पुणे-अभिनेते सयाजी शिंदे यांच्या ‘सह्याद्री देवराई’संस्थेतर्फे रविवारी  ‘वृक्ष संवाद २०२२’ हा कार्यक्रम आयोजित करण्यात आला होता. या कार्यक्रमाला चांगला प्रतिसाद मिळाला.यशस्वी वृक्ष लागवड करणाऱ्यांचा,  सह्याद्री देवराई ‘संस्थेच्या कृतिशील सदस्यांचा आणि सी.एस.आर. फंडच्या माध्यमातून   वृक्ष लागवडीला मदत करणाऱ्यांचा  सत्कार या कार्यक्रमात करण्यात  आला. देशी वृक्षांच्या बियांच्या वृक्षांची थैली भेट देण्यात आली.९ ऑकटोबर,रविवारी सकाळी १० ते सायंकाळी ६ या वेळात रामकृष्ण मोरे सभागृह,चिंचवड येथे हा कार्यक्रम झाला.’सह्याद्री देवराई’संस्थेच्या सदस्यांकरिता होता.देशी वृक्षांच्या बियांचे प्रदर्शनही मांडण्यात आले होते.
पुणे वन विभागाचे उपवनसंरक्षक राहुल पाटील,अभिनेते सयाजी शिंदे,लेखक अरविंद जगताप,डॉ चंद्रकांत साळुंखे,सतीश आवटे यांनी मार्गदर्शन केले.
श्रीकांत इंगळहळ्ळीकर, धनंजय शेडबाळे , विजय निंबाळकर, मधुकर फल्ले  यांच्यासह अनेक वृक्षप्रेमी सभागृहात उपस्थित होते.

निसर्ग संवर्धनाचा संदेश पोहोचविण्यासाठी या कार्यक्रमाचे आयोजन करण्यात आले होते. सूत्रसंचालन सचिन चंदन यांनी केले.
‘महाराष्ट्रात ‘सहयाद्री देवराई ‘ च्या सहकाऱ्यांच्या योगदानाने महाराष्ट्रात वृक्ष लागवड वाढत आहे.वन विभागाचे सहकार्य वाढत आहे. संस्थेच्या वतीने पुण्यात देवराई करणार आहोत. सीड बँक करणार आहोत ‘, असे सयाजी शिंदे यांनी सांगीतले. अरविंद जगताप यांची  ‘मुळांचे कुळ घेऊ,खोडांचे बळ होऊ,झाडाचे गुण घेऊ,झाडाचे गुण गाऊ ! ‘ ही कविता सयाजी शिंदे यांनी भाषणादरम्यान सादर केली.

अरविंद जगताप म्हणाले, ‘सह्याद्री देवराई ‘ ही संस्था वृक्ष हीच सेलिब्रिटी मानून काम करते. अनेक क्षेत्रातील तज्ज्ञ , स्थानिक पातळीवरील कार्यकर्ते एकत्र करून वृक्ष लागवडीची चळवळ पुढे नेली जात आहे. आपल्या आवारात, दारात, उद्यानात , गावात झाडं वाढवा. प्रत्येक डोंगर झाडांसाठीच असतात, असे नाही कारण काही डोंगर गवतांचे असतात.

राहुल पाटील म्हणाले, ‘जे कोणी वृक्ष लावतात, वाढवतात ते सर्व वृक्षसंरक्षक असतात. सह्याद्री देवराईच्या माध्यमातून हे मोठे काम महाराष्ट्रात उभे राहत आहे.
मंचावरील कुंडीतील झाडाला अध्यक्षपदाचा मान देऊन आगळा पायंडा या कार्यक्रमाद्वारे पाडण्यात आला. www.sahyadridevrai.org यासंकेतस्थळाचे उद्घाटन यावेळी करण्यात आले. वृक्ष लागवडीला प्रोत्साहन देणाऱ्या, सयाजी शिंदे यांच्या आवाजातील गीताचे प्रकाशन यावेळी करण्यात आले.
संस्थेने महाराष्ट्रात १० लाख वृक्ष लागवड केल्याची माहिती या कार्यक्रमात देण्यात आली

मिरवणुकीद्वारे दिला शैक्षणिक, सामाजिक ,पर्यावरणाचे संदेश
पुणे :
‘महाराष्ट्र कॉस्मॉपॉलिटन एज्युकेशन सोसायटी’ (आझम कॅम्पस) आणि संलग्न संस्थाच्या वतीने रविवार, दिनांक ९ ऑकटोबर रोजी  ‘हजरत महमद  पैगंबर जयंती’(ईद-ए-मिलाद)निमित्ताने विद्यार्थ्यांच्या अभिवादन मिरवणुकीचे आयोजन करण्यात आले होते. सकाळी ८. ३०  वाजता संस्थेचे अध्यक्ष डॉ.पी. ए. इनामदार यांच्या उपस्थितीत मिरवणुकीला प्रारंभ झाला. हजरत मोहम्मद पैगंबरांचे शैक्षणिक, सामाजिक संदेश, घोषवाक्याचे फलक मिरवणुकीचे आकर्षण ठरले. संस्थेचे सचिव प्रा. इरफान जे. शेख, शाहिद इनामदार, एस. ए. इनामदार, तसेच गोल्डन ज्युबिली एज्युकेशन ट्रस्ट, हाजी गुलाम मोहम्मद आझम एज्युकेशन ट्रस्ट, एमएमईआरसी, डेक्कन मुस्लिम लायब्ररी, अवामी महाज संस्थेचे पदाधिकारी, व आझम कॅम्पस शिक्षण संकुलाचे प्राध्यापक, शिक्षक, शिक्षकेतर कर्मचारी, विद्यार्थी व पालक मोठ्या संख्येने सहभागी झाले होते.
मिरवणूक आझम कॅम्पस येथून निघून, डेक्कन मुस्लिम इन्स्टिट्यूट, ‘ट्राय लक हॉटेल, गाय कसाब मशीद, बाबाजान दर्गा, सरबतवाला चौक, हुसैनीबाग, क्वार्टर गेट, मॉडर्न बेकरी, इस्लमपुरा, ए. डी. कॅम्प चौक, भारत सिनेमा, पद्मजी पोलीस चौकी, निशांत थिएटर, भगवानदास चाळ, चुडामण तालीम, पूना कॉलेज आणि आझम कॅम्पस गेट येथे मिरवणुकीची सांगता झाली.अभिवादन मिरवणूक उपक्रमाचे हे १८ वे वर्ष होते.

पुणे-

101 इन्फंट्री बटालियन (प्रादेशिक सेना) मराठा LI, “पुणे टेरियर्स” ने आज म्हणजेच 09 ऑक्टोबर 2022 रोजी आपला 73 वा प्रादेशिक सेना दिन साजरा केला. यानिमित्त, कमांडिंग ऑफिसर कर्नल मनीष प्रियदर्शन, यांनी या देश संरक्षणाच्या सेवेत हौतात्म्य पत्करलेल्या  शूर जवानांना श्रद्धांजली वाहिली. तसेच, त्यानंतर भारती विद्यापीठ वैद्यकीय महाविद्यालय रुग्णालय आणि संशोधन केंद्र, पुणे यांच्या सहकार्याने रक्तदान शिबिराचे आयोजन करण्यात आले होते. यावेळी तुकडीतील 101 जवानांनी रक्तदान केले. तसेच, बटालियन परिसरात, वृक्षारोपण कार्यक्रम आयोजित करण्यात होता, त्यात फळझाडांची 50 रोपटी लावण्यात आली.

18 ऑगस्ट 1948 रोजी प्रादेशिक सेना कायदा अस्तित्वात आल्यानंतर, ह्या प्रादेशिक सैन्याची स्थापना करण्यात आली. देशाचे पहिले गव्हर्नर जनरल सी राजगोपालाचारी यांच्या हस्ते, 9 ऑक्टोबर 1949 रोजी या सैन्याची औपचारिक स्थापना करण्यात आली, म्हणूनच हा दिवस, प्रादेशिक सेना स्थापना दिन म्हणून साजरा केला जातो.

गेल्या 73 वर्षांत, प्रादेशिक सैन्याने 1962, 1965, 1971 च्या युद्धांमध्ये तसेच जम्मू-कश्मीर आणि ईशान्य भारतातील दहशतवादाचा मुकाबला करण्यात उत्कृष्ट योगदान देत आपली अत्युच्च व्यावसायिकता आणि शौर्याचे प्रदर्शन केले आहे. नैसर्गिक आपत्ती आणि इतर आपत्कालीन परिस्थितीत, मदतकार्य पार पाडण्यासाठी आणि  शांततेच्या काळात देशाची सेवा करण्यातही त्यांनी महत्त्वपूर्ण भूमिका बजावली आहे.

१० क्लब सहभागी
पुणे : आरोग्य व पर्यावरण संवर्धनाबाबत जनजागृतीसाठी रविवारी सायकल रॅलीचे आयोजन करण्यात आले. ऑक्टोबर सेवा सप्ताहांतर्गत ही सायकल रॅली काढण्यात आली.सारसबाग, टिळक रोड, डेक्कन, फर्ग्युसन रस्ता, संभाजी उद्यान या मार्गावर सायकलस्वारांनी जागृती केली. 
प्रसंगी समन्वयक अनिल मंद्रुपकर, मयूर बागुल, के. के. गुजराती, किशोर मोहोळकर, संदीप गायकवाड, विश्वास सूर्यवंशी, रोहिणी नागवणकर, प्रियांका शेंडगे शिंदे, राजीव निगडीकर, शैलेश बुरसे, स्मिता देव आदी उपस्थित होते. या सप्ताहात ‘लायन्स’च्या ट्वेंटी फर्स्ट सेंच्युरी, पुना वेस्ट, फ्युचर, विधिज्ञ, मुकुंदनगर, शिवाजीनगर, सुप्रिम, पुणे रिव्हर साईड, मैत्री या क्लबने सहभाग घेतला आहे. या रॅलीचा समारोप संभाजी उद्यानात झाला.
अनिल मंद्रुपकर म्हणाले, “कार्बन उत्सर्जन रोखणे, निसर्गाचे संवर्धन, प्रदूषण कमी करणे, स्वच्छ आणि निरोगी जीवन याबाबत जागृती करण्यात आली. ‘जॉईन ग्रीन रिव्होल्यूशन, स्टॉप पोल्युशन’ हा नारा होता. सायकलचा वापर वाढवून कार्बन उत्सर्जन कमी करण्यासह चांगले आरोग्य राखणे हेही यातून सांगण्यात आले.”

बालकुमार दिवाळी अंक २०२२ चे प्रकाशन
पुणेः आजच्या काळात आपली मूळ संस्कृती झपाट्याने बदलत आहे. भाजी भाकरीच्या संस्कृतीपासून ती वडापाववर आली आणि आता ती पिझ्झा संस्कृती झाली आहे. हे बदल थांबवायचे असतील तर बालकुमार साहित्यावाचून पर्याय नाही. मुलांमध्ये लहानवयातच आपली मूळ संस्कृती रुजवायला हवी, असे मत ज्येष्ठ शिक्षणतज्ञ डॉ.न.म.जोशी यांनी व्यक्त केले.

अमरेंद्र-भास्कर मराठी बालकुमार साहित्य संस्था, पुणेच्यावतीने बालकुमार दिवाळी अंकांचे प्रकाशन शुक्रवार पेठेतील संस्थेच्या सभागृहात करण्यात आले. यावेळी बालसाहित्यिका डॉ. संगीता बर्वे, महाराष्ट्र साहित्य परिषदेच्या कोषाध्यक्षा सुनीताराजे पवार, संस्थेच्या विश्वस्त डॉ. मंदा खांडगे, कोषाध्यक्ष डॉ. दिलीप गरुड, लेखक बबन पोतदार, नगरसेविका माधुरी सहस्त्रबुद्धे, सीमा चव्हाण, कविता मेहंदळे, मुकुंद तेलीचरी, निर्मला सारडा उपस्थित होते.

सुनीता पवार म्हणाल्या, साहित्य संस्था या हॉस्पिटलचे काम करीत आहेत. मुलांना लेखन, वाचनाची गोडी लावा आणि त्यातून त्यांना जे भावले आहे ते व्यक्त करायला शिकवा. त्यांना शब्दांचे सामर्थ्य कळू द्या. जशी बाग फुलवावी लागते तेव्हा ती सुंदर दिसते, तसे मुलांवर संस्कार करावे लागतात. पुढच्या पिढीवर चांगले संस्कार करण्यासाठी आपल्याला सज्ज होण्याची गरज आहे, असे ही त्यांनी सांगितले.

डॉ. दिलीप गरुड, डॉ. मंदा खांडगे, बबन पोतदार यांनी मनोगत व्यक्त केले. नवेश पाटील यांनी सूत्रसंचालन केले. डॉ. संगीत बर्वे यांनी प्रास्ताविक केले. भरत सुरसे यांनी आभार मानले.

पुणे -आरोग्य विभाग त्याच्या सर्व भागधारकांशी प्रभावी समन्वयाने काम करेल. लोककेंद्रित आरोग्य सेवा, डेटा आधारित निर्णय घेणे आणि सक्षमकर्ता म्हणून माहिती तंत्रज्ञान चा वापर करून लोकाभिमुख कठीण आणि बदलत्या परिस्थितीस सक्षमपणे सामोरी जाणारी ‘आरोग्य व्यवस्था’ निर्मितीस प्राधान्य देणे ही काळाची गरज आहे असे आरोग्य सेवा आयुक्त तुकाराम मुंढे यांनी आरोग्य सेवेतील पुणे येथील विभाग प्रमुखांच्या बैठकीत मार्गदर्शन करतांना सांगितले.

आयुक्तालयाच्या अंतर्गत पुणे येथील विविध विभागाचा आयुक्त यांनी आढावा घेत अभ्यासपूर्ण मार्गदर्शन केले .
आरोग्यसेवा विषयीची माहिती अद्यावत ठेवून त्यांचा नियोजन व संस्थांच्या सेवांच्या विकासासाठी वापर करावा, आरोग्यासंबंधी ऋतू नुसार आरोग्य सेवांची तयारी ठेवावी .साथीच्या आजारांवर नियंत्रण ठेवण्यासाठी प्रत्येक जिल्हा व प्रत्येक तालुक्यातील परिस्थिती वर सनियंत्रण ठेवावे ,रोजच्या आकडेवारीवर लक्ष ठेवून जिल्हा व प्रत्येक तालुक्यातील आरोग्य सेवेतील अधिकारी कर्मचाऱ्यांची यांच्याशी समन्वय व नियंत्रण ठेवून पाठपुरावा करावा .जिल्हा व गाव पातळीवरील संस्थांशी चांगला संवाद ठेवून रोजचा आढावा घेतला जावा अशा सूचनाही त्यांनी अधिकाऱ्यांना केल्या.

आरोग्यसेवा उपक्रमांना मदत करणाऱ्या शासकीय, निमशासकीय विकासात्मक संस्था यांनीही आपली भूमिका व कार्य हे कार्याची पुनरावृत्ती न होऊ देता व कार्यातील उनिवा यांचाही अभ्यास करावा असे सुचविले सर्व भागधारकाशी प्रभावी समन्वयाने आरोग्य विभाग काम करेल असेही त्यांनी सांगितले.
जागतिक आरोग्य संघटनेच्या (WHO) आय. पी. एच. एस .(IPHS ) स्टँडर्ड नुसार आरोग्य प्रणालीसाठी वापरात येणाऱ्या सहा घटकांवर आधारित, जसे देण्यात येणाऱ्या सेवा, आरोग्य सेवेतील घटक, आरोग्य माहिती प्रणाली, आवश्यक असणाऱ्या औषधांची उपलब्धता, आरोग्य प्रणाली वित्त पुरवठा, नेतृत्व व शासन या सहा घटकावर भर देण्याविषयी त्यांनी अधिकाऱ्यांना सुचित केले.

आरोग्य सेवा अधिक सक्षम व लोकाभिमुख होण्यासाठी आपला प्राधान्यक्रम असेल असेही त्यांनी यावेळी स्पष्ट केले .या बैठकीत पुणे येथील आरोग्य सेवा संचालक डॉ. नितीन अंबाडेकर व पुणे येथील सर्व विभाग प्रमुख, सहाय्यक संचालक व विकासात्मक स्वयंसेवी संस्थेचे सल्लागार उपस्थित होते .

पुणे, 08 ऑक्टोबर 2022

केंद्रीय शिक्षण आणि परदेश व्यवहार राज्यमंत्री डॉ. राजकुमार रंजन सिंग यांनी आज सांगितले की,देशाचे भावी नेतृत्व असलेल्या युवा पिढीने आपल्या स्वप्नातील भारताची उभारणी करण्यासाठी सत्य, शांती आणि अहिंसेचा मार्ग अनुसरायला हवा. आपल्या स्वातंत्र्य सैनिकांचा आणि राष्ट्रीय नेत्यांचा संघर्ष तसेच त्यांनी दिलेले योगदान यांचा उल्लेख करून ते म्हणाले की, या सर्वांनी उत्तम प्रशासनासाठी आपल्याला राज्यघटना दिली.

पुणे येथील डॉ.विश्वनाथ कराड एमआयटी वर्ल्ड पीस विद्यापीठाच्या चौथ्या दीक्षांत समारंभात उपस्थितांना संबोधित करताना ते म्हणाले की, आपण इतिहासाच्या अशा टप्प्यावर आहोत की जिथे सर्व पातळ्यांवर अत्यंत जलदगतीने बदल घडून येत आहेत. आपण सर्वांनी नव्या गोष्टी शिकत राहून ज्ञान प्राप्त केले पाहिजे. राष्ट्रीय शैक्षणिक धोरण 2022 हे 21 व्या शतकातील आपले पहिलेच शैक्षणिक धोरण आहे. आपल्याजवळ मजबूत ज्ञानाचा पाया असेल तरच त्यावर सशक्त भारताची उभारणी करता येईल असे त्यांनी सांगितले. ते म्हणाले की, शिक्षण घेणे म्हणजे केवळ पदव्या मिळविणे नव्हे तर शिक्षित असणे म्हणजे चांगला माणूस असणे, ज्ञानी होणे आणि आपल्या समाजातील सामाजिक विषमता कमी करणे होय. आणि यासाठी आपल्याला समाजाच्या एकंदर हितासाठी प्रयत्न करतानाच सहयोगात्मक दृष्टीकोन स्वीकारणे गरजेचे आहे असे केंद्रीय राज्यमंत्री पुढे म्हणाले. आजच्या आधुनिक शिक्षणाला नितीमूल्यांच्या मजबूत पायाची गरज असल्याचं ते पुढे म्हणाले. नवीन शिक्षण धोरण तयार करताना प्राचीन परंपरा आणि आधुनिकतेचा योग्य संयोग साधला गेल्याचे त्यांनी सांगितले. नविनतम तंत्रज्ञानासह संशोधन आणि ई-लर्निंगला या धोरणात महत्त्व दिल्याचे त्यांनी नमूद केले. शिक्षण मंत्रालयातर्फे उच्च शिक्षणात विविध माहिती आणि संवाद  उपक्रमांचा समावेश केल्याचे डॉ सिंग यांनी अधोरेखित केले.

राष्ट्रीय शिक्षण धोरणाचे अध्यक्ष डॉक्टर के कस्तुरीरंगन यांच्यासह युनेस्कोचे अध्यक्षपद भूषवणारे आदरणीय प्राध्यापक तसच पुण्याच्या एम ए ई ई आर अर्थात  महाराष्ट्र अभियांत्रिकी आणि शैक्षणिक संशोधन अकादमीच्या एम आय टी चे संस्थापक आणि मुख्य आश्रयदाता डॉक्टर विश्वनाथ डी कराड तसच एम ए ई ई आर, एम आय टी विश्व शांती विद्यापीठाचे कार्यकारी अध्यक्ष राहुल कराड आणि इतर मान्यवर यावेळी उपस्थित होते.

अंतराळ दुर्बिणीची उभारणी तसच इतर ग्रहांवरच्या सजीवांचा शोध घेण्यासह भारताच्या येत्या पन्नास वर्षातल्या अंतराळ कार्यक्रमामुळे भविष्यात विद्यार्थ्यांना मुबलक संधी उपलब्ध होणार असल्याचे डॉ कस्तुरीरंगन यांनी सांगितले. हायब्रीड नोकऱ्यामध्ये  वाढ होत असून राष्ट्रीय शिक्षण धोरण 2020 नुसार आपली शिक्षण प्रणाली ही 21व्या शतकाच्या गरजांबरोबर जोडली जात असल्याचं ते म्हणाले.

अभियांत्रिकी, तंत्रज्ञान, मुक्तकला, ललित कला, बी एड, माध्यम आणि पत्रकारिता, वाणिज्य, अर्थशास्त्र, विज्ञान, औषधनिर्मिती, शाश्वत अभ्यासक्रम, डिझाईन, सुशासन या क्षेत्रातल्या एकूण 4 हजार ५७६  विद्यार्थ्यांना  पदवीदान समारंभात सुवर्ण, रौप्य    आणि कांस्य पदकांसह यावेळी पदव्या प्रदान करण्यात आल्या. केवल पद्मावार आणि मिनू कलीता यांना अनुक्रमे संस्थापक अध्यक्ष आणि कार्यकारी अध्यक्ष पुरस्काराने सन्मानित करण्यात आले.