पुणे-कात्रजच्या नव्या बोगद्याजवळ मुंबई बेंगलोर महामार्गावर एका अज्ञात वाहनाने धडक दिल्याने मोटारसायकल चालविणारा २५ वर्षीय तरुणाचा मृत्यू झाला. अपघातस्थळ येथे न थांबता अज्ञात वाहनासह त्याचा चालक पळून गेल्याने भारती विद्यापीठ पोलीस त्याचा शोध घेत आहेत .या अपघातात आंबेगाव पठार येथे राहणारा महादेव बाप्पू पिंगळे हा तरुण मृत्युमुखी पडला.काल सकाळी सव्वा नऊ वाजण्याच्या सुमारास हा अपघात घडला .फौजदार देशमुख 9765390943 याप्रकरणी अपघात करून पळून गेलेल्या वाहनाचा आणि वाहनचालकाचा शोध घेत आहे.

कार विक्रीच्या बहाण्याने सहा लाखांची फसवणूक

लोहगाव याठिकाणी राहणाऱ्या निखिल दिलीप कुमार यांनी त्याची हुंडाई आय ट्वेन्टी कार विक्रीसाठी असल्याचे सांगून गौरव बाबुलाल मिश्रा (वय -28 ,रा.वाघोली ,पुणे) यांच्याकडून रोख स्वरूपात व गुगल पे वर एकूण सहा लाख रुपये स्वीकारून, कारचे पेपर तक्रारदाराच्या नावावर ट्रान्सफर करायचे आहेत असे सांगितले. मात्र, तक्रारदाराच्या ताब्यात दिलेली कार आरटीओ पुणे येथे घेऊन जाऊन आजपर्यंत ती परत न करता त्यांची फसवणूक करण्यात आली आहे.याप्रकरणी आरोपीवर लोणीकंद पोलीस ठाण्यात फसवणुकीचा गुन्हा दाखल करण्यात आला आहे.

पूर्ववैमन्यस्यातून 2 तरुणावर तलवारीने वार; दोघे गंभीर जखमी

पूर्ववैमन्यास्याच्या टोळक्यातील वादातून दोन तरुणांवर तलवारीने वार करून त्यांना गंभीर जखमी करण्यात आल्याचा धक्कादायक प्रकार घडला आहे. याप्रकरणी सात आरोपींवर वारजे पोलिस ठाण्यात गुन्हा दाखल करण्यात आल्याची माहिती पोलिसांनी मंगळवारी दिली आहे.

गौरव संजय शेळके (वय -21,निळे वादळ चौक,रामनगर ,वारजे ),अभिषेक नवनाथ सकट (वय- 19,रामनगर ), सचिन शंकर दळवी (वय- 23,दांगट पाटील नगर ),ओंकार मांढरे ,रोहन पाटोळे, साहिल बल्लाळ, अमित धावरे अशी याप्रकरणी गुन्हा दाखल करण्यात आलेल्या आरोपींची नावे आहेत.

या प्रकरणी पोलिसांनी गौरव शेळके , अभिषेक सकट सचिन दळवी या तीन रेकॉर्ड वरील आरोपींना अटक केली आहे. सदर आरोपींच्या विरोधात चेतन मारुती शेडगे (वय -24 ,रा. रामनगर ,वारजे ,पुणे )यांनी पोलिसांकडे फिर्याद दाखल केली आहे. सदरची घटना 16 एप्रिल रोजी रात्री अकरा वाजता रामनगर येथे प्रणव सुपर मार्केट जवळ घडली आहे.

पोलिसांनी दिलेल्या माहितीनुसार ,तक्रारदार चेतन शेडगे व त्याचा मित्र कृष्णा शिंगाडे हे रामनगर परिसरात संबंधित ठिकाणी बसले होते. त्यावेळी आरोपी त्याठिकाणी तलवार, लोखंडी हत्यार घेऊन सदर ठिकाणी आले .आरोपी सचिन दळवी याने तक्रारदार यास ‘अण्णा डोळसे कुठे आहे ?’अशी विचारणा केली.

त्यावर तक्रारदार याने माहिती नाही असे सांगितले असता, तक्रारदार व आरोपी यांच्या टोळीतील वादामुळे आरोपीने तक्रारदाराच्या उजव्या हाताच्या दंडावर, कमरेच्या वरील बाजूस तलवारीने वार करून त्यास गंभीर जखमी केले. तसेच त्याचा मित्र कृष्णा शिंगाडे यानी अडवण्याचा प्रयत्न केला असता, त्याला देखील वार करून जखमी करण्यात आले आहे. याप्रकरणी वारजे पोलिस ठाण्याचे पोलिस निरीक्षक (गुन्हे) एस बागवे 9960780790 पुढील तपास करत आहेत.

पुणे, दि. १८: भारत सरकारच्या पर्यटन मंत्रालयामार्फत आयोजित ‘उत्कृष्ट पर्यटन खेडे’ (बेस्ट टुरिझम व्हिलेज) स्पर्धेमध्ये जिल्ह्यातील पर्यटनक्षम गावांनी ५ मे पर्यंत ऑनलाईन नामांकन दाखल करावेत, असे आवाहन जिल्हाधिकारी डॉ. राजेश देशमुख यांनी केले आहे.

देशातील ग्रामीण पर्यटनाचा विकास आणि प्रोत्साहनासाठी केंद्रीय पर्यटन मंत्रालयाने ‘आत्मनिर्भर भारत’ अंतर्गत राष्ट्रीय धोरण तयार केले आहे. त्याअनुषंगाने ग्रामीण पर्यटनाचे उत्कृष्ट उदाहरण दाखवून देणाऱ्या गावाचा गौरव करण्यासाठी ‘उत्कृष्ट पर्यटन खेडे’ स्पर्धा सुरू केली आहे. ग्रामीण विकास, समुदाय कल्याण आणि नैसर्गिक आणि सांस्कृतिक संपदेचे जतन आणि संवर्धन करणाऱ्या गावांमध्ये स्पर्धात्मकता वाढीस लागावी, इतर गावांना प्रेरणा मिळावी यासाठी या स्पर्धेचे आयोजन करण्यात आले आहे.

ही स्पर्धा तीन टप्प्यात होणार असून जिल्हा, राज्य आणि राष्ट्रीय या प्रत्येक टप्प्यावर ३ सर्वोत्कृष्ट पर्यटन गावे निवडली जाणार आहेत. निवडण्यात आलेली गावे पुढील टप्प्यावरील स्पर्धेसाठी पुढे पाठवली जातील. या प्रकारे राष्ट्रीय स्तरावर उत्कृष्ट पर्यटन गावांची निवड होईल. राष्ट्रीय स्तराव निवडण्यात आलेल्या प्रथम क्रमांकाच्या उत्कृष्ट पर्यटन खेड्याचे संयुक्त राष्ट्र जागतिक पर्यटन संघटनेद्वारे (युएनडब्ल्यूटीओ) घेण्यात येणाऱ्या ‘उत्कृष्ट पर्यटन खेडे’ (बेस्ट टुरिझम व्हिलेज) स्पर्धेसाठी नामांकन पाठविण्यात येईल.

सर्वोत्कृष्ट पर्यटन गाव स्पर्धेत भाग घेण्यासाठी पर्यटन मंत्रालयाने विकसित केलेल्या https://nidhi.nic.in/BVC/AboutDetail.aspx या पोर्टलवर ऑनलाईन नोंदणी करावी. अधिक माहितीसाठी https://rural.tourism.gov.in या संकेतस्थळाला भेट द्यावी, असेही कळविण्यात आले आहे.

डॉ. राजेश देशमुख, जिल्हाधिकारी: या स्पर्धेमुळे गावांमधील पर्यटनक्षमता राज्यासमोर, देशासमोर येणार असून ग्रामीण पर्यटनक्षेत्रात उत्कृष्ट काम करणाऱ्या गावांना देशपातळीवर ओळख मिळणार आहे. पर्यटन सुविधांच्या विकासातून ग्रामीण विकास तसेच रोजगार निर्मितीला चालना मिळेल. गावांचा शाश्वत विकास आणि रोजगार निर्मितीचे लक्ष्य साध्य करण्यासाठी ही स्पर्धा एक संधी आहे.
000

पुणे- दाेन टाेळक्यातील भाईगिरीच्या वादातून पीएमसी काॅलनी, पांडवनगर गेट व सार्वजनिक रस्त्यावर पार्क करण्यात आलेल्या वाहनांची लाेखंडी हत्यारे, लाकडी दांडके हातात घेऊन तब्बल 19 वाहनांची ताेडफाेड करुन दहशत निर्माण करण्याचा प्रयत्न करण्यात आला आहे. याप्रकरणी चतृश्रृंगी पोलिस ठाण्यात 18 ते 20 जणांविराेधात गुन्हा दाखल करण्यात आला असून दोन आराेपींना अटक करण्यात आल्याची माहिती पोलिसांनी दिली आहे.इस्माईल इब्राहीम शेख(वय १९ रा. १००१ जुनी वडारवाडी )आणि रुपेश उत्तम विटकर(वय २२ रा. विटकर बंगला ,पांडवनगर )अशी दोघांची नावे आहेत याप्रकरणी साेनु सुनिल अवघडे (वय 25) याने आराेपी विराेधात पोलिसांकडे फिर्याद दाखल केली आहे. सदरची घटना 17 एब्रिल राेगी रात्री साडेबारा वाजण्याच्या सुमारास घडली आहे.

चपत्या विटकर, लवकुश चव्हाण, सुरज जाधव, अक्षय जाधव, इसान पठाण, , बबलु देवकुळे, चैतन्य पवार यांच्यासह १८ ते २० आराेपींवर गुन्हा दाखल करुन पोलिसांनी सात जणांना अटक केली आहे.

पोलिसांनी दिलेल्या माहितीनुसार, तक्रारदार व आराेपी हे एकाच परिसरात राहण्यास आहे. घटनेच्या दिवशी आराेपी हे तक्रारदार राहत असलेल्या साेसायटीत हातात लाेखंडी हत्यारे, लाकडी दांडके घेऊन येवुन त्यांनी इमारतीच्या पार्किंग मध्ये पार्क केलेल्या दुचाकी व चारचाकणी गाडयांची ताेडफाेड केली. त्यावेळी रुपेश विटकर याने तक्रारदार यास म्हणाला की, ‘माझी गाडी काेणी फाेडली, काेण भाई झाला आहे’ या भागात अजय व विजय हे दाेनच भाई आहेत त्यांना खुन्नस देताेय काय असे म्हणून आराेपी चपत्या विटकर याने तक्रारदार यांना लाकडी दांडक्याने मारहाण केली. त्यावेळी तक्रारदार यांनी त्यास प्रतिकार केला असता, आराेपी रुपेश विटकर याने त्याचे जवळील लाेखंडी काेयत्याने तक्रारदार यास जीवे ठार मारण्याचे उद्देशाने डाेक्यात वार केला.

परंतु सदर वार चुकवल्यामुळे तक्रारदार यांचे खांद्याला वार लागुन ते जखमी झाले आहे. त्यानंतर आराेपींनी एकूण चार चारचाकी वाहने, 14 दुचाकी व एक तीनचाकी टेम्पाेची ताेडफाेड करुन नुकसान केले आहे. तसेच सदर भागात माेठमाेठयाने आरडाआरेड करुन दहशत निर्माण करण्याचा प्रयत्न करण्यात आलेला आहे. याबाबत पुढील तपास चतुश्रृंगी पोलिस ठाण्याचे उपनिरीक्षक रुपेश चाळके9552526603 करत आहे.

पुणे- डीलिंग सेंटर बिल्डींग, वेलणकर नगर पर्वती येथे ज्वेलरी मॅन्युफॅक्चरिंगचा व्यवसाय करणाऱ्या व्यवसायिकाने कामाच्या निमित्ताने कारागिरांकडे विश्वासाने दिलेल्या सोन्याचा कामगारांनी अपहार करून, संबंधित सोन्याच्या वजनाचे दागिने परत न करता व्यवसायिकाची तब्बल 26 लाख रुपयांची फसवणूक करण्यात आल्याचा प्रकार उघडकीस आला आहे. याप्रकरणी दोन आरोपींवर गुन्हा दाखल करण्यात आल्याची माहिती दत्तवाडी पोलिसांनी मंगळवारी दिली आहे.

याप्रकरणी संतोष रघुनाथ गायकर( रा. पिरंगुट ,मुळशी ,पुणे)आणि युसुफ शेख (रा. पर्वती दर्शन ,पुणे )या आरोपींवर गुन्हा दाखल करण्यात आला असून आरोपी संतोष गायकर यास पोलिसांनी अटक केले आहे. याबाबत स्वप्निल सतीश कोठारी ( वय – 48 ,रा.एनआयबीएम रोड ,कोंढवा पुणे) यांनी पोलिसांकडे तक्रार दाखल केली आहे.सदरचा प्रकार सात एप्रिल ते 13 एप्रिल यादरम्यान पर्वती येथील सेंटर बिल्डिंग याठिकाणी घडला आहे.

पोलिसांनी दिलेल्या माहितीनुसार, तक्रारदार स्वप्निल कोठारी यांचा ज्वेलरी मॅन्युफॅक्चरिंगचा व्यवसाय आहे .त्यांच्याकडे सदर आरोपी संतोष गायकर आणि युसुफ शेख हे कामस आहेत .तक्रारदार कोठारी यांनी संतोष गायकर यांच्याजवळ 243.864 ग्रॅम वजनाचे सोन्याचे लगडीचे दागिने बनवण्यासाठी दिले होते.त्यापैकी संतोषने 104.122 ग्रॅम वजनाचे दागिने तयार करून दिले.

मात्र, उर्वरित 159.742 ग्रॅम वजनाचे सोने दिले नाही. तसेच आरोपी युसुफ शेख याच्याकडे 865.575 ग्रॅम वजनाचे दागिने बनवण्यासाठी दिले असता, त्यापैकी त्यानी 559.320 ग्रॅम वजनाचे सोने परत दिले. उर्वरित 306.255 ग्रॅम वजनाचे दागिने परत न करता तक्रारदार यांची एकूण 26 लाख रुपयांची फसवणूक करण्यात आली आहे. याबाबत तक्रार दाखल झाल्यानंतर, पोलिसांनी संतोष गायकर या आरोपीस अटक केली आहे तर दुसरा आरोपी पसार झाला असून त्याचा पोलीस शोध घेत आहेत .याबाबत दत्तवाडी पोलीस ठाण्याचे पोलीस उपनिरीक्षक चंद्रकांत कामठे 9922970972 पुढील तपास करत आहे.

पुणे : फिनोलेक्स इंडस्ट्रीज आणि मुकुल माधव फाउंडेशन यांच्यातर्फे सीएसआर अंतर्गत गुरुनानक मेडिकल फाऊंडेशनला डिजिटल सोनोग्राफी मशीन आणि स्ट्रेस टेस्ट मशीनची देणगी देण्यात आली. राष्ट्रीय अल्पसंख्यांक आयोगाचे अध्यक्ष इकबाल सिंग लालपुरा यांच्या हस्ते या दोन्ही मशीन पुणे कॅम्पातील गुरुद्वारा गुरुनानक दरबार येथे सुपूर्द करण्यात आल्या. मोहिनी प्रल्हाद छाब्रिया यांच्या जयंतीनिमित्त या दोन्ही मशीन देण्यात आल्या.
यावेळी फिनोलेक्स इंडस्ट्रीजचे व्यवस्थापकीय संचालक अनिल वाबी, उपाध्यक्ष बी. आर. मेहता, मुकुल माधव फाऊंडेशनचे सचिन कुलकर्णी, इंदिरा बजाज, गुरुद्वारा गुरुनानक दरबारचे चरणजीत सिंह सहानी, संतसिंग मोखा, सुरिंदर धुपाल, राजपाल सिंह मारवाह आदी उपस्थित होते. गुरुनानक मेडिकल फाउंडेशनच्या वतीने चालविण्यात येणाऱ्या आरोग्य केंद्रात अत्याधुनिक व प्रगत तपासण्या व उपचार केले जातात. सर्व समाजातील रुग्णांना अल्पदरात ही सुविधा पुरविण्यात येते. मुकुल माधव फाउंडेशनने दिलेल्या या सोनोग्राफी व स्ट्रेस टेस्ट मशीनमुळे रुग्णांना दर्जेदार, विश्वासार्ह तपासणी सुविधा मिळणार आहे.
इकबाल सिंग लालपुरा म्हणाले, “रुग्णसेवा ही ईश्वरसेवा आहे. आरोग्य सुविधा सक्षम करण्यासाठी मुकुल माधव फाउंडेशनने घेतलेला पुढाकार कौतुकास्पद आहे. समाजाच्या, देशाच्या विकासात ‘सीएसआर’चे योगदान महत्वाचे आहे. आपले सामाजिक दायित्व ओळखून मुकुल माधव फाउंडेशनप्रमाणे इतर संस्थांनीही पुढाकार घेतला, तर आरोग्यासह शिक्षा, पर्यावरण, महिला सक्षमीकरण होण्यास मदत होईल. दिवा तेवत राहण्यासाठी जसा तेलाचा प्रत्येक थेंब महत्वाचा असतो, त्याचप्रमाणे प्रत्येक दानशूराचे योगदान मोलाचे असते.”
“शिक्षण, आरोग्य, पर्यावरण, महिला सक्षमीकरण या क्षेत्रात मुकुल माधव फाउंडेशन भरीव योगदान देत आहे. आरोग्य सुविधा सक्षम करण्यासाठी ससून सर्वोपचार रुग्णालय, केईएम रुग्णालय, भारती हॉस्पिटल, कमांड हॉस्पिटल यासह इतर अनेक संस्थांमध्ये अत्याधुनिक उपचार व तपासण्याची यंत्रणा कार्यान्वित करत आहे. पुण्यासह बाहेरच्या जिल्ह्यातही आरोग्य व शिक्षण क्षेत्राला सक्षम बनविण्याचे कार्य मुकुल माधव फाउंडेशन करत आहे.”- रितू प्रकाश छाब्रिया, व्यवस्थापकीय विश्वस्त, मुकुल माधव फाउंडेशन

पुणे : चैत्र वद्य त्रयोदशी म्हणजेच दिनांक २५ एप्रिल १८७३ रोजी सदाशिव पेठेतील नवा विष्णू मंदिरात झालेल्या पाच हजार महिलांच्या हळदी-कुंकू समारंभाच्या आठवणींना उजाळा देत तब्बल १५० वर्षांनी पुन्हा एकदा त्याच ठिकाणी त्या तिथीच्या दिवशी सार्वजनिक हळदी-कुंकू समारंभ पार पडला. पुणे सार्वजनिक सभेचे नेते गणेश वासुदेव जोशी उर्फ ‘सार्वजनिक काका’ यांनी ‘स्त्री विचारवती सभा’ यांच्या पुढाकाराने सार्वजनिक हळदीकुंकू कार्यक्रम आयोजित केला होता. त्या घटनेची पुनरावृत्ती करीत कार्यक्रमाचा शतकोत्तर सुवर्णमहोत्सव मोठया उत्साहात साजरा झाला. 
इतिहास प्रेमी मंडळ व पुणे सार्वजनिक सभेच्या वतीने सदाशिव पेठेतील नवा विष्णू मंदिरात सार्वजनिक हळदी-कुंकू कार्यक्रम शतकोत्तर सुवर्णमहोत्सव या विशेष कार्यक्रमाचे आयोजन करण्यात आले होते. यावेळी सुप्रसिद्ध लेखिका व सामाजिक कार्यकर्त्या शेफाली वैद्य, पुणे सार्वजनिक सभेचे अध्यक्ष विद्याधर नारगोळकर, इतिहास प्रेमी मंडळाचे अध्यक्ष मोहन शेटे, शरद पंडित, सुप्रसाद पुराणिक आदी उपस्थित होते.  
शेफाली वैद्य म्हणाल्या, हळदी-कुंकू सारख्या समारंभामध्ये महिलांमध्ये संवाद होतो. महिला एकत्र येणे हे महत्वाचे आहे. हळदी-कुंकू समारंभाची परंपरा केवळ महाराष्ट्रात नाही, तर भारतभर आहे. सामाजिक उद्देशाने एखादी परंपरा पुढे नेणे, हा आपला सांस्कृतिक वारसा आहे. तो पण जपायला हवा. 
विद्याधर नारगोळकर म्हणाले, सार्वजनिक काकांनी स्वदेशी शपथ, इंग्रजी भाषेतील मासिक, दुष्काळात गरजूंना आर्थिक मदत अशी वैविध्यपूर्ण सामाजिक कामे केली. त्यात १५० वर्षांपूर्वी आयोजित केलेले सार्वजनिक हळदी-कुंकू हा वेगळा कार्यक्रम होता. नवा विष्णू मंदिर त्या घटनेचे साक्षीदार आहे. 

मोहन शेटे म्हणाले, तब्बल १५० वर्षांपूर्वी झालेल्या या कार्यक्रमाची बातमी मुंबई च्या नेटिव्ह ओपिनियन मध्ये छापून आली होती. ही घटना  त्या काळातील एक क्रांतिकारी व महाराष्ट्राला प्रागतिक घडवणारी घटना ठरली. त्यामुळे या ऐतिहासिक घटनेला उजाळा  देण्यासाठी पुन्हा एकदा त्याच नवा विष्णू मंदिरात सार्वजनिक हळदीकुंकू समारंभ आयोजित करण्यात आला. याप्रसंगी स्वच्छता कामगार, भटके विमुक्त, देवदासी, तृतीयपंथी अशा समाजातील उपेक्षित महिलांना निमंत्रित करून सन्मानित करण्यात आले. तसेच याप्रसंगी महिलांना संसारोपयोगी वस्तू भेट देण्यात आल्या. दीप्ती डोळे यांनी सूत्रसंचालन केले. शैलेश घाटपांडे यांनी आभार मानले. 

पुणे, दि. १८ एप्रिल २०२३: महावितरणच्या पुणे परिमंडलातील वीजग्राहकांना माहे एप्रिल / मे महिन्याच्या वीजबिलांसोबत अतिरिक्त सुरक्षा ठेव भरण्यासाठी स्वतंत्र बिल देण्यात येत आहे. या अतिरिक्त सुरक्षा ठेवीच्या रकमेचा वीजग्राहकांना भरणा करावा असे आवाहन महावितरणकडून करण्यात आला आहे.

दरम्यान, वीजग्राहकांना अतिरिक्त सुरक्षा ठेवीची रक्कम भरण्यास महावितरणकडून जास्तीत जास्त सहा समान मासिक हप्त्यांची सोय उपलब्ध करून देण्यात आली आहे. त्याबाबतचा संदेश सुरक्षा ठेवीच्या बिलावर नमूद करण्यात आला आहे.

मा. महाराष्ट्र विद्युत नियामक आयोगाच्या विद्युत पुरवठा संहिता २०२१ च्या विनिमय १३.१ नुसार वीजग्राहकांकडून सुरक्षा ठेव आकारण्यात येते. दरवर्षी सुरक्षा ठेवीची पुनर्गणना करण्यात येते व त्यानुसार आर्थिक वर्ष संपल्यानंतर ग्राहकांच्या मागील एका वर्षातील सरासरी वीजवापराच्या आधारे नवीन सुरक्षा ठेवीची रक्कम निश्चित करण्यात येते. वीजग्राहकांची सुरक्षा ठेव मासिक बिल असेल तर तेथे सरासरी मासिक बिलाच्या दुप्पट आणि त्रैमासिक असेल तेथे सरासरी त्रैमासिक बिलाच्या दीडपट घेण्याची तरतूद मा. आयोगाकडून करण्यात आली आहे. त्याचप्रमाणे विनिमय १३.११ नुसार ग्राहकाने भरलेल्या सुरक्षा ठेव रकमेवर रिझर्व्ह बँक ऑफ इंडियाच्या दराच्या सममूल्य दराने व्याजाची रक्कम वीजबिलाद्वारे समायोजित करून वीजग्राहकांना अदा करण्यात येते.

त्याप्रमाणे पुणे परिमंडलातील वीजग्राहकांना एप्रिल महिन्यामध्ये अतिरिक्त सुरक्षा ठेवीचे स्वतंत्र बिल देण्यात येत आहे. या बिलामध्ये नमूद सुरक्षा ठेवीची रक्कम भरण्यासाठी जास्तीत जास्त सहा मासिक समान हप्त्यांची सोय उपलब्ध करून देण्यात आली आहे. त्यासंबंधीची माहिती सुरक्षा ठेवीच्या बिलामध्ये नमूद आहे. तसेच लघुदाब वीजग्राहकांना अतिरिक्त सुरक्षा ठेवीची रक्कम घरबसल्या भरण्यासाठी महावितरणच्या www.mahadiscom.in ही वेबसाईट व महावितरण मोबाईल अॅपद्वारे सोय उपलब्ध आहे. वीजग्राहकांनी अतिरिक्त सुरक्षा ठेवीच्या बिलाची रक्कम भरून सहकार्य करावे असे आवाहन महावितरणकडून करण्यात आले आहे.

मुंबई, दि. १८ : कात्रज-देहू मार्गावरील किवळे येथे होर्डिंग कोसळून झालेल्या दुर्घटनेतील मृतांच्या नातेवाईकांना तीन लाख रुपयांची मदत मुख्यमंत्री एकनाथ शिंदे यांनी जाहीर केली आहे.

कात्रज-देहू मार्गावरील किवळे ओव्हरब्रीज सर्व्हिस रोडवर वादळी वाऱ्यामुळे होर्डिंग कोसळल्याने या  दुर्घटनेत पाच जणांचा मृत्यू झाला. या दुर्घटनेबद्दल मुख्यमंत्री श्री. शिंदे यांनी तीव्र दुःख तसेच मृत, त्यांच्या कुटुंबियांप्रति सहवेदनाही व्यक्त केली आहे. या दुर्घटनेतील मृतांच्या नातेवाईकांना तीन लाख रुपयांची मदत देण्याचे मुख्यमंत्र्यांनी जाहीर केले आहे.

पुणे: बेंगलोर महामार्गावरून मुंबईच्या दिशेने जाणाऱ्या कात्रज देहूरोड दरम्यान खोबरे तेलाने भरलेला टँकर उलटला. ही घटना संध्याकाळी घडली आहे. अपघातात कुठल्याही प्रकारची जीवित हानी झालेली नाही.परंतु रस्त्यावर खोबरे तेल पसरल्याने महामार्ग मोठ्या प्रमाणावर निसरडा झाल्याने, महामार्गावरील वाहतूक मंदावली आणि वाहनांच्या लांबच लांब रांगा लागल्या. टँकर कोईमतूर तामिळनाडू येथून २४००० हजार लिटर खोबरे तेल घेऊन मुंबईच्या दिशेने जात असताना, नऱ्हे येथील भुमकर पुलावर गिअर बॉक्स निकामी झाल्याने टँकर चालकाचे टँकर वरील नियंत्रण सुटल्याने टँकर उलटला. सुदैवाने या अपघातात कुठल्याही प्रकारची जीवितहानी झाली नाही. तसेच सर्वत्र तेल पसरल्याने महामार्ग निसरडा झाला असल्याने इतर अपघात होण्याची शक्यता असल्याने सिंहगड वाहतूक विभाग व सिंहगड पोलीस वाहतूक सुरळीत करत आहेत.