ज्ञानेश्वर माऊलींच्या जयघोषात फुलांची आकर्षक सजावट केलेली बस झाली मार्गस्थ

पुणे-पीएमपीएमएल कडून आज पासून मार्ग क्रमांक ८३ – एन.डी.ए. गेट (गेट नं.१०) ते आळंदी हा नवीन बस मार्ग सुरू करण्यात आला. पुणे महानगरपालिकेचे नगरसेवक तथा पीएमपीएमएलचे संचालक प्रकाश ढोरे यांच्या हस्ते कोंढवे धावडे येथे या बससेवेचा लोकार्पण सोहळा पार पडला. प्रकाश ढोरे यांच्या विशेष प्रयत्नातून हि बससेवा सुरू झाली.
याप्रसंगी पुणे महानगरपालिकेच्या नगरसेविका सायली वांजळे, नगरसेवक सचिन दांगट, हवेली तालुका पंचायत समिती सभापती बाळासाहेब मोकाशी, कोंढवे धावडे गावचे उद्योजक अमोल धावडे, माजी उपसरपंच सौ. स्नेहलताई धावडे, पीएमपीएमएलचे वाहतूक नियोजन व संचलन अधिकारी चंद्रकांत वरपे, सहाय्यक आगार व्यवस्थापक सुरेंद्र दांगट, राजेश जाधव यांची प्रमुख उपस्थिती होती.
मार्ग क्रमांक ८३ – एन.डी.ए. गेट (गेट नं.१०) ते आळंदी या बससेवेचा मार्ग एन.डी.ए. गेट, उत्तमनगर, माळवाडी, कर्वेरोड, डेक्कन, शिवाजीनगर, मुळा रोड, विश्रांतवाडी, दिघी, मॅगझीन चौक, चऱ्होली फाटा, आळंदी असा आहे. सध्या या मार्गावर एक बस उपलब्ध असून प्रवाशी प्रतिसाद व उत्पन्न वाढल्यास बससंख्या वाढविली जाईल.
एन.डी.ए. गेट ते आळंदी पहिली बस सकाळी ६.०० वा. तर शेवटची बस संध्याकाळी ७.४५ वा. आहे. तसेच आळंदी ते एन.डी.ए. गेट पहिली बस सकाळी ७.५० वा. तर शेवटची बस संध्याकाळी ५.०५ वा. असून आळंदीहून रात्री ९.५५ वा. शेवटची फेरी कोथरूड स्टँड पर्यंत आहे.
या बस लोकार्पण सोहळ्यावेळी बोलताना प्रकाश ढोरे म्हणाले,”आळंदीला जाणेसाठी कोंढवे धावडे, उत्तमनगर, शिवणे व परिसरातील नागरिकांनी दुचाकी व चारचाकी वाहनांचा वापर टाळून पीएमपीएमएलच्या या बससेवेचा जास्तीत जास्त वापर करावा. जेणेकरुन वाहतूक कोंडी कमी होण्यास मदत होईल.”
स्नेहल धावडे म्हणाल्या, “एन.डी.ए. गेट ते आळंदी अशी थेट बससेवा पीएमपीएमएलने सुरू केल्यामुळे कोंढवे धावडे, उत्तमनगर, शिवणे व परिसरातील नागरिकांची चांगली सोय होणार आहे.”
लोकार्पण सोहळ्यानंतर बस मार्गस्थ झाल्यानंतर उत्तमनगर येथे माजी सरपंच सुभाष नाणेकर व त्यांच्या कार्यकर्त्यांनी बबससेवेचे स्वागत केले. तसेच गणपती माथा येथे पुणे महानगरपालिकेच्या विरोधी पक्षनेत्या दिपाली प्रदीप धुमाळ, दिलीप उर्फ बाबा धुमाळ व त्यांच्या कार्यकर्त्यांनी बससेवेचे स्वागत केले.

पुणे, ८ मार्च २०२२: पुणे जिल्हा बुद्धिबळ सर्कल(पीडीसीसी) यांच्या वतीने व महाराष्ट्र बुद्धिबळ संघटनेच्या मान्यतेखाली महाराष्ट्र राज्य 8 वर्षाखालील खुल्या व मुलींच्या गटाच्या निवड चाचणी बुद्धिबळ स्पर्धेचे आयोजन करण्यात आले आहे.    

महाराष्ट्र बुद्धिबळ संघटनेच्या संयुक्त विद्यमाने पुणे जिल्हा बुद्धिबळ मंडळातर्फे सिम्बायोसिस स्पोर्ट्स सेंटर, प्रभातरोड, पुणे येथे 12 ते 13 मार्च 2022 रोजी पुण्यात 8 वर्षाखालील ही राज्य निवडचाचणी बुद्धिबळ स्पर्धा  होणार आहे.

या स्पर्धेत 150 हून अधिक खेळाडूंचा सहभाग अपेक्षित आहे. ही स्पर्धा खुल्या मुले आणि मुलींच्या गटात होणार आहे. प्रत्येक गटात 10000/- अशी पारितोषीक रक्कम देण्यात येणार आहे. प्रत्येक गटातील अव्वल दोन खेळाडू हे हरियाणा येथे होणाऱ्या 8 वर्षांखालील राष्ट्रीय बुद्धिबळ स्पर्धेत महाराष्ट्राचे प्रतिनिधित्व करणार आहेत. 1 जानेवारी 2014 नंतर जन्मलेल्या किंवा त्यानंतरचे खेळाडू या स्पर्धेत भाग घेऊ शकतात. जिल्हास्तरीय स्पर्धांमध्ये निवडलेले खेळाडू 800/- भरून खेळू शकतात आणि इतर 1500/- ची डोनर एंट्री भरून भाग घेऊ शकतात.

प्रवेशाची अंतिम तारीख 10 मार्च 2022 आहे. अधिक माहितीसाठी स्पर्धेच्या संचालक आयए विनिता श्रोत्री यांना 9850439239 या क्रमांकावर आणि पीडीसीसीचे सचिव डॉ संजय करवडे यांच्याशी 9404983301या  क्रमांकावर संपर्क साधा.

पुणे, दि. ८ मार्च – जागतिक महिला दिनाचे औचित्य साधून मेसाई प्रतिष्ठानच्या वतीने ब्युटी क्षेत्रात कार्यरत असणार्‍या महिलांना प्रोत्साहन देण्यासाठी राज्यभरात विविध शहरांतील महिलांसाठी विशेष स्पर्धांचे आयोजन करण्यात आले होते. बेस्ट मेकअप टीचर आणि बेस्ट मेकअप अकॅडमी या स्पर्धेमधील विजेत्या स्पर्धाकांचा बक्षीस वितरण सोहळा स्वारगेट परिसरातील मराठा चेंबर ऑफ कॉमर्स पदमजी हॉल येथे हा सोहळा पार पडला.

यावेळी मेसाई प्रतिष्ठानचे अध्यक्ष विजय तळोले, उपाध्यक्ष सोनाली तळोले, खजिनदार आश्विनी लोले, पप्पू तळोले, सोमनाथ काशिद, रविंद्र घोसाळकर, नरेश कुलकर्णी, संतोष पांदे, सुहास जाधव उपस्थित होते.

बेस्ट मेकअप टीचर अवॉर्ड विजेते – वैशाली साळुंखे (तासगाव, सांगली), मनिषा जखोटीया (कल्याण, ठाणे),  शीला जगताप (फलटण, सातारा), तारा बनकर (जालना), बेस्ट ब्युटी टीचर पुरस्कार – सपना खाडे(रायगड), बेस्ट ब्युटी अकॅडमी पुरस्कार – सौंदर्या ब्युटी अकॅडमी (पारनेर, अहमदनगर)

विजय तळोले म्हणाले की, कोरोनाकाळात सातत्याने सलून व ब्युटी पार्लर व्यवसाय बंद राहत होता. त्यामुळे हातावर पोट असणारे बंधू –भगिनींवर उपासमारीची वेळ आली होती. उत्पन्नाचे इतर कोणतेही साधन उपलब्ध नसल्यामुळे तसेच कोरोनाच्या भितीमुळे ग्राहकांनी पाठ फिरवल्यामुळे गेले काही वर्ष या भगिनी हवालदील झाल्या होत्या. त्यामुळे मेसाई प्रतिष्ठानच्या वतीने त्यांना प्रोत्साहन देण्यासाठी विविध स्पर्धांचे आयोजन करण्यात आले होते.

पुणे, दि. ०८ मार्च २०२२: भोर तालुक्यातील खेड शिवापूर परिसरातील उद्योजक तसेच इतर वीजग्राहकांना दर्जेदार व विनाखंडित वीजपुरवठा करण्यासाठी पुढील १५ वर्षांमधील विजेची गरज लक्षात घेऊन सक्षमीकरण व नुतनीकरण योजनेअंतर्गत (एसएसएमआर योजना) सुमारे ५ कोटी रुपये खर्चाचे विविध कामे प्रगतीपथावर आहेत, अशी माहिती महावितरणकडून देण्यात आली.

या योजनेतून प्रामुख्याने १३२ केव्ही कामथडी येथून ३३/२२ केव्ही खेड शिवापूर डबल सर्किटचे काम अंतिम टप्प्यात आहे. मात्र काही स्थानिक नागरिकांकडून विविध कारणांमुळे वीजवाहिनीच्या कामामध्ये अडचणी येत असल्याने त्यांच्याशी चर्चा करून, त्यांची समजूत काढून व प्रसंगी पोलीस विभागाची मदत घेऊन वीजवाहिनीचे काम मार्गी लावण्यासाठी युद्धपातळीवर कामे सुरु आहेत. ही वीजवाहिनी कार्यान्वित झाल्यानंतर या परिसरातील सर्व वर्गवारीतील ग्राहकांचे वीजप्रश्न सुटणार आहेत व त्याची माहिती खेड शिवापूर औद्योगिक संघटनेस देण्यात आली आहे.

यासोबतच पायाभूत सुविधा योजना दोन अंतर्गत १० एमव्हीए क्षमतेचे अतिरिक्त पॉवर ट्रॉन्सफॉर्मर एक वर्षभरापुर्वी कार्यान्वित करण्यात आलेला आहे. तेव्हापासून वीजपुरवठा सुरळीत असून गेल्या चार वर्षांपासून विजेचा लपंडाव सुरु असल्याचा आरोप चुकीचा असल्याचे महावितरणकडून स्पष्ट करण्यात आले आहे. खेड शिवापूर परिसर हा मिश्र वर्गवारीतील ग्राहकांचा असून कृषी ग्राहकांची संख्या देखील लक्षणीय आहे. यामुळे या परिसरात होणारा वीजपुरवठ्यावर काही प्रमाणात वातावरणाचा देखील मोठा परिणाम होतो. वीजवापर हा मोसमानुसार कमी अधिक होतो.

सध्या उष्णता वाढत असल्याने विजेच्या मागणीत मोठी वाढ होत आहे. त्यामुळे वीजयंत्रणेवर ताण येत असला तरी तांत्रिक नियोजनातून वीजपुरवठा सुरळीत आहे. खेड शिवापूर परिसरातील दर्जेदार व सुरळीत वीजपुरवठ्यासाठी सुरु असलेल्या वीजयंत्रणेच्या सर्व कामांना स्थानिक नागरिकांनी सहकार्य करावे असे आवाहन महावितरणकडून करण्यात आले आहे.

डेक्कन एज्युकेशन सोसायटीच्या नवीन मराठी शाळेत महिला दिनानिमित्त कोरोना काळात शाळा बंद असल्याने अभ्यासात मागे पडणार्या विद्यार्थ्यांना स्वयंसेवी वृत्तीने शिकविणार्या माजी शिक्षिका आणि विद्यार्थिनींचा सन्मान करण्यात आला.
शाळेतील विद्यार्थिनींनी राष्ट्रमाता आणि सामाजिक, शैक्षणिक, सांस्कृतिक क्षेत्रांल प्रेरणादायी कामगिरी करणार्या महिलांच्या वेशभूषा करून त्यांच्या प्रती आदर व्यक्त केला. आनंदी बोराटे या विद्यार्थिनीने महाराणी ताराबाईचे स्वगत सादर केले. तिसरीच्या विद्यार्थ्यांनी स्वत: तयार केलेली भेटकार्ड आणि गजरे दिले.
शाला समितीच्या अध्यक्षा डॉ. प्राची साठे, डीईएसच्या प्रबंधक डॉ. सविता केळकर, माजी नगरसेविका ज्योत्स्ना सरदेशपांडे यांची प्रमुख उपस्थिती होती. मुख्याध्यापिका कल्पना वाघ यांच्या मार्गदर्शनाखाली रुपाली सावंत, सोनाली मुंढे, अर्चना देव, योगिता भावकर, अंतीर शेठ, तनुजा तिकोने, श्रीपाद जोशी, धनंजय तळपे यांनी संयोजन केले.

पुणे-डेक्कन एज्युकेशन सोसायटीच्या अहिल्यादेवी शाळेत जागतिक महिला दिनानिमित्त प्रसंगी जीव धोक्यात घालून समाज कार्य करणार्या क्रांत पवार, जया राऊत, अर्चना अभ्यंकर, पायल जिरेसाळ, कल्याणी वैराट, अमृता फासगे, नूतन साबळे या धाडसी महिलांचा सत्कार करण्यात आला. शाला समितीच्या अध्यक्षा डॉ. प्राची साठे, डीईएसच्या प्रबंधक डॉ. सविता केळकर, अड राजश्री ठकार यांची प्रमुख उपस्थिती होती.
मतदानाचा अधिकार, महत्त्व, मतदान करण्यासाठी लागणारी प्रगल्भता, वैचारिक बैठक, संवेदनशीलता याबाबत डॉ. साठे यांनी मार्गदर्शन केले. डॉ. केळकर यांनी जिद्द, शारीरिक आणि मानसिक स्वास्थ्य आदींचे महत्त्व सांगितले. मुख्याध्यापिका अनघा डांगे यांच्या मार्गदर्शनाखाली स्वाती मिश्रा, दीपाली थोरात, चारुता प्रभुदेसाई, मानसी देशपांडे, स्मिता राजगुरू यांनी संयोजन केले.

जिल्हाधिकाऱ्यांसह अन्य अधिकाऱ्यांनी घेतली विद्यार्थ्यांची भेट

पुणे दि.७- युक्रेन देशामध्ये युद्धजन्य परिस्थिती असल्याने भारतातून युक्रेनमध्ये वैद्यकीय शिक्षणासाठी गेलेल्या १०२ विद्यार्थ्यांना सुखरूप परत आणण्यात शासन व प्रशासनाला यश आले आहे. जिल्हाधिकारी डॉ.राजेश देशमुख यांनी जिल्हाधिकारी कार्यालयात युक्रेन येथील विद्यार्थिनी शाकंभरी लोंढेपाटील हिला पुष्पगुच्छ देऊन तिच्या धाडसाबद्दल अभिनंदन केले आणि तेथील परिस्थितीची माहिती घेतली.

जिल्हाधिकारी डॉ.देशमुख यांनी शाकंभरीच्या धाडसाचे कौतुक केले. तिने प्रतिकूल परिस्थितीतही न डगमगता धैर्याने परिस्थितीला तोंड दिले. तिने अशा परिस्थितीतही इतरही देशाच्या विद्यार्थ्यांना केलेली मदत स्तुत्य आहे, असे ते म्हणाले. शांकभरीने युक्रेनमधील परिस्थितीची माहिती जिल्हाधिकाऱ्यांना दिली. प्रतिकूल परिस्थितीत मुलीने दाखविलेल्या धाडसाबद्दल तिचे कौतुक करीत शाकंभरीचे वडील शाम लोंढेपाटील यांनी जिल्हाधिकाऱ्यांनी केलेल्या सहकार्याबद्दल त्यांना धन्यवाद दिले.

युक्रेनमधील विद्यार्थ्यांना परत आणण्यासाठी केंद्र व राज्य शासन तसेच जिल्हा प्रशासन सातत्याने प्रयत्नशील होते. जिल्हाधिकाऱ्यांच्या निर्देशानुसार जिल्हा प्रशासनामार्फत पालक आणि नातेवाईंकांना माहिती देण्यासाठी निवासी उपजिल्हाधिकारी हिंमत खराडे यांच्या मार्गदर्शनाखाली जिल्हा नियंत्रण कक्ष सुरू करण्यात आला. जिल्हा नियंत्रण कक्षात पालकांकडून विद्यार्थ्यांची माहिती प्राप्त झाल्यावर राज्य आपत्ती व्यवस्थापन कक्षाला या विद्यार्थ्यांची माहिती देण्यात आली.

नियंत्रण कक्षातर्फे जिल्हा आपत्ती व्यवस्थापन अधिकारी विठ्ठल बनोटे व त्यांचे सहकारी सातत्याने विद्यार्थ्यांच्या संपर्कात होते. विद्यार्थी असलेल्या ठिकाणाबाबत माहिती घेऊन दररोज सायंकाळी मंत्रालयातील कक्षाला त्याविषयी कळविण्यात येत होते. राज्य शासनातर्फे केंद्र सरकारच्या नियंत्रण कक्षाला याबाबत माहिती देण्यता येत होती. ‘ऑपरेशन गंगा’ अंतर्गत या विद्यार्थ्यांना विमानाने भारतात आणले गेले व राज्य शासनाने त्यांना महाराष्ट्रात आणण्याची व्यवस्था केली.

युक्रेनमधून परतलेल्या विद्यार्थ्यांचे प्रशासनातर्फे अभिनंदन
युक्रेनमध्ये असलेल्या १०९ विद्यार्थ्यांपैकी १०२ विद्यार्थी पुण्यात परतले असून ३ विद्यार्थी पोलंड येथे व १ विद्यार्थी ओमान या देशातील त्यांच्या पालकांकडे सुखरूप पोहोचले आहेत. इतर ३ विद्यार्थी प्रवासात असून लवकरच ते पुण्याला परततील. जिल्हाधिकारी डॉ.देशमुख यांच्या सुचनेनुसार उपविभागीय अधिकारी, तहसिलदार, नायब तहसिलदार, मंडळ अधिकारी आणि तलाठी यांनी जिल्ह्यात परतलेल्या विद्यार्थ्यांची घरी जाऊन भेट घेतली व ते सुखरुप परत आल्याबद्दल अभिनंदन केले. शासन आणि प्रशासनातर्फे वेळोवेळी संपर्क करून माहिती घेण्यात येत असल्याचे यावेळी विद्यार्थ्यांनी सांगितले.

जिल्हाधिकाऱ्यांनी खूप धीर दिला-शाकंभरी लोंढेपाटील
मी युक्रेनच्या दक्षिण भागात रहात होते. २४ फेब्रुवारी नंतर तीन दिवस बंकरमध्ये काढले. जवळचे खाद्य संपल्याने केवळ नळाच्या पाण्यावर रहावे लागले. त्यानंतर भारत सरकार, महाराष्ट्र शासन आणि विशेष करून जिल्हाधिकारी डॉ.राजेश देशमुख यांची खूप मदत झाली. जिल्हाधिकाऱ्यांनी दूरध्वनीद्वारे खूप धीर दिला. या सर्वांचे मी आभार व्यक्त करते.

पुणे (प्रतिनिधी):-महापालिकेच्या भारतरत्न अटल बिहारी वाजपेयी वैद्यकीय महाविद्यालयाला प्रवेश प्रक्रिया सुरू करण्यासाठीची अंतिम मंजुरी एनएमसीकडून प्राप्त झाली असून महापौर मुरलीधर मोहोळ यांच्या पाठपुराव्याला मोठे यश आले आहे. एनएमसीच्या मंजुरीनंतर यंदाच्या वर्षासाठी १०० प्रवेश देण्याची परवानगी देण्यात आली आहे. या परवानगीसह स्वतःचे वैद्यकीय महाविद्यालय असणारी महापालिका म्हणून पुण्याच्या शिरपेचात आणखी एक मानाचा तुरा रोवला गेला आहे. महापौर मुरलीधर मोहोळ यांनी हि माहिती दिली .

महापौर मुरलीधर मोहोळ यांनी वैद्यकीय महाविद्यालयाच्या अंतिम मंजुरीसाठी नुकतीच केंद्रीय आरोग्य मंत्री मनसुख मांडवीय आणि आरोग्य राज्यमंत्री भारती पवार यांची नवी दिल्लीतील आरोग्य मंत्रालयात भेट घेऊन चर्चा केली होती. विरोधीपक्ष नेते देवेंद्र फडणवीस यांच्या पुढाकाराने ही भेट झाली. या भेटीत सकारात्मक चर्चाही झाली होती. वैद्यकीय महाविद्यालयाने आजवर मंजुरीसंदर्भातील सर्व टप्पे पार केले असून आता प्रत्यक्ष परवानगी मिळाल्याने प्रवेश प्रक्रिया सुरु केली जाणार आहे.

याबाबत माहिती देताना महापौर मोहोळ म्हणाले, ‘वैद्यकीय महाविद्यालयाच्या अंतिम मंजुरी मिळणे हा क्षण पुणे शहरासाठी जितका महत्वाचा आहे, तितकाच तो अभिमानाचाही. या वैद्यकीय महाविद्यालयाच्या संकल्पनेपासून तर थेट अंतिम मंजुरीमिळेपर्यंतच्या विविध टप्प्यांमध्ये भूमिका निभावता आली, याचे मनस्वी समाधान आहे. आपल्या पाठपुराव्याला केंद्रीय आरोग्य मंत्री मनसुख मांडवीय, केंद्रीय आरोग्य राज्यमंत्री भारती पवार आणि विरोधी पक्षनेते देवेंद्र फडणवीस यांची मोलाची साथ मिळाल्याने अंतिम मंजूरीपर्यंतचा प्रवास पूर्ण झाला. त्याबद्दल तिघांचेही समस्त पुणेकरांच्या वतीने मनःपूर्वक धन्यवाद’.

असा झाला वैद्यकीय महाविद्यालयाचा प्रवास…

■ २८ ऑगस्ट, २०१९ : मुख्यसभेत ठराव मंजूर
■ २६ मे, २०२० : वैद्यकीय ट्रस्ट स्थापन करण्यास राज्य सरकारची मंजुरी
■ १३ ऑगस्ट, २०२० : वैद्यकीय ट्रस्टची नोंदणी
■ २८ नोव्हेंबर, २०२० : MUHS कडून Affiliations Consent प्राप्त
■ ७ मार्च, २०२२ : अंतिम मंजुरी