नागपूर, दि. 26 : राज्यातील शासकीय औद्योगिक प्रशिक्षण संस्थेतील (आयटीआय) विद्यार्थ्यांच्या विद्यावेतन ४० रुपयांवरुन ५०० रुपये करण्यात येणार आहे. येत्या तीन महिन्यात विद्यावेतन लागू करण्यात येईल, अशी माहिती कौशल्य, रोजगार, उद्योजकता व नाविन्यता मंत्री मंगलप्रभात लोढा यांनी विधानपरिषदेत दिली.

सदस्यांनी औद्योगिक प्रशिक्षण संस्थेतील विद्यार्थ्यांच्या विद्यावेतनात वाढ करण्याबाबत प्रश्न उपस्थित केला होता. त्याला उत्तर देताना मंत्री श्री. लोढा बोलत होते.

मंत्री मंगलप्रभात लोढा पुढे म्हणाले, शासकीय औद्योगिक प्रशिक्षण संस्थेतील विद्यार्थ्यांचे विद्यावेतन सन १९८२ पासून ४० रुपये आहे. यात वाढ करुन पाचशे रुपये करण्याचा प्रस्ताव मंत्रिमंडळाच्या मान्यतेसाठी सादर करण्याची कार्यवाही विभागाच्या स्तरावर सुरू आहे. खासगीच्या तुलनेत शासकीय आयटीआयचे प्रवेश शुल्क कमी आहे. विद्यार्थ्यांना चांगल्या सुविधा देण्याचा प्रयत्न सुरु आहे. औद्योगिक प्रशिक्षण संस्था बळकट करून १०० टक्के प्रवेश होण्यासाठी राज्य शासन प्रयत्न करीत आहे. जिल्ह्यात/ तालुक्यात मागणीनुसार एमआयडीसी आणि उद्योगपुरक अभ्यासक्रम सुरु करण्याची कार्यवाही सुरु आहे. स्थानिक कुशल कामगार आणि आयटीआयमधील शिक्षकांना प्रशिक्षण दिले जाईल, असेही मंत्री श्री. लोढा यांनी यावेळी सभागृहात सांगितले.

आयटीआयचे नूतनीकरण करणार; बाराशे कोटींची तरतूद

राज्यात ४१९ औद्योगिक प्रशिक्षण संस्था (आयटीआय) आहेत. या आयटीआयमध्ये सर्वसाधारण कुटुंबातील विद्यार्थी शिक्षण-प्रशिक्षण घेत आहेत. या विद्यार्थ्यांना चांगल्या सुविधा देण्यासाठी आयटीआयचे नूतनीकरण करण्याचा निर्णय राज्य शासनाने घेतला आहे. यासाठी १२०० कोटी रुपयांची तरतूद करण्यात आली आहे. यातून आभासी वर्ग (व्हर्चुअल क्लास रुम), ग्रंथालय, जीम अशा विविध सुविधा देण्यात येईल. येत्या सहा महिन्यात याबाबत अंमलबजावणी होईल, असेही मंत्री लोढा यांनी यावेळी उपप्रश्नाच्या उत्तरात स्पष्ट केले.

या चर्चेत सदस्य सर्वश्री एकनाथ खडसे, प्रविण दरेकर, सतीश चव्हाण, सचिन अहिर, शशिकांत शिंदे, श्रीकांत भारतीय, अभिजीत अरुण लाड आदींनी सहभाग घेऊन उपप्रश्न उपस्थित केले.

नागपूर, दि. 26 : “संसदीय लोकशाहीमध्ये सत्तारुढ आणि विरोधी पक्षाचे सदस्य सहकार्याने व समन्वयाने जनसामान्यांच्या हिताचे निर्णय घेत असतात. हे संसदीय लोकशाहीच्या सक्षमीकरणासाठी आवश्यक आहे”, असे प्रतिपादन आमदार रोहित पवार यांनी केले.

राष्ट्रकुल संसदीय मंडळ, महाराष्ट्र शाखेच्या ४९ व्या संसदीय अभ्यासवर्गात आमदार रोहित पवार यांनी ‘संसदीय लोकशाहीत सत्तारुढ आणि विरोधी पक्षांचे स्थान, कर्तव्ये आणि विधिमंडळातील भूमिका’  या विषयावर मार्गदर्शन केले, त्यावेळी ते बोलत होते. यावेळी आमदार महादेव जानकर, अमोल मिटकरी, महाराष्ट्र विधानमंडळ सचिवालयाचे अवर सचिव सुनिल झोरे तसेच राज्यातील बारा विद्यापीठांतील विद्यार्थी व अधिव्याख्याते उपस्थित होते.

श्री. पवार म्हणाले, “समाजकारण व राजकारणात युवकांना संधी ही अचानक येऊ शकते. या संधीमध्ये युवकांनी जबाबदारीने व योग्य तो निर्णय घेणे महत्त्वाचे आहे. संसदीय अभ्यासवर्गात मलाही आज  अचानक संधी मिळाली. तुम्हालाही राज्यातील निवडक विद्यार्थ्यांमधून संसदीय अभ्यासवर्गाच्या माध्यमातून विधानपरिषदेच्या सभागृहात बसण्याची संधी मिळाली आहे. त्यामुळे भविष्यात योग्य ती सामाजिक भूमिका घेणे, ही तुमची जबाबदारी आहे. आपण चांगले नागरिक होणे महत्त्वाचे आहे. मतदान प्रक्रियेत लोकशाहीसाठी सर्वांनी सहभागी होणे महत्त्वाचे आहे”.

“सभागृहामध्ये सत्तारुढ व विरोधी सदस्य हे आपआपल्या परीने जनसामान्यांचे प्रश्न मांडत असतात. हे प्रश्न सोडविण्याच्या मुद्यांवरुन काही वेळेस सत्तारुढ व विरोधी पक्षांत मतभेद निर्माण होतात. अशा वेळी दोन्ही पक्षांनी जनतेच्या हिताच्या दृष्टीने सहकार्य व सामंजस्याची भूमिका घेणे महत्त्वाचे असते. राज्याच्या विधिमंडळाने यापूर्वी सत्तारुढ व विरोधी पक्षांच्या सहमतीने व सहकार्याने अनेक महत्त्वाचे कायदे केलेले आहेत. ते पुढे देशपातळीवरही घेण्यात आलेले आहेत. संसदीय लोकशाहीसाठी  सत्तारुढ व विरोधी पक्षांत संतुलन असणे आवश्यक आहे. सत्तारुढ पक्षाने राज्याच्या हिताच्या दृष्टीने विरोधी पक्षाच्या सूचनांचा व मुद्यांचा आदर करणे आवश्यक आहे. त्याचप्रमाणे विरोधी पक्षांनीही जनहिताच्या निर्णयांना सहकार्य करणे आवश्यक आहे. यातूनच संसदीय लोकशाही सक्षम होण्यास मदत होणार आहे”  असे श्री.पवार यांनी यावेळी सांगितले.

कार्यक्रमाच्या सुरुवातीला अवर सचिव सुनिल झोरे यांनी श्री. पवार यांचा परिचय करुन दिला. तसेच यावेळी विद्यार्थ्यांनी विचारलेल्या प्रश्नांना श्री. पवार यांनी समर्पक अशी उत्तरे दिली. पुण्यश्लोक अहिल्यादेवी होळकर सोलापूर विद्यापीठाच्या विद्यार्थिनी कु.चिन्मयी तळेकर यांनी आभार व्यक्त केले.

मुंबई, दि. २५ डिसेंबर- भारताला महासत्ता बनविण्याची ताकद युवकांमध्ये आहे. त्यामुळे आजच्या युवा पिढीने जास्तीत शिक्षित व प्रगत होऊन विकासाच्या दिशेने पाऊल उचलले पाहिजे या एका उदिदष्टयाने प्रेरित होऊन सार्वजनिक बांधकाम मंत्री रविंद्र चव्हाण यांनी आपल्या संकल्पनेतून युवा पिढीच्या शिक्षणासाठी डिजिटल माध्यमाचे नवीन दालन सुरु केले आहे. डिजिटल मिडियाच्या माध्यमातून युवकांना सहज व सोपे शिक्षण मिळावे यादृष्टीने मंत्री रविंद्र चव्हाण यांनी अकरावीच्या कॉर्मस व विज्ञान शाखेच्या विद्यार्थ्यांसाठी ऑनलाईन लेक्चरसाठी विशेष सुविधा सुरु केली आहे. या ऑनलाईन सुविधेचा शुभारंभ आज माजी पंतप्रधान,भारतरत्न स्वर्गीय अटलबिहारी वाजपेयी यांच्या जयंतीच्या निमित्ताने मंत्री चव्हाण यांच्या हस्ते करण्यात आला.

मंत्री रविंद्र चव्हाण यांच्या https://ravindrachavan.in या वेबसाईटवरील बीजेपी फॉर युथ या व्यासपिठावरून अकरावीच्या कॉर्मस व विज्ञान शाखेच्या महाविदयलयीन विद्यार्थ्यांसाठी खास सुरु करण्यात आलेल्या या वेबसाईटमध्ये विद्यार्थ्यांना अभ्यास करता येणार आहे. सहा विषयांमध्ये बायोलॉजी, केमिस्ट्री, मॅथेमॅटिक्स, बुक किपिंग अँण्ड अकाऊंटन्सी,ऑर्गनायझेशन ऑफ कॉर्मस अँण्ड मॅनेजमेंट,सेकेट्ररिअल प्रॅक्टीस, याचा समावेश आहे. शिक्षण क्षेत्रातील तज्ज्ञ मंडळी व प्राध्यापक विद्यार्थ्यांना प्रत्येक विषयांचे स्वतंत्रपणे ऑनलाईन लेक्चर देणार आहेत. वेबसाईट नोंदणीची प्रक्रिया पूर्ण झाल्यानंतर ही लेक्चर विद्यार्थ्यांना युटयुबच्या माध्यमातून विद्यार्थ्यांना सहजपणे उपलब्ध होणार आहे. एकदा लॉगीन झाल्यानंतर विद्यार्थ्यांना कधीही व कुठेही या लेक्चरवरुन अभ्यास करता येऊ शकेल. विशेष म्हणजे विद्यार्थ्यांसाठी वेबसाईटवरील नोंदणी प्रक्रिया ही युझर फ्रेंडली स्वरुपात असेल, जेणेकरुन अगदी कमी वेळेत विद्यार्थी आपली नोंदणी पूर्ण करुन त्याला या शैक्षणिक सुविधेचा लाभ मिळणार आहे.
उत्तम शिक्षण हा त्यांच्या उज्ज्वल भविष्याचा पासपोर्ट आहे. दर्जेदार शिक्षण आणि कौशल्यपूर्ण प्रशिक्षण मिळालेली युवा पिढी स्पर्धात्मक युगात अग्रेसर राहणे हे भाजपचे उदिदष्टय आहे. भारत आणि भारतीयांना जागतिक शक्तीत रूपांतर करण्याचं ध्येय ठेवून युवा पिढीसाठी आधुनिक तंत्रज्ञानयुक्त डिजिटल व्यासपीठ सर्व विद्यार्थ्यांनी लाभ घ्यावा व अधिक प्रमाणात प्रगत व्हावे असे आवाहन यावेळी मंत्री रविंद्र चव्हाण यांनी यावेळी केले आहे.
विविध विषयातील नामवंत शिक्षक व प्रशिक्षकांच्या माध्यमातून व्हिडीओद्वारे विद्यार्थ्यांना दर्जेदार शैक्षणिक मार्गदर्शन देणारे डिजिटल व्यासपीठ उपलब्ध करून देण्याचे व्रत रविंद्र चव्हाण यांनी स्वीकारले आहे. गेल्या काही वर्षात अकरावी व अन्य विषयांचे शिक्षण घेणा-या विद्यार्थ्यांसाठी ही ऑनलाईन स्वरुपाची व्यवस्था नसल्यामुळे अनेक विद्यार्थ्यांना प्रगत शिक्षणापासून वंचित राहावे लागले होते. भविष्यात ही सुविधा सर्व विदयार्थ्यांना उपलब्ध व्हावी यासाठीच ही सुविधा सुरु करण्यात आली असल्याचे मंत्री चव्हाण यांनी सांगितले.

भविष्यामध्ये ही सुविधा अधिक दर्जेदार करण्यासाठी या ऑनलाईन सुविधेमध्ये वेळोवेळी सुधारणा करण्यात येणार आहे व या ऑनलाईन सुविधेचा लाभ अधिक विद्यार्थ्यांपर्यंत पोहचविण्याचा सकारत्मक प्रयत्न करण्यात येईल असेही मंत्री चव्हाण यांनी स्पष्ट केले.
विद्यार्थ्यांनी या शैक्षणिक सुविधेचा लाभ घेण्यासाठी खालील प्रक्रिया करावी.
https://ravindrachavan.in ही वेबसाईट उघडल्यावर तेथे असलेल्या BJP for youth या आयकॉनवर क्लिक केल्यानंतर नोंदणीची पुढील प्रक्रिया सुरु होते.
१) जर तुम्ही नोंदणी केली असेल तर कृपया वापरकर्ता नाव & पासर्वड तुम्हाला तुमच्या नोंदणी केलेल्या ईमेलमध्ये मिळू शेकल. अन्यथा खालील स्टेप्स फॉलो करा.
२) फोटो अपलोड करा आणि डेटा भरा ( नावे, लिंग, जन्मतारीख इ. )
३) Verify and Register या बटणावर क्लिक करा
४) तुम्हाला खालीलप्रमाणे OTP मिळेल
५) टेक्स्ट बॉक्समध्ये OTP भरा
६) एकदा तुम्ही तपशील सेव्ह केल्यानंतर तुम्हाला वापरकर्तानाव मिळेल & पासवर्ड.
७) युजरनेम & पासवर्ड द्वारे लॉगिन करा जे तुम्हाला तुमच्या नोंदणीकृत ईमेलमध्ये मिळेल.

वरील प्रक्रिया पूर्ण झाल्यानंतर विद्यार्थ्यांना युटुयबच्या लिंक मार्फत लेक्चरचा लाभ घेता येईल असे आवाहन मंत्री चव्हाण यांनी केले आहे

मुंबई-

ICICI बँकेतील कथित कर्ज घोटाळ्याप्रकरणी केंद्रीय गुन्हे अन्वेषण विभाग अर्थात CBIने सोमवारी व्हिडिओकॉन कंपनीचे मालक वेणुगोपाल धूत यांना अटक केली आहे. या प्रकरणी सीबीआयने गत आठवड्यातच आयसीआयसीआय बँकेच्या माजी व्यवस्थापकीय संचालक चंदा कोचर व त्यांचे पती दीपक कोचर यांना अटक केली होती. त्यानंतर ही कारवाई करण्यात आली आहे.

आयसीआयसीआय बँकेने 2012 मध्ये व्हिडिओकॉन कंपनीला कर्ज मंजूर केले होते. हे कर्ज नियमबाह्य देण्यात आल्याचा आरोप आहे. चंदा कोचर यांच्या हाती आयसीआयसीआय बँकेची सुत्रे असताना व्हिडिओकॉनला हे कर्ज देण्यात आले होते. या मोबदल्यात चंदा यांचे पती दीपक कोचर यांच्या न्यू रिन्यूएबलला व्हिडिओकॉनकडून गुंतवणूक मिळाली होती.

मुंबईच्या विशेष न्यायालयाने शनिवारी ICICI बँकेच्या माजी सीईओ चंदा कोचर व त्यांचे पती दीपक कोचर यांना 3 दिवसांच्या (24 ते 26 डिसेबंर) सीबीआय कोठडीत पाठवले होते. चंदा व दीपक कोचर यांना शुक्रवारी अटक केली होती. व्हिडिओकॉन समुहाला रेग्युलेशनविरोधात जाऊन कोट्यवधी रुपयांचे कर्ज मंजूर केल्याप्रकरणी ही कारवाई करण्यात आली होती.

आरोप आहे की, चंदा कोचर यांनी देशातील सर्वात मोठ्या खासगी बँकांपैकी एक असणार्या आयसीआयसीआय बँकेची सुत्रे सांभाळल्यानंतर व्हिडिओकॉनच्या विविध कंपन्यांना 6 कर्ज मंजूर करण्यात आले. यापैकी 2 कर्ज प्रकरणे चंदा कोचर सदस्या असणार्या समितीने मंजूर केली होती. त्यांच्यावर व्हिडिओकॉन समुहाला कर्ज मंजूर करण्यासाठी अन्य समित्यांवर प्रभाव टाकल्याचाही आरोप आहे.

मुंबई-टीव्ही अभिनेत्री टुनिशा शर्माने शनिवारी मुंबईत शूटिंगच्या सेटवर गळफास घेऊन आत्महत्या केली. 20 वर्षीय टुनिशा एक म्युझिक व्हिडिओ शूट करणार होती. सेटवरील लोकांनी तिला फासावर लटकलेले पाहून खाली उतरवले आणि हॉस्पिटलमध्ये नेले. मात्र वाटेतच तिचा मृत्यू झाला.

आत्महत्येचे कारण अद्याप समजू शकलेले नाही. आत्महत्येपर्यंत टुनिशा पूर्णपणे सामान्य होती आणि 5 तासांपूर्वी तिने इन्स्टाग्रामवर तिचा फोटो आणि काही नोट्स शेअर केल्या होत्या.

टुनिशाने कतरिना कैफच्या फितूर या चित्रपटात तिच्या बालपणीची भूमिका साकारली आहे. याशिवाय अलीबाबा दास्तान ए काबुलमध्ये ती राजकुमारी मरियमची भूमिका साकारत होती. याशिवाय टुनिशाने बार बार देखो, कहानी-2, दबंग-3 यांसारख्या चित्रपटांमध्ये बालकलाकार म्हणूनही काम केले आहे.

नागपूर, दि. 24 : इंडियन सायन्स काँग्रेसचे आयोजन नागपूर येथे दि. 3 ते 7 जानेवारी दरम्यान होत आहे. या आयोजनात महाराष्ट्राची विज्ञान व तंत्रज्ञानातील भरारी प्रतिबिंबीत व्हावी. शाळा, महाविद्यालयातील जास्तीत जास्त विद्यार्थी- विद्यार्थीनी यात सहभागी होतील अशी उपाययोजना करावी,अशा सूचना उपमुख्यमंत्री देवेंद्र फडणवीस यांनी आज येथे दिल्या.

उपमुख्यमंत्र्यांच्या ‘देवगिरी’ या शासकीय निवासस्थानी 108 व्या इंडियन सायन्स काँग्रेसच्या आयोजनाच्या पूर्वतयारीचा आढावा घेण्यात आला. या बैठकीला उच्च तंत्रज्ञान विभागाचे प्रधान सचिव विकास चंद्र रस्तोगी, उपमुख्यमंत्र्यांचे सचिव श्रीकर परदेशी, विभागीय आयुक्त विजयलक्ष्मी प्रसन्ना बिदरी, पोलीस आयुक्त अमितेश कुमार, जिल्हाधिकारी डॉ. विपीन इटनकर, महानगरपालिका आयुक्त राधाकृष्णन बी., नागपूर सुधार प्रन्यासचे सभापती मनोजकुमार सुर्यवंशी, राष्ट्रसंत तुकडोजी महाराज नागपूर विद्यापिठाचे कुलगुरु एस.आर. चौधरी, नागपूर मेट्रोचे संचालक अनिल कोकाटे, विद्यापीठाचे अन्य अधिकारी उपस्थित होते.

कुलगुरु एस.आर. चौधरी यांनी सादरीकरणातून पूर्वतयारीची माहिती दिली. दि.3 ते 7 जानेवारी दरम्यान विद्यापीठ परिसरात केंद्रीय विज्ञान आणि तंत्रज्ञान मंत्रालयातर्फे आयोजित या परिषदेचे उद्घाटन प्रधानमंत्री नरेंद्र मोदी करणार आहेत. देशातील 7 हजार शास्त्रज्ञ सहभागी होणार आहेत. कृषी, वने, प्राणी, मत्स्य, पशुशास्त्र, अभियांत्रिकी, भौतिकशास्त्र, रसायनशास्त्र, जीवशास्त्र, सांख्यिकी, वैद्यकीय विज्ञान, नवीन जीवशास्त्र अशा विविध 14 शाखांमधील नवनवीन शोध प्रबंध, प्रदर्शन, मार्गदर्शन होणार आहे. या मार्गदर्शनाचा लाभ विज्ञानस्नेही  विद्यार्थ्यांना होईल.

उपमुख्यमंत्री फडणवीस म्हणाले की, सहभागी होणाऱ्या विद्यार्थ्यांना ने-आण करण्यासाठी यंत्रणा उभारा. राज्यातील अन्य ठिकाणावरूनही सहभाग वाढविण्यासाठी प्रयत्न करा. बाहेरुन येणाऱ्या प्रतिनिधींच्या निवास, प्रवासाची उत्तम व्यवस्था ठेवा. विदेशातून येणाऱ्या शास्रज्ञांच्या निवास व्यवस्थेबाबत विशेष काळजी घ्या, अशी सुचना त्यांनी केली. ते पुढे म्हणाले की,   यंदा विद्यापीठाला शंभर वर्ष पूर्ण होत आहे. त्यामुळे विद्यापीठाचा हा प्रमुख कार्यक्रम समजून उत्तम प्रसिद्धी करा. या आयोजनाचे यजमान पद महाराष्ट्राकडे आहे. महाराष्ट्राने विज्ञान, तंत्रज्ञान व सर्व क्षेत्रातील प्रगतीची भरारी प्रतिबिंबीत व्हावी याकडे विशेष लक्ष द्यावे, असे श्री. फडणवीस यांनी सांगितले.  

मुंबई, दि.24 : महाराष्ट्र राज्य बालहक्क आयोग आणि बृहन्मुंबई महापालिका यांच्या संयुक्त विद्यमाने डी वॉर्ड कार्यक्षेत्रात ताडदेव, महापालिका शाळा, बने कम्पाउंड, साने गुरूजी  येथे आज बालकांसाठी मोफत लसीकरण आणि वैद्यकीय शिबीराचे आयोजन करण्यात आले होते.

या शिबीरामध्ये बालकांची दंत तपासणी आणि उपचार तसेच वैद्कीय तपासण्या करण्यात आल्या. या शिबीरासाठी मोठ्या प्रमाणत बालके उपस्थित होते. यावेळी महाराष्ट्र राज्य बालहक्क संरक्षण आयोगाच्या अध्यक्षा सुशीबेन शहा उपस्थित होत्या.