पुणे : मास्को रशिया येथे मास्को स्टार आंतरराष्ट्रीय वुशु स्पर्धेचे आयोजन करण्यात आले होते. या स्पर्धेमध्ये भारताने २० सुवर्ण,  २५ रौप्य, २० कांस्य पदके पटकाविली तर महाराष्ट्रातील पुणे जिल्ह्यातील कल्याणी जोशी हिने तायजीक्वॉन इव्हेंन्ट मध्ये १ सुवर्ण व ड्युअल मध्ये १ रौप्य आणि स्वराज कोकाटे याने नंनक्वान इन्व्हेन्ट मध्ये कांस्य तर ड्युअलमध्ये रौप्य पदक पटकाविले.
स्वयंम कटके, सलोनी जाधव, मिताली वाणी यांना ड्युअल इव्हेन्ट मध्ये प्रत्येकी एक रौप्य पदक पटकाविले. या स्पर्धेमध्ये भारताचा संघ सहभागी झाला होता. या स्पर्धेत एकूण १५ देशाच्या जवळपास ५५० खेळाडूंनी सहभाग नोंदविला होता. महाराष्ट्राचे सोपान कटके यांनी भारतीय वुशू संघाची मुख्य प्रशिक्षकाची धुरा सांभाळली होती त्यांच्या मार्गदर्शनाखाली भारतीय संघाने पदकांची लयलूट केली. २२ ते २८ फेब्रुवारी दरम्यान ही स्पर्धा माॅस्को येथे पार पडली.
भारतीय संघ दिल्लीत आल्यावर वुशू असोसिएशन ऑफ इंडियाचे अध्यक्ष भूपेंदर सिंह बाजवा सीईओ सोहेल अहमद यांनी सर्व खेळाडू व कोचेसचे स्वागत करून त्यांना पुढील वाटचालीसाठी शुभेच्छा दिल्या.

• कर्वे रस्ता घेणार मोकळा श्वास
• देवेंद्र फडणवीस यांच्या हस्ते आणि चंद्रकांत पाटील यांच्या उपस्थितीत लोकार्पण

पुणे -पश्चिम पुण्याच्या वाहतुकीला वेग येण्याच्या दृष्टीने महत्त्वाचा असणाऱ्या नळस्टॉप येथील शहरातील पहिल्या दुमजली उड्डाणपुलाचे लोकार्पण येत्या रविवारी संध्याकाळी ६ वाजता विरोधीपक्ष नेते देवेंद्र फडणवीस यांच्या हस्ते होणार असून कर्वे रस्ता आता वाहतूक कोंडीतून मोकळा श्वास घेणार आहे. मेट्रोकडून हा पूल महापालिकेच्या ताब्यात आल्यावर पुलाच्या विद्युत व्यवस्थेचेही काम आता अंतिम टप्प्यात पोहोचले असल्याची माहिती महापौर मुरलीधर मोहोळ यांनी दिली.

महापौर मुरलीधर मोहोळ यांच्याकडे स्थायी समितीच्या अध्यक्षपदाची सूत्रे असताना महापालिकेच्या २०१७-१८ अंदाजपत्रकात या उड्डाणपुलाची संकल्पना मांडून त्यास निधी उपलब्ध करुन दिला होता. वनाज ते रामवाडी हा मेट्रो मार्ग प्रस्तावित झाल्यावर नळस्टॉप येथे दुमजली पूल साकारण्यासाठी महापौर मोहोळ यांनी पाठपुरावा करत तत्कालीन मुख्यमंत्री देवेंद्र फडणवीस यांच्या हस्ते या पुलाचे भूमिपूजन केले होते. जयपूर येथील साकारलेल्या दुमजली उड्डाणपुलाच्या पार्श्वभूमीवर ही संकल्पना महापौर मोहोळ यांनी मांडली होती. त्यास आता मूर्त रूप आले आहे.

दुमजली उड्डाणपुलाच्या लोकार्पणाबाबत महापौर मोहोळ म्हणाले, ‘डेक्कन परिसरातून पश्चिम पुण्याकडे जाणाऱ्या वाहतुकीला या उड्डाणपुलामुळे चांगलीच गती मिळणार आहे. नळस्टॉप परिसरात येणाऱ्या रस्त्यांवरून दर तासाला ३५ ते ४० हजार वाहने जा-ये करत असल्याची नोंद होती. त्यामुळे या भागात तातडीने उड्डाणपूल उभारणे आवश्यक होते. त्यासाठी उड्डाणपुलाची संकल्पना मांडून त्यासाठी सर्वतोपरी पाठपुरावा केला. आता हा प्रकल्प सिद्धीस गेला आहे’.

‘नळस्टॉप येथील दुमजली उड्डाणपुलामुळे केवळ पश्चिम पुणेच नाही तर हवेली आणि मुळशी तालुक्याकडे जाणाऱ्या वाहतुकीसही वेग येणार आहे. पुण्यातील हा पहिलाच दुमजली उड्डाणपूल असून याचे काम दर्जेदार आणि वेळेत पूर्ण करण्याकडे आपला कल होता आणि त्या दृष्टीने यशदेखील आले आहे. कोरोनाचे संकट असतानाही मेट्रोने हे काम वेगाने पूर्ण केले त्याबद्दल मेट्रोचे पुणेकरांच्या वतीने मनःपूर्वक धन्यवाद.

असा आहे पुण्यातील पहिला दुमजली उड्डाणपूल !

• महापौर मुरलीधर मोहोळ यांची संकल्पना आणि पाठपुरावा
• पुलाची एकूण लांबी ५५० मीटर
• पुलावरून ४ पदरी वाहतूक होणार
• पहिल्या मजल्यावरून वाहने, दुसऱ्या मजल्यावर मेट्रो
• मेट्रो आणि महापालिकेचा संयुक्त प्रकल्प

कोथरुडकरांना आणखी एक गिफ्ट; बाळासाहेब ठाकरे उद्यानाचेही रविवारी लोकार्पण

महापौर मुरलीधर मोहोळ यांच्या संकल्पनेतून साकारलेल्या बाळासाहेब ठाकरे उद्यानाचेही लोकार्पण येत्या रविवारी फडणवीस यांच्या हस्ते आणि पाटील यांच्या उपस्थितीत होत आहे, अशीही माहिती महापौर मोहोळ यांनी दिली.

मुलांचं शिक्षण, रोजगार, एसटी कामगार यावर कोणी बोलतय का?

पुणे : नागरिकांच्या मुलभूत गरजा , जीवनावश्यक समस्या यावर न बोलता जातीत लोकाना अडकवून ,काही तरी वक्तव्ये करून लोकांची माथी भडकावून मते मिळवायचा धंदा करणारे सत्ताधारी आणि विरोधक आता दोघेही आपसात एकमेकांना संपवायला निघाले आहेत त्यानंतर उरणार कोण ? तर आपणच उरणार आहोत .. मनसैनिकांनी कोरोना काळात केलेल्या कामाची जाणीव आहे पडत्या काळात पक्षाबरोबर राहिलेल्यांची जाणीव आहे . २१ मार्चला तिथीनुसार शिवजयंती साजरी करा आणि २ तारखेला पाडव्याला शिव्तीत्र्ठाव्र या पुण्यात तर छोटासा हा तीझार आहे शिव्तीत्र्हाव्र पिक्चर दिसेल असे येथे मनसे चे अध्यक्ष राज ठाकरे यांनी म्हटले आहे.

महाराष्ट्र नवनिर्माण सेनेचा यंदाचा १६ वा वर्धापनदिन सोहळा पुणे शहरातील गणेश कला क्रीडा मंच येथे आयोजित करण्यात आला आहे. राज्यभरातून हजारोंच्या संख्येने मनसैनिक आणि पदाधिकारी या कार्यक्रमाला उपस्थित होते..दरवर्षी मुंबईत साजरा होणारा वर्धापन दिन सोहळा यंदा १५ वर्षानंतर प्रथमच पुण्यात आयोजित करण्यात आला आहे. निवडणुकीच्या पार्श्वभूमीवर लढायचं ते जिंकण्यासाठीच या नव्या नाऱ्याने पक्ष महापालिका निवडणुकीत उतरणार आहे. यावेळी राज ठाकरेंनी सरकारवर टीका केली आहे. मुलांचं शिक्षण, रोजगार, एसटी कामगार असे अनेक प्रश्न राज्यात निर्माण झाले आहेत त्यावर कोणी बोलतय का असा सवाल त्यांनी उपस्थित केला राज ठाकरे म्हणाले, राज्यातील नागरिक अनेक अडचणीत सापडले आहेत, ते मदत मागण्यासाठी सरकार कडे जात नाहीत. त्यांच्यासमोर मुलांचं शिक्षण, नोकरी याबरोबरच एसटी कामगारांचा मूळ प्रश्न आहे. त्याकडेही बघितले जात नाही. आमचे मनसे कार्यकर्ते घरोघरी जाऊन नागरिकांना मदत करत आहेत. त्यांच्या समस्य सोडवण्याचा प्रयत्न करत आहेत. पण सरकार याकडे दुर्लक्ष करू लागले आहे.

राज्यपाल -कुडमुड्या राज ठाकरे यांनी छत्रपती शिवाजी महाराजांबाबत केलेल्या विधानावरून राज्यपालांवर जोरदार निशाणा साधला. तुम्हाला शिवराय समजतात का? जर एखाद्या विषयातलं आपल्याला समजत नसेल तर त्यावर भाष्य कशाला करायचं, अशा शब्दात राज ठाकरे यांनी राज्यपाल भगतसिंह कोश्यारी यांचा समाचार घेतला.राज्यपालांवर निशाणा साधताना राज ठाकरे म्हणाले. सध्या महाराष्ट्रात महापुरुषांवरून माथी भडकवण्याचं काम सुरू आहे. त्यात हे आपले राज्यपाल. एकदा मी त्यांना भेटायला गेलो तर वाटलं हे तर कुडमुडे ज्योतिषी आहेत की काय. त्यांनी शिवरायांबाबत एक विधान केलं. पण आपल्याला ज्या विषयातील माहिती नाही, त्या विषयावर बोलायचं कशाला. छत्रपती शिवाजी महाराजांनी आपण कधी रामदास स्वामींचे शिष्य असल्याचं सांगितलं नाही. ना रामदास स्वामींनी आपण शिवरायांचा गुरू असल्याचा दावा केलाय. पण रामदास स्वामींनी छत्रपती शिवाजी महाराजांवर जेवढं चांगलं लिहिलंय, तेवढं कुणीही लिहिलेलं नाही. निश्चयाचा महामेरू… हे सुभाषित आज पुन्हा वाचा, असा सल्लाही राज ठाकरे यांनी दिला.यावेळी महात्मा फुले आणि सावित्रीबाई फुले यांचा अवमान करण्यावरूनही राज ठाकरेंनी राज्यपालांवर निशाणा साधला. इतक्या छोट्या वयात लग्न व्हायची, हे मला माहितच नव्हतं, असे राज्यपाल म्हणाले, पण त्याकाळात लहानपणी लग्न व्हायची. बालविवाह व्हायचे. पण तुमचे अजून झाले नाही, असा टोला त्यांनी लगावला.

प्रमुख मुद्दे :

🔸मध्यंतरीच्या काळात माझ्यावर संकटं आली. आपल्या पक्षावर आली. संकटं जेव्हा येतात, तेव्हा हातात हात घालून येतात आणि जातात तेव्हा एकएकटी जातात. अशा संकटांना घाबरून जायचं नसतं. त्यांना सामोरं जाऊन आपण पुढे जाणं महत्वाचं. या संकटकाळात तुम्ही- सर्व महाराष्ट्र सैनिक, तुमची कुटुंबं माझ्यासोबत राहिलात. मी मनापासून तुम्हाला धन्यवाद देतो.

🔸बाबासाहेब पुरंदरे यांना सॉफ्ट टार्गेट बनवलं गेलं. आम्हाला इतिहास नाही बघायचा, आम्हाला इतिहास लिहिणाऱ्याची जात बघायची आहे! महाराष्ट्रातील सर्व राजकीय पक्षांना तुम्हाला जातीपातीत अडकवून ठेवायचं आहे.

🔸आपल्या राज्यपालांना काही समज वगैरे काही आहे की नाही? कुडमुडे ज्योतिषी असतात ना, तसे आहेत! शिवाजी महाराज, रामदास स्वामी यांच्याबद्दल यांना काही माहिती आहे का? यांना एकाचं (महाराजांचं) शौर्य कमी करायचं आहे आणि दुसऱ्याची (स्वामींची) विद्वत्ता कमी करायची आहे. रामदास स्वामींनी शिवाजी महाराजांचं जे वर्णन केलं आहे तितकं सुंदर वर्णन मी कुठेही वाचलेलं नाही. रामदास स्वामींनी शिवाजी महाराजांविषयी जे लिहिलं आहे ते मी माझ्या घरात लावलं आहे…. “श्रीमंत योगी”! दुर्दैवाने, आमच्याकडे कुणी ‘योगी’ नाहीच! ईडीची धाड पडली की कळतं हा ‘श्रीमंत’ आहे!!

🔸राज्यपालांनी महात्मा फुले- सावित्रीबाई यांच्याबद्दल वक्तव्य केलं. अहो, तेव्हा लहानपणीच लग्नं व्हायची. तुमचं अजून नाही झालं! नको तिथे बोटं घालायची यांना सवय आहे.

🔸सध्याच्या वातावरणात निवडणूक नाही. निवडणूक पुढे ढकलायला ओबीसी समाजाची मोजणी वगैरे कारणं देताहेत. हे सगळं झूठ आहे. मला कुणाच्या वैयक्तिक जीवनाबद्दल किंवा आजारपणाबद्दल बोलायचं नाही. पण, मुख्यमंत्र्यांची तब्येत चांगली नाही हे खरं कारण आहे.

🔸संजय राऊत किती बोलतात? कसले हातवारे करत बोलतात.. महिला, विद्यार्थी, नोकऱ्या किंवा एसटीच्या विषयावर कुणी बोलत नाही. राजकीय नेत्यांची भाषणं, त्यांचे वाद-विवाद तरुण पिढी बघत आहे.

🔸कसली संपर्क कार्यालयं? कार्यालय न उघडताही लोकांनी त्यांच्या कामांसाठी तुम्हाला संपर्क करायला हवा. लोक त्यांच्या कामांसाठी सरकारकडे जात नाहीत. तुमच्या सर्वांच्या आशीर्वादाने या राज ठाकरेकडे येतात. नोकरी, ऍडमिशनचे प्रश्न घेऊन आपल्याकडे येतात. लोकांचा आपल्यावरचा हा विश्वास हीच आपल्या सर्वांची गेल्या १६ वर्षातील कमाई आहे. करोना लॉकडाऊनच्या काळात तुम्ही सर्वांनी- महाराष्ट्र सैनिकांनी जे काम केलं, त्याबद्दल तुमचे आभार मानायला माझ्याकडे शब्दच नाहीत.

🔸महाराष्ट्र सैनिकांनो, महाराष्ट्रासाठी काही तरी चांगलं काम करायची जी आग तुमच्यात आहे ना, ती कधीही विझू देऊ नका.

🔸गेल्या काही दिवसांत मी आपल्या काही पदाधिकाऱ्यांच्या घरी जाऊन जेवलो. यापुढे कुठे गेलो तर तिथेही पदाधिकाऱ्यांच्या घरी जाऊन जेवेन. पण इतर राजकीय नेत्यांप्रमाणे कुणाची जात बघून त्याच्या घरी जेवणार नाही!

🔸२१ मार्चला तिथीनुसार शिवजयंती आहे. हा आपल्याला आपली ओळख देणाऱ्या राजाचा जन्मदिवस आहे. आपला सण आहे. तो सर्वांनी धुमधडाक्यात साजरा करावा.

🔸आजचं माझं भाषण म्हणजे फक्त टिजर/ ट्रेलर आहे. संपूर्ण चित्रपट २ एप्रिल- गुढीपाडव्याला शिवतीर्थावर!

🔸२ एप्रिलला आपला गुढीपाडवा मेळावा आहे. त्यासाठी शिवतीर्थावर- छत्रपती शिवाजी महाराज पार्कवर येण्याचं आमंत्रण मी तुम्हा सर्वांना देतो.

पुणे, दि. ९ मार्च – अधिकाधिक चित्रपट दिग्दर्शकांवर पुस्तके येण्याची गरज आहे. त्यातून त्यांचा दृष्टिकोन तर समजतोच, पण पुढच्या पिढीलाही त्याचा फायदा होतो, असे मत ज्येष्ठ दिग्दर्शक गिरीश कासारवल्ली यांनी व्यक्त केले.

पुणे आंतरराष्ट्रीय चित्रपट महोत्सवात (पिफ२०२२), ‘सिअर ऑफ कंटेम्पररी हिस्टरी – गिरीश कासारवल्ली अँड हिज सिनेमा’ या गणेश मतकरी यांनी लिहिलेल्या पुस्तकाचे आज प्रकाशन झाले. त्यावेळी गिरीश कासारवल्ली बोलत होते.

‘पिफ’चे संचालक डॉ. जब्बार पटेल, राष्ट्रीय चित्रपट संग्रहालयाचे संचालक प्रकाश मगदूम, ‘ पिफ’च्या संयोजन समितीचे सदस्य समर नखाते, लेखक गणेश मतकरी यावेळी उपस्थित होते.

कासारवल्ली म्हणाले, “चित्रपट दिग्दर्शक आणि त्यांच्या चित्रपटांमधून मांडलेल्या राजकीय- सामाजिक परिस्थितीचे विश्लेषण करणारी अधिकाधिक पुस्तके येण्याची गरज आहे. त्यातून समकालीन चित्रपटांचा इतिहास समजत जातो.”

कासारवल्ली पुढे म्हणाले, “हे पुस्तक पुण्यामध्ये प्रसिद्ध होणे हा एक भावनिक क्षण आहे कारण मी इथेच ५० वर्षांपूर्वी चित्रपट शिकायला आलो होतो.” आपल्या चित्रपटांवर इंग्रजीमध्ये आलेले हे ९ पुस्तक असल्याचेही त्यांनी सांगितले.

मगदूम म्हणाले, “राष्ट्रीय चित्रपट संग्रहालयातर्फे संशोधन पठ्यवृत्ती दिली जाते. त्यातूनअनेक चित्रपट दिग्दर्शक आणि संबंधित लोकांवर संशोधन केले जाते. त्यातून पुस्तकनिर्मिती केली जाते. या प्रकल्पातून आतापर्यंत २० पुस्तके प्रकाशित झाली आहेत.” मतकरी यांनी उत्तम संशोधन करून हे पुस्तक पुढे आणल्याचे त्यांनी सांगितले.

पटेल म्हणाले, “कासावल्ली हे एकमेव दिग्दर्शक आहेत, ज्यांना १४ राष्ट्रीय पुरस्कार आणि ४ सुवर्ण कमळ पुरस्कार मिळाले आहेत. त्यांचे चित्रपट हे काळाच्या पुढे आहेत. “ २०२३ मध्ये कासावल्ली यांच्या चित्रपटांवर रेट्रस्पेक्टीव्ह करणार असल्याचे त्यांनी सांगितले.

समर नखाते म्हणाले, “कासारवल्ली यांचे चित्रपट माणसाचा प्रवास सांगणारे आहेत. त्यांच्या चित्रपटांवर आलेले हे पुस्तक समकालीन इतिहास सांगणारे आणि म्हणूनच पुढे कसे पहायचे याचे भान देणारे आहे.”

मतकरी म्हणाले, “आपण सगळा सिनेमा हा एकच प्रतलावर आणि एकाच पद्धतीने पाहत असतो. मला कासारवल्ली यांचा सिनेमा वैशिष्ट्यपूर्ण वाटला. त्यांचा सिनेमा इतिहास घडत असताना त्याकडे वेगळ्या प्रकारे पाहतो. जणूकाही पुढे घडणाऱ्या गोष्टी त्या चित्रपटांमधून दिसतात. एकाचवेळी समाज आणि व्यक्ती यांच्याकडे कासारवल्ली यांचा सिनेमा पाहतो. आणि त्यांच्या संबंधांवर भाष्य करतो. व्यवस्थेकडे सामान्य माणूस कसा बघतो,

पुणे-ऊर्जा क्षेत्रात देशाने स्वयंपूर्ण झाले पाहिजे, त्यासाठी बायोइथेनॉल सारख्या पर्यायी ऊर्जा उत्पादनांत काम करण्याची आवश्यकता प्राज इंडस्ट्रीजचे संस्थापक अध्यक्ष डॉ. प्रमोद चौधरी यांनी व्यक्त केले.

डेक्कन एज्युकेशन सोसायटीच्या (डीईएस) फर्ग्युसन महाविद्यालयाचे माजी विद्यार्थी असणार्या चौधरी यांना विल्यम सी. होलमबर्ग यांच्या नावाने दिला जाणारा आंतरराष्ट्रीय स्तरावरील या वर्षीच्या बायोएनर्जी क्षेत्रातील पुरस्काराने सन्मान करण्यात आला. त्या निमित्त महाविद्यालयाच्या वतीने आयोजित केलेल्या सत्कार समारंभात चौधरी विद्यार्थ्यांशी संवाद साधत होते.

डीईएसच्या नियामक मंडळ आणि परिषदेचे अध्यक्ष डॉ. शरद कुंटे कार्यक्रमाच्या अध्यक्षस्थानी होते. उपाध्यक्ष महेश आठवले, कार्यवाह प्रा. धनंजय कुलकर्णी, प्राचार्य डॉ. रविंद्रसिंग परदेशी यांची प्रमुख उपस्थिती होती.

सेलर्स संघाचा रोमहर्षक विजय; पूना क्लब प्रीमियर लीग क्रिकेट स्पर्धा
पुणे : माव्हरिक्स संघाने पूना क्लब प्रीमियर लीग क्रिकेट स्पर्धेत जॅग्वार्स संघावर सहा गडी राखून मात केली.
पूना क्लब क्रिकेट मैदानावर ही स्पर्धा सुरू आहे. जॅग्वार्स संघाने प्रथम फलंदाजी करताना निर्धारित सहा षटकांत ५ बाद ५६ धावा केल्या. यात मनप्रीत उप्पलने १६ चेंडूंत २३ धावा केल्या. माव्हरिक्स संघाने विजयी लक्ष्य ५.३ षटकांत दोन गडींच्या मोबदल्यात पूर्ण केले. यात साहिल कावडेने ११ चेंडूंत १९, तर रौनक सागर ढोले-पाटीलने नऊ चेंडूंत तेरा धावा केल्या. तर तुषारने आठ चेंडूंत दोन चौकार व एका षटकारासह नाबाद १९ धावा केल्या.
अखेरच्या चेंडूपर्यंत रोमहर्षक झालेल्या लढतीत सेलर्स संघाने किंग्ज संघावर सहा गडी राखून मात केली. या स्पर्धेत किंग्ज संघाने प्रथम फलंदाजी करताना निर्धारित सहा षटकांत २ बाद ५७ धावा केल्या. यानंतर लक्ष्याचा पाठलाग करताना सेलर्स संघाला पहिल्या चार षटकांत १ बाद ३७ धावाच करता आल्या होत्या. यानंतर पाचव्या षटकात सुमिरन मेहता आणि झमीरने भार्गव पाठकच्या गोलंदाजीवर चौदा धावा वसूल केल्या. त्यामुळे सेलर्स संघाला अखेरच्या षटकात विजयासाठी सात धावांची गरज होती. यात पहिल्याच चेंडूवर झमीर दुसरी धाव घेताना धावबाद झाला. यानंतर अखेरच्या चेंडूवर एका धावेची गरज असताना सुमिरन मेहताने फाइन लेगला चौकार ठोकून सेलर्सचा विजय साकारला. सुमिरन मेहताने १९ चेंडूंत नाबाद ३० धावा केल्या.

संक्षिप्त धावफलक : १) जॅग्वार्स – ६ षटकांत ५ बाद ५६ (मनप्रीत उप्पल २३, राजेश बनसोडे १७, विजय सामंत १-११, हिरेन परमार १-६, किरण देशमुख १-१०) पराभूत वि. माव्हरिक्स – ५.३ षटकांत २ बाद ५८ (साहिल कावडे १९, तुषार नाबाद १९, रौनक सागर ढोले-पाटील १३, पिनाकिन मराठे १-८).- सामनावीर – रौनक ढोले पाटील

२) किंग्ज – ६ षटकांत २ बाद ५७ (आर्यमन पिल्लई ३५, उमेश पिल्लई नाबाद ११, सचिन डी. १-२) पराभूत वि. सेलर्स – ६ षटकांत २ बाद ६१ (सुमिरन मेहता नाबाद ३०, झमीर २४, सतीश मुंदडा १-७).

३) टायफून्स – ६ षटकांत ३ बाद ६१ (अश्विन शाह १८, अमन पारेख १६, क्रिश शाह नाबाद १४, ऋषी चैनानी १३, प्रकाश कारिया २-१३) वि. वि. ऑल स्टार्स – ६ षटकांत २ बाद ४२ (खलीद परवानी १९, प्रकाश कारिया १३, क्रिश शहा १-७). सामनावीर – क्रिश शाह

४) वेन्डकिन ईगल्स – ६ षटकांत १ बाद ७४ (अरुण खट्टर ४०, सिद्धान्त धर्मा नाबाद ३४) पराभूत वि. जेट्स – ५.५ षटकांत २ बाद ७९ (चिराग लुल्ला ४९, ऋषभ बजाज नाबाद १२, अमित के. १०, अरुण खट्टर १-२१).
५) जॅग्वार्स – ६ षटकांत १ बाद ५९ (सुशांत खोसला नाबाद २५, राजेश बनसोड २०, विक्रम काकडे १-८) पराभूत वि. टायगर्स – ५.४ षटकांत ४ बाद ६२ (आदिश शहा नाबाद २७, आदिल खान २२, विमल हंसराज १-३, युवराज गुलाटी १-९, सुशांत खोसला १-१०). सामनावीर – आदिश शहा

पुणे दि.9: जागतिक महिला दिनानिमित्त जिल्हा क्रीडा अधिकारी कार्यालय, उपसंचालक क्रीडा व युवक सेवा, स्टार इंटरप्रायजेस तसेच येथील इंडो तायक्वादो दोजांग अकॅडमी यांच्या संयुक्त विद्यमाने येरवडा येथील विभागीय क्रीडा संकुलात आयोजित महिलांसाठी पॉवर योगा व स्वसंरक्षण प्रशिक्षण कार्यक्रमाला प्रतिसाद मिळाला.

यावेळी महाविद्यालयीन युवती, शालेय विद्यार्थिनी, महिला उपस्थित होत्या. जिल्हा क्रीडा अधिकारी महादेव कसगावडे यांनी क्रीडा क्षेत्रात देशाला विविध आंतरराष्ट्रीय स्पर्धामध्ये महिला खेळाडूंनी पदके मिळवून दिल्याचा गौरवपूर्ण उल्लेख याप्रसंगी केला.

योग प्रशिक्षिका मनाली देव घारपुरे यांनी योगासन प्रात्यक्षिके दाखवली. नोकरदार व व्यवसायिक महिलांसाठी सहज योग प्रात्यक्षिकांचे सादरीकरण केले. विखे पाटील मेमो. स्कूलच्या क्रीडा शिक्षिका सपना यादव यांनी समाजकंटक, चैन स्नॅचर्स यांच्यापासून स्वतःचा बचाव करण्याबाबतचे स्वसंरक्षण प्रशिक्षण दिले.

कार्यक्रमास उपसंचालक प्रमोदिनी अमृतवाड, क्रीडा अधिकारी दादासाहेब देवकते, शिल्पा चाबूकस्वार, महिला उद्योजिका स्टेला डिसोझा आदी उपस्थित होते.