मुंबई, दि.3 : विभागीय सह नियंत्रक यांनी त्यांच्या कार्यक्षेत्रातील आस्थापनांना भेटीस जाण्यापूर्वी त्याबाबतची माहिती नियंत्रक कार्यालयास व उपनियंत्रक यांनी त्यांच्या कार्यक्षेत्रातील आस्थापनांना भेटीस जाण्यापूर्वी त्याबाबतची माहिती सह नियंत्रक कार्यालयास देणे आवश्यक असल्याचे निर्देश नियंत्रक, वैध मापन शास्त्र डॅा. रविंद्र कुमार सिंगल यांनी दिले आहेत.

विभागीय सह नियंत्रक  व उपनियंत्रक यांना  त्यांच्या कार्यक्षेत्रातील आस्थापनांना भेटीस जाण्यापूर्वीचे निर्देश अन्न, नागरी पुरवठा व ग्राहक संरक्षण विभागाचे शासन परिपत्रक क्र. वैमाशा-2019/465/प्र.क्र.143/ग्रासं-३, दि. 26/11/2019 अन्वये देण्यात आलेले आहेत तसेच याबाबत वेळोवेळी नियंत्रक कार्यालयाकडूनही याबाबतचे निर्देश देण्यात आलेले आहेत. तरीसुद्धा काही अधिकारी आस्थापनांना भेटी देऊन नाहक त्रास देत असल्याचे निदर्शनास आले आहे. तरी अशा काही तक्रारी असल्यास व्यापारी व आस्थापनांना त्यांबाबत खातरजमा करता येणार आहे, असे परिपत्रक प्रसिध्दीस दिले आहे.

नाहक त्रास देण्याच्या हेतूने देण्यात येणाऱ्या भेटीस आळा घालण्यासाठी यंत्रणेतील सह नियंत्रक यांनी भेटीबाबत मुख्यालयास आगाऊ माहीती दिली असल्याबाबतची खातरजमा संबधित व्यापारी/आस्थापनांना 022- 22621968 या क्रमांकावर करता येईल. तसेच  उपनियंत्रक यांच्या भेटीबाबत खालील विभागीय कार्यालयांच्या संपर्क क्रमांकावर खातरजमा करता येईल. अशी नियंत्रक कार्यालयाकडून व्यापारी आस्थापनांना सांगण्यात आले आहे. मुंबई महानगर विभाग- बृहनमुंबई-   022-24148494 कोकण विभाग-  022-27574074 ( ठाणे, पालघर, रायगड, रत्नागिरी व सिंधूदूर्ग जिल्हा),पूणे विभाग-  020- 26697232 (पुणे,सातारा, कोल्हापूर,सांगली व सोलापूर जिल्हा) नाशिक विभाग-  0253- 2455696 ( नाशिक, अहमदनगर, धूळे, नंदूरबार, जळगांव) औरंगाबाद विभाग- 0240-2952656 (औरंगाबाद, बीड, जालना, लातूर, उस्मानाबाद, परभणी, हिंगोली, नांदेड),अमरावती विभाग –  0721-2990038 (अमरावती, यवतमाळ, बुलढ़ाणा, अकोला, वाशिम),नागपूर विभाग- 0712- 2540292,( नागपूर, वर्धा, चंद्रपूर, गडचिरोली, भंडारा, गोंदिया) अशी माहिती नियंत्रक, वैध मापन शास्त्र विभागाकडून एका पत्रकाद्वारे प्रसिद्धीस देण्यात आली आहे.

पूरजन्य परिस्थिती हाताळण्यासाठी नियोजन करताना स्थानिकांचा प्रत्यक्ष सहभाग वाढवा

पूरपरिस्थिती हाताळण्यासाठी केलेल्या उपाययोजनांचा महिन्याभराने  घेणार आढावा

मुंबई, दि. 3 : पूरजन्य परिस्थितीच्या तयारीचा आढावा प्रत्यक्ष कामाच्या ठिकाणी जाऊन  घ्या, तसेच पूरपरिस्थिती हाताळण्याचे नियोजन करताना स्थानिकांचा सहभाग वाढविण्याची सूचना नगरविकास मंत्री एकनाथ शिंदे यांनी केली.  पावसाळ्यातील संभाव्य दुर्घटना टाळण्यासाठी नालेसफाई, रस्त्यांवरील खड्डे बुजविणे आदी कामे प्राधान्याने करण्यासाठी महानगरपालिका आयुक्त, मुख्याधिकाऱ्यांनी स्वतः यात लक्ष घालून ही कामे पूर्ण करावीत. नियंत्रण कक्ष, अग्निशमन दलासह आरोग्य यंत्रणा सज्ज ठेवण्याचे निर्देश नगरविकासमंत्र्यांनी आज दिले. दरम्यान, पावसाळ्यात आपत्कालिन परिस्थितीला तोंड देण्यासाठी आवश्यक साधनसामुग्री, उपकरणांच्या खरेदीसाठी निधीची कमतरता भासू देणार नाही अशी ग्वाही देतानाच जिल्ह्यांनी नियोजन समितीच्या निधीतून अत्यावश्यक खरेदी करण्याच्या सूचना नगरविकासमंत्र्यांनी यावेळी दिल्या.

पावसाळ्याच्या पार्श्वभूमीवर राज्यातील सर्व महानगरपालिका आणि नगरपालिका- नगरपंचायतींनी केलेल्या तयारीचा आज नगरविकास मंत्री एकनाथ शिंदे यांनी आढावा घेतला. दूरदृश्य प्रणालीद्वारे आयोजित बैठकीस नगरविकास विभागाच्या प्रधान सचिव श्रीमती सोनिया सेठी, मदत व पुनर्वसन विभागाचे प्रधान सचिव असीमकुमार गुप्ता यांच्यासह राज्यातील सर्व जिल्हाधिकारी, महानगरपालिकांचे आयुक्त, नगरपरिषद मुख्याधिकारी, सार्वजनिक बांधकाम, आरोग्य, जलसंपदा विभागाचे वरिष्ठ अधिकारी उपस्थित होते.

मुख्यमंत्री उद्धव ठाकरे यांनी यापूर्वीच मान्सूनपूर्व तयारीचा आढावा घेऊन निर्देश दिले असून शहरांमधील नालेसफाई, रस्त्यांवरील खड्डे बुजविणे, नियंत्रण कक्ष आणि अग्निशमन दलाची सज्जता, धोकादायक इमारती, वृक्षछाटणी आदी विषयांवर महानगरपालिका, नगरपालिकांनी तातडीने कार्यवाही करावी, त्यासाठी विविध विभागांशी समन्वय राखण्याच्या सूचना नगरविकासमंत्री श्री. शिंदे यांनी यावेळी दिल्या.

नालेसफाईवर विशेष लक्ष द्या

शहरांमधील नाल्यांची १०० टक्के सफाई होईल याकडे विशेष लक्ष पुरवून नालासफाई झालेल्या भागातील गाळ, कचऱ्याची तातडीने विल्हेवाट लावण्याच्या सूचना नगरविकासमंत्र्यांनी यावेळी दिल्या. शहरातील पाणी साचणारी ठिकाणे शोधून आवश्यक त्या उपाययोजना करण्याच्या सूचना देतानाच रस्त्यांवरील खड्डे पावसाळ्यापूर्वी भरण्याचे निर्देशही मंत्री श्री. शिंदे यांनी यावेळी दिले. धोकादायक इमारतींमधील रहिवाशांच्या निवाऱ्याची व्यवस्था करण्यासाठी पूर्वतयारी करुन ठेवण्याबरोबरच शहरातील मोठे होर्डिंग्ज पडून दुर्घटना घडणार नाही त्यासाठी होर्डिंग्जची तपासणी करण्याच्या सूचनाही नगरविकासमंत्री श्री. शिंदे यांनी दिल्या.

नियंत्रण कक्ष सज्ज ठेवा

पावसाळ्याच्या काळात संकटसमयी शहरांमधील रहिवाशांना तात्काळ मदत पोहोचावी यासाठी सर्व महानगरपालिका, नगरपालिकांनी आपले नियंत्रण कक्ष सज्ज ठेवावेत. जनतेला माहिती देण्यासाठी अलर्ट प्रणाली कार्यन्वित ठेवण्याबरोबरच नियंत्रण कक्षाचे संपर्क क्रमांक जनतेपर्यंत प्रसारमाध्यमांद्वारे पोहोचविण्याच्या सूचनाही नगरविकासमंत्र्यांनी दिल्या. नियंत्रण कक्षाची सज्जता तपासण्यासाठी मॉकड्रिल घेण्याबरोबरच नियंत्रण कक्षाला आयुक्तांनी अचानक भेटी देऊन पाहणी करण्याचे निर्देशही त्यांनी दिले.

साथीचे आजार प्रतिबंधात्मक उपाययोजना करा

साथीचे आजार उद्भवणार नाही यासाठी प्रतिबंधात्मक उपाययोजना करा, त्याशिवाय औषधांचा पुरेसा साठा करण्यासह आपत्कालिन स्थितीमध्ये रुग्णालये, रुग्णवाहिका, अग्निशमन दलाला सज्ज करुन ठेवण्याचे निर्देशही यावेळी नगरविकासमंत्र्यांनी दिले.

जलसंपदा विभागाने सतर्क राहावे

पावसाळ्यात धरणांचे दरवाजे उघडताना खालच्या गावांची स्थिती पाहून संबंधितांशी संपर्क-समन्वय करुनच निर्णय घ्यावा, दरवाजे उघडल्यानंतर खालच्या गावांमध्ये पूरस्थिती निर्माण होणार नाही याची दक्षता घेतानाच जलसंपदा विभागाच्या सर्व अभियंत्यांनी या काळात अधिक सतर्क राहावे. नदीकाठच्या गावांशी संपर्क तुटल्यास त्या गावांमधील रहिवाशांना अन्नधान्ये, औषधे पुरविण्यासाठी व्यवस्था करणे आवश्यक आहे. धबधब्यासारख्या पर्यटन प्रवेश बंदीच्या ठिकाणावर लक्ष ठेवून कोणतीही दुर्घटना घडू नये यासाठी सतर्क राहावे लागणार आहे. भूस्खलन किंवा दरड कोसळणाऱ्या ठिकाणी अधिकची दक्षता घेण्याबरोबरच अग्निशमन दलाने सज्ज राहण्याच्या सूचनाही नगरविकासमंत्री एकनाथ शिंदे यांनी दिल्या.

स्थानिकांच्या सहभागासाठी ‘ठाणे पॅटर्न‘ राबवा

पावसाळ्याच्या काळात आपत्कालिन परिस्थिती निर्माण झाल्यास ठाण्याच्या धर्तीवर  स्थानिक व्यवस्थापन समितीमध्ये स्थानिकांचा सहभाग घेण्यात यावा, त्याचा निश्चितच मदतकार्यात फायदा होणार आहे.  मुंबई महानगरपालिकेने एमएमआरडीए, एमएसआरडीसी, जिल्हा प्रशासन, रेल्वे आदी सर्व संबंधित यंत्रणांशी समन्वय ठेवण्याच्या सूचना देतानाच महानगरपालिकेने नोडल अधिकारी नियुक्त करण्याचे निर्देश नगरविकासमंत्र्यांनी दिले. मुंबई महानगर प्रदेश क्षेत्रातील सर्व यंत्रणांनी पावसाळ्याच्या काळात सतर्क राहण्याचे आवाहनही यावेळी केले.

मुंबई, दि.३ : राज्यात क्रीडामय वातावरण निर्माण करून विविध खेळांना उत्तेजन देण्याच्या दृष्टीने तसेच खेळाडूंना स्पर्धेत खेळण्याची जास्तीत जास्त संधी प्राप्त व्हावी व नॅशनल गेम्सच्या दृष्टीने खेळाडूंची तयारी व्हावी, याकरिता राज्यात “महाराष्ट्र स्टेट ऑलिम्पिक गेम्स” चे आयोजन महाराष्ट्र शासन व महाराष्ट्र ऑलिम्पिक असोसिएशन यांच्या संयुक्त विद्यमाने २०२२ या वर्षामध्ये करण्यात येणार असल्याची माहिती क्रीडा व युवक कल्याण मंत्री सुनील केदार यांनी दिली.

श्री. केदार म्हणाले,राज्यात क्रीडामय वातावरण निर्माण करून विविध खेळांना उत्तेजन देण्याच्या दृष्टीने तसेच आंतरराष्ट्रीय, राष्ट्रीय व राज्यस्तरावर आपले नैपुण्य दाखवित असलेल्या खेळाडूंना स्पर्धेत खेळण्याची जास्तीत जास्त संधी प्राप्त व्हावी व राष्ट्रीय खेळ स्पर्धेच्या दृष्टीने खेळाडूंची तयारी व्हावी याकरिता महाराष्ट्र ऑलिम्पीक असोसिएशनमार्फत राज्यात विविध ठिकाणी मिनी ऑलिम्पिक स्पर्धा आयोजित करण्याचा निर्णय घेण्यात आला असल्याचे त्यांनी सांगितले.

विविध खेळांना उत्तेजन देण्यासाठी व खेळाडूंना स्पर्धात्मक अनुभव मिळावा यासाठी महाराष्ट्र ऑलिम्पीक असोसिएशनच्या सहकार्याने मिनी ऑलिपीक स्पर्धा आयोजित करण्याचे प्रस्तावित होते, याचा लाभ दिव्यांग खेळाडूंच्या क्रीडा प्रोत्साहन देण्यास देखील होणार आहे. कोविडमुळे उद्भवलेल्या परिस्थितीत सन २०२०-२१ व २०२१-२२ मध्ये या स्पर्धांचे आयोजन करणे शक्य झाले नसल्याचे श्री केदार यांनी सांगितले.

आता या स्पर्धाचे आयोजन महाराष्ट्र शासन व महाराष्ट्र ऑलिम्पिक असोसिएशन यांच्या संयुक्त विद्यमाने शिवछत्रपती क्रीडा संकुल बालेवाडी पुणे येथे आयोजित करण्यात येणार आहे. या स्पर्धेच्या अनुषंगाने सुरक्षा, वैद्यकीय सुविधा, खेळाडुंच्या प्रवासाची साधने इ. बाबी उपलब्ध करुन देणे आवश्यक आहे. यासाठी राज्यस्तरावर एक उच्चस्तरीय समिती व पुणे येथे मुख्य स्पर्धा आयोजन समिती अशा दोन समित्या गठीत करण्यात आला असून राज्यस्तरावर एक उच्चस्तरीय समिती मुख्यमंत्री आणि उपमुख्यमंत्री यांच्या मार्गदर्शनाखाली आणि क्रीडा व युवक कल्याण मंत्री यांच्या अध्यक्षतेखाली गठीत करण्यात आली आहे.

मुंबई, दि. 3 : राज्यातील ग्रामीण भागातील युवकांना रोजगारक्षम बनविण्यासाठी कॅपजेमिनी कंपनी डिजीटल अकॅडमीच्या माध्यमातून प्रशिक्षण देणार आहे. याबाबत राज्याचे कौशल्य विकास मंत्री राजेश टोपे यांच्या समोर कंपनीच्यावतीने सादरीकरण करण्यात आले.

सह्याद्री अतिथी गृहात आज झालेल्या बैठकीत कॅपजेमिनी कंपनीचे डिजिटल इन्क्लुजन विभागाचे उपाध्यक्ष अनुराग प्रताप यांनी याबाबत सादरीकरण केले. राज्याच्या ग्रामीण भागातील युवकांना रोजगारक्षम बनविण्यासाठी काही प्रशिक्षण आवश्यक आहे. विद्यार्थ्यांना कौशल्य देण्याची आवश्यकता आहे, असे त्यांनी सांगितले. कॅपजेमिनी कंपनी डिजीटल अकॅडमीच्या माध्यमातून हे प्रशिक्षण देण्यासाठी प्रयत्नशील आहे.

कंपनीचा उपक्रम चांगला आहे. ग्रामीण भागातील युवकांना रोजगारक्षम बनविण्यासाठी, चांगली संधी मिळण्यासाठी हा उपक्रम उपयुक्त ठरेल असा विश्वास श्री.टोपे यांनी व्यक्त केला. सध्या कंपनीच्यावतीने राज्यातील बारा महाविद्यालयात हा प्रकल्प प्रायोगिक तत्त्वावर राबविण्यात येत आहे. त्याची उपयुक्तता सिद्ध झाल्यास राज्यातील विविध जिल्ह्यांत हा उपक्रम राबविण्याचा मानस आहे.

यावेळी कॅपजेमिनी कंपनीच्या सीएसआर विभागाच्या मुख्य अधिकारी शोभा मीरा, आरती श्रीवास्तव, ऋता साटम आदी उपस्थित होते.

क्रीडा मंत्री सुनील केदार यांनी कबड्डीच्या दोन्ही संघांतील खेळाडूंचे केले अभिनंदन

मुंबई, ता. ३ : चौथ्या खेलो इंडिया स्पर्धेत पहिल्या दिवशी झालेल्या महाराष्ट्राच्या मुलांच्या कबड्डी संघाने आंध्र प्रदेशचा तब्बल १९ गुणांनी तर मुलींच्या संघांने झारखंडचा ४५ गुणांनी उडवला धुव्वा हरियाणाच्या भूमीत विजयी सलामी देत आपले कौशल्य दाखवल्याबद्दल राज्याचे क्रीडा व युवक कल्याण मंत्री सुनील केदार यांनी कबड्डीच्या मुला-मुलींच्या संघांतील खेळाडूंचे अभिनंदन केले.

महाराष्ट्राने मुलांच्या संघाने तब्बल ४८ गुण घेतले तर आंध्र प्रदेशला २९ गुणांपर्यंतच मजल मारता आली.ताऊ देवीलाल स्पोर्टस कॉप्लेक्समध्ये हा सामना झाला. सुरूवातीला अटीतटीचा वाटणारा सामना महाराष्ट्राने एकतर्फी केला.महाराष्ट्राने पहिल्याच चढाईत एक गुण घेतला. डु ओर डाय रेडमध्येही गुण मिळवला. सुरूवातीपासूनच महाराष्ट्राने आक्रमक खेळ केला. परंतु नंतर आध्र प्रदेशने आक्रमकता वाढवून सामन्यात पुनरागमन केले. चार विरूद्ध पाच गुणांची आघाडी घेतली. त्यांनी चारगुणांची कमाई करीत महाराष्ट्राला ऑल आऊट केले. त्यामुळे सामना बारा विरूद्ध सहा असा फिरला. परंतु नंतर महाराष्ट्राचे खेळाडू आक्रमक झाले. आंध्र प्रदेशला ऑलआऊट केले. त्यामुळे त्यांचे पंधराविरूद्ध सोळा गुण झाले. अठराव्या मिनिटाला सतरा आणि सतरा अशी बरोबरी झाली. परंतु पहिल्या हाफमध्ये महाराष्ट्रने तीन गुणांची आघाडी घेतली. त्यावेळी गुणफलकावर २० विरूद्ध १७ असे गुण होते. दुसऱ्या हाफ मध्ये महाराष्ट्र आणखीच आक्रमक झाला. त्यांनी चढाई आणि बचावातही उजवा खेळ केला. त्यामुळे आठ मिनिटे बाकी असताना जवळपास दुप्पट गुण मिळवले. धावफलक ४० विरूद्ध असा होता. शेवटी महाराष्ट्राने ४८ गुण मिळवत पहिलावहिला खेलो इंडिया युथ गेम्स मध्ये विजय नोंदवला. आंध्र प्रदेशचे २९ गुण होते.

शिवम पठारे (अहमदनगर), पृथ्वीराज चव्हाण (कोल्हापूर) यांनी चढाईत नेत्रदीपक कामगिरी केली. त्यांच्या बळावरच महाराष्ट्राला गुण मिळवता आले. दादासाहेब पुजारी, रोहन तुपारे, साईप्रसाद पाटील, जयेश महाजन यांनी उत्कृष्ट पकडी केल्या. त्यामुळे संघाला भरभक्कम आघाडी घेता आली. सामन्यात आऊ आउट झाल्याने महाराष्ट्र सहा गुणांनी पिछाडीवर होता. परंतु नंतर आक्रमक खेळ करीत मुलांनी सफाईदार खेळ केला.

कबड्डीत झारखंडचा ४५ गुणांनी उडवला धुव्वा

चौथ्या खेलो इंडिया स्पर्धेत पहिल्याच दिवशी कबड्डीत मुलांनंतर मुलींनी विजयी पतका फडकावत महाराष्ट्राचे नाव उंचावले. मुलींनी नेत्रदीपक कामगिरी करीत तब्बल ४५ गुणांनी झारखंडचा धुव्वा उडवला. ६० विरूद्ध १५ असा हा सामना झाला.
पंचकुलातील ताऊ देवीलाल स्पोर्टस कॉम्प्लेक्समध्ये हा सामना रंगला. सामन्यात पहिल्या पाचच मिनिटांत मुलींनी झारखंडवर पाच-शून्य अशी गुणांची आघाडी घेत मानसिक दबाव टाकला. त्यामुळे झारखंडला सामन्यात कमबॅक करता आले नाही.
खेळाडूंनी प्रारंभीच सामना महाराष्ट्राच्या बाजूने झुकवला होता. पहिल्या हापमध्ये १५ गुणांची आघाडी घेतली होती. दुसऱ्या हापची दहा मिनिटे उरली असताना महाराष्ट्राच्या मुलींनी तब्बल ४५ गुण फलकावर लावले. त्यावेळी झारखंडचे अवघे १३ गुण होते. त्यामुळे केवळ सामन्याची औपचारिकता उरली होती. सामन्याला एक मिनिट उरला असताना पुन्हा एकदा झारखंडला ऑल आऊट केले. त्यामुळे गुणफलकावर लागले ६० गुण. झारखंडचे होते अवघे १५ गुण.
प्रशिक्षक गीता साखरे-कांबळे, सोनाली जाधव यांनी तर टीम व्यवस्थापक अनिल सातव, महेश खर्डेकर, ज्ञानेश्वर खुरांगे, सपोर्ट स्टाफ विजय खोकले, किशोर बोंडे यांनी खेळाडूंचा उत्साह वाढवला. या सर्वांनी ठरवलेल्या प्लॅननुसार खेळाडूंनी सामन्यात कौशल्य दाखवले.

मैदानात जय भवानी, जय शिवाजीचा जयघोष

महाराष्ट्राच्या मुलींनीही खेळात तरबेज असल्याचे दाखवून दिले. त्यांचा खेळ पाहून उपस्थित असलेल्या मराठी क्रीडाप्रेमींनी जल्लोषात जय भवानी, जय शिवाजी, हर हर महादेव अशा विजयी जयघोष केला. हरियानातील क्रीडाप्रेमींनी टाळ्या वाजवून मुलींना प्रोत्साहन दिले.

या मुली चमकल्या

चढाईत हरजीतसिंग संधू ११ गुण (मुंबई), ऋतुजा अवघडीने ८ गुण मिळवले. पकडीतही ती चमकली. यशिका पुजारीने पाच गुण मिळवले. निकिता लंगोटे आणि कोमल ससाणे यांनी नेत्रदीपक पकडी केल्या. मुस्काने लोखंडे हिनेही उत्कृष्ट बचाव केला. एकंदरीत सांघिक कामगिरीमुळे महाराष्ट्राला एकतर्फी विजय मिळवता आला.

मुलींचा संघ असा

हरजीतकौर संधू, शिवरजनी पाटील, आरती ससाणे, कोमल ससाणे, रिद्धी हडकर, हर्षदा पाटील, किरण तोडकर, मनिषा राठोड, निकिती लंगोटे, यशिका पुजारी, मुस्कान लोखंडे, ऋतुजा अवघडी.

मुंबई, दि. 3 : महात्मा गांधी रुग्णालयातील रिक्त जागा तत्काळ भरण्यात याव्यात. यासाठी केंद्र सरकारच्या जेम पोर्टल वरुन मनुष्यबळ घ्यावे. रुग्णालयातील अर्धवट बांधकाम पूर्ण करावे. रुग्णालयातील स्वच्छता ठेवावी. त्यासाठी आवश्यक यंत्रसामग्री खरेदी करावी, अशा सूचना सार्वजनिक आरोग्य मंत्री राजेश टोपे यांनी दिल्या.

परळ येथील महात्मा गांधी स्मृती रुग्णालयाच्या विविध प्रकारच्या समस्यांबाबत तोडगा काढण्यासाठी सार्वजनिक आरोग्य मंत्री राजेश टोपे पुढील आठवड्यात व्यापक बैठक घेणार आहेत.

याबाबत आज सह्याद्री अतिथी गृहात रुग्णालयाच्या समस्यांबाबत बैठक झाली. आमदार अजय चौधरी, नगरसेवक अनिल कोकीळ, केईएम रुग्णालयाच्या अधिष्ठाता डॉ. संगीता रावत, सहाय्यक अधिष्ठाता डॉ. प्रविण बांगर, आरोग्य विभागाचे सहसचिव वि. ल. लहाने, अवर सचिव महेश लाड आदी उपस्थित होते.

आमदार अजय चौधरी यांनी महात्मा गांधी स्मृती रुग्णालयातील विविध प्रकारच्या समस्यांबाबत माहिती दिली. रुग्णालयातील व्यवस्था पूर्णपणे कार्यान्वित करण्याची आवश्यकता आहे, असे सांगितले. यावेळी ईएसआयसीचे डॉ. संजय ढवळे, डॉ. राजीव गुरमुखानी, संचालक महेश वरुडकर, कर्मचारी संघटनेचे प्रतिनिधी बाळा कदम उपस्थित होते.

राष्ट्रीय – नोएडा आंतरराष्ट्रीय विमानतळाची अभियांत्रिकी, खरेदी आणि बांधकाम (ईपीसी) कामे करण्यासाठी यमुना इंटरनॅशनल एअरपोर्ट प्रायव्हेट लिमिटेडने (वायआयएपीएल) टाटा प्रोजेक्ट्स लिमिटेडची निवड केली आहे. पायाभूत सोयीसुविधांच्या प्रचंड मोठ्या प्रकल्पांचे डिझाईन, खरेदी आणि बांधकाम क्षेत्रातील आपला अनुभव ज्यांनी सिद्ध केला आहे अशा तीन निवडण्यात आलेल्या टीम्समधून अखेरीस टाटा प्रोजेक्ट्स लिमिटेडची निवड करण्यात आली आहे. नोएडा आंतरराष्ट्रीय विमानतळावर टाटा प्रोजेक्ट्स लिमिटेड टर्मिनल रनवे, एअरसाईड इन्फ्रास्ट्रक्चर, रस्ते, युटिलिटीज, लॅन्डसाईड सुविधा आणि इतर सहायक इमारतींची उभारणी करेल. पायाभूत सुविधांच्या कुशल उभारणीच्या दीर्घ व यशस्वी अनुभवाच्या बळावर टाटा प्रोजेक्ट्स लिमिटेडने केलेल्या काही उत्कृष्ट कामांमध्ये नवे संसद भवन, मुंबई ट्रान्स-हार्बर लिंक, डेडिकेटेड फ्राईट कॉरिडॉरचे अनेक भाग आणि मुंबई, पुणे, दिल्ली, लखनौ, अहमदाबाद व चेन्नईसह विविध शहरांमध्ये मेट्रो रेल लाईन्स यांचा समावेश आहे.

नोएडा आंतरराष्ट्रीय विमानतळाच्या रचनेची प्रेरणा असणार आहे, भारत!  उपयोग करणार असलेल्या लोकांसाठी अनुकूल, आधुनिक डिझाईन विकसित करण्यासाठी स्विस तंत्रज्ञान, कार्यक्षमता आणि भारतीय संस्कृती व आदरातिथ्याचा मिलाप घडवून आणला जाईल.  पॅसेंजर टर्मिनलची उभारणी अनेक महत्त्वाचे निकष डोळ्यासमोर ठेवून केली जाईल, यामध्ये कमी आणि कुशल पॅसेंजर फ्लो, डिजिटल सेवा, पर्यावरणावरील परिणाम कमीत कमी असावा यासाठीची वचनबद्धता यांचा समावेश असेल.  नोएडा आंतरराष्ट्रीय विमानतळ भारतातील असे विमानतळ बनेल ज्याठिकाणी कुटुंबे/वयस्क व्यक्ती आणि व्यापारासाठी प्रवास करणाऱ्यांना संपर्कविना प्रवास आणि वैयक्तिक सेवा प्रदान केल्या जातील.

यमुना इंटरनॅशनल एअरपोर्ट प्रायव्हेट लिमिटेडचे मुख्य कार्यकारी अधिकारी क्रिस्तोफ श्नेलमन यांनी सांगितले, “टाटा प्रोजेक्ट्ससोबत नोएडा आंतरराष्ट्रीय विमानतळावर अभियांत्रिकी, खरेदी आणि बांधकाम कामांसाठी भागीदारी करून आम्हाला अतिशय आनंद होत आहे.  हे ईपीसी कॉन्ट्रॅक्ट त्यांच्या हाती सोपवून आमच्या प्रकल्पाने पुढील टप्प्यात प्रवेश केला आहे, ज्यामध्ये साईटवर बांधकामाची गती अतिशय वेगाने वाढेल.  २०२४ पर्यंत दरवर्षी १२ मिलियन प्रवाशांच्या क्षमतेसह एक पॅसेंजर टर्मिनल, रनवे आणि विमानतळावरील इतर पायाभूत संरचना तयार करण्यासाठी आम्ही टाटा प्रोजेक्ट्ससोबत काम करत आहोत.  भारतात एव्हिएशन इकोसिस्टिमच्या सर्वसमावेशक आणि पर्यावरणानुकूल विकासाला सक्षम बनवणे, प्रोत्साहन देणे आणि सुदृढ करणे हे आमचे उद्दिष्ट आहे.  नोएडा आंतरराष्ट्रीय विमानतळ राज्यासह देशभरात रोजगारसंधी निर्माण करण्याला आणि आर्थिक विकासाला चालना देईल.” 

टाटा प्रोजेक्ट्स लिमिटेडचे सीईओ आणि नियुक्त एमडी विनायक पै म्हणाले, “आम्हाला जेवरमध्ये ग्रीनफील्ड नोएडा आंतरराष्ट्रीय विमानतळाचे काम सोपवले गेले याचा अतिशय अभिमान वाटतो.  टाटा प्रोजेक्ट्स लिमिटेड भारतातील सर्वात प्रगत आणि पर्यावरणानुकूल विमानतळ नेमून दिलेल्या वेळेत तयार करण्यासाठी वायआयएपीएलसोबत काम करेल.  आम्ही गुणवत्ता, सुरक्षा आणि पर्यावरण सुरक्षा यांच्या सर्वोत्कृष्ट मानकांचे पालन करत या विमानतळाच्या बांधकामामध्ये नवीन, अत्याधुनिक तंत्रज्ञानाचा वापर केला जाईल.”

नोएडा आंतरराष्ट्रीय विमानतळावरील पॅसेंजर टर्मिनलचे लेआऊट कुशल असून डिझाईन अतिशय प्रभावी आहे. याठिकाणी हिरवाईने सजलेली, अनेक उच्च दर्जेदार ठिकाणे तयार केली जातील, ऊर्जेची बचत आणि पर्यावरण अनुकूलता यांचा वास्तविक आणि संतुलित अनुभव याठिकाणी घेता येईल. या विमानतळाच्या डिझाईनमध्ये पर्यावरण अनुकूलतेबरोबरीनेच प्रवाशांची सुविधा आणि भविष्यातील गरजांच्या दृष्टीने लवचिकतेबरोबरीनेच कालातीत डिझाईन यांचा मिलाप घडवून आणला जाईल.

नोएडा आंतरराष्ट्रीय विमानतळाचे डिझाईन पर्यावरणाला अनुकूल व शाश्वत विकासावर आधारित आहे.  हे भारतातील पहिले शुद्ध शून्य उत्सर्जन विमानतळ बनेल.  आयजीबीसीने प्रमाणित केलेल्या इमारती, रेनवॉटर हार्वेस्टिंग, झिरो लिक्विड डिस्चार्ज सीवेज ट्रीटमेंट प्लांट, कचरा व्यवस्थापन सुविधा यासारख्या हरित पायाभूत संरचनेच्या आवश्यक बाबी ध्यानात ठेवून या विमानतळाची रचना आणि विकास केला जाईल.

नोएडा आंतरराष्ट्रीय विमानतळाच्या डिझाईनची प्रेरणा असणार आहे, भारत! यामध्ये असे अनेक रचना घटक समाविष्ट केले जातील जे स्थानिक वास्तुकला दर्शवण्याबरोबरीनेच पर्यावरणाला अनुकूल संचालनात देखील योगदान देतील. उदाहरणार्थ, टर्मिनलच्या सेंट्रल लॅन्डस्केप्ड कोर्टयार्डमध्ये नैसर्गिक प्रकाश आणि व्हेंटिलेशनचा उपयोग केला जाईल, ज्यामुळे उर्जेवर होणारा खर्च आणि कार्बन उत्सर्जन कमी होईल. कॅम्पस लँडस्केपिंगचा उद्देश फक्त सौंदर्य वाढवण्यापुरता नसेल तर त्यातून उपयोग मूल्य देखील निर्माण केले जाईल.    

इतर स्थानिक डिझाईन घटकांमध्ये वाराणसी आणि हरिद्वारच्या प्रसिद्ध घाटांप्रमाणे टर्मिनल फोरकोर्टवर लोकांचे स्वागत आणि त्यांना एकत्र आणण्यासाठी पायऱ्यांच्या फ्लाईट्स असतील.  कोर्टयार्डला हवेलीचे रंगरूप दिले जाईल, ज्यामुळे टर्मिनल इमारतीमध्ये ताजी हवा व सूर्यप्रकाश खेळता राहील. राज्यातील महत्त्वाच्या नद्यांपासून प्रेरणा घेत सफेद, पारदर्शी, वळणदार छत नदीप्रमाणे आभास निर्माण करेल. पॅसेंजर टर्मिनलमध्ये भारतीय वास्तुकलेपासून प्रेरणा घेऊन तयार केलेले नक्षीदार सजावटीचे जाळीदार स्क्रीन्स असतील.  नोएडा आंतरराष्ट्रीय विमानतळ उत्तर प्रदेश राज्यात प्रवेश करतानाचा भव्य, शानदार अनुभव प्रदान करेल. 

झ्युरिक एअरपोर्ट इंटरनॅशनल एजीने विमानतळ विकासाच्या कामाची बोली २०१९ साली जिंकली आणि तेव्हापासून आजतागायत विमानतळाच्या विकासकामात अनेक महत्त्वाचे टप्पे पार केले आहेत.  यामध्ये सुरक्षा अनुमती, कन्सेशन अग्रीमेंटवर स्वाक्षऱ्या, आर्किटेक्ट्सची निवड, ब्रँड आयडेंटिटीचा शुभारंभ, समभागधारक आणि राज्य सहायता करारांवर स्वाक्षऱ्या, मास्टरप्लॅन आणि विकास प्लॅनला अनुमती, एसबीआयसोबत फायनान्शियल क्लोज, विमानळावर सीएनएस-एटीएम सेवांसाठी एएआयसह आणि फ्युएल फार्मची रचना, उभारणी आणि संचालन यासाठी कन्सेशनेरची निवड यांचा समावेश आहे.  कन्सेशनचा कालावधी अधिकृतरीत्या १ ऑक्टोबर २०२१ पासून सुरु झाला आहे. नोव्हेंबर २०२१ मध्ये माननीय पंतप्रधान श्री. नरेंद्र मोदी यांच्या हस्ते भूमिपूजन समारंभ झाल्यानंतर साईटवर मातीकाम आणि बाउंड्री बांधण्याचे काम यांच्यासह ईपीसी कामांची तयारी सुरु झाली आहे. आता ईपीसी कंत्राट दिले गेले आहे, विमानतळाचा पहिला टप्पा कन्सेशन कालावधी सुरु झाल्यापासून तीन वर्षांच्या आत पूर्ण होण्याच्या मार्गावर आहे.