पुणे, दि. ७ : ‘शासन आपल्या दारी’ अभियानांतर्गत जिल्हा कौशल्य विकास, रोजगार व उद्योजकता मार्गदर्शन केंद्र, पुणे यांच्यामार्फत लाभार्थ्यांना थेट लाभ उपलब्ध करुन देण्याकरिता पंडित दीनदयाळ उपाध्याय महारोजगार मेळाव्याचे १३ जुलै रोजी सकाळी १० वाजता जेजुरी पालखी तळ (ता. पुरंदर) येथे आयोजन करण्यात आले आहे.

या महारोजगार मेळावाद्वारे विविध पदांकरिता वेगवेगळ्या पात्रतेच्या उमेदवारांना नोकरीची विविध संधी उपलब्ध करुन देण्यात येणार आहे. बेरोजगार उमेदवारांसाठी नोकरीची संधी उपलब्ध होत असल्याने, त्यांच्यासह इतर सर्वच इच्छुक उमेदवारांनी रिक्तपदांच्या अधिक माहितीसाठी www.rojgar.mahaswayam.gov.in या संकेतस्थळावर जाऊन आपले पसंतीक्रम ऑनलाईन पद्धतीने नोंदवावेत.

मुलाखतीस येताना उमेदवारांनी सोबत आपली सर्व शैक्षणिक कागदपत्रे, पासपोर्ट आकाराचे छायाचित्र, आवश्यकतेनुसार संक्षिप्त परिचयासह अर्ज व आधारकार्डच्या छायांकित प्रती सोबत आणाव्यात. खाजगी क्षेत्रातील या विविध रिक्तपदांच्या प्रत्यक्ष मुलाखतीसाठी जास्तीत जास्त नोकरीइच्छूक उमेदवारांनी १३ जुलै रोजी सकाळी १० वा. महारोजगार मेळाव्याच्या ठिकाणी उपस्थित राहून या संधीचा लाभ घ्यावा, असे आवाहनही जिल्हा कौशल्य विकास, रोजगार व उद्योजकता मार्गदर्शन केंद्राचे प्र. सहाय्यक आयुक्त सा. बा. मोहिते यांनी केले आहे.

पुणे, दि. ७: औंध येथील शासकीय औद्योगिक प्रशिक्षण संस्थेत एक ते दोन वर्ष मुदतीच्या ३३ व्यवसाय अभ्यासक्रमांमध्ये १ हजार ६६४ प्रशिक्षणार्थ्यांसाठी प्रवेश प्रक्रिया सुरु करण्यात आली असून ११ जुलैपर्यंत प्रवेश अर्ज भरण्याचे आवाहन करण्यात आले आहे.

या अभ्यासक्रमासाठी शैक्षणिक अर्हता १० वी उत्तीर्ण/ अनुत्तीर्ण अशी आहे. प्रशिक्षणार्थ्यांना प्रतिवर्षी साधारणपणे दोन हजार रुपये खर्च येणार आहे.

एक वर्ष मुदतीचे व्यवसाय अभ्यासक्रम: कारपेंटर (वुड वर्क टेक्निशियन), फोटोग्राफर, सुईंग टेक्नोलॉजी, सेक्रेटरियल प्रॅक्टीस (इंग्रजी), मेकॅनिक डिझेल, स्टेनोग्राफर सेक्रेटरियल असिस्टंट (इंग्रजी), शिट मेटल वर्कर, प्लंबर, वेल्डर, मेकॅनिक ऑटो इलेक्ट्रिकल ॲण्ड इलेक्ट्रॉनिक्स, मेसन, कॉम्पुटर ऑपरेटर ॲण्ड प्रोग्रॅमिंग असिस्टंट, डेस्कटॉप पब्लिशिंग ऑपरेटर आणि प्लॉस्टिक प्रोसेसिंग ऑपरेटर.

दोन वर्ष मुदतीचे व्यवसाय अभ्यासक्रम: मशिनिस्ट, फीटर, मशिनिस्ट ग्राईंडर, मेकॅनिक मोटर व्हेईकल, मेकॅनिक मशिन टुल मेन्टेनन्स, टर्नर, टूल ॲण्ड डायमेकर (डाईज ॲण्ड मोल्ड), टूल ॲण्ड डायमेकर (प्रेस टुल्स, जिग्ज आणि फिक्चर), ड्राफ्टसमन मेकॅनिकल, ड्राफ्टसमन सिव्हिल, इलेक्ट्रोप्लेटर, सर्व्हेअर, पेंटर (जनरल), इलेक्ट्रॉनिक्स मेकॅनिक, इन्स्ट्रुमेंट मेकॅनिक, इलेक्ट्रिशियन, एरोनॉटिकल स्ट्रक्चर ॲण्ड इक्विपमेंट फिटर, वायरमन आणि रेफ्रिजरेशन ॲण्ड एअर कंडीशनर टेक्निशियन.

प्रत्येक व्यवसाय अभ्यासक्रमांमध्ये ३० टक्के जागा महिलांसाठी आरक्षित आहेत. ११ जुलै पर्यंत ऑनलाईन प्रवेश अर्ज भरण्याची व १२ जुलै पर्यंत निश्चित करुन विकल्प भरण्याची संस्थेमध्ये सुविधा आहे. प्रत्येक विद्यार्थ्याला जास्तीत जास्त शंभर विकल्प भरण्याची सुविधा उपलब्ध आहे. ज्या विद्यार्थ्यांनी प्रवेश अर्ज भरलेले आहेत परंतु निश्चित करुन विकल्प भरलेले नाहीत त्यांनी विहित मुदतीत संस्थेत प्रत्यक्ष उपस्थित राहून आपल्या पसंतीक्रमानुसार विकल्प भरावेत.

औंध येथील शासकीय औद्योगिक प्रशिक्षण संस्थेत चालू वर्षापासून एरोनॉटीकल स्ट्रक्चर अॅण्ड इक्विपमेंट फिटर हा दोन वर्ष कालावधीचा अभ्यासक्रम नव्याने सुरु करण्यात आलेला आहे. हा व्यवसाय पुर्ण केल्यानंतर विमान कंपनीमध्ये तसेच वाहन उद्योगामध्ये रोजगाराच्या मोठ्या संधी उपलब्ध आहेत. डेसॉल्ट एव्हिएशन या फ्रेंच कंपनीने नागपुर येथे नवीन शाखा स्थापन केलेली आहे. ही कंपनी आय. टी. आय. औंध, पुणे करीता तांत्रिक सहकार्य उपलब्ध करुन देणार आहेत.

स्टेनो (मराठी) हा व्यवसाय अभ्यासक्रम महाराष्ट्र राज्य कौशल्य, व्यवसाय शिक्षण व प्रशिक्षण मंडळ, खेरवाडी, वांद्रे. मुंबई- ५ यांच्यामार्फत राबविण्याचे प्रस्तावित असून ऑफलाईन प्रवेश अर्ज भरण्याची सुविधा उपलब्ध आहे.

प्रवेशासाठी संस्थेत प्रत्यक्ष भेट देवून किंवा संस्थेच्या भ्रमणध्वनी हेल्पलाईन क्रमांक ८८५७९८४८२२ वर मार्गदर्शन घ्यावे. http://admission.dvet.gov.in या संकेतस्थळाला भेट देवून प्रवेश प्रक्रिया निश्चित करता येईल, असे औद्योगिक प्रशिक्षण संस्थेचे उपसंचालक आर. बी. भावसार यांनी कळविले आहे.
0000

पुणे : श्रावणी कटके आणि स्वराज कोकाटे यांनी ३२ व्या वरिष्ठ गटाच्या राष्ट्रीय वुशू अजिंक्यपद स्पर्धेत चमकदार कामगिरी केली.अखिल महाराष्ट्र वुशू संघटनेच्या वतीने या स्पर्धेचे आयोजन करण्यात आले होते.

आॅल महाराष्ट्र वुशू असोसिएशनच्या वतीने स्पर्धेचे आयोजन करण्यात आले होते. या स्पर्धेत श्रावणी कटकेने महिला दुहेरीमध्ये तृप्ती चांदवडकरसह सुवर्णपदक मिळवले. त्याचबरोबर वैयक्तिक गटात ताईचीक्वॉन आणि तायचीजैन या प्रकारात अनुक्रमे रौप्य पदक आणि कांस्य पदक मिळवले. त्याचबरोबर सांघिक मध्ये महाराष्ट्रच्या संघाने रौप्यपदक मिळवले. त्या संघातही श्रावणीचा समावेश होता.

स्वराज कोकाटने नानगूनमध्ये सुवर्णपदकाची कमाई केली. सांघिक रौप्यपदकातही त्याने मोलाची कामगिरी केली.अखिल महाराष्ट्र वूश संघटनेचे महासचिव सोपान कटके यांनी या स्पर्धेचे आयोजन केले होते.

या स्पर्धेचे उद्घाटन श्री जितेंद्र बाजवा अध्यक्ष असोसिएशन ऑफ इंडिया यांच्या हस्ते झाले. या वेळी शोगिनी टेक्नोआर्टसचे निर्मिती संचालक ऋषिकेश मोडक, भारतीय ऑलिम्पिक संघटनेच्या हंगामी समितीचे सदस्य भूपेंद्रसिंह बाजवा,  रवींद्र डांगे आयुक्त जीएसटी विभाग पुणे, संभाजी झेंडे अध्यक्ष ऑल महाराष्ट्र वुशू असोसिएशन, चंद्रकांत कांबळे सहसंचालक क्रीडा व युवक सेवा संचनालय महाराष्ट्र राज्य, विजय सराफ, सुहेल अहंमद, नामदेव शिरगावकर महासचिव महाराष्ट्र ऑलिम्पिक असोसिएशन, बाळासाहेब पोळ, सचिन मोरे, अमित कांकरिया आदी उपस्थित होते.

पदक विजेते खेळाडू – सान्शू – ५२  किलो – सोमनाथ गुंजाळ (ब्राँझपदक), ६०  किलो – ऋषीकेश मलोरे (ब्राँझपदक). ताओलू – श्रावणी कटके – (तैजिक्वानमध्ये ब्राँझपदक आणि तैजिजैनमध्ये रौप्यपदक). स्वराज कोकाटे (नानगूनमध्ये सुवर्ण). प्रफुल्ल देशमुख (विंगचूनमध्ये ब्राँझपदक), सतीश दहीफळे (तैजिक्वानमध्ये ब्राँझपदक), वैष्णवी बांदबुचे (तैजिक्वानमध्ये रौप्यपदक), अंकिता भांगे (विंगू चूनमध्ये ब्राँझपदक), नयन निर्मल (नानक्वानमध्ये आणि फ्लेक्झिबल विपनमध्ये रौप्यपदक).दुहेरी – तृप्ती चांदवडकर – श्रावणी कटके (सुवर्णपदक), सांघिकमध्ये रौप्यपदक – श्रावणी कटके, तृप्ती चांदवडकर, सलोनी जाधव, खुशी तेलकर, निखिल जाधव, ओंकार मोडक, स्वराज कोकाटे.
—

पुणे-राष्ट्रीय तपास यंत्रणेने (एनआयए) पुण्यातील कोंढवा परिसरातून २ दिवसांपूर्वी जुबेर नूर मोहंमद शेख (३६) या तरुणाला ताब्यात घेतले आहे. बंदी घातलेल्या इस्लामिक स्टेट आॅफ इराक अँड सीरिया (इसिस) या दहशतवादी संघटनेत तरुणांची भरती करण्यासाठी सोशल मीडियाच्या माध्यमातून तो तरुणांचे मन:परिवर्तन करण्याचा प्रयत्न करत होता. विविध राज्यांतील २० जण त्याच्या संपर्कात असल्याचे तपास यंत्रणेच्या चाैकशीत समोर आल्याचे सूत्रांनी सांगितले.४ ते ५ वर्षांपासून तो सोशल मीडियावर सक्रिय होता. त्याने सोशल मीडियाच्या माध्यमातून अनेकांशी संपर्क साधल्याचे निदर्शनास आले आहे. तसेच प्रक्षोभक साहित्ची निर्मिती केल्याचे स्पष्ट झाले आहे. एनआयएने त्याच्या घरी टाकलेल्या छाप्यात इसिस संघटनेशी संबंधित महत्त्वपूर्ण कागदपत्रे, साहित्य, लॅपटॉप, मेमरी कार्ड, मोबाइल असा मुद्देमाल जप्त केलेला आहे.

जुबेर हा कराडचा रहिवासी असून तो संगणक अभियंता आहे. सुरुवातीला पुण्यातील खडकी परिसरात तो कुटुंबासोबत राहत होता. सन २०१३ पासून तो कोंढवा भागात राहण्यास गेला. तीन भाऊ, दोन बहिणी, आई-वडील, पत्नी, दोन मुले असा त्याचा मोठा परिवार आहे. हिंजवडीतील एका नामांकित आयटी कंपनीत तो नोकरीला असून त्याला वार्षिक १५ लाखांचे पॅकेज आहे. त्यानंतरही तो इन्स्टाग्राम, फेसबुक, व्हॉट्सअॅप आदी सोशल मीडिया ग्रुपवर ‘अबू नुसैबा’ या नावाने वावरत होता. त्याद्वारे आपला धर्म कशा प्रकारे श्रेष्ठ आहे आणि इतर धर्म कशा पद्धतीने कमी महत्त्वाचे आहेत, याबाबतची माहिती तो आपल्या समाजातील तरुणांना देऊन त्यांचे कट्टरतेकडे मन:परिवर्तन करण्यासाठी प्रयत्नशील होता. बॉम्ब, शस्त्रनिर्मितीच्या प्रशिक्षणासाठी प्रयत्नशील

इसिस संघटनेच्या इशाऱ्यावर दहशतवादी कारवायांना प्रोत्साहन देण्यासाठी जुबेर हा प्रयत्नशील असल्याने तपास यंत्रणांच्या रडारवर तो आला होता. त्याच्यासोबत इतर शहरांतील काही जण असल्याची माहिती एनआयएला मिळाली होती. त्यामुळे एकाच वेळी त्यांनी मुंबई, ठाणे व पुणे येथे छापा टाकून जुबेर शेख याच्यासोबत ठाण्यातून शरजील शेख व झुल्फिकार अली बडोदावाला व मुंबईतील नागपाडा येथून ताबीश नासेर सिद्दिकी यांना अटक केली आहे. इसिसच्या दहशतवादी कारवाया पुढे नेण्याचा कट आरोपींनी रचल्याची माहिती यंत्रणेने दिली. महाराष्ट्रात स्लीपर सेलचे जाळे विणण्याचे काम आरोपी करत होते. तसेच तरुणांची दहशतवादी संघटनेत भरती करून त्यांना बॉम्ब (आयईडी) बनवण्याचे व छोटे शस्त्र, पिस्तूल निर्मितीसाठी ते प्रयत्नशील असल्याचेही समोर आले.

पुणे-पोलिस शिपायाने गळफास घेऊन आत्महत्या केल्याची घटना लोहगाव भागात शुक्रवारी घडली. आत्महत्येमागचे निश्चित कारण समजू शकले नाही. मात्र, पोलिसाने आत्महत्येपूर्वी लिहिलेली चिठ्ठी सापडली असून ती पोलिसांनी ताब्यात घेतली आहे.

वैभव दिलीप शिंदे (रा. खेसे काॅलनी, लोहगाव) असे असे आत्महत्या केलेल्या पोलीस शिपायाचे नाव आहे. वैभव शिंदे, त्यांची पत्नी कांचन, भाऊ आणि चार वर्षांचा मुलगा खेसे काॅलनी भागात राहायला आहेत. शिंदे पुणे पोलिस दलात मोटार परिवहन विभागात नियुक्तीस होते. शिंदे यांच्या घराजवळ चिंचेचे झाड आहे. छतावर झाडाची फांदी आहे. शिंदे यांनी शुक्रवारी पहाटे फांदीला टाॅवेल बांधून गळफास घेऊन आत्महत्या केल्याचा प्रकार उघडकीस आला. या घटनेची माहिती मिळताच पोलिसांनी घटनास्थळी धाव घेतली.

शिंदे यांनी आत्महत्या करण्यापूर्वी चिठ्ठी लिहिली होती. पोलिसांनी चिठ्ठी जप्त केली. ‘पत्नी कांचन मला माफ कर. भाऊ आणि आई मला माफ करा. माझी शेवटची इच्छा पूर्ण करा. भाऊ विजय याने पत्नीशी विवाह करावा’, असे शिंदे यांनी चिठ्ठीत लिहिले आहे. शिंदे यांना मूळव्याधीचा त्रास होता. दोन महिन्यांपूर्वी त्यांची मूळव्याधीवरील शस्त्रक्रिया झाली होती. ते पोलीस उपनिरीक्षक भरती परीक्षेची तयारी करत होते. शिंदे यांच्या आत्महत्येमागचे निश्चित कारण समजू शकले नाही. नैराश्यातून त्यांनी आत्महत्या केल्याचा संशय व्यक्त करण्यात आला आहे.

पुणे,दि.६ :- हिंदी राजभाषा दिवस-२०२३ आणि अखिल भारतीय राजभाषा परिषदेचे आयोजन करण्याचा बहुमान जिल्हा प्रशासनाला मिळाला आहे. सर्व विभागांनी परस्पर समन्वयाद्वारे योग्य नियोजन करुन परिषद यशस्वी करावी, असे निर्देश विभागीय आयुक्त सौरभ राव यांनी आज दिले.

केंद्रीय गृह मंत्रालयाच्या भारतीय राजभाषा विभागाच्यावतीने १४ आणि १५ सप्टेंबर २०२३ रोजी बालेवाडी येथील श्री शिवछत्रपती क्रिडा संकुल येथे आयोजित करण्यात येत असलेल्या संयुक्त परिषदेच्या आयोजनासंदर्भात विभागीय आयुक्त कार्यालयात आयोजित आढावा बैठकीत ते बोलत होते. बैठकीस भारत सरकारच्या राजभाषा विभागाच्या सचिव अंशुली आर्या, संयुक्त सचिव मीनाक्षी जौली, जिल्हाधिकारी डॉ.राजेश देशमुख, क्रिडा आयुक्त सुहास दिवसे, पिंपरी चिंचवड महानगरपालिका आयुक्त शेखर सिंह, उपायुक्त श्रीमती वर्षा लड्डा-उंटवाल, अपर पोलीस आयुक्त अरविंद चावरीया,बी.जे.वैद्यकीय महाविद्यालयाचे अधिष्ठाता डॉ.मुरलीधर तांबे, आयआरसीटीसीचे महाप्रबंधक पिनाकिन मोरावाला यावेळी उपस्थित होते.

या सोहळ्यासाठी देशभरातून मान्यवर तसेच जवळपास सात हजारपेक्षा अधिक अधिकारी उपस्थित राहणार असल्याने, कार्यक्रमाच्या अनुषंगाने सुरक्षा, वाहतूक व्यवस्था, आरोग्य सुविधा, विद्युत पुरवठा, पिण्याचे पाणी, महत्वाच्या व्यक्तींसाठी संपर्क अधिकाऱ्यांची नियुक्तीसंबधी कार्यवाही त्वरित करावी. इतर व्यवस्थेसंदर्भात सर्व संबधित यंत्रणांनी योग्य नियोजन करावे अशी सूचना श्री.राव यांनी यावेळी केली. बालेवाडी येथील क्रिडा संकुलात हस्तकला प्रदर्शन, वैद्यकीय शिबीराचे आयोजन करण्यात येणार आहे. त्यादृष्टीने प्रशासनाने तयारी करावी असेही श्री.राव यांनी सांगितले.

राजभाषा विभागाच्या सचिव अंशुली आर्या यांनी अखिल भारतीय पातळीवरील या परिषदेचे आयोजन करण्याची संधी पुण्याला मिळाली असल्याचे सांगितले. परिषदेचे आयोजन यशस्वी करण्याचे आवाहन त्यांनी जिल्हा प्रशासनाला केले. बैठकीला विविध विभागांचे अधिकारी, स्वयंसेवी संस्थांचे प्रतिनिधी उपस्थित होते.