श्री गणेशाची पितांबर नेसवून सालंकृत पोशाख पूजा ;  नवरात्रात विनायकी चतुर्थीला टिपऱ्या खेळण्याची परंपरा
पुणे : ग्रामदैवत श्री कसबा गणपती मंदिरात अश्विन शु. चतुर्थी म्हणजेच नवरात्री मधील विनायकी चतुर्थी वेगळ्या पद्धतीने साजरी करण्याची परंपरा आहे. यानिमित्ताने  श्री गणेशाची पितांबर नेसवून सालंकृत पोषाख पूजा करून मोरयासमोर ठकार पुजारी, विश्वस्त आणि परिसरातील गणेशभक्तांनी गुलाल उडवत टिपऱ्यांचा खेळ खेळला.

यावेळी ग्रामदैवत श्री कसबा गणपती देवस्थानाचे प्रमुख विश्वस्त विनायक बाजीराव ठकार, यांसह विश्वस्त मंडळ उपस्थित होते. नवरात्रीतील विनायकी चतुर्थी सकाळी शक्ती सांस्कृतिक समूहातर्फे महिलांनी अथर्वशीर्ष पठण व श्रीसुक्त पठण केले. अनिता बिरजे यांच्या मार्गदर्शनाखाली या कार्यक्रमाचे आयोजन केले होते. यावेळी मंदिराच्या माजी प्रमुख विश्वस्त संगीता ठकार उपस्थित होत्या. त्यानंतर दुपारी श्री गणेशाची पितांबर नेसवून सालंकृत पोषाख पूजा करण्यात आली होती.

रात्री प्रथेनुसार मंदिरात श्रीमन्महासाधू मोरया गोसावी यांनी रचलेल्या आरत्या म्हटल्या गेल्या. चिंचवड देवस्थान संचालित देवस्थानांव्यतिरित फक्त ग्रामदैवत श्री कसबा गणपती मंदिरात या आरत्या रोज मोठ्या श्रद्धेने म्हटल्या जातात. नवरात्रीसारख्या काही विशेष दिवसांसाठी टिपूरी घालती तुझे महाद्वारी हो, आनंदले भक्त नाचती गर्जती हो…. हे श्रीमन्महासाधू श्री मोरया गोसावी यांनी रचलेले टिपऱ्या पद म्हटले जाते.

रात्री आरतीच्या वेळी ग्रामदैवत श्री कसबा गणपती मंदिरात मोरयासमोर ठकार पुजारी, विश्वस्त आणि परिसरातील गणेशभक्तांनी गुलाल उडवत टिपऱ्यांचा खेळ खेळला. नवरात्रात विनायकी चतुर्थी ला टिपऱ्या खेळण्याची ही परंपरा गेल्या अनेक वर्षांपासून सुरू असून आजतागायत चालूच आहे. या पदावेळी पुजारी प्रमोद ठकार यांनी कसबा गणपती समोर पारंपरिक नृत्यसेवा अर्पण केली. तर, दृष्टीच्या पदावेळी पुजारी सीमा ठकार यांनी गणपतीची दृष्ट देखील काढली.

आरती समाप्तीला वर्धन ठकार यांनी पंचारती ओवाळून शेजारती संपन्न केली. या संपूर्ण कार्यक्रमाचे संचालन मंदिराचे प्रमुख विश्वस्त विनायक बाजीराव ठकार यांच्या प्रमुख उपस्थितीत आणि मार्गदर्शनात झाले. याप्रसंगी ओंकार ठकार, अनय ठकार, अमेय ठकार, विक्रम ठकार, वरद ठकार, सुधा ठकार, अश्विनी ठकार आणि गणेशभक्त मोठ्या संख्येने उपस्थित होते.

पौरोहित्य पुरोहित फाउंडेशन च्या वतीने सनातन वेद रक्षक आणि हिंदू स्वाभिमान रक्षक पुरस्कार प्रदान

पुणे : आपण आपसात भांडत बसलो तर त्याचा फायदा बाहेरचेच घेतील. म्हणून बंधुत्वाची भावना टिकवणे गरजेचे आहे. सण, उत्सव, जयंती आणि पुण्यतिथी आपण ज्या पद्धतीने साजरे करतो त्यावरून आपली संस्कृती टिकेल की नाही हे ठरते. आज नवरात्र उत्सवात द्विअर्थी गाणी लावली जातात, हे संतापजनक आहे. पुढील पिढी योग्य पद्धतीने धर्माची उपासना करणारी आणि संस्कारित व्हावी, यासाठी प्रयत्न करणे आवश्यक आहे, असे मत खासदार प्रा. डॉ. मेधा कुलकर्णी यांनी व्यक्त केले.

पौरोहित्य पुरोहित फाउंडेशन च्या वतीने सनातन वेद रक्षक व हिंदू स्वाभिमान रक्षक पुरस्कार वितरण सोहळा आणि धर्मचैतन्य मासिक प्रकाशन समारंभाचे आयोजन केसरी वाड्यातील लोकमान्य सभागृहात करण्यात आले होते. यावेळी सनातन वेद रक्षक पुरस्कार काळाराम मंदिर नाशिकचे गुरुवर्य महंत सुधीरदास महाराज यांना तर हिंदू स्वाभिमान रक्षक पुरस्कार आमदार महेश लांडगे यांना प्रदान करण्यात आला. कार्तिक लांडगे यांनी महेश लांडगे यांच्या वतीने पुरस्कार स्वीकारला. 

यावेळी अवधूत शास्त्री उंडे, अशोक कुलकर्णी, भालचंद्र कुलकर्णी, शिवाजी जांभळे, दत्तात्रय कामठे, कुंदन निकम, विश्वजीत देशपांडे, कुणाल टिळक, शाम कुलकर्णी,  मयुरेश अरगडे, मंदार रेडे, मनोज तारे, चैतन्य जोशी, दिवेकर गुरुजी, हेमंत कापरे उपस्थित होते. तसेच कार्यक्रम प्रसंगी महेश जोशी, राहुल भाले, अनिल पुराणिक, नंदकुमार अलाटे, चैतन्य कुलकर्णी, दिपाली कुलकर्णी, अश्विनी जोशी, नंदिनी पुरंदरे, मृण्मयी कुलकर्णी, तृप्ती लाळे, माधवी लाळे, सचिन कुलकर्णी हे देखील उपस्थित होते.  

प्रा.डॉ.मेधा कुलकर्णी म्हणाल्या, सनातन धर्मात मूळतः जातीव्यवस्था नव्हती. इंग्रजांच्या कारकिर्दीत त्याची विकृती झाली. जन्माने नव्हे तर विद्या आणि संस्कारांनीच कोणीही ब्राह्मण ठरतो. म्हणूनच आपल्याला बुद्धी सापेक्ष विचार करून धर्माशी प्रामाणिक राहायला हवं. आपला हिंदू धर्म नित्य नूतन सर्वांना सामावून घेणारा आहे. जगातील सगळ्यात प्राचीन धर्म हिंदू धर्मच आहे.

धर्म आहे तिथेच चैतन्य असते. बाकी कुठल्याही गोष्टीत इतके चैतन्य दिसत नाही. वक्फ बोर्डाच्या निमित्ताने किती भयानक परिस्थिती निर्माण झाली आहे हे लक्षात आले आणि प्रश्न पडतो हिंदू इतके दिवस झोपले होते का? असा प्रश्न पडला.

महंत सुधीरदास महाराज म्हणाले, प्रत्येक शाखेला उपनिषद, ब्राह्मण, संहिता, श्रौतसूत्र, सामान्य सूत्र हे  नेमून दिलेले आहेत. त्या त्या शाखेच्या ब्राह्मणांनी गुरु शिष्य परंपरेतून ते शिकवले पाहिजेत म्हणजे ते सुरक्षित होतात.

पौरोहित्य पुरोहित फाऊंडेशन चे अध्यक्ष आणि धर्मचैतन्य मासिकाचे संपादक शामराव कुलकर्णी म्हणाले, मंदिरातील पुरोहितांना मानधन देण्यात यावे त्यामुळे पुरोहितांना बळ मिळेल. शहरातील पुरोहितांची परिस्थिती  ठीक असली तरी गावांमधील पुरोहितांची परिस्थिती अत्यंत अवघड आहे, त्यांना तिथे काम मिळत नाही. अशा परिस्थितीत त्यांना मानधन देणे किंवा पेन्शन सुरू करणे अत्यावश्यक आहे, अशी मागणी त्यांनी केली. मिलिंद कुलकर्णी यांनी सूत्रसंचालन केले.

हत्या, गोळीबारसह अनेक गंभीर गुन्हे दाखल
पुणे- शैक्षणिक, सांस्कृतिक राजधानी अशी ओळख असलेले पेन्शनरांचे पुणे आता गुन्हेगारीचा अड्डा बनला असल्याचे बोलले जात आहे. काही दिवसांपासून पुणे पोलिसांनी छोट्या-मोठ्या गुंडांची धिंड काढत अटक करण्याचे सत्र सुरू केले असतानाच कुख्यात गुंड नीलेश घायवळ मात्र परदेशात पळून गेल्याचे वृत्त पसरले आणि पोलीस दलात एकच खळबळ माजली काही दिवसांपूर्वी कोथरूड येथे गोळीबार झाला होता, या प्रकरणी नीलेश घायवळवर मकोका अंतर्गत कारवाई करण्यात येणार आहे. मात्र, त्यापूर्वीच नीलेश घायवळ परदेशात पळून गेला असल्याचे वृत्त पसरले.

कोथरूड गोळीबार प्रकरणानंतर पुन्हा एकदा घायवळ टोळी सक्रिय झाल्याची चर्चा सुरू झाली आहे. तसेच या टोळीचा म्होरक्या कुख्यात गुंड नीलेश घायवळ याच्यावर मकोका अंतर्गत कारवाई करण्यात येणार आहे. परंतु, नीलेश घायवळ लंडनला पळून गेल्याची माहिती पोलिसांच्या तपासातून समोर आली असे सांगितले जाते आहे. पण या घटनेमुळे नीलेश घायवळला पासपोर्ट मिळाला तरी कसा? असा प्रश्न उपस्थित होत आहे. यावर घायवळने पासपोर्ट जमाच केला नसल्याचे पोलिसांनी सांगितले आहे.

कोथरूड गोळीबार प्रकरणी नीलेश घायवळ याच्यासह इतर 10 जणांवर पोलिस आयुक्त अमितेश कुमार यांनी महाराष्ट्र संघटित गुन्हेगारी विरोधी कायद्यानुसार कारवाई केली आहे. कोथरूड पोलिस ठाण्यापासून अवघ्या 100 ते 200 मीटर अंतरावर एका तरुणावर गोळीबार करण्यात आला होता. या प्रकरणी आरोपी मयूर गुलाब कुंबरे, राऊत, चदिलकर, फाटक, व्यास यांना अटक करण्यात आली असून इतर आरोप फरार आहेत. त्यांचा तपास सुरू असून नीलेश घायवळ सुद्धा आता परदेशात पळून गेला असल्याचे वृत्त पसरले आहे.

नीलेश घायवळ याने आपले पासपोर्ट जमा केले नसल्याचे पोलिसांनी सांगितले आहे. नीलेश घायवळ हा उच्चशिक्षित गुंड असून त्याच्यावर अनेक गुन्हे दाखल आहेत. हत्या, खंडणी, अपहरण, मारामारी यासारखे गंभीर गुन्ह्यांची नोंद घायवळवर आहे. आता नीलेश घायवळवर लूकआऊट नोटीस जारी करण्यात आली असून भारतात परत येताच त्याला अटक करण्यात येईल, असे पोलिसांनी स्पष्ट केले आहे. तसेच नीलेशने गुन्हेगारी क्षेत्रातून मोठ्या प्रमाणावर पैसा कमावला असून त्याचे लंडनमध्ये सुद्धा घर आहे. त्याचा मुलगा सुद्धा हायफाय शाळेत शिक्षण घेत असल्याचे पोलिसांनी सांगितले आहे.

कोथरुड येथे एका क्षुल्लक वादातून गोळीबाराची घटना घडली होती. मुठेश्वर मित्र मंडळासमोर 17 सप्टेंबर रोजी रात्री 11.40 वाजता रस्त्यावर गप्पा मारत थांबलेल्या लोकांनी दुचाकीला जाण्यासाठी जागा दिली नाही, या कारणावरून झालेल्या वादावादीतून प्रकाश मधुकर धुमाळ (36, रा. थेरगाव) नावाच्या तरुणावर गोळी झाडण्यात आली, ज्यात तो जखमी झाला. यानंतर, याच आरोपींनी एका जुन्या वादातून आणखी एका व्यक्तीच्या मानेवर कोयत्याने वार करून त्याला गंभीर जखमी केले. या दोन्ही गंभीर घटनांप्रकरणी कोथरूड पोलिस ठाण्यात दोन स्वतंत्र गुन्हे दाखल करण्यात आले आहेत. या प्रकरणी नीलेश घायवळसह इतर 10 जणांवर गुन्हा दाखल करण्यात आला आहे.

विधान परिषदेचे सभापती राम शिंदेंसोबत नीलेश घायवळ–कोथरूड गोळीबार प्रकरणानंतर राष्ट्रवादी कॉंग्रेस शरद पवार गटाचे आमदार रोहित पवारांनी टीका करत एक ट्विट केले होते. त्यांनी म्हटले होते की, विधान परिषदेचे सभापती प्रा. राम शिंदे ज्या गुंडाला राजरोसपणे विधानभवनात घेऊन फिरतात त्याच्या टोळीने गाडीला साईड न दिल्याच्या रागातून पुण्यात (कोथरुड) भर रस्त्यात गोळीबार करून एका वाहनचालकाला जखमी केले. आता गृहमंत्री आणि मुख्यमंत्री या गुंडाच्या टोळीवर काय कारवाई करतात की हा गुंड विधानपरिषदेच्या सभापती महोदयांचा खास माणूस आहे म्हणून त्याला हमखास पाठीशी घालतात, हेच पहायचे आहे! या कारवाईनंतर हे सरकार सामान्य माणसाचे आहे की गुंडांचे हे कळणार आहे, असे त्यांनी म्हटले होते.

ना. चंद्रकांतदादा पाटील यांच्याकडून कोथरुड मधील ३००० पेक्षा जास्त कन्यांचे पूजन

पुणे-भारतीय संस्कृतीत स्त्रीला प्रथम स्थान दिलं असून, तिची पूजा केली पाहिजे, असे प्रतिपादन राज्याचे उच्च व तंत्रशिक्षण मंत्री आणि कोथरुडचे आमदार चंद्रकांतदादा पाटील यांनी केले. तसेच, मुलींना वेगवेगळ्या क्षेत्रात पुढे जाण्यासाठी प्रोत्साहन दिलं गेलं पाहिजे, असे आवाहन ही त्यांनी यावेळी केले.प्रतिवर्षी प्रमाणे नवरात्रौत्सवानिमित्त ना. चंद्रकांतदादा पाटील यांच्या पुढाकारातून कन्यापूजन कार्यक्रमाचे आयोजन करण्यात आले होते. या सोहळ्यात ३००० पेक्षा जास्त कन्यांचे पूजन करण्यात आले.

यावेळी कार्यक्रमाच्या संयोजिका आणि पुणे शहर चिटणीस प्रा. डॉ. अनुराधा येडके, पुणे जिल्हा नियोजन समिती सदस्य डॉ. संदीप बुटाला, भाजप कोथरुड मध्य मंडल महिला मोर्चा अध्यक्षा हर्षाली माथवड, माजी नगरसेविका मंजुश्री खर्डेकर, वासंती जाधव, वृषाली चौधरी, छाया मारणे, ॲड. मिताली सावळेकर, राज तांबोळी, गिरीश खत्री, अजित जगताप, दीपक पवार, अनिता तलाठी, प्राची बगाटे, पूनम कारखानिस, अपर्णा लोणारे, सुजाता जगताप यांच्यासह भाजपचे इतर पदाधिकारी आणि महिला मोठ्या संख्येने उपस्थित होत्या.

ना. पाटील म्हणाले की, भारतीय संस्कृतीत स्त्रीला प्रथम स्थान दिलं गेलं असून तिची पूजा केली जाते. आपण आजही बुद्धीची देवता सरस्वती, महालक्ष्मी, शक्तीस्वरुपा जगदंबेची नेहमीच पूजा करतो. ही सर्व स्त्रिचीच रुपे आहेत. पण पुरुषी मानसिकतेमुळे स्त्रियांना दुय्यम स्थान दिले जाते. कारण, स्वातंत्र्यपूर्व काळात परकीय आक्रमकांपासून स्त्रियांचे रक्षण करण्यासाठी तिला घरातच बंदिस्त केले. स्वातंत्र्य प्राप्तीनंतर तिला आपण पुन्हा बाहेर आणले नाही. चूल आणि मूल यामध्येच ती अडकली होती.

मात्र २०१४ पासून हे चित्र बदलते आहे. आज स्त्रिया प्रत्येक क्षेत्रात आपला ठसा उमटवत आहेत. तिला उच्च शिक्षणामध्ये प्रोत्साहन देण्यासाठी राज्य सरकारने आर्थिक दुर्बल कुटुंबातील मुलींना फी माफीचा निर्णय घेतल्याने मुलींचे उच्च शिक्षणातील प्रमाण वाढते आहे. विविध विद्यापीठांमध्ये पीएचडी धारकांमध्ये मुलांपेक्षा मुलींचे प्रमाण जास्त आहे. त्यामुळे स्त्रियांना वेगवेगळ्या क्षेत्रात पुढे जाण्यासाठी प्रोत्साहन दिलं गेलं पाहिजे, असे आवाहन त्यांनी यावेळी केले.

ते पुढे म्हणाले की, कोथरुड मतदारसंघात मानसी उपक्रमाच्या माध्यमातून आर्थिक दुर्बल कुटुंबातील मुलींच्या व्यक्तिमत्व विकासावर भरल दिला आहे. सुखदा उपक्रमाच्या माध्यमातून आर्थिक दुर्बल कुटुंबातील गरोदर महिलांच्या आरोग्याची काळजी घेतली जात आहे. उद्योग सुरु करण्यासाठी महिला बचत गटांना मदत केली जात आहे, असे एकना अनेक उपक्रमाच्या माध्यमातून कोथरुड मधील महिलांना मदत केली जात आहे, अशी भावना त्यांनी यावेळी व्यक्त केली.

पुणे – शिवदर्शन–सहकारनगर परिसरातील श्री लक्ष्मीमाता मंदिर नवरात्रौनिमित्त सजले असून, लक्षावधी दिव्यांच्या प्रकाशात उजळून निघणारा ‘मीनाक्षीपुरम मंदिर’ देखावा विशेष आकर्षण बनला आहे. हजारो भक्तांची येथे गर्दी उसळत असून, श्री लक्ष्मीमाता मनोकामना पूर्ण करते अशी भाविकांची श्रद्धा आहे. संपूर्ण मंदिराला नव्या रंगाने झळाळी आली आहे. मंदिराभोवती आकर्षक भव्य कमानी उभारण्यात आल्या असून, प्रशस्त मंडपही उभारण्यात आला आहे. मंदिरावर एलईडी लाइट्ससह आकर्षक विद्युतरोषणाई करण्यात आली असून, साकारण्यात आलेला ‘मीनाक्षीपुरम मंदिर’ देखावा १००हून अधिक कारागिरांनी सुमारे १ महिना कष्टपूर्वक तयार केला आहे. विविध नैसर्गिक सुवासिक लाखो फुलांची आरास मंदिरावर दररोज केली जाते आहे . मंदिराचे प्रांगण आकर्षक रांगोळीने रोज सजविले जाते आहे .

मंदिरातील श्री लक्ष्मीमातेची संगमरवरी मूर्ती अधिक तेजोमय दिसत आहे. येथे पूजा व आरती रोज होत असून, धूप व उदबत्त्यांच्या मधुर वासामुळे साऱ्या मंदिर परिसरात मांगल्याचे वातावरण निर्माण झाले आहे. घटस्थापनेच्या दिवशी येथे घटस्थापना पुणे नवरात्रौ महोत्सवाचे आयोजक अध्यक्ष आबा बागुल व पुणे नवरात्रौ महिला महोत्सवाच्या अध्यक्षा सौ. जयश्री बागुल यांच्या हस्ते विधिवत संपन्न झाली. तसेच मीनाक्षीपुरम मंदिराच्या प्रतिकृतीचेही उद्घाटन करण्यात आले. श्री लक्ष्मीमातेला सोन्याचा मुकुट, विविध सोन्याचे दागिने व सोन्याची आभूषणे यांसह चांदीची साडी यांनी सजविण्यात आले आहे.

येथे रोज सकाळी व संध्याकाळी श्री लक्ष्मीमातेची आरती, तसेच प्रसादवाटप होत असून, नवरात्रौच्या कालावधीत रोज अनेक महिला मंडळांची भजने संपन्न होत आहेत. अष्टमीला होमही करण्यात येणार आहे. हे मंदिर भाविकांसाठी रोज सकाळी ६.०० ते रात्री १०.००पर्यंत खुले असणार आहे. सुरक्षेच्या दृष्टीने येथे कॅमेरे बसविण्यात आले असून, पोलीस बंदोबस्तही चोख आहे. याच मंदिराच्या प्रांगणात पुणे नवरात्रौ महिला महोत्सवाचे कार्यक्रम व स्पर्धा होत आहेत, अशी माहिती पुणे नवरात्रौ महोत्सवाचे आयोजक अध्यक्ष आबा बागुल यांनी दिली.

पुणे-येथील काळेपडळ पोलीसांनी वरीष्ठ पोलीस निरीक्षक मानसिंग पाटील यांच्या प्रमुख उपस्थितीत महापालिकेच्या मदतीने कुख्यात गुंड रिझवान ऊर्फ टिपु सत्तार पठाण याच्या अनाधिकृत ऑफीसचे बांधकाम जेसीबी लावून भुईसपाट केले आहे
कुख्यात गुंड रिझवान ऊर्फ टिपू सत्तार पठाण, रा. सय्यदनगर, हडपसर, पुणे याचेवर काळेपडळ पोलीस स्टेशन येथे गु. र. नं. १००/२०२५ भा.न्या.स. कलम ३०८ (२), ३२९(३), ३५१(२), ३५२, १८९(१), १८९(२), १९१(२) महाराष्ट्र संघटीत गुन्हेगारी नियंत्रण कायदा (मोक्का) कलम ३(१) (II), ३(२), ३(४), २३ (१) अन्वये दाखल असून त्यास गुन्ह्यात अटक करण्यात आली आहे.
कुख्यात गुंड टिपु पठाण याचे वर्चस्व असलेल्या हडपसर येथील सय्यदनगर भागात बेकायदेशीर बांधकाम केलेले ऑफीस, टपरी व इतर अनाधिकृत अतिक्रमण बाबत काळेपडळ पोलीसांनी माहिती प्राप्त करुन सय्यदनगर येथील ख्वाजा मंजील इमारतीवर त्याने अनाधिकृतपणे बांधकाम केलेले ऑफीस, टपरी व इतर अनाधिकृत बांधकामावर आज दिनांक २६/०९/२०२५ रोजी काळेपडळ पोलीस स्टेशन व अतिक्रमण विभाग, पुणे महानगरपालिका यांनी संयुक्त कारवाई करुन बेकायदेशीर बांधकामावर कारवाई करुन जमीनदोस्त केले.
सदरची कारवाई पोलीस आयुक्त, पुणे शहर यांचे मार्गदर्शनाखाली पोलीस उप-आयुक्त परिमंडळ-५, पुणे शहर, सहा पोलीस आयुक्त, वानवडी विभाग, पुणे शहर, वरिष्ठ पोलीस निरीक्षक, काळेपडळ पोलीस स्टेशन, पोलीस निरीक्षक (गुन्हे), काळेपडळ पोलीस स्टेशन व काळेपडळ पोलीस स्टेशनकडील अधिकारी व अंमलदार व अतिक्रमण विभाग, पुणे महानगरपालिका यांच्या मदतीने करण्यात आली आहे.

पुणे-गेल्या दोन दिवसांपूर्वी कल्याण येथे दुर्दैवी घटना घडली. पंतप्रधान नरेंद्र मोदी यांच्या विरोधात पोस्ट व्‍हायलर केली म्हणून काँग्रेस पक्षाचे निष्ठावंत कार्यकर्ते (ज्येष्ठ नागरिक) प्रकाश उर्फ मामा पगारे यांच्यावर भारतीय जनता पक्षाशी संबधित असलेल्या ८ ते १० गुंड प्रवृतीच्या कार्यकर्त्यांनी हल्ला केला व त्यांना भर रस्त्यात साडी नेसवून त्यांचा अपमान केला. पगारे हे मागासवर्गीय समाजाचे आहेत, त्यांना एकटे गाठून या भाजपाच्या गुंडानी त्यांच्यावर हल्ला केला ही गंभीर स्वरूपाची घटना असून पोलीसांनी कोणतीही कारवाई केली नाही ही अत्यंत दुर्दैवी व लाजिरवाणी बाब आहे. या घटनेचा काँग्रेस पक्षाच्या वतीने तीव्र निषेध करण्यात आला.

कल्याण सारखी घटना पुणे शहरामध्ये घडू नये व या गुंडावर तातडीने कडक कारवाई व्‍हावी यासाठी आज पुणे शहर जिल्हा काँग्रेस कमिटीच्या वतीने पुणे शहराचे जिल्हाधिकारी व पोलीस आयुक्त यांना निवेदन सादर करण्यात आले.निवासी जिल्हाधिकारी ज्योती कदम यांना निवेदन देण्यात आले. यावेळी भाजपाच्या गुंड प्रवृत्तीच्या कार्यकर्त्यांवर त्वरीत कारवाई न झाल्यास पुणे शहर काँग्रेस कमिटीच्या वतीने रस्त्यावर उतरून तीव्र आंदोलन करण्यात येईल असा इशारा शहराध्यक्ष अरविंद शिंदे यांनी या निवेदनाद्वारे दिला आहे.

      यावेळी पुणे शहर काँग्रेसचे अध्यक्ष अरविंद शिंदे यांच्या समवेत माजी आमदार दिप्ती चवधरी, माजी नगरसेवक अजित दरेकर, रफिक शेख, अनुसूचीत जाती विभागाचे अध्यक्ष सुजित यादव, प्राची दुधाणे, राज अंबिके, फिरोज शेख, मुन्ना खंडेलवाल, कुणाल चव्‍हाण आदी उपस्थित होते. 

पुणे-संगीत नाटकांना पुनर्जिवन करून नवसंजीवनी देण्याचे महत्त्वपूर्ण काम जयमाला शिलेदार यांनी केले. त्यांच्या जन्मशताब्दी वर्षानिमित्त स्मरण करताना त्यांचे अमूल्य योगदान मराठी रसिक सदैव लक्षात ठेवतील, अशा भावना ३१व्या पुणे नवरात्रौ महोत्सवाचे आयोजक अध्यक्ष आबा बागुल आणि गायिका राधिका अत्रे, राजेश्वरी पवार, कविता सेंगर, चारुलता पाटणकर यांनी व्यक्त केले. पुणे नवरात्रौ महोत्सवातील ‘स्वर सम्राज्ञीयाँ’ या कार्यक्रमाच्या प्रारंभी जयमाला शिलेदार यांना जन्मशताब्दी वर्षानिमित्त गणेश कला क्रीडा रंगमंचा येथे झालेल्या कार्यक्रमात आदरांजली वाहण्यात आली.

यावेळी संयोजक आबा बागुल व गायिका राधिका अत्रे, राजेश्वरी पवार, कविता सेंगर, चारुलता पाटणकर यांनी जयमाला शिलेदार यांच्या प्रतिमेचे पूजन करून त्यांना आदरांजली वाहिली.

यानंतर नामांकित गायिका राधिका अत्रे निर्मित महिला गायिकांचा ‘स्वर सम्राज्ञीयाँ’ या विशेष कार्यक्रमाचे आयोजन करण्यात आले. राधिका अत्रे, राजेश्वरी पवार, कविता सेंगर, चारुलता पाटणकर या प्रसिद्ध गायिकांनी विविध सुरेल गाण्यांचे माध्यमातून रसिकांची मने जिंकली.  शिलेदार यांचे प्रसिद्ध “पारिजात फुलला अंगणी..” हे गाणे गात गायिका राजेश्वरी पवार यांनी कार्यक्रमाची सुरेख सुरुवात केली. सरस्वती स्तोत्र गायन नंतर “सांचा नाम तेरा” …”बचपन के दिन भूला न देना”.. काहे तरसाये”.. “हुजुरेवाला”.. गाण्याने कार्यक्रमाची रंगत वाढत गेली.”तुमको पिया दिल दिया”..या गाण्यास रसिकांनी वन्स मोअर म्हणत कलाकारांचा उत्साह वाढवला. १९५५ सालच्या “आपलम चपलम” गाण्याला गायकांनी गाताच रसिकांच्या जुन्या आठवणी जाग्या झाल्या आणि सभागृहात टाळ्यांचा कडकडाट झाला. गायिका राधिका यांनी एकाचवेळी पहाडी आणि नाजूक अशा दोन आवाजात गायलेले ” तेरे महेफिल मे”.. गाणे प्रेक्षकांच्या चांगल्याच पसंतीस उतरल्याचे पहावयास मिळाले. निवेदिका प्राजक्ता मांडके यांनी कार्यक्रमाचे सूत्रसंचालन माध्यमातून विविध गाण्यांचे महत्त्व स्पष्ट करत संपूर्ण कार्यक्रमात रंगत आणली.या कार्यक्रमात वादक अमन सैय्यद,ओमकार पाटणकर (सिंथेसायझर), विशाल थेलकर (गिटार), निशित जैन (बासरी), केविन (ड्रम्स),अजय अत्रे (रीदम मशीन, ऑक्टोपॅड),हर्षद गनबोटे (तबला, परकशन),रोहित जाधव (ढोलक),अमित सोमण, राकेश जाधव (साऊंड इंजिनिअर) यांनी सहाय्य केले.

याप्रसंगी जयश्री बागुल, निवृत्त अभियंता सतीश मानकामे, घनश्याम सावंत, रमेश भंडारी, नंदकुमार बानगुडे, नंदकुमार कोंढाळकर,अमित बागुल, सागर बागुल उपस्थित होते.

पुणे- दसरा दिवाळीच्या तोंडावर महापालिकेच्या अतिक्रमण कारवाईने कोंढवा येथे वेग घेतला आहे. कोंढवा बुद्रुक व येवले वाडी येथील फ्रंट मार्जिन, साईड मार्जिन मधील पत्राशेड वजा दुकाने, लहान टपऱ्या तसेच अनधिकृत दुकाने व हॉटेलसारख्या अनधिकृत बांधकामांवर बांधकाम विकास विभाग झोन क्र. 02 व कोंढवा येवले वाडी क्षेत्रीय कार्यालय अतिक्रमण विभाग यांचे संयुक्त कारवाई च्या अनुषंगाने पोलिस कर्मचारी, महाराष्ट्र सुरक्षा बल च्या मदतीने कारवाई करण्यात आली. या कारवाई दरम्यान एकूण 17,800चौरस फूट फ्रंट मार्जिन, साईड मार्जिनअनधिकृत क्षेत्र पाडून टाकण्यात आले .
हा कारवाई महापालिकेचे अधीक्षक अभियंता व बांधकाम विभाग झोन क्र. 02 च्या कार्यकारी अभियंत्यांच्या मार्गदर्शनाखाली उप अभियंता, कनिष्ठ अभियंता तसेच सहाय्यक आयुक्त यांचे मार्गदर्शनाखाली अतिक्रमण निरीक्षक, सहाय्यक अतिक्रमण निरीक्षक व इतर कर्मचारी, सहाय्यक पोलिस निरीक्षकांनी केली.
यात 1 जेसीबी, एक गॅस कटर, १० अतिक्रमण कर्मचारी अशी यंत्रणा वापरण्यात आली.