जीआर काढला पण अर्थमंत्र्यांचे नावच दिले नाही.. याचा अर्थ हे खाते रिक्त …

मुंबई-ज्या अजित पवारांनी राज्याचे अर्थमंत्री असताना आपल्याला निधी दिला नाही, असा आरोप करत शिंदे गट मविआतून बाहेर पडला, त्याच अजित पवारांकडे आता अर्थखाते जाण्याची शक्यता आहे. सध्या शिंदे सरकारमध्ये अर्थ खात्याचा कारभार देवेंद्र फडणवीस सांभाळत आहेत. मात्र, शासनाच्या एका जीआरमुळे या खात्यात लवकरच बदल होण्याचे संकेत दिले जात असून हे खाते अजितदादांकडेच जाण्याची शक्यता वर्तवली जात आहे.राज्य सरकारने एक जीआर जारी केला आहे. 7 जुलै 2023चा हा जीआर आहे. विदर्भ, मराठावाडा, उत्तर महाराष्ट्रातील औद्योगिक ग्राहकांना वीजदरात सवलत देण्याबाबत धोरणात्मक निर्णय घेण्यासाठी मंत्रिमंडळ सुधारित उपसमिती स्थापन करण्यासाठीचा हा जीआर आहे.

देवेंद्र फडणवीस यांच्या अध्यक्षतेखाली ही समिती स्थापन करण्यात आली आहे. जीआरनुसार एकूण पाच सदस्यांची ही समिती आहे. या समितीत सुधीर मुनगंटीवार, उदय सामंत, अतुल सावे यांचाही समावेश आहे. या सर्वांच्या नावापुढे ते कोणत्या खात्याचे मंत्री आहेत, हे स्पष्ट सांगण्यात आले आहे. मुनगंटीवार यांच्या नावापुढे कंसात वनमंत्री असा उल्लेख करण्यात आला आहे. उदय सामंत यांच्या नावापुढे उद्योग मंत्री आणि अतुल सावे यांच्या नावापुडे सहकार मंत्री म्हणून उल्लेख करण्यात आला आहे. तर देवेंद्र फडणवीस यांच्या नावापुढे ऊर्जा मंत्री उल्लेख करण्यात आला आहे. त्यांच्या नावापुढे अर्थमंत्री असा उल्लेख करण्यात आलेला नाही.

विशेष बाब म्हणजे या जीआरमध्ये पाच सदस्यांच्या यादीत फडणवीस यांच्यानंतर एक पद रिक्त ठेवले आहे. त्यात फक्त अर्थमंत्री असा उल्लेख केला आहे. अर्थमंत्र्याच्या नावाचा उल्लेख केलेला नाही. अर्थखाते फडणवीस यांच्याकडे असतानाही फडणवीस यांचा उल्लेख तिथे करण्यात आलेला नाही. त्यामुळे अर्थमंत्रीपद अजित पवार यांनाच दिले जाणार असल्याचे संकेत मिळत आहेत.

अजित पवार महाविकास आघाडीत अर्थमंत्री होते. तेव्हा त्यांनी निधी दिला नाही, त्यामुळे मतदारसंघाचा विकास होत नसल्याचं सांगत शिवसेनेच्या नेत्यांनी बंड केले. आता तेच अजित पवार शिंदे सरकारमध्ये आले आहेत. त्यामुळे शिंदे गटाची गोची झाली आहे. त्यातच त्यांना अर्थमंत्रीपद देण्याची चर्चा सुरू झाल्यानंतर शिंदे गटाकडून या निर्णयाला विरोध होण्याची शक्यता आहे. अजित पवार यांना अर्थमंत्रीपद दिल्यास आपल्या बंडातील हवाच निघून जाईल, मतदारसंघात आपली नाचक्की होईल, उद्धव ठाकरेंवरील आरोप निखालस खोटे असून आपण 50 खोक्यांसाठीच बंड केल्याचं अधोरेखित होईल, अशी भीतीदेखील शिंदे गटाच्या आमदारांनी मुख्यमंत्री एकनाथ शिंदेंकडे व्यक्त केल्याचे सांगितले जात आहे.

येवला -अजित पवाराच्या राष्ट्रवादी काँग्रेसमधील बंडखोरीनंतर शरद पवार यांची शनिवारी नाशिकच्या येवल्यात जाहीर सभा झाली. या सभेत त्यांनी अजित पवारांसोबत पक्षाशी बंडखोरी करणाऱ्या छगन भुजबळ यांच्यावर तिखट हल्ला चढवला. तसेच आगामी निवडणुकीत त्यांना पराभूत करण्याचे मतदारांना आवाहन केले. येवला हा भुजबळांचा विधानसभा मतदार संघ असल्यामुळे पवारांच्या येथील सभेला महत्त्व प्राप्त झाले आहे.

 यावेळी शरद पवार म्हणाले, १०-१२ दिवसांपूर्वी देशाचे पंतप्रधान नरेंद्र मोदी यांनी एक भाषण केलं. या भाषणात त्यांनी नेहमीप्रमाणे काँग्रेसवर हल्लाबोल केला. वेगवेगळे आरोप केले. हे करत असताना त्यांनी राष्ट्रवादी काँग्रेसवरही आरोप केले. त्यांनी त्यांच्या भाषणात एक-दोन उदाहरणं सांगितली. भ्रष्टाचाराचे आरोप केले. मी आज राष्ट्रवादी काँग्रेसचा अध्यक्ष म्हणून सांगतो, त्यांनी जे काही आरोप केले असतील, त्यात भ्रष्टाचाराचे आरोप असतील किंवा आणखी काही असेल, त्यावर त्यांनी कारवाई करावी.

शरद पवार म्हणाले, माझं देशाच्या पंतप्रधानांना जाहीरपणे सांगणं आहे की, संपूर्ण देशाची सत्ता त्यांच्या हातात आहे. ती त्यांनी लावावी आणि आमच्यापैकी कोणी जर भ्रष्टाचारात सहभागी आहे असं तुम्हाला वाटत असेल, तर तुमची असेल नसेल ती सगळी सत्ता वापरा, चौकशी करा, तपास करा आणि जो चुकीच्या रस्त्यावर गेलाय असं तुम्हाला वाटेल किंवा तुमचा तसा निष्कर्ष निघेल त्याला हवी ती शिक्षा द्या. त्यासाठी तुम्हाला आमचा पाठिंबा असेल.

शरद पवार पुढे बोलताना म्हणाले की, माझा छगन भुजबळांविषयची अंदाज चुकला. यासाठी मी तुमची माफी मागण्यास आलोय, असे त्यांनी मतदारांना उद्देशून म्हटले. तर त्यांनी विविध विषयाला हात लावत जुन्या जाणत्या नेत्यांची आठवण करत नाशिककरांनी मला जोरदार साथ दिली आहे. असे सांगितले. संकटाच्या काळात येथील जनता पुन्हा राष्ट्रवादीच्या पाठिशी उभी राहिल, असा विश्वास त्यांनी व्यक्त केला.

गडी काय अजून पाहिलाच नाही?
व्यक्तिगत बोलणे कधीच थांबत नसते. वय झाले ते खरे आहे पण गडी काय आहे अजून पाहिला कुठे, असे सांगत त्यांनी बंडखोरांना इशारा दिला. त्यामुळे उगं वयाबियाच्या भानगडीत पडू नका, वय आणि व्यक्तीगत भावना आम्हाला कोणी शिकवू नये. व्यक्तिगत हल्ले कधी अजिबात झालेले नाही. ते त्यांनी करू देखील नाही. या जनतेच्या विश्वासाला ज्या पद्धतीने तडा दिला. ते चुकीचे आहे.

एकीकडे बाप म्हणायचे दुसरीकडे घाव घालायचा- जितेंद्र आव्हाड

14 आमदार नाशिकरांनी दिली आहे. येवल्यांच्या बंधू बघिणींना सांगतो की, गोपिनाथ मुंडें यांचे मोठे भाऊ पंडीतराव मुंडे हे शरद पवार साहेबांकडे तीनदा गेले आहेत. त्यांनी पवार साहेबांना तीनदा विनंती केली आहे. आम्हाला तुमच्याबरोबर यायचे आहे. तेव्हा त्यांनी नकार दिला. आज भुजबळ बोलतात की, गोपिनाथ मुंडे यांचे घर फोडले? या आरोपाला काहीही अर्थ नाही. तेव्हा पवार साहेबांनी गोपिनाथ मुंडे यांना फोन करून सांगितले आहे. आम्ही दुसऱ्या मार्गाने निघाले आहोत. महाराष्ट्राचे स्वभावामध्ये विठ्ठलावर तलवार चालविणे, एकीकडे बाप म्हणायचे दुसरीकडे घाव घालायचा. ही महाराष्ट्राची संस्कृती नाही. असे जितेंद्र आव्हाड यांनी म्हणाले.

गोदावरी काठचा पवित्र जिल्हा निवडला. तुमचा कांदा, द्राक्षावर संकट आले तेव्हा हा माणूस उभा राहिला. भुजबळ देखील 75 वर्षांचे आहात. वय हे अंक आहे. हे समजून घ्या. त्यांना पंतप्रधान ना, ना राष्ट्रपती व्हायचा आहे. आता त्यांना दलित, शोषित एकच नाव आहे. त्या व्यक्तीचे नाव आहे. शरद पवार. आपला बापाला आधार म्हणून उभे राहायचे आहे. त्यांच्या पाठिशी उभे राहायचे आहे, असे आव्हान त्यांनी केले.

निती, अनितीची ही लढाई

अमोल कोल्हे म्हणाले की, कुरूक्षेत्रासारखी परिस्थिती सद्या राज्यात आहे. समोर रक्ताची माणसं आहे. तेव्हा लढाई रक्ताच्या नात्यांशी आहे. पण यात निती, अनितीची ही लढाई आहे. या लढाईत खडा कोणी टाकला तर तो शकुनी मामाने. अन् तो शकुनी मामाचा आकार कमळाच्या फूलासारखे आहे की, टरबूजासारखा. हे जनताच ठरवेल. आणि या शकूनी मामाला दूर करून आपल्याला पक्ष संघटन करत लढाई लढायची आहे.

अच्छे दिन दिसलेच नाही
अमोल कोल्हे यांनी पुढे बोलताना मोदी सरकारवर देखील निशाणा साधला. ते म्हणाले की, आता अच्छे दिन दिसलेच नाही. वारंवार पक्ष फोडले का जाताहेत. महागाई कमी झाली का? नोकरी मिळणार होती त्या मिळाल्या का? आज जेव्हा देशातील परिस्थिती बघा, सगळीकडे भाजपला हद्दपार करायला लोक लागले. तेव्हा अशाप्रकारे फोडाफोडीचे राजकारण सुरू आहे. पण मतदारांचा विश्वास उडाला आहे. कारण मतदारांना बोटावरील शाई ही चुना वाटायला लागली आहे.

त्यांना पांडुरंग समजला नाही
काही जण म्हणतात की, पांडुरंगाला बडव्यांनी घेरले. पण त्यांना पांडुरंग समजलाच समजलाच नाही. त्यामुळे अशा प्रकारचे आरोप त्यांच्याकडून करून संधीसाधूचा डाव साधला जात आहे. अशा लोकांना येत्या निवडणूकीत नक्कीच जागा दाखवायची आहे, असे आव्हान राष्ट्रवादीचे नेते तथा खासदार अमोल कोल्हे यांनी केला.

सुळे,कोल्हे, आव्हाड, रोहित पवारांचे शक्तिप्रदर्शन
येवल्यातील सभा संपल्यानंतर सुप्रिया सुळे, अमोल कोल्हे रोहित पवार, जितेंद्र आव्हाड यांच्या रॅलीला नागरिकांनी जोरदार स्वागत केले. भुजबळांच्या येवल्यात राष्ट्रवादी पवार गटाकडून झालेल्या शक्तीप्रदर्शनाला नागरिकांनी उदंड प्रतिसाद दिल्याचे दिसून आले.

नाशिक : नाशिकला येत असताना वरुणराजाने आपले चांगले स्वागत केले याचा आनंद शरद पवार यांनी व्यक्त करतानाच उपस्थित नाशिककरांना पावसाची स्थिती काय आहे अशी विचारणा केली त्यावेळी पुरेसा पाऊस नाही ही बाब शरद पवार यांच्या निदर्शनास आणून दिली. त्यावेळी शरद पवार यांनी आम्ही निघाल्यावर पावसाचे थेंब जसे टाकले तसे संबंध जिल्हयात, राज्यात पावसाचा शिडकाव कर आणि शेतकऱ्यांचा प्रश्न मार्गी लाव अशी प्रार्थना वरुणराजाकडे केल्याचे माध्यमांना सांगितले.यशवंतराव चव्हाण महाराष्ट्राचे पहिले मुख्यमंत्री झाले. चीनचे संकट देशावर आल्यानंतर जवाहरलाल नेहरुंनी त्यांना दिल्लीत बोलावून घेतले आणि देशाच्या रक्षणाची जबाबदारी संरक्षण मंत्री म्हणून दिली. चव्हाणसाहेबांचा लोकसभेत प्रवेश हा नाशिकमधून झाला होता. नाशिककरांनी त्यांना अविरत साथ दिली ही पार्श्वभूमी आहे. त्यामुळे आपल्या कामाची सुरुवात नाशिकमधून करावी वाटल्याने आज दौऱ्याची सुरुवात केल्याचे शरद पवार पत्रकार परिषदेत स्पष्ट केले.छगन भुजबळ यांचा मुंबईत पराभव झाल्यानंतर त्यांनी विधानसभेत आपली आवश्यकता असल्याची इच्छा व्यक्त केली आणि मग नाशिकच्या लोकांशी चर्चा केल्यानंतर येवल्यातून निवडणूक लढवावी असे सूचवले. येवला आमच्या विचारांचा तालुका आहे. १९८० साली आम्ही कॉंग्रेसमधून बाहेर पडलो. कॉंग्रेस (एस) पक्ष स्थापन केला. त्यावेळी नाशिककरांनी सर्व जागा आम्हाला निवडून दिल्या. लागोपाठ दोनदा जर्नादन पाटील हे निवडून आले होते. त्यामुळे भुजबळसाहेबांना सेफ जागा द्यायची होती म्हणून त्या मतदारसंघातील लोकांची संमती घेतली व आम्हाला यश आले असेही छगन भुजबळ यांना येवला मतदारसंघ कसा दिला याचा इतिहास शरद पवार यांनी माध्यमांना सांगितला.वयानुसार थांबले पाहिजे या अजितदादा पवार यांच्या वक्तव्यावर पत्रकारांनी विचारलेल्या प्रश्नावर बोलताना अटलबिहारी वाजपेयी यांच्या कवितेतील ‘ना टायर्ड हू ना रिटायर्ड हू’ …या ओळीची आठवण शरद पवार यांनी करुन दिली.आताच्या मंत्रीमंडळात ६० ते ७० वयोगटातील लोक आहेत. १९७८ मध्ये मुख्यमंत्री होतो त्यावेळी एक व्यक्ती माझ्या नजरेसमोर होती त्यांचे नाव मोरारजी देसाई होते. ते पंतप्रधान असताना त्यांचे ८४ वय होते. वय असते… नाही असे नाही… पण केवळ वयच नाही तर प्रकृती चांगली ठेवली तर त्या प्रकृतीने चांगली कामे करायला वय कधी अडथळे आणत नाही असेही शरद पवार यांनी स्पष्ट केले.

मुंबई तक नामक न्यूज पोर्टलला दिलेल्या मुलाखतीत शरद पवार म्हणाले ….

अजित पवारांना काही कमी केले नाही

सुप्रियाला नव्हे इतरांना संधी दिली.

घराणेशाहीचे आरोप निराधार

मुंबई-अजित पवारांच्या बंडामुळे राष्ट्रवादी काँग्रे्समध्ये उभी फूट पडली आहे. त्यामुळे विखुरलेला पक्ष पुन्हा उभा करण्यासाठी शरद पवार स्वतः मैदानात उतरेलत. अजित पवारांनी बंडखोरी करताना पवारांवर सुप्रिया सुळेंमुळे आपल्याला संधी देण्यात येत नसल्याचा आरोप केला होता. पवारांनी मुंबई तक नामक न्यूज पोर्टलशी संवाद साधताना यावर स्पष्टीकरण दिले. ते म्हणाले – मी अजितला राज्यमंत्री, कॅबिनेट मंत्रीपद दिले. तीन-चारदा उपमुख्यंमत्रीही केले. याऊलट सुप्रियाला काय दिले? तुम्हीच तुलना करा.

अजित पवारांनी बंडखोरी करताना ते तुमचे पुत्र नाहीत म्हणून त्यांना संधी मिळाली नाही, असा आरोप केला. हे सर्वकाही उत्तराधिकारी निवडल्यामुळे घडले का? असा प्रश्न पत्रकारांनी शरद पवारांना केला होता. त्यावर शरद पवार म्हणाले. माझी यावर जास्त बोलण्याची इच्छा नाही. विशेषतः कुटुंबाशी संबंधित मुद्यावर मला फार बोलायाचे नाही. ते मला आवडतही नाही. केवळ एकच गोष्ट मी तुमच्या निदर्शनास आणू इच्छितो की, अजित पवार यांना सुरुवातीला राज्यमंत्री म्हणून जबाबदारी मिळाली. त्यानंतर त्यांना कॅबिनेट मंत्री केले. एवढेच नाही तर त्यांना तीन ते चारवेळा उपमुख्यमंत्री म्हणूनही संधी दिली.

शरद पवार पुढे म्हणाले की, आता ते सुप्रियाविषयी बोलत आहेत. तुम्हीच तुलना करा. एकाला तीन-चारवेळा उपमुख्यमंत्री व एकदा मंत्रीपद दिले. आणि दुसऱ्याला एकही असे महत्त्वाचे पद दिले नाही. केंद्रीय पातळीवर राष्ट्रवादी काँग्रेसचा नेत्याला मंत्रीपदाची संधी मिळाली, तेव्हा आम्ही सूर्यकांता पाटील यांना संधी दिली. त्यावेळी सुप्रिया सुद्धा खासदार होती. त्यानंतर पक्षाला दुसऱ्यांदा संधी मिळाली, तेव्हा पी ए संगमा यांच्या मुलीला संधी देण्यात आली. तेव्हाही सुप्रिया संसदेत उपस्थित होत्या. त्यानंतर तिसऱ्या वेळी प्रफुल्ल पटेल यांना संधी देण्यात आली. पण मी सुप्रियाला एकदाही मंत्रीपदाची संधी दिली नाही, असे पवार म्हणाले.

प्रफुल्ल पटेलांचा लोकसभा निवडणुकीत पराभव झाला होता. त्यानंतरही त्यांना मंत्रिमंडळात संधी देण्यात आली. सुप्रिया सुळे लोकसभेत निवडून आल्या असतानाही मी इतर लोकांना संधी दिली, असे शरद पवार आपल्यावर होणारे घराणेशाहीचे आरोप निराधार असल्याचा दावा करत म्हणाले.

पक्ष सोडून गेलेल्या नेत्यांचा गेम प्लॅन भाजपच्या मुख्यालयात तयार झाला आहे. ते जसे सांगत आहेत, तसे आमचे सहकारी करत आहेत. यापेक्षा कोणतीही वेगळी गोष्ट नाही, असेही शरद पवार यावेळी अजित पवार व त्यांच्या सहकाऱ्यांवर निशाणा साधताना म्हणाले.

माझा अंदाज योग्य ठरला नाही, हा माझा दोष

नाशिक -राष्ट्रवादीचे नेते अजित पवार यांनी पुकारलेल्या बंडानंतर राष्ट्रवादी काँग्रेस पक्षात फूट पडली.यानंतर शरद पवार हे जोमाने पक्षबांधणीच्या कामाला लागले आहेत. पक्षातील बंडानंतर त्यांची आज पहिल्यांदाच छगन भुजबळ यांच्या बालेकिल्ल्यात जाहीर सभा होत आहे. या सभेपूर्वी शरद पवरांनी नाशिक येथे पत्रकारपरिषद घेतली.अजित पवारांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या उपस्थितीत उपमुख्यमंत्री पदाची शपथ घेतली, त्यांच्यासोबत छगन भुजबळ यांनी देखील मंत्रिपदाची शपथ घेतली. दरम्यान दोन वर्ष तुरुंगातून बाहेर आल्यानंतर भुजबळांना मंत्रिमंडळात स्थान दिलं, त्यांच्या वाईट काळात त्यांच्यावर विश्वास दाखवला. ते भुजबळ तुम्हाला सोडून गेले याचं वाईट वाटतं का असा प्रश्न शरद पवारांना विचारण्यात आला.पवार म्हणाले की, यातून माणसाचं कॅरेक्टर कळतं. माझ्या स्वतःबद्दल वाटतं इतराबद्दलं नाही, तेही एकाच गोष्टीचं वाटतं की, माझा अंदाज योग्य ठरला नाही, हा माझा दोष आहे मी दुसऱ्याला दोष देणार नाही, असे शरद पवार म्हणाले. २०२४ मध्ये भुजबळांना लोक स्वीकारतील का? असे विचारले असता पवार म्हणाले की, जे आमच्या पासून दूर गेले त्यांच्याबद्दल भाष्यच करायला नको, लोक ठरवतील मी कोण ठरवणार.

मुंबई: वर्षा निवासस्थानी उपमुख्यमंत्री देवेंद्र फडणवीस यांनी मुख्यमंत्री एकनाथ शिंदे यांची भेट घेतली. फडणवीस हे सव्वा अकरा वाजण्याच्या सुमारास वर्षा निवासस्थानी दाखल झाले होते. त्यानंतर रात्री एक वाजून चोवीस मिनीटांनी फडणवीस तेथून बाहेर पडले.राष्ट्रवादीच्या नेत्यांना मंत्रीपदाची संधी दिल्यामुळं शिंदे गटातील काही आमदार नाराज झाले आहेत. कारण या मंत्रीमंडळ विस्तारात शिंदे गटातील काही आमदारांना मंत्रीपदाची संधी मिळेत अशी आशा होती. मात्र, राष्ट्रवादी काँग्रेसच्या आमदारांनी मंत्रीपदाची संधी देण्यात आली. मुख्यमंत्री आणि उपमुख्यमंत्री लवकरच मंत्रीमंडळाचा विस्तार होणार असल्याचे सांगत आहेत. त्याच अनुषंगाने रात्रीच्या बैठकीत चर्चा झाल्याची शक्यता देखील वर्तवली जात आहे. त्यामुळं आता पुढच्या मंत्रीमंडळ विस्तारत नेमकी कोणाला संधी मिळणार हे पाहणं महत्वाचं ठरणार आहे.मंत्रिमंडळ विस्तारासोबत महामंडळाचे देखील लवकरात लवकर वाटप करत नाराजी दूर करण्याचा प्रयत्न शिंदे आणि फडणवीस यांच्याकडून करण्यात येणार आहे. राष्ट्रवादी काँग्रेस जरी सत्तेत सोबत असली तरी भाजप आणि शिवसेनेच्या आमदारांवर अन्याय होणार नाही याची काळजी घेतली जाणार आहे. हीच बाब दोन्ही गटाच्या आमदारांना मुख्यमंत्री-उपमुख्यमंत्री पटवून देणार असल्याची माहिती सूत्रांनी दिली.

सध्या राज्यात सातत्यानं विविध राजकीय घडामोडी घडत आहे. वर्षभरापूर्वी शिवसेनेचे नेते एकनाथ शिंदे यांनी 40 आमदारांसह बंड करत गुवाहाटी गाठली होती. त्यांनतर त्यांनी भाजपबरोबर सरकार स्थापन करण्याचा निर्णय घेतला होता. यामध्ये एकनाथ शिंदे यांनी मुख्यमंत्री पदाची संधी मिळाली तर देवेंद्र फडणवीस हे उपमुख्यमंत्री झाले. त्यानंतर आता राष्ट्रवादीचे नेते आणि तत्कालीन विरोधी पक्षनेते अजित पवार यांनी राष्ट्रवादी काँग्रेसमध्ये बंड केले. त्यांनी देखील काही आमदारांसह सरकारमध्ये सामील होण्याचा निर्णय घेतला. यामध्ये अजित पवार हे पुन्हा पाचव्यांदा उपमुख्यमंत्री झाले तर अन्य राष्ट्रवादीच्या 8 जणांना मंत्रीपदाची संधी मिळाली आहे.