पुणे-डीआरडीओ संशोधन आणि विकास विभाग संचालक डाॅ. प्रदीप कुरुलकर याने डीआरडीआेच्या आर अँड डीमधील विकसित केलेल्या प्रकल्पाबाबतची संवेदनशील माहिती पाकिस्तानी हेर झारादास गुप्ता हिला हस्तांतरित केल्याचे स्पष्ट झाले आहे. कुरुलकर याने झारादास गुप्तासोबत केलेले वेगवेगळे व्हाॅट्सअॅप चॅट तपास यंत्रणेस सापडले असून त्यात कुरुलकर याने ब्रह्मोस मिसाइल, अग्नी-६ मिसाइल, आकाश मिसाइल, अस्त्र क्षेपणास्त्र, ड्रोन प्रोजेक्ट, रुस्तम प्रोजेक्ट, क्वापटर, इंडियन निकुंज, पराशर, यूसीएव्ही, डीआरडीआे ड्यूटी चार्ट, मिसाइल लाँचर, मेटोर मिसात्तर्ल, एमबीडीए, राफेल आदींबाबत चर्चा करून त्यातील काही माहिती पुरवल्याचे दहशतवादविरोधी पथकाने न्यायालयात दाखल केलेल्या दोषारोपपत्रात सांगण्यात आले आहे.

एटीएसतर्फे डाॅ कुरुलकरविरोधात १८३७ पानी दोषारोपपत्र विशेष न्यायाधीश व्ही.आर.कचरे यांच्या न्यायालयात तपास अधिकारी सुजाता तानवडे यांनी दाखल केले आहे. शुक्रवारी संबंधित दोषारोपपत्राची प्रत डाॅ.कुरुलकर याच्या व्हिडिआे काॅन्फरन्सिंगमधील न्यायाधीशांसमोरील संमतीने त्याचे वकील ऋषिकेश गानू यांना दिली आहे. कुरुलकरच्या न्यायालयीन कोठडीत २१ जुलैपर्यंत वाढ करण्यात आली आहे. कुरुलकर याच्या पाॅलिग्राफ चाचणीसाठी पोलिसांचे लेखी म्हणणे सादर करण्यास न्यायालयाने सांगितलेले आहे.

डॉ. कुरुलकर याच्याविरोधात न्यायालयात दाखल करण्यात आलेल्या दोषारोपपत्रात एकूण २०३ साक्षीदारांचे जबाब नोंद केल्याचे सांगण्यात आले आहे. यामध्ये डीआरडीओचे पुणे व दिल्ली येथील डीआरडीओ आरअँडडीईमधील स्टाफ व काही अधिकाऱ्यांचे जबाब घेण्यात आले आहेत. दोषारोपपत्राबाबत दिल्लीतील गृह मंत्रालयाची मंजुरी, पत्रे, सर्व मूळ पंचनामे, न्यायसहायक वैज्ञानिक प्रयोगशाळेचा पत्रव्यवहार, आरअँडडीईसोबत केलेला पत्रव्यवहार, तपास अधिकारी यांचे १६८ प्रमाणे अहवाल व स्टेशन डायरी, डीआरडीआेकडून प्राप्त झालेला आरोपी कुरुलकर याचा इलेक्ट्रॉनिक गॅजेटचा अॅनालिसिस रिपोर्ट, आरोपी व वाँटेड आरोपी याच्या मोबाइलचा तांत्रिक विश्लेषण अहवाल तसेच सोशल मीडियाबाबतचा अहवाल सादर केला आहे.

माहितीच्या गैरवापराचा ठपका

डॉ. कुरुलकर डीओरडीओत १० जून २०२२ ते २४ फेब्रुवारी २०२३ यादरम्यान संचालक पदावर कार्यरत होता. त्याने विविध गोपनीय माहिती परदेशी हस्तकास पुरवली. संरक्षण खात्याशी संबंधित माहिती तसेच भारताची सार्वभौमता, एकात्मता व परकीय देशांशी मैत्रीपूर्ण संबंधांवर परिणाम होण्याची शक्यता असूनही तसेच देशाच्या सुरक्षिततेस बाधा येण्याची शक्यता असताना परकीय हस्तकांच्या फायद्यासाठी देशाच्या सुरक्षेस बाधक ठरेल, अशा पद्धतीने पदाचा गैरवापर केल्याचा ठपका कुरुलकरवर ठेवण्यात आला आहे.

हेर म्हणायची “बेब’

पाकिस्तानी हेर झारादास गुप्ता ही कुरुलकर याला ‘बेब’ नावाने बोलत होती. त्याच्या मोबाइलमध्ये तिने व्हिडिओ क्लिप पाठवण्यासाठी क्लाऊड चॅट, बिंगचॅट हे अॅप डाऊनलोड करण्यास लावले. तसेच तिने एक लिंक पाठवून त्यावर तिचा मेलआयडी, पासवर्ड टाकून ते अॅपदेखील त्याच्या मोबाइलवर इन्स्टाॅल करण्यास सांगितले. त्या माध्यमातून अग्नी-६ वापराबाबत माहिती दिली गेली. ‘मेंटॉर’ मिसाइलपेक्षा ‘अस्त्र मिसाइल’ जास्त अचूक लक्ष्य करते हेदेखील कुरुलकरने सांगितले.

पुणे – पुणे महापालिकेच्या विविध विभागांची साडे तीन हजारापेक्षा जास्त खटले न्यायालयात प्रलंबित आहेत. याचे कामकाज आठ न्यायाधीशांच्या माध्यमातून केले जात आहे. पण सध्याची जागा अपुरी पडत असल्याने व पूर्ण क्षमतेने न्यायालय चालावेत यासाठी महापालिका न्यायालयासाठी स्वतंत्र इमारत बांधली जाणार आहे, अशी माहिती आयुक्त विक्रम कुमार यांनी दिली.

पुणे महापालिकेच्या बांधकाम, मिळकत कर, अतिक्रमण, पर्यावरण, आरोग्य, भूसंपादन यासह विविध विभागातील प्रकरणांचे खटले महापालिकेच्या जिल्हा न्यायालय, दिवाणी न्यायालय, प्रथम न्यायदंडाधिकारी, उच्च न्यायालय, सर्वोच्च न्यायालय, राष्ट्रीय हरित लवाद येथे सुरू आहेत.

या खटल्यांची संख्या पुणे महापालिकेच्या सर्वाच्च न्यायालयापासून ते पालिका न्यायालयापर्यंत तब्बल ३ हजार ८०० दावे प्रलंबित आहे. तर गेल्या एका वर्षापासून १ हजार प्रकरणांवर स्थगिती आहे, त्यांची पुढे सुनावणीच होऊ शकलेली नाही. त्यामुळे प्रलंबित प्रकरणांची संख्या वाढत असून, त्याचा परिणाम प्रशासकीय कामकाजावर होत आहे.

त्यासंदर्भात महापालिका आयुक्तांनी विधी विभाग, न्यायाधीश यांच्याशी नुकतीच चर्चा केली आहे. त्यामध्ये प्रलंबित खटले वेगाने काढण्यासाठी न्यायालये पूर्णवेळ चालविणे आवश्‍यक आहे. त्यासाठी पुरेशी जागा आवश्‍यक असल्याचे सांगण्यात आले. त्यामुळे नवीन इमारत उभारून तेथे आठ न्यायालयांमध्ये एकाच वेळी कामकाज चालू शकेल अशी व्यवस्था केली जाणार आहे.

पुणे: राज्य सरकारच्या शासन आपल्या दारी अभियान खडकी येथे शुक्रवारी राबविण्यात आले.त्यात १हजार नागरिकांनी सहभाग घेतला,अशी माहिती आमदार सिद्धार्थ शिरोळे यांनी दिली.

शासकीय दाखले आणि योजना एकाचं ठिकाणी उपलब्ध करून देण्यात आल्या.जिल्हाधिकारी कार्यालय,पुणे तहसील कार्यालय या अंतर्गत नागरिकांना दाखले,योजना देण्यात आल्या.

सरकारी सेवा आणि लाभ मिळविण्यात नागरिकांना येणाऱ्या अडचणी दूर करून विविध शासकीय योजनांचे लाभ मिळावेत त्याचबरोबर महत्त्वाची कागदपत्रेसुद्धा एकाच ठिकाणी मिळावीत याउद्देशाने मुख्य मंत्री एकनाथराव शिंदे, उपमुख्य मंत्री देवेंद्र फडणवीस आणि उपमुख्यमंत्री अजित पवार यांच्या संकल्पनेतून आज (शुक्रवारी ) खडकी भागात शासन आपल्या दारी अभियान राबविण्यात आले, असे आमदार शिरोळे यांनी सांगितले.

शासनाच्या योजना आणि सेवांचा लाभ घेण्यासाठी छत्रपती शिवाजीनगर मतदारसंघातील एक हजार नागरिकांनी उपक्रमामध्ये उत्स्फूर्तपणे सहभाग घेतला, अशीही माहिती आमदार शिरोळे यांनी दिली.

या उपक्रमात धर्मेश शहा, गणेश बगाडे, दुर्योधन भापकर, अजित पवार, राहुल कांबळे, नेहाताई गोरे, संगिताताई गवळी, मुकेश गवळी, शाम काची, कार्तिकीताई हिवरकर, मनिषाताई कांबळे, जय शहा, रोहन मगर, नाना मोरे, सतीश बहिरट, रमेश भंडारी, अनिल भिसे, प्रकाश सोलंकी, बंडू कदम, तसेच भाजपा खडकी मंडलाचे पदाधिकारी व कार्यकर्ते सहभागी झाले होते.

पुणे-महानगरपालिकेमध्ये नोकरी लावून देतो त्यासाठी प्रत्येकी पाच लाख रुपये लागतील. त्यापैकी चार लाख रुपये अॅडव्हांस रक्कम द्यावी लागेल तर उर्वरित एक लाख रुपये काम झाल्यावर द्यावी लागेल असे सांगून तरुणाची दोन लाख २० हजार रुपयांची फसवणूक केल्याप्रकरणी आरोपीवर विश्रामबाग पोलिस ठाण्यात गुन्हा दाखल करण्यात आलेला आहे.

भास्कर लक्ष्मण मोहोळ( वय -38 ,राहणार -सदाशिव पेठ, पुणे) असे गुन्हा दाखल करण्यात आलेल्या आरोपीचे नाव आहे.याप्रकरणी मंगेश विष्णू चिकने (वय- 36 ,राहणार -शिवाजीनगर ,पुणे) यांनी आरोपी विरोधात तक्रार दाखल केली आहे सदरचा प्रकार जून 2019 ते नोव्हेंबर 2021 यादरम्यान टिळक स्मारक मंदिर टिळक रस्ता व इतर ठिकाणी घडलेला आहे .तक्रारदार मंगेश चिकने यांनी दिलेल्या तक्रारीनुसार ,आरोपी भास्कर मोहोळ यांनी त्यांना पीएमसी मध्ये नोकरी लावून देतो असे सांगितले. त्यासाठी त्याच्यासह इतर साथीदारांना प्रत्येकी पाच लाख रुपये लागतील ,त्यापैकी चार लाख रुपये अॅडव्हांस दिल्यानंतर पंधरा दिवसात काम करून देतो असे आरोपीने सांगितले. त्यानुसार तक्रारदार यांच्या खात्यावरून स्वतःच्या बँक खात्याच्यावर आरोपीने दोन लाख 20 हजार रुपये हस्तांतरित करण्यास लावून त्यांना आतापर्यंत कोणतीही नोकरी न लावता तसेच वेळोवेळी टाळटाळ करून संबंधित रकमेची आर्थिक फसवणूक केलेली आहे. पोलिस उपनिरीक्षक एस पाटील याबाबत पुढील तपास करत आहे.

पुणे: राष्ट्रवादी काँग्रेसचे नेते अजित पवार यांनी बंड करत शिंदे-फडणवीस सरकारमध्ये उपमुख्यमंत्रिपदाची शपथ घेतली . या शपथविधीनंतर अजित पवार आपले होमग्राउंड असलेल्या पुणे शहरात शनिवारी प्रथमच येणार होते. मात्र अजित पवार यांचा उद्याचा पुणे दौरा रद्द झाला आहे. ते उद्या मुख्यमंत्री एकनाथ शिंदे यांच्यासमवेत गडचिरोली येथे शासन आपल्या दारी या कार्यक्रमाला हजेरी लावणार असल्याने त्यांचा पुणे दौरा रद्द करण्यात आला आहे. अजित पवार यांना पुणे शहरातून मोठा पाठिंबा मिळाला आहे. शहरातील दोनपैकी वडगाव शेरी विधानसभा मतदारसंघाचे आमदार आमदार सुनिल टिंगरे यांनी अजित पवारांना पाठिंबा दिला आहे. तर बहुतांश पदाधिकारी आणि माजी नगरसेवकांनी देखील अजित पवारांना पाठिंबा देण्याचा निर्णय घेतला आहे. दुसरीकडे ५० पेक्षा जास्त नॉटरिचेबल असणारे नगरसेवक देखील अजित पवारांच्या उद्याच्या पुणे दौऱ्यानंतर आपली भूमिका स्पष्ट करणार असल्याचं बोललं जात होतं. तर, नवनिर्वाचित शहराध्यक्ष दीपक मानकर यांनी पुण्यात अजित पवारांच्या जोरदार स्वागत आणि शक्तिप्रदर्शनाची तयारी केली होती.

पुणे : सहकार नगरमधील तळजाई परिसरात कोयता गँगकडून पुन्हा ‘भाईगिरी’ करत दहशत माजविण्याची घटना घडली. या प्रकरणी सहकारनगर पोलिसांनी आठ जणांना अटक केली असून, दोन अल्पवयीन मुलांना ताब्यात घेतले आहे. काही दिवसांपूर्वीच तळजाई वसाहतीत टोळक्याने २६ वाहनांची तोडफोड केल्याची घटना घडली होती.
या प्रकरणी माऊली शिंदे (वय १९, रा. तळजाई वसाहत) याने सहकारनगर पोलिस ठाण्यात फिर्याद दिली आहे. त्यावरून दहा जणांविरुद्ध गुन्हा दाखल करण्यात आला आहे. मयूर रंगनाथ आरडे (वय २२), रोहन ऊर्फ गायसोन्या राजू आरडे (वय २१), ऋषिकेश ऊर्फ बारक्या संजय लोंढे (वय २३), जयेश ऊर्फ जयड्या दत्ता ढावरे (वय १८), वृषभ शंकर कांबळे (वय २३), अनिकेत ऊर्फ गुड्डू रवींद्र शिंदे (वय २४), आकाश मनोज डाकले (वय २३), आदित्य ऊर्फ सँडी पद्माकर डाकले (वय २०) अशी अटक केलेल्यांची नावे आहेत.
पोलिसांनी दिलेल्या माहितीनुसार, माऊली शिंदे आणि त्याचा मित्र पाच जुलै रोजी मध्यरात्री सव्वा बाराच्या सुमारास तळजाई वसाहत परिसरात उभे होते. त्या वेळी दहा ते बारा जणांच्या टोळक्याने कोयते हवेत फिरवत ”तुम्ही या भागातील भाई झाले का”, असे म्हणत एका टपरीची तोडफोड केली. तसेच, नागरिकांना शिवीगाळ करून दहशत माजवली. ”आम्ही या भागातील भाई आहोत. आमच्या नादाला लागला, तर जीवे ठार मारू”, अशी धमकी दिली.