पुणे-शालेय पोषण आहाराचे टेंडर महिला बचत गटांच्या हातून हिसकावून कायमस्वरूपी ठेकेदारांच्या घशात घालण्यासाठी महापालिका प्रशासनाचा खटाटोप सुरु असल्याचा आरोप आम आदमी पार्टीने केला आहे.आज आम आदमी पक्ष आणि महिला बचत गटाच्या काही संघटनांनी पत्रकार भवन येथे एकत्रित पत्रकार परिषद घेऊन या अन्यायाला वाचा फोडली. या पत्रकार परिषदेला आम आदमी पक्षाचे डॉ अभिजीत मोरे, घनश्याम मारणे, सुजित अग्रवाल, किशोर मुजुमदार, कुमार धोंगडे, अमोल मोरे, शेखर ढगे तसेच जयश्रीताई ढोबळे (अध्यक्षा, सावित्री बचतगट महासंघ), अल्ताफ तांबोळी ( हेल्पलाईन संस्था), रजनी वाघमारे (अध्यक्ष, तक्षशिला व्यवसाय गट), सुचिता नानगुडे (सचिव, ऋचा महिला बचत गट), जयश्री लोहोकरे (खजिनदार, साविती बचतगट महासंघ), संगिता डाके (तक्षशिला बचत गट) हे उपस्थित होते.

यावेळी यांनी सांगितले कि, पुणे शहरातील शेकडो बचतगटांनी हे टेंडर भरण्याकरिता खूप खर्च केलेला आहे व जागेचे भरमसाठ भाडे भरत आहेत. निविदा प्रक्रिया प्रचंड रखडली असल्याने गरीब बचतगटांना खूप मोठा आर्थिक भुर्दंड सोसावा लागत आहे. जुन्या ठेकेदाराना नियमबाह्य पुन्हा संधी देण्याचे षडयंत्र आहे.जुन्याच ठेकेदाराना जास्तीचे काम मिळण्याकरिता पुणे शहरातील ज्यांनी अर्ज भरले आहेत अशा बचतगटांना अपात्र करण्याचा प्रयत्न सुरु आहे. खरे तर पोषण आहारामध्ये बचत गटांना प्रोत्साहन देण्याचे शासकीय धोरण असून देखील बचत गटांना या प्रक्रियेतून हद्दपार करण्याचे षडयंत्र पुणे महानगरपालिकेमध्ये शिजत आहे. तरी मनपाने टेंडर भरलेल्या अर्जदार बचत गटांना पूर्ण संधी द्यावी व जास्तीची माहिती प्राप्त करून घ्यावी. माहिती अपूर्ण आहे या कारणास्तव कोणालाही अपात्र करू नये, पूर्ण माहिती देण्यासाठी पुरेसा अवधी प्राप्त करून दिला जावा असे शासन निर्णय आहेत. त्या अनुषंगाने पुणे शहरातील महिला बचतगटांना पुरेशी संधी देण्यात यावी. त्यांना पत्र पाठवून पूरक माहिती मागवून घ्यावी अशी मागणी आम आदमी पार्टी मनपा आयुक्तांना निवेदनाद्वारे करीत आहे. तसेच दि.१३.७.२०२२ रोजीचे शुद्धीपत्रक सुद्धा बदलण्याचा प्रयत्न सुरु आहे तो तातडीने थांबवण्यात यावा. दि.१३.७.२०२२ रोजीचे शुद्धीपत्रकाप्रमाणे सर्व बचतगटांना कामे देण्यात यावीत अशी मागणी यावेळी करण्यात आली आहे.

जुन 2022 मध्ये पुणे मनपा शिक्षण विभागाच्या शालेय पोषण आहार योजने अंतर्गत, केंद्रीय स्वयंपाकगृह निवडीकरीता टेंडर मागविलेले होते. याबाबत सर्व बचतगटांना कामे मिळण्याच्या दृष्टीने दि.१३.७.२०२२ रोजी शुद्धपत्रक काढून प्रत्येक युनिटसाठी २५०० विद्यार्थी संख्या ठरविण्यात आली. एका किचनसाठी १००० स्क्वे. फु. जागा व सन २०१८-१९ व २०१९-२० ची सरासरी वार्षिक आर्थिक उलाढाल २५ लक्ष एवढी निश्चित करणेत आली. या नंतर पुणे शहरातील अनेक बचतगटांनी 25 जुलै 2022 रोजी टेंडर भरलेले आहेत. अनेक महिने उलटून गेले तरी आजपर्यंत ही टेंडर प्रक्रिया मुद्दाम लांबवलेली असून मनपाचे काही अधिकारी जुन्या ठेकेदाराना फायदा कसा होईल याबाबत प्रयत्न करीत आहेत. त्यासाठी दि.१३.७.२०२२ रोजीचे शुद्धीपत्रक सुद्धा बदलण्याचा प्रयत्न सुरु आहे. याकरिता जुन्या ठेकेदाराना कोर्टात पाठवून जाणीवपूर्वक प्रक्रिया विलंब करण्याचा प्रयत्न केला गेला. उच्च व सर्वोच्च न्यायालयाने त्या याचिका फेटाळल्या आहेत व प्रक्रिया वेळेत उरकण्याच्या सूचना केल्या होत्या. 29 सप्टेंबर 2022 रोजी राज्य प्राथमिक शिक्षण संचालक यांनी पत्र पाठवून याबाबतची निविदा प्रक्रिया तातडीने उरकण्याबाबत आदेश दिले होते. परंतु पुणे मनपातील या योजनेतील काही अधिकारी जाणीवपूर्वक गेल्या अनेक दिवसांपासून या प्रक्रियेस विलंब लावत आहेत.असा आरोप यावेळी करण्यात आला.

पुणे, दि ८:- महाराष्ट्र राज्य परीक्षा परिषदेमार्फत ३१ जुलै २०२२ रोजी घेण्यात आलेल्या पूर्व उच्च प्राथमिक (पाचवी), पूर्व माध्यमिक शिष्यवृत्ती परीक्षा (आठवी) तसेच शासकीय, आदिवासी, विमुक्त जाती व भटक्या जमाती विद्यानिकेतन प्रवेश परीक्षेचा अंतरिम (तात्पुरता) निकाल www.mscepune.in व https://www.mscepuppss.in या संकेतस्थळावर प्रसिद्ध करण्यात आला आहे.

शाळांना विद्यार्थ्यांचा निकाल आपल्या लॉगिनमधून तसेच पालकांना त्यांच्या पाल्यांचा निकाल संकेतस्थळावर बघता येणार आहे. विद्यार्थ्यांना गुणपडताळणी करुन घेण्यासाठी तसेच विद्यार्थ्याचे नाव, आडनाव, वडिलांचे नाव, आईचे नाव, शहरी किंवा ग्रामीण, अभ्यासक्रम इत्यादीमध्ये दुरूस्तीसाठी संबंधित शाळेच्या लॉगीनमध्ये १७ नोव्हेंबर पर्यंत ऑनलाईन अर्ज उपलब्ध करुन देण्यात आले आहे. गुण पडताळणीसाठी प्रत्येक पेपरकरीता ५० रुपये याप्रमाणे शुल्काची रक्कम ऑनलाईन पेमेंटद्वारे भरावी लागेल. यासाठी केवळ ऑनलाईन अर्जच करावे. विहित मुदतीनंतर प्राप्त झालेल्या अर्जाचा विचार केला जाणार नाही, याची नोंद घ्यावी.

विहित मुदतीत आवश्यक शुल्कासह ऑनलाईन प्राप्त अर्जानुसार गुणपडताळणीचा निर्णय संबंधित शाळेच्या लॉगीनमध्ये अर्ज प्राप्त झाल्यानंतर ३० दिवसांपर्यंत कळविण्यात येईल. गुणपडताळणीसाठी आलेले अर्ज निकाली काढल्यानंतर अंतिम निकाल व गुणवत्ता यादी प्रसिद्ध करण्यात येणार आहे, अशी माहिती महाराष्ट्र राज्य परीक्षा परिषदेच्या सहायक आयुक्त स्मिता गौड यांनी दिली आहे.

ज्येष्ठ साहित्यिक दशरथ यादव यांची माहिती

सासवड, दि. ८ खानवडी (ता.पुरंदर) येथे रविवार दि २७ नोव्हेंबर २०२२ रोजी होणाऱ्या १५ व्या राज्यस्तरीय महात्मा फुले प्रबोधन मराठी साहित्य संमेलनाच्या स्वागताध्यक्ष पदी अॅड शिवाजी कोलते यांची निवड करण्यात आले आहे, ,अशी माहिती संमेलनाचे मुख्य संयोजक व ज्येष्ठ साहित्यिक दशरथ यादव यांनी दिली.

सासवड येथील नामांकित वकील व बांधकाम व्यावसायिक अॅड श्री शिवाजी कोलते हे पिसर्वे गावचे रहिवासी असून सासवड बार असोसिएशनचे माजी अध्यक्ष आहेत, यापुर्वी त्यांनी आचार्य अत्रे मराठी साहित्य संमेलन, छत्रपती संभाजी महाराज साहित्य संमेलनाचे स्वागताध्यक्ष पद भूषविले आहे, राजकीय व सामाजिक कार्यात त्यांचा सहभाग असतो,
महात्मा फुले यांच्या मूळ खानवडी गावी दि. २७ नोव्हेंबर रोजी साहित्य संमेलनाचे आयोजन करण्यात आले आहे. दरवर्षी मराठी साहित्य संशोधन परिषद व अखिल भारतीय परिवर्तन मराठी साहित्य परिषद यांच्या वतीने साहित्य संमेलनाचे आयोजन केले जाते ़

सकाळी ११ वा. संमेलनाचे उदघाटन होणार असून, दुपारी २ वा. समाजसुधारक महात्मा फुले या विषयावर परिसंवाद होणार आहे, मी सावित्री बाई बोलतेय, नाट्य प्रयोग, कथाकथन, कविसंमेलन व पुरस्कार वितरण असे भरगच्च कार्यक्रम आयोजित केले आहेत ़ं

संमेलनाचे संयोजन करण्यासाठी आयोजित बैठकीला राजाभाऊ जगताप,सुनील धिवार, दत्तानाना भोंगळे, गंगाराम जाधव, शामराव मेमाणे, सुनील लोणकर, नंदकुमार दिवसे, दत्ता कड रवींद्र फुले, दत्ता होले , रमेश बोरावके, विजय तुपे, प्रा सुरेश वाळेकर, दिपक पवार, संजय सोनवणे, अमोल भोसले आदी उपस्थित होते,

मुंबई : मुंबई मराठी पत्रकार संघ आणि रामशेठ ठाकूर सामाजिक विकास मंडळ यांच्या संयुक्त विद्यमाने 22 वी राज्यस्तरीय सर्वोत्कृष्ट दिवाळी अंक स्पर्धा जाहीर करण्यात आली आहे. राज्यभरात सर्वात मोठ्या बक्षीस रकमेच्या या दिवाळी अंक स्पर्धेतील सर्वोत्कृष्ट दिवाळी अंकाला प्रथम पारितोषिक रु. 1,00,000/- (रुपये एक लाख) व सन्मानचिन्ह, द्वितीय पारितोषिक रु. 50,000/- (रुपये पन्नास हजार), तृतीय पारितोषिक रु. 30,000/- (रुपये तीस हजार) अशी भरघोस रकमेची पारितोषिके देण्यात येतील. तसेच उत्कृष्ट दिवाळी अंकास रु. 5,000/- (रुपये पाच हजार), उत्कृष्ट कथा रु. 7,000/- (रुपये सात हजार), उत्कृष्ट कविता रु. 5,000/- (रुपये पाच हजार) आणि उत्कृष्ट व्यंगचित्र रु. 5,000/- (रुपये पाच हजार), उत्कृष्ट मुखपृष्ठ रु. 5,000/- (रुपये पाच हजार), सर्वोत्कृष्ट बाल दिवाळी अंक रु. 7,500/- (रुपये सात हजार पाचशे) व विशेष विषयांवरील अंकालाही दोन ते पाच हजार रुपयांची रोख पारितोषिके दिली जातील.

याशिवाय खास रायगड जिल्ह्यातून प्रकाशित होणाऱ्या उत्कृष्ट दिवाळी अंकाला प्रथम पारितोषिक
रु. 40,000/- (रुपये चाळीस हजार), द्वितीय पारितोषिक रु. 20,000/- (रुपये वीस हजार), तृतीय पारितोषिक रु. 10,000/- (रुपये दहा हजार) रोख व सन्मानचिन्ह आणि उत्तेजनार्थ दोन पारितोषिके प्रत्येकी रु. 5,000/- अशी पारितोषिके देण्यात येतील.
तरी ज्या स्पर्धकांना या स्पर्धेत भाग घ्यावयाचा असेल त्यांनी दिवाळी अंकाच्या दोन प्रती व प्रवेश शुल्क रु. 100/- रोख, धनादेश अथवा डी.डी.द्वारे दिनांक 30 नोव्हेंबर, 2022 पूर्वी पुढील पत्त्यावर पाठवावेत, असे आवाहन मुंबई मराठी पत्रकार संघाचे अध्यक्ष श्री. नरेंद्र वि. वाबळे व रामशेठ ठाकूर सामाजिक विकास मंडळाचे अध्यक्ष आमदार प्रशांत ठाकूर यांनी केले आहे.
अंक पाठविण्याचा पत्ता :

अध्यक्ष/कार्यवाह
मुंबई मराठी पत्रकार संघ, पत्रकार भवन, आझाद मैदान,
महापालिका मार्ग, सी.एस.टी., मुंबई – 400001.
फोन : 022-22620451/22700715
अथवा
दीपक म्हात्रे
स्पर्धा समन्वयक
श्री. रामशेठ ठाकूर सामाजिक विकास मंडळ, प्लॉट नं. 475
मार्केट यार्ड, पनवेल, जि. रायगड – 410206
मो. : 9769409161
धनादेश किंवा डी.डी. मुंबई मराठी पत्रकार संघ या नावाने काढावा.

पुणे -राष्ट्रवादीच्या दोन्ही खासदारांनी वेळोवेळी भेटी दिल्या,सूचना केल्या पण प्रशासन ठम्म ,स्थानिक काय कोणातही आमदार याची दखल घेईना,चांदणी चौकाचे तर गडकरी आणि मुख्यमंत्री यांच्या धक्क्याने काम तर सुरु केलेय,पण याच चांदणी चौकाकडून कात्रज कडे येणाऱ्या वारजे पासून ते कात्रज ते कोंढवा -सासवड या मार्गावरील रस्त्याकडे मात्र निव्वळ डोळेझाक चालविली आहे. अपघाती रस्ता,बळी घेणारा रस्ता म्हणून याची ख्याती झाली आहे.

नवले पूल ते कात्रज चौकाकडे येणारा मुख्य रस्त्यावर पोतदार स्कुल जवळ हा स्पॉट कायम ट्राफिक चा पॉईंट ठरला असून प्रशासनाच्या निष्काळजीपणाने रस्त्याचे काम पूर्ण होत नसून गेले अनेक वर्षे दररोज नागरिकांना हा सहन करावा लागतोय,ट्राफिक पोलिसांचे नियोजन नसून मागील आठवड्यापूर्वी एका महिलेचा अपघात होऊन जागीच मृत्यू झाला, आजपर्यंत या रस्त्यावर अगणित अपघात आणि मृत्यू देखील झालेत पण अद्यापही यावर उपाय योजना मात्र सुरु झालेल्या नाहीत.येथील स्थानिक नागरिक आशिष भोसले याबाबत वारंवार तक्रार करत आहेत.यापुढे कात्रज ते कोंढवा -त्यापुढे सासवड अशा रस्त्याची मोठ्ठी दुरावस्था झालेली आहे.आमदार निवडून येतात,मुंबई,दिल्ली अन्य शहरात वाऱ्या करतात,एवढेच काय परदेश वाऱ्या देखील करतात पण या रस्त्यांवरील आणि यांना मिळणाऱ्या छोट्या छोट्या रस्त्यांकडे लक्ष द्यायला अजिबात कोणी धजावलेले नाही.

पुणे दि. ७ नोव्हेंबर :* महावितरणच्या पुणे परिमंडलाद्वारे आयोजित पुणे प्रादेशिक विभाग अंतर्गत आंतरपरिमंडलीय नाट्य स्पर्धेला आज थाटात सुरुवात झाली. पद्मावती येथील लोकशाहीर अण्णाभाऊ साठे सभागृहात या स्पर्धा होत आहेत.
स्पर्धेची सुरुवात नटराजपूजन व दीप प्रज्वलनाने झाली. याप्रसंगी प्रमुख पाहुणे म्हणून मुख्य अभियंते सचिन तालेवार (पुणे ), सुनील पावडे  (बारामती), परेश भागवत (कोल्हापूर) तसेच नाट्य परीक्षक संजय गोसावी, अरुण पटवर्धन व सौ. मंजुषा जोशी यांची उपस्थिती होती. ‘महावितरणच्या कर्मचाऱ्यांच्या कलागुणांना प्रोत्साहित करण्यासाठी या नाट्य स्पर्धेचे आयोजन करण्यात आले आहे. सर्व कर्मचारी, त्यांच्या कुटुंबियांनी व नाट्यप्रेमींनी आनंद घेण्याचे आवाहन मुख्य अभियंता सचिन तालेवार यांनी यावेळी केले.
कोल्हापूर परिमंडलाच्या ‘इस्किलार’ या जी. ए. कुलकर्णी लिखीत कथेवरील नाट्य रूपांतराच्या पहिल्या प्रयोगाने स्पर्धेला सुरुवात झाली. या नाटकातून एका शापित राजकुमाराच्या माध्यमातून नियतीचा खेळ मांडला आहे. त्याच्या स्वतःच्या अस्तित्वाच्या शोध प्रवासात त्याला विविध व्यक्तिरेखा भेटतात. त्यातील प्रत्येक व्यक्तिरेखेचा जीवनाकडे बघण्याचा एक स्वतंत्र दृष्टीकोन, मांडलेलं तत्वज्ञानाने प्रेक्षकांना खिळवून ठेवले.
दुपारच्या सत्रात बारामती परिमंडलाने रत्नाकर मतकरी लिखित ‘ब्लाइंड गेम’ या दोन अंकी नाटकाचे दमदार सादरीकरण केले. एका अंध महिलेच्या जिवनातील जगण्याचा संघर्ष मांडण्याचा त्यांनी प्रभावी प्रयत्न केला. या नाटकाने शेवटच्या क्षणापर्यंत ‘सस्पेंन्स’ कायम ठेवत रसिकांना गुंतून ठेवले. यावेळी अधीक्षक अभियंते राजेंद्र पवार, प्रकाश राऊत, सतीश राजदीप, अंकुर कावळे व गौतम गायकवाड, उपमहाव्यवस्थापक अभय चौधरी, सहायक महाव्यवस्थापक ज्ञानदा निलेकर, पांडुरंग वेळापुरे, माधुरी राऊत, किर्ती भोसले, उपमुख्य औद्योगिक संबंध अधिकारी शिरीष काटकर, भुपेंद्र वाघमारे व श्रीकृष्ण वायदंडे यांचेसह पुणे शहरातील सर्व अभियंते व कर्मचारी, पुणेकर रसिक मोठ्या संख्येने उपस्थित होते.

पुणे- खासदार सौ.सुप्रिया सुळे यांच्यावर राज्याचे कृषिमंत्री अब्दुल सत्तार यांनी अपशब्द वापरत टीका केली. या विरोधात पुणे शहर राष्ट्रवादी काँग्रेस पार्टीच्या वतीने अब्दुल सत्तार यांच्या विरोधात राणी लक्ष्मीबाई पुतळा ,जंगली महाराज रोड येथे जोरदार घोषणाबाजी करत आंदोलन करण्यात आले. सुप्रिया सुळे यांची कृषिमंत्र्यांनी व्यक्तिगत माफी मागावी व महिलांबाबत अपमानकारक विधान करणाऱ्या मंत्र्यांचा मुख्यमंत्री एकनाथ शिंदे यांनी राजीनामा घ्यावा, अशी मागणी यावेळी करण्यात आली.या आंदोलन प्रसंगी शहराध्यक्ष प्रशांत जगताप,प्रकाश कदम , नितीन कदम, रूपाली पाटील,अंकुश काकडे, प्रदीप गायकवाड , विशाल तांबे , महेंद्र पठारे, प्रदीप देशमुख ,वैशाली नागवडे , मुणालिनी वाणी , किशोर कांबळे , विक्रम जाधव , अप्पा शिंदे , अमोघ ढमाले यांसह मोठ्या संख्येने पदाधिकारी व कार्यकर्ते उपस्थित होते.

यावेळी बोलताना शहराध्यक्ष प्रशांत जगताप म्हणाले की , “महिलांच्या बद्दल आदर नसणारी लोक आज शिवरायांच्या महाराष्ट्राचा गाडा हाकत आहे ही, आपल्या सर्वांसाठी लाजिरवाणी गोष्ट आहे.विरोधी पक्ष व सत्ताधारी पक्षामध्ये महाराष्ट्र राज्याच्या राजकीय संस्कृतीचा एक धागा गेली अनेक वर्षे जपण्यात आलेला आहे. यामध्ये विरोधी पक्ष व सत्ताधारी पक्ष यांनी गेली अनेक वर्षे राजकारणापलीकडे जाऊन सौहार्दाचे वातावरण जपले आहे. अशामध्ये आपल्या मंत्रीमंडळातील मंत्री अब्दुल सत्तार यांनी राष्ट्रवादीच्या नेत्या खासदार सुप्रियाताई सुळे यांच्याविषयी केलेले वक्तव्य अत्यंत अशोभनीय व असंस्कृत आहे. याचा आम्ही तीव्र निषेध करतो.
खासदार सुप्रियाताई सुळे यांचा अपमान म्हणजे राज्यातील तमाम महिलांचा अपमान आहे. त्यामुळे राज्य सरकारने तात्काळ अब्दुल सत्तार यांची हकालपट्टी करावी अन्यथा राष्ट्रवादी काँग्रेसच्या रोषाला सामोरे जावे लागेल!
अब्दुल सत्तार सारख्या बेताल वक्तव्य करत महाराष्ट्रातील वातावरण बिघडविनाऱ्या वाचाळवीरांचा बंदोबस्त राष्ट्रवादी काँग्रेस पार्टीचे पदाधिकारी नक्की करतील”.