रफींच्या बहारदार गीतांच्या मैफलीने श्रोते मंत्रमुग्ध
महक व म्युझिक इंडियातर्फे रफींच्या जन्मदिनानिमित्त ‘माधुर्य मधुरता’ कार्यक्रम
पुणे : दिल पुकारे आ रे आ रे… पर्बत के इस पार… गुलाबी आँखे… छुप गये सारे नजारे… बेखुदी में सनम.. निंदिया से जागी बहार… पत्ता पत्ता बुटा बुटा… कोयल बोली दुनिया डोली… या आणि अशा बहारदार गीतांनी शुक्रवारची सायंकाळ ‘रफीमय’ झाली. लतादीदी व रफी साहेबानी गायलेली एकूण २४ गाणी या कार्यक्रमात सादर झाली.
निमित्त होते, सुरांचा बादशहा मोहम्मद रफी यांच्या जन्मदिनानिमित्त महक व म्युझिक इंडिया यांच्या वतीने आयोजिलेल्या ‘माधुर्य मधुरता’ या युगुल गीतांच्या कार्यक्रमाचे. ज्यांच्या गायनात माधुर्य आणि मधुरता आहे, अशा मोहम्मद रफी आणि स्वरसम्राज्ञी लता मंगेशकर यांच्या युगुलगीतांची मैफल कोथरूड येथील यशवंतराव चव्हाण नाट्यगृहात रंगली. प्रसिद्ध गायिका मनीषा निश्चल आणि गफार मोमीन यांच्या जोडगोळीने रसिकांच्या मनावर मोहिनी घातली.
संगीत संयोजन सईद खान यांनी केले. गोविंद कुडाळकर (तबला), राजन साळवी (ढोलक), सचिन वाघमारे (बासरी), सईद खान (सिंथेसायझर), असिफ खान इनामदार (ऑक्टोपॅड) वर साथसंगत केली. संदीप पंचवाटकर यांच्या अर्थपूर्ण निवेदनाने मैफलीत रंगत आणली.