पाहुण्यांनी जाणून घेतला इतिहास

पुणे दि. २०: जी-२० बैठकीसाठी आलेल्या प्रतिनिधींनी आज पुण्यातील वारसास्थळांना भेट दिली. परदेशी पाहुण्यांसाठी ‘हेरिटेज वॉक’ अंतर्गत शनिवार वाडा, लाल महाल आणि नाना वाड्याला भेट आयोजित करण्यात आली होती. शनिवारवाड्याची भव्यता पाहून पाहुणे अचंबित झाले, तर लाल महालातील छत्रपती शिवाजी महाराजांच्या शौर्याचा इतिहास जाणून घेत स्तिमितही झाले.

सकाळी शनिवारवाड्यापासून या भेटीला सुरूवात झाली. शनिवारवाड्याची भव्यता, प्रवेशद्वार, विस्तारलेला परिसर प्रतिनिधींनी आपल्या मोबाईलमध्ये टिपला. येथील इतिहासाविषयी उत्सुकतेने त्यांनी मार्गदर्शकांना प्रश्नही विचारले. अशा ऐतिहास स्थळांना भेट देण्याची संधी दिल्याबद्दल प्रतिनिधींनी प्रशासनाला धन्यवाद दिले. येथे पारंपरिक ढोल ताशाच्या गजरात पाहुण्यांचे स्वागत करण्यात आले.

लाल महल येथे पारंपरिक चौघड्याच्या सुरावटीत पाहुण्यांचे स्वागत करण्यात आले. राजमाता जिजाऊ माँसाहेब आणि बाल शिवाजी महाराजांचा पुतळा पाहिल्यानंतर त्यामागचा इतिहासही त्यांनी जाणून घेतला. तर काहींनी महालातील राजमाता जिजाऊंच्या पुतळ्यालाही अभिवादन केले. महालातील छायाचित्रेही त्यांनी आपल्या मोबाईमध्ये टिपली.

भेटीच्या अखेरच्या टप्प्यात प्रतिनिधींनी नाना वाडा येथे भेट देऊन तेथील इतिहास जाणून घेतला.

शनिवार वाडा येथे पिंगळा, वासुदेव,
पारंपरिक गोंधळी कलाकारांनी कलेचे सादरीकरण केले. गोंधळी बांधवांनी संकेतभाषा कला असलेली करपल्लवीचे सादरीकरण करत बोटांच्या संकेतातून पाहुण्यांची नावे ओळखल्याने पाहुण्यांनी आश्चर्य व्यक्त केले. संबळ, हलगीचे सादरीकरण करण्यात आले. पारंपरिक कुंभार कलेअंतर्गत चाकावर मातीची भांडी करण्याची कला प्रदर्शित करण्यात आली. यावेळी पाहुण्यांना नंदीबैलही पाहता आला. पाहुण्यांनी या कलाकारांसोबत, नंदीबैलासोबत छायाचित्रे, मोबाईलद्वारे सेल्फी काढून घेतल्या. शनिवारवाडा आवारात लावण्यात आलेल्या आर्टिफिशयल ज्वेलरी, कलाकुसरीच्या वस्तूंच्या स्टॉलमधील बांगड्या, कानातील आभूषणांनी महिला प्रतिनिधींना आकर्षित केले.

अजित आपटे, संदीप गोडबोले, सुप्रिया शेलार यांनी पाहुण्यांना पुण्याचा इतिहास आणि वारसा स्थळांबाबत माहिती दिली.

यावेळी महानगरपालिका अतिरिक्त आयुक्त विकास ढाकणे, पोलीस उपायुक्त संदीप सिंह गिल, महानगरपालिकेचे शहर अभियंता प्रशांत वाघमारे आदी उपस्थित होते.
000

शुक्रवार पेठेत राहत होते दोघेच …

पुणे-६२ वर्षे वयाच्या निवृत्त बँक कर्मचाऱ्याने आपल्या ५८ वर्षीय पत्नीची हत्या करून स्वतः गळफास घेऊन आत्महत्या केल्याचा प्रकार पुण्यातील शुक्रवार पेठेत घडला. खडक पोलीस ठाण्यातील सहायक पोलीस निरीक्षक लक्ष्मण सोनावणे यांनी याप्रकरणी पोलिसात तक्रार दाखल केली आहे आणि पोलीस निरीक्षक विनायक पाटणकर अधिक तपास करत आहेत.

हेमंत रामकृष्ण थोरात (वय ६२,रा.स.नंबर २९०,आशा को ऑप. सोसायटी ,शुक्रवार पेठ पुणे )असे या निवृत्त बँक कर्मचाऱ्याचे नाव आहे. हेमंत हे आपली पत्नी सुनीता (वय ५८ ) यांच्या समवेत येथे ३ क्रमांकाच्या सदनिकेत राहत होते , मुले त्यांच्यासमवेत राहत नव्हती .काल्साकली पावणे आठ पूर्वी म्हणजे रात्रीच्या वेळेत हा प्रकार घडल्याचे पोलिसांनी सांगितले. हेमंत यांनी प्रथम आपल्या पत्नीला गळा आवळून ठार मारले त्यानंतर स्वतः दोरीने गळफास घेऊन आत्महत्या केली . मानसिक त्रास सहन न झाल्याने हेमंत यांच्या कडून हे कृत्य घडले असावे असे पोलिसांचे म्हणणे आहे.

पुणे-पुण्यातील खराडी इथे राहणाऱ्या सिद्धार्थ किशोर भांगे या एका भाजी विक्रेत्याच्या मुलाने यूपीएससीची सीएसई परीक्षेत मोठं यश मिळवलं असून, पालकमंत्री चंद्रकांतदादा पाटील यांनी त्याचे कौतुक केले आणि आज आपल्या निवासस्थानी सिद्धार्थचा सत्कार करुन, भावी वाटचालीस शुभेच्छा दिल्या.

स्पर्धात्मक परीक्षांमध्ये UPSC ची नागरी सेवा परीक्षा अर्थात Civil Services सर्वात अवघड परीक्षा मानली जाते. या परीक्षेमधील यशासाठी जसे परीक्षार्थीचे बौद्धिक श्रम महत्त्वाचे असतात. तसेच त्याच्या सभोवतालचे वातावरणही महत्त्वाचे असते.

महाराष्ट्रातील यंदाच्या सर्वच यूपीएससी यशवंतांचे कौतुक आहे. मात्र सभोवतालचे वातावरण आव्हानात्मक असतानाही केवळ आपल्या आई-वडिलांवरील श्रद्धा, स्वतःवरील विश्वास आणि आपल्या अभ्यासातील सातत्य यांच्या जोरावर यशश्री खेचून आणणाऱ्या पुण्याच्या खराडी भागातील सिद्धार्थ भांगे याचे सर्वच स्तरातून विशेष कौतुक होत आहे.

सिद्धार्थच्या या यशाबद्दल आज पालकमंत्री चंद्रकांतदादा पाटील यांनीही कौतुक केले असून, आपल्या कोथरुड मधील निवासस्थानी भेट घेऊन सत्कार केला. तसेच भविष्यातील वाटचालीस शुभेच्छा दिल्या.

स्पर्धात्मक परीक्षांमध्ये UPSC ची नागरी सेवा परीक्षा अर्थात Civil Services सर्वात अवघड परीक्षा मानली जाते. लाखो विद्यार्थी ही परीक्षा उत्तीर्ण होण्यासाठी कठोर मेहनत घेत असतात. पण सिद्धार्थ भांगे याचे विशेष कौतुक वाटते. कारण, प्रतिकूल परिस्थितीशी दोन हात करुन, त्याने हे यश संपादन करुन, पालकांच्या कष्टाचे खरे चीज केले आहे. त्याने भविष्यातही आपल्या कार्यकर्तृत्वाच्या बळावर नावलौकिक कमावावा. सिद्धार्थचे हे यश अनेक तरुणांना प्रेरणा देईल यात शंका नाही, अशा शुभेच्छा दिल्या.

यावेळी भाजपा कोथरूड मंडल अध्यक्ष पुनीत जोशी, कोल्हापूरच्या विद्या प्रबोधिनीचे संचालक श्री राजकुमार पाटील आणि सिद्धार्थचे पालक उपस्थित होते.

ग्रॅव्हिट्स फाउंडेशनतर्फे चार लाख बालकांपर्यंतपोहोचला ‘गुड टच बॅड टच’ उपक्रमउषा काकडे यांची माहिती; युनिसेफ व ग्रॅव्हिट्स फाउंडेशनतर्फे राज्यस्तरीय परिषद
पुणे : “बालकांचे आरोग्य, विकास, सुरक्षितता, शिक्षण यासाठी युनिसेफ व भारत सरकार यांच्यात सहकार्य करार झाला आहे. याअंतर्गत बालकांचे लैंगिक शोषण रोखण्यासाठी उपयुक्त ठरलेला ग्रॅव्हिट्स फाउंडेशनचा ‘गुड टच बॅड टच’ उपक्रम बालकल्याण व शिक्षण विभागाने राज्यभर राबवावा,” अशी सूचना महाराष्ट्र विधान परिषदेच्या उपसभापती डॉ. नीलम गोऱ्हे यांनी आज येथे केली. बाल न्याय अधिनियम आणि बालकांच्या सुरक्षिततेचे इतर कार्यक्रम मराठीमधून उपलब्ध करून देण्याची मोहीम हाती घ्यावी, असे आवाहनही त्यांनी केले.
ग्रॅव्हिटस फाउंडेशनच्या संस्थापिका-अध्यक्षा उषा काकडे यांच्या पुढाकाराने युनिसेफ व ग्रॅव्हिटस फाउंडेशनतर्फे ‘बाल आरोग्य, विकास व त्यांचे अधिकार’ या विषयावरील राज्यस्तरीय परिषदेच्या उद्घाटनावेळी डॉ. गोऱ्हे बोलत होत्या. या परिषदेला युनिसेफच्या महाराष्ट्र प्रमुख राजेश्वरी चंद्रशेखर, ‘सिंबायोसिस’च्या संचालिका डॉ. विद्या येरवडेकर, दिग्दर्शिका फराह खान, अभिनेत्री पद्मिनी कोल्हापुरे, इंडियन मेडिकल असोसिएशन, महाराष्ट्राचे माजी अध्यक्ष डॉ. अविनाश भोंडवे, बालनाट्य दिग्दर्शक संजय हळदीकर, बालरोगतज्ज्ञ डॉ. अमिता फडणीस, ऍड. दिव्या चव्हाण, ट्रान्सजेंडर ॲक्टीविस्ट लक्ष्मीनारायण त्रिपाठी, महिला व बालकल्याण उपायुक्त राहुल मोरे, अतिरिक्त पोलीस महासंचालक (कारागृह) अमिताभ गुप्ता, सामाजिक कार्यकर्त्या जुगनू गुप्ता, ज्येष्ठ पत्रकार अरुण खोरे यांनी विचार मांडले. बालकांसाठी काम करणारे कार्यकर्ते, सामाजिक संस्थांचे प्रतिनिधी यावेळी उपस्थित होते.
उषा काकडे म्हणाल्या, “युनिसेफच्या सहकार्याने बालहक्कांबद्दल जागरूकता करण्याच्या उद्देशाने ही परिषद महत्वाची ठरली. बाल आरोग्य व विकास, बालकांची लेखन-वाचन क्षमता आणि पाणी व्यवस्थापनात युवकांचा सहभाग यावर चर्चा झाली. ग्रॅव्हिट्स फाउंडेशनतर्फे ‘गुड टच, बॅड टच’ उपक्रमांतर्गत आजवर चार लाख मुलांना याविषयी मार्गदर्शन केले आहे. युनिसेफच्या सहकार्याने सोलापूर, कोल्हापूर व नागपूर येथे तीन महिन्यांनी परिषद घेणार आहोत.”
अमिताभ गुप्ता म्हणाले, “बालकांना पोलिसांचा आधार वाटावा, यासाठी ‘चाईल्ड फ्रेंडली पोलिस स्टेशन’ची संकल्पना राबविली. कायदा सक्षम आहे. यंत्रणाही योग्य काम करते. परंतु, गुन्हा घडण्याआधी तो समजण्यासाठी संवाद, माहिती नेटवर्क चांगले असावे.”
फराह खान म्हणाल्या, “सामाजिक प्रश्न मांडण्यासाठी चित्रपट प्रभावी माध्यम आहे. बालकांच्या आरोग्य, सुरक्षिततेच्या जनजागृतीसाठी शॉर्टफिल्म, डॉक्युमेंटरी, रील याचा उपयोग करावा.”
पद्मिनी कोल्हापुरे म्हणाल्या, “आपले मूल चांगला नागरिक घडावे, यासाठी पालकांनी संस्कार, चांगला आहार, शिकवण द्यावा. मूल जन्मल्यानंतर करिअर पेक्षा पालकत्व गांभीर्याने घ्यावे. पालकांचे प्रेम बालकाचा मूलभूत अधिकार आहे.”
लक्ष्मीनारायण त्रिपाठी म्हणाल्या, “भारतामध्ये तृतीयपंथियांसाठी कायदे, धोरण चांगले आहे. मात्र, समाजाचा दृष्टीकोन अजूनही बदलेला नाही. युनिसेफने स्त्री-पुरुष यापलीकडे जाऊन ट्रान्सजेंडरचाही विचार करायला हवा.”
डॉ. अमिता फडणीस म्हणाल्या, “चांगले पालकत्व, मुलांचे मानसिक आरोग्य, चांगला आहार यावर लक्ष केंद्रित करावे. जडणघडणीच्या वयात त्यांना चांगली संगत, मुलांशी मुक्तसंवाद, प्रोत्साहन द्यायला हवे.”
राहुल मोरे म्हणाले, “वेगवेगळ्या घटकांतील मुलांचे प्रश्न वेगवेगळे आहेत. त्यामुळे वस्ती, गावपातळीपासून ते राज्य पातळीवर जनजागृतीचे कार्यक्रम राबवावेत. त्यांचा सर्वांगीण विकास, सुरक्षित वातावरण मिळावे.”
डॉ. विद्या येरवडेकर म्हणाल्या, “प्रत्येक मुलीचा आदर करण्याचा संस्कार पालक व शिक्षकांनी द्यावा. मुलांशी मोकळेपणाने संवाद व त्यांचे म्हणणे ऐकून घ्यायला हवे. मोबाईल, इंटरनेटचा वापर पालकांनी मर्यादित करावा.”
संजय हळदीकर म्हणाले, “बालनाट्याच्या माध्यमातून जागृतीचे प्रभावी काम होईल. नाटक ही बालकांची सांस्कृतिक गरज असून, ‘गुड टच बॅड टच’ यासारखे विषय नाट्य व पथनाट्यातून मांडणार आहे.”
ऍड. दिव्या चव्हाण यांनी सांगितले की, न्यायालयातील वातावरण बालस्नेही व्हावे, यासाठी ‘चाईल्ड फ्रेंडली कोर्ट’ कल्पनेचा विचार व्हावा.” जुगनू गुप्ता, स्वाती मोहापात्रा, अरुण खोरे यांनीही मनोगत व्यक्त केले. लीना सलढाणा-जोशी यांनी सूत्रसंचालन केले. संघमित्रा खोरे यांनी आभार मानले.

व्यापारी एकता दिनानिमित्त पुरस्कार वितरण समारंभाचे आयोजन ; पद्मविभूषण डॉ. कांतीलाल संचेती आणि माजी आमदार मेधा कुलकर्णी यांची प्रमुख उपस्थिती

पुणे : स्टेशनरी कटलरी अ‍ँड जनरल मर्चंटस् असोसिएशनतर्फे व्यापारी एकता दिनानिमित्त पुरस्कार वितरण समारंभाचे आयोजन करण्यात आले आहे. असोसिएशनतर्फे देण्यात येणारा व्यापार भूषण पुरस्कार यंदा सचिन शामसुंदर मालपाणी यांना प्रदान करण्यात येणार आहे. याशिवाय उत्कृष्ट विक्रेता, उत्कष्ट महिला व्यापारी, कै.साधनाताई गोरे स्मृती पुरस्कार देखील प्रदान करण्यात येणार आहेत. सोमवार, दिनांक २६ जून रोजी सायंकाळी ५.३० वाजता एस.एम.जोशी सभागृहात हा समारंभ होणार आहे, अशी माहिती असोसिएशनचे अध्यक्ष शिरीष बोधनी  यांनी पत्रकार परिषदेत दिली.
पत्रकार परिषदेला असोसिएशनचे  उपाध्यक्ष सचिन जोशी, सचिव गणपतराज जैन, खजिनदार मोहन कुडचे, मदनसिंह रजपूत, सूर्यकांत पाठक, किशोर चांडक, अनिल प्रभुणे, नितीन पंडीत, सुरेश नेऊरगावकर आदी उपस्थित होते.
पुरस्कार वितरण कार्यक्रमाच्या अध्यक्षस्थानी पद्मविभूषण डॉ. कांतीलाल संचेती हे असणार आहेत. तर, प्रमुख पाहुणे म्हणून माजी आमदार मेधा कुलकर्णी उपस्थित राहणार आहेत. व्यापार भूषण पुरस्काराचे स्वरुप पुणेरी पगडी, सन्मानचिन्ह, सन्मानपत्र, शाल, श्रीफळ असे आहे. पुरस्काराचे यंदा २६ वे वर्ष आहे.
शिरीष बोधनी म्हणाले, दरवर्षी २५ मे या व्यापारी एकता दिनाचे औचित्य साधून पुरस्कार वितरण समारंभाचे आयोजन करण्यात येते. व्यापारातून समृद्धी साधताना आपले कर्तृत्व सिद्ध करणा-या असामान्य व्यक्तिमत्त्व असलेल्या व्यापा-यांना विविध पुरस्काराने सन्मानित करण्यात येते.
यंदाच्या वर्षी उत्कृष्ट विक्रेता पुरस्कार शनिवार चौकातील जीवन जनरल स्टोअर्स चे राजेंद्र सुगंधी, उत्कृष्ट महिला व्यापारी पुरस्कार शनिवार मंडई रस्त्यावरील दीप इलेक्ट्रिकल्स च्या नेहा शहा, कै. साधनाताई गोरे स्मृती पुरस्कार रंजीता होडे, फिनिक्स पुरस्कार सखी तुळशीबागचे गणेश रामलिंग आणि उत्कृष्ट दुकान पुरस्कार तुळशीबाग येथील श्री ज्वेलर्स चे चंद्रशेखर खोडके यांना प्रदान करण्यात येणार आहे. या पुरस्कारांचे स्वरुप  सन्मानचिन्ह, सन्मानपत्र, श्रीफळ असे असणार आहे.
दुकानातील स्वच्छता, सादरीकरण, आधुनिकता आणि ग्राहकांशी संबंध आदी गोष्टी पाहिल्या जातात. तसेच व्यापा-यांच्या उद्योगातील वाढत्या प्रगतीचा आलेख पाहून पुरस्कारार्थींची निवड समितीतर्फे केली जाते. यापूर्वी गिरीकंद ट्रॅव्हल्स चे विश्वास जोशी, गुडलक सेल्स डेपोचे खिमजी गाला, दोराबजी अ‍ँड कंपनीचे थ्रिटी पूनावाला आणि फरशिद पटेल, कॉटन किंगचे प्रदीप मराठे, ग्राहक पेठचे सूर्यकांत पाठक, रांका ज्वेलर्सचे फतेचंद रांका, सुदर्शन स्टेशनरीचे कृष्णचंद्रजी आर्य (करमचंदानी), लक्ष्मीनारायण चिवडा कंपनीचे बाबूशेठ डाटा, जवाहर ट्रेडिंग कंपनीचे चकोर गांधी, जयराज ग्रुपचे राजेश शहा आदींना व्यापारभूषण पुरस्काराने सन्मानित करण्यात आले आहे.

पुणे- एमपीएससीमधील टॉपर दर्शना दत्तू पवार हिचा संशयास्पद मृत्यू झाल्याने पुण्यासह राज्यात एकच खळबळ उडाली आहे. राजगडाच्या पायथ्याशी कुजलेल्या अवस्थेत दर्शनाचा मृतदेह आढळून आला. त्यानंतर आता या प्रकरणात एक मोठी बातमी समोर आली आहे. दर्शनासोबत गेलेला तिचा मित्र राहुल हांडोरे हादेखील बेपत्ता झाल्याचे पोलिसांच्या हाती आलेल्या CCTV फुटेजवरून लक्षात आले आहे. एवढेच नव्हे तर, अनोखळी व्यक्तीच्या मोबाईलवरून राहुलने कुटुंबियांना घडलेल्या घटनेत आपण काहीही केले नसल्याचे सांगितले आहे. जर राहुलने काहीच केलेले नाही असे जर तो सांगत असेल तर, तो अद्यापपर्यंत पोलिसांसमोर का आला नाही? असा प्रश्न यामुळे उपस्थित झाला आहे. राहुल समोर येईपर्यंत दर्शनाच्या मृत्युचे कारण गुलदस्त्यात राहणार आहे.

दरम्यान, दर्शनाचा कुजलेल्या अवस्थेतील मृतदेह आढळून आल्याने मोठी खळबळ उडालेली असताना आता राजगडावरील सीसीटीव्ही फुटेज समोर आले आहे. या फुटेजमध्ये दर्शना आणि राहुल दोघेही 12 जून रोजी दुचाकीवरून राजगडावर गेले होते. येथे गेल्यानंतर दोघांनी गड चढण्यास सुरूवात केली. मात्र, 10 वाजण्याच्या सुमारास गडावरून राहुल एकटाच परततांना दिसून येत आहे. ही सर्व माहिती गडाशेजारी असलेल्या एका हॉटेलच्या सीसीटीव्ही फुटेजच्या माध्यमातून समोर आली असून, राहुल घटनेपासून बेपत्ता आहे. दुसरीकडे, राहुल गडावरून एकटाच खाली येत असल्याचे समोर आले असून, पोलिसांकडून राहुलचा कसुन शोध घेतला जात आहे. त्याच्या मोबाईलचं लोकेशन बाहेरील राज्यात दिसत आहे.

बहुमाध्यम प्रदर्शन पाहून परदेशी पाहुणे प्रभावित

पुणे, दि. १९: सावित्रीबाई फुले पुणे विद्यापीठ येथे ‘जी-२०’ शिक्षण कार्यगटाच्या चौथ्या बैठकीनिमित्त ‘संमिश्र शिक्षणाद्वारे मूलभूत साक्षरता आणि संख्याशास्त्र ज्ञानाची सुनिश्चिती’ या विषयावर आयोजित चर्चासत्राअंतर्गत आज तीन वेगवेगळ्या सत्रात विविध विषयांवर चर्चा करण्यात आली.

पहिल्या सत्रात भारत सरकारच्या शालेय शिक्षण विभागाचे सचिव संजय कुमार यांच्या अध्यक्षतेखाली, ‘मिश्र पद्धतीने मूलभूत साक्षरता आणि संख्याशास्त्र शिकवण्याचे शिक्षण, दृष्टिकोन आणि अध्यापनशास्त्र’ या विषयावर चर्चा झाली. त्यामध्ये स्पेन, ऑस्ट्रेलिया, संयुक्त अरब अमिरात, इंडोनेशिया आणि दक्षिण आफ्रिकेतील सदस्य चर्चेत सहभागी झाले.

दुसऱ्या सत्रामध्ये ‘मूलभूत साक्षरता आणि संख्याशास्त्राचा अभ्यास घरामध्ये राहून (होम लर्निंग) करताना पालक, मुलांची काळजी घेवून त्यांना सांभाळणारे आणि समुदायातील सदस्यांच्या भूमिका’ या विषयावर चर्चासत्राचे आयोजन केले होते. यामध्ये सामाजिक-भावनिक कौशल्ये आणि मुलांचे आरोग्य आणि पोषण, याविषयावर वक्त्यांनी विचार मांडले. महिला आणि बाल कल्याण मंत्रालयाच्या अतिरिक्त सचिव अदिती दास राउत यांच्या अध्यक्षतेखाली या चर्चासत्राचे आयोजन करण्यात आले. यावेळी अमेरिका आणि चीनचे प्रतिनिधी गट चर्चेत सहभागी झाले.

तिसरे सत्र केंद्रीय माध्यमिक शिक्षण मंडळाच्या (सीबीएसई) अध्यक्षा निधी छिब्बर यांच्या अध्यक्षतेखाली पार पडले. हे चर्चासत्र बहुभाषिकतेच्या संदर्भात मूलभूत साक्षरता आणि संख्याशास्त्रासाठी शिक्षकांची क्षमता बांधणी आणि प्रशिक्षण यावर केंद्रित होते. या सत्रातील चर्चेत ब्रिटन, आर्थिक सहकार्य आणि विकास संघटना (ओईसीडी), सौदी अरेबिया आणि युनिसेफचे प्रतिनिधी सहभागी झाले होते.

‘पायाभूत साक्षरता आणि संख्याशास्त्र’ प्रदर्शनाला प्रतिनिधींची भेट
दरम्यान ‘मूलभूत साक्षरता आणि संख्याशास्त्र’ या विषयावरील दोन दिवसीय राष्ट्रीय परिषदेस जोडून आयोजित शिक्षण, मूलभूत साक्षरता आणि संख्याशास्त्र, डिजिटल उपक्रम, संशोधन आणि कौशल्य विकासातील सर्वोत्तम पद्धती आदींचे सादरीकरण असलेल्या बहुमाध्यम प्रदर्शनाला प्रदर्शनाला ‘जी-२०’ बैठकीला आलेल्या देश विदेशातील प्रतिनिधींनी भेट देऊन विविध दालनांची माहिती घेतली.

सावित्रीबाई फुले पुणे विद्यापीठ येथे आयोजित या प्रदर्शनात भारतातील शैक्षणिक क्षेत्रातील नवनवीन तंत्रज्ञान आणि उपक्रमात परदेशी प्रतिनिधींनी विशेष रुची दाखविली. भारतातील संशोधन आणि शिक्षण क्षेत्रातील प्रगतीचा जगातील इतर देशांना लाभ मिळत असल्याने या क्षेत्रात भारताकडून येणाऱ्या काळात सहकार्य मिळेल अशी अपेक्षा यावेळी प्रतिनिधींनी व्यक्त केली. युनिसेफ, ओईसीडी, स्पेन, बांगलादेश, चीन, इंडोनेशिया आणि युएई च्या प्रतिनिधींनी आयुका, एनसीईआरटी, सीबीएसई, गुवी, आयुका, आयसरच्या उपक्रमांची माहिती उत्सुकतेने घेतली.

आधुनिक तंत्रज्ञानावर आधारित नाविन्यपूर्ण शैक्षणिक साधनांबरोबरच भारतीय ज्ञान परंपरेतील बाबींचा प्रदर्शनात समावेश आहे. पुणे विद्यापीठातील खाशाबा जाधव क्रीडा संकुलात २२ जूनपर्यंत सकाळी १० ते सायंकाळी ६ यावेळेत प्रदर्शन सर्वांसाठी खुले राहणार आहे.