पुणे- महापालिकेतील कंत्राटी , सफाई , शिपाई ,प्रक्षिशीत संगणक कामगार , पाणीपुरवठा कामगार , खाजगी सुरक्षारक्षक कर्मचाऱयांवर होत असलेला अन्याय दूर करून कंत्राटी कामगारांना कायमस्वरूपी नोकरीत समाविष्ट करणे बाबत तसेच पुणे शहर जिल्ह्यातील गटई ( चर्मकार ) बांधवाचे प्रश्न व त्यांना बैठे परवाने (लायसन्स ) व स्टोल्स देण्याबाबत निवेदन देउनहि ठोस कारवाई न झाल्याने पुणे मनपातील कंत्राटी कामगार व पुणे शहर जिल्ह्यातील गटाई कामगारांचे प्रश्नाकडे शासनाचे लक्ष वेधून घेण्यासाठी पुणे महापालिका प्रवेश द्वारावर रिपब्लिकन संघर्ष दल महाराष्ट्र प्रदेश कृत रिपब्लिकन  कामगार संघटना व रिपब्लिकन चर्मकार आघाडीच्यावतीने प्रचंड निदर्शन आंदोलनकरण्यात आले . यामध्ये  रिपब्लिकन संघर्ष दलाचे नेते संजय भीमाले यांच्याहस्ते संघटनेच्या मागण्याचे निवेदन अतिरिक्त महापालिका आयुक्त रुबेला आगरवाल यांना देण्यात आले .

या रिपब्लिकन संघर्ष दलाचे पुणे शहराध्यक्ष नितीन बालकी  , अर्चना कांबळे , प्रतिभा केंगार , संजू बनसोड , शिवलाल चिंचोले , चंद्रकांत चव्हाण , विशाल आंदे , विजय वरछे , बंडू पुरुषोत्तम , किसन उतपुरे , शाम उतपुरे , भीमछावाचे अध्यक्ष शाम गायकवाड , संघर्षाचा आवाजचे संजय सोनवणे , विकास साळवे , जीवन गनपुरी ,गजानन बिजोरे  ,  जयपाल आंबीपुरे , गजानन अवसारे , पुष्पा पाटोळे , साधना जाधव आदी प्रमुख कार्यक्रर्ते व मोठ्या संख्येने गटई ( चर्मकार ) बांधव व कंत्राटी कामगार सहभागी झाले होते .

पुणे : जी गतिमंद मुलं असतात. ती बाकी काहीच  करू शकत नाही. एकाला पेपर दिले तर तो कागदावर शीप काढेल. दुसरा पेपराचे बारीक तुकडे करेल, तिस-याला मागच्या आणि पुढच्या पन्नास वर्षांच्या तारखा माहिती असतील. एकच गोष्ट तो अगदी मनापासून करेल. बाकी काहीच त्याला येणार नाही. हा एक मानसिक आजार आहे. पण विचार केला तर अशाच प्रकारे देशातील एककल्ली शिक्षणपद्धतीमुळे विद्याथर्थ्यांना इंजिनिअरिंग, मेडिसीन, चार्टर्ड अकाऊटिंग त्या त्या विषयांची माहिती तर होते. मात्र  इतर विषयात त्यांची पाटी कोरीच राहाते. विदयार्थ्यांना संपूर्ण ‘भारतीय’ च  बनविले जात नाही अशा शब्दातं देशाच्या शिक्षणव्यवस्थेवरच ज्येष्ठ गीतकार जावेद अख्तर यांनी ताशेरे ओढले.

सिंबायोसिसच्या रौप्यमहोत्सवी सांस्कृतिक महोत्सवाचे उदघाटन ज्येष्ठ गीतकार जावेद अख्तर यांच्या हस्ते झाले. त्यावेळी ते बोलत होते.  यावेळी ज्येष्ठ संगीतकार प्यारेलाल शर्मा,  सिंबायोसिसचे संस्थापक- अध्यक्ष डॉ शां.ब मुजुमदार, सिंबायोसिसच्या प्रधान संचालिका  डॉ विद्या येरवडेकर उपस्थित होत्या. यावेळी प्रसिद्ध दिग्दर्शक आदित्य सरपोतदार यांना जावेद अख्तर यांच्या हस्ते सिंबायोसिस सांस्कृतिक पुरस्कार देऊन सन्मानित करण्यात आले. तसेच  महोत्सवाच्या रौप्य महोत्सवी वर्षाचे औचित्य साधून नाट्य, गायन,संगीत, नृत्य आणि चित्रपट या क्षेत्रात भरीव कामगिरी केलेल्या संस्थांना सन्मानित करण्यात आले. त्यामध्ये भरत नाट्य मंदिर, भारत गायन समाज,आर्य संगीत प्रसारक मंडळ, मनीषा नृत्यालय आणि आशय फिल्म क्लब यांचा समावेश होता.

जावेद अख्तर यांनी आपल्या भाषणात देशातील शिक्षणपद्धतीवरच टीकास्त्र सोडले.  सेंटर फॉर अडव्हायझरी बोर्ड ऑफ एज्युकेशच्या कमिटीमध्ये असताना एक प्रश्न उपस्थित केला होता. काश्मीरपासून कन्याकुमारीपर्यंत कोणत्याही शाळेमध्ये गेल्यास  तिथल्या आठ वर्षांच्या मुलाला  चित्र काढ असे सांगितले जाते तेव्हा  तो डोंगर, त्याच्यामागे सूर्य, घर, एक दार खिडकी आणि अगदीच जमल्यास नदी व  त्यात नाव हेच चित्र काढेल. भारतातील प्रत्येक शाळांमधील सात ते आठ वर्षांचा मुलगा हेच चित्र रंगवताना दिसेल.  मग आपण मुलांना कोणत्याप्रकारचे शिक्षण देत आहोत? असा सवाल उपस्थित करीत ते म्हणाले, आपण  मुलांची  कल्पनाशक्ती हिरावून घेत त्यांना एका चौकटीत बसवत आहोत. ज्या मुलाने नदी, डोंगराच्या मागे उगवणारा सूर्य ते घर या गोष्टी जर  पाहिल्याच नसतील तर त्याला आपण का हे चित्र बनवायला लावत आहोत?  तो आठ वर्षांचा मुलगा आपली गल्ली किंवा घराचे चित्र का बनवत नाही? पण त्यांना हेच करायचे असे सांगितले आहे.

मला सात ते आठ वर्षांपूर्वी आर्थिक मंत्रालयाने वक्ता म्हणून  बोलावले होते. खरेतर लेखकाचा अर्थ खात्याशी काडीमात्र संबंध नसतो अशी मिश्किल टिप्पणी करीत ते पुढे म्हणाले, तेव्हा मला प्रश्न विचारला होता की देशाच्या अंदाजपत्रकामध्ये बदल करायचा झाल्यास काय कराल ? तेव्हा अंदाजपत्रकात शिक्षणासाठी 10 टक्के तरतूद करेन असे उत्तर दिले होते. सध्याच्या शिक्षण क्षेत्राला अनेक समस्यांनी ग्रासले आहे.  त्यामध्ये भाषा ही प्रमुख समस्या आहे.  दोन वेळेची रोटी खाऊन जगणारे लोक  मुलांना इंग्रजी माध्यमाच्या शाळेत घालत आहेत. इंग्रजी यायलाच हवी हे खरं आहे. जे इंग्रजी सोडा म्हणतात ते आपले शत्रूच आहेत. पण आपल्या भाषेची किंमत मोजून  इंग्रजीला महत्व देता कामा नये. त्यामुळे उच्च मध्यमवर्गीय भाषेपासून तुटत चालला आहे. भाषेच्या मजबूत खांबावरच संस्कृती टिकून असते, अशा शब्दातं त्यांनी मातृभाषेचे महत्व विशद केले. इंग्रजीच्या मानसिकतेमुळे आपण आपल्या मुलांना विहिरीतले बेडूक बनवत आहोत. ज्यांना संस्कृती, इतिहासाबद्दल माहिती नाही. आपण शिक्षणाचा वृक्ष तर उभा करीत आहोत. मात्र त्याची मूळ, फांद्या वेगळ्या ठिकाणी अशी सध्याची परिस्थिती आहे, अशी टीकाही  त्यांनी केली.

’राष्ट्रवादा’चा खरा अर्थ उमगला नाही
‘राष्ट्रवादी कोण आणि राष्ट्रद्रोही कोण, यातच आपण गुंतून गेलो आहोत. हा आमचा देश, हा त्यांचा देश, हा भेदभाव काय कामाचा ?… खरंतर, राष्ट्रवाद ही जगण्याची रीत आहे. त्यात देशाप्रती कर्तव्य अपेक्षित आहे. पण आम्हाला या शब्दाचा खरा अर्थ उमगू शकलेला नाही, अशी खंत प्रसिद्ध गीतकार जावेद अख्तर यांनी व्यक्त केली. सिम्बायोसिस आंतरराष्ट्रीय अभिमत विद्यापीठातर्फे फेस्टिव्हल ऑफ  थिंकर्स या कार्यक्रमात त्यांनी  ‘राष्ट्रवादा’वर राज्यकर्त्यांना खडे बोल सुनावले. निव्वळ शाब्दिक राष्ट्रवादापेक्षा आज आपल्याला सदभावनेच्या राष्ट्रवादाची गरज आहे. दुदैवाने  तसे आज घडताना मात्र दिसत नाही. राष्ट्रवादाच्या घोषणा देण्यापेक्षा खरी देशभक्ती, खरे देशप्रेम महत्त्वाचे. दुदैवाने आपण सामाजिक बांधिलकी विसरत गेलो, असल्याचे ते म्हणाले.

पुणे : “प्रत्येकाच्या आतमध्ये सुप्त गुण दडलेले असतात. या सुप्त गुणांना वाव देण्यासाठी महाविद्यालयीन स्तरावर आयोजिले जाणारे महोत्सव उपयुक्त ठरतात. त्यामुळे विद्यार्थ्यांनी सर्वांगीण विकासासाठी पुस्तकी ज्ञानासह कला-कौशल्ये आत्मसात करावीत,” असे मत प्रसिद्ध गायक जितेंद्र भुरुक यांनी व्यक्त केले. विद्यार्थ्यांच्या कलागुणांना वाव देण्यासाठी केजे शैक्षणिक संस्थेच्या केजे अभियांत्रिकी महाविद्यालयातर्फे आयोजित ‘मल्हार युवा महोत्सवा’च्या उद्घाटनावेळी जितेंद्र भुरुक बोलत होते.

सहा दिवसांच्या या युवा महोत्सावात अभियांत्रिकी, तंत्रनिकेतन, व्यवस्थापनशास्त्र व वास्तुशास्त्राच्या विद्यार्थी व शिक्षक-शिक्षकेतर कर्मचार्‍यांनी सहभाग घेतला. फॉर्मल टाय डे, साडी डे, रोज डे, बॉलीवुड डे, चॉकलेट डे, स्कूल डे, मिसमॅच डे, सिग्नेचर डे, ब्लॅक अ‍ॅण्ड व्हाईट डे व ट्रेडीशनल डे आदी दिवस साजरे झाले. विद्यार्थ्यांनी काढलेली चित्रे, पेन्सिल स्केचेस, छायाचित्रे, हस्तकला व रांगोळींचे प्रदर्शन भरविण्यात आले होते. या कलादालनाचे उद्घाटन सुनंदा जाधव व विभावरी जाधव यांनी केले.

‘म्युझिकल इव्हीनींग’मध्ये प्रसिध्द डीजे मित यांच्या उपस्थितीत मुलांनी नृत्याचा आनंद घेतला. गायन, संगीत, नृत्य, नाटक आदी कलांचे सादरीकरण सांस्कृतिक कार्यक्रमात झाले. विद्यार्थ्यांनी दर्जेदार गाणी, नृत्य व नाटकांद्वारे प्रेक्षकांना मंत्रमुग्ध केले. सर्व कलेतील प्रत्येकी दोन विद्यार्थ्यांना संस्थेच्या वतीने पारितोषिके प्रदान करण्यात आली. कृष्णात पाटील यांनी विद्यार्थ्यांना मार्गदर्शन केले. डॉ. सुहास खोत यांनी महोत्सवाच्या आयोजनामागील भूमिका स्पष्ट केली.

महोत्सवाच्या समारोपावेळी भारतीय रेल्वेच्या पश्चिम विभागाचे प्रमुख कृष्णाथ पाटील, संस्थेचे अध्यक्ष कल्याण जाधव, खजिनदार विनोद जाधव, व्यवस्थापकीय संचालिका हर्षदा देशमुख-जाधव, विभावरी जाधव, कार्यकारी संचालक डॉ. हेमंत अभ्यंकर, संचालक डॉ. व्यासराज काखंडकी, ट्रिनिटी महाविद्यालयाचे प्राचार्य डॉ. एच. जी. फाकटकर, ट्रिनिटी अ‍ॅकॅडमीचे प्राचार्य डॉ. एन. जे. उके, डॉ. मंगेश कश्यप, जी. बी. इंगोले, सर्व विभागप्रमुख, शिक्षक-शिक्षकेतर कर्मचारी व विद्यार्थी उपस्थित होते. ‘मल्हार युवा महोत्सवा’चे समन्वयक व केजे अभियांत्रिकी व व्यवस्थापन महाविद्यालयाचे प्राचार्य डॉ. सुहास खोत, प्रा. छबिलदास गाजरे, प्रा. विकास मरळ, प्रा. अमृता ताकवले व सहकार्‍यांनी मेहनत घेतली.