पुणे : पुण्यातील गंभीर बनत चाललेली वाहतूक सुरळीत करण्यासाठी पोलिस दल ‘तंत्रज्ञान, तज्ज्ञ सल्लागार आणि नागरिकांचे सहकार्य व सूचना’ या त्रिसूत्रीचा अवलंब करणार आहे. शहरात लवकरच ५०० कृत्रिम बुद्धिमत्ता (AI) कॅमेरे बसवले जाणार असून, मुंबईच्या धर्तीवर अत्याधुनिक वाहतूक नियंत्रण प्रणाली कार्यान्वित केली जाईल. केवळ तंत्रज्ञानावर विसंबून न राहता नागरिकांनीही वाहतूक नियमांचे पालन करण्याचे आवाहन अपर पोलीस आयुक्त (वाहतूक) मनोज पाटील यांनी शनिवारी केले. पुणे शहरातील वाढती वाहतूक कोंडी, सार्वजनिक वाहतूक व्यवस्था, मेट्रो व बससेवा, पार्किंगची समस्या तसेच रस्ते सुरक्षेच्या विविध मुद्द्यांवर चर्चा करण्यासाठी शहर जिल्हा काँग्रेस कमिटीच्या पश्चिम विभागाच्या अध्यक्षा दीप्ती चवधरी यांच्या वतीने ‘पुणे ट्रॅफिक परिषद’ शनिवारी पत्रकार संघात घेण्यात आली. अपर पोलीस आयुक्त (वाहतूक) मनोज पाटील, शहर वाहतूक उपायुक्त संदीप भाजीभाकरे, पीएमपीएमएलच्या जॉईन्ट एमडी एलिस पोरे, शहर जिल्हा काँग्रेस कमिटीच्या पश्चिम विभागाच्या अध्यक्षा दीप्ती चवधरी, उपप्रादेशिक परिवहन अधिकारी सुरेंद्र निकम, आरटीओ चे अधिकारी साखरे, पुणे मेट्रोचे अधिकारी मिहीर कुलकर्णी, हृदयरोग तज्ञ डॉ. राहुल सावंत, वाहतूक अभ्यासक व ‘सकाळ’चे मुख्य वार्ताहर मंगेश कोळपकर, नगरसेवक रफिक शेख, काँग्रेसचे गोपाळ तिवारी, अविनाश बागवे, स्वाती शिंदे, युवक काँग्रेसचे शहर अध्यक्ष सौरभ अमराळे आदी उपस्थित होते.

मनोज पाटील म्हणाले, पुण्याची वाहतूक कोंडी ही आता केवळ रस्त्यांची समस्या उरलेली नाही, तर ती नागरिकांच्या आरोग्याशी आणि मानसिक तणावाशी जोडली गेली आहे. वाहतूक कोंडीमुळे प्रत्येक पुणेकराच्या आयुष्यातील सरासरी दोन वर्षे केवळ रस्त्यावर वाया जात आहेत. पुणे शहरात लवकरच ५०० ‘एआय’ कॅमेरे बसवले जाणार आहेत. हे कॅमेरे वाहतूक नियमांचे उल्लंघन करणाऱ्यांवर मानवी हस्तक्षेपाशिवाय थेट आणि स्वयंचलित दंडात्मक कारवाई करतील. वाहतुकीचे स्वयंचलित नियमन करण्यासाठी ‘इंटेलिजंट ट्रॅफिक मॅनेजमेंट सिस्टीम’ (ITMS) चा अत्यंत महत्त्वाकांक्षी प्रकल्प वाहतूक शाखेने तयार केला असून, त्याचा सविस्तर अहवाल मंजुरीसाठी राज्य सरकारकडे पाठवण्यात आला आहे. मुंबईत ज्याप्रमाणे अत्याधुनिक ‘ॲडव्हान्स्ड ट्रॅफिक मॅनेजमेंट सिस्टीमद्वारे संपूर्ण शहरातील वाहतुकीचे एकात्मिक नियंत्रण केले जाते, तशीच यंत्रणा पुण्यातही कार्यान्वित करण्याचे पोलिसांचे प्रयत्न सुरू आहेत.

वाहतूक स्थितीवर लक्ष ठेवण्यासाठी आणि नागरिकांच्या सोयीसाठी ‘ट्रॅफिक व्ह्यूअर ॲप’चा प्रभावी वापर केला जात आहे. ‘टॉमटॉम’ या जागतिक वाहतूक अहवालात पुण्याची नोंद जगातील संथ शहरांमध्ये झाली होती. यावर उपाय म्हणून सध्या अरुंद रस्त्यांवर ‘अल्पकालीन वाहतूक नियोजन’ करून जे.एम. रोड आणि एफ.सी. रोडची वाहतूक सामावून घेण्याची क्षमता यशस्वीपणे वाढवण्यात आली आहे.
१९९५ मध्ये केवळ ८६ चौरस किलोमीटर असलेले पुणे आज ३८२ चौरस किलोमीटरवर पोहोचल्यामुळे प्रशासकीय मर्यादा आल्या आहेत. मात्र, आगामी काळात उभे राहणारे १०० किलोमीटरचे मेट्रोचे जाळे आणि पोलिसांची ही हायटेक यंत्रणा यामुळे पुण्याचा वाहतुकीचा प्रश्न नक्कीच सुटेल, अशी आशा मनोज पाटील यांनी यावेळी व्यक्त केली.

केवळ तंत्रज्ञानावर विसंबून न राहता नागरिकांनीही वाहतूक नियमांचे पालन करण्याचे आवाहन पाटील यांनी केले. रस्त्यांवरील खाजगी वाहनांची गर्दी कमी करण्यासाठी शहरात प्रायोगिक तत्त्वावर ‘पे अँड पार्किंग’चा प्रयोग राबवला पाहिजे, तसेच पुण्यातील विविध आयटी आणि कॉर्पोरेट कंपन्यांनी आठवड्यातून किमान एक दिवस ‘सार्वजनिक वाहतूक दिन’ म्हणून पाळला पाहिजे, अशी महत्त्वपूर्ण शिफारस त्यांनी यावेळी त्यांनी मांडली.

शहर जिल्हा काँग्रेस कमिटीच्या पश्चिम विभागाच्या अध्यक्षा दीप्ती चवधरी यांनी प्रास्ताविक केले. त्या म्हणाल्या, सर्वसामान्य नागरिकांशी संवाद वाढविणे, युवकांमध्ये विश्वास निर्माण करणे आणि महिलांच्या सुरक्षेला प्राधान्य देणे गरजचे आहे. पुण्यातील वाढती वाहतूक कोंडी हा केवळ वाहतुकीचा नव्हे, तर शहराच्या विकासाशी निगडित गंभीर प्रश्न बनला आहे. मेट्रो सेवा अधिक प्रभावी करण्यासाठी प्रत्येक स्थानकावर पुरेशी वाहनतळ व्यवस्था उपलब्ध करणे आवश्यक आहे. तसेच जुन्या शहरातील वाहतुकीचा विचार करून लहान बससेवेचा पर्याय, नियोजनबद्ध बसथांबे आणि सक्षम पायाभूत सुविधा उभारण्याची गरज आहे. वाहतूक कोंडीवर कायमस्वरूपी उपाय शोधण्यासाठी प्रशासन, वाहतूक पोलीस, आरटीओ, लोकप्रतिनिधी आणि नागरिक यांच्यात प्रभावी समन्वय होणे अत्यावश्यक आहे.

वाहतूक पोलीस उपायुक्त संदीप भाजी भाकरे म्हणाले, “पुण्यातील वाहतूक कोंडीच्या समस्येचा मी सध्या सखोल अभ्यास आणि निरीक्षण करत आहे. शहरातील वाहतूक व्यवस्था अधिक सक्षम आणि सुरळीत करण्यासाठी लवकरच ठोस उपाययोजना राबविण्यात येतील. अनेक रस्त्यांवर ‘पे अँड पार्क’ व्यवस्था प्रभावीपणे लागू केल्यास वाहनतळाबाबत शिस्त निर्माण होण्यास मदत होईल. तसेच मुंबईच्या धर्तीवर वाहतूक व्यवस्थापन अधिक कार्यक्षम करण्यासाठी सर्वतोपरी प्रयत्न करण्यात येतील.” हृदयरोगतज्ज्ञ डॉ. राहुल सावंत म्हणाले, वाहतूक कोंडीचा आरोग्यवर परिणाम होत आहे. हृदयविकाराच्या रुग्णांवर वेळेत उपचार होणे आवश्यक असते; मात्र डॉक्टर, परिचारिका आणि वैद्यकीय कर्मचारी वाहतूक कोंडीत अडकल्याने उपचारांमध्ये विलंब होतो. मोठी दुर्घटना होते. वाहतुकीमुळे नागरिकांमध्ये तणाव वाढत असून रक्तदाबासारख्या समस्या निर्माण होत आहेत. तसेच रस्त्यांवरील वाद आणि भांडणांचे प्रमाणही वाढत असल्याचे त्यांनी नमूद केले.

पोरे म्हणाल्या, ब्राझीलमधील यशस्वी बीआरटी मॉडेलचा उल्लेख करत त्यांनी सार्वजनिक वाहतूक अधिक सक्षम करण्याची गरज व्यक्त केली. बससेवा वेळेवर चालविणे, चालकांचे प्रशिक्षण, छोट्या रस्त्यांवर लहान बस सुरू करणे तसेच बसच्या डिझाइनमध्ये आवश्यक बदल करण्याबाबत प्रयत्न सुरू असल्याची माहिती त्यांनी दिली. बससेवा वाढविण्यासाठी आवश्यक जागा आणि पायाभूत सुविधा उपलब्ध होणे गरजेचे असल्याचेही त्यांनी स्पष्ट केले. सार्वजनिक वाहतूक व्यवस्थेबद्दल जागरूकता निर्माण करण्यासाठी ‘बस डे’ सारखा उपक्रम राबविण्याचा मानस त्यांनी व्यक्त केला.

 निकम यांनी पुण्यातील वाढत्या वाहनसंख्येबाबत चिंता व्यक्त केली. शहरात सुमारे ३० लाख दुचाकी आणि ९ लाख चारचाकी वाहने असून बहुतांश दुचाकी एकाच व्यक्तीद्वारे वापरली जात असल्याचे त्यांनी सांगितले. वाहन नोंदणी, परवाना आणि वाहतूक नियमांचे पालन यावर भर देत नवीन तंत्रज्ञानाच्या साहाय्याने सुरक्षा वाढविण्यात येत असल्याची माहिती त्यांनी दिली. नियमभंग करणाऱ्यांवर कठोर दंडात्मक कारवाई सुरू असल्याचेही त्यांनी नमूद केले.

वाहतूक अभ्यासक व पत्रकार मंगेश कोळपकर यांनी सादरीकरणाद्वारे पुण्यातील वाहतूक व्यवस्थेतील समस्या, सद्यस्थिती आणि उपाययोजना, या बाबत सविस्तर आढावा घेतला. शहरातील वाहतूक समस्यांचे स्वरूप कसे बदलत आहे, याचे विश्लेषण त्यांनी केले.
ते म्हणाले, वाहतूक समस्या सोडविण्यासाठी नागरिकांची सजगता आणि सहभाग अत्यंत महत्त्वाचा आहे. एकात्मिक वाहतूक व्यवस्था निर्माण होण्यासाठी प्रशासकीय प्रयत्न पुरेसे नाहीत तर, लोकप्रतिनिधींचा दबाव आणि नागरिकांचा पाठपुरावा आवश्यक आहे. शहराचा सर्वंकष वाहतूक आराखडा तयार करून त्याची विशिष्ट कालमर्यादेत अंमलबजावणी व्हायला हवी.
पुण्यातील अरुंद रस्ते, ४४ लाखांहून अधिक वाहनांची संख्या आणि वाहनांमुळे वाढणारे प्रदूषण यामुळे शहरातील हवेची गुणवत्ता खालावत आहे. तसेच शहरातील वाहतुकीचा सरासरी वेगही लक्षणीयरीत्या कमी झाला आहे, असेही त्यांनी सांगितले. अतिक्रमणे, सक्षम व सर्वसमावेशक सार्वजनिक वाहतूक व्यवस्थेचा अभाव आणि सुमारे साडेतीन हजार पीएमपीएमएल बस उपलब्ध असूनही वाहतूक कोंडीची समस्या कायम असल्याचे त्यांनी नमूद केले.

गोपाळ तिवारी यांनी यावेळी शहरातील वाहतूक कोंडी विषयी प्रश्न व सूचना मांडल्या. यशराज पारखी यांनी पुण्यातील वाहतूक व्यवस्थेवरील अभ्यासपूर्ण अहवाल सादर करून वाहतूक कोंडी कमी करण्यासाठी विविध उपाययोजना आणि शिफारशी मांडल्या.
सूत्रसंचालन अर्चना शहा यांनी केले. अविनाश बागवे यांनी आभार मानले.

पुणे : जातीधर्मभेद न मानणारा, समतेचा आणि बंधुतेचा पुरस्कार करणारा सुधारकांचा विचार सावित्रीबाई फुले यांनी त्यांच्या कवितेतून मांडला. त्यांच्या कवितेच्या केंद्रस्थानी समाजक्रांतीचा विचार आहे, असे मत प्रसिद्ध लेखक आणि वक्ते प्रा. मिलिंद जोशी यांनी व्यक्त केले. ही ‘काव्यफुले’ ‘क्रांतीफुले’ आहेत असे म्हटले तर वावगे ठरणार नाही. कारण ही क्रांतीफुले तुमच्या मनामध्ये विचारांच्या ठिणग्या निर्माण करतील, असेही ते म्हणाले.

चपराक प्रकाशनाच्या वतीने सावित्रीबाई फुले यांच्या ‘काव्यफुले’ या कवितासंग्रहाच्या लोकार्पण सोहळ्यात ते बोलत होते. भरत नाट्य मंदिर येथे गुरुवारी (दि. ४) कार्यक्रमाचे आयोजन करण्यात आले होते. सुप्रसिद्ध लेखक, संशोधक संजय सोनवणी, काकडे शैक्षणिक संकुलचे अध्यक्ष ॲड. शिवाजीराव काकडे, कार्यक्रमाचे निमंत्रक घनश्याम पाटील, ज्ञानेश्र्वर तापकीर, चंद्रलेखा बेलसरे, शुभांगी गिरमे मंचावर होते.

सध्या जातीपातीच्या राजकारणामुळे महाराष्ट्राची सामाजिक वीण उसवत चालली आहे. दुभंगलेला समाज कधीही उत्कर्षाच्या वाटेने जाऊ शकत नाही. समता आणि बंधुता ही राजघटनेतील मूल्ये कृतीत उतरायला हवीत, अशी अपेक्षा व्यक्त करून प्रा. जोशी म्हणाले, सामाजिक आरोग्याची हानी करणारी जातीव्यवस्था, गुलामगिरी, अंधश्रद्धा आणि रूढी-परंपरा यांच्या विषयीची चीड सावित्रीबाई फुले यांच्या कवितेतून व्यक्त झाली आहे. अज्ञान हा समाजाचा सर्वात मोठा शत्रू आहे. अविद्येची काजळी दूर होऊन विद्येचा प्रकाश सर्वदूर पोहोचल्याशिवाय जनसामान्यांचा उद्धार होणार नाही, असा विचार त्यांनी कवितेतून प्रभावीपणे मांडला आहे. मानव्याची प्रतिष्ठापना हेच सावित्रीबाई यांच्या कवितेचे ब्रीद आहे. जेव्हा समाज जीवनाचा तोल ढळतो, तत्त्वांना ग्लानी येते, नीतीचा विपर्यास होतो आणि माणसांचा पशु होतो तेव्हा समाजाला सावरण्याचे काम कवींनी करायचे असते. हेच काम सावित्रीबाईंनी त्यांच्या कवितेतून केले.

संजय सोनवणी म्हणाले, सावित्रीबाई फुले यांच्या सामाजिक दंभावर हल्ले करणाऱ्या, निसर्गाशी जवळीक साधणाऱ्या कविता लोकांपासून दूर राहिल्या याचे उत्तर पुरोगाम्यांच्या विचित्र मानसिकतेत आहे. त्यामुळेच त्यांच्या आद्यतेवरचा अधिकार डावलला गेला. सावित्रीबाई फुले यांचा तत्कालीन स्थितीतील सामाजिक आक्रोश, जगाला ज्ञानवंत बनविण्याची तळमळ ते स्वत:च निर्मिक होण्याच्या प्रक्रियेचा सामाजिक-मानसिक प्रवास या काव्यसंग्रहातून अनुभवता येणार आहे.

प्रास्ताविकात घनश्याम पाटील यांनी सावित्रीबाई फुले यांनी १७२ वर्षांपूर्वी लिहिलेल्या ‘काव्यफुले’ या पुस्तकाचे पुन:प्रकाशन करण्यामागील भूमिका विशद केली. ते म्हणाले, तत्कालीन परिस्थितीवर केलेले भाष्य समाजासमोर यावे आणि सावित्रीबाई फुले आधुनिक मराठी कवितेच्या जनक आहेत हे समाजाला समजावे या हेतूने पुस्तक प्रकाशित करण्यात येत आहे. ॲड. शिवाजीराव काकडे, ज्ञानेश्र्वर तापकीर यांनी मनोगत व्यक्त केले. कार्यक्रमाचे सूत्रसंचालन संदीप वाकचौरे यांनी केले.

कार्यक्रमाच्या उत्तरार्धात ‘पुन्हा क्रांतिज्योती’ हा एकपात्री नाट्यप्रयोग डॉ. सोमनाथ मुटकुळे यांनी सादर केला.

७,००० हरकतींवर प्रत्यक्ष सुनावणी घेण्याची मागणी

पुणे:
गणेशखिंड रस्त्याच्या रिझर्व्ह बँक इन्स्टिट्यूट ते संचेती चौक दरम्यानच्या ४५ मीटर रुंदीकरणासाठी सुमारे ५२९ ऐतिहासिक आणि जुने वृक्ष कापण्याच्या पुणे महानगरपालिकेच्या प्रस्तावाला आता तीव्र विरोध सुरू झाला असून, या प्रकरणात शिवसेना नेत्या आणि विधान परिषदेच्या मा.उपसभापती आ. डॉ. नीलम गोऱ्हे यांनी थेट हस्तक्षेप केला आहे. मनपा प्रशासनाने १ मार्च २०२६ रोजी हा प्रस्ताव वृक्ष प्राधिकरणासमोर मांडला होता आणि २ एप्रिल रोजी जाहीर नोटीस प्रसिद्ध करून नागरिकांकडून हरकती मागवल्या होत्या. या आवाहनाला प्रतिसाद देत पर्यावरणप्रेमी पुणेकरांनी तब्बल ७,००० हरकती नोंदवल्या आहेत. या पार्श्वभूमीवर डॉ. गोऱ्हे यांनी पुणे मनपा आयुक्तांना पत्र लिहून प्रशासनाचे लक्ष वेधले असून, ही नियोजित वृक्षतोड त्वरित थांबवण्याची आणि वृक्ष संवर्धन करण्याची आग्रही मागणी केली आहे.

​डॉ. नीलम गोऱ्हे यांनी पत्रात नमूद केले आहे की, महाराष्ट्र नागरी क्षेत्र वृक्ष संवर्धन नियमानुसार एवढ्या मोठ्या संख्येने आलेल्या हरकतींवर नागरिकांना प्रत्यक्ष बोलावून त्यांची सुनावणी घेणे आवश्यक आहे. मेट्रो लाईन-३ च्या पिलर्समुळे रस्त्याची रुंदी काही ठिकाणी आधीच मर्यादित झाली असल्याने, केवळ झाडे कापून वाहतूक कोंडी पूर्णपणे सुटणार नाही. याउलट, ‘परिसर’ संस्थेने तसेच पर्यावरण संस्थांनी सुचवलेल्या पर्यायी डिझाईनचा वापर केल्यास, रस्त्याच्या उपलब्ध जागेतच सायकल ट्रॅक आणि पादचारी मार्गासह उत्तम नियोजन करणे शक्य आहे, ज्यामुळे एकही झाड कापण्याची गरज पडणार नाही.

​या समस्येवर सुवर्णमध्य काढण्यासाठी डॉ. गोऱ्हे यांनी मनपा प्रशासनाला काही महत्त्वाच्या सूचना केल्या आहेत. या प्रस्तावाला तूर्तास स्थगिती देऊन, पुढील ८ दिवसांत मनपाचे नगर अभियंता, वाहतूक पोलीस, ‘परिसर’ संस्था आणि मॉडेल कॉलनी पर्यावरण समितीच्या प्रतिनिधींची एक संयुक्त बैठक त्यांच्या उपस्थितीत आयोजित करण्यात यावी, अशी इच्छा त्यांनी व्यक्त केली आहे. या बैठकीत तज्ज्ञांच्या पर्यावरणपूरक डिझाईनचा प्रत्यक्ष जागेवर पडताळा घेऊन पुढील काम करावे, असे त्यांनी सुचवले आहे. पुणेकरांचा विकासकामांना विरोध नाही, परंतु पर्यावरणाचा समतोल राखून आणि जनभावनेचा आदर करून प्रशासनाने यावर सर्वसमावेशक निर्णय घ्यावा, अशी विनंती डॉ. नीलम गोऱ्हे यांनी या पत्राद्वारे केली आहे.

पुणे, दि.५: फुगेवाडी, दापोडी व हडपसर येथील प्रथमदर्शनी मेथेनॉल मिश्रित गावठी दारू प्राशन घटनेनंतर राज्य उत्पादन शुल्क विभागाकडून २९ मे ते ४ जून या कालावधीत धडक कारवाई करुन एकूण १ कोटी ४७ लाख २७ हजार १४५ रुपये किंमतीचा मुद्देमाल जप्त करण्यात आलेला आहे, अशी माहिती अधीक्षक अतुल कानडे यांनी दिली आहे.

राज्य उत्पादन शुल्क आयुक्त राजेश देशमुख, सह आयुक्त अंमलबजावणी व दक्षता , प्रसाद सुर्वे, पुणे
विभागीय उपायुक्त सागर धोमकर, यांच्या मार्गदर्शन व सूचनेनुसार पुणे विभागाने अवैध गावठी दारू निर्मिती व विक्री करणाऱ्यांविरुद्ध धडक कारवाई केली आहे.

या कालावधीत एकूण १४२ गुन्हे नोंद करण्यात आले असून एकूण ११६ आरोपींना अटक करण्यात आलेले आहे. सदर गुन्ह्यामध्ये ८ हजार ४७२ लि. तयार गावठी दारू जप्त करण्यात आली असून गावठी दारू तयार करण्यासाठीचे ६९ हजार २७१ लि. रसायन जागीच नाश करण्यात आले आहे. तसेच ११ हजार ७३३ लि. परराज्यातील व बनावट मद्य ही जप्त करण्यात आले आहे. दारूच्या अवैध वाहतुकीसाठी वापरण्यात आलेली एकूण ११ वाहने जप्त करण्यात आलेली आहेत.

सर्व विक्री व निर्मितीचे हॉटस्पॉट संवेदनशील गाव येथील हातभट्टी केंद्र नेस्तनाबूत करण्याच्या सूचना देण्यात आलेल्या आहेत. तसेच हातभट्टी निर्मितीसाठी लागणारा कच्चामाल पुरवठादारांना गुन्ह्यात आरोपी करून कारवाई करण्याचे निर्देश दिलेले आहेत.

सराईत गुन्हेगारा कडून महाराष्ट्र दारूबंदी कायदा १९४९ चे कलम ९३ नुसार चांगल्या वर्तणुकीचे बंधपत्र घेण्यासाठी एकूण १२५ प्रस्ताव दाखल करण्यात आलेले आहेत.

मेथेनॉल मिश्रित दारूप्राशन करून नागरिकांचा मृत्यू झाल्याचा गुन्हा सीआयडीकडे वर्ग करण्यात आला आहे. त्या गुन्ह्याशी संबंधित राज्य उत्पादन शुल्क विभागाने ३ गुन्हे नोंदविले होते त्यांचा तपास सीआयडी सोबत करण्यात येत आहे.

जिल्हाधिकारी श्री.गजानन पाटील यांनी पुणे व पिं. चि. मनपा आयुक्त यांना त्यांचे हद्दीमध्ये विषारी दारूचे दुष्परिणाम व त्यास प्रतिबंध घालण्यासाठी ध्वनिफीत घंटागाडीच्या ध्वनिक्षेपावरून वाजविणे तसेच राज्य उत्पादन शुल्क विभागाकडून गावठी दारूच्या नोंदविलेल्या गुन्ह्याची ठिकाणे अवैध बांधकामावर निष्कासनाची कारवाई करण्याची विनंती केली आहे. अशाच प्रकारच्या सूचना सर्व नगरपरिषद, नगरपालिका, नगर पंचायतीचे मुख्याधिकारी यांना देण्यात आलेल्या आहेत. तसेच सर्व उप विभागीय दंडाधिकारी , सर्व पोलीस उपायुक्त पुणे व पिंपरी-चिंचवड यांना विषारी दारूसारख्या घटनांची पुनरावृत्ती होऊ नये यासाठी सराईत गुन्हेगारांवर जरब बसण्यासाठी कलम ९३ खाली अधिकाधिक रक्कमेचे बंधपत्र घेण्याच्या सूचना दिल्या आहेत. सर्व ग्रामपंचायतींचे सरपंच,ग्रामसेवक, तलाठी यांना त्यांच्या गावामध्ये गावठी दारू निर्मिती व विक्री करणाऱ्यांची माहिती राज्य उत्पादन शुल्क विभागाला देण्याबाबत व सरकारी जमिनीचा अवैध धंद्यांसाठी वापर होत असल्यास त्याला प्रतिबंध करण्याबाबत सूचना देण्याबाबतच्या सूचना (नोटीस) राज्य उत्पादन शुल्क विभाग मार्फत देण्यात आल्या आहेत. तसेच महावितरणलाही अशा अवैध दारू व्यवसायात गुंतलेल्या गुन्हेगारांना देण्यात आलेल्या अधिकृत किंवा अनधिकृत वीज जोडण्या तोडण्याच्या सूचना देण्यात आलेल्या आहेत. तसेच गावठी दारू निर्मिती करणारऱ्यास गुळाचा पुरवठा करणाऱ्या व्यापाऱ्यानाही कलम १६८ खाली प्रतिबंधात्मक सूचना देण्यात आल्या आहेत.

मेथेनॉल बाबत सह आयुक्त, औषध प्रशासन विभाग यांना भेटून पुणे जिल्ह्यातील सर्व मेथेनॉल अनुज्ञप्ती धारक, पुरवठादार यांची यादी प्राप्त करून घेण्यात आलेली आहे. सर्व घटकांना राज्य उत्पादन शुल्क अधिकाऱ्यांना प्रत्यक्ष भेट देऊन भा.ना.सु. संहितेच्या कलम १६८ नुसार नोटीस बजाविण्यात आलेल्या आहेत. औषध प्रशासन विभागाकडून मेथेनॉलच्या पुरवठादारांच्या व्यवहारांची तपासणी करून अवैध करण्यासाठी मेथेनॉलचा पुरवठा केल्यास कडक कारवाई करण्याबाबत विनंती केली आहे.

राज्य उत्पादन शुल्क विभागाकडून नागरिकांना अवैध गावठी दारूपासून दूर राहण्याच्या व अशा बेकायदेशीर धंद्यात गुंतलेल्या गुन्हेगारांविषयी माहिती असल्यास टोल फ्री क्रमांक १८००२३३९९९९ किंवा ०२०-२६१२७३२१ दूरध्वनी क्रमांकावर संपर्क करण्याचे आवाहन राज्य उत्पादन शुल्क अधीक्षक अतुल कानडे यांनी केले आहे.

पुणे- शहराच्या पर्यावरणाचे संतुलनाठी व शहराचे तापमान आरोग्याचे दृष्टीने योग्य राहण्यासाठी मोठ्या प्रमाणावर वृक्षारोपण व संवर्धन करणे काळाची गरज आहे. पुणे महानगरपालिका उद्यान विभाग व वृक्ष प्राधिकरणामार्फत वृक्ष लागवड, संगोपन व संवर्धन तसेच पर्यावरण संवर्धनाकरिता विविध उपक्रम कायम राबवित असते.
पुणे शहर हरित होण्याच्या दृष्टीने यावर्षी “हरित पुणे,समृद्ध पुणे” या मोहिमेअंतर्गत मोठ्या प्रमाणावर स्थानिक वृक्षांची लागवड करण्यात येणार आहे.
जागतिक पर्यावरण दिनानिमित्ताने वनमहोत्सवातर्गत अल्प दरात रोपे विक्री व वृक्षारोपण आणि बीज संकलन केंद्र असे विविध उपक्रमांचे उदघाटन शुक्रवार, दिनांक ०५ जून २०२६ रोजी सकाळी १०.३० वा. छत्रपती संभाजीराजे उद्यान, जंगली महाराज रस्ता, शिवाजीनगर, या ठिकाणी अतिरिक्त महापालिका आयुक्त (विशेष) ओमप्रकाश दिवटे यांच्या प्रमुख उपस्थितीत पार पडले. सदर कार्यक्रमास मकरंद टिल्लू, मुख्य समन्वयक विश्वस्थ, नवचैतन्य हास्ययोग परिवार , अॅड.राजेंद्र आगरवाल व नव चैतन्य हास्ययोग परिवाराचे सदस्य व मोठ्या संख्येने नागरिक उपस्थित होते.
सदर कार्यक्रमास पुणे महानगरपालिकेचे डॉ.अशोक दि.घोरपडे,सह महापालिका आयुक्त तथा सदस्य सचिव, वृक्ष प्राधिकरण, राजेश बनकर,मुख्य अभियंता,पथ विभाग, संतोषकुमार कांबळे, उद्यान अधिक्षक, प्रिती प्रसाद ,उद्यान अधिक्षक,स्नेहल हरपळे,उद्यान अधिक्षक, रत्नाकर करडे, सहाय्यक उद्यान अधिक्षक तसेच उद्यान विभागाकडील उप अभियंता शाखा अभियंता कनिष्ठ अभियंता, हॉर्टीकल्चर मिस्त्री,माळी, कर्मचारी उपस्थित होते.
पावसाळी हंगामामध्ये पुणे महानगरपालिका हद्दीमध्ये वृक्ष लागवडीचे काम मोठ्या प्रमाणावर होण्यासाठी जागतिक पर्यावरण दिनानिमित्ताने वनमहोत्सव उपक्रमांतर्गत इच्छुक वृक्षप्रेमी, नागरिक व स्वयंसेवी संस्थांना अतिरिक्त महापालिका आयुक्त (विशेष) ओमप्रकाश दिवटे यांच्या हस्ते रोपांचे वाटप करण्यात आले व त्यांचे हस्ते छत्रपती संभाजीराजे उद्यान परिसरामध्ये ‘बेल’ प्रजातीचे वृक्ष रोपण करण्यात आले.
जागतिक पर्यावरण दिनानिमित्त संपूर्ण पुणे शहरात वृक्षारोपण कार्यक्रमाचे आयोजन करण्यात आले असून वृक्ष प्राधिकरणामार्फत १५ क्षेत्रिय कार्यालयाच्या हद्दीत व उद्यान विभागामार्फत विविध उद्यानात लोकसभा, विधानसभा सदस्य, सभासद, पुणे महानगरपालिका, स्वयंसेवी संस्था, नागरिक यांचे उपस्थितीत वृक्षारोपण करण्यात आले. तसेच शहर अभियंता यांचे उपस्थितीत पुणे महानगरपालिका नदी पुनर्जीवन प्रकल्पा अंतर्गत देखील वृक्ष लागवड करण्यात आली.

वनमहोत्सवातर्गत इच्छुक वृक्ष प्रेमी, नागरिक, स्वयंसेवी संस्था यांना पुणे महानगरपालिका हद्दीमध्ये वृक्ष लागवडीसाठी पुणे महानगरपालिका वृक्ष प्राधिकरणामार्फत दिनांक ०५ जून २०२६ ते १४ ऑगस्ट २०२६ या कालावधीमध्ये एक ते दीड वर्षाचे स्थानिक जातींच्या रोपांचे र.रु.५/- प्रति रोप अशा सवलतीच्या दरामध्ये वाटप करण्यात येत आहे. तसेच नागरिकांनी आपल्याकडे उपलब्ध असलेल्या वृक्षांची, फळ झाडांच्या बिया, बीज, गोळे व रोप निर्मितीकरिता बीज संकलन केंद्रात जमा करावे असे आवाहन नागरिकांना करण्यात येत आहे. सदर कालावधीत घनकचरा व्यवस्थापन विभागामार्फत तयार करण्यात आलेले सेंद्रिय खत देखील नागरिकांसाठी उपलब्ध करण्यात आले आहे.
सदर उपक्रम दिनांक ०५ जून २०२६ ते १४ ऑगस्ट २०२६ या कालावधीत छ.संभाजीराजे उद्यान येथील रोपवाटिका, जंगली महाराज रस्ता, बालगंधर्व रंगमंदिर शेजारी, शिवाजीनगर, पुणे ४११००५ या ठिकाणी सकाळी ०८.०० ते सायंकाळी ०४.०० (रविवार व शासकीय सुट्टी सोडून) या वेळेत सुरु राहील. तरी जास्तीत जास्त नागरिकांनी याचा लाभ घ्यावा व हरित पुणे उपक्रमास हातभार लावावा.
सदर रोपे वाटप उपक्रमाबाबत अधिक माहितीकरिता श्री.रत्नाकर करडे ,सहाय्यक उद्यान अधिक्षक – मो.नं.९६८९९३८५२३ किंवा श्री.रविंद्र कांबळे,वृक्ष निरीक्षक – मो.नं.-८३०८८४१५२५ यांच्याशी संपर्क साधावा.

पुणे- :-
जागतिक पर्यावरण दिनानिमित्त पंतप्रधान नरेंद्र मोदी यांनी केलेल्या एक पेड मा के नाम या संकल्पनेला अनुसरून भारतीय जनता पार्टी पुणे शहराच्या वतीने ३०२०बूथ वर प्रत्येकी २५झाडे लावण्याचा संकल्प केला आहे ७जून पर्यंत चालणाऱ्या ह्या अभियानात सुमारे ७५५०० झाडे लावण्यात येणार आहेत अशी माहिती शहराध्यक्ष धीरज घाटे यांनी दिली
यावेळी बोलताना घाटे म्हणाले, शहरात मोठ्या प्रमाणात काँक्रेट चे जंगल झाले आहे ज्यामुळे निसर्गाला हानी पोहोचत आहे निसर्गाचा समतोल राखण्यासाठी झाडे हे प्राणवायू स्रोत आहेत तीच नष्ट होत असतील तर शहरांची परिस्थिती भयंकर होईल म्हणून भारतीय जनता पार्टी पुणे शहराच्या वतीने हा उपक्रम हाती घेण्यात आला आहे पंतप्रधान नरेंद्र मोदी यांनी ‘एक पेड माँ के नाम ‘ संकल्पना मांडून वसुंधरा मातेला एक प्रकारे वंदन केले आहे याचेच अनुसरणं पुणे शहरतील भारतीय जनता पार्टीचा प्रत्येक कार्यकर्ता करेल हा विश्वास आहे
या पर्यावरण पर्वा निम्मित स्वच्छता अभियान देखील मोठ्या प्रमाणात राबविण्यात येणार असल्याचे घाटे यांनी नमूद केले आहे या अभियानासाठी पश्चिम महाराष्ट्राच्या संयोजिका म्हणून खासदार डॉ मेधा कुलकर्णी यांची तर पुणे शहराच्या संयोजिका म्हणून नगरसेविका व पुणे शहर सरचिटणीस प्रियांका शेंडगे -शिंदे यांची नेमणूक करण्यात आली आहे.

स्थायी समितीच्या माजी अध्यक्षा संगीता देवकर : रोटरी क्लब ऑफ पूना मिडटाउन तर्फे सेवा उत्कृष्टता गौरव पुरस्कार

पुणे : प्रत्येक महिलेमध्ये कोणत्यातरी प्रकारचे गुण दडलेले असतात. या गुणवत्तेला प्रोत्साहन दिल्यास ती महिला आपल्या पायावर उभी राहू शकते. एक महिला जर आपल्या पायावर उभी राहिली, तर ती निश्चितच आर्थिकदृष्ट्या स्वयंपूर्ण होऊन कुटुंबाला आधार देऊ शकते.  महिलांच्या गुणवत्तेला प्रोत्साहन दिल्यास त्यामधून रोजगार निर्मिती शक्य होते, असे मत पुणे महापालिकेतील स्थायी समितीच्या माजी अध्यक्षा राणी लक्ष्मीबाई महिला प्रशिक्षण संस्थेच्या प्रमुख संगीता देवकर यांनी व्यक्त केले.

रोटरी क्लब ऑफ पूना मिडटाऊन तर्फे सामाजिक क्षेत्रातील महत्त्वपूर्ण योगदानासाठी भांडारकर इन्स्टिट्यूट मधील सभागृहात संगीता देवकर यांना रोटरी क्लबचे डिस्ट्रीक्ट गव्हर्नर संतोष मराठे यांच्या हस्ते सेवा उत्कृष्टता गौरव पुरस्कार प्रदान करण्यात आला. त्यावेळी त्या बोलत होत्या. संस्थेचे प्रमुख  डॉ. चंद्रशेखर वळव्हणकर, हेमंत तोडकर, शोभा सोमाणी आदी यावेळी उपस्थित होते. रोटरी क्लबच्या सामाजिक कार्यासाठी आर्थिक योगदान देणाऱ्या  डॉ. चंद्रशेखर वळव्हणकर, विद्यासागर जाधव, जोस्ना जाधव, सुनील हिंगमिरे, सचिन देशपांडे यांचा यावेळी गौरव करण्यात आला.

संगीता देवकर म्हणाल्या, पुणे महापालिकेच्या सहयोगाने २००४ मध्ये महाराणी लक्ष्मीबाई महिला प्रशिक्षण संस्था सुरू करण्यात आली . या संस्थेच्या माध्यमातून आतापर्यंत २२ हजार महिलांना ब्युटी पार्लर मोबाईल दुरुस्ती, मेकअप, मेहंदी अशा विविध प्रकारच्या गुणवत्ता प्रशिक्षण देण्यात आले. या महिलांनी स्वतःचे व्यवसाय सुरू केले आहे. यामुळे केवळ महिलाच स्वतःच्या पायावर उभे राहिलेल्या नाहीत तर त्यातून आम्ही कुटुंब स्वयंपूर्ण करण्यास मदत केली आहे.

त्या पुढे म्हणाल्या, राजकारण हे आळूच्या पानावरील दवा प्रमाणे असते. ते कायमस्वरूपी टिकत नाही. परंतु राजकारणाच्या माध्यमातून जर समाजकारण केले आणि समाजाला आपल्या पदाचा उपयोग करून देता आला, तर त्यामधून मिळणारे समाधान हे वेगळ्या प्रकारचे असते. राजकारण कायमस्वरूपी टिकत नाही, परंतु समाजकारण हे कायमस्वरूपी टिकते आणि त्याचा निश्चितच समाजामध्ये सकारात्मक बदल घडण्यास मदत होते, असेही त्यांनी यावेळी सांगितले.

संतोष मराठे म्हणाले, संगीता देवकर यांनी महिलांना प्रशिक्षण देऊन त्यांना त्यांच्या पायावर उभे करून स्वयंपूर्ण करण्याचे महत्त्वपूर्ण काम केले आहे. आजही समाजामध्ये कोणतीही अपेक्षा न ठेवता सेवाभावी वृत्तीने जागृत राहून इतरांसाठी काम करणाऱ्या व्यक्ती आणि संस्था कार्यरत आहेत. रोटरीने त्यांना त्यांच्या कार्याचा गौरव करण्यास निश्चितच थोडासा उशीर केला आहे. इतरांच्या सेवेचा सन्मान ठेवणे आणि त्यातून आदर आणि सेवाभाव वाढीस लावणे, हे रोटरीचे मुख्य उद्देश आहे. त्यामधूनच  संगीता देवकर यांची या पुरस्कारासाठी निवड केली आहे. संगीता देवकर यांच्या कार्यातून प्रोत्साहन घेऊन इतरांनी महिलांना स्वयंपूर्ण करण्यास सहयोग केल्यास त्याचा समाज बांधणीत महत्वाचे योगदान देता येऊ शकते. 

डॉ. चंद्रशेखर वळव्हणकर म्हणाले , समाजहित आणि मानव सेवा केंद्रबिंदू ठेवून रोटरी क्लब ऑफ पूना मिडटाऊन कार्य करत आहे. पुणे आणि जुन्नर परिसरात डोळ्यांच्या १ हजार  मोफत शस्त्रक्रिया करण्याचे ध्येय पुन्हा संस्थेने ठेवले असून आतापर्यंत ४०० शस्त्रक्रिया करण्यात आल्या आहेत.

पुणे, दि. ५ जून, २०२६- महावितरण पुणे ग्रामीण मंडलच्या अधीक्षक अभियंता पदी सुरेश सवाईराम पदोन्नतीने तर अधीक्षक अभियंता (पायाभूत आराखडा) या पदावर संजय वाघमारे बदलीद्वारे नुकतेच रुजू झाले झाले आहेत. यांचेसोबतच पुणे परिमंडलास ५ नविन कार्यकारी अभियंतेही मिळाले आहेत. मुख्य अभियंता सुनिल काकडे यांनी पुणे परिमंडलात सर्वांचे स्वागत करुन जोमाने व ग्राहकाभिमुख काम करण्याच्या सूचना दिल्या.

सांगली येथील वालचंद महाविद्यालयातून अभियांत्रिकी शिक्षण पूर्ण करुन सुरेश सवाईराम यांनी तत्कालिन वीज मंडळात १९९४ साली चिपळूण येथे सहाय्यक अभियंता म्हणून सेवेला सुरुवात केली. २००२ ते २०१० हातकणंगले येथे उपकार्यकारी अभियंता, २०१० ते २०१४ नाशिक येथे अति. कार्यकारी अभियंता तर २०१६ ते २०२६ या काळात नाशिक शहर विभाग-१, भांडूप शहर विभाग व सांगली ग्रामीण विभागात कार्यकारी अभियंता म्हणून त्यांनी काम केले आहे. नुकत्याच झालेल्या पदोन्नतीवर ते पुणे ग्रामीण मंडलात अधीक्षक अभियंता म्हणून ते रूजू झाले आहेत.

महावितरण सांघिक कार्यालयात अधीक्षक अभियंता (अपारंपरिक ऊर्जा) या पदावर कार्यरत असलेले संजय वाघमारे पुणे परिमंडलाच्या पायाभूत आराखडा विभागात अधीक्षक अभियंतापदी नुकतेच बदलीवर रुजू झाले. १९९९ साली वीज मंडळात सहा. अभियंतापदी वाघमारे यांची निवड झाली. त्यानंतर २००६ साली सरळ सेवेतून उपकार्यकारी अभियंता, २०१० साली अति. कार्यकारी अभियंता, २०१६ मध्ये कार्यकारी अभियंता व २०२४ साली सरळ सेवेतूनच ते अधीक्षक अभियंता झाले. या सेवाकाळात त्यांनी अनुक्रमे कल्याण, पुणे, केडगाव, बारामती व मुंबई येथे काम केले आहे.

कार्यकारी अभियंतापदामध्येही बदल

नुकत्याच झालेल्या पदोन्नती व बदल्यांमुळे पुणे परिमंडलात काही विभागांचे कार्यकारी अभियंता बदलले आहेत. यामध्ये रास्तापेठ, पद्मावती, भोसरी या संवसु विभागासह गणेशखिंड व पुणे ग्रामीण चाचणी विभागाचा समावेश आहे. रास्तापेठ विभागाला राहूल पाटील, पद्मावती विभाग- सचिन पाटील, भोसरी विभाग- विश्वनाथ लहाने, गणेशखिंड चाचणी विभाग- मिलिंद चौधरी तर पुणे ग्रामीण चाचणी विभागाच्या कार्यकारी अभियंतापदी डॉ. जितेंद्रकुमार राठौर रुजू झाले आहेत.