कुपवाड (सांगली)-
अश्विन कुमार गुरु, कौस्तुभ गिरगावकर शौरेन सोमण यांनी मुलांच्या गटात तर रुचिता दारवटकर व सई कुलकर्णी या पुण्याच्या खेळाडूंनी शानदार विजय मिळवित राज्य मानांकन टेबल टेनिस स्पर्धेत चौथी फेरी गाठली.सूरज फाउंडेशन व सांगली जिल्हा टेबल टेनिस संघटना यांच्या वतीने कृष्णा व्हॅली स्कूल कुपवाड येथे या स्पर्धेचे आयोजन करण्यात आले आहे. ही स्पर्धा महाराष्ट्र राज्य टेबल टेनिस संघटनेच्या मान्यतेने होत आहे.

मुलांच्या पंधरा वर्षाखालील गटात अश्विन याने आपला सहकारी व नवव्या मानांकित श्रेयस माणकेश्वर याला ११-१३,११-९, ८-११,११-५,११-६ असे पराभूत केले. हा सामना अतिशय चुरशीने खेळला गेला. शेवटच्या दोन गेम्स मध्ये अश्विन याने काउंटर अटॅक पद्धतीचा सुरेख खेळ केला आणि विजय मिळविला. सातव्या मानांकित कौस्तुभ याने रिशित बंसल याला ११-३,११-४,९-११,११-९ असे हरविले. तिसरी गेम रिशितने घेत सामन्यातील उत्सुकता वाढली मात्र शेवटच्या गेम मध्ये त्याला मोक्याच्या क्षणी गुण मिळवता आले नाहीत. तिसऱ्या मानांकित शौरेन याने टी एस टी मुंबई संघाच्या रिशान कनानी याच्यावर ११-९,११-३,११-४ असा सफाईदार विजय मिळवला. त्याच्या आक्रमक खेळापुढे कनानी याला फारशी संधी मिळाली नाही. पुण्याच्या आदित्य सामंत यानेही विजयी वाटचाल कायम ठेवली. त्याने कोल्हापूरच्या मृथिय कळमकर याच्यावर १-११,११-९,१४-१२,११-९ अशी मात केली. मुलांच्याच विभागात ठाण्याच्या प्रत्युष बौवा, कुश पाटील, ध्रुव वसईकर या मानांकित खेळाडूंनी चौथ्या फेरीकडे वाटचाल केली.

मुलींच्या गटात सातव्या मानांकित रुचिता हिने ठाण्याच्या सात्विका बौवा हिचा ११-१,११-६,११-४ असा दणदणीत पराभव केला आणि चौथी फेरी गाठली. एकतर्फी लढतीत तिने टॉप स्पिन फटके आणि चॉप्स असा अष्टपैलू खेळ केला. अकरावी मानांकित खेळाडू सई कुलकर्णी हिला टी एस टी संघाची खेळाडू त्रिशा लुदबे हिच्या विरुद्ध विजय मिळवताना संघर्ष करावा लागला. तिसऱ्या फेरीचा हा सामना तिने ११-९,१२-१०,९-११,११-८ असा जिंकला.  

MAHARASHTRA STATE TABLE TENNIS ASSOCIATION

1^st Maharashtra State Ranking Table Tennis Tournament, 2023, Sangli

Venue – Krishna Valley School, Kupwad MIDC, Sangli

19^th to 23^rd July 2023

Organised By – Suraj Foundation & Sangli District Table Tennis Association

हवामान विभागाने मुंबईला हायटाईडचा (भरती) इशारा दिला आहे,मुंबईच्या किनारपट्टीवर ४.१४ मीटरपर्यंत उंच लाटा उसळण्याचा इशारा,मुंबईत आज कमी पाऊस असल्याने मोठा फटका बसणार नाही, असा अंदाज हवामान विभागाने वर्तवला आहे.आज उपनगरात काही प्रमाणात पाऊस आहेतर नवी मुंबई आणि ठाण्यात मुसळधार पाऊस सुरू आहे.

मुंबई : महाराष्ट्राला आठवड्याभरापासून मुसळधार पावसाने झोडपून काढलं आहे. अद्यापही पावसाचा जोर कायम असून पुढच्या २४ तासांत राज्यातील महत्त्वाच्या शहरांना रेड अलर्ट जारी करण्यात आला आहे. हवामान खात्याकडून राज्यात पावसाचा जोर आणखी वाढेल, असा इशारा देण्यात आला आहे. त्यामुळे नागरिकांनी घराबाहेर पडताना पावसाचा अंदाज घ्यावा अशाही सूचना देण्यात आल्या आहेत.

हवामान खात्याने दिलेल्या माहितीनुसार, आज शनिवारी सकाळपासूनच सर्वत्र पावसाची जोरदार बॅटिंग सुरू आहे. अशात आज ५ जिल्ह्यांना हवामान खात्याकडून रेड अलर्ट जारी करण्यात आला आहे. मुंबई IMD ने जारी केलेल्या अंदाजानुसार, पालघर, ठाणे, पुणे, चंद्रपूर आणि गडचिरोली या ५ जिल्ह्यांना आज २४ तासांचा रेड अलर्ट जारी करण्यात आला आहे. यामुळे या भागांमध्ये मुसळधार ते अति मुसळधार पावसाची शक्यता वर्तवण्यात आली आहे.

अलिबाग,दि.22 :- इरशाळवाडी दुर्घटनेतील मुले, मुली, महिला, पुरुष, एकल स्त्रिया या सर्वांचे सर्व्हेक्षण करून अधिकाऱ्यांनी त्याची व्यवस्थित नोंद ठेवावी. या ग्रामस्थांचे कायमस्वरूपी पुनर्वसन व्हावे, यासाठी तात्काळ कार्यवाही सुरु करावी असे उपसभापती डॉ.नीलम गोऱ्हे यांनी सांगितले.

इरशाळवाडी दुर्घटनेत अनाथ झालेल्या मुलांची उपसभापती डॉ.नीलम गोऱ्हे यांनी नढळ गावात जाऊन भेट घेत त्यांची विचारपूस केली. तसेच त्यांच्या तात्पुरत्या राहण्याची सोय असलेल्या ठिकाणी जाऊन भेट देत उपलबद्ध सुविधांची पाहणी केली.

यावेळी त्यांनी सांगितले की मुख्यमंत्री श्री. एकनाथ शिंदे यांनी स्वतः तत्परतेने व संवेदनशीलतेने तात्काळ भेट दिली होती. याबाबत त्यांनी सविस्तर निवेदन विधान सभेमध्ये केले होते व प्रत्येक मृत व जखमी कुटुंबाला शासनाची सर्वोतोपरी मदत जाहिर केली होती.  विधानभवनात माझी भेट घेऊन सविस्तर माहिती ही दिली होती. या भेटी वेळी त्यांनी आपादग्रस्त लोकांना तात्काळ मदत पोहचत आहे का? तसेच सर्व मुले व महिलांना आवश्यक सुविधा दिल्या आहेत का? याबाबत या ठिकाणी जाऊन पाहणी करण्याचेही सांगितले असल्याचे डॉ. गोऱ्हे यांनी सांगितले.

या दरम्यान त्यांनी दुर्घटनेतून बचावलेल्या लोकांशी संवाद साधला. यावेळी त्यांनी सांगितले की, सर्वांनी एकत्रित येऊन दहा दहा लोकांचा समूह करून त्यातील एक जणाने सर्व आपादग्रस्त लोकांची जबाबदारी घ्यावी आणि काय वस्तू लागणार आहे त्याची यादी करावी व ती आम्हाला कळवावी. जेणेकरून आपण एक कुटुंब असल्यासारखं एकमेकांच्या संपर्कात राहू शकतो.  कोणत्याही व्यक्तीसोबत गैरकृत्य होणार नाही याची दक्षता घेण्यात येईल असेही डॉ. गोऱ्हे यांनी सांगितले.

यावेळी आमदार महेंद्र थोरवे, आमदार मनिषा कायंदे, जिल्हा पोलीस अधीक्षक सोमनाथ घार्गे, अप्पर जिल्हाधिकारी सुनील थोरवे, तहसिलदार आयुब तांबोळी, आदिवासी विकास प्रकल्प अधिकारी शशिकला अहिरराव, पोलीस उपअधीक्षक विक्रम कदम, अप्पर तहसिलदार पूनम कदम, नगरसेविका शीतल म्हात्रे, स्त्री आधार केंद्राच्या विश्वस्त जेहलमताई जोशी, मंगेश चिवटे उपस्थित होते.

अलिबाग,दि.22 :- इरशाळवाडी ता.खालापूर जि रायगड येथे  दुर्घटनेत बचावलेल्या अनाथ मुलांचे पालकत्व मुख्यमंत्री एकनाथ शिंदे यांनी स्वीकारले असून अचानक कोसळलेल्या मोठ्या नैसर्गिक आपत्तीमध्ये देखील शासन मोठ्या ताकदीने त्यांच्या पाठिशी उभे आहे, असे प्रतिपादन महाराष्ट्र राज्य विधान परिषद उपसभापती डॉ.नीलम गोऱ्हे यांनी केले.

विधान परिषद उपसभापती डॉ. नीलम गोऱ्हे यांनी आज नढळ येथे दुर्घटनेतील पीडितांच्या तात्पुरत्या निवारा केंद्रास भेट देऊन त्यांचे सांत्वन केले. मुख्यमंत्री एकनाथ शिंदे यांच्या वतीने त्यांनी पालकत्व स्वीकारल्याचे यावेळी जाहीर केले. यावेळी आमदार मनीषा कायंदे, आमदार महेंद्र थोरवे, अप्पर जिल्हाधिकारी सुनील थोरवे, आदिवासी एकात्मिक विकास प्रकल्प अधिकारी शशिकला अहिरराव, मुख्यमंत्री वैद्यकीय सहाय्यता कक्ष प्रमुख मंगेश चिवटे उपस्थित होते.

या मुलांशी संवाद साधताना डॉ.गोऱ्हे यांनी मुलांना लगेच कामाला न जाता शिक्षण पूर्ण करण्याबाबत सांगितले. काहीही लागल्यास त्यांच्या फोनवर संपर्क साधण्याकरिता स्वतःचा नंबर अनाथ मुलांना दिला. तसेच गावातील स्थानिक व्यक्ती ज्याला आपण सर्व ओळखता त्यांच्या संपर्कात राहण्याच्या सूचनाही त्यांनी मुलांना केली.

दुर्घटनाग्रस्त इरशाळवाडी मध्ये एकूण 1 ते 18 वयापर्यंतचे 31 मुल- मुले असून त्यापैकी 21 जण आश्रम शाळांमध्ये शिक्षण घेत आहेत.

डॉ.श्रीकांत शिंदे फाउंडेशन या स्वयंसेवी संस्थेने या इरशाळवाडी दुर्घटनेतील या अनाथ मुलांचे पालकत्व स्विकारले आहे. ही मुले 18 वर्षाचे पूर्ण होईपर्यंत त्यांच्या शिक्षण व पालनपोषणाची जबाबदारी संस्थेने घेतली असून त्यांच्या आवश्यक त्या सर्व गरजा पूर्ण करण्यात येणार आहे. कल्याण लोकसभा मतदारसंघाचे खासदार डॉ.श्रीकांत शिंदे यांची डॉ. श्रीकांत शिंदे फाउंडेशन ही स्वयंसेवी आहे  खा.डॉ.शिंदे यांनी यावेळी दूरध्वनीद्वारे संबंधितांशी संवाद साधला. स्वतः मुख्यमंत्री  या संपूर्ण घटनेवर आणि मदत कार्यावर लक्ष ठेवून आहेत. शंभर टक्के पुनर्वसन होईपर्यंत मदत कार्य सुरू राहील, असा विश्वास यावेळी दुर्घटनाग्रस्त मुलांना देण्यात आला. तसेच मदत साहित्याचे वितरण करण्यात आले. आमदार मनीषा  कायंदे व स्थानिक आमदार महेंद्र थोरवे यांना देखील यावेळी मुलांशी संवाद साधला.

राज्याचे मुख्यमंत्री श्री.शिंदे साहेब यांनी यापूर्वी देखील 2020 साली महाड येथील तारीक गार्डन या दुर्घटनाग्रस्त इमारतीत बचावलेल्या दोन लहान बालकांचे संपूर्णता पालकत्व स्वीकारले होते. तसेच 2021 साली पालघर येथे रोजगाराअभावी आत्महत्या केलेल्या कामगार दाम्पत्यांच्या 2 मुलांचे होते.

भारतीय नौदल प्रमुख अ‍ॅडमिरल आर. हरी कुमार हे व्हिएतनामच्या अधिकृत दौऱ्यावर आहेत. आज, 22 जुलै 2023 रोजी भारतीय नौदलातील कृपाण हे जहाज सेवामुक्तीनंतर व्हिएतनाममधील कॅम रॉन येथे व्हिएतनाम पीपल्स नेव्ही (VPN) कडे सुपूर्द केले जाणार असून, भारतीय नौदल प्रमुख या समारंभाचे अध्यक्षस्थान भूषवणार आहेत.

भारतीय नौदलाकडून व्हिएतनाम पीपल्स नेव्हीकडे स्वदेशी बनावटीचे, क्षेपणास्त्र सज्ज जहाज आयएनएस कृपाणचे हस्तांतरण, हे समविचारी भागीदारांना त्यांची क्षमता आणि कार्यकुशलता वाढवण्यासाठी मदत करण्याची भारताची वचनबद्धता अधोरेखित करते. हे हस्तांतरण भारत सरकारच्या ‘ॲक्ट ईस्ट’ तसेच सागर (SAGAR) अर्थात ‘प्रदेशातील सर्वांसाठी सुरक्षा आणि विकास‘ या धोरणांशी सुसंगत आहे. मैत्रीपूर्ण संबंध असलेल्या एखाद्या राष्ट्राला भारताकडून संपूर्णपणे सक्रिय असणारी युद्धनौका भेट देण्याची ही पहिलीच वेळ आहे.

19 जून 2023 रोजी व्हिएतनामला पूर्णपणे सक्रिय असलेली क्षेपणास्त्र सज्ज युद्धनौका भेट देण्याच्या संरक्षणमंत्र्यांच्या घोषणेला अनुसरून, स्वदेशी बनावटीचे खुकरी-श्रेणीची ही आयएनएस कृपाण युद्धनौका व्हिएतनाम पीपल्स नेव्हीकडे सुपूर्द केली जात आहे. या हस्तांतरणासाठी आयएनएस कृपाण भारतीय तिरंगा फडकवत 28 जुन 2023 रोजी भारतातून व्हिएतनामकडे रवाना झाली आणि 8 जुलै 2023 रोजी व्हिएतनाममधील कॅम रॉन येथे दाखल झाली.

अ‍ॅडमिरल आर. हरी कुमार हे व्हिएतनाम पीपल्स नेव्हीच्या मुख्यालयात, सीआयएनसी व्हाइस ॲडमिरल तन तनहा नेगिम यांच्याशी द्विपक्षीय संवाद साधणार आहेत. तसेच ते व्हिएतनामच्या संरक्षण मंत्र्यांचीही भेट घेणार आहेत.

भारतीय नौदल प्रमुखांचा हा दौरा भारतीय नौदल आणि व्हिएतनाम पीपल्स नेव्ही यांच्यातील उच्चस्तरीय द्विपक्षीय सहकार्याचे महत्व अधोरेखित करणारा असून भारताच्या क्षेत्रातील आसियानच्या मध्यवर्ती भूमिकेप्रति आदर व्यक्त करणारा आहे.

यवतमाळ–

राज्यातील अनेक शहरांमध्ये मुसळधार ते अतिमुसळधार पावसाच्या सरी बरसत आहेत. विदर्भात पावसाने रौद्ररूप धारण केले आहे. यवतमाळमध्ये पावसाचा जोर वाढल्याने आनंदनगर तांडा येथे 45 जण पुराच्या पाण्यात अडकले आहेत. तर, घराची भिंत कोसळून दोघांचा मृत्यू झाल्याचे समोर आले आहे. बचावकार्यासाठी राज्य शासनाने हवाई दलाचे दोन हेलिकॉप्टरर्स मागवले. हवाईदलाच्या Mi-17 हेलिकॉप्टरने आता बचावकार्याला सुरूवात झाली आहे.संग्रामपूर तालुक्यात सुरू असलेल्या संततधार मुळे संग्रामपूर तालुक्यातील केदार नदीला पूर आला असून नदी दुथडी भरून वाहत आहे. या परिणामी बावनबीर, टूनकी गावांचा संपर्क तुटला असतानाच घरात पाणी घुसले आहे.जिल्ह्यातील अनेक ठिकाणी मध्यरात्रीपासून हजेरी लावली आहे.

पैनगंगा नदीला पूर

मुसळधार पावसामुळे पैनगंगा नदीला पुर आला आहे. या पुराचा फटका अनेक गावांना बसला आहे. पुराने परिसरात वेढा घातल्याने अनेक जण पाण्यात अडकलेत. महागाव तालुक्यातील आनंद नगर येथील नागरिक पुराच्या पण्यात अडकले आहेत. त्यांचे बचावकार्य सुरू आहे.

परिसराला नदीचे स्वरुप
नदीचे पाणी आनंद नदरमध्ये शिरल्याने संपूर्ण परिसराला नदीचे स्वरुप प्राप्त झाले आहे. रस्त्यावर कंबरेच्यावर पाणी साचले आहे. आलेल्या पुरामुळे अनेकांची घरे वाहून गेली आहेत. बचाव पथक पाण्यात अडकलेल्या नागरिकांना वाचवण्यासाठी प्रयत्न करत आहेत. मात्र पावसाचा जोर कायम असल्याने बचावकार्यात अडथळे येत आहेत.

राज्याचे उपमुख्यमंत्री देवेंद्र फडणवीस यांनीदेखील या घटनेची नोंद घेतली आहे. देवेंद्र फडणवीस यांनी सांगितले आहे की, यवतमाळ जिल्ह्यातील महागाव तालुक्यातील आनंदनगर तांडा येथे पुराच्या पाण्यामुळे सुमारे 45 लोक अडकले आहेत. आम्ही सातत्याने स्थानिक प्रशासनाच्या संपर्कात असून आता तासभरात भारतीय हवाई दलाचे 2 हेलिकॉप्टर्स नागपुरात पोहोचतील आणि तेथून अडकलेल्या नागरिकांना बाहेर काढण्यासाठी लगेच महागावसाठी रवाना होतील. सुमारे 231 मिमी पाऊस येथे झाला आहे. माझे सहकारी मदनभाऊ येरावार सुद्धा संपर्कात आहेत. परिस्थितीवर आम्ही लक्ष ठेवून आहोत.

महागाव तालुक्यातील हिवरा संगम गट ग्रामपंचायतमधील आनंद नगर येथे पाणी वाढत चालल्याने काही नागरिक बोटीवर बसलेत. या 45 जणांना वाचवण्याचे प्रयत्न सुरू आहेत. दरम्यान, आता पुराच्या पाण्यात दोन जणांचा मृत्यू झाल्याचे समोर आले आहे.

बार्शी – यंदाच्या खरीप हंगामात प्रधानमंत्री पीक विमा योजनेचा लाभ घेण्यासाठी ऑनलाईन पोर्टल कार्यान्वित करण्यात आले आहे. इच्छुक शेतकऱ्यांनी ३१ जुलैपर्यंत अर्ज करावेत, असे आवाहनही कृषी विभागाकडून करण्यात आले आहे. आता, बार्शी तालुका डिजिटल मीडिया संपादक-पत्रकार संघटनेच्यावतीने शेतकऱ्यांसाठी मोफत पीक विमा नोंदणी करून देण्यात येत आहे. संघटनेच्यावतीने रविवारी एकदिवसीय शिबिराचे आयोजन करण्यात आले असून तालुक्याचे आमदार राजेंद्र राऊत यांच्याहस्ते उद्घाटन होणार आहे.

याप्रसंगी प्रमुख उपस्थिती म्हणून बार्शी तालुका कृषि अधिकारी एस.एस.कोयले, आगळगावच्या सरपंच पुतळा गरड, उपसरपंच आणि संघटनेचे वरिष्ठ पदाधिकारी असणार आहेत. राज्य सरकारच्या निर्णयानुसार केवळ १ रुपयांत शेतकऱ्यांना पीक विमा काढता येईल. मात्र, पोर्टलवर भरणा करताना त्यांच्याकडून कॉम्प्युटर फी म्हणून १०० ते २०० रुपये घेतले जात असल्याच्या अनेक तक्रारी आहेत. तसेच, पीक विमा भरण्याची मुदतही संपुष्टात येत आहे. त्यामुळे, महाराष्ट्र राज्य डिजिटल मीडिया संपादक-पत्रकार संघटनेचे संस्थापक अध्यक्ष राजा माने यांच्या मार्दर्शनानुसार बार्शीतील आगळगाव या गावी रविवार २३ जुलै रोजी पीक विम्यासाठी मोफत नोंदणी कॅम्पचे आयोजन केले आहे. त्यात, केवळ कागदपत्रांची पूर्तता (७/12, ८ अ, बँक पासबुक व आधारकार्ड) करणाऱ्या शेतकऱ्यांची नोंदणी पूर्णत: मोफत केली जाणार आहे. याकामी, बार्शी तालुका कृषी विभागाचीही मदत मिळणार असल्याचे संघटनेचे बार्शी तालुका अध्यक्ष दिनेश मेटकरी यांनी सांगितले.

दरम्यान, आगळगाव येथील विठ्ठल रुक्मिणी मंदिरात मोफत पीक विमा कॅम्प आणि पीक विमा भरण्यासंदर्भातील अडचणींची माहिती मिळणार आहे. त्यासाठी, आगळगाव व आजुबाजूच्या गावातील शेतकऱ्यांनी मोठ्या प्रमाणात शिबिराच्या माध्यमातून नोंदणी करावी, असे आवाहनही संघटनेच्यावतीने मेटकरी यांनी केले आहे.