पुणे, दि. १२ जानेवारी २०२४: महावितरणच्या सर्व औद्योगिक ग्राहकांना तत्पर सेवा देण्यासाठी पुणे परिमंडल अंतर्गत रास्तापेठ, गणेशखिंड व पुणे ग्रामीण मंडलस्तरावर स्वतंत्र ‘स्वागत सेल’ कार्यान्वित करण्यात आले. पुणे प्रादेशिक संचालक श्री. अंकुश नाळे यांच्याहस्ते या सेलचे उद्घाटन झाले. यावेळी मुख्य अभियंता श्री. राजेंद्र पवार यांच्यासह उद्योजक व औद्योगिक संघटना प्रतिनिधींची उपस्थिती होती.

रास्तापेठ येथे ‘प्रकाशदूत’ सभागृहात गुरुवारी (दि. ११) आयोजित कार्यक्रमात महावितरणचे वरिष्ठ अधिकारी तसेच उद्योजक, औद्योगिक संघटना प्रतिनिधी यांच्यात संवाद कार्यक्रम झाला. यावेळी ‘स्वागत सेल’बाबत सादरीकरणातून सविस्तर माहिती देण्यात आली. ‘तत्पर ग्राहकसेवा व पायाभूत वीजयंत्रणेचे विस्तारीकरण, सक्षमीकरणामुळे औद्योगिक ग्राहकांमध्ये महावितरणबाबत विश्वासार्हता वाढीस लागली आहे. पूर्वीपेक्षा वरिष्ठ पातळीवर खुला संवाद व संपर्क वाढला आहे. तात्काळ उपाययोजनांमुळे तक्रारींचे प्रमाण कमी झाले आहे. या तीनही ‘स्वागत सेल’मुळे ग्राहकसेवेचे आणखी तत्पर व्यासपीठाचे स्वागत आहे,’ असे प्रातिनिधिक मनोगत उद्योजक व औद्योगिक प्रतिनिधींनी व्यक्त केले.

प्रादेशिक संचालक श्री. अंकुश नाळे म्हणाले, ‘महावितरणच्या महसूलाचा औद्योगिक ग्राहक प्रमुख स्त्रोत आहे. ‘स्वागत सेल’मुळे औद्योगिक ग्राहकांना वीजसेवा व तक्रारींसाठी स्थानिक कार्यालयाऐवजी आता थेट मंडलस्तरावर संपर्क साधता येईल. स्थानिक कार्यालयांच्या औद्योगिक ग्राहकसेवांसाठी या सेलकडून समन्वय व दैनंदिन देखरेख राहणार आहे.’ यावेळी मुख्य अभियंता श्री. राजेंद्र पवार म्हणाले, ‘पुणे परिमंडलामध्ये एमआयडीसी विद्युत सुधारणा योजनेतून ४५ कोटींच्या पायाभूत वीजयंत्रणेची विविध कामे वेगाने सुरू आहेत. सोबतच औद्योगिक ग्राहकांसाठी आणखी १०० कोटी रूपयांचा आराखडा तयार करण्यात आला आहे. मंजूरीनंतर त्यातील सर्व कामे येत्या मार्चपर्यंत पूर्ण करण्याचे नियोजन आहे. दर्जेदार वीजपुरवठा व तत्पर ग्राहकसेवामध्ये कोणतीही तडजोड करण्यात येणार नाही’, अशी ग्वाही श्री. पवार यांनी दिली.

कार्यक्रमाला अधीक्षक अभियंता सर्वश्री अरविंद बुलबुले, युवराज जरग, संजीव राठोड, अमित कुलकर्णी तसेच उद्योजक व औद्योगिक संघटना प्रतिनिधी सर्वश्री दिलीप बटवाल, नरेश राठी, शांताराम जाधव, संदीप बेलसरे, प्रमोद राणे, नवनाथ वायाळ, प्रशांत खानखोजे, राम जोगदंड आदींसह महावितरणचे अभियंता, अधिकारी उपस्थित होते. ‘स्वागत सेल’चे प्रमुख म्हणून कार्यकारी अभियंता व वरिष्ठ व्यवस्थापक (वित्त व लेखा) काम पाहतील. त्यांना ८ ते १० अभियंता व कर्मचारी सहकार्य करतील. या सेलकडे संपर्क साधल्यानंतर औद्योगिक ग्राहकांच्या बिलिंग व वीजपुरवठ्याच्या तक्रारींचे ताबडतोब निराकरण करण्यात येईल. तसेच नवीन वीजजोडणी, भार वाढ व इतर सेवा देण्यासाठी थेट ग्राहक दारी जावून कागदपत्रांची पूर्तता करण्यासह विनाविलंब सेवा मिळणार आहे.

‘स्वागत सेल’ संपर्क क्रमांक व ईमेल– पुणे ग्रामीण मंडल- ७८७५७६७९३३ व swagatcell_prc@mahadiscom.in, गणेशखिंड मंडल- ७८७५२३२९२९ व swagatcell_ganeshkhind@mahadiscom.in, रास्तापेठ मंडल– ७८७५७६७०९५ व swagatcell_rastapeth@mahadiscom.in

पिंपरी, पुणे : महाराष्ट्रात प्रथमच माध्यमिक व उच्च माध्यमिक शारीरिक शिक्षण शिक्षक महामंडळच्या वतीने पिंपरी चिंचवड शहरात जिल्हास्तरीय ऑलिंपिया गेम्स क्रिडा महोत्सवाचे आयोजन करण्यात आले आहे हे क्रिडा क्षेत्रासाठी उपयुक्त आहे असे प्रतिपादन ऑलिंपिक वीर पै. मारुती आडकर यांनी केले.
बुधवारी (दि.१०) यांच्या हस्ते डॉ. हेडगेवार क्रिडा संकुल येथे माध्यमिक व उच्च माध्यमिक शारीरिक शिक्षण शिक्षक महामंडळ पिंपरी चिंचवड शाखेच्या वतीने पिंपरी चिंचवड शहरात प्रथमच जिल्हास्तरीय ऑलिंपिया गेम्स क्रिडा महोत्सवाचे आयोजन करण्यात आले आहे. त्याचे उद्घाटन ऑलिंपिक वीर पै. मारुती आडकर यांच्या हस्ते मेजर ध्यानचंद यांच्या प्रतिमेचे पूजन करून करण्यात आले. तत्पूर्वी महामंडळाचे अध्यक्ष फिरोज शेख, सचिव डॉ. पुरुषोत्तम उपर्वट, सामाजिक कार्यकर्त्या तृप्ती धनवटे, महामंडळाचे संचालक निवृत्ती काळभोर यांच्या हस्ते क्रिडा ज्योत संचालन करून विद्यार्थ्यांना शुभेच्छा देण्यात आल्या. यावेळी महामंडळाचे सचिव महादेव फपाळ, खजिनदार निळकंठ कांबळे तसेच रज्जाक पानसरे, सरजीत कौर, आशा पालवे, कीर्ती पाल, सीमा भोसले, विद्याराणी वाल्हेकर, नितीन काकडे, राजेश यादव, अनिल जगताप, मुकेश बिरांजे, राकेश प्रसाद, आशिष मालुसरे, राम मुदगल, राधिका काळे, वैशाली इंदलकर, रेणू शर्मा आदी उपस्थित होते.
फुटबॉल (मुले) स्पर्धेचे उद्घाटन करण्यात आले. पहिला सामना एस. बी. पाटील पब्लिक स्कूल (रावेत) विरुद्ध एसएनबीपी (मोरवाडी पिंपरी) संघ यांच्यात झाला. हा सामना एसएनबीपी संघाने दोन गोल करून एस. बी. पाटील पब्लिक स्कूल विरुद्ध विजय मिळवला. यामधे आतिफ कर्नलकर आणि दिप पाटील यांनी प्रत्येकी एक गोल केला. दुसऱ्या सामन्यात एस. पी. एम. विजयी विरुद्ध अभिषेक विद्यालय (२ गोल प्रणव गायकवाड याने केले). प्रियदर्शनी स्कूल विजयी विरुद्ध क्रिएटिव्ह पब्लिक स्कूल (श्रेयस पाटील याने एक गोल केला). गुरुवारी झालेल्या सामन्यात एसएनबीपी (बी) मोरवाडी, पिंपरी विजयी विरुद्ध होली मिशन स्कूल ( ईशान जोधा आणि आर्यन कुमार यांनी प्रत्येकी एक गोल केला). एसएनबीपी (ए) विजयी विरुद्ध एसपीएम स्कूल (आतिफ कर्नलकर, दीप पाटील आणि विनय कांबळे यांनी प्रत्येकी एक गोल केला). प्रतिभा स्कूल विजयी विरुद्ध गणेश स्कूल ने हा सामना दोन विरुद्ध एक गोलने जिंकला.
या क्रिडा महोत्सवात बास्केटबॉल (१०,१२,१४ वर्षे मुले, मुली); क्रिकेट (१२ वर्षे मुले, १४ वर्षे मुले, मुली)

हँडबॉल (१२ वर्षे मुले, १४ वर्षे मुले, मुली); हॉकी (१२, १४ वर्षे मुले, मुली); खो-खो (१२,१४ वर्षे मुले, मुली) व लंगडी (१०, १२, १४ वर्षे मुले, मुली) या स्पर्धा आणि वैयक्तिक गटात मैदानी स्पर्धा कराटे (८ ते १४ वर्षे मुले, मुली); रोप स्किपिंग (१०, १२, १४ मुले, मुली) व स्केटिंग (५ ते १४ वर्षे मुले, मुली) या स्पर्धा होणार आहेत. विजेत्या खेळाडू व संघाना रोख बक्षीस, स्मृतीचिन्ह, मेडल व प्रमाणपत्र देऊन बक्षीस वितरण समारंभात सन्मानित करण्यात येणार आहे. या स्पर्धेचे परीक्षक म्हणून महामंडळाचे मान्यताप्राप्त काम पाहणार आहेत. स्पर्धेत सहभागी होण्यासाठी ऑनलाईन, ऑफलाइन सुविधा उपलब्ध करून देण्यात आली आहे. ऑनलाइन पद्धतीने नोंदणी करण्यासाठी www.mahamandal@games.com ऑफलाईन नोंदणी करण्यासाठी निवृत्ती काळभोर (९८८१३६५११३) किंव्हा महादेव फपाळ (९८२२६१६७४९) यांच्याशी संपर्क साधावा असे आवाहन महादेव फपाळ यांनी केले आहे.

आंबेगावमध्ये कारवाई मात्र कात्रज,जांभूळवाडी, मांगडेवाडी,धनकवडीतील राजकीय संबधीतांच्या बेकायदा बांधकामांकडे दुर्लक्ष

पुणे- अनधिकृत बांधकामांनी बकाल बनविलेल्या दक्षिण पुण्यात १० बिल्डरांवर गुन्हे दाखल करूनही आजही जाहिराती करत अनधिकृत बांधकामांच्या विक्रीचा सपाटा सुरूच असल्याचे दिसून आले आहे. महापालिकेने आंबेगाव येथे काही दिवसांपूर्वी कारवाई केली त्यानंतर पुन्हा अशा असंख्य कारवाया केल्या तरी येथील अनधिकृत बांधकामे संपणार नाहीत अशी अवस्था आहे. आंबेगाव मध्ये कारवाई एकाच कारवाई नेच महापालिका काय करू शकते याचे संकेत दिले असले तरी आता मोहीम थांबली तर त्याचे अर्थपूर्ण अर्थ निष्कर्ष निघतील या शिवाय कात्रज,जांभूळवाडी, मांगडेवाडी,धनकवडी कडे येथील कनिष्ठ अभियंते दुर्लक्ष का करत आहेत? असाही सवाल केला जातो आहे.

दरम्यान बांधकाम व्यावसायिक मे. श्रावणी डेव्हलपर्सचे अतुल सुभाष मांगडे,साईनाथ डेव्हलपर्सचे प्रवीण सुरेश कोंढरे,मे. मोरया डेव्हलपर्सचे संतोष महादेव वांजळे आणि महेश नारायण कोंढरे तसेच अनिल भानुदास भवर, मे. साई गणेश डेव्हलपर्सचे अविनाश काळुराम वांजळे, श्री गणेश डेव्हलपर्सचे धनाजी पोपट घाडगे, मे. श्री डेव्हलपर्सचे सुशांत सुभाष वाडेकर, मे. समर्थ डेव्हलपर्सचे जयप्रकाश ब्रिजराज चौव्हान, दत्तात्रेय सहदू करपे, या १० जणांवर भारती विद्यापीठ पोलिस ठाण्यात गुन्हा दाखल केला आहे. महेश कोंढरे यांच्या या ठिकाणी दोन इमारती होत्या. कनिष्ठ अभियंता उमेश गोडगे यांनी यासंदर्भात फिर्याद दिली आहे.आंबेगाव बुद्रूक येथे महापालिकेची कोणतीही परवानगी न घेता बहुमजली निवासी इमारती बांधून त्यांची विक्री केली. या ठिकाणी महापालिकेने कारवाई करून ११ इमारती जमीनदोस्त केल्यानंतर याप्रकरणी १० बिल्डरांवर भारती विद्यापीठ पोलिस ठाण्यात गुन्हा दाखल केला आहे. महाराष्ट्र प्रादेशिक नियोजन नगररचना अधिनियमातील कलम १९६६ मधील ४३ आणि ५२ या कलमान्वये हे गुन्हे दाखल झाले आहेत, अशी माहिती शहर अभियंता प्रशांत वाघमारे यांनी दिली.आंबेगाव बुद्रूक येथे सिंहगड महाविद्यालयाच्या लगत ११ अनधिकृत निवासी मिळकती बांधल्या होत्या. त्यामधील फ्लॅटची संख्या सुमारे ५०० इतकी आहे. या इमारतींचे काम सुरू असताना २०२१ मध्ये बांधकाम विभागाने नोटीस बजावून कारवाई केली होती. त्यानंतर पुन्हा या ठिकाणी प्रत्येकी सहा मजली इमारती उभ्या राहिल्या. या काळात अनेक नागरिकांनी तेथे १८ लाखांपासून ते २० लाखांपर्यंत सदनिका विकत घेतल्या होत्या. महापालिकेच्या बांधकाम विभागाने डिसेंबरच्या अखेर या ठिकाणी कारवाई करून ४५ हजार ५० चौरस फुटाचे बांधकाम पाडून टाकले. या कारवाईमुळे सामान्य नागरिकांचे मोठे नुकसान झाले आहे. महापालिकेने वेळीच कारवाई केली असती तर आमची फसवणूक झाली नसती, अशा शब्दात सदनिकाधारकांनी नाराजी व्यक्त केली होती. दरम्यान, या कारवाईनंतर महापालिका प्रशासनाने संबंधित बिल्डरांवर गुन्हा दाखल करण्यासाठी भारती विद्यापीठ पोलिस ठाण्यात तक्रार दिली होती. त्यानुसार गुन्हे दाखल झाले आहे.

पुणे-सोलापूरला ११ जानेवारी ते ११ फेब्रुवारी या कालावधीत उजनीतून कालव्याद्वारे शेतीसाठी एक सिंचन आवर्तन देण्यात यावे, तसेच पिण्यासाठी पाणी पुरविण्यास प्राधान्य देऊन उपलब्ध पाण्याचे अत्यंत सुक्ष्म नियेाजन करण्याचे निर्देश उच्च व तंत्रशिक्षण मंत्री तथा पालकमंत्री चंद्रकांतदादा पाटील यांनी आज दिले.

उजनी प्रकल्प कालवा सल्लागार समितीची बैठक पालकमंत्री चंद्रकांतदादा पाटील यांच्या अध्यक्षतेखाली पुणे येथील शासकीय विश्रामगृहात पार पडली, त्यावेळी ते बोलत होते. यावेळी बार्शीचे आमदार राजेंद्र राऊत, मोहोळचे आमदार यशवंत माने, करमाळाचे आमदार संजय शिंदे, पंढरपूरचे आमदार समाधान आवताडे, आमदार रणजितसिंह मोहिते पाटील, जिल्हाधिकारी कुमार आशिर्वाद, जलसंपदा विभागाचे मुख्य अभियंता एच.टी.धुमाळ, अधिक्षक अभियंता धीरज साळे यावेळी उपस्थित होते.

गतवर्षी पाऊस कमी झाला असून, उपलब्ध पाणी येणाऱ्या पावसाळयापर्यत पुरविण्यासाठी सिंचन विभागाने नियोजन करावे असे सांगून पालकमंत्री चंद्रकांतदादा पाटील यांनी पिण्याचे पाणी पुरविण्यास प्राधान्य देण्यात यावे अशी सूचना केली. यापूर्वी कालवा सल्लागार समितीने मंजूरी दिल्याप्रमाणे पाण्याच्या आवर्तनाचे नियेाजन संबधितांनी केले नसल्यास त्यासंदर्भात जिल्हाधिकारी यांच्या अध्यक्षतेखाली समितीकडून चौकशी करण्यात येईल असे सांगून, आवश्यकतेनुसार  आढावा घेऊन कालवा सल्लागार समितीची पुन्हा बैठक घेण्यात येईल असे सांगितले.

उजनी प्रकल्पात सध्या ५.३४ टीएमसी (९.५८ टक्के) उपयुक्त पाणीसाठी आहे. उजनी भिमा प्रकल्पाद्वारे सन २०२२-२३ मध्ये प्रत्यक्ष भिजलेले क्षेत्र २ लाख ५४ हजार २५३ हेक्टर (८४.५० टकके) होते अशी माहिती यावेळी देण्यात आली.

अधीक्षक अभियंता धीरज साळे यांनी उपलब्ध पाणीसाठा,कालव्यावरील आठमाही प्रकल्पीय पीक रचना, निर्मित सिंचन क्षमता व प्रत्यक्ष सिंचित क्षेत्र, मागील पाच वर्षातील पाणीपट्टी वसूली, खरीप व रब्बी हंगाम २०२३-२४ मधील प्रत्यक्ष पाणी वापर, उर्वरित कालावधीसाठी पाण्याचे नियोजनाविषयीची सविस्तर माहिती बैठकीत सादर केली.

यावेळी जिल्ह्यातील लोकप्रतिनीधींनी समान पध्दतीने उपलब्ध पाणी वाटप करण्याची सूचना लोकप्रतिनिधींनी यावेळी केली. माढयाचे आमदार बबनदादा शिंदे, अक्कलकोटचे आमदार सचिन कल्याणशेट्टी, दक्षिण सोलापूरचे आमदार सुभाषबापू देशमुख, कृष्णा खोरे विकास महामंडळाचे कार्यकारी संचालक श्री.कपोले  हे दृकश्राव्य माध्यमातून बैठकीत सहभागी झाले होते.

डॉ. शेहला रशीद यांचे प्रतिपादन
भारतीय छात्र संसदेचे तिसरे सत्र संपन्न
पुणे, दि. ११ जानेवारी : एआय (अख) मध्ये नैतिक पारदर्शकता आणली पाहिजे. बनावट व्हिडिओ आणि फोटोंना बळी पडू नये. असे प्रतिपादन नीती सल्लागार आणि संशोधक  डॉ. शेहला रशीद यांनी केले.
एमआयटी स्कूल ऑफ गव्हर्नमेंटने आयोजित केलेल्या १३व्या भारतीय विद्यार्थी संसदेच्या तिसर्‍या सत्रात लोकशाही २.० एआय आणि सोशल मीडिया गेम कसे बदलत आहेत? या विषयावर व्याख्यान झाले.अध्यक्षस्थानी कर्नाटक विधानसभेचे अध्यक्ष यूटी खादर फरीद हे होते.
यावेळी प्रमुख वक्ते म्हणून एड. सोमनाथ (विधानसभा सदस्य, दिल्ली), अपूर्व सिंग (सोशल मीडिया प्रभारी राष्ट्रीय बीजेवायएम ११ राज्य) उपस्थित होते.
डॉ. शैला रशीद म्हणाल्या की, डिजिटल इंडिया पूर्णपणे धर्मनिरपेक्ष असावा. त्याचा उपयोग चांगल्या विचारांसाठी व्हायला हवा. सोशल मीडियाच्या माध्यमातून लोक सक्रिय आहेत.
खादार फरीद म्हणाले की, प्रत्येक क्षेत्रात सुधारणा करणे हे केवळ नेत्याच्याच हातात असते.राजकारण हे गणित नसून रसायन आहे.राजकारण समाधान देत नाही तर प्रतिक्रिया देते.
अपूर्व सिंह म्हणाले की, सोशल मीडिया सकारात्मक आणि नकारात्मक असे दोन्ही परिणाम देतो. पूर्वी लोकांना काहीतरी जाणून घेण्यासाठी किंवा त्यांचा संदेश पोहोचण्यासाठी प्रतीक्षा करावी लागत होती. पण आजच्या काळात घरात बसून सोशल मीडियाच्या माध्यमातून माहिती मिळवता येते.
तुम्ही तुमची समस्या सरकारपर्यंत पोहोचवू शकता.सोशल मीडियाची ताकद अशी आहे की जर आपण घरी बसून काहीतरी ट्रेंड केले तर लाखो लोकांपर्यंत पोहचते. मात्र त्याचाही काही वेळेस नकारात्मक प्रभाव पडतो. व्हिडिओ एआय द्वारे मॉर्फ केला जातो, त्यामुळे तो योग्य की अयोग्य हे आम्हाला समजू शकत नाही. मात्र वस्तुस्थिती तपासल्यानंतर  माहिती समोर येते.

एड. सोमनाथ भारती म्हणाले की, ज्यांच्या हातात सोशल मीडियाचे साधन आहे, त्यांनी ज्याला पुढे न्यायचे आहे ते पुढे जाईल.सोशल मीडिया आणि एआय हे केवळ सक्षम करणारे आहेत, पुढे काय चालणार हे ज्याच्या हातात हे साधन आहे त्याच्या नियंत्रणात आहे. अशा अनेक गोष्टी सोशल मीडियावरून पसरतात ज्यामुळे द्वेष पसरतो, त्यामुळे काहीही व्हायरल करण्यापूर्वी त्याबद्दल जाणून घेणे आवश्यक आहे.पण सोशल मीडिया आणि एआयचेही फायदे आहेत.
मॉडेल यंग एमएलए पुरस्कार हरियाणाच्या आमदार भव्य बिश्नोई यांना प्रदान करण्यात आला.विद्यार्थी वक्ते हिमांशू जिंदाल (दिल्ली), सेजल सिंग (महाराष्ट्र), अक्षरा एच (आंध्र प्रदेश), ऋषी वैभव मिश्रा (उत्तर प्रदेश) सोशल मीडिया आणि एआय गेम कसा बदलत आहे…? पण आपले मत व्यक्त केले.
डॉ. गौतम बापट यांनी सूत्रसंचालन केले

‘अ ब्रायटर टुमारो’ चित्रपटाने महोत्सवाची सुरुवात होणार

पुणे, दि. ११ जानेवारी २०२४ : ‘पुणे आंतरराष्ट्रीय चित्रपट (पीफ) महोत्सव २०२४’चा उद्घाटन सोहळा गणेश कला क्रीडा मंच येथे १८ जानेवारीला संध्याकाळी ५ वाजता होणार असून, यावेळी भारतीय चित्रपटसृष्टीतील योगदानाबद्दल प्रसिद्ध रेडीओ उद्घोषक अमिन सयानी, दिग्दर्शक-अभिनेते गौतम घोष आणि प्रसिद्ध नृत्यांगना-अभिनेत्री लीला गांधी यांना ‘पीफ डिस्टींग्वीश अॅवार्ड’, तर संगीत संयोजक, गायक आणि गीतकार एम. एम. कीरवानी यांना संगीत क्षेत्रातील योगदानासाठी संगीतकार एस. डी. बर्मन पुरस्कार देऊन गौरविण्यात येणार असल्याची घोषणा, आज महोत्सवाचे संचालक डॉ, जब्बार पटेल यांनी केली.

उद्घाटन सोहळ्यानंतर ‘अ ब्रायटर टुमारो’ (इटली, दिग्दर्शक – नानी मोरेत्ती) हा उद्घाटनाचा चित्रपट (ओपनिंग फिल्म) दाखवण्यात येणार आहे, तर ‘कीडनॅप्ड’ (इटली, दिग्दर्शक – मार्को बेलोचिओ) या चित्रपटाने महोत्सवाची (क्लोजिंग फिल्म) सांगता होणार असल्याचे डॉ. पटेल यांनी सांगितले.

हे वर्ष सदाबहार अभिनेते देव आनंद (२६ सप्टेंबर १९२३), गायक मुकेश (२२ जुलै १९२३), दिग्दर्शक मृणाल सेन (१४ मे १९२३), प्रसिद्ध अभिनेते-दिग्दर्शक एनटीआर (२८ मे १९२३), संगीत दिग्दर्शक सलिल चौधरी  (१९ नोव्हेंबर १९२३) आणि गीतकार शैलेन्द्र (३० ऑगस्ट १९२३) यांचे जन्मशताब्दी वर्ष साजरे करण्यात येणार असल्याचे  डॉ. जब्बार पटेल यांनी सांगितले.

यावेळी महोत्सवाच्या आंतरराष्ट्रीय ज्यूरींच्या नावाचीही घोषणा करण्यात आली. यामध्ये पेट्र झेलेन्का – (झेक प्रजासत्ताक – नाटककार आणि दिग्दर्शक), शाई गोल्डमन (इस्रायल – सिनेमॅटोग्राफर आणि चित्रपट निर्माता), सुधीर मिश्रा (भारत – चित्रपट दिग्दर्शक आणि पटकथा लेखक), मंजू बोराह (भारत – चित्रपट दिग्दर्शक आणि लेखक), सेतारेह इस्कंदरी (इराण – अभिनेत्री), उमरान सफ्तेर (तुर्कस्तान – चित्रपट दिग्दर्शक आणि निर्माता), सू प्राडो (फिलिपाईन्स – अभिनेत्री) आणि विसाकेसा चंद्रसेकरम (श्रीलंका – चित्रपट दिग्दर्शक, लेखक, नाटककार) यांचा समावेश आहे. 

या महोत्सवात विकास खार्गे, अविनाश ढाकणे, जानू बरुआ, शाई गोल्डमन, मनोज वाजपेयी यांचे विविध विषयांवर मास्टर क्लास होणार आहेत. ‘नव्या मराठी सिनेमाच्या शोधात’ या विषयावर परिसंवाद होणार असून, त्यामध्ये निखिल महाजन, वरून नार्वेकर, रितेश देशमुख, मंगेश देसाई आणि संजय कृष्णाजी पाटील सहभागी होणार आहेत. तसेच चित्रपट महोत्सवांचे भविष्य आणि महत्त्व या विषयावरील परिसंवादामध्ये सैबल चटर्जी, बीना पॉल, एडवीनास पुकास्ता सहभागी होणार असल्याचे डॉ. पटेल यांनी सांगितले.

१८ ते २५ जानेवारी दरम्यान ‘पुणे आंतरराष्ट्रीय चित्रपट (पीफ) महोत्सव २०२४’ होणार आहे. सेनापती बापट रस्त्यावरील पॅव्हेलियन मॉलमधील पीव्हीआर आयकॉन (६ स्क्रीन), कॅम्प परिसरातील आयनॉक्स (३ स्क्रीन) आणि औंध भागातील वेस्टएंड मॉलमधील सिनेपोलीस चित्रपट गृहात (२ स्क्रीन) या तीन ठिकाणी एकूण ११ स्क्रीनवर चित्रपट दाखविले जाणार आहेत.

महोत्सवासाठीची ऑनलाईन नोंदणी प्रक्रिया www.piffindia.com या महोत्सवाच्या अधिकृत संकेतस्थळावर सुरू झाली असून, चित्रपटगृहांवर स्पॉट रजिस्ट्रेशन प्रक्रियाही सुरू झाली आहे. रसिक प्रेक्षकांसाठी चित्रपटगृहात चित्रपट पाहण्यासाठी संपूर्ण महोत्सवासाठी नोंदणी शुल्क रुपये ८०० फक्त आहे.

पुरस्काराचे मानकरी

अमीन सयानी

अमीन सयानी हे भारतातील लोकप्रिय माजी रेडिओ उद्घोषक आहेत. रेडिओ सिलोनवर ‘बिनाका गीतमाला सादर करीत अमीन सयानी यांनी संपूर्ण भारतीय उपखंडात प्रसिद्धी आणि लोकप्रियता मिळवली. पारंपरिक “भाईयो और बहनो”च्या विरूद्ध “बहनों और भाइयों” प्रेक्षकांना संबोधित करण्याची त्यांची शैली अजूनही लोकप्रिय मानली जाते. त्यांनी १९५१ पासून ५४ हजारांहून अधिक रेडिओ कार्यक्रम आणि १९ हजार जिंगल्सची निर्मिती केली आहे.

सीबाका/ बिनाका त्यांनी अगोदर रेडिओ सिलोनवर आणि नंतर विविध भारतीवरून एकूण ४२ वर्षांहून अधिक काळ प्रसारीत केले आणि ऑल इंडिया रेडिओ लोकप्रिय करण्यात मदत केली.

महात्मा गांधींच्या सूचनेनुसार सुरू झालेले ‘राहबर’ या पाक्षिकाचे संपादन, प्रकाशन आणि छापण्यात सयानी यांनी त्यांची आई कुलसुम सयानी यांना मदत केली होती.

गौतम घोष

अनेक राष्ट्रीय पुरस्कार नावावर असणारे गौतम घोष हे प्रसिद्ध चित्रपट दिग्दर्शक, अभिनेते, संगीत दिग्दर्शक आणि सिनेमॅटोग्राफर आहेत. त्यांनी प्रामुख्याने बंगाली चित्रपटांमध्ये काम केले आहे. त्यांना १९९७ मध्ये इटलीतील “व्हिटोरियो डी सिका” हा पुरस्कार मिळाला असून, हा पुरस्कार प्राप्त करणारे ते एकमेव भारतीय आहेत. २०१२ मध्ये, पश्चिम बंगाल सरकारने त्यांना ‘बंग बिभूषण’ देऊन सन्मानित केले आहे. चित्रपटातील त्यांच्या योगदानाची दखल घेऊन, त्यांना जुलै २००६ मध्ये ‘स्टार ऑफ द इटालियन सॉलिडॅरिटी नाइटहूड’ हा पुरस्कार प्रदान करण्यात आला आहे.

लीला गांधी

१९५१ साली नृत्य दिग्दर्शक म्हणून कारकीर्द सुरू केलेल्या लीला गांधी यांनी पुढे मास्टर भगवान यांच्या ‘रंगीला’ (१९५३), ‘हल्लागुल्ला’ (१९५४) व ‘भला आदमी’ (१९५८) या चित्रपटांत नृत्य करत पदार्पण केले. ‘बस कंडक्टर’ या चित्रपटात तर त्यांनी हेलनबरोबर नृत्य केले होते. राजा ठाकूर यांच्या ‘रेशमाच्या गाठी’ या कार्यक्रमात ‘इष्काच्या रंगात वीज भरे अंगात’ या गाण्यावर त्यांनी नृत्य केले होते. त्यानंतर ‘प्रीतिसंगम’ (१९५७)मधील त्यांचे नृत्य गाजले.

‘सांगत्ये ऐका’पासून (१९५९) त्यांनी अनेक चित्रपटांचे नृत्यदिग्दर्शन केले, तर ‘केला इशारा जाता जाता’ (१९६५) या चित्रपटाच्या त्या सहनायिका होत्या. चित्रपटांबरोबरच त्यांचा नाट्यप्रवासही चालू होता. ७५ चित्रपटात व २५ नाटकांत त्यांनी काम केले आहे.

एम. एम कीरवानी

पद्मश्री कोडुरी मारकथमणी कीरवानी हे एम. एम. कीरवानी म्हणून प्रसिद्ध आहेत. संगीत संयोजक, रेकॉर्ड निर्माते, गायक आणि गीतकार अशा अनेक भूमिकांमध्ये त्यांचे काम आहे. त्यांनी प्रामुख्याने तेलुगू चित्रपटात काम केले आहे.

कीरवानी यांनी हिंदी, तमिळ, कन्नड आणि मल्याळम चित्रपटांसाठीही काम केले. क्षाना क्षनम, घराना मोगुडू, अल्लारी प्रियुडू, क्रिमिनल, सुभा संकल्पम, पेल्ली संदादी, देवरागम यांसारख्या रचनांसाठी ते प्रसिद्ध आहेत. तसेच अन्नमय्या (१९९७), जख्म (१९९८), स्टुडंट नंबर १ (२००१), जिस्म (२००३), पहेली (२००५), मगधीरा (२००९), बाहुबली (२०१५), आणि आरआरआर (२०२२), हे त्यांचे गाजलेले चित्रपट आहेत. त्यांच्या बहुतेक रचना एस. पी. बालसुब्रह्मण्यम आणि के. एस. चित्रा यांनी जिवंत केल्या आहेत.

त्यांना ११ नंदी पुरस्कार, ८ फिल्मफेअर पुरस्कार, २ राष्ट्रीय चित्रपट पुरस्कार, एक अकादमी (ऑस्कर) पुरस्कार, एक गोल्डन ग्लोब पुरस्कार अशा अनेक पुरस्कारांनी त्यांना सन्मानित करण्यात आले आहे. २०२३ मध्ये, भारतीय चित्रपटसृष्टीतील त्यांच्या योगदानाबद्दल भारत सरकारने त्यांना पद्मश्री देऊन सन्मानित केले आहे.

लोणावळा येथे रिक्षा चालक मालकांचा मेळावा संपन्न

पुणे-रिक्षा चालक मालकांसाठी कल्याणकारी महामंडळ स्थापन करून त्यांना म्हातारपणी पेन्शन मिळाली पाहिजे , मुक्त रिक्षा परवाना बंद झाला पाहिजे, इ चलन बंद झालं पाहिजे, याबरोबर देशभरामध्ये सध्या सुरू असलेल्या हिट अँड रन प्रकरणी सरकारने रस्त्यावर उतरून आंदोलन करणाऱ्या चालक-मालकांच्या प्रतिनिधी सोबत चर्चा करावी, चालक-मालकांच्या प्रतिनिधी सोबत चर्चा केल्याशिवाय, व आमचे प्रश्न सोडवल्याशिवाय माघार घेणार नाही, महाराष्ट्र सह देशभरामध्ये स्टेरिंग छोडो आंदोलन सुरू झाले असून देशातील चालक-मालक हे रस्त्यावर उतरून आंदोलन करत आहेत, आंदोलन करणाऱ्या संघटना प्रतिनिधी सोबत चर्चा करण्याऐवजी सरकार मात्र उद्योगपती आणि भांडवलदार ट्रान्सपोर्टस सोबत चर्चा करत आहेत, यामुळे देशभरातील 25 करोड चालक मालकांमध्ये तीव्र नाराजी पसरली यामुळे पुन्हा 9 जानेवारीपासून स्टेरिंग छोडो आंदोलन सुरू करण्यात आले असून सरकारने चालक-मालकांच्या प्रतिनिधी सोबत चर्चा करावी असे आवाहन बाबा कांबळे यांनी सरकारला केले आहे,

लोणावळा येथे महाराष्ट्र रिक्षा पंचायत व लोणावळा शहरातील विविध संघटनेच्या वतीने रिक्षा चालक मालकांचा मेळावा मोठ्या उत्साहांमध्ये संपन्न झाला यावेळी बाबा कांबळे बोलत होते,

यावेळी प्रादेशिक परिवहन विभागाचे प्रदीप शिंगारे, महाराष्ट्र रिक्षा पंचायत महाराष्ट्र उपाध्यक्ष बाबुभाई शेख अध्यक्ष, आनंद सदावर्ते, गुजरात येथील सतीश जागडा आदी उपस्थित होते,

यावेळी बाबा कांबळे म्हणाले महाराष्ट्रातील पंचवीस करोड चालक मालकांनी देशभरामध्ये एक तारखेपासून आंदोलन सुरू केले परंतु सरकारने मात्र ट्रान्सपोर्ट धारकांचे मोठे उद्योगपती ऑल इंडिया मोटर काँग्रेस यांच्याशी चर्चा करून आंदोलन माघार घेतले असे जाहीर केलं ऑल इंडिया मोटर काँग्रेसने देशातील 25 करोड ड्रायव्हर यांची दिशाभूल करून ज्यांनी आंदोलन सुरूच केले नाही त्यांना आंदोलन माघार घेण्याचा अधिकार नाही हे आंदोलन देशातील 25 कोटी चालक-मालकांनी सुरू केले आहे परंतु त्यांच्याशी चर्चा न करता ऑल इंडिया मोटर्स काँग्रेसच्या वतीने परस्पर हे आंदोलन मागे घेतले असे जाहीर करण्यात आले यामुळे देशभरातील 25 करोड चालकांमध्ये तीव्र संताप पसरला आहे,या मुळे त्यांनी पुन्हा 09 जानेवारी 2024 मध्ये रात्रीपासून महाराष्ट्रात देशभरामध्ये स्टेरिंग छोडो करून चक्काजाम करण्याचा निर्णय देशातील चालक मालकांने घेतला, आहे, असे बाबा कांबळे यावेळी म्हणाले

कार्यक्रमाच्या संयोजनासाठी आनंद सदवरते , विनय बच्चे, भगवान घनवट, विकास खेंगरे, भाऊ शिवेकर वासिम खान चल्लरभाई शेख यांनी परिश्रम घेतले.

पुणे-भाजप शिवसेना राष्ट्रवादी काँग्रेस आरपीआय (ए) शिव संग्राम आणि मित्र पक्षांचा पुणे जिल्ह्याचा पहिला संयुक्त मेळावा रविवारी तारीख 14 म्हात्रे पुलाजवळील डीपी रस्त्यावरील शुभारंभ मंगल कार्यालयात दुपारी चार वाजता आयोजित करण्यात आला असल्याची माहिती भाजपचे प्रदेश सरचिटणीस मुरलीधर मोहोळ यांनी आज पत्रकार परिषदेत दिली.मुरलीधर मोहोळ,दीपक मानकर,धीरज घाटे,संदीप खर्डेकर,सुरेश घुले,प्रदीप गारटकर,प्रमोद तथा नाना भानगिरे,संजय मशीलकर,किरण साळी,भरत लगड,आर पी आय (ए) परशुराम वाडेकर,संजय सोनवणे उपस्थित होते .

महायुतीच्या वरिष्ठ नेत्यांनी घेतलेल्या निर्णयानुसार राज्यातील सर्व 38 जिल्ह्यांमध्ये संयुक्त मेळावे आयोजित करण्यात येणार आहेत. त्यानुसार हा मेळावा होणार आहे. प्रत्येक जिल्ह्याचा पालकमंत्री मेळाव्याला मार्गदर्शन करणार आहे. पुणे जिल्ह्याचे पालकमंत्री अजितदादा पवार या मेळाव्यात मार्गदर्शन करतील.

लोकसभा निवडणुकीचे कामाचे व्यवस्थापन करणे, मोदी सरकारच्या लोकोपयोगी योजना, देशातील महायुती सरकारच्या योजना नागरिकांपर्यंत पोहोचविणे तसेच पुणे जिल्ह्यातील लाभार्थ्यांची संवाद साधणे आणि विविध प्रकल्प व विकास कामांची माहिती नागरिकांना देणे अशा प्रकारचे नियोजन मेळाव्यात करण्यात आले आहे. घटक पक्षातील कार्यकर्त्यांमध्ये समन्वयाने काम व्हावे हाही मेळाव्याचा उद्देश आहे.