पुणे: बंदुकीचा धाक दाखवून फर्गसन रस्त्यावरील वैशाली हॅाटेलचा ताबा घेण्याचा प्रयत्न करण्यात आला. या प्रकरणी या हॅाटेलचे कुलमुख्यत्यारपत्र बंदुकीच्या धाकाने नावावर करून घेतल्याचा आरोप एका महिलेने पतीवर केला आहे. शिवाजीनगर पोलीस ठाण्यात या प्रकरणी कौटुंबिक हिंसाचार कायद्यान्वये गुन्हा दाखल करण्यात आला आहे.

विश्वजीत विनायकराव जाधव (वय ३८), अभिजित विनायकराव जाधव (वय ४०), विनायकराव जाधव (वय ६५), वैशाली विनायकराव जाधव (वय ६०) अशी गुन्हा दाखल झालेल्यांची नावे आहेत. याबाबत एका महिलेने शिवाजीनगर पोलीस ठाण्यात फिर्याद दिली आहे. जून २०१८ ते आतापर्यंत वेळोवेळी हा प्रकार घडल्याचे फिर्यादी महिलेने दिलेल्या तक्रारीत म्हटले आहे.

सदरचा प्रकार 2018 ते आतापर्यंत घडलेला आहे. पोलिसांनी दिलेल्या माहितीनुसार, तक्रारदार महिलेचा पती असलेल्या आरोपीने लग्न होण्यापूर्वी जानेवारी 2018 मध्ये त्याच्या पुण्यातील एका घरी नेऊन त्या महिलेला दारु व ड्रग्ज पाजून तिच्यासोबत जबरदस्तीने शारिरीक संबंध केले. त्यानंतर तिला गरोदर करुन जबरदस्तीने लग्नानंतर त्यांना आरोपींनी संगनमताने मारहाण करुन शारिरिक व मानसिक छळ केला.

फिर्यादीच्या पतीने त्याच्याकडील पिस्तूलचा धाक दाखवून व जबरदस्तीने अनैसर्गिक शारिरिक संबंध प्रस्थापित करून या महिलेकडून बळजबरीने महिलेच्या वडिलांचे प्रसिध्द हॉटेल वैशाली पॉवर ऑफ अॅटर्नी करुन स्वत:च्या नावावर करुन घेतले. तसेच कंपनीच्या नावावर खरेदी केलेल्या ५२ कोटी 50 लाख रुपये किंमतीच्या कार परस्पर विक्री करुन त्यांची फसवणुक केली आहे. तसेच लग्नातील दागिने व वस्तू असा एक कोटी 70 लाख रुपये किंमतीचा ऐवज तसेच दोन कार घेवून आरोपी व त्याचा भाऊ वापरत आहे. याबाबत शिवाजीनगर पोलिस ठाण्य़ाचे पोलिस निरीक्षक (गुन्हे्) विक्रम गौड पुढील तपास करत आहेत.

पुणे दि.19: लिहिण्याची-वाचण्याची क्षमता आणि अंकाद्वारे मूलभूत व्यवहार करणे हा भविष्यातील शालेय शिक्षणासाठी आणि जीवन विकासासाठी आवश्यक पाया आहे. त्यादृष्टीने विद्यार्थ्यांना पूर्वप्राथमिक शिक्षणाच्या माध्यमातून मूलभूत साक्षरता आणि संख्याशास्त्राची ओळख करून देणे आणि त्यासाठी स्पष्ट उद्देश समोर ठेवून तातडीने उपाययोजना करणे काळाची गरज आहे, असे प्रतिपादन केंद्रीय शिक्षण व परराष्ट्र व्यवहार राज्यमंत्री राजकुमार रंजन सिंह यांनी केले.

सावित्रीबाई फुले पुणे विद्यापीठ येथे जी-20 शिक्षण कार्यगटाच्या चौथ्या बैठकीनिमित्त ‘संमिश्र शिक्षणाद्वारे मूलभूत साक्षरता आणि संख्याशास्त्राची शाश्वती’ या विषयावर आयोजित चर्चासत्राच्या उद्घाटन प्रसंगी ते बोलत होते. कार्यक्रमाला राज्याचे उच्च व तंत्रशिक्षण मंत्री चंद्रकांतदादा पाटील, राष्ट्रीय अभ्यासक्रम फ्रेमवर्क सुकाणू समितीचे सदस्य प्रा.मंजुल भार्गव, केंद्रीय उच्च शिक्षण सचिव संजय मूर्ती, केंद्रीय शालेय शिक्षण सचिव संजय कुमार, केंद्रीय कौशल्य विकास सचिव अतुल कुमार, युनिसेफचे चिफ ऑफ एज्युकेशन टेरी डर्नीअन, विद्यापीठाचे कुलगुरु प्रा.सुरेश गोसावी आदी उपस्थित होते.

केंद्रीय राज्यमंत्री श्री.सिंह म्हणाले, ‘संमिश्र शिक्षणाद्वारे मूलभूत साक्षरता आणि संख्याशास्त्राची शाश्वती’ हा विषय शिक्षण कार्यगटाच्या प्राधान्याच्या विषयापैकी एक आहे. प्राथमिक शाळेतील विद्यार्थ्यांना मूलभूत साक्षरता आणि संख्याशास्त्राची (एफएलएन) ओळख नसल्याची बाब विविध सर्वेक्षणाच्या माध्यमातून समोर आली आहे. ‘एफएलएन’च्यादृष्टीने मूलभूत कौशल्यावर  आधारीत कृतियोजना निश्चित करण्यासाठी गरज आहे. अध्ययन आणि अध्यापनाचा दृष्टीकोन, पालक व समाजघटकांची भूमिका आणि शिक्षकांची क्षमतावृद्धी आणि प्रशिक्षण या तीन उद्दीष्टांवर विशेष लक्ष द्यावे लागेल. मूलभूत साक्षरता आणि संख्याशास्त्राच्या अध्ययनासाठी मुलांना सहाय्यभूत ठरणाऱ्या  आणि त्यासाठी वातावरण निर्मितीत उपयुक्त ठरणाऱ्या उत्तम कल्पना चर्चासत्राच्या माध्यमातून पुढे याव्यात, अशी अपेक्षा त्यांनी व्यक्त केली.

ते म्हणाले, भारताच्या राष्ट्रीय शिक्षण धोरणात प्रत्येक व्यक्तीच्या क्षमता विकासावर भर देण्यात आला आहे. शिक्षणाद्वारे मूलभूत साक्षरता आणि संख्याशास्त्राची उत्तम प्रकारे ओळख व्हावी यावर विशेष लक्ष देण्यात येत आहे. 2025 पर्यंत मूलभूत साक्षरता आणि संख्याशास्त्राची प्राथमिक शिक्षणाच्या स्तरावर विद्यार्थ्यांना ओळख करून देण्यास सर्वोच्च प्राधान्य देण्यात आले आहे. हे उद्दिष्ट कालबद्धरित्या गाठण्यासाठी भारतातील सर्व राज्य आणि केंद्रशासित प्रदेशांनी कार्यक्रम आखला आहे. भारताच्या जी-20 अध्यक्षपदाच्या कालावधीत शिक्षण क्षेत्रातील त्रुटींवर लक्ष केंद्रित करून त्या दूर करण्यावर लक्ष केंद्रीत करण्यात आले आहे. शिक्षण कार्यगटाच्या चौथ्या बैठकीद्वारे पुण्यातून शिक्षण पद्धती अधिक सहज, समावेशक आणि नाविन्यपूर्ण करण्यासाठीचा  संदेश दिला जाईल, असा विश्वास त्यांनी व्यक्त केला.

प्रा.भार्गव म्हणाले, भूक आणि दारिद्र्याची समस्या दूर करण्यासाठी मुलांना मूलभूत साक्षरता आणि संख्याशास्त्राचे ज्ञान आवश्यक आहे. याबाबतीत मागे पडल्याने शाळा सोडण्याचे प्रमाण वाढते. जगातील 56 टक्के आणि युरोपासारख्या प्रगत भागातही या विषयाचे ज्ञान नसलेल्यांची संख्या 14 टक्के आहे. विद्यार्थ्यांचे योग्य अध्ययन, प्रयोगशीलता, नवनिर्मितीचे ज्ञान आणि कौशल्य विकसित केल्यास शाश्वत विकासाचे उद्दीष्ट गाठता येईल. त्यासाठी वैशिष्ठ्यपूर्ण अभ्यासक्रमावर भर देत शिक्षकांची अध्यापन क्षमताही विकसीत करावी लागेल.

विद्यार्थ्यांच्या संतुलित आहार आणि आरोग्यावर भर दिल्यास शाळा सोडण्याचे प्रमाण कमी होऊ शकेल. लवचिक, बहुपर्यायी, मनोरंजक, क्रियाशीलतेवर आधारीत, आणि शोधप्रवृत्तीला चालना देणारा अभ्यासक्रम विकसीत करणे, लहान वयात विविध भाषांची ओळख करून देणे, तंत्रज्ञानाचा वापर निश्चित करणे आणि पूर्व प्राथमिक शिक्षणावर एकूण शिक्षण खर्चाच्या 10 टक्के खर्च करणे ‘एफएलएन’ साठी आवश्यक आहे असेही प्रा. भार्गव यांनी सांगितले.

युनिसेफचे चिफ ऑफ एज्युकेशन टेरी डर्नीअन यांनीदेखील ’मूलभूत साक्षरता आणि संख्याशास्त्र’ या विषयावर सादरीकरण केले.  विद्यार्थ्यांमध्ये मूलभूत साक्षरता आणि संख्याज्ञान विकसीत होण्यासाठी शिक्षणातील नाविन्यता, विविध घटकात समन्वय आणि नव्या शैक्षणिक पद्धती आवश्यक आहेत.  विद्यार्थ्यांचा प्रवासाचा वेळ कमी करणे, पूर्व प्राथमिक शिक्षणाची गुणवत्ता वाढविणे, शैक्षणिक साहित्याची उपलब्धता, शिक्षणाच्या गुणवत्तावृद्धीसाठी कार्यक्रम आखणे गरजेचे असल्याचे ते म्हणाले.

प्रास्ताविकात शिक्षण सचिव संजय कुमार यांनी चर्चासत्राविषयी माहिती दिली. ‘वसुधैव कुटुंबकम्’ या भारताच्या अध्यक्षतेखालील जी-20 परिषदेच्या घोषवाक्यानुसार जगभरात सर्वत्र समानरितीने गुणवत्तापूर्ण शिक्षण मिळावे यादृष्टीकोनातून कार्यगटाच्या पहिल्या तीन बैठकांमध्ये चर्चा करण्यात आली. चौथ्या बैठकीत ‘मूलभूत साक्षरता आणि संख्याशास्त्र’ या विषयावर चर्चा होणार असल्याने देशभरातील साडेचार कोटींपेक्षा अधिक विद्यार्थी, पालक आणि शिक्षकांपर्यंत हा विषय पोहोचविण्यात आला आहे. यानिमित्ताने आयोजित प्रदर्शनात 30 राज्ये आणि केंद्रशासित प्रदेशातील उत्तम शैक्षणिक संकल्पना प्रदर्शित करण्यात आल्याची माहिती त्यांनी दिली.

चर्चासत्राला जी-20 शिक्षण कार्यगटाच्या बैठकीसाठी आलेले सदस्य आणि शिक्षण क्षेत्रातील तज्ज्ञ व्यक्ती उपस्थित होते.

पाहुण्यांचे महाराष्ट्रीय पद्धतीने स्वागत

यावेळी पालकमंत्री चंद्रकांतदादा पाटील यांनी सर्व पाहुण्यांचे स्वागत केले आणि उपस्थित प्रतिनिधींशी संवाद साधला. बैठकीस उपस्थित झालेल्या परदेशी प्रतिनिधींचे ढोल ताशांचा गजरात स्वागत करण्यात आले.

पुणे : अखिल भारतीय तंत्र शिक्षण परिषद (एआयसीटीई) व ११४ वर्षांची शैक्षणिक व सामाजिक परंपरा असलेल्या पुणे विद्यार्थी गृह या संस्थांच्या वतीने संस्था चालकांसाठी राष्ट्रीय शिक्षण धोरण यावर चर्चासत्राचे आयोजन केले आहे. येत्या गुरुवारी (दि. २२ जून) पुणे विद्यार्थी गृहाचे सभागृह, मुक्तांगण इंग्लिश स्कुल, पर्वती दर्शन, पुणे येथे हे चर्चासत्र होणार आहे, अशी माहिती पुणे विद्यार्थी गृहाचे कार्याध्यक्ष सुनील रेडेकर यांनी पत्रकार परिषदेत दिली. प्रसंगी संचालक प्रा. राजेंद्र कडुसकर, पुणे विद्यार्थी गृहाच्या अभियांत्रिकी महाविद्यालयाचे प्र-प्राचार्य डॉ. मनोज तारांबळे आदी उपस्थित होते.
सुनील रेडेकर म्हणाले, “राष्ट्रीय शिक्षण धोरणाच्या अंमलबजावणीत शिक्षण संस्था, प्राध्यापक, शिक्षक, विद्यार्थी, पालक व औद्योगिक क्षेत्र यांची महत्वाची भूमिका आहे. या नव्या शिक्षण धोरणाची अंमलबजावणी करताना येणारी आव्हाने व त्यावर मात करण्यासाठीच्या उपाययोजना याविषयी संस्था चालकांना मार्गदर्शन करण्यासाठी हे चर्चासत्र महत्वपूर्ण ठरणार आहे. चर्चासत्राचे उद्घाटन राज्याचे उच्च व तंत्रशिक्षण मंत्री चंद्रकांत पाटील यांच्या हस्ते होणार आहे. ‘एआयसीटीई’चे अध्यक्ष प्रा. टी. जी. सीताराम, सावित्रीबाई फुले पुणे विद्यापीठाचे कुलगुरु डॉ. सुरेश गोसावी, महाराष्ट्र राज्याचे तंत्र व शिक्षण प्र-संचालक डॉ. विनोद मोहितकर आणि विविध विद्यापीठाचे कुलगुरु सदर कार्यक्रमासाठी उपस्थित राहणार आहेत. 
“एक दिवसाच्या या चर्चासत्रात सकाळ व दुपारच्या सत्रामध्ये सहा ज्येष्ठ वक्त्यांची व्याख्याने तसेच मार्गदर्शक तत्वे, महाराष्ट्रातील उच्च व तंत्र शिक्षणासंबंधी सर्व शिक्षण संस्थांचे संस्थाचालक व प्राचार्य यांचेसाठी असणार आहेत. महाराष्ट्रामध्ये ‘एनईपी-२०२०’ची अंमलबजावणी करण्यासाठी मुंबई विद्यापीठाचे कुलगुरु डॉ. आर. डी. कुलकर्णी, महाराष्ट्र राज्य संचालक उच्च शिक्षण विभाग व सुकाणू समितीचे अध्यक्ष डॉ. नितीन करमळकर, सदस्य डॉ. शैलेंद्र देवळाणकर, डॉ. अनिल राव, डॉ. अनिल सहस्त्रबुद्धे, महेश दाबक, राम सुब्रमण्यम् या तज्ज्ञांचे मार्गदर्शन असणार आहे. शेवटच्या सत्रामध्ये शिक्षण संस्थांना येणाऱ्या अडचणी आणि आव्हाने यासंबंधी तज्ज्ञांबरोबर प्रश्नोत्तरांच्या स्वरुपामध्ये आपापली मते मांडता येणार आहेत,” असे सुनील रेडेकर यांनी नमूद केले.
सुनील रेडेकर पुढे म्हणाले, “यातून संस्था चालकांना नवीन शैक्षणिक धोरण आत्मसात करुन नवीन तंत्रज्ञानाच्या दृष्टीने शिक्षक तयार करणे आणि शिक्षकांच्या माध्यमातून भविष्यात कुशल तंत्रज्ञानाने परिपूर्ण असे विद्यार्थी घडविण्याचे कार्य होण्यास मदत होणार आहे. येत्या काळामध्ये विविध देशांशी शैक्षणिक देवाण-घेवाण यासंबंधी तंत्र शिक्षणाशी निगडित अभ्यासक्रम तयार करणे, क्लस्टरच्या नियोजनाचा विचार, मुक्त विद्यापीठ, अभिमत विद्यापीठ, विद्यार्थी आदान-प्रदान इत्यादी गोष्टींवर सखोल चर्चा तसेच मार्गदर्शन होणार आहे.”
संस्थाचालक, प्राचार्य या चर्चासत्रात सहभागी होऊ शकणार असून, विनामूल्य नाव नोंदणी व सहभागासाठी डॉ. मनोज तारांबळे (९८२२११७४२७) यांच्याशी संपर्क साधण्याचे आवाहन संयोजकांनी केले आहे.

पुणे-कर्मयोगिनी कै. विजयाताई लवाटे यांनी एचआयव्ही संसर्गित मुला-मुलींचे संगोपन, आरोग्य आणि शिक्षण हे मानवतेचे अभूतपूर्व कार्य केले असून त्यांची पुढची पिढी तेवढ्याच आत्मीयतेने हे कार्य पुढे नेत आहे ही कौतूकास्पद बाब आहे. विशेष म्हणजे आता या संस्थेत लाभार्थींची संख्या कमी होत असून, हितचिंतकांची संख्या वाढत आहे. ही विशेष आनंदाची बाब आहे. अशा शब्दात ज्येष्ठ सामाजिक कार्यकर्ते व पर्यावरणतज्ञ डॉ. विश्वंभर चौधरी यांनी ‘मानव्य’ संस्थेच्या कार्याचा गौरव केला. ‘मानव्य’ संस्थेच्या २६ व्या वर्धापनदिनानिमित्त भूगाव येथील ‘गोकुळ’ या संस्थेच्या वास्तूत झालेल्या कार्यक्रमात प्रमुख पाहुणे म्हणून ते बोलत होते. ‘मानव्य’ चे अध्यक्ष शिरीष लवाटे कार्यक्रमाच्या अध्यक्षस्थानी होते. यावेळी मंचावर विश्वस्त सौ. उज्वला लवाटे आणि विश्वस्त विनया देसाई उपस्थित होत्या.
प्रारंभी दीपप्रज्वलनाने कार्यक्रमाची सुरुवात झाली. संस्थेतील विद्यार्थिनी साक्षी हिने गणेशवंदना सादर केली.
डॉ. विश्वंभर चौधरी पुढे म्हणाले की, विशेष म्हणजे या संस्थेतून बाहेर पडलेले विद्यार्थीच संस्थेत परत येवून संस्थेतला कारभार संभाळण्यात भरीव योगदान देत आहेत. हे अनुकरणीय ‘मॉडेलच’ मानावे लागेल.
‘मानव्य’ चे अध्यक्ष शिरीष लवाटे यांनी सर्वांचे स्वागत व प्रस्ताविक केले. ते म्हणाले की, ‘कर्मयोगिनी कै. विजयाताई लवाटे यांनी सुरु केलेल्या या कार्याचा आज वटवृक्षाएवढा विस्तार झाला आहे. संस्थेतील एचआयव्ही संसर्गित मुले आता योग्य संगोपन, औषधोपचार आणि शिक्षणामुळे स्वतःच्या पायावर उभी राहत आहेत. याचा संस्थेला मोठा अभिमान आहे. संस्थेतील विविध उपक्रमांची व नविन प्रकल्पांची माहिती देऊन. ‘जोपर्यंत एचआयव्ही संसर्गित मुलं-मुली आहेत तोपर्यंत ‘मानव्य’ चे काम चालतच राहिल असे सांगून, या कार्यास सहाय्य करणार्या  सर्वांचे त्यांनी आभार मानले.’
यासोबतच संस्थेतील विद्यार्थीनी प्रिती इंगळे बी.ए सायकॉलॉजि करत असून पेंटा फाऊंडेशन मार्फत निवड झाल्यानंतर ती आता ऑस्ट्रेलियातील ब्रिस्बेन येथे यंग रिपोर्टर म्हणूंन  कॉन्फरन्ससाठी जात असल्याचे सांगून शिरीष लवाटे यांनी टाळ्यांच्या कडकडाटात तिचे विशेष कौतूक केले.
यावेळी संस्थेतच मोठे झालेल्या व आता संस्थेच्या दैनंदिन कामकाजात सहभाग देणार्याक अमित, गणेश आणि शुभम यांच्यापैकी अमितचे मनोगत झाले. त्याने म्हटले की, या संस्थेत लहान वयातच दाखल केले गेले. आई-वडिलांचे प्रेम येथे लाभले. तसेच उत्तम औषधोपचार आणि शिक्षणामुळे ‘एचआयव्ही संसर्गित’ हा शब्दच जणू आमच्यातून हद्दपार झाला आहे. संस्थेतून बाहेर पडल्यावर तो परदेशी गेला. ते अनुभवही त्याने याप्रसंगी कथन केले.
यानंतर विविध सांस्कृतिक कार्यक्रम झाले. त्यात विद्यार्थ्यांनी उत्कृष्ट नृत्याविष्कार सादर केले. तसेच संस्थेतील सर्व विद्यार्थ्यांनी मिळून ‘आम्ही स्वच्छतेचे सारथी’ ही चित्तवेधक नाटिका समर्थपणे सादर केली. याचे लेखन, दिग्दर्शन करणार्याआ संस्थेबाहेरील मुग्धा थोरात, पराग बद्रिके आणि ऋतुजा खैरनार यांचाही विशेष सत्कार करण्यात आला. संस्थेच्या जमिला ढलाईत यांनी आभार प्रदर्शन केले. या संपूर्ण कार्यक्रमाचे नियोजन संस्थेतील विद्यार्थ्यांनीच केले होते. याप्रसंगी संस्थेच्या हितचिंतकांची मोठी गर्दी होती.

पुणे :
 विवेकानंद केंद्र कन्याकुमारी च्या मराठी प्रकाशन विभागातर्फे निर्मित ,सौ.दीपाली पाटवदकर लिखित ‘देशविदेशातील भारतीय संस्कृतीची स्वस्तिचिन्हे’  या पुस्तकाचा प्रकाशन समारंभ  पुण्यात  लेखक -समीक्षक सौ. शेफाली वैद्य, लेखक अभिजित जोग तसेच साप्ताहिक विवेकच्या संपादक सौ. अश्विनी मयेकर, किरण कीर्तने यांच्या हस्ते  झाले. रविवार, १८ जून २०२३ रोजी,सायंकाळी सहा वाजता स्वा. सावरकर अध्यासन केंद्र ( कर्वे रस्ता ) येथे हा कार्यक्रम झाला. 

शेफाली वैद्य म्हणाल्या,’ आग्नेय आशियामध्ये भारतीय संस्कृतीची स्वस्तीचिन्ह पावलोपावली दिसतात. तेथील आचार विचार, रितीरिवाजावर भारतीय संस्कृतीचा ठसा आहे. हे ठसे विनाशकारी नव्हती तर मंगलमय होती.भारताने जगाला काय काय दिले, याचा अभ्यास करताना आपण काय हरवलं याचीही नोंद ठेवली पाहिजे. आपण पूर्वी महान होतो, हा अभिमान मानून थांबता कामा नये, तर आपल्या देशाचा विस्तार कमी कमी का होत गेला, याचाही अभ्यास केला पाहिजे. आणि इथून पुढे सतर्क राहिले पाहिजे. धडा घेतला पाहिजे.आपला वारसा का आक्रसला याचा अभ्यास करून तसे पुन्हा होणार नाही,याची काळजी घेतली पाहिजे ‘.
‘ असत्यमेव जयते ‘ पुस्तकाचे लेखक अभिजीत जोग म्हणाले, ‘ आपण कोण होतो, कुठून आलो हा प्रवास म्हणजे इतिहास आहे. खरा इतिहास हीच आपली ओळख आहे. आपल्या देशाची खरी ओळख शोधली पाहिजे. भविष्यासाठी ते आवश्यक आहे.काही शक्तींनी चुकीची ओळख देशावर लादली.इस्लामी आक्रमकांनी वास्तूंचा विध्वंस केला, माणसं मारली. पण,ब्रिटिशांनी कारकुनी लादून आपल्याला गुलाम केले. संस्कृती विसरायला लावली. तत्पूर्वी सर्व ज्ञानशाखांचा पाया भारताने घातला, हे मान्य केले पाहिजे ‘.
‘सनावळयांच्या पालिकडे इतिहासाचा अभ्यास व्हायला हवा, पूरक वाचन म्हणून  अशी पुस्तके अभ्यासक्रमात घेतली पाहिजे ‘, असे मत अश्विनी मयेकर यांनी व्यक्त केले.
पुस्तकाच्या लेखिका दीपाली पाटवदकर यांनीही मनोगत व्यक्त केले. स्वाती कुलकर्णी, जयंत कुलकर्णी आदी मान्यवर उपस्थित होते. वसुधा करंदीकर यांनी प्रास्ताविक केले.  मंजुषा लिमये यांनी सूत्रसंचालन केले.दीप्ती खरे यांनी आभार मानले.
मनोवेधक प्रवास : ” स्वस्तिचिन्हे “

देव, धर्म, भाषा, शब्द, लिपी, ग्रंथ, कथा, काव्य, पंचांग, गणित, विज्ञान, कला या क्षेत्राद्वारे जी भारतीय संस्कृती देशविदेशात पोचली, तिथल्या मूळ संस्कृतीशी एकजीव झाली, तिचा मनोवेधक प्रवास ” स्वस्तिचिन्हे ” या ग्रंथातून लेखिकेने घेतला आहे. रामकथेच्या अशाच वाटचालीवरच्या रामकथामाला या ग्रंथानंतरचे लेखिकेचे हे नवे पुस्तक आहे.

कंबोडियाच्या ध्वजावर विष्णूचे मंदिर, थायलंडच्या राज्याच्या झेंड्यावर ऐरावत, इंडोनेशियामधील विद्यापीठांच्या लोगोवर गणपती, आग्नेय आशियाई देशांच्या समुद्री स्पर्धेचे चिन्ह समुद्रस्नान करणारा हनुमान,आशियाई तिरंदाजी खेळांचे चिन्ह धनुर्धारी राम, पांडव वंशातील मातेच्या पोटी घटोत्कचाचा पुनर्जन्म आणि त्याचा बदला घेण्यासाठी आलेला चिरंजीव अश्वत्थामा यांची कहाणी सांगणारा इंडोनेशियाचा 2021 चा चित्रपट ” क्षत्रिय देव घटोत्कच अशा अनेक गोष्टींचा या पुस्तकात समावेश आहे.

पुणे, दि. १७: शिक्षण, मूलभूत साक्षरता आणि संख्याशास्त्र, डिजिटल उपक्रम, संशोधन आणि कौशल्य विकासातील सर्वोत्तम पद्धती आदींचे सादरीकरण असलेल्या मल्टीमीडिया प्रदर्शनाचे सावित्रीबाई फुले पुणे विद्यापीठ येथे केंद्रीय शिक्षण राज्यमंत्री अन्नपूर्णा देवी यांच्या हस्ते उद्घाटन करण्यात आले.

जी- २० अंतर्गत शिक्षण कार्यगटाच्या चौथ्या बैठकीच्या पार्श्वभूमीवर या प्रदर्शनाचे आयोजन करण्यात आले आहे. या उद्घाटन प्रसंगी राज्याचे उच्च व तंत्र शिक्षण मंत्री चंद्रकांतदादा पाटील, शालेय शिक्षण मंत्री दीपक केसरकर, भारत सरकारच्या शालेय शिक्षण विभागाचे सचिव संजय कुमार, सावित्रीबाई फुले पुणे विद्यापीठाचे कुलगुरू डॉ. सुरेश गोसावी, विद्यापीठ व्यवस्थापन परिषद सदस्य रविंद्र शिंगणापूरकर, समन्वयक राजेश पांडे आदी उपस्थित होते.

राष्ट्रीय शैक्षणिक धोरणाला अनुसरून कृती आधारित शिक्षण पद्धतीद्वारे मुलांना आनंददायी आणि गुणवत्तापूर्ण शिक्षण मिळावे या उद्देशाने भरविण्यात आलेल्या या प्रदर्शनात विविध शैक्षणिक साधने आणि शिक्षकांच्या गुणवत्ता वाढीसाठी उपक्रमांचा समावेश आहे. आदर्श बालवाडी, ५५ भाषांतील पुस्तके, आयुकाद्वारे निर्मित ४० विज्ञान प्रयोगांची माहिती देणारी ‘द वेलो ग्यानेश्वरी’ सायकल, खेळ आणि अभ्यासाचे महत्त्व, कौशल्य अभ्यासक्रम, भारतीय पारंपरिक खेळ, पूर्व प्राथमिकसाठी डिजिटल अभ्यासक्रम, वाचन, गणन व लेखन कौशल्य विकसित करण्यासाठी खेळणी, प्रात्यक्षिके, कोडी, सामान्यज्ञान, प्रश्नमंजूषा, गोष्टी, कविता, डिजिटल साहित्य आदीची रेलचेल प्रदर्शनात आहे.

पायाभूत साक्षरता आणि संख्या ज्ञानाबरोबर मुलांचा गणिती व वैज्ञानिक दृष्टिकोन, कौशल्य शिक्षण, आकलन, निरीक्षण, उपयोजन, विश्लेषण, संश्लेषण, निर्णय प्रक्रिया या मूलभूत प्रक्रिया विकसित व्हाव्यात यासाठी शैक्षणिक साहित्य येथे उपलब्ध आहे. भारतीय ज्ञान परंपरेबरोबर आधुनिक तंत्रज्ञानावर आधारित नाविन्यपूर्ण शैक्षणिक साधनांचा प्रदर्शनात समावेश आहे. प्रदर्शनात शिक्षणसंस्था, उत्पादक, स्टार्टअप आदींची सुमारे १०८ दालने असून २२ जूनपर्यंत सकाळी १० ते सायंकाळी ६ यावेळेत पुणे विद्यापीठातील खाशाबा जाधव क्रीडा संकुलात प्रदर्शन सर्वांसाठी विनामूल्य खुले राहणार आहे. यापैकी ३६ राज्यांची दालनेदेखील आहेत.

प्रदर्शनात सहभागी प्रमुख संस्था
युनिसेफ, राष्ट्रीय कौशल्य विकास महामंडळ (एनएसडीसी), एनसीईआरटी, नॅशनल बुक ट्रस्ट, भारतीय नॉलेज सिस्टम्स्‌‍ डिव्हिजन (आयकेएस), मायक्रोसॉफ्ट, गुगल, आयुका, आयसर, विविध स्टार्ट अप यांच्यासह विविध राज्य शासनांचे शिक्षण विभाग अशा एकूण १०८ प्रदर्शन दालनांचा प्रदर्शनात सहभाग आहे.

प्रदर्शनाचे महत्व:
पायाभूत क्षेत्रातील गुणवत्तापूर्ण आनंददायी शिक्षणासाठी हे प्रदर्शन उपयुक्त आहे. मुलांचा शारीरिक, मानसिक, भावनिक, आत्मिक विकास, बौद्धिक व कौशल्य वृद्धी यासह लेखन, वाचन व गणन या प्रक्रिया सोप्या पद्धतीने शिकण्यासाठीची कौशल्ये येथे प्रदर्शित करण्यात आली आहेत. आकलन, निरीक्षण, उपयोजन, विश्लेषण, संश्लेषण, निर्णय प्रक्रिया या मूलभूत प्रक्रिया विकसित होण्यासाठी या प्रदर्शनातील बाबी सहाय्यभूत ठरणार आहेत.
000

-अजित फाटके पाटील यांचे मत

पुणे-महाराष्ट्रातील राजकारण हे घराणेशाही भावकी आणि खोके- बोके यामध्ये गुरुफटले गेले असून जनतेचा आवाज प्रस्थापित विरोधी पक्षांच्या माध्यमातूनही उमटत नाही. त्यामुळे आम आदमी पार्टीच जनहिताचे राजकारण करू शकते असे आप चे अजित फाटके पाटील यांनी स्वराज्य संवाद सभेदरम्यान सांगितले.

मागील पंधरवड्यामध्ये आम आदमी पार्टीने पंढरपूर ते रायगड अशी आठ जिल्ह्यातून जाणारी स्वराज्य यात्रा काढली होती. आता त्यानंतर प्रभाग पातळीवरती संवादासाठी विविध ठिकाणी सभा घेतल्या जात आहेत. शुक्रवारी संध्याकाळी फुले वाडा येथे सभा घेण्यात आली. पाऊस असतानाही त्यास स्थानिक नागरिकांनी उत्तम प्रतिसाद दिला.

महाराष्ट्र मध्ये चार वर्ष सर्वचपक्ष हे एकमेकांशी सत्तेसाठीच्या तडजोडी करताना दिसले आहेत. त्यामध्ये कुठली विचारधारा अथवा समान कार्यक्रमही दिसत नाही. त्यामुळे एखाद्या सत्ताधारी पक्षाला मतदारांचे प्रश्न सोडवण्यास अपयश आल्यावर पर्याय म्हणून असणारे विरोधी पक्ष हेही हा प्रश्न सोडवत नाहीत असा अनुभव सध्या महाराष्ट्र घेत आहे. एकमेकांची उणिदुणी काढणे, शाब्दिक कुरघोडी करणे यामध्येच हे सर्व नेते मग्न आहेत. प्रस्थापित पक्ष आपले प्रश्न सोडवेल ही श्रद्धा भाबडी ठरेली आहे. आता जनतेने आपला आवाज उठवणाऱ्या आम आदमी पार्टी याला संधी देण्याची गरज आहे. दिल्ली मधली कामे ही प्रत्यक्षामध्ये दिसलेली आणि जगभर कौतुक झालेली अशी असून गुजरात मॉडेल प्रमाणे ती फसवी नाहीत. महिलांसाठी मोफत बस योजना, मोफत उत्तम शिक्षण योजना घरोघरी घरपोच कागदपत्र सेवा, मोफत वीज अशी पंजाब आणि दिल्लीमध्ये केलेल्या कामांची मोठी यादी आहे असे यावेळी जिल्हा अध्यक्ष मुकुंद किर्दत यांनी सांगितले.

फुलेवाडा परिसरातील जनतेचे राहणीमान उंचावण्याचे सर्व प्रयत्न आम आदमी पार्टी करेल असे आश्वासन यावेळेस शेखर ढगे यांनी दिले.
आनंद अंकुश यांनी सरकारी तिजोरीत जमा होणारा कर हा मुख्यत्वे मध्यमवर्गीय आणि गरीब कुटुंबाकडूनच जमा होत असल्याने तो सरकारने कल्याणकारी कामांसाठी राबवावा अशी मागणी केली.
तरुणांना हातास काम ही शासनाची जबाबदारी आहे आणि त्यासाठी उत्तम कौशल्य प्रशिक्षण देण्याची गरज असल्याचे प्रतिपादन इरफान रोड्डे यांनी केले. रुबीना काझमी यांनी दिल्ली मॉडेलमुळे महिलांचे सक्षमीकरण झाल्याचे सांगितले.

यावेळेस एकनाथ ढोले यांनी प्रास्ताविक केले व किरण कद्रे यांनी सूत्रसंचालन केले.पैठणकर यांनी आभार मानले.