पुणे;राष्ट्रपती द्रौपदी मुर्मू यांनी आज, 1 डिसेंबर 2023 रोजी, पुणे येथील सशस्त्र दल वैद्यकीय महाविद्यालयाला प्रेसिडेंट्स कलर हा सन्मान देऊन गौरवले. यावेळी त्यांनी आभासी पद्धतीने ‘प्रज्ञा’ या सशस्त्र दलांच्या संगणकीय औषध उपचार केंद्राचे उद्घाटन देखील केले.

या प्रसंगी बोलताना, राष्ट्रपती म्हणाल्या की एएफएमसी अर्थात सशस्त्र दल वैद्यकीय महाविद्यालयाने, वैद्यकीय शिक्षणाच्या संदर्भात सर्वोच्च गुणवत्ता असलेली शिक्षण संस्था म्हणून नावलौकिक मिळवला आहे. या संस्थेतून पदवीधर झालेल्यांनी  युद्धाचा काळ, बंडविरोधी कारवाया, नैसर्गिक आपत्ती तसेच महामारीच्या काळात, देशांतर्गत तसेच सीमापार भागात समर्पितपणे सेवा देऊन देशासाठी अभिमानास्पद कामगिरी केली आहे.
एएफएमसी मधून पदवी मिळवलेल्या अनेक महिला सैनिकांनी सशस्त्र दलांच्या वैद्यकीय सेवा क्षेत्रात उल्लेखनीय योगदान दिले आहे तसेच अत्यंत उच्च पदांवर काम केले आहे याची दखल घेत राष्ट्रपतींनी आनंद व्यक्त केला. या महिलांकडून प्रेरणा घेऊन, अधिकाधिक महिला सशस्त्र दलांमधील कारकीर्द  निवडतील असा विश्वास त्यांनी यावेळी व्यक्त केला.

राष्ट्रपती मुर्मू म्हणाल्या की, आज आपण वैद्यकीय क्षेत्रात कृत्रिम बुद्धीमत्ता, प्रिसिजन मेडिसिन, त्रिमितीय छपाई, टेलीमेडिसिन आणि इतर तंत्रज्ञानांचा वापर होताना पाहतो आहोत. सैनिकांना तंदुरुस्त तसेच युद्धासाठी सदैव सज्ज ठेवण्यात सशस्त्र दलाच्या वैद्यकीय सेवा विभागाने महत्त्वाचे योगदान दिले आहे असे त्यांनी सांगितले. आणि म्हणूनच त्यांना, आपल्या तिन्ही सेनादलांतील कर्मचाऱ्यांना सर्वोच्च दर्जाच्या वैदयकीय सेवा मिळेल याची सुनिश्चिती करून घ्यावी लागते असे त्या म्हणाल्या.  एएफएमसीच्या पथकाने, वैद्यकीय क्षेत्रातील संशोधनावर अधिक भर द्यावा आणि अत्याधुनिक तंत्रज्ञानाचा वापर करावा अशा सूचना राष्ट्रपतींनी दिल्या. एएफएमसीमधील कर्मचारी त्यांच्या कार्यात उत्कृष्टता आणण्यासाठी अधिकाधिक प्रयत्न करतील असा विश्वास राष्ट्रपती द्रौपदी मुर्मू यांनी व्यक्त केला.

शालेय पोषण आहारात अंडी नकोत

पुणे : महाराष्ट्र सरकारने ७ नोव्हेंबर २०२३ रोजी शासन निर्णय प्रसिद्ध करत शाळेतील इयत्ता १ ली ते ८ वी पर्यंतच्या विद्यार्थ्यांना शालेय पोषण आहारात उकडलेली अंडी, अंडा भुर्जी, अंडा बिर्याणी, केळी देण्याचा निर्णय जाहीर केला आहे. हा शासन निर्णय ५ डिसेंबर २०२३ पासून लागू केला जाणार आहे. शास्त्रीयदृष्ट्या मांसाहार आरोग्यास हानिकारक असून, शालेय पोषण आहारात अंडी दिली जाऊ नयेत,” अशी मागणी शाकाहार चळवळीचे पुरस्कर्ते, सर्वजीव मंगल प्रतिष्ठानचे संस्थापक डॉ. कल्याण गंगवाल यांनी पत्रकार परिषदेत केली.

शाळांमधून जेवणात अंडी देणे अयोग्य आहे. शाळेतील जैन, महानुभव पंथी, ब्राह्मण व अन्य शाकाहारी विद्यार्थ्यांवर त्याचा परिणाम होईल. इतर विद्यार्थी अंड्यांचे पदार्थ खाताना त्यांनाही ते पदार्थ खाण्याची इच्छा होईल. वय लहान असल्याने त्यांना या गोष्टींचे ज्ञान नसते. त्यातून ही सवय जडली जाईल. एक प्रकारे या जैन व शाकाहारी मुलांना मांसाहारी बनविण्याचे महाराष्ट्र शासनाने षडयंत्र असून, ही अतिशय गंभीर बाब असल्याचा आरोपही डॉ. कल्याण गंगवाल यांनी केला.
डॉ. कल्याण गंगवाल म्हणाले, “शासनाने निर्णयामध्ये असेही  सांगितले आहे की, अंडी उत्पादक शेतकऱ्यांच्या मालाला बाजारपेठ मिळण्यासाठी ही योजना चालू केली आहे. परंतु शेतकऱ्यांच्या फायद्यासाठी विद्यार्थ्यांना मांसाहारी बनविणे कितपत योग्य आहे, याचा विचार आपण केला पाहिजे. आपला धर्म वाचविण्यासाठी सर्व लोकांनी एकत्र येऊन सरकारच्या निर्णयाविरोधात तीव्र सामाजिक लढा देणे गरजेचे आहे.”

“अंडे मांसाहारी असून, अंड्यातून कुठलेही पोषक घटक मिळत नाहीत. अंड्यात ‘सी’ व्हिटॅमिन नाही. प्रोटिन्सही केवळ १३.५ टक्के इतकेच आहे. त्यामध्ये कोलेस्ट्रॉल मोठ्या प्रमाणात असते. पोल्ट्री फार्ममधील कोंबड्यांवर अँटिबायोटिक्स, हार्मोन्सचा मोठा मारा होतो. शिवाय अंड्यांची उत्पत्ती अधिक व्हावी, याकरिता अनैसर्गिक प्रक्रिया केली जाते. अंडी शिळी की ताजी, याचीही आपल्याला माहिती नसते. त्यामुळे त्यातून अनेक रोगांना निमंत्रण मिळते,” असेही डॉ. गंगवाल यांनी सांगितले.
अंड्याच्या सेवनामुळे सालमोनेला (टायफॉईडचा ताप), ऍलर्जी, सर्दी, दमा, त्वचारोग, फूड पॉइजनिंग, पचन प्रक्रियेत बिघाड आदी आजार बळावतात. अनेक घातक अंश शरीरात येत असल्याने ह्रदयविकार होण्याची शक्यता अधिक असते. अंडी शाकाहारी नाहीत. अफलित अंड्यातील जिवंत स्त्रीबीजाला आपण मारतो. अशा हिंसक आहारामुळे मानसिक आरोग्यही बिघडते. विद्यार्थ्यांच्या आरोग्याशी आपण का खेळतोय, याचा विचार शाळा व पालकांनी करायला हवा, असे आवाहनही त्यांनी केले.

पुणे–सर्वोच्च न्यायालयाने दुकानांवर महाराष्ट्रात मराठी पाट्या असाव्यात अशा प्रकारचा निर्णय दिलेला आहे. त्यानंतर महाराष्ट्र नवनिर्माण सेनेचे कार्यकर्ते आक्रमक झाले असून त्यांनी पुण्यातील जंगली महाराज रस्त्यावरील आणिटिळक रोड वरील नामांकित दुकानांच्या बोर्डवर मराठीत पाट्या नसल्याच्या निषेधार्थ शुक्रवारी तोडफोड केल्याची घटना घडली आहे. यावेळी पोलिस बंदोबस्त असताना देखील कार्यकर्त्यांनी तोडफोड केली . दरम्यान पोलिसांनी सर्व प्रकारचे शूटिंग कॅमेऱ्यात केले आहे.मात्र कुठल्याही इंग्रजी पाट्या लावून सर्वोच्च न्यायालयाचा अवमान करणाऱ्या व्यापार्यावर गुन्हा दाखल केल्याचे वृत्त नाही . दुसरीकडे इंग्रजी पाट्या लावणाऱ्या व्यापाऱ्यांनी मात्र आम्हाला महापालिकेने नोटीस दिली नाही , द्यायला हवी होती , आम्हाला मराठी पाट्यांचा कायदाच ठाऊक नाही , समजावून सांगायला हवे होते ,तोडफोड हि पद्धत योग्य नाही असा पवित्र घेत व्यापारी बाणा दाखविला आहे.

जंगली महाराज रस्त्यावर महाराष्ट्र नवनिर्माण सेनेचे पुणे शहराध्यक्ष साईनाथ बाबर आणि मनसे नेते बाबू वागस्कर यांच्या नेतृत्वात मोठ्या प्रमाणात मनसे कार्यकर्ते शुक्रवारी सकाळी दाखल झाले. हातात बांबूच्या काठ्या घेऊन त्यांनी लिव्हाईस दुकानाच्या काचेची तोडफोड केली. तसेच सदर दुकानाचा इंग्रजी अक्षरातील बोर्ड देखील फोडला. त्यानंतर इतर दुकानांकडेही मनसे कार्यकर्त्यांनी आपला मोर्चा वळवला.यावेळी मनसे शहराध्यक्ष साईनाथ बाबर म्हणाले, सर्वोच्च न्यायालयाने दुकानदारांना दुकानांवर मराठी पाट्या लावाव्यात याकरिता दोन महिन्यांचा वेळ दिला होता. त्यानंतर याबाबत आम्ही पुणे मनपाला देखील निवेदन देऊन ज्या दुकानदार पाट्या मराठीत पाट्या लावत नाही, त्यांच्यावर कारवाई करावी अशी मागणी केली. मात्र, प्रशासनाने कोणतीही पावले उचलली नाही .त्यामुळे आम्हाला आक्रमक होत सदरची कारवाई करावी लागत आहे .

कायदा राबविणारे राबवीत नाहीत पण त्यासाठी आमच्यावर गुन्हे दाखल करतात–त्यांना घाबरत नाही

आमच्या अनेक पदाधिकाऱ्यांवर कार्यकर्त्यांवर यापूर्वी गुन्हे दाखल असल्याने नवीन कोणत्याही गुन्हे दाखल होण्याची आम्हाला भीती वाटत नाही. महाराष्ट्रात पाटया या मराठीतच असाव्यात असा सुपरिण कोर्टाने निर्णय देऊनही तो राबवीत का नाही असा आमचा आग्रह असून प्रशासनाने कारवाई केली नाही त्यामुळे आम्हाला हे करावे लागते , आगामी काळात आणखी तीव्र आंदोलन करू.यावेळी मनसे नेते बाबू वागस्कर म्हणाले ,पुण्यातील दुकानांवर मराठी भाषेत पाट्या असावेत या दृष्टीने पुणे मनपाला चार दिवसांपूर्वी आम्ही लेखी पत्र दिले होते. त्यानंतर प्रशासनाच्या वतीने कोणतीही पावले उचलण्यात आले नाही. तसेच सर्वोच्च न्यायालयाने मराठीत पाट्या असव्यात असा निर्णय दिल्यानंतर देखील मनसे अध्यक्ष राज ठाकरे यांनी स्थानिक प्रशासनाला पहिले पत्र द्यावे त्यानंतर पुढील आक्रमक आंदोलन करावे असे सुचित केले होते. त्यामुळे ज्या ठिकाणी इंग्रजी भाषेत आम्हाला पाट्या दिसतील त्या ठिकाणी मनसे स्टाईलने आम्ही कारवाई करू. मराठी भाषेत दुकानदारांनी पाट्या लावण्यात कोणत्याही प्रकारचा आक्षेप असण्याचे कारण नाही.

पुणे :पुणे-मुंबई महामार्गावर (Pune-Mumbai Highway)बाणेर येथे अनधिकृतपणे उभारलेल्या फर्निचर मॉल, शो-रुम इत्यादीवर बांधकाम विकास विभागाच्या (Construction Development Department) वतीने जोरदार कारवाई करण्यात आली. या कारवाईत सुमारे 1 लाख चौरस फुट बांधकाम पाडण्यात आले.

मागील काही दिवसांपासून मुंबई – बंगळुरु महामार्गावर मोठ्या प्रमाणात फर्निचरची अवैध दुकाने थाटण्यात आली होती. संबंधित मोठे शोरूम टाकण्यासाठी कुणाचीही परवानगी घेण्यात आली नव्हती. तसेच करही भरण्यात आला नव्हता. मनपाने वारंवार नोटीस बजावूनही ही अनधिकृत बाधकामे काढण्यात येत नव्हती. अखेर मनपाने गुरुवारी सकाळी पोलिस बंदोबस्तात या दुकानांवर जेसीबी चालवून कायदेशीर कारवाई केली.

हे बांधकाम HEMRL (High Energy Materials Research Laboratory) या संरक्षण विभागाच्या प्रतिबंधित क्षेत्रात येत आहे. या फर्निचर मॉल मुळे महामार्गावर वाहतुकीचा ताण येत होता. या बाबत HEMRL कडून तक्रारी करण्यात आल्या होत्या. पुढील आठवड्यात उर्वरित दुकानांवर कारवाई करण्यात येणार आहे.यावेळी कटर मशीन, दोन जेसीबी, गॅस कटर, ब्रेकर, 15 बिगारी व पोलीस कर्मचारी यांनी सहभाग घेतला. हिंजवडी पोलीस स्टेशनचे (Hinjewadi Police Station) वरिष्ठ पोलीस निरीक्षक व इतर कर्मचारी यावेळी उपस्थित होते.महापालिकेने  संबंधित दुकानांना 1 महिन्यापूर्वीच नोटीस देऊन जागा खाली करण्याची सूचना केली होती. पण दुकानदारांनी त्याकडे दुर्लक्ष केले होते. त्यामुळे मनपा प्रशासनाला नाईलाजाने ही कारवाई करावी लागली. ही कारवाई अधीक्षक अभियंता युवराज देशमुख (Superintending Engineer Yuvraj Deshmukh),कार्यकारी अभियंता बिपीन शिंदे (Executive Engineer Bipin Shinde) यांचे मार्गदर्शनाखाली उप अभियंता सुनिल कदम,शाखा अभियंता राहुल रसाळे, समीर गडइ यांनी केली.

पुणे -महापालिकेत गेली पाच वर्षे भाजपची सत्ता होती. तसेच भाजपच्या तत्कालीन नगरसेविका वर्षा तापकीर यांनी त्यांच्या प्रभागात श्रीरामाचे शिल्प उभारण्यासाठी प्रस्ताव मांडून तो स्थायी समितीच्या बैठकीत मान्य करून त्यासाठी दोन कोटी रुपयांचा निधीदेखील उपलब्ध करून दिला होता. असे असताना पुण्यात प्रभू श्रीरामाचे पहिले शिल्प उभारण्यामध्ये शिवसेना शिंदे गटाने बाजी मारली आहे. शिंदे गटाचे शहरप्रमुख नाना भानगिरे यांच्या प्रयत्नातून हांडेवाडी येथील श्रीराम चौकात हे शिल्प उभारले जाणार आहे. येत्या दोन डिसेंबरला या शिल्पाचा पायाभरणी कार्यक्रम होणार आहे

पुणे महापालिकेत भाजपची एकहाती सत्ता होती. पालिकेत भाजपचे शंभरहून अधिक नगरसेवक होते. त्यातील एक नगरसेविका वर्षा तापकीर यांनी धनकवडी-आंबेगाव पठार (प्रभाग क्र ३८) येथील आंबेगाव पठारमधील मोकळ्या जागेत असलेल्या क्रीडांगणामध्ये प्रभू श्रीरामाचे भव्य शिल्प उभारण्याचा प्रस्ताव दिला होता. तापकीर यांचा हा प्रस्ताव स्थायी समितीसमोर मान्यतेसाठी आल्यानंतर काही सभासदांनी त्याला आक्षेप घेत क्रीडांगणामध्ये हे शिल्प उभारू नये, असा विरोधदेखील केला होता. मात्र, पालिकेत भाजपचे संख्याबळ असल्याने स्थायी समितीच्या बैठकीत हा विषय मान्य करून त्यासाठी दोन कोटी रुपयांचा निधीदेखील उपलब्ध करून देण्यात आला होता. स्थायी समितीनंतर हा प्रस्ताव पुढील मान्यतेसाठी पालिकेच्या मुख्य सभेत गेला. मात्र, त्यानंतर पालिकेच्या सभासदांची मुदत संपुष्टात येऊन पालिका आयुक्तांनी प्रशासक म्हणून कारभार सुरू केला. त्यानंतर या प्रस्तावावर प्रशासकांनी काही केले नाही असे वर्षा तापकीर यांनी सांगितले.

शिवसेनेचे तत्कालीन नगरसेवक प्रमोद नाना भानगिरे यांनी २०१८ मध्ये महापालिकेकडे हांडेवाडी भागात प्रभू श्रीरामाचे शिल्प उभारण्याची मान्यता देण्याचा प्रस्ताव दिला होता. या पूर्णाकृती शिल्पाचा संपूर्ण खर्च दशरथ बळीबा भानगिरे ट्रस्ट यांच्याकडून करण्यात येणार होता. हा प्रस्ताव मुख्य सभेने मान्य करून राज्य सरकारकडे मान्यतेसाठी पाठविला होता. नाना भानगिरे यांनी शिंदे मुख्यमंत्री झाल्यावर त्याचा पाठपुरावा सुरु ठेवला आणि आता नगरविकास खाते तसेच पोलिस महासंचालक कार्यालयाने हे शिल्प बसविण्यासाठी मान्यता दिली आहे. त्यामुळे हे शिल्प उभारण्याचा मार्ग मोकळा झाला असल्याचे भानगिरे यांनी सांगितले.पुण्यात उभारण्यात येणारे श्रीरामाचे पूर्णाकृती शिल्प हे देशातील पहिले शिल्प असणार आहे, असा दावा भानगिरे यांनी केला आहे. २ डिसेंबरला याचा पायाभरणी समारंभ होणार असून, प्रमुख पाहुणे म्हणून विधान परिषदेच्या सभापती डॉ. नीलम गोऱ्हे, माजी खासदार, शिवसेना नेते शिवाजीराव आढळराव-पाटील, भरत गोगावले हे उपस्थित राहणार आहेत.

पुणे, दि. ३० नोव्हेंबर २०२३: महावितरणचे कर्मचारी असल्याची बतावणी करीत कमी वीजबिलाचे आमिष दाखवून ग्राहकाची आर्थिक फसवणूक वमहावितरणचे वीजमीटर परस्पर बदलल्याप्रकरणी दोघांविरुद्ध मंचर पोलीस ठाण्यात शुक्रवारी (ता. २४) गुन्हा दाखल करण्यात आला आहे.

याबाबत माहिती अशी की, आंबेगाव तालुक्यातील मंचर शहरातील मार्केट यार्डजवळ ढोबीमळा येथे अंबिका चंदर चव्हाण यांच्यानावे महावितरणने वीजजोडणी दिली आहे. तथापि मीटर रीडिंगच्या पर्यवेक्षणात ग्राहक क्रमांक व महावितरणकडून लावण्यात आलेला मीटर क्रमांक जुळत नसल्याचे संगणकीय प्रणालीत दिसून आले. त्यानंतर मंचर शाखेचे सहायक अभियंता श्री. संजय बारहाते व सहकाऱ्यांनी वीजग्राहक चव्हाण यांच्या घरी जाऊन प्रत्यक्ष तपासणी केली. यामध्ये महावितरणकडून लावण्यात आलेल्या वीजमीटरऐवजी दुसऱ्याच कंपनीचा वीजमीटर लावलेला आढळून आला. यासंदर्भात वीजवापरकर्ते चंदर धरम चव्हाण यांच्याकडे विचारणा करण्यात आली. यात ‘गणेश महादेव इंदोरे (रा. चांडोली, ता. आंबेगाव) व प्रवीण पाचपुते (जारकरवाडी, ता. आंबेगाव) या दोघांनी दोन महिन्यांपूर्वी घरी येऊन महावितरणचे कर्मचारी असल्याचे सांगितले. वीजबिल दरमहा कमी येईल असे आमिष दाखवून वीजमीटर बदलण्यासाठी ७ हजार ५०० रुपये घेतले. त्यानंतर जुना वीजमीटर घेऊन गेले व दुसरा मीटर बसविला’, अशी माहिती श्री. चव्हाण यांनी दिली.

तथापि गणेश इंदोरे व प्रवीण पाचपुते दोघेही तोतया कर्मचारी असल्याचे लगेचच स्पष्ट झाले. या दोघांनी कर्मचारी असल्याची बतावणी करून चव्हाण यांच्याकडील अधिकृत वीजमीटरची विल्हेवाट लावली व त्याठिकाणी दुसरे मीटर बसवले. महावितरणसह वीजग्राहकाची फसवणूक केल्याचे आढळून आले. त्यानुसार मंचर पोलीस ठाण्यात महावितरणकडून तक्रार दाखल करण्यात आली. पोलीसांनी या दोघांविरुद्ध कलम १७०, ४२०, ४२७, १३६ व ३४ नुसार गुन्हा दाखल केला आहे.

तोतया कर्मचाऱ्यांपासून सावधान : मुख्य अभियंता श्री. राजेंद्र पवार – मीटरमधील वीज वापर कमी दाखवणे, मीटरची गती संथ करण्यासाठी मीटरमध्ये फेरफार करणे, परस्पर वीजमीटर बदलणे किंवा वीजबिलाची रक्कम कमी करून देण्याचे आमिष दाखविणे आदींसाठी कोणत्याही व्यक्तीने वीजग्राहकांकडे आर्थिक मागणी केल्यास त्यास कोणताही प्रतिसाद देऊ नये. याबाबत महावितरणच्या संबंधित कार्यालयामध्ये तात्काळ कळवावे किंवा तक्रार करावी असे आवाहन पुणे परिमंडलाचे मुख्य अभियंता श्री. राजेंद्र पवार यांनी केले आहे. 

२८वीं तत्त्वज्ञ संतश्री ज्ञानेश्वर-तुकाराम स्मृती व्याख्यानमालाचा समारोप समारंभ योग गुरु मारूती पाडेकर यांना विशेष जीवन गौरव पुरस्कार

पुणे,दि.३० नोव्हेंबर: ” दूरदुष्टीचा विचार करून वर्ष २०४७ मध्ये भारतीय शिक्षण व्यवस्था कशी असेल. यावर सर्वांनी मंथन करावे. जागतिक स्तरावरील शिक्षण व्यवस्थेत टिकण्यासाठी आमची स्पर्धा परदेशातील विद्यापीठांशी असेल. त्यावेळी शिक्षकांची भूमिका अत्यंत महत्वाचे आहे.”असे मत केंद्र सरकारच्या एचआरडी विभागाचे ऑल इंडिया कौन्सिल फॉर टेक्निकल एज्यूकेशनचे उपाध्यक्ष डॉ. अभय जेरे यांनी व्यक्त केले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत आयोजित करण्यात आलेल्या २८व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेच्या समारोप समारंभ प्रसंगी प्रमुख पाहुणे म्हणून ते बोलत होते.
यावेळी पद्मभूषण डॉ. दीपक धर, अभिजित पानसे, उद्योजक ईश्वरचंद्र परमार, डॉ. राजेंद्र शेंडे व हिंदी सल्लागार समितीचे सदस्य डॉ. योंगेन्द्र मिश्रा हे सन्माननीय अतिथी म्हणून उपस्थित होते. अध्यक्षस्थानी विश्वशांती केंद्र (आळंदी), माईर्स एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड होते.
तसेच एमआयटी एडीटी विद्यापीठाचे कार्याध्यक्ष डॉ. मंगेश तु. कराड व सल्लागार डॉ.संजय उपाध्ये हे उपस्थित होते.
या वेळी योग गुरु मारूती पाडेकर यांचा विशेष जीवन गौरव पुरस्काराने गौरविण्यात आले. सत्काराला उत्तर देतांना म्हणाले. कराड सरांच्या दिव्यदृष्टीने मला डब्ल्यूपीयूत स्थान मिळाले. प्रत्येक व्यक्तीपयर्र्त योग कसा पोहचेल यासाठी कार्य करावयाचे आहे.
डॉ. अभय जेरे म्हणाले,” पंतप्रधान यांनी सांगितल्यानुसार वर्ष २०४७ साली भारताला प्रगत राष्ट्र आणि आर्थिक व्यवस्थेत समृध्द करण्याच्या दृष्टिने कार्य करावे लागणार आहे. आज भारताची अर्थव्यवस्था जवळपास ४ बिलियन डॉलर पर्यंत पोहचली आहे. ती जवळपास १० बिलियन डॉलर पर्यंत पोहचवायची आहे.”
“आज जगात गिग इकॉनॉमी हळू हळू सुरू झाली आहे. यामध्ये कर्मचारी दोन ते तीन ठिकाणी कार्य करू शकतो. आता माइक्रोसॉफ्ट बरोबर यूएसमध्ये ही पद्धत सुरू झाली आहे. तर भारतात ती पद्धत यायला वेळ लागणार नाही. गिग इकॉनॉमी मध्ये प्रोजेक्टवर कार्य करावे लागणार आहेत. तेव्हा स्वतःला मजबूत करावे लागेल. पुढील पिढीला खूप कष्ट करावे लागणार आहेत त्यामुळे त्या दृष्टीने शिक्षण असावे.”
पद्मभूषण डॉ. दीपक धर म्हणाले,” मानवाच्या कल्याणासाठी विज्ञानाची भूमिका अत्यंत महत्वाची आहे. परंतू त्याच बरोबर अध्यात्माची गरज ही आहे. धर्म हे जीवनात वर्तवणुकीसाठी असतात आजच्या विद्यार्थ्यांना विज्ञानाबरोबरच अध्यात्माचे शिक्षण देणे गरजेचे आहे. ”
प्रा.डॉ. विश्वनाथ दा. कराड म्हणाले,” कोणत्याही व्यक्तीने स्वार्थ आणि गर्व करू नये समजा हे दोन्ही एकत्र आले तर विनाश होतो. त्यामुळे संत ज्ञानेश्वर यांची ज्ञानेश्वरी आणि भगवान गौतम बुद्धांचे पंचशील यांचा समन्वय घडेल तेव्हाच मानवजातीचे कल्याण होईल. तसेच पुढील वर्षापासून डब्ल्यूपीयूच्या प्रत्येक वर्गातील प्रथम व द्वितिय येणार्‍या विद्यार्थ्यांना या व्याख्यानमालेत समाविष्ठ करून घेऊ.”
आचार्य डॉ. योगेन्द्र मिश्रा म्हणाले,” जेथे विज्ञान संपते तेथे अध्यात्म सुरू होते. त्यामुळे जीवनात निरंकारी बनून सेवेला प्राथमिकता दयावी. परमात्मा बाहेर नाही तर अंर्तमनात असून त्याचा शोध घ्यावा. पवित्र अंतःकरण असेल तर अंर्तमनात शांती सापडेल. डॉ. विश्वनाथ कराड यांनी केलेल्या अफाट कार्याला पाहता त्यांच्या नावाने रिसर्च सेंटर सुरू करावे.”
ईश्वर परमार म्हणाले,” मानसिक ताण तनाव असेल तर व्यक्तीची प्रगती थांबते. त्यासाठी जीवनात अध्यात्म अत्यंत महत्वाचे असून आपल्या अंर्तःमनात त्याला बसवावे. जीवनाचे लक्ष्य काय आहे हे ठरवून कार्य केल्यास जीवण जगणे अवघड नाही तर अतिशय सोपे आहे. तसेच उत्तम आरोग्यसाठी रोज ८ तास गाढ झोपणे आणि अध्यात्म महत्वाचे आहे.”
राहुल विश्वनाथ कराड यांनी आपल्या संदेशात सांगितले की, ही व्याखानमाला सर्वसमावेशक आहे. जाती, धर्म, पंथ या पलिकडे जाऊन जीवन जगण्याची आदर्श शैली रुजवण्याचे काम यातून होत आहे. डॉ. विश्वनाथ कराड यांच्या प्रेरणेतून सुरू झालेले हे बीज आज वटवृक्षात परिवर्तन होतांना खूप आनंद वाटत आहे.”
त्यानंतर अभिजित पानसे यांनी विचार मांडले.
विद्यापीठाचे कुलगुरू डॉ. आर.एम.चिटणीस यांनी प्रास्ताविक केले.
प्रा.गौतम बापट यांनी सूत्रसंचालन व व्याख्यानमालेचे मुख्य समन्वयक प्र कुलगुरू डॉ.मिलिंद पांडे यांनी आभार मानले.

पुणे : ३७वी पुणे आंतरराष्ट्रीय मॅरेथॉन स्पर्धा रविवार, दि. ३ डिसेंबर रोजी ‘ब्राह्म मुहूर्त रन’ म्हणून संपन्न होणार असून, त्या दिवशी पहाटे ३.३० वाजता पुरुष महिलांच्या मॅरेथॉनचा फ्लॅग ऑफ सणस मैदानाजवळील कल्पना/विश्व चौक येथून समारंभपूर्वक होर्इल. या मॅरेथॉनमध्ये १२ हजारहून अधिक धावपटूंनी सहभाग घेतला असून, केनिया, इथोपिया, टान्झानिया, मलेशिया यांसह विविध देशांतील नामवंत ७० आंतरराष्ट्रीय धावपटू सहभागी होणार आहेत. तसेच बॉम्बे सॅपर्स, एएसआय, सैन्य दल, रेल्वे, पोलीस यांतील नामवंत धावपटू व महिला विभागात राष्ट्रीय विजेती ज्योती गवते, साक्षी भंडारी, भाग्यश्री भंडारी व शीतल भंडारीदेखील सहभागी होणार आहेत. अशी माहिती अॅड. अभय छाजेड (विश्वस्त), रोहन मोरे (जॉइंट रेस डायरेक्टर), सुमंत वार्इकर (रेस डायरेक्टर)यांनी येथे दिली

ते म्हणाले,’‘पर्यावरणसंवधनासाठी पळा’ हे यंदाचे घोषवाक्य आहे. थायसन ग्रुपचे विशेष पथकांसह पर्यावरणसंवर्धन मोहिमेसाठी सहभागी होणार आहे. या स्पर्धेसाठी ‘We create livable planet’ असे घोषवाक्य असून, तंदुरुस्तीसाठी एकत्र येऊन १००हून अधिक अभियंते यामध्ये सहभागी होणार आहेत. पुणे महानगरपालिकेतर्फे या स्पर्धेतील विजेत्या धावपटूंना दरवर्षीप्रमाणे यंदाही ३५ लाख रुपयांची बक्षिसे देण्यात येणार आहेत.रविवार, दि. ३ डिसेंबर रोजी पहाटे ३.३० वाजता ४२.१९५ कि.मी.ची पूर्ण मॅरेथॉन, पहाटे ४.०० वाजता अर्धमॅरेथॉन सकाळी ६.१५ वाजता १० कि.मी., ६.४५ वाजता ५ कि.मी., ७.१५ वाजता व्हीलचेअर व ७.२० वाजता ३ कि.मी.ची ‘फॅमिली रन’ होर्इल. यावेळीदेखील मॅरेथॉन स्पर्धेमध्ये १७ सप्टेंबर रोजी संपन्न झालेल्या ६व्या कारगिल आंतरराष्ट्रीय मॅरेथॉन स्पर्धेचे प्रत्येक गटातील पहिले ३ विजेते सहभागी होणार आहेत.पुणे आंतरराष्ट्रीय मॅरेथॉनमधील यंदाचे नाइट रनचे तिसरे वर्ष आहे. मागील वर्षी रात्री १२.०० वाजता लॅग ऑफ करण्यात आला होता. मात्र, मुख्य मार्ग सिहंगड रस्त्यावरील वाहतूक रात्री १२.०० वाजतादेखील कमी झाली नव्हती. त्यामुळेच यंदा पूर्ण मॅरेथॉनची वेळ पहाटे ३.३० वाजता करण्यात आली आहे. पुरुष व महिलांची पूर्ण स्पर्धा सणस मैदानाजवळील कल्पना/विश्व चौकापासून–सारसबाग–वीर सावरकर पुतळा– सिंहगड रस्ता–नांदेड सिटी– आतील सर्कला वळसा घालून त्याच मार्गे कल्पना/विश्व चौक येथे परत आणि पुन्हा त्याच मार्गाने जाऊन व येऊन ४२.१९५ कि.मी. अंतर पूर्ण केले जाणार आहे.अर्ध मॅरेथॉनमधील स्पर्धक वरील मार्गाप्रमाणे जाऊन-येऊन एकाच फेरीत स्पर्धा पूर्ण करतील. बाकी सर्व स्पर्धा कल्पना/विश्व चौकातून निघून १० कि.मी. संतोष हॉल येथून परत, 5 कि.मी. गणेशमळा चौक येथून परत व ३ कि.मी. व व्हीलचेअर दांडेकर पूलपर्यंत जाऊन परत अशा असणार आहेत. या सर्व मार्गावर संयोजकांतर्फे मोटारसायकल व सायकल पायलट असतील. सर्व गटांतील धावपटूंनी आपली शर्यत सुरू होण्यापूर्वी अर्धा तास प्रारंभ रेषेजवळ येणे आवश्यक आहे.स्पर्धेच्या ४२.१९५ कि.मी.च्या मार्गावर प्रत्येक कि.मी.वर स्पंजिंग, फीडिंग व वैद्यकीय सुविधा प्रत्येक १ कि.मी.डॉक्टररांसह अॅम्ब्युलन्स असणार आहे. या संपूर्ण मार्गावर पुणे महानगरपालिकेतर्फे सर्वत्र पुरेसा प्रकाश असण्याची व्यवस्था करण्यात आलेली आहे. या स्पर्धेच्या मार्गावर ज्या विविध स्पर्धा वळण घेऊन मागे फिरतील, त्या टर्निंग पॉइंटवर पंच, टाइमकीपर्स तांत्रिक अधिकारी आदी असणार आहेत.या स्पर्धेसाठी २००हून अधिक डॉक्टर्स व २५०हून अधिक नर्सेस जबाबदारी सांभाळणार असून, डॉक्टर राजेंद्र जगताप यांच्या नेतृत्वाखाली हे वैद्यकीय पथक काम करणार आहे. नवले हॉस्पिटल, सिम्बायोसिस, बी.व्ही.जी. १०८ अॅम्ब्युलन्स, संचेती हॉस्पिटल आणि भारती हॉस्पिटल यांनी या वैद्यकीय पथकात संयोग दिला आहे. ही स्पर्धा यशस्वी होण्यासाठी एक हजारहून अधिक कार्यकर्ते काम करीत असून, शहर पोलीस व ट्रॅफिक पोलीस यांचेही मोठे सहकार्य लाभले आहे. चंद्रशेखर आगाशे शारिरिक शिक्षण कॉलेज, सरहद संस्था आणि कॉलेज, सायक्लोहोलिक्स, आझम कॅम्पस, पुणे जिल्हा हौशी अॅथलेटिक्स संघटना, अद्वेत क्रीडा सेल, कावेरी कॉलेज व अवामी महाज यांनी यामध्ये सहयोग दिला आहे.या ३७व्या पुणे आंतरराष्ट्रीय मॅरेथॉन स्पर्धेच्या निमित्ताने आदल्या दिवशी शनिवार, दि. २ डिसेंबर रोजी सकाळी११.०० ते सायंकाळी ६.०० या वेळेत मॅरेथॉन भवन येथे क्रीडासाहित्याचे प्रदर्शन आयोजित करण्यात आले असून, क्रीडासाहित्य तयार करणाऱ्या ३८ कंपन्या यात सहभागी झाले आहेत. या दिवशी स्पर्धेत नोंदणी केलेल्या स्पर्धकांना टी–शर्ट, चेस्ट नंबर व गुडी बॅग देण्याची व्यवस्था करण्यात आली आहे.या स्पर्धेचा पारितोषिक वितरण समारंभ ३ डिसेंबर रोजी सकाळी ८.३० वाजता सणस मैदान येथे महाराष्ट्र विधनासभेतील काँग्रेस पक्षाचे विधिमंडळ गटनेते बाळासाहेब थोरात यांच्या हस्ते होणार आहे. याप्रसंगी माजी गॄह राज्यमंत्री रमेश बागवे, पुणे शहर काँग्रेस अध्यक्ष अरविंद शिंदे,खा. वंदना चव्हाण, आ. दीप्ती चवधरी,आ. रवींद्र धंगेकर, व सिम्बायोसिस संस्थेच्या संचालिका विद्या येरवडेकर १७ सप्टेंबर रोजी संपन्न झालेल्या ६व्या कारगिल आंतरराष्ट्रीय मॅरेथॉन स्पर्धेचे संयोजक संजय नहार व डॉ. शैलेश पगारिया आदी प्रमुख पाहुणे म्हणुन उपस्थित रहातील.