पुणे:मान्सून सक्रिय झाला असून आज पुण्यात ,मुंबईत देखील पावसानं हजेरी लावली आहे. त्यामुळं उष्णतेपासून नागरिकांना दिलासा मिळाला आहे. राज्यात विदर्भासह कोकण आणि मुंबई परिसरात पावसानं चांगली हजेरी लावली आहे. या पावसामुळं शेतकऱ्यांना देखील काही प्रमाणात दिलासा मिळाला आहे. मात्र, काही ठिकाणी अद्यापही पावसाची प्रतिक्षा कायम आहे.पुण्यात पालखीचे आगमन समयी पावसाने अगदी अत्यल्प मिनिट अलगदच छिडकावा केला होता, त्यानंतर आज सकाळी पावसाने 10 ते 15 मिनिटे हलकासा वर्षाव केला.त्यानंतर दिवसभर अधून मधून पुण्यात पावसाच्या हलक्या सारी कोसळत होत्या .

दीर्घ प्रतीक्षेनंतर यवतमाळ जिल्ह्यात पावसाचे आगमन झालं आहे. या पावसामुळं बळीराजा सुखावला आहे. जून महिन्याच्या पहिल्याच आठवड्यापासून पावसाने दडी मारली होती.बळीराजा पावसाच्या प्रतीक्षेत होता. मात्र, आता पावसाला सुरुवात झाल्यानं शेतकरी सुखावला आहे.

मोठ्या प्रतीक्षेनंतर चिपळूणमध्ये मान्सूनच्या सरी बरसल्या आहेत. जून महिन्याच्या शेवटच्या आठवड्यात पावसाचे आगमन झाल्यानं शेतकरी सुखावला आहे. रत्नागिरी जिल्ह्यातील अनेक भागात पावसाच्या हलक्या सरी पडल्या. पावसाचे आगमन झाल्यानं शेतकऱ्यांचे दुबार पेरणीचे संकट टळले आहे. या पावसामुळं आता कोकणात शेतीच्या कामांना वेग येणार आहे. चिपळूणसह गुहागर, खेड, दापोली या भागात हलक्या पावसाला सुरवात झाली आहे.

पुढच्या आठवड्यात आषाढी वारीचा सोहळा आहे. त्यापूर्वीच पंढरपूरमध्ये पावसाला सुरुवात झाली आहे. या पावसामुळं पंढरपूर तालुक्यातील शेतकऱ्यांमध्ये आनंदाचे वातावरण पाहायला मिळत आहे.उष्णतेमुळं हैराण झालेल्या मुंबईकरांना दिलासा मिळाला आहे. कारण मुंबईत अखेर पावसाला सुरुवात झाली आहे. रात्री मुंबईच्या विविध भागात चांगला पाऊस झाला. तसेच ठाणे,नवी मुंबईच्या परिसरात देखील पावसानं हजेरी लावली.

पुणे – महापालिकेचे औंध कुटी रूग्णालय सर्व सोयीसुविधांनी युक्त करण्याचा निर्धार असून महापालिका आयुक्त विक्रम कुमार यांच्याकडे पाठपुरावा करेन, असे आमदार सिद्धार्थ शिरोळे यांनी आज (शुक्रवारी) जाहीर केले.

छत्रपती शिवाजीनगर विधानसभा मतदारसंघातील पुणे महापालिकेच्या औंध कुटी रुग्णालयाची पाहणी केली आणि रुग्णालयाच्या विविध समस्यांबाबत सविस्तर आढावा अधिकाऱ्यांसमवेत घेतला. या रुग्णालयाचा फायदा औंध परिसरातील गर्भवती महिला भगिनी घेतात. परंतु या रुग्णालयामध्ये सिझेरियन प्रसुतीची सोय नाही, तसेच रुग्णालयाची इमारत जुनी असून पावसाळ्यामध्ये गळती होते, या रुग्णालयात तज्ज्ञ डॉक्टरांची आवश्यकता आहे, अशा त्रुटी या भेटीदरम्यान निदर्शनास आल्या, असे आमदार शिरोळे यांनी सांगितले.

या समस्यांबाबत लवकरच पुणे महापालिका आयुक्त विक्रम कुमार आणि पुणे महापालिका आरोग्य प्रमुखांकडे पाठपुरावा करणार असून लवकरच या समस्या सोडवून औंध कुटी रुग्णालय सर्व सोयीसुविधायुक्त करण्यासाठी प्रयत्न करेन, असे आश्वासन आमदार शिरोळे यांनी रूग्णालय भेटीच्या वेळी दिले.

यावेळी बाळासाहेब रानवडे, आनंद छाजेड, सचिन वाडेकर, सचिन मानवतकर, सागर मदने, सुप्रीम चोंधे, सुशील लोणकर आदी उपस्थित होते.

BRS मध्ये प्रवेश

पुणे: लोकप्रिय नृत्यांगना सुरेखा पुणेकर यांनी राष्ट्रवादी काँग्रेसला रामराम करत BRS पक्षात प्रवेश केला आहे.

सुरेखा पुणेकर यांनी यापूर्वी राष्ट्रवादी काँग्रेस पक्षात मोठ्या धुमधडाक्यात प्रवेश केला होता. आता दोन दिवसांपूर्वीच त्यांनी हैदराबाद येथील भारत राष्ट्र समिती या पक्षात प्रवेश केला आहे. यापूर्वी प्रिया बेर्डे यांनी राष्ट्रवादी पक्षाला सोडचिठ्ठी देत भारतीय जनता पार्टीत प्रवेश केला होता. आता सुरेखा यांनीही पक्ष सोडत थेट हैदराबाद येथील BRS पक्षात प्रवेश केला आहे. तेलंगणाचे मुख्यमंत्री के. चंद्रशेखर राव यांच्या उपस्थितीत सुरेखा पुणेकर यांनी गुरूवारी (ता. २२ जून) पक्षप्रवेश केला

सुरेखा यांनी काही दिवसांपूर्वी विधानसभा निवडणूक लढवण्याची इच्छा व्यक्त केली होती. त्यामुळेच त्यांनी बीआरएसमध्ये पक्षप्रवेश केल्याचे सांगितले जात आहे. त्या मोहोळ किंवा देगूलूर या दोन मतदारसंघातून बीआरएसच्या तिकिटावर लढण्याची शक्यता आहे.

दरम्यान, सुरेखा पुणेकर या ‘बिग बॉस मराठी’ मध्ये सहभागी झाल्या होत्या. बिग बॉसमुळे त्या चांगल्याच चर्चेत आल्या. यानंतर त्यांनी राष्ट्रवादी काँग्रेसमध्ये प्रवेश केला आहे. त्यांच्या या निर्णयाने महाराष्ट्राच्या राजकारणात किती फरक पडणार हे पाहणं औसुक्याचं ठरणार आहे.

• चंद्रशेखर बावनकुळे यांचा मविआवर टोला
  • पुढच्या पिढ्यांची चिंता करण्याकरिता एक
  • मोदींनी संपूर्ण जगामध्ये भारत मांडला

पुणे – विरोधकांनी एकीची कितीही मूठ बांधली तरी त्यांना यश येणार नाही.एकवटेले विरोधक घराणेशाही टिकविण्यासाठी प्रयत्न करीत आहेत. ज्यांना महाराष्ट्र सांभाळता आला नाही ते दिल्ली काय सांभाळणार असा टोला भारतीय जनता पार्टीचे प्रदेशाध्यक्ष चंद्रशेखर बावनकुळे यांनी महाविकास आघाडीच्या नेत्यांना लगावला.पुण्यात ते पत्रकारांशी बोलत होते.

पैशापासून सत्ता व सत्तेपासून पैसा मिळविणाऱ्या विरोधकांची पुढची पिढी धोक्यात आली आहे.म्हणून त्यांना वाटतं की आम्ही आज एकत्र आलो नाही, तर आमचे सर्वकाही उद्ध्वस्त होईल. आम्ही केलेले काळे धंदे हे उघडकीस आल्याशिवाय राहणार नाही आणि म्हणून पुढच्या पिढ्यांची चिंता करण्याकरिता एकत्र आले आहेत.अशा बोलघेवड्या लोकांमुळे आम्हाला काहीही फरक पडणार नाही.आता महाराष्ट्राची जनता त्यांना साथ देणार नाही,असेही बावनकुळे म्हणाले.

विरोधकांनी कितीही वज्रमूठ बांधली तरीही मोदी जगातले सर्वोत्कृष्ट नेते म्हणून समोर आले आहेत. २०२४ मध्ये एनडीए ४०० हून अधिका जागांवर विजय मिळविणार ऐवढी ताकद पंतप्रधान मोदींच्या नेतृत्वात तयार झाली आहे.भारतातील प्रत्येक नागरिक मोदींना पंतप्रधान करण्यासाठी मतदान करेल. नरेंद्र मोदी यांनी संपूर्ण जगामध्ये भारत मांडला आहे आणि आजसुद्धा नरेंद्र मोदी अमेरिकेत भारताला मांडत आहेत.

आदित्य ठाकरेंच्या तक्रारीची चौकशी व्हावी महाराष्ट्रात सत्तेच्या माध्यमातून मुंबई महापालिकेत भ्रष्टाचार केला. मविआ सरकारच्या काळात कोविड घोटाळ्यासह एवढे काळे धंदे केले आहेत की, तक्रारीच्या आधारे चौकशी झाली असेल. अशा भ्रष्टाचाराची चौकशी झाली पाहिजे. आदित्य ठाकरे यांनी तक्रार केली असेल तर त्याचीही चौकशी झाली पाहिजे.

राष्ट्रवादी कॉंग्रेसमध्ये पुन्हा महानाट्य ओबीसी नेते राष्ट्रवादी सोडून जात आहे. म्हणून त्यांच्या पक्षात ओबीसी प्रदेशाध्यक्ष असावा,अशी मागणी पुढे आली आहे.राष्ट्रवादी ओबीसी विरोधी आहे. त्यामुळे आता त्यांना महाराष्ट्रात काहीही वाव नाही. त्यांच्याकडे असलेले मोठे ओबीसी नेते आता भाजपमध्ये येत आहेत.त्यामुळेच राष्ट्रवादी काँग्रेसमध्ये पुन्हा एकदा महानाट्य होईल आणि त्याचा शेवट शरद पवार करतील

पुणे, ता. २३ : अमेरिकेतील सौ. रजनी व अशोक शेंदुरे परिवाराने विद्यार्थी साहाय्यक समितीच्या पुण्यातील मुलींच्या वसतिगृहासाठी साडेतीन लाख डॉलर्सची (सुमारे २ कोटी ८० लाख रुपये) देणगी नुकतीच जाहीर केली. ग्रामीण भागातील मुलींची पुण्यात उच्च शिक्षणाला येण्यासाठी संख्या वाढते आहे. परवडणारा दर आणि सुरक्षितता यादृष्टीने त्यांचा समितीकडे कल असतो. परंतु, मर्यादित जागांमुळे प्रवेशाला अडचणी येत होत्या. त्यावर मार्ग काढण्यासाठी समितीने शिवाजी हौसिंग सोसायटी जवळील जागेत मुलींसाठी नवीन वसतिगृहाचे बांधकाम सुरु केले आहे.
या वसतिगृहाच्या एका विंगसाठी ही देणगी देण्यात आली. त्यातून ८४ मुलींच्या निवासाच्या व्यवस्थेचा प्रश्न मार्गी लागणार आहे. शेंदुरे परिवार मूळचे कोल्हापूरजवळील असून पन्नासहून अधिक वर्षे अमेरिकेत वास्तव्याला आहेत. महाराष्ट्र फौंडेशनचे अध्यक्ष राजीव भालेराव काही महिन्यांपूर्वी पुण्यात आल्यावर समितीचे काम पाहण्यासाठी आले होते. त्यावेळी या विधायक कामाला आर्थिक मदत उभारण्याचे त्यांनी आश्वासन दिले होते. अमेरिकेत गेल्यावर शेंदुरे परिवाराशी समितीच्या कामाबाबत चर्चा करून या देणगीबाबत विनंती केली. त्यांच्या आणि समितीचे विश्वस्त डॉ. मकरंद फडके यांच्या पाठपुराव्यामुळे या मुलींच्या वसतिगृहाच्या कामासाठी मोठा आर्थिक हातभार लाभला आहे.

आर्किटेक्चरल डिझाईन स्पर्धांतील  राष्ट्रीय विजेत्यांचा संवाद
 पुणे :
शहराचे वैभव ठरणाऱ्या ‘ आयकॉनिक ‘ इमारती तयार होताना त्या मागे असणारी वास्तुरेखाकाराची दृष्टी, योगदान, कष्ट याची निर्माण कथा शुक्रवारी उलगडली.. निमित्त होते ‘सस्टेनॅबिलिटी इनिशिएटिव्हज् ‘ संस्थेने आयोजित केलेल्या चर्चासत्राचे .. 
सार्वजनिक उपयोजन असलेल्या महत्वपूर्ण सरकारी इमारतींना सुंदर रुपडे देताना काय करावे लागते, याचा रोचक प्रवास त्यातून उलगडला.. ! या स्पर्धा आर्किटेक्ट टीमला अद्ययावत ठेवते, त्यामुळे सहभाग घेत राहावे, हार -जीत न मानता नव्या गोष्टी शिकत राहावे, असा सूर या चर्चासत्रात उमटला.
‘सस्टेनॅबिलिटी इनिशिएटिव्हज’या संस्थेतर्फे ‘आर्किटेक्चरल डिझाईन कॉम्पिटिशन्स -पुशिंग द एज इन आर्किटेक्चर प्रोफेशन’ या विषयावर चर्चासत्राचे आयोजन करण्यात आले होते. सार्वजनिक बांधकाम खात्याचे मुख्य अभियंता अतुल चव्हाण यांनी या चर्चासत्राला प्रमुख पाहुणे म्हणून दूरदृश्य प्रणालीद्वारे संबोधित केले.  सुनील पाटील (संचालक सुनील पाटील अँड असोसिएट्स),कल्पक भंडारी( संचालक, विकास स्टुडिओ), विजय साने (पार्टनर, व्ही.के.: यु ,अर्बन) हे मान्यवर या चर्चासत्रात सहभागी झाले. राष्ट्रीय स्तरावरील वेगवेगळ्या आर्किटेक्चरल डिझाईन कॉम्पिटिशन मधील विजेते असलेल्या या मान्यवरां  त्यांचे अनुभव आणि विचार या चर्चासत्रात मांडले.
२३ जून रोजी सायंकाळी ५ ते ७ या दरम्यान  सेनापती बापट रस्त्यावरील मराठा चेंबर ऑफ कॉमर्स च्या  सुमंत मुळगावकर सभागृह येथे हे चर्चासत्र झाले .आर्किटेक्चर चे विद्यार्थी,आर्किटेक्ट व्यावसायिक,तसेच या क्षेत्राशी संबंधित व्यक्ती या चर्चासत्रात सहभागी झाले. ‘ अनबिल्ट ‘ या पुस्तकाची माहिती चर्चासत्रात देण्यात आली.
अतुल चव्हाण म्हणाले, ‘सामान्य जनतेच्या संबंधित सरकारी इमारती आल्हाददायक , उपयुक्त , पर्यावरणपूरक व्हाव्यात, चांगल्या वास्तू उभारण्यात आर्किटेक्ट समुदायाचे योगदान मिळावे. ‘
सातारा नगरपरिषदेच्या नव्या प्रशासकीय इमारतीच्या आराखड्याची माहिती कल्पक भंडारी यांनी दिली.  सुनील पाटील यांनी पुणे जिल्हाधिकारी कार्यालयाच्या आराखड्याचे सादरीकरण केले.विजय साने यांनी कटरा (जम्मू ) येथील इंटरमोडल स्टेशन इमारतीच्या आराखडयाचे सादरीकरण केले.

द्वैपायन चक्रवर्ति यांनी सूत्रसंचालन केले. अपूर्वा कुलकर्णी यांनी प्रास्ताविक केले.ज्येष्ठ आर्किटेक्ट विश्वास कुलकर्णी, ज्येष्ठ आर्किटेक्ट विकास भंडारी,ह्रषिकेश कुलकर्णी , आर्किटेक्ट असोसिएशनचे  पराग लकडे , अमोल उंबरजे,  विजय साने,   विशाल देशमुख, दीपा बोकील आदी उपस्थित होते.

‘सस्टेनॅबिलिटी  इनिशिएटिव्हज’  ही संस्था आर्किटेक्चर क्षेत्रातील व्ही.के. ग्रुप या कंपनीचा  एक उपक्रम आहे. व्ही.के. ग्रुपच्या सुवर्ण महोत्सवी वर्षानिमित्त गोल्डन डायलॉग ही चर्चासत्रांची मालिका आखण्यात आली असून हे चर्चासत्र या मालिकेतील तिसरे चर्चासत्र होते. 

सुनील पाटील म्हणाले, ‘ पुणे जिल्हाधिकारी कार्यालयाची उभारणी करताना शंभरहून अधिक झाडे वाचविणे हे आव्हान होते. नैसर्गिक उजेड, हवा खेळती राहील, कामे घेऊन येणाऱ्या नागरिकांना थांबायला जागा मिळेल, वाहनांना चांगली जागा मिळेल याचा विचार केला. सरकारी यंत्रणेला आपण चांगल्या संकल्पना व्यवस्थित समजावून सांगितल्या तर त्या स्वीकारल्या जातात, असा अनुभव या प्रकल्पातून आला.  सरकारी काम करताना संयम ठेवावा लागतो. या दरम्यान अधिकारी बदलतात, सरकारे बदलतात, ब्रीफ बदलतात. पण, आपण आपल्या संकल्पनांवर ठाम राहावे लागते. कारण, या इमारती दशकानुदशके समाजाकडून उपयोगात येतात. एक योगदान म्हणून आर्किटेक्ट मंडळींनी याकडे पाहावे. ‘
‘क्लायंट ब्रीफ देतात  तेव्हा त्यातील आशय लक्षात घ्यावा लागतो, दोन ओळींच्या मध्ये न लिहिलेला आशय समजून घेणे आवश्यक असते ‘, असे विजय साने यांनी सांगीतले.
‘कटराला रोज ५० हजार भाविक भेट देतात. त्यांना बस, रेल्वे, हेलिकॉप्टर, कार, रोपवे सहित राहण्याची सुविधा असणारा परिसर उभारायचा होता. २५ एकर जागेत जागतिक दर्जाच्या या सेंटरची उभारणी करण्यात यश आले ‘, असे विजय साने यांनी सांगितले.

पुणे- शिवाजीनगर भागामध्ये महानगरपालिका, विद्यापीठ, अभियांत्रिकी कॉलेज, गोखले इन्स्टिट्यूट अशा अनेक महत्त्वाच्या वास्तू आहेत. परंतु या सर्व ठिकाणी नुसताच सुशोभीकरणाचा धडाका चालू आहे. सुशोभिकरण म्हणजे विकास नव्हे.उड्डाणपूल पाडले जात आहेत. मेट्रोचे खांब उभे होत आहेत. नदी रुंदी कमी केली जात आहे. परंतु जनसामान्याचा मुख्यत्वे गोखले नगर जनवाडी वैदुवाडी या भागाचा विकास हा थांबलेला आहे असा आरोप आम आदमी पार्टीचे मुकुंद किर्दत यांनी केला. गुरुवार दिनांक 22 रोजी गोखलेनगर भागातील कुसाळकर चौकामध्ये आम आदमी पार्टीतर्फे स्वराज्य संवाद सभा घेण्यात आली, त्यावेळेस ते बोलत होते

प्रभात ७ आणि १४ मधील निम्मे नगरसेवक गायब आहेत आणि त्यामुळे जनतेचे प्रश्न सुटत नाहीत. गेले दीड वर्ष प्रशासनाचा कारभार असल्यामुळे तिथे बंद पडलेली ई टॉयलेट, अनेक वर्षे बांधकाम चालू असलेले भाभा हॉस्पिटल, सतत वाहतूक कोंडी झालेला फर्ग्युसन रोड आहे. या भागात एकही सुसज्ज इस्पितळ नाही. त्यावर कोणीही बोलत नाही अशी टीका सनी मुरुडकर यांनी केली. या सर्वच पक्षांच्या बेफिकिरी मुळे आणि बेताल कार्यपद्धतीमुळे आता आम आदमी पार्टी हाच एकमेव पर्याय उरला आहे असं अभिमान विटकर यांनी म्हटले.
शंकर थोरात यांनी मेट्रो डी पी प्रमाणे बांधकाम करीत नसल्याचा आरोप केला.

दिल्ली आणि त्यानंतर पंजाब मध्ये उत्तम मोहल्ला क्लिनिक उभे करून आणि जगमान्य शाळा उभ्या करून आम आदमी पार्टीने एक आदर्श घालून दिला आहे आणि हे मूलभूत मुद्दे प्रथमच राजकीय मुद्दे बनले आहेत असे डॉक्टर अभिजीत मोरे यांनी सांगितले.
निलेश वांजळे यांनी सूत्र संचालन केले.
यावेळेस मोठ्या संख्येने स्थानिक नागरिक तसेच आपचे अजित फाटके पाटील,सतीश यादव, शंकर थोरात विकास लोंढे, नाज शेख , अक्षय शिंदे आदी उपस्थित होते.