भारतीय प्राचीन संस्कृतीमध्ये योगसाधनेला अनन्य साधारण महत्व आहे. आजच्या आधुनिक काळात प्रचंड धावपळीच्या आणि स्पर्धात्मक युगामध्ये शरीर निरोगी ठेवण्यासाठी आपल्या देशात व जगभरामध्ये योगसाधनेचे, योगाचे पालन करणे आवश्यक आहे. मानव जातीचे दीर्घ आयुष्य दर्शविणारा दिवस म्हणजेच वर्षभरातील सर्वात मोठा दिवस म्हणुन गणल्या जाणाऱ्या 21 जुन रोजी संपुर्ण जगभरामध्ये जागतिक योग दिन साजरा केला जातो. शाररिक व मानसिक अनारोग्याचे निवारण करणे अत्यंत महत्वाचे असुन 2023 यावर्षीच्या जागतिक योग दिनाचे औचित्य साधुन शरीर आणि मन सुदृढ करण्यावर भर देण्यात येणार आहे.
या अनुषंगाने, योगाचा प्रचार व प्रसार वाढवुन योगमय वातावरण निर्माण व्हावे तसेच योगदिनाची जागृती करुन आरोग्य सुद्दढ कसे राखता येईल यांची पर्यटकांमध्ये जनजागृती करण्यासाठी दि. 21 जुन 2022 या दिवशी महामंडळ परिचलन करीत असलेल्या पर्यटक निवासामध्ये जागतिक योगदिन साजरा करण्यात येणार आहे. जागतिक योग दिनाला प्रोत्साहन देण्यासाठी महाराष्ट्र पर्यटन विकास महामंडळाच्या अखत्यारीत येत असलेल्या सर्व पर्यटक निवासांमध्ये वास्तव्यास आलेल्या पर्यटकांना एकत्रितपणे काही वेळ योगासने करण्यावर भर देण्यात येणार आहे. तसेच पर्यटक निवासात कार्यरत असलेल्या प्रत्येक कर्मचारी वर्गाने योगाचा अंतर्भाव आपल्या दैनंदिन जीवनामध्ये करावा, यासाठी प्रयत्न करण्यात येणार आहेत. यासाठी मा. पर्यटन मंत्री मंगलप्रभात लोढाजी हे खासकरुन आग्रही आहेत.
पर्यटक निवासाच्या परिसरातील स्थानिक स्तरावरील योग प्रशिक्षण संस्थेस किंवा व्यक्तीस पर्यटक निवासात बोलवुन वास्तव्यास येणाऱ्या पर्यटकांना योगाचे जीवनामधील महत्व, योगाचे प्रकार, योग केल्याचे शरीरास त्याचा होणारा फायदा तसेच आजच्या धकाधकीच्या व धावपळीच्या जीवनात मनाच्या एकाग्रतेसाठी योग किती गरजेचे आहे हे एखादया व्याख्यानाव्दारे पर्यटकांना पटवुन देण्याबाबत प्रयत्न करण्यात येणार आहेत. शारीरिक आणि मानसिक आरोग्यासाठी योगासनांना त्यांच्या जीवनशैलीचा भाग बनवण्याचे तसेच सर्वांचे आरोग्य सुधारण्याकरिता प्रत्येकाने नियमितपणे योगाभ्यास करण्याचा प्रयत्न केला पाहिजे, असे आवाहन या निमित्ताने महाराष्ट्र पर्यटन विकास महामंडळाकडुन करण्यात येत आहे.
नियमित योगाचे महत्त्व जाणता योग माणसांना आपसांत जोडुन परस्पर प्रेम आणि सध्दभावनेची भावना विकसित करतो त्यामुळे महामंडळाच्या पर्यटक निसासांमध्ये वास्तव्यास आलेल्या विविध धर्मांचे लोक जाती, पंथ आणि देशप्रेमाच्या भावनेने प्रेम, सद्भावना आणि आत्मीयतेने योगा करण्यास मार्गदर्शन करण्यात येईल. त्या अनुषंगाने महामंडळाच्या सर्वच पर्यटक निवासांमध्ये जागतिक योगदिन साजरा करण्याबाबतची आवश्यक ती कार्यवाही करण्याबाबतच्या सुचना व्यवस्थापकिय संचालक मा. श्रध्दा जोशी-शर्मा मॅडम यांनी दिल्या आहेत.
सध्याच्या वातावरणात कोरोना सारख्या रोगांचा प्रादुर्भाव कमी करणे आणि निरोगी जीवन शैलीबारोबरच निसर्गाचा आणि पर्यटनाचा आनंद घेणे यासाठी महाराष्ट्र पर्यटन विकास महामंडळ सर्वतोपरी प्रयत्न करीत आहे. याच प्रयत्नांचा भाग म्हणुन रोगप्रतिकारक शक्ती वाढविणारे अन्नपदार्थ असणारे रुचकर जेवण आणि योगोपचार याबाबत मार्गदर्शन शिबिर पर्यटक निवासात येणाऱ्या पर्यटकांसाठी आयोजित करण्याचा प्रयत्न करण्यात येत आहेत. कोरोना संसर्गातुन सावरलेल्या पर्यटकांना आयुर्वेदिक उपचार पध्दती आणि योगोपचार याबाबत माहीती देणे, योगा सत्र सुरु करणे, त्रासलेल्या आणि मनस्वास्थ्य भरकटलेल्या मनाला शांती देण्यासाठी मेडीटेशन-ध्यानधारणा सुरु करणे, अशा विविध सुविधा आगामी काळात पर्यटकांसाठी उपलब्ध करुन देण्यावर भर देण्यात येणार आहे. त्याचबरोबर निसर्गाचे वैभवशाली रुप जपण्यासाठी आणि निसर्गाचा समतोल राखण्यासाठी जबाबदार पर्यटनाचा (Responsible Tourism) अंगिकार करणे, प्लॅस्टिक आणि प्रदुषण करणाऱ्या वस्तुंचा वापर कमी करणे या बाबींवरही भर देण्यात येणार आहे.
महाराष्ट्र पर्यटन विकास महामंडळाचे महाव्यस्थापक मा. श्री चंद्रशेखर जयस्वाल सर यांच्या मार्गदर्शनाखाली महाराष्ट्राची जागतिक वारसा स्थळे असलेल्या आणि बौध्द-हिंदु इ. साधु-महंत यांनी ध्यानध्यारणा करण्यासाठी निवडलेल्या अशा अजंठा, वेरुळ आणि निसर्गरम्य असलेल्या लोणार तसेच ऐतिहासिक छत्रपती संभाजीनगर शहरातील पर्यटक निवासामध्येही योगा आयोजित केला जाणार आहे.
ऐतिहासिक गडकिल्ले, निसर्गरम्य डोगररांगांवर आणि समुद्राच्या किनारी असलेल्या महाराष्ट्र पर्यटन विकास महामंडळाच्या पर्यटक निवासांमध्ये योगा करणे ही एक अनोखी पर्वणी असुन त्याचा पर्यटकांनी लाभ घ्यावा, असे आवाहन महाराष्ट्र पर्यटन विकास महामंडळाचे प्रादेशिक व्यवस्थापक श्री. दिपक हरणे यांनी केले आहे.
श्री. दिपक हरणे,
प्रादेशिक व्यवस्थापक,
महाराष्ट्र पर्यटन विकास महामंडळ.
