पुणे- पुण्यात होणाऱ्या अनधिकृत बांधकामावर जोरदार हथोडा टाकणारी मोहीम महापालिकेने सुरु ठेवली असून वाहतूक समस्या ,प्रदूषण आणि बकालपणा वाढवून करोडोची तुंबडी भरणाऱ्या तथाकथित बिल्डर आणि त्यांना साथ देणाऱ्या ग्राहक वर्गाला पुन्हा एकदा इशारा देणारी कारवाई केली आहे.जुन्या शहरालगतच्या उपनगरात काही राजकीय नेते, कार्यकर्ते नामी बेनामी बिल्डर बनून अशी बेकायदा बांधकामे करत असून माहिती असून नागरिकांनी ती खरेदी करू नयेत ,अन्यथा त्यांना साथ देणारे त्यांच्या एवढेच दोषी ठरतात पण कारवाईत मात्र ग्राहकांचे जास्त नुकसान होते हे लक्षात घेऊनच खरेदी करावी असे आवाहन महापालिकेने पुन्हा एकदा केले आहे.

पुणे महानगरपालिका झोन क्र.२ मधील मौजे आंबेगाव बु. (जुनी हद्द)  स.नं.४३ व स.नं.२५ आणि व आंबेगाव स.नं.१० येथील विनापरवाना अनधिकृत बांधकामावर कारवाई करणेत येऊन एकूण सुमारे ४७६६४ चौ.फुट क्षेत्र मोकळे  करणेत आले..

आंबेगाव बु. (जुनी हद्द) स.नं. ४३ व स.नं. २५ येथे २५ महाराष्ट्र महापालिका कलम ४७८ (१), २६० (अे) (अे) (बी) व कलम  ५३ (१) (अे) अन्वये नोटीस देऊन विनापरवाना अनधिकृत बांधकामावर कारवाई करणेत आली.

सदरच्या कारवाईमध्ये आंबेगाव बु. (जुनी हद्द)  मधील रोहन ओदेल व इतर यांचे ३०० चौ. फुट, एस.एम.पवार व इतर  यांचे ९०० चौ. फुट, उदित सिंग व इतर यांचे ५०० चौ. फुट, तारू राजेंद्र गणपत  यांचे ६८४ चौ., विलास कोकरे व इतर  यांचे १५० चौ. विकास चव्हाणव इतर  यांचे ८० चौ. फुट  आणि आंबेगाव (बु.) स.नं.१० येथील  अथर्व डेव्ह. व इतर यांचे ४३५० चौ. फुट, साई गणेश डेव्ह. व इतर यांचे ४३०० चौ. फुट, श्रावणी डेव्ह. व इतर यांचे ४२०० चौ. फुट, आर एल चोरगे व इतर यांचे ४२५० चौ. फुट, श्री डेव्ह. व इतर यांचे ४२०० चौ. फुट, साईनाथ डेव्ह. व इतर यांचे ४३५० चौ. फुट, समर्थ डेव्ह. व इतर यांचे ४४५० चौ. फुट, गवळी व इतर यांचे ४५०० चौ. फुट, मौर्य डेव्ह. व इतर यांचे ८३०० चौ. फुट, गुरुदत्त डेव्ह. यांचे २१५० चौ. फुट, असे एकूण ४७६६४ चौ. फुट. क्षेत्र मोकळे  करणेत आले.

सदरची कारवाई अतिक्रमण विभागाकडील कर्मचारी, बिगारी सेवक, पोलीस कर्मचारी, जेसीबी,  ब्रेकर, गॅस कटर,जॉ क्रशर,ब्रेकर, इत्यादीच्या सहाय्याने पूर्ण करण्यात आली.

पुणे- देशाच्या स्वातंत्र्य संग्रामात आपल्या प्राणांची आहुती देत तत्पूर्वी समाजाच्या भल्यासाठी शिक्षण,कृषी,राजकारण,समाजकारण,सहकार,आरोग्य,विधी व न्याय आदी क्षेत्रात भरीव योगदान देणारे अन् इंग्रजांना सळो की पळो करून सोडणारे थोर स्वातंत्र्यसूर्य वीर भाई कोतवाल यांना त्यांच्या उज्वल कारकिर्दिसह देशाच्या स्वातत्र्यांच्यासाठी दिलेल्या अतुलनीय अष्टपैलू योगदानाबद्दल केंद्र शासनाने मरणोत्तर भारतरत्न देऊन गौरविण्यात यावे अशी मागणी महाराष्ट्र शासन व केंद्र शासनाकडे बारा बलुतेदार संघ व सकल नाभिक संघाच्यावतीने केली असल्याचे प्रतिपादन बारा बलुतेदार संघांचे प्रदेशाध्यक्ष रामदास सूर्यवंशी यांनी केले.यावेळी त्यांच्या ८० व्या बलिदान दिनानिमित्त राणा प्रताप उद्यानातील भाईंच्या पुतळ्यास माथेरान नगरपरिषदेचे नगरसेवक अवधूत एरफुले व पुणे मनपा कसबा क्षेत्रीय अधिकारी अमोल पवार यांच्या हस्ते पुष्पहार अर्पण करण्यात आला.कार्यक्रमाच्या अध्यक्षस्थानी जेष्ठ साहित्यिक अनिलकुमार मल्लेलवार हे होते.याप्रसंगी भाई कोतवाल यांचे वंशज श्रीकेश कोतवाल,ओंकार एरफुले,त्यांचे भाचे गणेश कु-हाडे,अशोक चटपल्ली,पालिका अधिकारी गांगुर्डे व घारे साहेब ,बारा बलुतेदार सचिव राजेंद्र पंडित,महाराष्ट्र नाभिक महामंडळ प्रसिद्धी प्रमुख दिनकर चौधरी,बारा बलुतेदार पिंपरी चिंचवड अध्यक्ष हेमंत श्रीखंडे,नाभिक महामंडळ शहर उपाध्यक्ष विनायक गायकवाड,उपाध्यक्ष रवींद्र मावडीकर,सिंहगड रोड नाभिक मंडळ अध्यक्ष अमोल थोरात,विनायक रणदिवे,लोहगाव संस्थेचे सतीश पांडे,दत्ता आढाव,शंकर सोनायलू,सुनील पैय्यावल,विनायक साबळे,बाळासाहेब भामरे,आनंद पय्यावल,निलेश चटपल्ली,लिलाताई साठेकर,सौ विजया मल्लेलवार,अशोक सोनायलू,पद्माकर सुरळे,रा.ओबीसी अध्यक्ष हनुमंत यादव,आदी अनेक पालिका कर्मचारी व मान्यवर पदाधिकारी यावेळी उपस्थित होते.
यावेळी गणेश कु-राडे यांची वीर भाई कोतवाल स्मारक समितीच्या पुणे शहराच्या सन 2024-25 च्या वार्षिक अध्यक्षपदी निवड सर्वानुमते रामदास सूर्यवंशी यांनी जाहीर केली.
पुणे स्टेशन येथील शहीद वीर भाई कोतवाल चौकात प्रतिमेस व नामफलकास पुष्पहार प्रदेशाध्यक्ष रामदास सूर्यवंशी व स्मारक समिती अध्यक्ष गणेश कु-राडे यांच्या हस्ते अर्पण करण्यात आला.
कार्यक्रमाचे सुत्रसंचालन विनायक गायकवाड,प्रास्ताविक हेमंत श्रीखंडे तर आभार दिनकर चौधरी यांनी मानले.

पुणे, दि. २ : केंद्र शासनाच्या महात्वाकांक्षी योजनांचे लाभ लक्षित लाभार्थ्यांपर्यंत पोहोचावेत यादृष्टीने मंचर आणि राजगुरूनगर नगरपंचायत कार्यक्षेत्रात ‘विकसित भारत संकल्प’ यात्रेचे आयोजन करण्यात आले. या यात्रेच्या माध्यमातून नगरपरिषद कार्यक्षेत्रात विविध योजनांची माहिती नागरिकांना देण्यात येत असून प्रत्यक्ष लाभही देण्यात येत आहेत.

मंचर आणि राजगुरूनगर शहरात या संकल्प रथाच्या ठिकाणी नागरिकांनी मोठ्या संख्येने उपस्थिती दर्शवून उत्स्फूर्त सहभाग नोंदविला. लोकसहभाग हे या संकल्प यात्रेच्या उद्दिष्टांपैकी एक महत्वाचे उद्दिष्ट आहे. शहरातून या कार्यक्रमात सुमारे ५५० लाभार्थी सहभागी झाले. यावेळी लाभार्थ्यांनी विविध शासकीय योजनांबाबत माहिती घेतली.

प्रधानमंत्री आवास योजना (नागरी), दिव्यांग बांधव कल्याण निधी योजना, आयुष्मान भारत कार्ड, प्रधानमंत्री स्वनिधी योजना, दीनदयाळ अंत्योदय योजना, प्रधानमंत्री जनधन योजना, स्वच्छ भारत अभियान इत्यादी नागरी भागात शासनातर्फे राबविल्या जाणाऱ्या योजनांची माहिती यावेळी नागरिक व लाभार्थी यांना देण्यात आली.

कार्यक्रमस्थळी भेट दिलेल्या अनेक लाभार्थ्यांनी दिव्यांग कल्याण निधी, आयुष्यमान भारत कार्ड व पीएम स्वनिधी या योजनांकरिता प्रत्यक्ष जागेवर नोंदणी केली. ३ जानेवारी रोजी विकसित भारत संकल्प यात्रेअंतर्गत तळेगाव नगरपरिषद क्षेत्रातील मराठा क्रांती चौक आणि नथुभाई भेगडे शाळा मैदान येथे कार्यक्रम होणार आहेत.

नगरपरिषद, नगरपंचायत क्षेत्रातील विकसित भारत संकल्प यात्रेत जास्तीत जास्त नागरिकांनी सहभागी होऊन केंद्र शासनाच्या योजनांचा लाभ घ्यावा, असे आवाहन प्रशासनाने केले आहे.

पुणे-वैद्यकीय शिक्षण विभागाने जुलै 2023 ते नाेव्हेंबर 2023 यादरम्यान तीन शासन निर्णय घेतले असून त्यावर एकाच अवर सचिवांची सही आहे. त्यानुसार राज्यभरातील शासकीय रुग्णालयात स्वच्छता कामाच्या नावाखाली हजाराे काेटी रुपयांचा अधिकृत पध्दतीने भ्रष्टाचार झालेला आहे.केवळ काेल्हापूर मधील राजर्षी छत्रपती शाहू महाराज शासकीय वैद्यकीय महाविद्यालय व छत्रपती प्रमिला राजे सर्वाेपचार रुग्णालयात बाहय स्त्राेता मार्फत स्वच्छता सेवा पुरविण्याचे माध्यमातून 5.82 काेटीच्या स्वच्छता कामात 5.2 काेटीचा भ्रष्टाचार झाल्याचा आराेप येथील आम आदमी पक्षाचे राज्य उपाध्यक्ष विजय कुंभार यांनी पत्रकार परिषदेत केला आहे.

कुंभार म्हणाले, मंत्रालयातील अवर सचिव, सचिव व इतर अधिकाऱ्यांना किमान बेरीज, वजाबाकी येत असेल व चाैरस फूट आणि चाैरस मीटर मधील फरक कळत असेल असे गृहित धरुन सदर तक्रार अाम्ही करत आहे. ते जर कळत नसेल तर त्यांना त्या पदावर रहाण्याचा अधिकार नाही. बाहय तत्वांच्या नादाला लागून ते शासनाचे तिजाेरीवर दराेडा घालत असून त्यांच्यावर आणि त्यांना पाठीशी घालणाऱ्यांवर फाैजदारी गुन्हे दाखल करण्याची आमची मागणी आहे. शासनाचे वैद्यकीय शिक्षण विभागाचे तीन परिपत्रकात स्वचछता विषयक कामाचे बाहय सेवेचे दर हे एक रुपयांपासून तब्बल 72 रुपयांपर्यंत दिले असल्याचे दिसून येत आहे. रत्नागिरी येथील शासकीय वैद्यकीय महाविदयालयात स्वच्छता विषयक सेवा बाहय कामासाठी बांधकामाचा खुला परिसर व स्वच्छतागृह परिसर यासाठी अनुक्रमे 4 रुपये, 2 रुपये व एक रुगया प्रति स्क्वेअर मीटर प्रती महिना असा दर मंजूर करण्यात आला.

आता या निर्णयात गडबडी करण्यात आली असून काेल्हापूरात हाच दर अनुक्रमे 42 रुपये, 2.400 रुपये व 71.200 रुपये प्रती स्क्वेअर मीटर असा करण्यात आलेला आहे. हे दर सुरुवातीचे दराच्या 11 पट ते 71 पट इतके जास्त आहे. शासनाचे निर्णयात दरात इतकी तफावत कशासाठी ठेवण्यात आली, यास अंतिम मान्यता काेणी दिली? यामुळे 5.82 काेटी रुपयांचे कामात 5.2 काेटी रुपयांचा भ्रष्टाचार झालेला आहे.

काेल्हापूर येथील स्वच्छालय परिसर हा 28137 आणि 1038.980 असा 29 हजार 175 स्क्वेअर मीटर म्हणजे सात एकर इतका दाखवलेला आहे. एका जागेवर इतके माेठे स्वच्छालय हाेत असेल तर ताे जागतिक विक्रम ठरेल. स्वच्छतेचा दर जरी स्क्वेअर मीटर मध्ये लिहिलेला असला तरी प्रत्यक्षात गुणाकार करताना मात्र, स्क्वेअर फुटावर करण्यात आल्याने मान्य रकमेच्या दहापट जास्त खर्चाला प्रशासकीय मंजूरी दिली गेली आहे. संपूर्ण राज्यात हाच प्रकार सुरु असून माेठया प्रमाणात उघडपणे भ्रष्टाचार हाेऊ लागल्याचे यातून दिसून येते.

पुणे दि.२: प्रधानमंत्री जनमन योजनेअंतर्गत विविध लाभांसाठी लाभार्थ्यांची आधार नोंदणी आवश्यक असून त्यासाठी विशेष शिबिरांचे आयोजन करण्यात यावे. या शिबिरांमध्ये आयुष्मान कार्ड नोंदणी, जनधन बँक खाते उघडणे यासाठीही नियोजन करावे, असे निर्देश जिल्हा परिषदेचे मुख्य कार्यकारी अधिकारी रमेश चव्हाण यांनी दिले.

जिल्हाधिकारी कार्यालयात दूरदृष्यप्रणालीद्वारे आयोजित बैठकीत ते बोलत होते. बैठकीस निवासी उपजिल्हाधिकारी ज्योती कदम, जिल्हा ग्रामीण विकास यंत्रणेच्या प्रकल्प संचालक शालिनी कडू, उपजिल्हाधिकारी रोहिणी आखाडे, जिल्हा पुरवठा अधिकारी सीमा होळकर, घोडेगाव येथील एकात्मिक आदिवासी विकास प्रकल्पाचे प्रकल्प अधिकारी बळवंत गायकवाड आदी उपस्थित होते.

श्री.चव्हाण म्हणाले, स्वत:ची जागा नसलेल्या लाभार्थ्यांना घरकुलाचा लाभ देण्यासाठी शासकीय जागेबाबतचा प्रस्ताव प्रशासनाकडे त्वरीत पाठवावा. वीज नसलेल्या वस्त्यांवर वीज देण्याबाबत आठवड्यात नियोजन सादर करावे. उपविभागीय अधिकाऱ्यांनी तालुकास्तरीय बैठकीत योजनेअंतर्गत ११ बाबींचा आढावा घ्यावा.

महिला बचत गटातील सदस्य आणि युवकांना कौशल्याचे प्रशिक्षण देण्याबाबत तयारी करावी. वैद्यकीय उपकेंद्र नसलेल्या गावातील आदिवासी बांधवांच्या वस्त्यांवर फिरत्या वैद्यकीय पथकामार्फत आरोग्य सेवा उपलब्ध करून देण्यात याव्यात, असे निर्देशही त्यांनी दिले.

यावेळी श्रीमती आखाडे आणि श्रीमती कडू यांनीदेखील योजनेच्या अंमलबजावणीबाबत मार्गदर्शन केले.

आंबेगाव तालुक्यात २६, भोर ३०, मावळ ९१, मुळशी २७, जुन्नर ८, खेड ३४ आणि वेल्हे तालुक्यात ११ गावे अशा एकूण २२६ गावात ही योजना राबविण्यात येणार आहे, अशी माहिती यावेळी देण्यात आली.

बैठकीला खेड, जुन्नर, आंबेगाव आणि भोरचे उपविभागीय अधिकारी, जिल्हा अग्रणी बँक व्यवस्थापक श्रीकांत कारेगावकर, संबंधित तालुक्याचे तहसिलदार, गटविकास अधिकारी दूरदृष्य प्रणालीद्वारे उपस्थित होते.

लोणी येथील पेट्रोल, डिझेल वाहतूक धारकांचा संप स्थगित. तीन जानेवारीला दिल्लीत होणाऱ्या बैठकीत या विषयी निर्णय घेणार असल्याचेही ट्रान्सपोर्ट फेडरेशनचे राष्ट्रीय अध्यक्ष बाबा कांबळे यांनी सांगितले.

सरकारने आंदोलन दडपण्याचा प्रयत्न करू नये विविध ठिकाणी झालेल्या लाठी चार्ज चा जाहीर निषेध

पुणे (दि. २ जानेवारी २०२४) ‘हिट अँड रन २०२३” या नवीन कायद्यानुसार अपघात प्रसंगी पळून जाणाऱ्या चालकाला दहा वर्षे शिक्षा व लाखो रुपये दंड आकारण्याचा निर्णय केंद्र सरकारने घेतला आहे. या निर्णया विरोधात ट्रक, टेम्पो, बस व सर्व प्रकारच्या
चालकांमध्ये तीव्र रोष निर्माण झाला आहे.
या मुळे देशातील सुमारे २५ कोटी चालकांचे भवितव्य धोक्यात आले आहे. हा काळा कायदा रद्द करावा आणि चालकांच्या इतर प्रलंबित मागण्या मान्य कराव्या यासाठी बुधवारी ३ जानेवारी पासून दिल्ली मध्ये जंतर मंतर येथे धरणे आंदोलन करण्यात येणार आहे. या आंदोलनात देशभरातील ७५० पेक्षा जास्त संघटनाचे प्रतिनिधी सहभागी होणार आहेत. पुणे, पिंपरी चिंचवड शहर आणि पुणे जिल्ह्यातून हजारो चालक दिल्लीमध्ये आंदोलनात सहभागी होणार आहेत अशी माहिती
ऑटो, टॅक्सी, ट्रक, बस, चालक मालक फेडरेशनचे राष्ट्रीय अध्यक्ष बाबा कांबळे यांनी पत्रकार परिषदेत दिली.
मंगळवारी पुण्यात आयोजित केलेल्या पत्रकार परिषदेत ऑटो, टॅक्सी, बस ट्रान्सपोर्ट फेडरेशनचे राष्ट्रीय संघटक आनंद तांबे, महाराष्ट्र राज्याचे जनरल सेक्रेटरी एकनाथ ढोले पाटील, सचिन तांबे, महाराष्ट्र रिक्षा पंचायतच पुणे शहराध्यक्ष मोहम्मद शेख,…… आदी उपस्थित होते.

मंगळवारी पुणे आणि पिंपरीतील भारतरत्न डॉ. बाबासाहेब आंबेडकर पुतळ्यास बाबा कांबळे यांच्या हस्ते सायंकाळी ५ वाजता पुष्पहार अर्पण करून प्रतिनिधी दिल्लीकडे रवाना होणार आहेत.
जे चालक दिल्लीमध्ये येऊ शकणार नाहीत त्यांनी महाराष्ट्रातील प्रत्येक जिल्हाधिकारी कार्यालयासमोर आणि राज्यातील प्रादेशिक व उपप्रादेशिक परिवहन (आरटीओ) कार्यालयासमोर बुधवारी सकाळी दहा वाजता आंदोलन करून जिल्हाधिकाऱ्यांना आपल्या मागणीचे निवेदन द्यावे असे आवाहन बाबा कांबळे यांनी केले आहे.
देशभरात एकूण 22 ते 25 कोटी चालक विविध क्षेत्रात कार्यरत आहेत. यामध्ये मालवाहतूक, प्रवासी वाहतूक तसेच ऑटो रिक्षा चालकांचा समावेश आहे. या चालकांच्या अनेक वर्षांपासून विविध मागण्या आहेत. त्याकडे केंद्र सरकारने दुर्लक्ष केले असून या मागण्या मान्य करण्यासाठी आता देशभरातील चालकांच्या ७५० संघटना एकत्रितपणे जंतर-मंतर येथे आंदोलन करत आहेत.

अनेक ठिकाणी चालकांनी काम बंद आंदोलन पुकारून सेवा स्थगित केली आहे. परंतु हे आंदोलन करत असताना कोणत्याही शासकीय, सार्वजनिक अथवा खाजगी मालमत्तेचे नुकसान होऊ देऊ नये. शांततेच्या मार्गाने आंदोलन करत आपल्या मागणीचे निवेदन द्यावे असे आवाहन बाबा कांबळे यांनी केले आहे.

संघटनेच्या मागण्या १) अपघात झाल्यास चालकाला दहा वर्षांची शिक्षा आणि दहा लाख रुपये दंड असलेला काळा कायदा सरकारने तात्काळ मागे घ्यावा.
२) देशातील सर्व चालक आणि मालकांसाठी राष्ट्रीय कल्याण मंडळाची स्थापना करावी. त्याद्वारे सामाजिक सुरक्षा, आरोग्य सुविधा, मुलांना शिक्षणाच्या सुविधा आणि वृद्धापकाळात पेन्शन सुविधा उपलब्ध करून द्याव्यात.
३) राष्ट्रीय चालक आयोग स्थापन करावा.
४) सरकारने देशभरात चालक दिन साजरा करावा.
५) दिल्लीत चालकांसाठी राष्ट्रीय स्मारक बांधावे.
देशभरामध्ये ऑटो, टॅक्सी, ट्रक, बस, टेम्पो सह सर्व प्रकारचे २५ कोटी चालक, मालक आहेत. या घटकांना कोणती सामाजिक सुरक्षा नाही. त्यांना सामाजिक सुरक्षा मिळावी. यासाठी केंद्र सरकारने वेलफेअर बोर्ड आणि राष्ट्रीय चालक आयोग स्थापन करावा.

–