पुणे,दि.१४ : जिल्ह्यातील २०५- चिंचवड विधानसभा मतदारसंघ पोटनिवडणूकीसाठी नियुक्त निवडणूक निरीक्षक एस. सत्यनारायण यांनी मतदारसंघातील विविध मतदान केंद्रांना भेट देऊन केंद्रांची तपासणी केली आणि मतदान सुरळीत पार पाडण्यासाठी मतदान केंद्रामध्ये आवश्यक सुविधा आणि रचना याबाबत संबंधित अधिकारी आणि समन्वयकांना मार्गदर्शन केले.

मागील निवडणुकीत कमी संख्येने मतदान झालेल्या भागात विशेष मोहिम राबवून मतदारांना मतदान करण्यास प्रोत्साहीत करावे, अशी सूचना त्यांनी यावेळी केली. चिंचवड विधानसभा मतदारसंघाचे सहायक निवडणूक निर्णय अधिकारी शिरीष पोरेडी, समन्वयक थॉमस नरोन्हा, उत्तम भारती, अशोक कुटे यांच्यासह संबंधीत समन्वय अधिकारी यावेळी उपस्थित होते.

मामुर्डी येथील सेंट जॉर्ज इंग्लिश मिडीयम स्कूल, किवळे येथील विद्या भुवन स्कूल, विकासनगर, भोईरनगर येथील जयवंत प्राथमिक शाळा आणि दिवंगत मनिषा भोईर विरंगुळा केंद्र, पुनावळे येथील महापालिका शाळा, चिंचवडगाव येथील महात्मा फुले प्राथमिक शाळा आणि मरहूम फकिरभाई पानसरे उर्दू विद्यालय, थेरगाव येथील यशवंतराव चव्हाण विद्यालय, पिंपळे सौदागर येथील पी. के. इंटरनॅशनल इंग्लिश मिडीयम स्कूल व महापालिका शाळा तसेच जी.के. गुरुकुल, पिंपळे निलख येथील महापालिका शाळा, पिंपळे गुरव येथील महापालिका शाळा आणि विशालनगर येथील विद्याविनय निकेतन शाळा या मतदान केंद्रांना निवडणूक निरीक्षकांनी भेटी दिल्या. त्यांनी मतदान केंद्राची पाहणी करून संबंधित अधिकाऱ्यांशी तेथील व्यवस्थेबाबत चर्चा केली.

एमआयटी वर्ल्ड पीस युनिव्हर्सिटीच्या विद्यार्थ्यांना प्रथम क्रमांकाचे बक्षीस

पुणे, दि.१४ फेब्रु.भारतीय प्रौद्योगिक संस्था (आयआयटी) गोवा यांनी ०९ ते ११ फेब्रुवारी २०२३ आयोजित केलेल्या सिफेस २३ एक्स अथर इलेक्ट्रिक टू व्हीलर डिझाईन व मॅन्युफॅक्चरिंग स्पर्धेत भारतातून आलेल्या २५ संघांनी सहभाग घेतला होते. या स्पर्धेत  एमआयटी वर्ल्ड पीस युनिव्हर्सिटी, पुणेच्या संघाने राष्ट्रीय पातळीवर  प्रथम क्रमांक मिळवून  रु. ३००००/- चे पारितोषिक पटकाविले आहे.
इलेक्ट्रिक वाहन ही काळाची गरज असून या स्पर्धेमधून विध्यार्थाना इलेक्ट्रिक वाहन बनविताना येणार्‍या सर्व सुरक्षा प्रणालींचे चे प्रयोजन करणे बंधनकारक असते. १ किलो वॅट मोटर, ३० अँपिएर  ४८ वोल्ट ची बॅटरी वापरून हे वाहन बनविण्यात आले आहे. या वाहनात अल्कोहोल डिटेक्टर सेन्सर, क्रूझ कंट्रोल, ऑटोनॉमस ब्रेकींग अशीविविध अत्याधुनिक प्रणाली बसविण्यात आल्या आहेत.
अशा स्पर्धांमधून विद्यार्थ्यांना वर्गाबाहेरील ज्ञान, संघटन कौशल्य, प्रकल्प नियोजन, आर्थिक नियोजन इत्यादी गोष्टी आत्मसात होतात. भारतीय प्रौद्योगिक संस्था (आयआयटी) चे प्राध्यापक आणि अथर या कंपनीचे  चे इंजिनिअर्स यांच्या कडून या इलेक्ट्रिक टू व्हीलर डिझाईन व मॅन्युफॅक्चरिंगचे मूल्यांकन स्टॅटिक व डायनॅमिक अशा दोन उपविभागात केल्या गेले. संघ प्रमुख सिद्धांत देशमुख, उप संघ प्रमुख अतुल झा, सदस्य प्रणव जाधव, मयुरेश ओक, दीपेश चारथड व संघाचे इतर सदस्य यांनी अत्यंत कुशाग्रतेने हि गाडी बनविताना अथक परिश्रम घेतले. यांना संघाचे सल्लागार प्रा. आशिष पवार व प्रा. निलेश बिराजदार आणि प्रा. प्रल्हाद पेसोडे याचे मार्गदर्शन लाभले.
या यशाबद्दल एमआयटीचे संस्थापक विश्वस्त प्रा. प्रकाश जोशी, विद्यापीठाचे कार्यकारी अध्यक्ष राहुल कराड, कुलगुरू डॉ.आर.एम. चिटणीस, यंत्र अभियांत्रिकी विभाग प्रमुख डॉ. गणेश काकांडीकर, उप विभाग प्रमुख डॉ.दीपक हुजरे आणि डॉ. कुंडलिक माळी व अधिष्ठाता डॉ. दिनेश सेठ यांनी अभिनंदन केले.

श्री योग वेदांत सेवा समिती पुणे यांच्यावतीने मातृ-पितृ पूजन
पुणे : भारतीय संस्कृतीत अनेक चांगले सण, उत्सव आहेत. यामध्ये आई-वडिल, गुरू यांना आदर दिला आहे. परंतु काळाच्या ओघात तरुणाईला आपल्या संस्कृतीचा विसर पडत आहे. व्हॅलेंटाईन डे सारखे दिवस तरुणाई उत्साहात साजरी करते, परंतु माता पित्यांचा सन्मान देखील करायला हवा, यासाठी व्हॅलेंटाईन डे ऐवजी पुण्यात मातृ-पितृ दिन व पूजन उत्साहात करण्यात आले.

श्री योग वेदांत सेवा समिती पुणे यांच्यावतीने अखिल मंडई मंडळाच्या प्रांगणात मातृ-पितृ पूजन कार्यक्रमाचे आयोजन करण्यात आले होते. साध्वी रेखा बहन यांच्या गीता भागवत सत्संगाचे आयोजन देखील करण्यात आले होते. जाधवर ग्रुप ऑफ इन्स्टिट्यूट्सचे अध्यक्ष प्राचार्य डॉ. सुधाकर जाधवर, समिति चे अध्यक्ष चेतन चरवड, सचिव राकेश श्रीवास्तव, मीडिया प्रमुख सचिन परदेशी व इतर पदाधिकारी आणि सदस्य उपस्थित होते. 
साध्वी रेखा बहन म्हणाल्या, व्हॅलेंटाईन डे ऐवजी मातृ-पितृ दिन साजरा करायला हवा. शाळेमध्ये घराघरांमध्ये आणि प्रत्येक माणसापर्यंत हा संदेश जायला पाहिजे. आपला दिवसच आपल्या आई-वडिलांपासून चालू होतो, हीच आपली संस्कृती आहे. काळ बदलतो तसे काळासोबत अनेक गोष्टी बदलतात, परंतु आपले संस्कार आपण विसरता कामा नये.

प्राचार्य डॉ. सुधाकर जाधवर म्हणाले, भारतीय लोक कोणताही विचार न करता अंधानुकरण करतात. अनेकदा याचे दुष्परिणाम देखील होतात. भारत देशात व्हॅलेंटाईन डे  साजरा करण्यापेक्षा मातृ पितृ दिन साजरा करायला पाहिजे. आई वडिलांना परमेश्वर मानून त्यांची पूजा करणे, ही भारत देशाची संस्कृती आहे. भारत देशातील चांगल्या प्रथा पुढे नेणे गरजेचे आहे, असेही त्यांनी सांगितले.

चेतन चरवड म्हणाले, हा उपक्रम समिती सॅन २००५  पासून साजरा करत आहे. आज संपूर्ण भारतामध्ये आणि 1१५६ देशांमध्ये मातृ पितृ दिवस म्हणून उत्साहात साजरा केला जातो. प्रत्येकाने याचे अनुकरण करणे गरजेचे आहे. 

पुणे-

राष्ट्रीय स्वच्छ गंगा अभियान (एनएमसीजी) आणि राष्ट्रीय शहरी व्यवहार संस्था (एनआययुए) यांनी पुणे येथे संयुक्तपणे आयोजित केलेल्या  “धारा” अर्थात शहरी नद्यांसाठी समग्र कृती विषयक उपक्रमाअंतर्गत वार्षिक बैठकीच्या उद्घाटन सत्राला  केंद्रीय जलशक्तीमंत्री गजेंद्र सिंह  शेखावत यांच्या अध्यक्षतेखाली 13 फेब्रुवारी रोजी प्रारंभ झाला.    

धारा 2023 ही “रिव्हर सिटीज अलायन्स” च्या सदस्यांची वार्षिक बैठक असून  या माध्यमातून स्थानिक जलस्रोतांचे व्यवस्थापन आणि त्यासंबंधीचे उपाय जाणून घेण्यासह विचारमंथन करण्याच्या उद्देशाने  सह शिक्षणासाठी, आयुक्त, अतिरिक्त आयुक्त, वरिष्ठ अधिकारी,  भारतातील 100 सदस्यीय नदी शहरांचे ज्येष्ठ नियोजक तसेच मुख्य अभियंता यांना व्यासपीठ उपलब्ध झाले आहे.

एनएमसीजीचे महासंचालक, जी. अशोक कुमार,पुणे महानगर पालिकेचे आयुक्त विक्रम कुमार, एनआययुएचे संचालक हितेश वैद्य, हे देखील या कार्यक्रमाला उपस्थित होते. सुरुवातीच्या सत्रात अयोध्या आणि औरंगाबादसाठी नागरी नदी व्यवस्थापन योजना आणि ‘75 रिव्हर इनिशिएटिव्ह्स’ – या विषयावर एक संकलनही सादर करण्यात आले.

नद्या या नेहमीच नागरी सभ्यतेशी  एकरूप होत असतात आणि गेली कित्येक दशके आपण आपल्या जगण्यासाठी या नद्यांचा वापर केल्यानंतर आता आपण या नद्यांना काय देऊ शकतो यावर चिंतन  करण्याची वेळ आली आहे, अन्यथा आपल्या भावी पिढीला पाणीटंचाईच्या समस्येला तोंड द्यावे लागेल, असे श्री गजेंद्र सिंह शेखावत यांनी यावेळी उपस्थितांना संबोधित करताना सांगितले. आज या कार्यक्रमाला 40 हून अधिक महापालिका आयुक्त उपस्थित आहेत आणि जलस्त्रोतांचे प्रभावीपणे व्यवस्थापन करण्यासाठी वि-केंद्रीकृत नियोजनाचे महत्त्व याविषयी वचनबद्धता दाखवल्याबद्दल  त्यांनी आनंद व्यक्त केला. “स्थानिक स्वराज्य संस्थांच्या पातळीवर नियोजन उत्तम प्रकारे केले जाऊ शकते आणि म्हणूनच त्यांच्या उपस्थितीला येथे खूप महत्त्व आहे,” असे ते म्हणाले. “स्थानिक स्वराज्य संस्थांच्या माध्यमातून आपण लोकांशी थेट जोडले  जाऊ शकतो आणि पाण्याशी संबंधित कोणत्याही उपक्रमाच्या यशस्वितेसाठी ते अत्यंत महत्वाचे आहे, असे त्यांनी सांगितले.

देश एका निर्णायक काळातून जात असून, स्वातंत्र्याची ७५ वर्षे पूर्ण झाली आहेत, असे शेखावत म्हणाले. जग आपल्या विकासाकडे  मोठ्या अपेक्षेने पाहत असून विशेषतः जेव्हापासून भारताने  जी 20 चे अध्यक्षपद ग्रहण केले आहे, तेव्हापासून जगाचे भारताकडे लक्ष आहे, असे ते म्हणाले.

आपल्या जल विषयक उपक्रमांची व्याप्ती केवळ पायाभूत सुविधांच्या  विकासापुरती  मर्यादित न ठेवता लोकांना नद्यांशी जोडण्याचा प्रयत्न आपण जोमाने करायला हवा, असे त्यांनी सांगितले.  आपल्या पूर्वजांच्याकडून चालत आलेल्या  पारंपारिक ज्ञानाचा  भाग म्हणून आणि आता एकेक पिढीनंतर कमी होत गेलेला पाण्याबद्दलचा आदर पुन्हा प्रस्थापित करणे आवश्यक आहे,” असे ते म्हणाले, “सध्याच्या काळातल्या एका शक्तिशाली साधनाच्या म्हणजे समाज माध्यमांच्या मदतीने   आपणच  ती भावना तरुण पिढीमध्ये निर्माण करण्याची वेळ आली आहे, असे ते म्हणाले

जलशक्ती मंत्रालय प्रत्येक कुटुंबाला सुरक्षित पेय जल पुरवण्यासाठी , भूजल व्यवस्थापन आणि पुनर्भरण, एक्वाफर मॅपिंग, नदी पुनरुज्जीवन या सर्व स्तरावर कार्य  करत आहे आणि जलक्षेत्रासाठी  सर्वात जास्त आर्थिक निधी देणाऱ्या देशांपैकी भारत एक देश आहे, असे शेखावत म्हणाले.

आपल्या उद्घाटनपर भाषणात  एनएमसीजीचे महासंचालक, जी. अशोक कुमार  यांनी पाहुण्यांचे स्वागत केले.  गंगा नदी आणि तिच्या उपनद्यांचे पुनरुज्जीवन करण्यासाठी नमामि गंगे कार्यक्रम सुरू करण्यात आला आहे, अशी माहिती त्यांनी दिली. “नमामि गंगा कार्यक्रमाची निवड  160 हून अधिक देशांमधून जगातील अव्वल 10 प्रमुख कार्यक्रमांपैकी एक म्हणून करण्यात आली आहे आणि हेच  नमामि गंगे कार्यक्रमाच्या यशाचे द्योतक आहे.” असे ते म्हणाले.

धारा 2023 च्या पहिल्या दिवशी  ‘भारतातील नदी व्यवस्थापनाची अभिनव उदाहरणे’, ‘नदी व्यवस्थापनासाठी नाविन्यपूर्ण आंतरराष्ट्रीय केस स्टडीज’, ‘शहरी नदी व्यवस्थापनासाठी अजेंडा मजबूत करणे’, ‘नद्यांसाठी युवा ’, ‘आंतरराष्ट्रीय स्तरावरच्या नदी शहरांचे अनुभव’. या विषयांवर विविध सत्रे आयोजित करण्यात आली होते.