पुणे, – कोणत्याही क्षेत्रात यश मिळवायचे असेल तर प्रथम ती गोष्ट करण्याची मनाची इच्छा पाहिजे. माणसाच्या जीवनात इच्छाशक्तीला फार महत्त्व आहे. आनंदी, परिपूर्ण आणि समाधानी जीवन जगण्यास प्रत्येकजण पात्र आहे. कोणत्याही औषधाला एक्सपायरी डेट असते त्याप्रमाणे आपल्या आयुष्यातील प्रत्येक समस्येला सुद्धा एक अंतिम तारीख असते. मनाच्या शक्तीचा उपयोग करून व्यक्ती, समाज आणि संस्था यशस्वी होऊ शकतात. त्यासाठी पुढील ५ वर्षात १ हजारहून अधिक प्रशिक्षक तयार करण्याबरोबरच जगातील पहिले “माईंड पॉवर कॉलेज” सुरू करण्याचे महत्त्वाकांक्षी स्वप्न उराशी बाळगत असल्याचे प्रतिपादन प्रसिद्ध माइंड ट्रेनर सुदर्शन साबत यांनी केले.

पुण्यात आयोजित मनशक्ती प्रशिक्षण शिबिरात बोलताना सुदर्शन साबत म्हणाले की, मनाच्या प्रशिक्षण कार्यक्रमांनी केवळ सकारात्मक विचार करण्याची शक्तीच वाढवली नाही तर अनेक लोकांच्या जीवनातही परिवर्तन घडवून आणले आहे. वर्षानुवर्षे मनशक्ती तंत्राद्वारे लोकांनी जीवनात हव्या असलेल्या आश्चर्यकारक गोष्टी साध्य केल्या आहेत. हे प्रशिक्षक एकत्रितपणे लोकांपर्यंत पोहोचून त्यांना त्यांच्या समस्यांना कसे सामोरे जायचे आणि जीवनातील अडथळे कसे दूर करायचे हे शिकवतात. करिअरमधील आणि जीवनातील समस्यांचे निराकरण करण्याबरोबर यशस्वी कसे व्हावे आणि स्वप्ने प्रत्यक्षात कशी आणावीत याविषयी सुदर्शन साबत यांनी माहिती दिली आहे.

भारताचे सर्वोत्तम माईंड ट्रेनर सुदर्शन साबत हे “सुदर्शन ग्रुप ऑफ कंपनी”चे संस्थापक आणि अध्यक्ष आहेत. त्यांनी त्यांच्या कारकिर्दीच्या पहिल्या अर्ध्या दशकात ११ व्यवसाय विकसित केले आहेत. त्यांनी ५० हून अधिक राष्ट्रीय आणि आंतरराष्ट्रीय सर्वोत्कृष्ट माइंड ट्रेनर पुरस्कार जिंकले आहेत. त्यामुळे इतर कोणत्याही उपाधिपेक्षा ‘इन्फोप्रेन्योर’ या उपाधीला त्यांनी मान्यता दिली. “माइंड विनर वर्ल्ड विनर”, “रिच माइंड ब्लूप्रिंट” आणि “डेअर युअर माइंड-टु थिंक बियॉन्ड” या पुस्तकांचे ते लेखक आहेत. इंग्रजी, हिंदी, ओडिया, गुजराती आणि मराठी भाषेतील त्यांची इतर २१ पुस्तके २०२३ मध्ये प्रकाशित होणार आहेत.

सुदर्शन साबत हे भारतातील सर्वात जास्त मागणी असलेल्या माइंड ट्रेनर्सपैकी एक आहेत. आतापर्यंत त्यांनी शेकडो प्रशिक्षण कार्यक्रम केले आहेत. त्यांच्या प्रशिक्षणामुळे अनेकांना त्यांच्या जीवनात उत्तम यश मिळाले आहे. लोकांना त्यांचे ध्येय शोधण्यात आणि साध्य करण्यात मदत करण्यासाठी सुदर्शन साबत यांनी अनेक मनशक्ती कार्यशाळा आयोजित केल्या. व्यापक अनुभव आणि लोकांचे वर्तन समजून घेण्याचे सखोल ज्ञान असल्याबरोबर सुदर्शन साबत यांना विविध उद्योगांमध्ये मिळालेल्या यशामुळे अनेकांना प्रेरणा मिळाली.

शिक्षणाद्वारे गरिबीचे चक्र तोडण्याच्या उद्देशाने साबत यांनी आर्यन फाउंडेशनची स्थापना केली. आर्यन फाउंडेशनद्वारे भारतातील गरिबी कमी करण्यासाठी लहान मुलांना शिक्षण त्याचबरोबर महिला, तरुण आणि वृद्धांना मदत दिली जाते आणि व्यावसायिक कौशल्य प्रशिक्षणही दिले जाते.

पुणे : दारू नका दूध प्या, मानवतेचा बोध घ्या… दारुचा पाश जीवनाचा नाश… एक दोन तीन चार दारुबंदीचा करा प्रचार… दारु सोडा आनंद जोडा…असे सांगत नववर्षाचे स्वागत करताना चांगले विचार आणि संकल्प मनात ठेवून प्रत्येकाने व्यसनमुक्त भारताचे स्वप्न रंगवावे. नववर्षाचे स्वागत दारू पिऊन न करता चांगल्या पद्धतीने आनंदात करावे, याकरीता नववर्षाच्या पूर्वसंध्येला विविध सामाजिक संस्था आणि महाविद्यालयांतील तरुणाई व कलाकारांनी जनजागृती केली.

डेक्कन जवळील गुडलक चौकातील कलाकार कट्टा येथे आनंदवन व्यसनमुक्ती व पुर्नवसन केंद्रातर्फे दारू नको, दूध प्या उपक्रमाचे आयोजन करण्यात आले होते. उपक्रमाला कात्रज डेअरी, मराठवाडा मित्र मंडळ कॉलेज आॅफ कॉमर्स आणि पुणे पोलीस, पुणे शहर वाहतूक शाखा यांनी सहकार्य केले. यावेळी केंद्राचे अध्यक्ष डॉ.अजय दुधाणे, कात्रज डेअरीचे कुमार मारणे, धनवीर वाडकर, संतोष पटवर्धन, केतन जैन, दत्तात्रय सोनार, संजय हिरवे, अनिरुद्ध हळंदे, विजय शिंदे, प्रसाद चांदेकर, शैलेश बढाई, जयंत हिरे, विवेक राजगुरु, निखिल कदम, मनीष भोसले, प्रकाश पवार, राहुल बोंबे, मराठवाडा मित्र मंडळ महाविद्यालयाचे प्रा. प्रा.डॉ.देविदास गोल्हार, प्रा.प्रवीण कड, प्रा. सुशील गंगणे, प्रा. प्रमोद सपकाळ, प्रा.कल्पना वैद्य यावेळी उपस्थित होते. कात्रज डेअरीच्या संचालक केशर पवार यांनी विशेष सहकार्य केले. 
कलाकार पलाश साठे यांनी देखील लोकांना दूध वाटप करुन जनजागृती केली. मराठवाडा मित्र मंडळ कॉलेज आॅफ कॉमर्सच्या एन.एस.एस च्या विद्यार्थ्यांनी जनजागृती करण्याकरिता सक्रिय सहभाग घेतला. उपक्रमाचे यंदा ११ वे वर्ष असून यावेळी महाविद्यालयीन तरुणाईने घोषणा देत दारू करते कुटुंब उध्वस्त… असे संदेश फलक घेऊन जनजागृती देखील केली.  पथनाट्य, देशभक्तीपर गीतांचे सादरीकरण करीत सरत्या वर्षाला निरोप दिला.

डॉ. अजय दुधाणे म्हणाले, नवीन वर्षाचे स्वागत तरुणाई दारूचे सेवन करून करते. यामुळे व्यसनाधीनता वाढत जाते. नवीन वर्षाची सुरुवात चांगल्या पद्धतीने करावी आणि व्यसनाधीनतेची झालर नववर्षाच्या पूर्वसंध्येला नसावी यासाठी दूधाचे वाटप करून दारू नको दूध प्या हा उपक्रम राबविला जातो.

समाज कल्याण आयुक्तांकडून पाहणी व आढावा

पुणे, दि.३१: पेरणे (ता. हवेली) येथील जयस्तंभ अभिवादन कार्यक्रमासाठी प्रशासकीय यंत्रणा सज्ज झाली आहे. त्या अनुषंगाने समाज कल्याण आयुक्त डॉ.प्रशांत नारनवरे यांनी आज रोजी कार्यक्रमस्थळाची पाहणी करुन कोविड-१९ च्या पाश्वभूमीवर सर्व नियमांचे पालन काटेकोरपणे करण्याच्या सूचना दिल्या.

यावेळी बार्टीचे महासंचालक धम्मजोती गजभिये, यांच्यासह विविध विभागांचे अधिकारी उपस्थित होते.

जयस्तंभ अभिवादन कार्यक्रमाचे नियोजन करण्याची जबाबदारी राज्य शासनाने समाज कल्याण विभागाकडे सोपवली आहे. कार्यक्रमाच्या अनुषंगाने सर्व शासकीय यंत्रणाची तयारी पूर्ण झाली आहे. सदर कार्यक्रमासाठी अनेक मान्यवर उपस्थित राहणार आहेत. गृह विभागाने विविध सूचना निर्गमित केल्या आहेत. डॉ. नारनवरे यांनी येणाऱ्या सर्व अनुयायांना प्रशासनास सहकार्य करण्याचे आवाहन केले आहे.

या सोहळ्यादरम्यान १ जानेवारी रोजी पहाटे धम्मयाचना, सकाळी भारतीय बौद्ध महसभा सामुदायिक बुद्ध वंदना करण्यात येणार असून मान्यवरांकडून अभिवादन करण्यात येणार आहे. त्यानतर समता सैनिक दल, महार बटालियन सेवानिवृत्त सैनिक यांच्याकडून सलामी व मानवंदना कार्यक्रम होणार आहे. सकाळी ८ वा. नंतर अभिवादन स्थळ सर्व अनुयायांना अभिवादनाकरिता खुले असणार आहे.

हा कार्यक्रम यशस्वीरित्या संपन्न होण्यासाठी महसुल विभाग, पोलिस विभाग, जिल्हा परिषद विभाग, सार्वजनिक बांधकाम विभाग, पी.एम.पी.एल., राज्य परिवहन महामंडळ, अन्न व औषध प्रशासन, राज्य उत्पादन शुल्क विभाग, डॉ.बाबासाहेब आबेडकर संशोधन व प्रशिक्षण संस्था (बार्टी) पुणे, समाज कल्याण आयुक्तालय पुणे, महावितरण कंपनी, आरोग्य विभाग यांच्यासह विविध विभागांकडून नियोजन पुर्ण करण्यात आले आहे. शासनाच्यावतीने या कार्यक्रमाचे सकाळी ६ वाजल्यापासून दूरदर्शनच्या सह्याद्री वाहिनीवर दिवसभर थेट प्रसारण करण्यात येणार आहे.

समन्वयसाठी विविध समित्या
या कार्यक्रमासाठी शासनाने समाज कल्याण आयुक्त डॉ. नारनवरे यांच्या मार्गदर्शनाखाली प्रशासकीय समिती गठित केली आहे. या समितीचे जिल्हाधिकारी राजेश देशमुख हे अध्यक्ष आहेत. तर समाजकल्याणचे पुणे प्रादेशिक उपायुक्त बाळासाहेब सोळंकी हे समितीचे सदस्य सचिव असून त्यांनी शासनाच्या इतर विभागाच्या समन्वय अधिकारी यांच्याशी समन्वय साधण्यासाठी विविध समित्यांचे गठण केले आहे. संनियंत्रण समिती, राजशिष्टाचार समिती, नियत्रंण कक्ष- पुणे, नियत्रंण कक्ष-भिमा कोरेगाव, नियोजन समिती, रंगमंच समिती, पास समिती, बुक स्टॉल समिती आदी समित्याद्वारे नियोजन करण्यात येत आहे.

स्तनदा मातांसाठी हिरकणी कक्ष.
अभिवादन करण्यासाठी येणाऱ्या महिलाची संख्या विचारात घेता लहान बाळांना स्तनपानासाठी स्तनदा मातांकरिता हिरकणी कक्ष स्थापन करण्यात आला आहे. सदर हिरकणी कक्षाचे उद्घाटन डॉ.प्रशांत नारनवरे आयुक्त समाज कल्याण आणि इतर वरिष्ठ अधिकाऱ्यांचे उपस्थितीत करण्यात आले. यावेळी सह पोलीस आयुक्त संदिप कर्णिक, बार्टीचे महासंचालक धम्मजोती गजभिये, पुणे जिल्हा परिषदेचे कार्यकारी अधिकारी चंद्रकांत वाघमारे, समाज कल्याण सहायक आयुक्त संगिता डावखर आदी यावेळी उपस्थित होते.

आरोग्य दूत
विजयस्तंभ ते पार्किंग चे ठिकाण हे अंतर जास्त असल्याने कोणत्याही अनुयायाला काही त्रास झाल्यास किंवा दुखापत झाल्यास तसेच ज्येष्ठ नागरिकांचे आरोग्याची काळजी घेण्यासाठी ‘आरोग्य दूत’ ही अभिनव संकल्पना राबविण्यात आली आहे. येणाऱ्या अनुयायांची गर्दी विचारात घेता दुचाकी वरील आरोग्य दूत तात्काळ आरोग्य सेवा देतील, आरोग्य विभागाची ही संकल्पना नव्याने येथे अंमलात येत आहे. तसेच आरोग्य विभागाच्या वतीने आरोग्य तपासणी कक्ष देखील उभारण्यात आला आहे.

संकल्प नवीन वर्षाचा उपक्रमात शेकडो विद्यार्थ्यांनी घेतली शपथ

पुणे, दि. ३१ डिसेंबर:श्रीमंत दगडूशेठ हलवाई गणपती मंदिर ट्रस्ट आणि टाकळकर क्लासेस यांच्या संयुक्त विद्यमाने ‘निर्धार व्यसनमुक्तीचा, संकल्प नवीन वर्षाचा’ हा उपक्रम शनिवारी सकाळी श्रीमंत दगडूशेठ हलवाई गणपती मंदिरात पार पडला. यावेळी टाकळकर क्लासेसच्या १०० विद्यार्थ्यांनी डिजिटल व्यसनमुक्तीचा संकल्प सोडून शपथ घेतली. या कार्यक्रमाची सुरूवात अथर्वशीर्ष पठणाने झाली. तसेच काही विद्यार्थी हे रस्त्याच्या दोन्ही बाजूला हातात वेगवेगळे संदेश असलेले बोर्ड घेऊन उभे होते.यावेळी केदार टाकळकर,शीतल पाटील, चंद्रकांत शहासने आणि २० शिक्षक व कर्मचारी वर्ग उपस्थित होते.

या प्रसंगी श्रीमंत दगडूशेठ हलवाई गणपती मंदीर ट्रस्टचे उपाध्यक्ष हेमंत रासणे, केदार टाकळकर आणि शितल पाटील यांच्या हस्ते डिजिटल व्यसनमुक्ती पोस्टर प्रकाशन करण्यात आले.
सूर्यवंशी म्हणाले,“सरत्या वर्षाला निरोप आणि नववर्षाच्या स्वागताची तयारी सुरू असून ३१ डिसेंबर म्हणजे व्यसनाधीनतेची दिवसच असे काही वातावरण तयार झाले आहे. या दिनी वाढत असलेल्या बीभस्तपणा लक्षता घेता विद्यार्थ्यांच्या बालमनावर परिणाम होतांना दिसत आहे. ते टाळण्यासाठी विद्यार्थ्यांना व्यसनमुक्तीचा संकल्प देणे गरजेचे आहे.”
केदार टाकळकर म्हणाले,“ वाढत्या डिजिटल युगात विद्यार्थी रात्रीचा दिवस करून फेसबुक, इंस्टा, व्हॉट्सअप, नेटफ्लिक्सच्या जाळ्यात अडकलेला आहे. त्यामुळे त्याचे मन हे अभ्यासापासून विचलित झाले आहे. हे टाळण्यासाठी विद्यार्थ्यांना बाप्पा समोर ही शपथ दिली आहे. आमच्या सर्व क्लासेसच्या विद्यार्थ्यांना ही शपथ दिली जाणार आहे.”

शितल पाटील म्हणाले,“व्यसनांची वाढती उपलब्धतेमुळे समाजाची शारीरिक, आर्थिक व सामाजिक मोठी हानी होत आहे. सरत्या वर्षाला निरोप देण्याच्या उत्सवाला येत असलेले बीभत्सरूप व या दिवशी वाढत असलेली व्यसनाधीनता रोखणे काळाची गरज आहे. आजच्या विद्यार्थी हा डिजिटलच्या जाळ्यात अडकलेला आहे. त्यामुळे आमच्या क्लासेसमध्ये केवळ मार्क्सच मिळवून दिले जातात असे नव्हे तर मार्क्स बरोबर मूल्यांचे शिक्षण देखील येथेे दिले जाते.”
यावेळी विद्यार्थ्यांनी डिजिटल व्यसनमुक्तीचा, नववर्षी निर्धार, दगडूशेठ बाप्पाचा आशिर्वाद, हाच आमुचा आधार आणि टाकळकर क्लासेसची साद, त्याला दगडूशेठ बाप्पाचा आशिर्वाद,
विद्यार्थ्यांची होवो संकल्पपूर्ती, शाबासकी देतील मंगलमूर्ती या सारखे स्लोगन घेऊन उपस्थित होते.

पुणे -शहरात स्वराज्य संघटनेच्या वतीने ३१ डिसेंबर च्या पार्श्वभूमीवर ‘दारू नको, दुध प्या’ आपण आपले आरोग्य जपुया हा अभिनव उपक्रम पारपडला.
नववर्षाच्या स्वागतासाठी स्वराज्य संघटनेच्या वतीने पुणे शहरातील बालगंधर्व चौकात अनोखा उपक्रम घेण्यात आला. जुन्या वर्षाची सांगता व नविन वर्षाच्या स्वागताच्या पार्श्वभूमीवर अनेक तरुण युवक मद्यपान करतात. मद्यपान केल्याने अनेकांना आरोग्याचे प्रश्न उदभवत असतात. नवी वर्षाची सुरवात नविन संकल्प करुन केली जाते त्यामुळे स्वराज्य च्या वतीने पुणे शहरात दारू नको, दुध प्या उपक्रम राबविण्यात आला. 
या उपक्रमांतर्गत जवळपास २०० लीटर मसाला दुधाचे वाटप करण्यात आले, येणा जाणाऱ्या वाहनचालकांना दूध देण्यात आले. ‘दारू नको, दुध प्या’, आपण आपले आरोग्य जपुया , स्वराज्य संघटनेचा विजय असो, दारूला नकार, दुधाला होकार अशी घोषणाबाजी यावेळी करण्यात आली. 
तरुणांचे व्यसनाकडे झुकण्याचे वाढते प्रमाण लक्षात घेता, सर्वांचेच आरोग्य व्यवस्थीत राहण्यासाठी दुध सेवन महत्वाचे आहे तसेच व्यसनमुक्तीसाठी सामाजिक उपक्रम राबवून जनजागृती करणे आवश्यक असल्याचे मत, स्वराज्य चे प्रवक्ते डॉ. धनंजय जाधव यांनी व्यक्त केले. 
यावेळी स्वराज्य चे निमंत्रक गणेश सोनवणे, निखील काची, अमोल वीर, विनोद परांडे ,दिनेश कदम, द्वारकेश जाधव, गौतम जाधव, राजू फाले, समीर वीर, अजय बांडे,  प्रविण कदम, प्रणय शेंडे, प्रविण भोसले, प्रवीण भोसले,आशिष भोसले,संकेत सोनवणी, लक्ष्मण वडणे, विक्रम कदम, आकाश करंजेकर, गणेश गवळी, सोन्या शितोळे, शैलेश तारडे, किशोर दाताळ, तौफिक इनामदार, प्रसाद रासकर, अविनाश शितोळे, युवराज बाबर, हेमंत दाभाडे, सुमित बोऱ्हाडे, संजय चोरगे, निलेश वाघ,  यांसह अनेक पदाधिकारी व कार्यकर्ते उपस्थित होते.

इतिहास प्रेमी मंडळाच्यावतीने भिडे वाड्यास वास्तुमानवंदना : भिडे वाड्यातील मुलींच्या पहिल्या शाळेला १७५ वर्षे पूर्ण झाल्यानिमित्त आयोजन

पुणे : शिक्षणापासून वंचित राहिलेल्या स्त्रियांना शिक्षित करण्याचा निर्धार त्यांनी केला…आणि असंख्य हाल अपेष्टा सहन करीत आपला निर्धार सुरूच ठेवला… त्यांच्या एका विचारामुळे आज सावित्रीमा ई फुले ते भारताच्या राष्ट्रपती द्रौपदी मुर्मू असा यशस्वी पल्ला भारताच्या महिलांनी गाठला. असे महात्मा फुले आणि क्रांतीज्योती सावित्रीबाई फुले यांच्या पदस्पर्शाने पावन झालेल्या भिडे वाड्याला मानवंदना देण्यात आली. त्यांच्या कार्याचे जागरण करण्यासाठी भिडे वाड्याशेजारी पुन्हा एकदा सावित्रीबाईंची शाळा भरली. 
इतिहास प्रेमी मंडळाच्या वतीने भिडे वाड्यामध्ये मुलींच्या शाळा सुरू होण्याच्या ऐतिहासिक घटनेला १७५ वर्षे पूर्ण झाली. या निमित्त भिडे वाड्यास वास्तू मानवंदना देण्यात आली. यावेळी कवयित्री मृणालिनी कानिटकर जोशी, इतिहास प्रेमी मंडळाचे अध्यक्ष मोहन शेटे, शिक्षिका मनीषा पाठक यावेळी उपस्थित होत्या. 
दिव्या सौरभ जगताप हिने सावित्रीमाई फुले यांची तर अभिषेक शाळू यांनी महात्मा फुले यांची भूमिका केली. सुंदराबाई राठी प्रशाला आणि सेवा सदन संस्थेच्या रमाबाई रानडे प्रौढ प्रशालेतील विद्यार्थिनींनी फुले दांपत्याबद्दल आदर व्यक्त केला.
मृणालिनी कानिटकर जोशी म्हणाल्या, सावित्रीमाई फुले आणि महात्मा फुले यांनी ज्ञानज्योत लावली आणि स्त्रियांचे आयुष्य उजळून निघाले. समाजाने त्यांचे ऋणी असायला पाहिजे. त्यांच्यामुळेच आपण अज्ञानाच्या अंधारातून बाहेर आलो. त्यामुळे स्त्रियांनी शिक्षण घेऊन घरी बसू नका आपल्या कुटुंबासाठी आणि समाजासाठी काम करा, असेही त्यांनी सांगितले. 
मोहन शेटे म्हणाले, १ जानेवारी १८४८ पासून भिडे वाड्यात मुलींची पहिली शाळा सुरू केली या घटनेला यावर्षी १७५ वर्ष पूर्ण होत आहेत यानिमित्त स्त्री शिक्षणाची गंगोत्री असणाऱ्या भिडे वाड्यास मानवंदना देण्यात आली. 

अमनोरा-पीवायसी एचटीबीए कप बॅडमिंटन स्पर्धा ; हवेली तालुका बॅडमिंटन संघटना आणि पीवायसी हिंदू जिमखाना क्लब यांच्या संयुक्त विद्यमाने आयोजन

पुणे : हवेली तालुका बॅडमिंटन संघटना (एचटीबीए) आणि पीवायसी हिंदू जिमखाना क्लब यांच्या संयुक्त विद्यमाने आयोजित अमनोरा-पीवायसी एचटीबीए बॅडमिंटन कप अजिंक्यपद स्पर्धेत लौकिक ताथेड आणि राधा गाडगीळ यांनी आपापल्या गटाचे विजेतेपद पटकावले.

पीवायसी हिंदू जिमखान्याच्या बॅडमिंटन कोर्टवर ही स्पर्धा झाली. या स्पर्धेतील १९  वर्षांखालील मुलांच्या एकेरीच्या अंतिम फेरीत अग्रमानांकित लौकिक ताथेडने सर्वेश हाउजीवर १२-१५, १५-१३, १५-७ अशी ४२ मिनिटांत मात करून जेतेपद पटकावले. ही लढत अतिशय चुरशीची झाली. पहिल्या गेममध्ये सर्वेशने आघाडीपासूनच वर्चस्व राखले. लौकिकने त्याला गाठण्याचा प्रयत्न केला. परंतु, सर्वेशने चांगला खेळ करून बाजी मारली. पहिल्या गेमच्या पिछाडीनंतर लौकिकने आत्मविश्वास न गमावता जबरदस्त पुनरागमन केले. त्याने पुढील दोन गेम जिंकून जेतेपद निश्चित केले.

यानंतर १५  वर्षांखालील मुलींच्या एकेरीच्या अंतिम फेरीत राधा गाडगीळने दुस-या मानांकित नव्या रांकाला १५-११, १५-१० असे पराभूत करून जेतेपद पटकावले.

आद्य पारसनीसला दुहेरी मुकुट

आद्य पारसनीस याने १९  आणि १७  वर्षांखालील मुलांच्या दुहेरीचे विजेतेपद मिळवून दुहेरी यश संपादन केले. आद्यने १९  वर्षांखालील मुलांच्या अंतिम फेरीत अनय चौधरीसह खेळताना अश्वजित सोनावणे-क्रिश खटवड जोडीवर १५-७, १२-१५, १६-१४ अशी मात केली आणि विजेतेपद पटकावले. यानंतर आद्यने १७ वर्षांखालील मुलांच्या अंतिम फेरीत कृष्णा जसूजासह खेळताना बाजी मारली. आद्य-कृष्णा जोडीने क्रिश खटवड-वेदांत सरदेशपांडे जोडीवर १५-१३, १५-११ अशी मात करून जेतेपद निश्चित केले. कृष्णाचेही हे दुहेरी यश ठरले. याआधी त्याने १७ वर्षांखालील मुलांच्या एकेरीचे जेतेपद मिळवले. त्या वेळी कृष्णाने आद्यला पराभूत केले होते. 

अंतिम फेरीचे काही निकाल : १७  वर्षांखालील मुली – दुहेरी – अदिती गावडे – जिज्ञासा चौधरी वि. वि. राधा फाटक – सुखदा लोकापुरे १५-१३, १५-११ उपांत्य फेरी – राधा फाटक – सुखदा लोकापुरे वि. वि. सिमरन धिंग्रा – सिया रासकर १५-११, ४-१५, १५-१२, अदिती गावडे – जिज्ञासा चौधरी वि. वि. शरयू रांजणे – सोयरा शेलार १५-८, १५-५.

१७  वर्षांखालील मिश्र दुहेरी – श्लोक डागा – सिया रासकर वि. वि. व्यास खोंडे – सिमरन धिंग्रा १५-८, १५-१७, १५-१२. उपांत्य फेरी – व्यास खोंडे – सिमरन धिंग्रा वि. वि. आदित्य कदम – श्राव्या शिवदे १५-६, १५-३, श्लोक डागा – सिया रासकर वि. वि. ओजस जोशी – अद्विका जोशी १६-१४, १५-१७, १५-१२. 

१५  वर्षांखालील मुली दुहेरी – जुई जाधव – यशस्वी काळे वि. वि. शरयू रांजणे – सोयरा शेलार १४-१६, १५-७, १५-४. जुई जाधव – यशस्वी काळे वि. वि. आर्या कुलकर्णी – सुखदा लोकापुरे १५-६, १५-८, शरयू रांजणे – सोयरा शेलार वि. वि. भक्ती पाटील – नाव्या रांका १७-१५, १५-११ .