पुणे- मिळकत कर आकारणी करताना ४० टक्के सवलत म्हणजेच पूर्वीप्रमाणेच कर आकारणी व्हावी,म्हणजेच करात वाढ होऊ नये म्हणून पीटी 3चे फॉर्म भरून घेण्याची करदात्यांना सक्ती करणे अन्याय कारक असून हि थेरं बंद करा असा स्पष्ट इशारा आता लोकप्रतिनिधी देऊ लागले आहेत रेशन कार्डे,आधार कार्ड,प ॅन कार्ड आणि वेगवेगळ्या कागदपत्रांच्या पत्रावळीत नागरिकांना सातत्याने छळून घेण्यात येत असल्याची भावना तीव्र वेगाने पसरते आहे.नानाविध प्रकारची कार्डे, प्रमाणपत्रे,आणि नानाविध प्रकारचे कर भरता भरता सामान्य माणूस मेटाकुटीला येतो आहे. आणि नागरिकांत याबद्दल संताप निर्माण होतो आहे. राष्ट्रवादी अर्बन सेल पुणे शहर अध्यक्ष नितीन कदम आणि सौ आश्विनी कदम यांनी म्हटले आहे कि,’आधीच भरमसाठ टॅक्स त्यात 40% अधिकचे भरणे. त्याशिवाय no due सर्टिफिकेट मिळतच नाही..त्याचबरोबर इतरही खूप अनावश्यक कागदपत्रांची मागणी केल्चेया आढळून येत आहे..मुळामध्ये शासनाने 40% सवलत देण्याचे आदेश दिले असताना महापालिकेने अर्ज करण्यासाठी मुदत घालणे हेच चुकीचे आहे.त्यामुळे महापालिकेने दिलेली आजची मुदत नुसतीच वाढवणे पेक्षा काढून टाकावी. आज मीतिला जवळजवळ दोन लाखांपेक्षा जास्त नागरिकांना याचा लाभ घेता येत नाही..हा पुणेकरांवर अन्याय आहे..

दरम्यान माजी विरोधी पक्षनेते उज्ज्वल केसकर,सुहास कुलकर्णी,माजी नगरसेवक प्रशांत बधे यांनी आता यासंदर्भात पुन्हा मुख्यमंत्री, उपमुख्यमंत्री, पुण्याचे पालकमंत्री, शिक्षण मंत्री यांच्यासह आयुक्त,अतिरिक्त आयुक्त आणि कर आकारणी संकलन प्रमुख यांना पत्र दिले आहे. यात म्हटले आहे कि,’महाराष्ट्र शासनाने प्रामाणिक करदात्यांना 40% रिटेबल व्हॅल्यू मध्ये कर आकारणी करताना सवलत दिली त्यासाठी तत्कालीन पालकमंत्री आणि आमच्या कोथरूडचे आमदार चंद्रकांतदादा पाटील तसेच देवेंद्र फडणवीस यांनी पुढाकार घेतला होता. या सगळ्या पार्श्वभूमीवर महानगरपालिकेमध्ये करदात्यांकडून
पीटी 3 अर्ज भरून घेणे २०१९ नंतर ज्यांची कर आकारणी झाली आहे त्यांना सक्तीचे केले हे करण्याची गरज नव्हती हे त्यावेळेला देखील आमचे मत नोंदवले होते आणि आजही आमचे मत कायम आहे.समाविष्ट २३ गावातील लोकांना मुदत १ जानेवारीपर्यंत तर मूळ पुणेकरांना मुदत आजपर्यंत हा अन्याय आहे.मुळात हा फॉर्म भरून घेण्याची गरजच नाही हे आम्ही सर्व प्रमाण सिद्ध करू शकतो परंतु वारंवार विनंती करून देखील याबाबत प्रशासनाने आम्हाला वेळ दिला नाही.
जे करदाते वारंवार amnesty scheme देऊन सुद्धा पैसे भरत नाहीत असे लोक त्यांच्यावर जे व्याज लागले आहे ते रद्द करण्यासाठी एकत्र झाले एका पंचतारांकित हॉटेलमध्ये भेटले त्या ठिकाणी मलिदा कुणाला कसा द्यायचा हे ठरले आणि कर आकारणी आणि कर संकलन विभागाने आयुक्त यांच्याकडे पुन्हा एकदा या करबुडव्या लोकांसाठी amnesty scheme सुचवली आहे यापूर्वी तीन वेळा ही योजना सुचवली होती अमलात आणली होती त्यावेळेला कर आकारणी आणि कर संकलन विभागाचे प्रमुख विलास कानडे यांनी स्पष्ट अभिप्राय देऊन अशा प्रकारची योजना आणल्यास कर भरण्याचे प्रमाण कमी होते आणि बुडवणारे शिरजोर होतात असे सांगितले होते त्यावेळेला लोकनियुक्त स्थायी समितीने आग्रह धरून ही योजना आणली त्यावेळेला देखील आम्ही विरोध केला होता आता तर लोकनियुक्त समिती नाही त्यामुळे कर आकारणी आणि कर संकलन विभागाचा प्रस्ताव हा आयुक्त स्थायी समिती म्हणून मान्य करणार आयुक्तच मुख्य सभा म्हणून मान्यता देणार आणि आयुक्तच प्रशासक म्हणून अंमलबजावणी करणार अशी परिस्थिती आहे आमची आपणास विनंती आहे या विषयात लक्ष घालावे प्रामाणिक करदात्यांना शिक्षा आणि करबुडव्याना बक्षीसी हे धोरण चालू देऊ नये तातडीने महापालिका आयुक्त यांना या योजनेच्या संदर्भामध्ये कुठलाही निर्णय घेऊ नये अशा प्रकारचे आदेश द्यावेत ही विनंती प्रामाणिक पुणेकर आणि प्रामाणिक करदाते पुणेकर यांच्या वतीने हात जोडून विनंती आहे.

(PT-३) मुदतीचा संबध नाही-कधीही द्या (PT-३)तपासणी करून निर्णय घेऊ – अजित देशमुख

दरम्यान आज पुणे महानगरपालिका कर आकारणी व कर संकलन उप आयुक्त अजित देशमुख यांनी सत्वर आदेश काढून म्हटले आहेकी ,’ ज्या निवासी मिळकतींची जी. आय. एस. सर्व्हेक्षानांतर्गत सवलत काढली गेली आहे, किंवा ज्या निवासी मिळकतींची नव्याने आकारणी दिनांक ०१/०४/२०१९ नंतर झालेली आहे, अशा स्व-वापर करीत असलेल्या निवासी मिळकतींना दिली जाणारी ४०% सवलतीचा अर्ज (PT-३) करणेकरिता दिनांक ३० नोव्हेंबर, २०२३ पर्यंत मुदतवाढ देण्यात आली होती. आज अखेर ९६,२५७ इतके ४०% सवलतीचे (PT-३ चे) अर्ज प्राप्त झाले आहेत.सदरची मुदत संपली असली तरी, दिनांक ३० नोव्हेंबर २०२३ नंतर ज्या मिळकतधारकांचे ४०% सवलतीसाठी PT-३ चे अर्ज प्राप्त होतील, अशा निवासी मिळकतीसाठी पुढील आर्थिक वर्षाकरिता दिनांक ०१/०४/२०२४ पासून पुढील कालावधीकरिता संबंधित मिळकतधारकांचे स्वरहिवास कागदपत्राचे पुरावे तपासणी करून निर्णय घेण्यात येईल, याची नागरिकांनी नोंद घ्यावी.

पुणे :भारतातील वन्यजीव संवर्धनासाठी राबवल्या जाणाऱ्या महत्वाच्या  प्रकल्पांपैकी ‘प्रोजेक्ट टायगर’ला’ पन्नास वर्षे पूर्ण झाल्याचे औचित्य साधून वन्यजीव संवर्धनाच्या या यशस्वी प्रकल्पाच्या सुवर्ण महोत्सवाचे  कौतुक करण्यासाठी ‘जीविधा’ संस्थेतर्फे आयोजित भित्तीपत्रक प्रदर्शनाचे उद्घाटन राज्याचे माजी प्रधान मुख्य वनसंरक्षक सुनील लिमये यांच्या हस्ते झाले.
२९ नोव्हेंबर ते ३ डिसेंबर २०२३ या कालावधीत यशवंतराव चव्हाण कलादालन, कोथरूड, पुणे येथे ‘व्याघ्र प्रकल्पाची पन्नास  सोनेरी वर्षे’ या संकल्पनेवर आधारित प्रदर्शन आयोजित केले आहे. या प्रदर्शनाद्वारे वाघांच्या संवर्धनात ‘ व्याघ्र प्रकल्पांची’ भुमिका , स्थानिक लोकांना रोजगार उपलब्ध करून देण्यासाठीचे प्रयत्न, व्याघ्र प्रकल्पांसमोरील भावी काळातील आव्हाने यासारख्या विषयांची माहिती पोस्टरद्वारे करून दिली जात आहे.
प्रदर्शनाचे उद्घाटन  माजी प्रधान मुख्य वनसंरक्षक  सुनील लिमये  यांच्या हस्ते बुधवार , २९ नोव्हेंबर रोजी सायंकाळी साडे सहा  वाजता झाले.जीविधा संस्थेचे अध्यक्ष राजीव पंडित यांनी प्रास्ताविक केले. वृंदा पंडित यांनी आभार मानले. राजेंद्र आवटे,प्रज्ञा सातारकर, अभिजित ताम्हणे यांच्यासह अनेक मान्यवर उपस्थित होते. यावेळी ‘कान्हा द प्रोटेक्टिंग पॅराडाईज ‘ या माहितीपटाचे प्रसारण यावेळी करण्यात आले.संगीता राठी यांनी सूत्रसंचालन केले.
सुनील लिमये म्हणाले,’ भारतात वाघांची संख्या वाढत आहे.पण ही ठिकाणे विखुरलेली आहेत.वाघांना अभयारण्यात राहावेसे वाटणे, पिले देता यावेत असे अधिवास तयार करणे महत्वाचे आहे. नामिबियातून भारतात चित्ते आणणे हा सकारात्मक प्रयोग असून त्याला वेळ दिला पाहिजे. प्राणी विश्वात नवनवीन प्रयोग होत राहिले पाहिजेत.जंगल बघायला शिकले पाहिजे.
 प्राण्यांचे अस्तित्व सगळ्यासाठी गरजेचे आहेत. वाघाचे अस्तित्व हे चांगल्या परिसंस्थेचे लक्षण आहे. म्हणून वाघांचे रक्षण केले पाहिजे. वाघांना एका अभयारण्यातून दुसऱ्या अभयारण्यात जाण्यासाठी आवश्यक कॉरिडॉर जपले पाहिजेत. वाघाकडून माणूस मारला जातो, तेव्हा मानवी चुका त्यात असण्याची शक्यता जास्त असते. अभयारण्यात बंदी असलेल्या भागात माणसांनी जावू नये.बिबट्यापासून जपण्यासाठी काळजी घेण्याचे उपाय लोकांनी ऐकले पाहिजेत.गवा शहरात आला तरी गर्दी करून संकट निर्माण करता कामा नये. वन खात्याला काम करु द्यावे.
वन्य प्राण्यांना पाहण्यासाठी जंगलात गेले पाहिजे. जंगलं आणि प्राण्यांचे महत्त्व सांगा. पाणी मुरवणे हे जंगलाचे काम आहे. हेही महत्त्वाचे कारण आहे. शहरात झाडाचे आच्छादन वाढवले पाहिजे.

राजीव पंडित म्हणाले, ‘जैव विविधता जपण्यासाठी जागृती आणि लोक शिक्षण करण्याचे काम जिविधा करते. विविध प्रशिक्षण वर्ग आयोजित करतो.    अभयारण्यातील गाईड्स ना प्रशिक्षण देत असतो.  १९९० पासून काम करत आहोत.पण,तेच प्रश्न व्याघ्र प्रकल्पात अजून आहेत. नवे विकासाचे प्रश्न ही निर्माण झाले आहेत. कॉरिडॉर खंडित होत आहेत. लोकसहभाग वाढावा यासाठी स्पर्धा घेण्यात आले. गाईड हेच जंगलाचे, अभयारण्याचे ब्रँड ॲम्बेसेडर आहेत. त्यासाठी गाईड निवडून पारितोषिक देत आहोत.

  त्यासोबतच या वर्षीपासून जीविधा संस्थेचे वतीने ‘महाराष्ट्राच्या व्याघ्र प्रकल्पातील सर्वोत्कृष्ट गाईड’ हा पुरस्कार दिला जाणार आहे. या पुरस्काराचा पहिला मानकरी म्हणून जीविधा ने नेमलेल्या समितीने ताडोबा व्याघ्र प्रकल्पातील कोअर मधे काम करणाऱ्या शहनाज बेग यांची निवड केली आहे.  त्यांचा सत्कार शुक्रवार ,१ डिसेंबर रोजी  सायंकाळी साडेपाच ते सात   वाजता  करण्यात येणार आहे. शहनाज बेग महाराष्ट्रातील पहिल्या महिला गाईड आहेत व ताडोबा मधील पुरूष गाईडचे वर्चस्व मोडून काढण्यासाठी लढा देऊन महिलांना गाईड बनण्यासाठी प्रोत्साहन दिले व अनेक महिलांना गाईड म्हणून तयार केले.या कार्यक्रमाला वनखात्याचे पुणे शहराचे मुख्य वनसंरक्षक  एन आर प्रविण उपस्थित राहणार आहेत.  त्यांनी ताडोबा चे फिल्ड डायरेक्टर म्हणून काम बघितले आहे. जीविधा संस्थेचे अध्यक्ष राजीव पंडित  हे गाईडना ट्रेनिंग देण्याचे व लोकांना जंगलात घेऊन जाण्याचे काम करतात. या सत्कार समारंभा नंतर शहनाज बेग, एन.आर. प्रवीण व राजीव पंडित यांची मुलाखतीचा कार्यक्रम असणार आहे .
 तीघांच्या एकत्र मुलाखती मधून व्याघ्र प्रकल्पाविषयी विविध अंगाने माहिती पुणेकरांना  मिळेल. 
  या  अभिमानास्पद प्रकल्पाची माहिती मिळवण्यात समाजाचा सहभाग असावा, म्हणून जीविधा संस्थेतर्फे यावर्षी प्रौढांसाठी पोस्टर स्पर्धा, शालेय विद्यार्थ्यांसाठी चित्रकला स्पर्धा, ज्युनियर कॉलेजच्या विद्यार्थ्यांसाठी निबंध स्पर्धा अशा तीन स्पर्धांचे आयोजन केले आहे.निबंध, चित्रकला व पोस्टर स्पर्धेच्या विजेत्यांचा सत्कार समारंभ रविवार, दि. ३ डिसेंबर रोजी सकाळी साडे दहा  वाजता माजी नगरसेविका सौ. मेधा कुलकर्णी यांच्या हस्ते होणार आहे.
‘प्रोजेक्ट टायगर’ची ५० वर्षे  
 पन्नास वर्षे भारतातील वन्यजीव संवर्धनासाठी राबवल्या जाणाऱ्या महत्वाच्या  प्रकल्पांपैकी ‘प्रोजेक्ट टायगर’ला पंन्नास वर्षे पूर्ण झाली. तत्कालीन पंतप्रधान माननीय श्रीमती इंदिरा गांधी यांनी १ एप्रिल १९७३ ला प्रोजेक्ट टायगर या प्रकल्पाची घोषणा केली. त्यावेळेस ९ जंगलं व्याघ्र प्रकल्पांतर्गत संरक्षित केली गेली. सध्या भारतात ५४ व्याघ्र प्रकल्प आहेत. जगातील ७० टक्के  वन्य वाघ भारतात आहेत हे प्रोजेक्ट टायगरचे यश आहे. भारतात सरकारने आपल्या राष्ट्रीय प्राण्याचे संरक्षण करण्यासाठी  व्याघ्र प्रकल्प निर्माण करणे, शिकारीविरोधात कायदे लागू करणे आणि संवर्धनाच्या प्रयत्नांमध्ये लोकसमुदायाच्या सहभागास प्रोत्साहन देणे  यासारखी अनेक पावले उचलली आहेत.

भारतीय विद्या भवन -इन्फोसिस फाऊंडेशन आयोजित  ‘कथा कीर्तन महोत्सव’  ला चांगला प्रतिसाद 
पुणे:भारतीय विद्या भवन -इन्फोसिस फाऊंडेशन आयोजित  ‘कथा कीर्तन महोत्सव’ मध्ये   तिसऱ्या दिवशी  दि. २९ नोव्हेंबर रोजी ,सायंकाळी ६ वाजता अंजली कऱ्हाडकर, शिवानी कऱ्हाडकर या मायलेकिंचा  पारंपरिक कीर्तन संवाद रंगला! पुणेकर रसिकांचा  चांगला प्रतिसाद मिळाला .

 महाराष्ट्रातील शेकडो वर्षांच्या  कीर्तन परंपरांचा परिचय आजच्या पिढीला करून देण्याच्या उद्देशाने भारतीय विद्या भवन व इन्फोसिस फाउंडेशन यांच्या वतीने आयोजित कथा कीर्तन महोत्सवात हे कीर्तन आयोजित करण्यात आले होते.
 भारतीय विद्या भवन बंगळुरू केंद्राच्या सह संचालक नागलक्ष्मी राव, ज्येष्ठ नेते उल्हास पवार, आरती सचदेव, रत्ना शहा यांच्यासह अनेक मान्यवर उपस्थित होते.भारतीय विद्या भवन चे मानद सचिव नंदकुमार काकिर्डे यांनी सूत्रसंचालन केले, स्वागत केले.  उल्हास पवार उद्घाटन प्रसंगी म्हणाले “आज कऱ्हाडकर माय लेकी कीर्तन संवाद सादर करणार आहे, ही एक प्रकारची कीर्तन जुगलबंदीच उपस्थितांना अनुभवायला मिळणार आहे! लय, विनय आणि अभिनय  यांचा उत्तम संगम म्हणजे कीर्तन होय! जो अध्यात नाही आणि मध्यात नाही तो अध्यात्मिक म्हणावा!”
लक्ष्मीचे भक्त उपासक आणि सरस्वतीचे भक्त उपासक यांच्यातील लक्ष्मी आणि सरस्वती यात श्रेष्ठ कोण या विषयावरील भक्त संवाद हा आजच्या कीर्तनाचा विषय होता.प्रथम कीर्तनकार अंजली कऱ्हाडकर आणि कन्या शिवानी कऱ्हाडकर यांनी रामकृष्ण हरी राजाराम, रघुपती राघव राजाराम पतीत पावन सिताराम, तसेच जय शारदे वागेश्वरी ही पदे सादर केली.या नंतर पुरंदरदास कथा सादर करण्यात आली, पुरंदरदास हे प्रथम लक्ष्मी मातेचे उपासक होते, नंतर ते सरस्वती देवीचे उपासक झाले, यावरील कथा उभय कीर्तनकार कऱ्हाडकर यांनी सादर केली.कीर्तनकार कऱ्हाडकर यांना प्रिया केळकर गांगुली यांनी संवादिनीवर तर केदार तळणीकर यांनी तबल्यावर साथ दिली. 
सप्ताह भर कथा कीर्तन
   गुरुवार दि.३० नोव्हेंबर रोजी,सायंकाळी ६ वाजता कीर्तन विशारद  श्रेयस संजय कुलकर्णी यांच्या  नारदीय कीर्तनाने सप्ताहातील चवथे पुष्प गुंफले जाणार आहे. सप्ताहातील पाचवे पुष्प शुक्रवार, दि. १ डिसेंबर रोजी,सायंकाळी ६ वाजता कीर्तनचंद्र  श्रेयस बडवे व किर्तन चंद्रिका सौ मानसी बडवे  पती-पत्नीच्या ” कीर्तन जुगलबंदीने” गुंफले जाणार  आहे. या मालिकेतील सहावे पुष्प शनिवार ,दिनांक २  डिसेंबर रोजीसायंकाळी ६ वाजता ज्येष्ठ  कीर्तनकार चारुदत्त  आफळे यांच्या राष्ट्रीय कीर्तनाने गुंफले जाणार आहे.
महोत्सवाच्या  अखेरच्या दिवशी म्हणजे रविवार, दि. ३ डिसेंबर रोजी सकाळी १०  ते १२ दरम्यान ” कीर्तन परंपरा – काल, आज व उद्या” या महत्त्वाच्या विषयावर परिसंवाद होणार आहे. यामध्ये संत साहित्याचे ज्येष्ठ अभ्यासक डॉ. सदानंद मोरे, ज्येष्ठ माध्यमतज्ञ  प्रा.डॉ. विश्राम ढोले,  तत्वज्ञान व प्राच्य विद्या यांचे अभ्यासक व  संशोधक डॉ. प्रणव गोखले सहभागी होणार असून ह .भ. प. प्रा. अभय टिळक हे परिसंवादाचे सूत्रसंचालन करणार आहेत.
 याच दिवशी सायंकाळी सहा वाजता  कीर्तन महोत्सवाचा समारोप होणार आहे. यावेळी प्रारंभी ६ वाजता भारतीय विद्या भवनच्या अध्यक्षा श्रीमती लीना मेहंदळे यांचे  “महाभारतातील किर्तन परंपरा”  यावर व्याख्यान होणार असून त्यानंतर  ठाणे येथील युवा कीर्तनकार अमेय बुवा  रामदासी यांचे रामदासी कीर्तन सादर होणार आहे. 
भारतीय विद्या भवनच्या सेनापती बापट रस्त्यानजीकच्या  सरदार महादेव बळवंत नातू  सभागृहामध्ये या कीर्तन महोत्सवाचे आयोजन करण्यात आले आहे.  पुणे शहर व जिल्ह्यातील कीर्तन महाविद्यालयाचे विद्यार्थी, अभ्यासक, रसिक यांनी उपस्थित राहावे असे आवाहन भारतीय विद्या भवन तर्फे करण्यात आले आहे.प्रवेश मोफत आहे. 

पुणे : भारतातातील सुपरकपॅसिटरचे जनक, शास्त्रज्ञ व स्पेल टेक्नॉलॉजीचे मुख्य व्यवस्थापकीय संचालक डॉ. राजेंद्रकुमार शर्मा यांना वेस्टमिनिस्टर लंडन येथील हाऊस ऑफ कॉमन्समध्ये (ब्रिटिश पार्लमेंट) ‘अचिव्हर्स वर्ल्ड लीडरशिप अवॉर्ड-२०२३’ प्रदान करण्यात आला. प्रगत ऊर्जा साठवण यंत्र (ऍडव्हान्स एनर्जी स्टोरेज डिव्हाईस) निर्मितीसाठी डॉ. राजेंद्रकुमार शर्मा यांना हा पुरस्कार देण्यात आला असून, सुपर कॅपॅसिटरचे उत्पादन करणारी स्पेल टेक्नॉलॉजी ही भारतातील एकमेव कंपनी आहे. सी-मेट लिथियम-आयन बॅटरीचे आणि सोडियम आयन टेक्नॉलॉजीचे ते प्रवर्तक आहेत.
अचिव्हर्स वर्ल्ड मॅगझीन, इंडियन अचिव्हर्स फोरम आणि ग्लोबल इंडियन ऑर्गनायझेशन-युके यांच्या संयुक्त विद्यमाने युरेशियन बिझनेस समिट व अचिव्हर्स वर्ल्ड लीडरशिप अवॉर्डचे आयोजन केले होते. विविध क्षेत्रात उल्लेखनीय कार्य करणाऱ्या व्यक्ती व संस्थांना या पुरस्काराने सन्मानित करण्यात आले. ‘युके’चे सर्वात ज्येष्ठ खासदार वीरेंद्र शर्मा यांच्या हस्ते पुरस्कारांचे वितरण झाले. प्रसंगी केरळच्या कोट्टायमचे खासदार थॉमस चाझीकडन, युगांडाचे युके व आयर्लंडमधील उच्चायुक्त निमिषा माधवा, ‘युके’तील आयसीआयसीआय बँकेचे मुख्य कार्यकारी अधिकारी लोकनाथ मिश्रा, ग्लोबल इंडियन ऑर्गनायझेशन युकेचे उपाध्यक्ष महेंद्रसिंह जडेजा, अचिव्हर्स वर्ल्डचे संपादक हरीश चंद्र आदी उपस्थित होते.
जागतिक स्तरावरील या कार्यक्रमामध्ये १०० पेक्षा अधिक विविध देशांचे प्रतिनिधी, व्यावसायिक, अधिकारी, कॉर्पोरेट क्षेत्रातील मान्यवर सहभागी झाले होते. जागतिक व्यापार, व्यावसायिक संबंध, इनोव्हेशन्स याविषयी चर्चा या व्यासपीठावर करण्यात आली. वीरेंद्र शर्मा यांनी जागतिक स्तरावरील द्विपक्षीय संबंधांच्या महत्त्वावर जोर देत भारत आणि यूके यांच्यातील व्यापार, व्यावसायिक सहकार्य वाढवण्याचे महत्त्व अधोरेखित केले. थॉमस चाझीकडन यांनी भारताच्या बहुआयामी विकासाचे कौतुक केले. जगभरातील भारतीयांच्या अमूल्य योगदानावर प्रकाश टाकत पुरस्कारार्थींचे अभिनंदन केले.
स्पेल टेक्नॉलॉजीजच्या संचालक संगीता शर्मा यांनी जागतिक स्तरावरील ‘अचिव्हर्स वर्ल्ड लीडरशिप अवॉर्ड २०२३’ पुरस्कार मिळाल्याचा आनंद वाटत आहे. भारताची मान अभिमानाने उंचावण्यात योगदान देता येत असल्याचा अभिमान वाटतो. 

भारतीय बनावटीच्या ऊर्जा साठवणूक उपकरणांची निर्मिती आम्ही करत आहोत. लिथियम-आयऑन बॅटरीच्या निर्मितीसाठी इलेक्ट्रॉनिक्स अँड इन्फर्मेशन टेक्नॉलॉजी मंत्रालय आणि स्पेल टेक्नॉलॉजी यांच्या संयुक्त विद्यमाने सेंटर फॉर मटेरियल्स फॉर इलेक्ट्रॉनिक्स टेक्नॉलॉजी (सी-मेट) येथे सेंटर ऑफ एक्सलन्स ऑन रिचार्जेबल बॅटरी टेक्नॉलॉजी उभारले आहे. बॅटरी निर्मितीसाठी छोट्या उद्योगांना सहकार्य केले जाते. आत्मनिर्भर भारताकडे टाकलेले हे एक पाऊल आहे.”- डॉ. राजेंद्रकुमार शर्मा, शास्त्रज्ञ व मुख्य व्यवस्थापकीय संचालक, स्पेल टेक्नॉलॉजी प्रायव्हेट लिमिटेड

 पुणे -पुणे जिल्हा दूध उत्पादक संघ (कात्रज डेअरी) कडून ग्राहकांना मोठा दिलासा देण्यात आला आहे. दूध दरात दोन रुपयांची कपात करण्याचा निर्णय कात्रज डेअरीकडून घेण्यात आला आहे. संघाचे अध्यक्ष भगवान पासलकर यांच्या अध्यक्षतेखाली २४ नोव्हेंबर रोजी झालेल्या संचालक मंडळाच्या बैठकीत हा निर्णय घेण्यात आला.गायीच्या दूध दरात ही कपात केलेली असून डेअरीकडून टोण्ड मिल्क नावाने त्याची विक्री होते. ग्राहकांसाठी हा निर्णय शुक्रवारपासून (ता. १ डिसेंबर) लागू होणार असून ग्राहकांना १ लिटर पॅकिंगचे टोण्ड दूध आता ५३ रुपयांमध्ये उपलब्ध होणार आहे. तसेच, कमी स्निग्ध व जास्त प्रोटीन असलेले डबल टोण्ड दूधाची २५० मिलीची पिशवी आता १२ रुपयांत उपलब्ध असणार आहे.