पुणे : ’शेजारचा सखासोबती’ अशी मोहक प्रतिमा निर्माण करणारा अभिनेता आणि स्त्रीच्या
संवेदनशील व्यक्तिरेखांचा विस्तार करणारा तरल चित्रपट दिग्दर्शक म्हणून
नावलौकिक मिळविलेल्या अमोल पालेकर यांना आशय फिल्म क्लबतर्फे ‘झेनिथ एशिया सन्मान’
प्रदान करण्यात येणार आहे.
9वा आशियाई चित्रपट महोत्सव दि. 24 ते 30 डिसेंबर दरम्यान पर्यटन आणि
सांस्कृतिक कार्य विभाग, महाराष्ट्र शासन यांच्या सहकार्याने आणि राष्ट्रीय
चित्रपट संग्रहालय आणि फेडरेशन ऑफ फिल्म सोसायटीज ऑफ इंडिया, एशियन फिल्म
फौंडेशन, मुंबई तसेच डेक्कन एज्युकेशन सोसायटीच्या फिल्म अँन्ड टेलिव्हीजन
इन्स्टिट्यूटच्या सक्रीय सहयोगाने रंगणार आहे. या महोत्सवाचे उदघाटन
सोमवार दि. 24 डिसेंबर रोजी राष्ट्रीय पुरस्कारप्राप्त प्रख्यात आसामी आणि
हिंदी चित्रपट दिग्दर्शक जानू बरूआ यांच्या हस्ते होणार असून, उदघाटनानंतर
संध्याकाळी ७.०० वाजता, काझीम ओझ दिग्दर्शित ’झेर’ हा तुर्की चित्रपट
उद्घाटनाचा चित्रपट म्हणून दाखविण्यात येणार आहे. या महोत्सवानिमित्त
देण्यात येणारा ‘झेनिथ एशिया सन्मान अमोल पालेकर
यांना नवसिनेमाचे प्रणेते कुमार शाहनी यांच्या हस्ते प्रदान करण्यात येणार
आहे. तसेच दिग्दर्शक गजेंद्र अहिरे यांचा विशेष सन्मान करण्यात येणार आहे.
मंगळवार दिनांक २५ डिसेंबर रोजी संध्याकाळी ६.३० वाजता, अर्काइव्ह थिएटर,
लॉ कॉलेज रोड, पुणे येथे
हा पुरस्कार वितरण सोहळा होणार आह, अशी माहिती आशय फिल्म क्लबचे प्रमुख
आणि ९व्या आशियाई चित्रपट महोत्सवाचे संयोजक सतीश जकातदार आणि वीरेंद्र
चित्राव यांनी आज आयोजित पत्रकार परिषदेत दिली.
या सात दिवसीय चित्रपट
महोत्सवात विविध विभाग करण्यात आले असून, चित्रपटांमधील कलावंत आणि
दिग्दर्शक यांच्याशी संवाद आणि खुली चर्चा हे या महोत्सवाचे विशेष आकर्षण
असणार आहे. त्यातील ‘इंडियन व्हिस्टा’ या विभागात गेल्या दोन वर्षात
राष्ट्रीय स्तरावर गाजलेले भारतीय भाषांमधील चित्रपट दाखविण्यात येणार
आहेत. त्यामध्ये बंगाली, आसामी, मल्याळम, ओडिया, मणीपुरी अशा विविध
भाषांमधील चित्रपटांचा समावेश आहे. ‘ऑफबीट बॉलीवूड’ या विभागात २०१७-१८
या वर्षातील लव्ह अँन्ड शुक्ला, तीन मुहर्त, भोर हे वेगळ्या धाटणीचे
चित्रपट पाहता येणार आहेत. ‘सिंहावलोकन’ या विभागात डॅन वुल्मन या
इस्रायली दिग्दर्शकाच्या चित्रपटांचा समावेश करण्यात आला आहे. डॅन वुल्मन
यांना गोवा चित्रपटमहोत्सवात जीवनगौरव पुरस्कार प्रदान करण्यात आल्याच्या
निमित्त त्यांचा सन्मान म्हणून त्यांचे चित्रपट दाखविण्यात येणार आहेत. तर
मराठी चित्रपट सृष्टीवर राज्य करणारे पु.ल. देशपांडे, ग.दि. माडगुळकर आणि
सुधीर फडके यांच्या जन्मशताब्दिनिमित्त त्यांना आदरांजली म्हणून या तिघांचा
‘जोहार मायबाप जोहार’ हा संतपट दाखविला जाणार आहे. या महोत्सवात
रसिकांना चार नवीन इराणी चित्रपटांचा आणि गतवर्षात गाजलेल्या ‘फर्जंद’,
‘कुलकर्णी चौकातला देशपांडे’, ‘पुष्पक विमान’ आणि ‘आरॉन’ या मराठी
चित्रपटांचा आस्वाद घेता येणार आहे. ‘स्पेक्ट्रम एशिया’ विभागात वेगवेगळ्या
आशियाई देशातील संस्कृती आणि जीवनशैली मांडणारे आठ चित्रपट दाखविले जाणार
आहेत.
या महोत्सवाचा समारोप प्रसिद्ध अभिनेते आणि दिग्दर्शक सुबोध भावे
आणि आशियाई फाऊंडेशनचे अध्यक्ष किरण व्ही. शांताराम यांच्या प्रमुख
उपस्थितीत रविवार दिनांक ३० डिसेंबर रोजी, संध्याकाळी ६.३०वाजता होणार
आहे. या चित्रपट महोत्सवाची सांगता मिलिंद लेले दिग्दर्शित आणि मुक्ता
बर्वे, शरद पोंक्षे ’’अभिनीत बंदिशाळा’’ या नवीन चित्रपटाच्या प्रथम प्रदर्शनाने  होणार आहे

पुणे –
स्वच्छतेत पुण्याला अव्वल ठरविण्यासाठी कंबर कसलेल्या पुणे महानगरपालिकेला स्वच्छता सर्वेक्षणात सार्वजनिक मुताऱ्यांची दुरावस्था कशी काय दिसत नाही ? असा सवाल करून माजी उपमहापौर व महाराष्ट्र प्रदेश काँग्रेसचे प्रतिनिधी आबा बागुल यांनी ”स्मार्ट सिटीच्या गप्पा बंद करा ;आधी सार्वजनिक मुताऱ्यांची स्वच्छता सुधारा” अशा शब्दात पालिका प्रशासनाला सुनावले आहे. इतकेच नाही तर जर हा प्रश्न तातडीने सुटला नाही तर अधिकाऱ्यांना या मुताऱ्यांमध्ये कोंडून ठेवण्याचे आंदोलन करावे लागेल असा इशाराही त्यांनी दिला आहे.
यासंदर्भांत आयुक्तांना दिलेल्या पत्रात माजी उपमहापौर आबा बागुल यांनी म्हटले आहे कि, महापालिकेकडून स्वच्छ सर्वेक्षणची मोहीम सद्यस्थितीत जोमात सुरु आहे ;पण शहरातील विविध सार्वजनिक मुताऱ्यांची अवस्था काय ? याकडे या सर्वेक्षणात दुर्लक्ष होत आहे. या मुताऱ्यांची अवस्था इतकी खराब आहे कि, त्याचा वापर करणाऱ्या नागरिकांचे आरोग्य धोक्यात आहे अशी वस्तुस्थिती आहे. दुर्गंधी , घाण असूनही नागरिकांना नाइलाजास्तव त्याचा वापर करावा लागत आहे. एकप्रकारे नरकयातना भोगाव्यात अशी स्थिती या मुताऱ्यांची झाली आहे.केवळ नव्या सार्वजनिक मुताऱ्या उभारून हा प्रश्न सुटणार नाही तर आधी स्वच्छतागृहांचे सर्वेक्षण करण्याची गरज आहे. आरोग्य कोठीनिहाय या मुताऱ्यांच्या स्वच्छतेला प्राधान्य द्यावे. पाणी, स्वच्छता आणि देखभालसाठी तरतूद करून या मुताऱ्यांची स्थिती सुधारावी मग त्यानंतरच स्वच्छता सर्वेक्षण असो किंवा स्मार्ट सिटीच्या गप्पा माराव्यात. जर तात्काळ कार्यवाही न झाल्यास या दुर्गंधीयुक्त आणि आरोग्याला धोका निर्माण करणाऱ्या शहरातील या मुताऱ्यांमध्ये अधिकाऱ्यांना कोंडण्याचे आंदोलन करावे लागेल, असा इशारा आबा बागुल यांनी दिला आहे.

पुणे  :  चांदणी चौकातील नियोजित उड्डाणपूलाचे काम आठवडाभरात सुरू करण्याचे आदेश हैदराबाद येथील कंपनीला देण्यात आले आहेत. अशी माहिती पालकमंत्री गिरीश बापट यांनी शनिवारी पत्रकारांना दिली.

पालकमंत्री या नात्याने नवी दिल्ली येथे सतत पाठपुरावा केल्यानंतर केंन्द्रीय मंत्री नितीन गडकरी यांनी पुढाकार घेऊन विशेष बाब म्हणून या प्रकल्पाला मान्यता दिली. त्यामुळे  चांदणी चौकातील उड्डाणपूल व रुंदीकरणाचा प्रश्न मार्गी लागला आहे. नियोजित वेळेत हे काम पूर्ण होईल व तेथील वाहतूक कोंडी संपुष्टात येईल असा विश्वासही बापट यांनी व्यक्त केला.

ते म्हणाले की , हैदराबाद येथील एनसीसी या कंपनीला हे काम देण्यात आले आहे. तशी वर्क ऑर्डर भारतीय राजमार्ग राष्ट्रीय प्राधिकरणाने काल दिली. पहिल्या टप्प्यात तीनशे सत्याण्णव कोटी रूपयांची कामे पुर्ण करावे. असे आदेश एनसीसी कंपनीला देण्यात आले आहेत. कागदपत्रांची पूर्तता झाल्यावर येत्या आठवडाभरात हे काम सुरू होईल. चांदणी चौकाचे हे काम एकूण ४९५ कोटी रूपयांचे आहे. त्यासाठी लागणारे भूसंपादन महापालिकेने करायचे आहे. महापालिकेने एकूण पंचाऐंशी टक्के भूसंपादन यापूर्वीच केले आहे. उरलेल्या पंधरा टक्के भूसंपादनाची प्रक्रिया अंतीम टप्यात आहे. शंभर टक्के भूसंपादन झाल्याशिवाय केन्द्रीय महामार्ग खाते काम सुरू करण्यास तयार नव्हते. पालकमंत्री या नात्याने श्री गडकरी यांच्याशी चर्चा केल्यावर या प्रकल्पाला हिरवा कंदील मिळाला.

मुंबई पुणे,हिंजवडी  आयटी पार्क. बंगलोर हायवे या रस्यावरील वाहतूक अधिक गतिमान होण्यासाठी हा प्रकल्प उपयोगी पडेल. पुणेकरांना दिलेल्या आणखी वचनांची पूर्तता होत आहे याचा भारतीय जनता पक्षाला अभिमान वाटतो.

पुणे : भारत हा देश तत्वज्ञानाचा जन्मदाता देश म्हणून ओळखल्या जाणाऱ्या जगातील देशांपैकी एक देश आहे. संत ज्ञानेश्वर महाराज, स्वामी विवेकानंद यांच्या तत्वज्ञानातून जगाला शांतीचा संदेश आणि भारतीय संस्कृतीचे दर्शन घडत आहेत. भारतीय संस्कृती, ज्ञान, तत्वज्ञ, संस्कृती, परंपरा आणि जागतिक तत्वज्ञानाचे संगम या जगातील सर्वात भव्य गोल घुमटात झाल्याचे दिसून येते आहे. यामुळे भारतीय संस्कृती ही खऱ्या अर्थाने ज्ञानाचे दालन म्हणून जगापूढे येईल, असे प्रतिपादन हिंदुजा ग्रुपचे संस्थापक प्रकाश हिंदुजा यांनी केले.

एमआयटी वर्ल्ड पीस युनिव्हर्सिटी आणि एमआयटी आर्ट, डिझाईन आणि टेक्नॉलॉजी विद्यापीठ यांच्या संयुक्त विद्यमाने लोणी काळभोर येथे उभारण्यात आलेल्या जगातील सर्वात मोठ्या गोल घुमटातील सभागृहात झालेल्या कार्यक्रमात ते बोलत होते. यावेळी प्रकाश हिंदुजा यांच्या पत्नी सौ. कमल हिंदुजा, एमआयटी विश्वशाती विद्यापीठाचे संस्थापक अध्यक्ष डॉ. विश्वनाथ. दा. कराड, शहानी ग्रुपच्या प्रमुख माया शहानी, रुपमेक इलेक्ट्रीकल्स कंपनीचे अध्यक्ष उद्योजक नाणिक रुपानी, इंडिया अहेड न्यूज चॅनल आणि आंध्र प्रभा हैद्राबादचे संचालक गौतम मुथ्या, के. पी. बी हिंदुजा कॉलेजच्या प्राचार्या डॉ. मिनू मडलानी, विश्वशांती विद्यापीठाचे कार्याध्यक्ष प्रा. राहूल कराड आदी उपस्थित होते.

प्रकाश हिंदुजा म्हणाले, भारतीय संस्कृती ज्ञानाचे माहेरघर आहे. या देशातील अनेक संत-महंत आणि तत्वज्ञ यांनी जगाला विश्वशांती व मानव कल्याणाचा संदेश दिला आहे. हाच संदेश भविष्यातील नवतरुणांना अविरतपणे देण्याचे कार्य या जगातील सर्वात मोठ्या गोल घुमटाच्या माध्यमातून होत राहिल. तंत्रज्ञानाच्या बदलत्या काळात कोणत्याही तंत्रज्ञानाशिवाय केवळ मानवी मनुष्यबळाच्या सहाय्याने   उभारण्यात आलेला हा गोल घुमट एक अद्भूत आणि स्थापत्य कलेच दर्शन घडविणारा अद्भूत नमूना  आहे. व्हिजन आणि दूरदृष्टीचे दर्शन घडवत जागतिक स्तरावरील शिक्षण देण्याचे कार्य ही एमआयटी शिक्षण संस्थेच्या माध्यमातून  होत असल्याचे ही त्यांनी यावेळी सांगितले.

माया शहानी म्हणाल्या, भारत हा देश एकता आणि विविधतेने नटलेला देश आहे. येथे अनेक जाती-धर्मांचे नागरिक बंधुभावाने नांदतात. एकतेचे आणि विविधतेचे प्रतिक म्हणून भविष्यात हे जगातील सर्वात मोठे गोल घुमट ओळखले जाईल. भारतीय तत्वज्ञान आणि सांस्कृतिक शिक्षणाचे धडे भविष्यात या भव्य घुमटाच्या माध्यमातून नवतरुणांना मिळत राहिल.

डॉ. विश्वनाथ कराड म्हणाले, जगातील सर्वात मोठ्या गोल घुमटातील तत्वज्ञ संत श्री ज्ञानेश्वर महाराज सभागृहात उभारण्यात आलेल्या ५४ पुतळ्याच्या माध्यमातून जगाला विश्वशांतीचा संदेश देण्याचा कार्य होत राहिल. भारतीय संस्कृती, परंपरा आणि तत्वज्ञानाचे दर्शन या घुमटालामुळे जगाला मिळत राहिल. भारतीय संस्कृती आणि तत्वज्ञानाचे संगम या घुमटात झाल्याचे चित्र आहे.