पुणे, दि. ०९ मार्च २०२२: कौटुंबिक जबाबदाऱ्यांसह विद्युत क्षेत्रातील आव्हानात्मक जबाबदाऱ्या समर्थपणे पेलणाऱ्या व कंपनीला प्रगतिपथवर नेणाऱ्या सक्षम महिला अधिकारी, अभियंता व कर्मचारी महावितरणसाठी अभिमानास्पद आहेत असे गौरवोद्गार महावितरणचे पुणे प्रादेशिक संचालक (प्र.) श्री. अंकुश नाळे यांनी मंगळवारी (दि.८) काढले.

येथील ‘प्रकाशभवन’मध्ये जागतिक महिला दिनानिमित्त आयोजित कार्यक्रमात ते बोलत होते. यावेळी प्रमुख पाहुणे म्हणून अधीक्षक अभियंता सौ. पुनम रोकडे, श्री. सतीश राजदीप, उपमहाव्यवस्थापक श्री. अजय खोडके (आयटी) व श्री. अभय चौधरी (मानव संसाधन) उपस्थित होते. प्रादेशिक संचालक श्री. नाळे म्हणाले की, भारतात प्रथमच विद्युत क्षेत्रात महावितरणमध्ये महिला तंत्रज्ञांची (लाईनवूमन) भरती करण्यात आली. हा निर्णय अतिशय योग्य व सार्थ असल्याचा प्रत्यय महावितरणच्या महिला तंत्रज्ञांनी केलेल्या कामगिरीमुळे आला आहे. त्यांच्यासह महिला अभियंता व अधिकारी देखील महावितरणमधील विविध पदांच्या जबाबदाऱ्या समर्थपणे पूर्ण करीत आहेत. महावितरणची ही सक्षम महिलाशक्तीची वाटचाल अभिमानास्पद आहे असे श्री. नाळे यांनी सांगितले.

यावेळी अधीक्षक अभियंता सौ. पुनम रोकडे व श्री. सतीश राजदीप यांनी मनोगत व्यक्त केले. कार्यक्रमाला सहायक महाव्यवस्थापक सौ. दिप्ती आंबेकर, मुख्य औद्योगिक संबंध अधिकारी श्री. शिरीष काटकर, कार्यकारी अभियंता श्री. संजीव राठोड, तसेच महिला अभियंता, अधिकारी व कर्मचारी मोठ्या संख्येत उपस्थित होते. सुत्रसंचालन उपकार्यकारी अभियंता डॉ. संतोष पटनी यांनी केले व आभार मानले.

मुंबई, दि. ९ मार्च २०२२:- कृषी वर्गवारीतील ग्राहकांच्या वीजबिलांबाबत असणाऱ्या शंका आणि तक्रारी सोडविण्यासाठी महावितरणतर्फ़े उद्या दि. १० मार्चपासून राज्यातील प्रत्येक तालुक्यात वीजबिल दुरुस्ती शिबिराचेआयोजन करण्यात येत आहे.

दि.१० मार्च ते ३१ मार्च २०२२ या कालावधीत राज्यातील प्रत्येक तालुक्याच्या ठिकाणी कृषी ग्राहकांच्या देयक दुरुस्ती संदर्भात शिबिरे आयोजित करण्यात येणार असून या शिबिरांमध्ये ग्राहकांचा मंजूर वीजभार, मिटर वाचन, थकबाकी या स्वरुपाच्या सर्व तक्रारींचे निराकरण करण्यात येईल.  कृषी ग्राहकांच्या वीज देयक दुरुस्ती व मंजूरीचे प्रस्ताव महावितरणच्या संगणकीय प्रणालीद्वारे मंजूर करुन देयक दुरुस्तीनंतरची सुधारित थकबाकीची रक्कम ग्राहकाला तात्काळ कळविण्यात येणार आहे.

महावितरणच्या एकूण थकबाकीपैकी सप्टेंबर २०२० अखेर कृषी ग्राहकांकडे रु. ४५,८०२ कोटी थकबाकी झालेली आहे. त्यामुळे कृषी ग्राहकांच्या हितासाठी महाराष्ट्र शासनाने सर्व समावेश “कृषीपंप वीजजोडणी धोरण २०२०” जाहीर केले होते. या धोरणा अंतर्गत निर्लेखनाद्वारे रु. १०,४२० कोटी सूट, व्याज व विलंब आकारामध्ये रु. ४,६७६ कोटी सूट दिल्यानंतर सुधारीत थकबाकी रु. ३०,७०६ कोटी निर्धारित करण्यात आली आहे. त्यापैकी फक्त रु.२,३७८ कोटी रक्कमेचा भरणा कृषी ग्राहकांद्वारे करण्यात आलेला आहे. सप्टेंबर २०२० पासून चालू वीज देयकाच्या थकबाकीत देखील मोठ्या प्रमाणात वाढ होऊन आज रोजी एकूण थकबाकी रु. ३९,९९३ कोटी झाली आहे.

यामध्ये चुकीच्या कृषी देयकांचा मुद्दा वारंवार लोकप्रतिनिधी, ग्राहक प्रतिनिधी व प्रसारमाध्यमातून उपस्थित केला जातो. याबाबत महावितरणतर्फ़े कृषी ग्राहकांच्या देयकांची पडताळणी व दुरुस्ती करण्याबाबत तालुकानिहाय शिबिरे आयोजित करण्यात येत आहे. या शिबिराचा लाभ घेत कृषी ग्राहकांनी आपली वीजबिले तात्काळ दुरुस्ती करुन घेण्याचे आवाहन महावितरणतर्फ़े करण्यात आले आहे.

पुणे-सदर्न  स्टार एडब्ल्यूडब्ल्यूए तर्फे पुण्यात “इंद्रधनुष आसमान की ओर ” या शीर्षकाखाली विविध कार्यक्रमांचे आयोजन करत आंतरराष्ट्रीय महिला दिन साजरा करण्यात आला. एसजीएस मॉल इथे 5 आणि 6 मार्च 2022 रोजी चित्रकला आणि हस्तकला प्रदर्शन आयोजित करण्यात आले होते. त्यानंतर 8 मार्च 2022 रोजी पुण्याच्या कॅम्प परिसरात मैत्री कॉम्प्लेक्स येथे एडब्ल्यूडब्ल्यूए संघटनेच्या 20 हून अधिक नवोदित कलाकारांच्या कलागुणांना वाव देणारे  एक प्रदर्शन भरवण्यात आले होते. याशिवाय, सुकन्या समृद्धी योजनेअंतर्गत (SSY),1 डिसेंबर 2021 ते 31 जानेवारी 2022 दरम्यान जन्मलेल्या  मुलींना आधार कार्ड देऊन आणि सुकन्या समृद्धी योजनेअंतर्गत योग्य प्रारंभिक रक्कम भरून त्यांचे खाते उघडून  त्यांचा सत्कार करण्यात आला. सदर्न स्टार एडब्ल्यूडब्ल्यूएच्या सर्व फॉर्मेशनद्वारे अशाच प्रकारे आजचा दिवस साजरा केला जात आहे.

पिफअंतर्गत ओम भूतकर आणि समुहाचे बहारदार सादरीकरण

पुणे, ८ मार्च, २०२२
यंदाच्या पुणे आंतरराष्ट्रीय चित्रपट महोत्सवाची थीम गीतकार साहीर लुधियानवी, सत्यजित रे आणि पं. भीमसेन जोशी यांच्या जन्मशताब्दीवर आधारित असून विविध उपक्रमांचे या अंतर्गत आयोजन करण्यात आले आहे. अशाच साहिर लुधियानवी यांच्या गीतांवर आधारित ‘साहिर’ या कार्यक्रमाचा आस्वाद रसिकांनी घेतला. ओम भूतकर दिग्दर्शित या कार्यक्रमात साहिर लुधियानवी यांच्या रचना सादर केल्या. रविवारी राष्ट्रीय फिल्म संग्रहालय (एनएफएआय) येथे झालेल्या कार्यक्रमाला प्रेक्षकांचा भरभरून प्रतिसाद लाभला. यावेळी पिफचे संचालक डॉ. जब्बार पटेल, पीफ आयोजन समितीचे सतीश आळेकर उपस्थित होते.

‘जाने वो कैसे लोग थे जिनके’ या गीताने कार्यक्रमाला सुरुवात झाली. नचिकेत देवस्थळी यांनी हे गीत सादर केले. त्यानंतर मुक्ता जोशी यांनी ‘कभी खूद पे तो कभी हालात पे रोना आया’ हे गीत सादर केले. यानंतर नचिकेत देवस्थळी यांनी ‘जश्ने गालिब’ ही गजल सादर केली. यानंतर ओम भूतकर यांनी ‘ताजमहाल’ ही कविता सादर केली. ‘ये महलो ये तख्तो ये ताजो की दुनिया’ ही रचना जयदीप वैद्य यांनी गायली. ‘न तो कारवाँ की तलाश है’ ही कविता सादर करून कार्यक्रमाची सांगता झाली. सलग एक तासाच्या या कार्यक्रमात साहिर लुधियानवी यांची गीते, कविता आणि नज्म सादर करण्यात आल्या. या कार्यक्रमाला रसिक प्रेक्षकांनी भरभरून दाद दिली.

अभिनेता ओम भूतकर, अभिनेता नचिकेत देवस्थळी यांच्यासह गायिका मुक्ता जोशी, गायक जयदीप वैद्य, गायक अभिजीत ढेरे यांनी यावेळी रचना सादर केल्या. तसेच देवेंद्र भोमे (संवादिनी), केतन पवार (तबला), मंदार बगाडे (ढोलकी) यांनी साथसंगत केली. कार्यक्रम व्यवस्थापन कुशल खोत यांचे होते.

पुणे-

पुणे शहर जिल्हा काँग्रेस कमिटी लिगल सेलच्या वतीने आज काँग्रेस भवन येथे ‘‘जागतिक महिला दिना’’ निमित्त महिला वकिलांचा सन्मान करण्यात आला. यावेळी बोलताना पुणे शहर जिल्हा काँग्रेस कमिटीचे अध्यक्ष रमेश बागवे म्हणाले की, ‘‘महिलांनी सर्व क्षेत्रामध्ये उत्तम कामगिरी दाखविलेली आहे. वकिलीमध्ये सुध्दा अनेक नामवंत महिला वकिलांनी युक्तीवाद करून आपल्या पक्षकारांना न्याय मिळवून दिला आहे. तसेच अनेक महिला वकिलांनी न्याय क्षेत्रात खूप मोठे काम केलेले आहे.’’यानंतर पुणे शहर जिल्हा महिला काँग्रेसच्या अध्यक्षा पुजा आनंद म्हणाल्या की, ‘‘महिला सक्षमीकरणासाठी जास्तीत जास्त महिला वकीलांनी न्याय मिळवून देण्याचे काम करणे गरजेचे आहे.’’कार्यक्रमाचे संयोजन ॲड. अश्विनी गवारे, ॲड. पुजा भोसले यांनी केले. या प्रसंगी उपस्थित सर्व महिला ॲड. विशाखा गाडेकर, ॲड. संघमित्रा गायकवाड, ॲड. सुवर्णा आढाव, ॲड. रेश्मा शिकलकर, ॲड. रेश्मा जगताप, ॲड. अनुपमा गायकवाड इत्यादी महिला वकिलांचा प्रमुखांच्या हस्ते सन्मान करण्यात आला.पुणे जिल्हा लिगल सेल उपाध्यक्ष ॲड. श्रीनिवास खुंटे, पुणे शहर जिल्हा लिगल सेल प्रभारी ॲड. राहुल ढाले, महाराष्ट्र प्रदेश लिगल सेल वरिष्ठ उपाध्यक्ष ॲड. अनिल कांकरिया यावेळी उपस्थित होते.

  पुणे, दि. 8: स्त्री आणि पुरुष असा भेदभाव न करता योग्य समन्वय राखल्यास चांगला समाज घडण्यास मदत होईल तसेच अशा प्रकारची भेदभावरहित सामाजिक संरचना येणाऱ्या पिढीला मार्गदर्शक ठरेल, असा विश्वास कारागृह व सुधारसेवा महानिरीक्षक व अपर पोलीस महासंचालक अतुलचंद्र कुलकर्णी यांनी व्यक्त केला. जागतिक महिला दिनाच्या निमित्ताने ‘महिला लैंगिक अत्याचार कायदा व लैंगिक संवेदना’या विषयावर कारागृह व सुधारसेवा महानिरीक्षक व अपर पोलीस महासंचालक कार्यालयात कार्यशाळा आयोजित केली होती, या प्रसंगी ते बोलत होते. यावेळी कारागृह उपमहानिरीक्षक सुनील ढमाळ, संशोधन अधिकारी डॉ.हेमंतकुमार पवार, उपअधीक्षक प्रदीप जगताप, राजाराम भोसले, कारागृह अधिकारी शिवाजी पाटील, महिला तक्रार निवारण समितीच्या सदस्या डॉ. अजंली देशपांडे, बँक ऑफ महाराष्ट्राच्या वरिष्ठ अधिकारी अश्विनी कुलकर्णी आदी उपस्थित होते.

स्त्री जन्माचे स्वागत करण्याची मानसिकता समाजात रुजत असल्याची बाब स्वागतार्ह आहे असे सांगून श्री. कुलकर्णी म्हणाले, कोणत्याही क्षेत्रात स्त्री- पुरुष भेदभाव होणार नाही असा समाज आपल्याला घडवायचा आहे. त्यातूनच पुढील पिढीवर महिलांप्रती आदर राखण्याचे संस्कार घडतील.

डॉ. देशपांडे म्हणाल्या, पोलीसांची ‘मदतनीस’ म्हणून भूमिका असावी यासाठी विशाखा समिती स्थापना करण्यात आलेली आहे. महिलांवर अत्याचार झाल्यास स्वतः महिला तसेच इतर कोणतीही व्यक्तीला तक्रार दाखल करता येते. अन्यायाविरोधात धैर्याने आवाज उठवल्यास भविष्यात अशा घटनांना आळा बसू शकेल.

त्या पुढे म्हणाल्या, महिलांकडे सृजनांची शक्ती आहे. समाज निर्मितीतील महत्वपूर्ण सहभागामुळे तिला महत्वाचे स्थान देणे गरजेचे आहे. स्त्री आणि पुरुष समसमान व परस्परपूरक असून भेदभाव न करता तिच्या क्षमतेचा उपयोग करुन घेतला पाहिजे. कोणताही निर्णय घेतांना महिलांचे मत विचारत घेतले पाहिजे, असेही त्या म्हणाल्या.

श्रीमती कुलकर्णी म्हणाल्या, समाजात काम करताना महिला म्हणून नव्हे तर समाजाचा घटक म्हणून स्त्री-पुरुष समानतेबाबत मत व्यक्त करावे. कारागृह विभागात काम करणाऱ्या महिला कर्मचाऱ्यांच्या अंगी दक्षता, चातुर्य, हजरजबाबीपणा, कार्यतत्परता इत्यादी गुण असणे आवश्यक आहे.

यावेळी महानिरीक्षक श्री. कुलकर्णी यांच्या हस्ते कार्यालयातील महिला अधिकारी व कर्मचाऱ्यांचे तुळशीचे रोपटे देवून स्वागत केले. महिला दिनाचे औचित्य साधत आजपासून नियत्रंण कक्षाची जबाबदारी कांचन शेलार व दिक्षीता चिलप यांच्याकडे सोपविण्यात आली आहे.

पुणे, दि. 8 : राष्ट्रीय विधी सेवा प्राधिकरण आणि महाराष्ट्र राज्य विधी सेवा प्राधिकरण, उच्च न्यायालय, मुंबई यांच्या निर्देशाने येत्या शनिवार १२ मार्च रोजी पुणे जिल्ह्यातील सर्व न्यायालयांमध्ये ‘राष्ट्रीय लोकअदालतीचे’ आयोजन करण्यात आले आहे. न्यायालयात दाखल तसेच दाखलपूर्व प्रकरणे तडजोडीने निकाली होण्यासाठी या राष्ट्रीय लोक अदालतीचा लाभ घ्यावा, असे आवाहन जिल्हा विधी सेवा प्राधिकरणाचे सचिव प्रताप सावंत यांनी केले आहे.

या लोकन्यायालयामध्ये जिल्ह्यातील विविध न्यायालयांमध्ये प्रलंबित असलेली विविध प्रकारची ४५ हजार पेक्षा जास्त प्रकरणे सामंजस्याने तडजोडीने निकाली काढण्याकरीता ठेवण्यात आलेली आहेत. त्यामध्ये तडजोडयोग्य फौजदारी, निगोशिएबल इन्ट्रुा मेंट अॅक्ट कलम 138, दिवाणी, मोटार अपघात नुकसान भरपाई, कामगार वाद, वीज, पाणी देयकांबाबतची प्रकरणे, वैवाहिक वाद, भूसंपादन विषयक, नोकरीबाबतची प्रकरणे, महसूल प्रकरणे तसेच इतर दिवाणी प्रकरणे घेण्यात आलेली आहे.

त्याचप्रमाणे विविध बँका, वित्तीय संस्था तसेच दूरध्वनी विभाग, विद्युत विभाग आणि पुणे व पिंपरी महापालिका, पुणे जिल्ह्यातील विविध ग्रामपंचायती यांच्याकडील प्रलंबित पाणीपट्टी, घरपट्टी देयके अशी सुमारे १ लाख ७५ हजारापेक्षा जास्त दाखलपूर्व प्रकरणे निकाली काढण्याकरीता ठेवण्यात आलेली आहेत.

जिल्ह्यातील वाहतूक पोलीस विभागाकडील विविध नागरिकांवर मोटार वाहन अधिनियमांतर्गत प्रलंबित असलेली परंतु अद्याप न्यायालयामध्ये दाखल न झालेली अशी एकुण ११ लाख प्रकरणे निकाली करण्याकरीता ठेवण्यात आलेली असून यातील सर्व वाहन मालकांना ई-चलन नोटीसा बजावण्यात आलेल्या आहेत.

१२ मार्च रोजी पुणे जिल्हयातील सर्व न्यायालयांमध्ये आयोजित केलेल्या लोकअदालतीमध्ये जलद व मोफत न्याय हवा आहे आणि आपला वाद सामोपचाराने मिटविण्याची इच्छा आहे अशा पक्षकारांनी पुणे जिल्हा विधी सेवा प्राधिकरण कार्यालयाकडे अथवा संबंधित तालुका विधी सेवा समितीकडे त्वरीत संपर्क साधावा. जिल्हा कार्यालयाचा मोबाईल क्रमांक ८५९१९०३६१२ असा असून इमेल आयडी dlsapune2@gmail.com असा आहे.

ही राष्ट्रीय लोकअदालत प्रमुख जिल्हा न्यायाधीश तथा जिल्हा विधी सेवा प्राधिकरणाचे अध्यक्ष संजय देशमुख यांच्या मार्गदर्शनाखाली आयोजित होत असून लोकअदालतीचा जास्तीत जास्त पक्षकार, नागरिकांनी लाभ घ्यावा असे आवाहन श्री. सावंत यांनी केले.
0000

पुणे : मराठमोळा पेहराव करून महानगरपालिकेच्या प्रांगणात जमलेल्या महिला शाहिरा… छत्रपती शिवाजी महाराजांना जन्म देणाऱ्या मातृशक्ती जिजामाता यांना केलेले नमन… निश्चयाचा महामेरू, बहुतजनांसी आधारू, अखंड स्थितीचा निर्धारू, श्रीमंत योगी जाणता राजा…या शब्दात बुलंद आवाजातील पोवाड्यातून छत्रपती शिवाजी महाराजांना महिला शाहिरांनी मानवंदना दिली.

महिला व बालकल्याण समिती पुणे महानगरपालिका आणि शाहीर हिंगे लोककला प्रबोधिनी, पुणे संयुक्त विद्यमाने जागतिक महिला दिनानिमित्त प्रबोधिनीच्या महिला शाहिरांनी पोवाड्यातून छत्रपती शिवाजी महाराजांना मानवंदना दिली. पुणे महानगरपालिका भवनाच्या प्रांगणात नवीन बसविलेल्या छत्रपती शिवाजी महाराजांचा पुतळ्यासमोर कार्यक्रमाचे आयोजन करण्यात आले होते.

यावेळी शाहीर हिंगे लोककला प्रबोधिनीचे अध्यक्ष शाहीर हेमंतराजे मावळे, महिला व बाल कल्याण समिती पुणे महानगरपालिकेच्या रुपाली धाडवे, प्रबोधिनीचे अरुणकुमार बाभुळगावकर आदी उपस्थित होते.  अक्षदा इनामदार, श्रद्धा जाधव, आदिती कालेकर, तृप्ती उफाळे, कृष्णा उफाळे, सानवी कुटे यांनी पोवाडा सादरीकरण केले.साहिल पुंडलिक यांनी हार्मोनियम, होनराज मावळे यांनी ढोलकी आणि शिवम उभे यांनी तालवाद्याची साथसंगत केली.

शाहीर हेमंतराजे मावळे म्हणाले, पुणे महानगरपालिकाच्या आवारात छत्रपती शिवाजी महाराज यांच्या पुतळ्याचे नुकतेच अनावरण झाले. महाराजांना मानवंदना देण्यासाठी व महिलादिनाचे औचित्य साधून या कार्यक्रमाचे आयोजन करण्यात आले होते.