एक वोभी था जमाना …म्हणत 40 वर्षांपूर्वीचा काळ पुन्हा एकदा अनुभवला

पुणे- रांगोळी, सनईचे सूर, नटून थटून आलेल्या महिलांची धावपळ, त्यांचं भारावलेपण असं मंगलमय वातावरण नुकतच अहिल्यादेवी प्रशालेत अनुभवायला मिळालं. निमित्त होतं 1982 सालच्या माजी विद्यार्थिनींचा मेळावा.
या सर्व माजी विद्यार्थिनींनी त्यांच्या वेळी त्यांना शिकवायला असणाऱ्या गुरुजनांप्रती कृतज्ञतेची भावना व्यक्त करण्यासाठी त्यांच्या वेळच्या गुरुजनांनाही आमंत्रित केले होते. विद्यार्थिनी जशा आपल्या गुरुजनांविषयी भरभरून बोलत होत्या तसेच हे सर्व गुरुजनही या विद्यार्थिनी प्रति कृतकृत्य होऊन बोलत होते. या सर्व माजी विद्यार्थिनींनी जवळजवळ 40 वर्षांपूर्वीचा काळ पुन्हा एकदा अनुभवला. प्रशालेच्या मुख्याध्यापिका अनघा डांगे ही आपली बालपणीची मैत्रीण विद्यमान मुख्याध्यापिका आहे याचा या मैत्रिणींना केवढा आनंद झाला होता. त्यावेळच्या मुख्याध्यापिका जयश्री वैद्य याही या कार्यक्रमाला उपस्थित होत्या. त्यांनाही आपली एक विद्यार्थिनी आपण ज्या खुर्चीत बसून प्रशासन चालवलं त्याच खुर्चीत बसून प्रशासन चालवते आहे याचा अभिमान वाटला.
या माजी विद्यार्थिनींनी प्रशालेला भूगोल लॅब अद्ययावत करून देण्यासाठी जी सामग्री लागणार आहे ती सर्व सामग्री भेट देण्याचे नियोजन केले. या सर्व माजी विद्यार्थिनी क्षणभर आपलं वय विसरून शाळेच्या परिसरामध्ये आनंदाने बागडत होत्या.
याप्रसंगी काकडे सर, भोमे सर,माजी मुख्याध्यापिका जयश्री वैद्य,खेरबाई,गोखलेसर, नगरकरबाई यांनी कृतज्ञतापूर्वक आपले मनोगत व्यक्त केले.
विद्यमान मुख्याध्यापिका अनघा डांगे यांनी आपल्या मैत्रिणींना अहिल्यादेवी शाळेतील विद्यार्थिनी ते शाळेचे मुख्याध्यापिका होण्याचा प्रवास उलगडून दाखवला. डांगे आपल्या भाषणात म्हणाल्या की शाळेची शिस्त, विविध स्पर्धा या पूर्वीसारख्याच आहेत. त्यात थोडाही बदल झालेला नाही. “मुख्याध्यापक म्हणून जेव्हा मी शाळेत वावरते तेव्हा जागोजागी मला आपल्या वेळेसचे शिक्षक भेटतात आणि ते मला माझ्या या वळणावर मार्गदर्शन करतात. एक विद्यार्थिनी ते मुख्याध्यापिका हा प्रवास माझ्यासाठी खरोखर अभिमानाचा क्षण आहे.
कार्यक्रमाची सुरुवात मानसी देशपांडे व माजी विद्यार्थिनी किशोरी कुलकर्णी यांनी गायलेल्या ईशस्तवनाने झाली. प्रास्ताविक वीणा नगरकर यांनी केले, सूत्रसंचालन यशश्री पुणेकर यांनी केले,उज्ज्वल लघाटे यांनी शाळा आणि शिक्षकांच्या प्रति कृतज्ञता व्यक्त केली तर आभार शुभदा गोडबोले यांनी मानले. कार्यक्रमाची सांगता किशोरी कुलकर्णी यांनी गायलेल्या पसायदानाने झाली.

 पुणे- बाबा गुरबचनसिंहजी यांच्या पावन स्मृति प्रित्यर्थ दिनांक २४ एप्रिल हा दिवस देश विदेशामध्ये रक्तदान शिबिरांचे आयोजन करत ‘मानव एकता दिवस’ या रूपात साजरा केला जातो. प्रति वर्षाप्रमाणे याही वर्षी  मानव कल्याणार्थ संत निरंकारी मिशनची सामाजिक शाखा संत निरंकारी चैरिटेबल फाउंडेशनच्या माध्यमातून भारत देशातील मिशनच्या बहुसंख्य शाखांसह मिशनचे पुण्याचे मुख्यालय असलेल्या गंगाधाम  येथील सत्संग भवनमध्ये देखील  रक्तदानाचे महाअभियान राबविण्यात येत आहे. त्यामध्ये मिशनचे अनुयायी मोठ्या संख्येने स्वेच्छेने व उत्स्फूर्तपणे रक्तदान करावे असे आवाहन संत निरंकारी मंडळाचे पुणे झोनचे झोनल प्रमुख .ताराचंद करमचंदानी यांनी केले आहे .
    ते म्हणाले,’  बाबा गुरबचनसिंहजी यांनी सत्याचा बोध प्रदान करून मनुष्य जीवन समस्त भ्रमापासून मुक्त करण्याचे अलौकिक कार्य  केले; त्या बरोबरच समाज उत्थानासाठी अनेक कल्याणकारी योजना क्रियान्वित केल्या. त्यामध्ये साधे विवाह, नशा मुक्ति तसेच युवा वर्गाला खेळांच्या प्रति प्रेरित केले. समाजात व्याप्त अनिष्ट गोष्टीच्या त्या कालखंडानंतर बाबा हरदेवसिंहजी यांच्या ‘रक्त नाड्यामध्ये वाहावे , नाल्यांमध्ये नको ‘  या प्रेरक संदेशातून समस्त निरंकारी भक्तांना एक नवी सकारात्मक दिशा मिळाली. तोच प्रेरक संदेश जीवनात उतरवत निरंकारी भक्त लोककल्याणार्थ आपल्या सेवा प्रदान करत आले आहेत.
       यांनी या अभियानाची विस्तृत माहिती देताना त्यांनी सांगितले, की हे महाअभियान भारतातील संत निरंकारी मिशनच्या सर्व ९९ झोन मधील बहुसंख्य शाखांमध्ये राबविले जाईल. त्यामध्ये रक्तदान शिबिरांच्या आयोजनापूर्वी केली जाणारी तपासणी  व स्वच्छता याकडे विशेष लक्ष देण्यात येईल. त्या बरोबरच रक्तदात्यांसाठी चहापानाची उचित व्यवस्था केली जाणार आहे. रक्त संकलनासाठी ससून रुग्णालय रक्तपेढी, संत निरंकारी रक्तपेढी , यशवंतराव चव्हाण रुग्णालय रक्तपेढी , कमांड हॉस्पिटल रक्तपेढी व अन्य सरकारी रक्त पेढ्यांचे प्रशिक्षित चमू येणार आहेत. मिशनचे सेवादार संपूर्ण आठवडाभर गंगाधाम परिसरातील घराघरांमध्ये जाऊन नागरिकांना रक्तदानाविषयी जागरूक करत आहेत. ठिकठिकाणी पथनाट्य,रॅली च्या माध्यमातून प्रेरणा देखील दिली जात आहे.उदात्त लोक कल्याणकारी हेतूने आयोजित या अभियानामध्ये सद्गुरु माता सुदीक्षाजी महाराज यांच्या मानवतेच्या दिव्य शिकवणुकीची छाप दिसून येईल जिचा अंगीकार करून निरंकारी जगतातील समस्त भक्तगण प्रेरणा प्राप्त करून आपले जीवन कृतार्थ करत आहेत

पुणे- बसप्रवास असो गर्दीची ठिकाणे असो कि दाटीवाटीने बांधलेली बेकायदा घरांच्या इमारती असो वा कायदेशीर बांधलेल्या सोसायट्या असोत चोऱ्या, घरफोड्या, भाईगिरी यांचे शहर अशी नवी ओळख तर पुणे ओढू पाहत नाही ना ?रस्तोरस्ती, गल्लोगल्ली सीसी टीव्ही चे जाळेअसूनही असा सवाल कधी उपस्थित होऊ नये एवढी असुरक्षितता पुण्यात वाढू नये हीच अनेकांची अपेक्षा आहे.

नऱ्हे म्हणजे बेकायदा बांधकामांचे आगर तेथील पारी कंपनी रोड येथील महालक्ष्मी पैलेस फलॅट नंबर ४०७ (व्यंकटेश शर्विल सोसायटी समोर ) कुलूप बंद असताना कुलूप तोडून चोरट्याने १ लाख ८० हजाराचे दागिने चोरून नेले . विशेष म्हणजे हि घरफोडी दुपारी पावणे चार ते सायंकाळी सव्वापाच च्या दरम्यान घडली .प्रशांत हनमघर यांनी याप्रकरणी पोलिसात फिर्याद नोंदविली आहे.सिंहगड पोलीस ठाण्यातील सहायक निरीक्षक यादव 9552160720याप्रकरणी तपास करत आहेत .

दुसऱ्या एका घरफोडीत लोहगाव येथील गुरुद्वारा रोड ,स्मशान भूमि जवळ असलेल्या एका फलॅट चे कुलूप तोडून बेडरूम मध्ये घुसून तेथील कपाटातील सुमारे ३५ हजाराची रोकड आणि दागिने असा सुमारे ३लाखच ऐवज चोरट्याने चोरून नेला .येथे राहणाऱ्या ६८ वर्षीय ज्येष्ठ नागरिकाने याबाबत पोलिसात तक्रार दिली आहे.विमानतळ पोलीस ठाण्यातील फौजदार आर एस ढावरे 9422109997 याप्रकरणी तपास करत आहेत.

उत्तम नगर शिवणे येथील आशीर्वाद गार्डन आणि क्षितीज रेसिडेन्सी येथील २ रूम मधून चक्क नजर चुकवून घुसलेल्या ३१ वर्षीय महिलेने येथून २ लाख १० हजार रुपये किंमतीचे दागिने चोरून नेले आहेत . फौजदार लुगडे 8208480303या चोर महिलेचा शोध घेत आहेत .

बाणेरच्या बालेवाडी नजीक ऑर्चीड स्कूल शेजारी असलेल्या श्रद्धा पोलीक्लीनिक मध्ये ४ लाख ८२ हजाराची रोकड आणि अमेरिकन डॉलर ठेवलेली बॅग अज्ञात भामट्याने अशाच पद्धतीने चोरून नेली आहे. रितेश शहा (वय ४५ ) यांनी या प्रकरणी पोलिसात तक्रार दिली असून चतुर्श्रुंगी पोलीस ठाण्यातील अंमलदार वणवे 9422347585 या भाम्त्याचा शोध घेत आहेत .

उंड्री जवळील मौजे वडाची वाडी येथील ‘द वात्सल्य स्कूल ‘ च्या खिडकीचे लोखंडी बार तोडून त्यातून आत प्रवेश करून चोरट्याने ७२ हजार रुपयांची रोकड चोरून नेली आहे . येथील ५४ वर्षीय महिलेने याप्रकरणी कोंढवा पोलिसात तक्रार दिली असून फौजदार सोनावणे 8805337100अधिक तपास करत आहेत

पुणे-पीएमपीएमएल च्या बस प्रवासात होणाऱ्या चोऱ्या ,पाकीटमारी यात लक्षणीय वाढ झाली असून याकडे पीएमपीएमएल चे संचालक आणि महापालिकांचे प्रशासक यांनी असेच दुर्लक्षित कारभार सुरु ठेवला तर यापुढे बसने प्रवास करणे कठीण होत जाणार असल्याचे स्पष्ट आहे. प्रवासी जादा बसगाड्या कमी अशी अवस्था असल्याने गर्दी वाढते आणि चोरांचे फावते अशी अवस्था आहे. प्रवासात कुठलीही सुरक्षितता , विमा नसल्याने प्रवाश्यांची दैना वाढते आहे.

हडपसर ते कोथरूड च्या बस मध्ये प्रवास करत असलेल्या एका ६५ वर्षीय महिलेकडील प्रवासी बॅगेतून चोरट्याने हडपसर ते फातिमा नगर प्रवास दरम्यान तब्बल ३ लाख ६० हजार रुपये किंमतीच्या दागिन्यांवर हाथ साफ केला.शनिवार पेठेत राहणाऱ्या या वृद्धेने वानवडी पोलिसात तक्रार दाखल केली आहे. फौजदार संतोष सोनावणे 8888186999 या चोरट्याचा शोध घेत आहेत .

दुसऱ्या एका घटनेत कात्रज येथील हॉटेल अंबिका समोर पीएमपी च्या बस मध्ये चढत असताना एका ३९ वर्षीय महिलेच्या पर्समधून भामट्याने २ लाख ७२ हजार रुपयांचे दागिने हातोहात लांबविले.वडगाव बुद्रुक येथे राहणाऱ्या या महिलेने भारती विद्यापीठ पोलिसात तक्रार दाखल केली असून अंमलदार चीप्पा 9923107178 याप्रकरणी अधिक तपास करत आहेत .

सर्व धर्मीयांसाठी इफ्तार पार्टी

पुणे-संपूर्ण जगात शांतता नांदण्याची गरज आहे. सर्व जाती-धर्मामध्ये भाईचारा निर्माण व्हायला हवा. स्वतःच्या धर्माचा अभिमान असायलाच पाहिजे. मात्र इतर धर्माचा द्वेष करणे योग्य नाही. जगात माणूसकी हाच श्रेष्ठ धर्म आहे, असे प्रतिपादन पुणे महापालिकेचे माजी उपमहापौर डॉ. सिद्धार्थ धेंडे यांनी केले.

पुणे महापालिकेच्या प्रभाग क्रमांक दोनच्या महाराष्ट्र हाऊसिंग बोर्ड येथील कै. नटराज गंगावणे सभागृहात डॉ. सिद्धार्थ धेंडे यांच्या पुढाकाराने ईफ्तार पार्टीचे आयोजन करण्यात आले होते. या वेळी ते धेंडे बोलत होते. या वेळी प्रत्येक घरात ईद साजरी व्हावी यासाठी गरजूंना शिरखुर्मा साहित्य किट प्रदान करण्यात आले.

या कार्यक्रमाला माजी नगरसेविका फरझाना शेख, आरपीआय (आठवले गट) महाराष्ट्र अल्पसंख्याक आघाडीचे अध्यक्ष अयुब शेख, पुणे शहर भाजपा प्रवक्ते मंगेश गोळे, हिंदू संस्कृती मंचाचे दिलीप म्हस्के, शिख समाजाच्या वतीने सरबतजीतसिंग सिंधू, बौध्दाचार्य रमेश गाडगे, यासिन शेख, ख्रिश्चन समाजाच्या वतीने महापुरे, सामाजिक कार्यकर्ते नामदेवराव घाडगे, हुसेन शहा बाबा दर्गा ट्रस्टचे रज्जाकभाई, मुश्‍ताकभाई तसेच प्रभागातील हमारी तंजीम व जामा मजीद ट्रस्टचे सर्व पदाधिकारी व सभासद मोठ्या संख्येने सहभागी झाले होते. या वेळी महिलांची देखील मोठ्या प्रमाणात उपस्थिती होती.

हा कार्यक्रम यशस्वी करायला सुरैया शेख, सईदा शेख, नझिम शेख, पप्पु मगदुम, फिरोज शेख, नुमान शेख, अनवर देसाई, फिरदोस शेख, विजय कांबळे, गजानन जागडे, वसंत दोंदे, अल्हाबक्ष, भिमराव जाधव , गणेश पारखे व ईतर सर्व कार्यकर्ते यांनी सहकार्य केले.

डॉ. धेंडे म्हणाले की, जगाला प्रेम अर्पण करण्याची शिकवण सर्व धर्मांमध्ये दिली जात आहे. कोणताही धर्म एकमेकांच्या विरोधात उभा राहण्याची मुभा देत नाही. माणसांनी एकमेकांचा द्वेष करायला सुरूवात केली. माणसांनीच भेदाभेद निर्माण केला. धर्माचा योग्य अभ्यास केल्यास मानवतावादी भावना सर्वांमध्ये वाढेल. पुढे तीच भावना माणसांनी पुढे घेऊन जाणे गरजेचे असल्याचे डॉ. धेंडे म्हणाले.

डॉ. सिद्धार्थ धेंडे यांनी प्रभागात जोपासला सामाजिक एकोपा : अय्युब शेख –

डॉ. सिद्धार्थ धेंडे यांच्या पुढाकाराने गेल्या 17 वर्षांपासून प्रभागात ईफ्तार पार्टीचे आयोजन केले जात आहे. प्रभागात सामाजिक एकोपा वृर्द्धींगत व्हावा, सर्व जाती धर्मात शांतता नांदावी, सर्व जाती धर्मात प्रेम भावना वाढावी या उद्देशाने उपक्रम राबविला जात आहे. यामध्ये सर्व धर्मियांना एकत्रित करून भाईचारा वाढीसाठी प्रयत्न केले जात आहे. गेल्या वर्षांपासून महिलांसाठी देखील इफ्तार पार्टीचे आयोजन करून नवीन आदर्श डॉ. धेंडे यांनी निर्माण केला आहे, असे प्रतिपादन आरपीआय (आठवले गट) महाराष्ट्र अल्पसंख्याक आघाडीचे प्रदेशाध्यक्ष अय्युब शेख यांनी केले.

पुणे- सिंहगड रोड परिसरातील आनंदनगर याठिकाणी एका सोसायटीत चोरट्यांनी रात्रीच्या वेळेस शिरून पाच फ्लॅटचे कडी कोयंडा तोडून चोरी करण्याचा प्रयत्न केला आहे. या घटनेत एक फ्लॅट कुलूप तोडून घरात प्रवेश करून चोरी करण्यात आली. त्यांनी 4 लाख 15 हजार रुपयांचा मुद्देमाल चोरून नेला आहे. या प्रकरणी सिंहगड रोड पोलिस ठाण्यात आरोपी विरोधात गुन्हा दाखल करण्यात आला आहे.

याबाबत नीलिमा अनिल देशपांडे (वय- 65, रा. आनंदनगर ,पुणे )यांनी अज्ञात आरोपी विरोधात पोलिसांकडे तक्रार दाखल केली आहे. सदरचा प्रकार 17 एप्रिल रोजी दुपारी तीन ते 18 एप्रिल संध्याकाळी साडेनऊ या दरम्यान घडला आहे. पोलिसांनी दिलेल्या माहितीनुसार, तक्रारदार या कामानिमित्त कुटुंबासह बाहेरगावी गेल्या होत्या. त्यावेळी अज्ञात आरोपीने त्यांच्या राहत्या घराचा कडीकोंडा तोडून घरात प्रवेश केला, त्यानंतर बेडरूम मधील कपाटातील लॉक तोडून चोरट्याने 142 ग्रॅम सोन्याचे व 390 ग्रॅम चांदीचे दागिने असा एकूण चार लाख 15 हजार रुपयांचा मुद्देमाल चोरून नेला आहे.

तसेच अज्ञात चोरट्याने कापरे गार्डन येथील चार फ्लॅटचे कडीकोंडा तोडून चोरी करण्याचा प्रयत्न केल्याचेही निष्पन्न झाले आहे. घटनेची माहिती मिळताच वरिष्ठ पोलिस अधिकाऱ्यांनी घटनास्थळी भेट देत परिस्थितीची पाहणी केली. त्याचप्रमाणे सदर भागातील सीसीटीव्ही फुटेजची पाहणी करून, चोट्यांचा माग काढण्याचा प्रयत्न पोलिस करत आहेत. याबाबत सिंहगड रोड पोलिस ठाण्याचे सहाय्यक पोलिस निरीक्षक एम निकम पुढील तपास करत आहेत.

मार्केटयार्ड परिसरातील भगवती ट्रेडर्स या किराणा मालाच्या होलसेल दुकानाचे शटर उचकटून दुकानात दोन अनोळखी आरोपींनी प्रवेश करून कॅश काउंटरचे ड्रॉवर्स तोडून त्यातून दोन लाख रुपयांची रक्कम घोरफोडी करून चोरून नेली आहे. या प्रकरणी संजीव राधेश्याम गोयल (वय- 55, रा. कोंढवा ,पुणे) यांनी आरोपी विरोधात मार्केटयार्ड पोलिस ठाण्यात तक्रार दाखल केली आहे. सीसीटीव्ही फुटेज मध्ये सदर आरोपी कैद झाले असून त्याआधारे पोलिस आरोपींचा शोध घेत आहे.

तर दुसऱ्या घटनेत, हनुमान नगर येथील सुर्यतारा हाऊसिंग सोसायटीमध्ये दुसऱ्या मजल्यावर राहणाऱ्या हेमा दत्तात्रय माने (वय -34 )या बाहेरगावी गेल्या असताना, त्यांच्या बंद फ्लॅटचा कडीकोयडा अज्ञात चोरट्यांनी तोडून घरात प्रवेश केला. त्यानंतर चोरट्यांनी लाकडी कपाटातील 25 ग्रॅम सोन्याचे दागिने आणि इतर रक्कम असा दीड लाख रुपयांचा मुद्देमाल घरफोडी करून चोरून नेला आहे. याबाबत चतुर्श्रुंगी पोलिस पुढील तपास करत आहे.

पुणे- सिनेमा स्टाईल ने येरवड्याच्या रिमांड होम मध्ये असलेल्या मुलांच्या २ गटात हाणामारी झाली आणि ४ मुलांनी कुलूप तोडून शिडी मिळवून शिडीवरून भिंतीवर चढून उड्मायारून रिमांड होम ची रखवाली तोडून पळ काढला आहे. हि मुले कोयता टोळीतील असल्याचे सांगण्यात आले आहे. या मुलांनी बालसुधारगृहात झालेल्या भांडणाचा फायदा घेत सुरक्षा भिंतीला शिडी लावून धूम ठोकली आहे. याप्रकरणी येरवडा पोलिस ठाण्यात गुन्हा दाखल करण्यात आला आहे.

याबाबत येरवड्यातील पं. जवाहरलाल नेहरु उद्योग केंद्रातील कर्मचारी सुमंत जाधव (वय ३१, रा. अप्पर इंदिरानगर, बिबवेवाडी ) यांनी येरवडा पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, वेगवेगळ्या गुन्ह्यामुळे कोयता टोळीतील चार मुलांना येरवडा येथील बालसुधार गृहात ठेवण्यात आले होते. या मुलांनी सुधारगृहात झालेल्या भांडणाच्या गोंधळाचा फायदा घेत, लाकडी शिडी सुरक्षा भिंतीला लावून पलायन केल्याचा धक्कादायक प्रकार उघडकीस आला आहे. या मुलांनी मंगळवारी 18 एप्रिल रोजी पलायन केले आहे. पंडित जवाहरलाल नेहरू उद्योग केंद्राच्या बाल निरीक्षण गृह, येरवडा येथे ही घटना घडली आहे.

येरवडा पोलिसांनी सांगितले की, तक्रारदार सुमंत जाधव हे येरवड्यातील बालसुधारगृहात काम करतात. मंगळवारी या बालसुधारगृहात मुलांमध्ये आपापसात जोरदार भांडण झाले. भांडणांमध्ये पलायन केलेल्या मुलांनी इतर दोन मुलांना शिवीगाळ केली. तसेच, दगड मारून खिडकीचेही नुकसान केले. त्यामुळे बालसुधारगृहात मोठा गोंधळ निर्माण झाला. पसार झालेल्या अल्पवयीन मुलांचा शोध घेण्यात येत असून पोलीस उपनिरीक्षक विशाल पाटील9766764471 तपास करत आहेत.

पुणे दि. १९: भारतीय हवामानशास्त्र विभागाकडून देण्यात येणारे हवामान अंदाज, पर्जन्यमान अंदाजविषयक सेवांची माहिती सर्वसामान्य नागरिकांपर्यंत पोहोचविण्यासाठी सर्व विभागांनी प्रयत्न करावेत, असे निर्देश जिल्हाधिकारी डॉ. राजेश देशमुख यांनी दिले. हवामानशास्त्र विभागाकडील माहितीचा आरोग्य विभागाला चांगला उपयोग करुन घेता येईल, असेही जिल्हाधिकारी यावेळी म्हणाले.

एल निनो समुद्र प्रवाह आणि हवामान बदलाच्या अनुषंगाने जिल्हाधिकारी डॉ. देशमुख यांच्या अध्यक्षतेखाली आणि भारतीय हवामानशास्त्र विभाग पुणेचे प्रमुख के. एस. होसळीकर यांच्या प्रमुख उपस्थितीत बैठक आयोजित करण्यात आली. यावेळी निवासी उपजिल्हाधिकारी ज्योती कदम, हवामानशास्त्र विभागाचे हवामान अंदाज विभागाचे प्रमुख शास्त्रज्ञ अनुपम कश्यपी, डॉ. राजीव चटोपाध्याय यांच्यासह विविध विभागांचे अधिकारी उपस्थित होते.

उन्हाळ्यात होत असलेले हवामानबदल पाहता हवामानशास्त्र विभागाचे हवामान अंदाज, इशारे याकडे सर्वांचे लक्ष असणे महत्त्वाचे आहे, असे सांगून जिल्हाधिकारी डॉ. देशमुख म्हणाले, सध्याची परिस्थिती पाहता उष्णतेची लाट, पावसाचे अंदाज, वादळवारा आदींबाबतच्या अंदाजांची माहिती जिल्ह्यातील जास्तीत जास्त लोकांपर्यंत पोहोचेल यासाठी प्रयत्न करावेत. शेतकरी तसेच सर्वसामान्य व्यक्तीसाठी ही माहिती उपयुक्त असल्याने प्रत्येक गाव, ग्रामपंचायत तसेच गावातील व्हॉट्सॲप ग्रुपपर्यंत माहिती पोहोचविण्यासाठी प्रयत्न करावेत.

हवामानशास्त्र विभागाकडील विविध अंदाज, अहवालांचा उपयोग आरोग्य विभागाला हवामानबदलामुळे होणारे साथीचे आजार आदींविरोधात उपाययोजना करण्यासाठी होऊ शकेल. त्याचबरोबर याबाबतची संबंधित विभागांनीही आपली माहिती हवामानशास्त्र विभागाला उपलब्ध करुन दिल्यास संयुक्तपणे चांगले काम होऊ शकेल. पुणे हवामानशास्त्र विभागाच्या बळकटीकरणासाठी प्रयत्न करण्यात येतील, असेही डॉ. देशमुख यावेळी म्हणाले.

यावेळी श्री. होसाळीकर यांनी सांगितले, हवामानशास्त्र विभागाकडून विविध अत्याधुनिक प्रारुपांचा उपयोग हवामान तसेच पावसाचा अंदाजासाठी केला जातो. आगामी नैऋत्य मोसमी पावसाचा पहिल्या टप्प्यातील अंदाज हवामानशास्त्र विभागाने जाहीर केला असून त्यानुसार सरासरीच्या ९६ टक्के म्हणजेच सामान्य पावसाचा अंदाज व्यक्त करण्यात आला आहे. पावसावर प्रभाव टाकणाऱ्या अल निनो प्रवाहाची स्थिती यावर्षी पावसाळ्यात विकसित होण्याची असली तरी सध्यातरी त्याबाबत चिंता करण्याची आवश्यकता नाही.

फेब्रुवारी आणि मार्च २०२३ मध्ये युरेशियावर सामान्यापेक्षा कमी बर्फाचे आवरण दिसल्यामुळे भारतात नैऋत्य मोसमी पावसासाठी अनुकूल घटक आहे. तसेच तटस्थ हिंद महासागर द्विध्रुव (आयओडी) परिस्थिती विकसित होण्याची शक्यता असून हा घटकही नैऋत्य मोसमी पावसासाठी अनुकूल आहे. मे अखेरीस दुसऱ्या टप्प्यातील पावसाचा अंदाज जाहीर करण्यात येईल, असेही ते म्हणाले.

पुण्यासाठी लवकरच स्वतंत्र डॉप्लर रडार
स्थानिक हवामान अंदाज अधिक अचूक आणि वेगवानरित्या वर्तविण्याच्यादृष्टीने पुणे शहरासाठी स्वतंत्र डॉप्लर रडार मंजूर केले आहे. त्यासाठी जागा निश्चित करण्याबाबतची कार्यवाही सुरू आहे. या रडारमुळे ‘नाऊकास्ट’ नुसार आगामी दोन तीन तासातील अचूक अंदाज वर्तवणे शक्य होणार आहे. पुणे शहरात सध्या पुणे, पाषाण, लोहगाव, चिंचवड, लवळे, मगरपट्टा या सहा ठिकाणी रिअल टाइम तापमान व हवामान स्थितीविषयक माहिती जमा करण्याची व्यवस्था असून ही माहिती संकेतस्थळावर उपलब्ध आहे, असेही श्री. होसळीकर यावेळी म्हणाले.

यावेळी अनुपम कश्यपी यांनी विभागाकडील हवामान अंदाज, इशारे, त्याचे प्रकार, चिन्हांचे अर्थ आदींबाबत माहिती दिली. पुणे शहर व परिसरासाठी विभागाकडून स्थानिक अंदाज व हवामान सल्ला जाहीर करण्यात येत असल्याचे त्यांनी सांगितले. जिल्हाधिकारी कार्यालय, पुणे महानगरपालिका यांच्या सहकार्याने पुणे शहरात १६० ठिकाणी इलेक्ट्रॉनिक डिस्प्ले बोर्डवर हवामानाची माहिती दर्शविण्यात येत असल्याचे त्यांनी सांगितले.

डॉ. चटोपाध्याय यांनी उष्णतेची लाट आणि हवामान प्रारुपांचा आरोग्य क्षेत्रासाठी उपयोग याबाबत माहिती दिली. मलेरिया, डेंग्यू सारख्या साथीचा पूर्वानुमानासाठी या प्रारुपांचा उपयोग होऊ शकतो. आरोग्य विभाग आणि हवामानशास्त्र विभागाने समन्वयाने काम केल्यास याविषयी गतीने उपाययोजना करता येतील, असे यावेळी सांगण्यात आले.

यावेळी हवामानशास्त्र विभागाचे मुंबई प्रादेशिक कार्यालयाचे संकेतस्थळ https://mausam.imd.gov.in/mumbai/, भारतीय हवामानशास्त्र विभागाचे https://mausam.imd.gov.in/ तसेच पुणे https://www.imdpune.gov.in/marathi/indexmarathi.php या संकेतस्थळ तसेच विभागाचे ‘मौसम’ ॲप, वीजांबाबत माहिती देणारे ‘दामिनी’ ॲप आदी मोबाईल ॲपचा उपयोग करण्याबाबत माहिती देण्यात आली.

पुणे : मोग-याच्या लाखो फुलांनी सजलेला दत्तमंदिराचा परिसर…सुवासिक फुलांनी साकारलेला महाराजांचा मुकुट… रंगीबेरंगी फुलांची आकर्षक आभूषणे… शोभिवंत फुलांची आरास… आणि गुलाब, झेंडू, चाफा, लिलीसारख्या नानाविध फुलांनी सजलेल्या दत्तमंदिरात वासंतिक पुष्पोत्सव उत्साहात साजरा झाला. चैत्र अमावस्येला दत्तमहाराजांकरीता केलेली फुलांची आरास व महाराजांचे फुलांच्या दागिन्यांनी सजलेले मनोहारी रुप पाहण्याकरीता मोठया संख्येने भाविक उपस्थित होते. 
श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे संस्थापिका लक्ष्मीबाई दगडूशेठ हलवाई यांच्या पुण्यतिथीनिमित्त पुष्पोत्सवाचे आयोजन करण्यात आले. यावेळी ट्रस्टचे अध्यक्ष अ‍ॅड.प्रताप परदेशी, कार्यकारी विश्वस्त अ‍ॅड.शिवराज कदम जहागिरदार, खजिनदार महेंद्र पिसाळ, उत्सवप्रमुख अ‍ॅड.रजनी उकरंडे, उत्सव उपप्रमुख युवराज गाडवे, विश्वस्त सुनिल रुकारी, डॉ.पराग काळकर, राजू बलकवडे, अक्षय हलवाई यांसह पदाधिकारी व कर्मचारी उपस्थित होते. 
पुष्पोत्सवाबाबत माहिती देताना ट्रस्टचे अध्यक्ष अ‍ॅड.प्रताप परदेशी म्हणाले, सुमारे १०० किलो मोगरा, ५० किलो झेंडू, १०० बंडल गुलाब फुले, १२५ किलो गुलाब  पाकळ्या, ९ हजार चाफयाची फुले,  जाई, जुई  आणि पासलीच्या पानांनी पुष्पोत्सवात सजावट करण्यात आली. सुभाष सरपाले आणि सहका-यांनी ही आरास साकारली. 
श्रीपाद श्रीवल्लभ, नृसिंह सरस्वती, श्रीमत् वासुदेवानंद टेंभेस्वामी महाराज, श्रीमाणिकप्रभू महाराज या दत्तमहाराजांच्या चार अवतारांच्या प्रतिमा आणि  कै.लक्ष्मीबाई दगडूशेठ हलवाई यांची प्रतिमा देखील फुलांनी सजविण्यात आली.