सांगोलेकर लिखित ‘विश्वबंधुतेची प्रकाशवाट’ पुस्तकाचे प्रकाशन

पुणे: “स्वातंत्र्य आणि समतेला बंधुतेची जोड नसेल, तर लोकशाहीचे स्वरूप अपूर्ण राहते. समाजातील तणाव, दुभंगलेली मने आणि विषमता दूर सार्याची असेल, तर बंधुतेचा विचार जनमानसात रुजणे अत्यंत महत्वाचे आहे. कारण बंधुता ही केवळ एक सामाजिक मूल्य नसून, प्रगल्भ लोकशाहीचा प्राण आहे,” असे मत रयत शिक्षण संस्थेचे चेअरमन व माजी विभागीय आयुक्त चंद्रकांत दळवी यांनी व्यक्त केले.

महात्मा गांधी यांच्या जयंतीदिनानिमित्त ज्येष्ठ साहित्यिक डॉ. अविनाश सांगोलेकर लिखित आणि बंधुता प्रकाशन प्रकाशित ‘विश्वबंधुतेची प्रकाशवाट’ या पुस्तकाचे प्रकाशन चंद्रकांत दळवी यांचे हस्ते झाले. रयत शिक्षण संस्थेच्या औंध येथील डॉ. बाबासाहेब आंबेडकर महाविद्यालयात झालेल्या प्रकाशन  सोहळ्याच्या अध्यक्षस्थानी ज्येष्ठ समाजनिष्ठ उद्योजक कृष्णकुमार गोयल होते. प्रसंगी बंधुताचार्य प्रकाश रोकडे, मंदाकिनी रोकडे, स्वागताध्यक्ष प्राचार्य डॉ. अरुण आंधळे, प्रा. चंद्रकांत वानखेडे, प्रा. शंकर आथरे, संगीता झिंजुरके, दत्तात्रय गायकवाड, डॉ. प्रभंजन चव्हाण आदी उपस्थित होते.

चंद्रकांत दळवी म्हणाले, “बंधुता चळवळीचा हा प्रवास ५१ वर्षांचा आहे. विविध साहित्य संमेलने, काव्य महोत्सव, बंधुता पुरस्कारांतून बंधुतेचे मूल्य खोलवर रुजवण्याचा रोकडे यांचा प्रयत्न स्तुत्य आहे. समाजाला एकसंध ठेवण्यासाठी आवश्यक बंधुता विचार व्यापक करण्याचा हा प्रवास यापुढेही चालू राहावा.”

कृष्णकुमार गोयल म्हणाले, “विद्यार्थ्यांनी मोठी स्वप्ने पाहावीत. ध्येयासक्तीने ती स्वप्ने पूर्ण करण्यासाठी परिश्रम घ्यावेत. आपल्यातील सुप्त गुण ओळखून करिअर घडवण्यासाठी कठोर मेहनत, जिद्द, प्रामाणिकपणा अंगीकारावा. परस्परांचा सन्मान, बंधुभाव जोपासून एकमेकांच्या साथीने राष्ट्राच्या विकासात योगदान द्यावे.

बंधुताचार्य प्रकाश रोकडे म्हणाले, “महामानवांच्या मूल्यविचारांचे बळ, प्रज्ञावंताची दृष्टी, विचारवंतांचे विचार, धनवंतांचे धन आणि सहकारी कार्यकर्त्यांची कृतिशील साथ हे बंधुता चळवळीच्या यशाचे गमक आहे. ही चळवळ अधिक व्यापक होण्यासाठी सर्वानी मिळून प्रयत्न करावेत.”

डॉ. अविनाश सांगोलेकर म्हणाले, “बंधुताचार्य प्रकाश रोकडे यांनी पाच दशकांहून अधिक काळ बंधुता, राष्ट्रबंधुता आणि विश्वबंधुता या तीन टप्प्यांवर केलेल्या यशदायी आणि प्रेरणादायी कार्याचे दस्तावेजीकरण म्हणजे हे पुस्तक आहे.”

महात्मा गांधी, माजी पंतप्रधान लालबहाद्दूर शास्त्री यांच्या प्रतिमेला पुष्पहार अर्पण करण्यात आले. महात्मा गांधी आणि रयत शिक्षण संस्थेचे संस्थापक कर्मवीर भाऊराव पाटील यांच्या दुर्मिळ छायाचित्र प्रदर्शनाचे उद्घाटन करण्यात आले.

डॉ. अरुण आंधळे यांनी स्वागत-प्रास्ताविक केले. संगीता झिंजुरके यांनी सूत्रसंचालन केले. मंदाकिनी रोकडे यांनी आभार मानले.

पुणे : मोठ्या शहरांमध्ये मराठी भाषेची गळचेपी होताना दिसत आहे. सर्व स्तरातील बहुतांश विद्यार्थी इंग्रजी माध्यमात शिकत आहेत. हे चित्र बदलण्यासाठी महापालिकेच्या मराठी शाळांमध्ये उत्तम शिक्षण द्यावे, योग्य पद्धतीने कला-क्रीडा आणि साहित्याला प्रोत्साहन देणारे वातावरण निर्माण व्हावे, प्रत्येक शाळा आदर्श शाळा बनविण्यासाठी प्रयत्नशील रहावे, ज्या योगे इंग्रजी माध्यमाच्या खासगी शाळांचा प्रभाव कमी होईल, असे प्रतिपादन अखिल भारतीय मराठी साहित्य संमेलनाचे माजी अध्यक्ष, राज्याच्या मराठी भाषा सल्लागार समितीचे अध्यक्ष लक्ष्मीकांत देशमुख यांनी केले. वाचनसंस्कृती निर्माण होण्यासाठी शाळांमध्ये ग्रंथालये निर्माण करून तेथे उत्तम ग्रंथसंपदा उपलब्ध करून द्यावी, अशी सूचनाही त्यांनी केली.

मराठी भाषेला अभिजात भाषेचा दर्जा मिळाल्याच्या वर्षपूर्तीनिमित्त पुणे महानगरपालिका, सांस्कृतिक केंद्र आणि शिक्षण विभाग यांच्या संयुक्त विद्यमाने ‌‘जागर अभिजात मराठीचा‌’ हा गाणी, गोष्टी, प्रवचन, कविसंमेलन आणि अभिवाचन यांचा संगम असलेल्या एक दिवसीय विशेष कार्यक्रमाचे आयोजन करण्यात आले असून कार्यक्रमाचे उद्घाटन आज (दि. 3) लक्ष्मीकांत देशमुख यांच्या हस्ते झाले. त्यावेळी ते अध्यक्षपदावरून बोलत होते. बालगंधर्व रंगमंदिर येथे कार्यक्रमाचे आयोजन करण्यात आले होते.

बालसाहित्य अकादमी पुरस्कार विजेते ल. म. कडू, डॉ. संगीता बर्वे, राजीव तांबे तसेच महापालिका अतिरिक्त आयुक्त ओमप्रकाश दिवटे, उपायुक्त किशोरी शिंदे, बालगंधर्व रंगमंदिराचे व्यवस्थापक आणि महापालिका सांस्कृतिक विभाग प्रमुख राजेश कामठे, संवाद पुणेचे अध्यक्ष आणि कार्यक्रमाचे संयोजक सुनील महाजन, माजी नगरसेविका माधुरी सहस्रबुद्धे, कामगार विभाग आयुक्त नितीन केंजळे, उपायुक्त वसुंधरा बारवे, प्रशासकीय अधिकारी सुनंदा वाखारे, आशा उबाळे मंचावर होते. रोपट्यास जलार्पण करून आणि फलकावर मराठी भाषेत स्वाक्षरी करून कार्यक्रमाचे उद्घाटन करण्यात आले.

भाविष्यात मराठी भाषा प्रवाहित होण्यासाठी महापालिकेच्या स्तरावर काय उपाययोजना करणे अपेक्षित आहे या विषयी लक्ष्मीकांत देशमुख पुढे म्हणाले, महापालिकेच्या शाळांमधील प्रत्येक शिक्षकाने विद्यार्थ्यांना मराठी भाषा लिहिणे, बोलणे व वाचण्यासाठी प्रोत्साहित करावे. मुलांच्या अंगातील कला-क्रीडा गुण ओळखून त्यांना मार्गदर्शन करावे आणि या करिता शासनाच्या शिक्षण, सांस्कृतिक व क्रीडा विभागाने एकत्रितपणे प्रयत्न करावेत. विद्यार्थ्यांना मार्गदर्शन करताना ते म्हणाले, वाचन हे निरंतर शिक्षण असते, त्यामुळे भरपूर वाचा, वाचनाची गोडी लावून घ्या आणि जे वाचाल ते तुमच्या भाषेमध्ये सारांश रूपात लिहित रहा. कविता वाचा, गुणगुणा आणि हसतखेळत अभ्यास करा.

ओमप्रकाश दिवटे म्हणाले, मराठी भाषा टिकविण्यासाठी तसेच भाषेचे आदान प्रदन व्हावे या करिता विविध उपक्रमांचे आयोजन करण्यात आले आहे.

विद्यार्थ्यांशी संवाद साधताना ल. म. कडू म्हणाले, आपण जे पाहतो ते आपल्या शब्दात मांडत, गंमत जंमत अनुभवत शब्दचित्र कागदावर उमटविण्याचा प्रयत्न करा.

‌‘भाषेमुळे आपण घडतो, भाषेला आपण घडवितो‌’ ही कविता विद्यार्थ्यांकडून सामूहिकरित्या गाऊन घेत डॉ. संगीत बर्वे म्हणाल्या, प्रत्येकाने मराठी वाचायला, बोलायला आणि लिहायला प्रयत्न करून प्रोत्साहित करणे आवश्यक आहे.

गोष्टीतून मुलांशी संवाद साधत राजीव तांबे म्हणाले, भाषा जेव्हा मुलांकडून मोठ्या व्यक्ती शिकतात आणि मुले मोठ्यांकडून शिकतात म्हणजेच भाषेचे आदानप्रदान होते तेव्हाच भाषा अभिजात होते.

स्वागतपर प्रास्ताविकात किशोरी शिंदे म्हणाल्या, महानगरपालिकेचा अमृत महोत्सव आणि मराठी भाषेला अभिजात भाषेचा दर्जा मिळाल्याच्या वर्षपूर्तीनिमित्त सांस्कृतिक व शिक्षण विभाग एकत्र येऊन हा उपक्रम करीत आहे. मराठी भाषेची मुळे खोलवर रुजलेली आहेत. या कार्यक्रमातून शालेय विद्यार्थ्यांपर्यंत मराठी भाषा प्रवाहित होण्यास मदत होईल.

वसुंधरा बारवे यांनी शुभेच्छा संदेश दिला. कार्यक्रमाचे सूत्रसंचालन रत्ना दहिवेलकर यांनी केले तर आभार आशा उबाळे यांनी मानले.

 सदाशिव पेठेतील नवा विष्णू चौक मित्र मंडळ, नवरात्र उत्सव, सदाशिव पेठ तर्फे विशेष मुलांच्या मातांचा सन्मान

पुणे : आयुष्य हे एक आव्हान किंवा संकट असते, तेव्हाच ते खरे आयुष्य म्हणावे. जे संकट आपल्यावर आलेले असते त्यापलीकडे दुसरे संकट शोधा ; त्यातून बाहेर पडण्यासाठी अनेक मार्ग दिसू लागतात. जेव्हा तुम्ही वंचितांचे जग पाहता, तेव्हा तुमचा अहंकार संपून जातो. संकटांतूनच आयुष्याचे खरे धडे मिळतात, असे मत ज्येष्ठ सामाजिक कार्यकर्त्या रेणू गावस्कर यांनी व्यक्त केले.

सदाशिव पेठेतील नवा विष्णु चौक मित्र मंडळ, नवरात्र उत्सव, सदाशिव पेठ तर्फे विशेष मुलांच्या मातांचा सन्मान करण्यात आला. यावेळी पूनम गांधी, गौरी तुपे, वैशाली सुरगुडे, पल्लवी सोनाकुल, मालन पवार, मंदा पवार, मनीषा कांबळे, श्वेता कांबळे, कार्याध्यक्ष कुमार रेणुसे, तेजस घोडके, अमित सुरगुडे, गणेश जंगम, सचिन खंडाळकर, रवींद्र गांधी, पांडुरंग ढाकूळ, धीरज वाघेरे, अरुण राठोड, संतोष राठोड, मंगेश सानप, दीपक प्रजापति हे उपस्थित होते. सन्मानपत्र, सन्मानचिन्ह आणि मानाचे उपरणे अशा स्वरूपात सन्मान करण्यात आला.

रेणू गावस्कर पुढे म्हणाल्या, या मातांचा सन्मान करताना समाजाने त्यांना प्रोत्साहन दिले पाहिजे. आयुष्य खूप सुंदर आहे. ते जगताना आपल्या दुःखांपेक्षा इतरांचे दुःख पाहिले, तर नक्कीच मार्ग मिळतो. गरजूंना फक्त सहानुभूती देण्यापेक्षा आपुलकी अधिक महत्त्वाची असते, असेही त्यांनी सांगितले.

कुमार रेणुसे म्हणाले, मंडळाच्या वतीने दरवर्षी नवरात्र उत्सवात महिलांचा सन्मान केला जातो. अनाथाश्रमात मुलांचे संगोपन करणाऱ्या माता असोत किंवा ससून रुग्णालयातील लहान मुलांची काळजी घेणाऱ्या परिचारिका यांचा सन्मान आम्ही केला आहे. यंदा विशेष मुलांच्या मातांचा गौरव करण्यात आला. विशेष मुलांची जबाबदारी सांभाळणे हे त्यांच्यासाठी मोठे आव्हान असते, असे त्यांनी नमूद केले. प्रा.संगीता मावळे यांनी सूत्रसंचालन केले. शाहीर हेमंत मावळे यांनी आभार मानले.

चार दिवसांत पूरग्रस्तांसाठी दोन लाखांची मदत जमा

पुणे –
जगात दोनच धर्म श्रेष्ठ मानले जातात – एक माणूस धर्म आणि दुसरा शेजार धर्म. या धर्माचं उत्तम उदाहरण पुण्यातील डॉक्टरांनी घालून दिलं आहे.
सोलापूर जिल्ह्यातील मोहोळ तालुक्यातील पसलेवाडी आणि बोपली या गावांवर अलीकडच्या अतिवृष्टीमुळे आणि सीना नदीच्या पुरामुळे मोठं संकट आलं. शेकडो कुटुंबं विस्थापित झाली, तर जनजीवन विस्कळीत झालं. या पार्श्वभूमीवर पुणे जिल्ह्यातील तज्ज्ञ डॉक्टरांची संघटना – AMC (Association of Medical Consultants), Pune – यांनी एक संवेदनशील शेजारी या नात्याने मदतीचा हात पुढे केला आहे.
AMC पुणेने सभासद डॉक्टरांना मदतीचे आवाहन केल्यानंतर अवघ्या चार दिवसांत जवळपास दोन लाख रुपयांची मदत जमा झाली. यात रोख रक्कम तसेच अत्यावश्यक साहित्याचा समावेश होता. या उपक्रमाला हडपसर मेडिकल असोसिएशनने देखील मोलाची साथ दिली.
मदतीच्या किटमध्ये – टूथब्रश, टूथपेस्ट, अंगावरील कपड्यांचा साबण, खाद्यतेल, साखर, गव्हाचे पीठ, डाळ, तांदूळ, चहा पावडर, दूध पावडर, शेंगदाणे, मीठ अशा जीवनावश्यक वस्तूंचा समावेश करण्यात आला. एकूण १०० किट्स तयार करण्यात आले तसेच २०० उच्च दर्जाची ब्लॅंकेट्स खरेदी करण्यात आली.
दि. १ ऑक्टोबर रोजी हे साहित्य प्रत्यक्ष गावी पोहोचवून सुमारे २०० कुटुंबांना मदतीचे वाटप करण्यात आले. यावेळी स्थानिक नागरिकांनी पुणे जिल्ह्यातील डॉक्टरांनी दिलेल्या मदतीचे मनापासून कौतुक केले.
एएमसीचे अध्यक्ष डॉ.हनुमंत साळे, सेक्रेटरी डॉ.रोशनी कवले, खजिनदार डॉ.चेतन म्हस्के , नियोजीत अध्यक्ष डॉ.साधना धर्माधिकारी, उपाध्यक्ष डॉ.विजय पवार, एच एम ए चे अध्यक्ष डॉ.मनोज कुंभार आदींचे मोलाचे सहकार्य लाभले.
AMC पुणे कार्यकारिणी, सर्व सभासद, हडपसर मेडिकल असोसिएशन चे सभासद आणि या उपक्रमासाठी हातभार लावणारे सर्व दानशूर यांचे मनःपूर्वक आभार व्यक्त करण्यात आले. विशेष म्हणजे, या संपूर्ण उपक्रमाचे नियोजन निखिल शिंदे आणि त्यांच्या मित्रपरिवाराने काटेकोरपणे केले, ज्यामुळे मदत योग्य ठिकाणी आणि योग्य वेळी पोहोचली.
पूरग्रस्त बांधवांना लवकरात लवकर स्थैर्य लाभो, त्यांच्या जीवनात पुन्हा प्रकाशमान दिवस यावेत, अशा सदिच्छा संस्थेने दिल्या.

पुणे – भाजपा आमदाराच्या दबावाखालील म्हाडाच्या पक्षपाती कारभारामुळे पुण्यातील म्हाडाच्या रहिवाशांची अवस्था दयनीय झाली असून  म्हाडाच्या अनागोंदी  कारभारामुळे “कोणी नवीन घर देत का घर” अशी नागरिकांची अवस्था झाली आहे.  पुणे लोकमान्यनगर बचाव कृती समितीच्या वतीने व महाराष्ट्र हाउसिंग बोर्ड पुनर्विकास कृती समिती येरवडा यांच्यावतीने (ता. ३) रोजी पुणे स्टेशन येथील म्हाडाच्या इमारतीला शेकडो नागरिकांनी घेराओ घातला . यावेळी नागरिकांनी म्हाडाच्या आणि राज्य शासनाच्या विरोधात जोरदार निदर्शने करण्यात आली. या आंदोलनात महिलांची लक्षणीय उपस्थिती होती. “घर आमच्या हक्काच” मुर्दाबाद मुर्दाबाद राज्य शासनाचा मुर्दाबाद, म्हाडाचा धिक्कार असो अशा घोषणांनी संपूर्ण परिसर दणाणून सोडला होता. याप्रसंगी ॲड. गणेश सातपुते यांनी लोकमान्यनगर बचाव कृती समिती तर अजय बल्लाळ यांनी महाराष्ट्र हाउसिंग बोर्ड येरवडा कृती समिती येथील रहिवाशांची बाजू मांडली. नागरिकांनी म्हाडाच्या अधिकाऱ्यांना खडे बोल सुनावले. “आम्हाला आमची स्वप्नं साकार करू द्या,  आमच्या घरांवर विकासकांवर आणलेले स्थगिती अगोदर उठवा, मगच चर्चा अशी नागरिकांनी ठाम भूमिका घेतली. परिणामी गोंधळातच वादळी चर्चा झाली. आम्हाल आमची स्वप्न पाहू द्या आणि पूर्ण करू द्या, तुम्ही आम्हाला गृहित धरू नका, म्हाडाने आणलेले स्थगिती त्वरित हटवा, आमचा आम्हाला विकास करू द्या, रहिवाशांना विचारात घेऊनच स्वतः रहिवाशांना घरांचे पुनर्विकासाला करू द्या. यावेळी नागरिकांनी पुणे गृहनिर्माण व क्षेत्र विकास मंडळ म्हाडाचे अध्यक्ष आढळराव पाटील, मुख्य अधिकारी राहुल समोरे यांना भेटून नागरिकांनी निवेदन दिले.  गेली अनेक वर्षं चर्चेत असलेला लोकमान्यनगर पुनर्विकास सुरळीतपणे होऊ लागलेला असतानाच पुनर्विकास प्रक्रियेला खीळ बसल्याने नागरिकांनी संताप व्यक्त केला. उपस्थित नागरिकांनी त्यांच्या समस्या व्यक्त केल्या. नागरिक म्हणाले की लोकमान्यनगर येथील काही इमारती तिरक्या झाल्या आहेत. अशा नरक यातना सोसत येथील रहिवाशी जीव मुठीत घेवून राहत आहेत. येथील सर्व इमारती कॉपरेटिव सोसायटी रजिस्टर झाल्या आहेत. त्यांचे प्रॉपर्टी कार्ड व नोंदणी झाली आहे. सेल डीड, लीस डीड, कन्व्हेन्स डिड झाले असून देखील म्हाडाच्या भोंगळ कारभारामुळे येथील नागरिक हवालदिल झाले आहेत.महाराष्ट्र हाउसिंग बोर्ड येरवडा येथील नागरिकांनी बोलताना सांगितले की गेली अनेक वर्षांपासून आम्ही या ठिकाणी अनेक समस्यांचा सामना करत आहोत. म्हाडाने आणि राज्य शासनाने यावर तात्काळ लक्ष द्यावे. शासनाकडून त्वरित दखल जो पर्यंत घेतली जात नाही. तो पर्यंत हा लढा चालूच राहणार असून हा लढा भविष्यात तीव्र होणार असल्याचे पुणे लोकमान्यनगर कृती समिती व महाराष्ट्र हाउसिंग बोर्ड पुनर्विकास कृती समिती येरवडा यांच्या वतीने सांगण्यात आले.  

म्हणून…”म्हाडा महासंघाची स्थापना” केली – ॲड. गणेश सातपुते गेल्या अनेक वर्षांपासून महाराष्ट्र गृहनिर्माण व क्षेत्र विकास मंडळ (म्हाडा) महाराष्ट्रभर गृहनिर्माणाची कामे करते आहे. मात्र महाराष्ट्रभर आपण पाहिले तर म्हाडाच्या बांधकामांची आणि नागरिकांची अवस्था चिंताजनक आहे. तेथील बांधकामांचा पुनर्विकास होणे अत्यंत गरजेचे आहे. महाराष्ट्राच्या कानाकोपऱ्यातील नागरिकांचे हक्काचे व्यासपीठ म्हणून म्हाडा महासंघ काम करेल. 

पिंपरी (दि.३) : पुणे महानगर प्रदेश विकास प्राधिकरणाच्या (PMRDA) आकुर्डी कार्यालयात गुरुवारी राष्ट्रपिता महात्मा गांधी व माजी पंतप्रधान लालबहादूर शास्त्री यांची जयंती साजरी करण्यात आली. कार्यक्रमाच्या सुरुवातीस महात्मा गांधी व लालबहादूर शास्त्री यांच्या प्रतिमांना पुष्पहार अर्पण करून अभिवादन करण्यात आले.

या प्रसंगी महात्मा गांधींच्या सत्य-अहिंसा, स्वच्छता व स्वावलंबन या विचारांचा तसेच शास्त्रीजींच्या “जय जवान, जय किसान” या घोषणेचे स्मरण करून देत कर्मचाऱ्यांना त्यांचे कार्य आदर्श मानून प्रामाणिकपणे व समर्पण भावनेने कार्य करण्याचे आवाहन करण्यात आले. यावेळी कक्ष अधिकारी विशाल ताठे, जनसंपर्क अधिकारी डॉ. ज्ञानेश्वर भाले, वरिष्ठ लिपिक पांडुरंग मधुरकर, सुधाकर ठाकरे, हुसेन नदाफ आदी उपस्थित होते.

टीव्ही बंद कर अन् माझ्या डोळ्यात ड्रॉप टाक म्हटल्याने राग अनावर

पुणे: ऐन दसऱ्याच्या दिवशी कोथरूड मधील जय भवानी नगरमध्ये एका मुलाने वडिलांचा चाकूने वार करून खून केला. या घटनेमुळे परिसरात एकच खळबळ उडाली आहे.घटनेची माहिती मिळताच कोथरूड पोलिस घटनास्थळी दाखल झाले आणि आरोपी मुलाला ताब्यात घेतले. त्याच्यावर खुनाचा गुन्हा दाखल करण्यात आला आहे. सणाच्या दिवशीच घराघरात आनंदाचे वातावरण असताना जय भवानी नगरमध्ये घडलेल्या
खून झालेल्या व्यक्तीचे नाव तानाजी पायगुडे असे असून, आरोपी मुलगा सचिन तानाजी पायगुडे (वय ३३) याला कोथरूड पोलिसांनी ताब्यात घेतले आहे. या प्रकरणी तानाजी यांची पत्नी सुमन तानाजी पायगुडे यांनी कोथरूड पोलिस ठाण्यात फिर्याद दिली आहे.

पायगुडे कुटुंब जय भवानी नगर येथील चाळ क्रमांक दोनमध्ये वास्तव्यास आहे. दसऱ्याच्या दिवशी, दुपारी साधारणपणे बारा वाजता सचिन हा माळ्यावर टीव्ही पाहत बसला होता. त्यावेळी वडील तानाजी यांनी त्याला “टीव्ही बंद कर आणि माझ्या डोळ्यात ड्रॉप टाक” असे सांगितले.यावरून दोघा बापलेकात वाद झाला. रागाच्या भरात सचिन याने वडिलांवर स्वयंपाकघरातील चाकूने हल्ला केला. त्याने तानाजी यांच्या तोंडावर आणि गळ्यावर वार केले. गंभीर जखमी झालेल्या तानाजी यांचा जागीच मृत्यू झाला.