पुणे-आयोध्येमधील श्री राम मंदिराच्या प्राणप्रतिष्ठापना दिनानिमित्त २२ जानेवारी २०२४ रोजी राष्ट्रीय सन घोषित करून दरवर्षी सार्वजनिक सुट्टी जाहीर करण्याची विनंती करणारे पत्र पुण्यातून भाजपचे नेते श्रीनाथ भिमाले यांनी पंतप्रधान नरेंद्र मोदींना पाठविले आहे.

या पत्रात भिमाले यांनी असे म्हटले आहे कि,’आपल्या भारत देशातील सर्व नागरिकांकरिता एक आनंदाची बातमी म्हणजेच आयोध्येमध्ये प्रदीर्घ कालावधीनंतर भगवान श्री राम विराजमान होणार आहेत. याकरिता प्रत्येक भारतीय अगदी मनापासून आतुर झालेला आहे. आपण सर्वजण अयोध्येच्या श्रीराम मंदिराच्या उद्घाटनाच्या शुभ प्रसंगाजवळ येत आहोत. २२ जानेवारी २०२४ रोजी सुमारे ५०० वर्षांच्या प्रदीर्घ कालावधीनंतर संपूर्ण भारत देशात आनंद उत्सवाचे वातावरण निर्माण होणार आहे. जसे काही दिवाळी सारखाच प्रत्येक भारतीय हा सन साजरा करणार आहे. मी तुम्हाला विनंती करू इच्छितो कि २२ जानेवारी २०२४ रोजी राष्ट्रीय सन घोषित करून दरवर्षी सार्वजनिक सुट्टी जाहीर करण्याचा विचार करावा, सार्वजनिक सुट्टी घोषित केल्याने नागरिकांमध्ये नक्कीच आनंदाचे वातावरण निर्माण होऊन सर्व नागरिक श्री राम मंदिराच्या प्राणप्रतिष्ठापना दिनानिमित्त साजरे केल्या जाणाऱ्या ऐतिहासिक उत्सवात सहभागी होण्याची संधी त्यांना मिळणार आहे.
मला संपूर्ण विश्वास आहे की, आपण या विनंतीचा व आपल्या देशभरातील नागरिकांच्या भावनांचा विचार करून आयोध्येमधील श्री राम मंदिराच्या प्राणप्रतिष्ठापना दिनानिमित्त २२ जानेवारी २०२४ रोजी राष्ट्रीय सन घोषित करून दरवर्षी सार्वजनिक सुट्टी जाहीर करावी ही नम्र विनंती आहे. असे भिमाले यांनी मोदींना पाठविलेल्या पत्रात म्हटले आहे.

लायन्स क्लब आॅफ पुणे पर्ल यांच्या सहयोगाने उपक्रम ; शालेय व महाविद्यालयीन विद्यार्थ्यांचा सहभाग
पुणे : सापुतारा पर्वतरांगांमधील आदिवासी बांधवांचा कडाक्याच्या थंडीपासून बचाव व्हावा, याउद््देशाने न-हे येथील जाधवर ग्रुप आॅफ इन्स्टिटयूटच्या विद्यार्थ्यांनी जमा केलेल्या १० हजार कपडयांची मदत आदिवासी बांधवांना पाठविण्यात आली. लायन्स क्लब आॅफ पुणे पर्ल च्या सहयोगाने या उपक्रमाचे आयोजन करण्यात आले होते. 
जाधवर इन्स्टिटयूटच्या सभागृहात झालेल्या कार्यक्रमाला लायन्स चे माजी प्रांतपाल दीपक शहा, लायन रमेश शहा, लायन्स क्लब आॅफ पुणे पर्लचे अध्यक्ष युवराज लांबोळ, प्रविण खुळे, जाधवर इन्स्टिटयूटचे अध्यक्ष प्राचार्य डॉ.सुधाकर जाधवर, उपाध्यक्ष अ‍ॅड.शार्दुल जाधवर, खजिनदार सुरेखा जाधवर आदी उपस्थित होते. मान्यवरांच्या हस्ते कपडयांनी भरलेल्या टेम्पोला हिरवा झेंडा दाखविण्यात आला. धुळे येथील गरजूंना देखील हे कपडे देण्यात येणार आहेत. 
दीपक शहा म्हणाले, इच्छाशक्तीची प्रेरणा ही प्रत्येकाला सामाजिक कार्याकरिता उद्युक्त करीत असते. आपण नकारात्मकतेकडे न पाहता, चांगल्या गोष्टींकडे पाहून त्याचा अवलंंब करुन यशस्वी होऊ शकतो. यामाध्यमातून अनेक चांगल्या व्यक्तींचे हात एकत्र येऊन समाजकार्याचा डोंगर उभा राहू शकतो. 
रमेश शहा म्हणाले, नैसर्गिक आपत्ती किंवा गरजूंना मदतीचा हात देताना केवळ सरकारच्या मदतीची अपेक्षा न करता आपण काय करु शकतो, हा विचार लायन्स क्लब करीत असतो. यामाध्यमातून समाजाच्या प्रत्येक घटकातील गरजूंना विविध प्रकारे मदत करण्याचा प्रयत्न क्लबने केला आहे. 
अ‍ॅड. शार्दुल जाधवर म्हणाले, समाजातील गरजू घटकांना विविध योजनांच्या माध्यमातून मदत देण्याकरिता शासनाच्या सर्व यंत्रणा कार्यान्वित असतात. मात्र, सामाजिक संस्थांसह सामान्य नागरिक म्हणून आपलीही जबाबदारी आहे. शालेय विद्यार्थ्यांच्या मनात सामाजिक जाणिव निर्माण करण्याचा प्रयत्न यानिमित्ताने करण्यात आला. विद्यार्थ्यांनी चांगले कपडे गोळा करुन गरजूंपर्यंत पोहोचविण्याच्या उपक्रमात मोठा वाटा उचलला आहे.

भारतीय छात्र संसदेचे दुसरे सत्र संपन्न
 पुणे, दि. ११ जानेवारी – नवे युग नवे विचार, नवी क्रांती आणि नवे तंत्रस्नेही वातावरण घेऊन अवतरत आहे. या पार्श्वभूमीवर, इतिहासाचे नेमके आकलन करून घेऊन, भविष्याचा वेध घेत नव्या युगाची धुरा तरुणाईने खांद्यावर घ्यावी, असे प्रतिपादन इतिहासतज्ञ आणि प्रसिद्ध वक्ते विक्रम संपत यांनी गुरुवारी येथे केले.
एमआयटी स्कूल आफ गव्हर्नमेंट, भारतीय छात्र संसद फाऊंडेशन आणि एमआयटी वर्ल्ड पीस यूनिव्हर्सिटी यांच्या संयुक्त विद्यमाने आयोजित १३ व्या भारतीय छात्र संसदेच्या दुसर्‍या सत्रात विद्यार्थ्यांच्या प्रचंड प्रतिसादाने रंगले. या सत्राला एमआयटी वर्ल्ड पीस युनिव्हर्सिटीचे संस्थापक अध्यक्ष डॉ. विश्वनाथ कराड, कार्याध्यक्ष राहुल कराड यांची प्रमुख उपस्थिती होती. ’युगांतर – यूथ इन ट्रान्झिशन’, या शीर्षकांतर्गत ते बोलत होते. या सत्रात आध्यात्मिक गुरू, लेखक स्वामी मुकुंदानंद, कर्नाटक विधान सभेचे सभापती बसवराज होराट्टी, प्रसिद्ध वक्ते सुरेश गरीमेला हे उपस्थित होते.
विक्रम संपत म्हणाले, ’देशाचे भवितव्य तेथील युवा पिढीमध्येच पाहिले जाते. प्रत्येक नव्या युगात प्रवेश करताना, आपण आपल्या इतिहासात डोकावणे आवश्यक असते. आपण कुठून आलो, आपल्या पूर्वजांनी ज्ञानाच्या विविध क्षेत्रात काय कामगिरी केली, संस्कृतीची कोणती उच्चतम अवस्था आपण प्राप्त केली होती, हे युवा पिढीने समजून घेतले पाहिजे. तसेच नजिकचा दीडशे वर्षांचा इतिहासही समजून घेतला पाहिजे. आपल्या स्वातंत्र्यासाठी पूर्वजांनी, क्रांतिकारकांनी, लोकनेत्यांनी कोणते संघर्ष केले. किती अत्याचार सहन केले, याची कृतज्ञ जाणीव आपण ठेवली पाहिजे, तरच उज्ज्वल भविष्याकडे आपण यशस्वी वाटचाल करू शकू’,.
स्वामी मुकुंदानंद म्हणाले, ’जगभरातील सर्वाधिक युवा लोकसंख्येचा देश अशी आपली ओळख आहे. युवा हे परिवर्तनाचे अग्रदूत असतात. ते भावी नेते असतात. त्यामुळे युगांतरात त्यांची भूमिका सर्वात महत्त्वाची ठरते. नव्या युगाकडे जाताना आपली मुळे आपण पुन्हा तपासली पाहिजेत, नव्या दृष्टीने आपल्या इतिहासाकडे पाहिले पाहिजे, त्यातून प्रेरणादायी दृष्टी मिळेल आणि विकासाला अंतर्दृष्टी मिळेल’.
सुरेश गरिमेला यांनी तरुणाईसाठी सहा मुद्दे मांडले. गुंतागुंतीची आव्हाने असताना तुमच्यामधील सर्वोत्कृष्ट ते देशासाठी द्या, प्रभावी संवाद शिकून घ्या, विरोधी मतांचा आदर करा, परिश्रमांना पर्याय नाही, हे लक्षात ठेवा, इतर कुणी आपल्यासाठी काहीतरी करत राहील, या गैरसमजातून बाहेर या, सकारात्मक दृष्टीकोन ठेवा आणि योग्य कृती तात्काळ करा, मग नवे युग तुमचेच असेल.
बसवराज होराट्टी यांनी युवा शक्ती हीच देशाचे सामर्थ्य असते आणि नव्या युगात सारे विश्व नागरीक असतील, याचे भान ठेवण्याचे आवाहन केले. ’नव्या युगात प्रवेश करताना, हे स्थित्यंतर स्वीकारणे आव्हानात्मक, गुंतागुंतीचे असते, त्यामुळे तरुणाईने आपली जबाबदारी ओळखून देशासाठी योगदान देण्याचा निश्चय करावा’, असे आवाहन केले.
यावेळी आदर्श आमदार सन्मान राष्ट्रीय जनता दलाचे बिहार येथील चेतन आनंद यांना राहुल कराड यांच्या हस्ते प्रदान करण्यात आला. सायली घाटे, सूरज शर्मा, ट्यूलिप शर्मा, नंदिता जामवाल आणि अनुराग गुप्ता या विद्यार्थी प्रतिनिधींनी मनोगत मांडले. डॉ. गौतम बापट यांनी सूत्रसंचालन केले.

पीवायसी एचटीबीए अमनोरा कप जिल्हा मानांकन बॅडमिंटन स्पर्धा
पुणे : यशराज कदम, आद्य पारसनीस, सार्थक पाटणकर, परीधी बुधवार यांनी पीवायसी एचटीबीए अमनोरा कप जिल्हा मानांकन बॅडमिंटन स्पर्धेत १९ वर्षांखालील मुलांच्या गटात आपापल्या प्रतिस्पर्ध्यावर मात करून उपांत्यपूर्व फेरीत प्रवेश केला.

पीवायसी हिंदू जिमखाना येथील बॅडमिंटन कोर्टवर ही स्पर्धा सुरू आहे. या स्पर्धेतील १९ वर्षांखालील मुलांच्या चौथ्या फेरीत यशराज कदमने कृष्णा जसूजावर १९-२१, २१-९, २१-१५ असा, आद्य पारसनीसने सुदीप खोराटेवर २१-१५, २१-१८ अशी मात केली. वत्सल्य गर्गने ग्रंथ वालेचावर २१-१०, २१-१७ अशी मात केली. यानंतर सार्थक पाटणकरने तनिष दरपेवर २१-११, २१-९ अशी मात करून उपांत्यपूर्व फेरीत प्रवेश केला.

१९ वर्षांखालील मुलींच्या एकेरीच्या उप-उपांत्यपूर्व फेरीत श्रीया उत्पटने इरा आपटेवर २१-८, २१-७ असा, सानिका पाटणकरने प्राची शितोळेवर २१-१४, २१-७ असा, त जिज्ञासा चौधरीने नाव्या रांकावर २२-२०, २१-१९ असा विजय मिळवला. सफा शेखने दिव्यांश वहाळवर २१-८, २१-१२ अशी सहज मात केली. परीधी बुधवारने सायुरी थोकलवर २१-११, २१-१७ अशी मात करून आगेकूच केली.

निकाल – उपउपांत्यपूर्व फेरी – १५ वर्षांखालील मुले – कपिल जगदाळे वि. वि. सौरिष काने २१-६, २१-७, राघवेंद्र यादव वि. वि. आरुष अरोरा २१-११, २१-११, तनिष्क आडे वि. वि. स्वरीत सातपुते २१-१९, १९-२१, २५-२३, अभिक शर्मा वि. वि. चिन्मय फणसे २१-१६, २१-१७, एस. सोमजी वि. वि. पार्थ सहस्त्रबुद्धे २१-१५, २१-१३, अभिज्ञान सिंघा वि. वि. सयाजी शेलार २१-१३, २१-१०, विराज सराफ वि. वि. अक्षर झोपे १८-२१, २१-१५, २१-१६, अरहम रेदासानी वि. वि. ध्रुव बर्वे २१-१०, २१-१५.

१५ वर्षांखालील मुली – शर्वरी सुरवसे वि. वि. शिवानी मासळेकर २१-१२, २१-१५, ख्याती कत्रे वि. वि. शिप्रा कदम २१-८, २१-७, मनीषा थिरुकोंडा वि. वि. कायरा निजाहवान २१-५, २१-५, शरयू रांजणे वि. वि. स्वराली थोरवे २१-२, २१-४, स्नेहा भिसे वि. वि. आर्या कुलकर्णी २०-२२, २१-१७, २१-८, अनन्या बोंद्रे वि. वि. मौसम पाटील २२-२०, २१-१८, सोयरा शेलार वि. वि. पद्मश्री पिल्लई २१-९, २१-१३, सान्वी पाटील वि. वि. पर्णवी मोहळकर २१-११, २१-१९,

१७ वर्षांखालील मुले – सुदीप खोराटे वि. वि. श्लोक डागा २१-१६, २१-१४, कविन पटेल वि. वि. रघुवेंद्र यादव २१-६, १५-२१, २१-१६, विहान मुर्ती वि. वि. ओम दरेकर २१-१५, २१-१४, देवांश सकपाळ वि. वि. आधिश ए. २१-११, १९-२१, २१-१४, अवधूत कदम वि. वि. वरद लांडगे २१-१३, २१-१६, अर्जुन देशपांडे वि. वि. नील शोरन २१-८, २१-१६, सार्थक पाटणकर वि. वि. कपिल जगदाळे २१-१३, २१-१४, ओजस जोशी वि. वि. अभिक शर्मा २१-१३, २३-२१, २१-१६

१७ वर्षांखालील मुली – भक्ती पाटील वि. वि. एस. ढाखणे २१-१४, २१-१६, यशस्वी काळे वि. वि. आयुषी मुंडे २१-११, २१-१०, स्नेहा भिसे वि. वि. हृदया साळवी २१-१७, २१-१५, नाव्या रांका वि. वि. आयुषी काळे २१-१३, २१-१३,

पुणे-क्रीडा भारती व शाहू लक्ष्मी कला क्रीडा अकादमी यांच्या संयुक्त विद्यमाने आयोजित केलेल्या जिल्हास्तरीय मल्लखांब स्पर्धेतील मुलांच्या गटात तन्मय मुजुमले याने तर मुलींच्या गटात शमिका उभे हिने सर्वसाधारण विजेतेपद पटकावले.‌

ही स्पर्धा पुणे जिल्हा मल्लखांब संघटनेच्या मान्यतेने शाहू लक्ष्मी कला क्रीडा अकादमीच्या पटवर्धन बाग येथील मैदानावर (श्यामाप्रसाद मुखर्जी उद्यानासमोर) आयोजित केली होती. दोरीवरील मल्लखांब व पुरलेला मल्लखांब या दोन्ही प्रकारातील एकत्रित कामगिरीच्या आधारे विजेतेपद देण्यात आले.‌
या स्पर्धेचा बक्षीस समारंभ प्रसिद्ध बांधकाम व्यावसायिक केळकर हाऊसिंग कंपनीचे संचालक अनिरुद्ध केळकर यांच्या हस्ते झाला.कार्यक्रमास क्रीडा भारती पुणे महानगर अध्यक्ष शैलेश आपटे, अर्जुन पुरस्कार विजेत्या कबड्डीपटू शकुंतला खटावकर, क्रीडा भारतीचे पुणे महानगर मंत्री विजय रजपूत, पुणे जिल्हा मल्लखांब संघटनेचे अध्यक्ष सत्यजित शिंदे, शाहू लक्ष्मी कला क्रीडा अकादमीच्या संचालिका अनुराधा येडके व राज तांबोळी, मल्लखांब प्रशिक्षक जितेंद्र खरे आणि रवींद्र पेठे उपस्थित होते.
कार्यक्रमाचे सूत्रसंचालन दीपक मेहेंदळे यांनी केले.स्पर्धेमध्ये २७४ खेळाडूंनी भाग घेतला होता.

स्पर्धेतील गटवार निकाल असे-
मुले- १. तन्मय मुजुमले १५.९५ गुण (शाहू लक्ष्मी कला क्रीडा अकादमी), २. आर्यन पाळंदे १५.७ गुण (नवजीवन स्पोर्ट्स),३. ओम लखाशे १५.५५ गुण ४. अथर्व मोरे १५.४५ गुण (दोन्ही महाराष्ट्रीय मंडळ),५. रेवणसिद्ध कोरे १५.२५ गुण,६. सर्वेश देशपांडे १५.१० गुण (दोन्ही इंद्रायणी स्पोर्ट्स अकादमी)
मुली १.शमिका उभे १५.६५ गुण(मल्लखांब स्पोर्ट्स अकादमी),२. तनया साळवी १५ गुण (पुणे स्पोर्ट्स अकादमी),३.अवनी हुले १४.६ गुण (मल्लखांब स्पोर्ट्स अकादमी) ४.अन्वी म्हसवडे १४.५०गुण (वेदांत अकादमी),५. अर्णवी नाईक १४.०५ गुण (इंद्रायणी स्पोर्ट्स अकादमी),६.मधुरा दीक्षित १३.६५ गुण (मल्लखांब स्पोर्ट्स अकादमी)

पुणे दि.११: प्रादेशिक परिवहन कार्यालयाच्या वायुवेग पथकाने थकीत कर वसुलीसाठी तसेच मोटार वाहन कायद्यातील अन्य गुन्ह्यांतर्गत कार्यालयाच्या आवारात अटकवून ठेवलेली वाहने मोटार वाहन कर व दंड भरून पुढील ७ दिवसांत सोडवून नेण्याचे आवाहन प्रादेशिक परिवहन कार्यालय, पिंपरी चिंचवड यांनी केले आहे.

प्रादेशिक परिवहन कार्यालयाच्या आवारातील अशी वाहने मालक, चालक यांच्या जबाबदारीवर अटकावून ठेवलेली आहेत. ही वाहने सोडवून नेण्यासाठी वाहन मालकांनी परिवहन कार्यालयात वाहन कर, दंड भरलेला नाही अथवा वाहने नेण्यासाठी संपर्क केलेला नाही.

प्रादेशिक परिवहन कार्यालयाने मोटार वाहन थकीत कराच्या वसुलीसाठी अटकावून ठेवलेल्या वाहनांच्या जाहीर लिलावाची प्रक्रियादेखील सुरु केलेली आहे. त्यापैकी ४ वाहनांच्या मालकांना कार्यालयाने पाठविलेल्या नोटीस वाहन मालक नोंदणीकृत पत्त्यावर आढळून न आल्याने त्यांना पोच झालेल्या नाहीत. अशा वाहनांची यादी परिवहन कार्यालयाच्या सूचना फलकावर प्रदर्शित केलेली आहे.

मोटार वाहन कायद्यातील तरतुदीनुसार वाहन मालकांनी नोंदणी प्रमाणपत्रावर पत्ता बदलाची नोंद पत्ता बदल झाल्यास ७ दिवसात करावयाची आहे. परंतु, वाहन मालकांनी पत्ता बदल न केल्याने वाहन मालकाचे अद्ययावत पत्त्यावर पत्रव्यवहार करणे शक्य होत नाही व वाहन मालकासोबत संपर्क होऊ शकत नाही.

वाहन मालकांनी आपली वाहने मोटार वाहन कर व दंड भरून पुढील ७ दिवसांत सोडवुन न्यावीत, अन्यथा अशी वाहने बेवारस वाहने आहेत समजून सक्षम प्राधिकाऱ्यांच्या परवानगीने या वाहनांचा जाहीर ई लिलाव करण्यात येईल, असेही प्रादेशिक परिवहन अधिकारी, पिंपरी चिंचवड यांनी कळविले आहे.

पुणे दि.११-आदिवासी समाजाच्या सर्वांगीण विकासासाठी पेसा कायदा अतिशय महत्वाचा असून आगामी काळात या कायद्याच्या प्रभावी अंमलबजावणीसाठी सर्वांनी प्रयत्नशील राहण्याचे आवाहन केंद्रीय पंचायती राज मंत्रालयाचे सचिव विवेक भारद्वाज यांनी केले .

यशवंतराव चव्हाण विकास प्रशासन प्रबोधिनी येथे केंद्रीय पंचायती राज मंत्रालयातर्फे पंचायत (अनुसूचित क्षेत्र विस्तार ) अधिनियम १९९६ अर्थात ‘पेसा’ कायद्यावरील दोन दिवसांच्या पहिल्या प्रादेशिक परिषदेच्या उद्घाटन प्रसंगी ते बोलत होते. उद्घाटन सत्राला केंद्रीय पंचायती राज मंत्रालयाचे अतिरिक्त सचिव डॉ. चंद्रशेखर कुमार, सहसचिव ममता वर्मा , राज्याच्या ग्रामविकास आणि पंचायती राज विभागाचे प्रधान सचिव एकनाथ डवले, यशदाचे अतिरिक्त महासंचालक सचिंद्र प्रताप सिंह, उपमहासंचालक मल्लिनाथ कलशेट्टी, केंद्रीय पंचायती राज मंत्रालयाचे उपसचिव विजयकुमार आदी उपस्थित होते .

श्री.भारद्वाज म्हणाले, आदिवासींच्या जमिनीवर, घरांवर इतरांनी कब्जा केल्याची अनेक उदाहरणे पहायला मिळतात. हे प्रकार रोखण्यासाठी अनेक कायदे असून त्याची अधिक प्रभावीपणे अंमलबजावणी होणे गरजेचे आहे. ब्रिटिशांविरुद्ध लढा देणाऱ्या आदिवासी समाजाच्या कल्याणासाठी पेसा कायदा करण्यात आला. आदिवासींच्या मालकीची जमीन, जंगल आणि वनसंपदा त्यांनाच मिळावी यासाठी या कायद्याचा वापर सुरू झाला आहे . पंतप्रधान नरेंद्र मोदी यांची ‘जन मन योजना’ हा त्याचाच एक भाग असून पेसाच्या प्रभावी अंमलबजावणीच्या माध्यमातून आदिवासी समाजाला अधिक सक्षम बनवण्याचे आवाहन भारद्वाज यांनी यावेळी केले.

श्री. डवले यांनी यावेळी पेसा कायद्याच्या महाराष्ट्रातील अंमलबजावणी संबंधी माहिती दिली . पेसा अंतर्गत आदिवासी बहुल भागाच्या विकासासाठी मिळणाऱ्या निधीचा वापर अधिक कार्यक्षमतेने कसा करता येईल याबद्दल या परिषदेत अधिक विचारमंथन व्हावे अशी अपेक्षा त्यांनी व्यक्त केली.

दोन दिवसांच्या या परिषदेत ५ राज्यातील प्रतिनिधी उपस्थित असून पुढच्या टप्प्यात आणखी ५ राज्यांसाठी स्वतंत्र परिषद घेण्यात येईल असे पंचायती राज मंत्रालयाचे अतिरिक्त सचिव चंद्रशेखर कुमार यांनी सांगितले.

सहसचिव ममता वर्मा यांनी प्रास्ताविकात पेसा कायद्याच्या या ५ राज्यातील अंमलबजावणी संदर्भात सादरीकरण केले.

पेसा कायद्याच्या अंमलबजावणीतील राज्यांच्या प्रगतीचे मूल्यमापन करणे आणि तळागाळातील धोरणकर्ते, नागरी संस्था संघटना आणि विविध राज्यांतील प्रतिनिधींमध्ये कायद्याच्या अंमलबजावणीसाठी सामूहिक दृष्टीकोन वाढविणे हे परिषदेचे उद्दिष्ट आहे. पहिल्या दिवशी ‘पेसा क्षेत्रातील ग्रामसभांची परिणामकारकता, या भागात राहण्याच्या सोयीमध्ये त्यांची भूमिका,’ ‘पेसा क्षेत्रातील गौण वनउत्पादन आणि गौण खनिजे’ या विषयांवर चर्चासत्राचे आयोजन करण्यात आले.

कार्यक्रमाला महाराष्ट्रासह मध्य प्रदेश, राजस्थान, गुजरात आणि हिमाचल प्रदेश या राज्यातील संबंधित विभागाचे अधिकारी, लोकप्रतिनिधी आणि स्वयंसेवी संस्थांचे प्रतिनिधी उपस्थित होते.

‘आर्किटेक्ट,इंजिनियर्स अँड सर्व्हेअर्स असोसिएशन’ची घोषणा-१३ जानेवारी रोजी कार्यक्रम 
पुणे :
‘आर्किटेक्ट,इंजिनियर्स अँड सर्व्हेअर्स असोसिएशन’ कडून दरवर्षी दिल्या जाणाऱ्या जीवनगौरव पुरस्कारांची  घोषणा करण्यात आली असून ज्येष्ठ आर्किटेक्ट प्रा.जी.के.कान्हेरे, ज्येष्ठ स्ट्रक्चरल  इंजिनियर सतीश मराठे यांना यावर्षी हा सन्मान जाहीर करण्यात आला आहे. असोसिएशन तर्फे   प्रेसिडेंट पराग लकडे, उपाध्यक्ष राजीव राजे,चेअरमन महेश बांगड,सचिव संजय तासगांवकर यांनी पत्रकाद्वारे ही माहिती दिली. 
 दि १३ जानेवारी रोजी पी वाय सी हिंदू जिमखाना टेरेस येथे सायंकाळी ६ वाजता आर.बी.सूर्यवंशी(सिनियर चीफ एक्झिक्युटिव्ह ,बी.जी.शिर्के कन्स्ट्रक्शन टेक्नॉलॉजी प्रा.लि.) आणि जे.पी.श्रॉफ(अध्यक्ष,श्रॉफ ग्रुप)  यांच्या हस्ते जीवनगौरव पुरस्कारांचे वितरण करण्यात येणार आहे.  सन्मानचिन्ह, मानपत्र असे या पुरस्काराचे स्वरूप आहे. आपल्या क्षेत्रात उल्लेखनीय योगदान देणाऱ्या प्रत्येकी एक ज्येष्ठ आर्किटेक्ट आणि एक ज्येष्ठ इंजिनियर यांचा जीवनगौरव पुरस्कार देऊन दरवर्षी सन्मान केला जातो.या पुरस्कारांचे हे १७ वे वर्ष आहे.*’आर्किटेक्ट,इंजिनियर्स अँड सर्व्हेअर्स असोसिएशन’:५४ वर्षांची परंपरा* 
‘आर्किटेक्ट,इंजिनियर्स अँड सर्व्हेअर्स असोसिएशन’ ही ५४ वर्षांपूर्वी स्थापन झालेली संस्था आहे. बांधकाम क्षेत्रातील गुणवत्तापूर्ण आणि नीतिमान  सेवांना उत्तेजन देणे हा या संस्थेचा उद्देश आहे. पुण्याच्या सर्वांगीण विकासात योगदान देऊन नागरी,सामाजिक प्रश्नांवर कार्यरत राहण्यासाठी ही संस्था स्थापन झाली.सभासदांची वर्गणी आणि प्रयोजकत्वातून विविध उपक्रम आयोजित केले जातात. त्यामध्ये चर्चासत्रे,प्रशिक्षण ,विविध पुरस्कारांचा समावेश आहे.  

राष्ट्रीय शिक्षण मंडळ सेंटर फॉर पोस्ट ग्रॅज्युएट स्टडीज अँड रीसर्च इन आयुर्वेद आणि टिळक आयुर्वेद महाविद्यालयाच्या क्रियाशारीर विभागातर्फे अग्नीकॉन २०२४ मध्ये परिसंवादाचे आयोजन

पुणे : रोगप्रतिबंधात्मक उपाय यांकरीता आयुर्वेदीय जीवनशैलीचा अंगीकार करायला हवा. आयुर्वेदाचे आधुनिक शास्त्राबरोबर एकत्रीकरण करुन त्यामध्ये अधिकाधिक संशोधन करावे. आयुर्वेदाचा प्रसार मोठ्या प्रमाणात होणे आवश्यक आहे. आयुर्वेदातील संशोधनाचे पेटंट मिळवावे आणि योग्य दिशेने प्रसिद्धी द्यावी, असे मत सावित्रीबाई फुले, पुणे विद्यापीठाचे प्र कुलगुरू डॉ. पराग काळकर यांनी व्यक्त केले.
राष्ट्रीय शिक्षण मंडळ सेंटर फॉर पोस्ट ग्रॅज्युएट स्टडीज अँड रीसर्च इन आयुर्वेद आणि टिळक आयुर्वेद महाविद्यालयाच्या क्रियाशारीर विभागातर्फे पुणे रेल्वे स्टेशनजवळील हॉटेल शेरेटन ग्रँड येथे आयोजित अग्नीकॉन २०२४ या राष्ट्रीय परिसंवाद  कार्यक्रमात ते बोलत होते. यावेळी राष्ट्रीय शिक्षण मंडळाचे अध्यक्ष डॉ. दिलीप पुराणिक कार्यक्रमाच्या अध्यक्षस्थानी होते. सचिव डॉ. राजेंद्र हुपरीकर, प्राचार्य डॉ. सरोज पाटील, उपप्राचार्य-डॉ. मिहीर हजरनवीस, डॉ.इंदिरा उजागरे आणि डॉ. संगीता साळवी उपस्थित होते. यावेळी डॉ. जयंत बर्डे यांचा सत्कार करण्यात आला. महाविद्यालयाच्या ‘आयुर्विद्या’ या वैज्ञानिक विषयावरील मासिकाच्या विशेषांकाचे प्रकाशन मान्यवरांच्या हस्ते कार्यक्रमात करण्यात आले.
परिसंवादात ७२ शोधनिबंध सादर केले झाले. परिसंवादाचे संयोजन प्राचार्य डॉ. सरोज पाटील  क्रियाशारीर विभागप्रमुख डॉ. मिनाक्षी रणदिवे, डॉ. तरन्नूम पटेल, डॉ. लक्ष्मण लावगनकर, डॉ. तनुजा सावंत, डॉ. श्यामबाला बळी यांनी केले.
यावेळी डॉ. योगेश बेंडाळे यांचे धात्वाग्नी आणि कर्करोग व्यवस्थापन, डॉ.मुरली कृष्ण यांचे पंचकर्मामध्ये दोष आणि अग्नी विचार, डॉ. तपन कुमार यांचे अग्नी – कॉन्सेप्ट टू क्लिनिकल मॅनेजमेंट,डॉ. प्रशांत सुरू यांचे पांचभौतिक अग्नी आणि त्याचे वैद्यकीय उपयोग, डॉ. हरीश पाटणकर यांचे पुराव्यावर आधारित आयुर्वेद, डॉ. वैशाली वेणू यांचे राष्ट्रीय क्षयरोग कार्यक्रम आणि त्यामध्ये आयुर्वेदीय डॉक्टरांचा सहभाग , डॉ. लक्ष्मण लावगनकर यांचे केस सादरीकरण या विषयांवर व्याख्याने झाली.