शिवजयंतीच्या तपपूर्ती सोहळ्याला ९५ स्वराज्यरथांची मानवंदना

पुणे : शिवजयंती महोत्सव समिती, पुणे तर्फे शिवजयंतीला सोमवार, दिनांक १९ फेब्रुवारी २०२४ रोजी सकाळी ९ वाजता लालमहाल येथून ‘शिवजन्मोत्सव स्वराज्यरथ सोहळा’ या भव्यदिव्य मिरवणुकीचे आयोजन करण्यात आले आहे. मिरवणुकीचे यंदा १२ वे वर्ष आहे. सरसेनापती, सरदार, सुभेदार, वीर मावळे आणि वीर मातांच्या तब्बल ९५ स्वराज्यरथांचा सहभाग हे या सोहळ्याचे वैशिष्टय असणार आहे, अशी माहिती सोहळ्याचे संकल्पक आणि समितीचे प्रवर्तक संस्थापक अध्यक्ष अमित गायकवाड यांनी दिली.  
या मिरवणुकीचे उद्घाटन शिवरायांचे वंशज श्रीमंत मालोजीराजे छत्रपती, खासदार सुप्रिया सुळे, समितीचे संस्थापक अध्यक्ष अमित गायकवाड, आमदार दिलीप मोहिते, संग्राम थोपटे, भीमराव तापकीर, संजय जगताप, चेतन तुपे, सिध्दार्थ शिरोळे, तसेच सर्व स्वराज्यघराण्यांचे प्रतिनिधी यांच्या शुभहस्ते होणार आहे.  यावेळी परिमंडळ १ पोलीस उपायुक्त संदीप गिल्ल, बीव्हीजी ग्रुपचे हणमंत गायकवाड उपस्थित राहणार आहेत.
भारताच्या इतिहासातील शिवकालीन युद्धकला सादर करणाऱ्या ५१ रणरागिनींचे औरंगासुर मर्दिनी भद्रकाली रणरागिनी “महाराणी ताराराणी शौर्य पथक” मर्दिनी युद्धकला सादर करणार आहेत. नादब्रह्म ट्रस्ट ढोलताशा पथक, ५१ रणशिंग, ओम नमो: परिवर्तन महिला लेझीम पथक सहभागी होणार आहे.    
सोहळ्याचे संकल्पक आणि समितीचे प्रवर्तक संस्थापक अध्यक्ष अमित गायकवाड, सचिन पायगुडे, रवींद्र कंक, शंकर कडू, नीलेश जेधे, गोपी पवार, समीर जाधवराव, किरण देसाई, प्रवीण गायकवाड, मोहन पासलकर, किरण शितोळे, मयुरेश दळवी यांसह असंख्य स्वराज्यबांधवांनी सोहळ्याचे आयोजन केले आहे. पुणेकरांनी मोठया संख्येने या सोहळ्यात सहभागी व्हावे असे आवाहन समितीच्या वतीने करण्यात आले आहे. 

* स्वराज्यरथ सोहळ्यात सहभागी होणार ही स्वराज्यघराणी -समितीच्या जिजाऊ मॅांसाहेब शहाजी महाराज शिवज्योत या मानाच्या मुख्य स्वराज्यरथाच्या नेतृत्वाखाली सरसेनापती वीर बाजी पासलकर, सरदार कान्होजी नाईक जेधे, सरदार कृष्णाजी नाईक बांदल, सरनौबत सेनापती येसाजी कंक, सरदार नरवीर तानाजी मालुसरे, मानाजी पायगुडे, कान्होजी कोंडे, बाबाजी ढमढेरे, पिलाजीराव सणस, हैबतराव शिळीमकर, त्र्यंबकराव नाईक निंवगुणे, सरदार जैताजी नाईक करंजावणे, सरदार चांगोजी कडू, अढळराव बाबाजी डोहर धुमाळ, सुर्याजी काकडे, सरलष्कर सरसेनापती हंबीरराव मोहिते, सरसेनापती संताजी घोरपडे, सरदार गोदाजी जगताप, सरनोबत सिधोजी थोपटे, झुंजारराव मरळ, शितोळे सरकार, गोदाजी भुरूक, सरनोबत नागोजीराव कोकाटे, श्रीमंत माने सरकार घराणे, सरदार हिरोजी इंदलकर, श्रीमंत सरदार राऊतराव ढमाले, श्रीमंत सुभेदार खंडोजी माणकर, श्रीमंत सरदार दयाजीराव मारणे गंभीरराव, सप्तसहस्त्री सरदार नावजी बलकवडे, वीर माता धाराऊ गाडे, समुद्रस्वामी दर्यासारंग सरखेल कान्होजी आंग्रे, सरदार शिवाजी इंगळे, हिंमतबहाद्दर विठोजी चव्हाण, भोई बांधव, श्रीमंत सरदार लखुजीराजे जाधवराव, गरुड घराणे, चंद्रवंशी (भोपतराव) श्रीमंत सरदार लुखजीराव घारे, महाशक्तीशाली सरदार संभाजी काटे, सरदार निंबाळकर घराणे, जगदगुरू संतश्रेष्ठ संत तुकाराम महाराज भक्ती शक्ती स्वराज्यरथ, श्रीमंत हरजीराजे महाडीक, महाशक्तीशाली रणमर्द सरदार संभाजी कोंढाळकर, सरनोबत पिलाजी गोळे, सरदार प्रतापराव गुजर, सरदार वाघोजी तुपे, सरदार, पिलाजीराव शिर्के, श्रीमंत महाराज छत्रसाल बुंदेला धारदेवास, महाराष्ट्राचे श्रीमंत पवार घराणे, समशेर बहाद्दर श्रीमंत दमाजीराव गायकवाड सरकार, श्रीमंत महादजी शिंदे सरकार, गुप्तहेर प्रमुख बहिर्जी नाईक, शिवरत्न शिवा काशीद जीवा महाले, सरदार जीवाजी सुभानजी रणनवरे, सरदार मल्हारजी तुकोजी निगडे, शुरवीर एकोजी शिरोळे, शुरवीर शेलार मामा, राजेश्री सरदार हांडे, सरदार भोईटे, सरदार मांढरे, स्वराज्यनिष्ठ येसाजी कामठे, श्रीमंत हरजीराजे बर्गे,शिवरायांचे शिलेदार डिंबळे, श्रीमंत तापकीर सरदार, वीर सरदार मालोजी भिलारे,पानीपत वीर महादजी माळवदकर, पानीपत वीर महादजी व दादजी हरपळे, प्रतापगड युध्दवीर सहस्त्री सरदार कोडांजी वरखडे, दक्षिण दिग्वीजय वीर मानाजी मोरे, स्वराज्याचे निष्ठावंत सरदार दरेकर , स्वराज्याचे शिलेदार कुंजीर, स्वराज्यनिष्ठ शेळके, वीर फडतरे, राजे साळुंखे चालुक्य राजवंश, स्वराज्यनिष्ठ सरदार बाबर, सिंहगड वीर विठोजी कारके, प्रतापगड युध्दवीर सहस्त्री सरदार रामजी पांगारे, स्वामीनिष्ठ खंडो बल्लाळ चिटणीस, सरदार काळे, वीर बाजीप्रभु देशपांडे यांचे स्वराज्यरथ आपआपला गौरवशाली इतिहास मांडत सहभागी होणार आहेत.
* सलग १३ व्या वर्षी  हेलिकॉप्टरने पुष्पवृष्टी-शिवछत्रपतींच्या पुतळ्यावर सलग १३ व्या वर्षी  हेलिकॉप्टरने पुष्पवृष्टी करुन शिवजयंती महोत्सव समितीचे प्रवर्तक संस्थापक अध्यक्ष अमित गायकवाड मानवंदना देणार आहेत. एसएसपीएमएस शाळेतील श्री शिवछत्रपतींच्या पूणार्कृती पुतळ्यावर सकाळी ११ ते १ या वेळेत , ईशान अमित गायकवाड यांच्या हस्ते हेलिकॉप्टरमधून सलग १३ व्या वर्षी पुष्पवृष्टी करण्यात येणार आहे.

महाराष्ट्रातील गरजू महाविद्यालयीन विद्यार्थ्यांनींकरिता रुलर स्कॉलर स्किम व यशस्वी विद्यार्थीनींचा गौरव
पुणे : महाराष्ट्राच्या नकाशावरील खामगाव जवळील अतिशय छोटेसे खेडेगाव असलेल्या दुर्गम भागातील शाळेत पारधी समाजातील मुला-मुलींना शिक्षणाच्या सावलीत सर्व सोयी-सुविधा उपलब्ध व्हाव्या, याकरिता पुण्यातील अ‍ॅमनोरा येस फाऊंडेशनने पुढाकार घेतला आहे. पारधी समाजातील मुला-मुलींना सर्वतोपरी मदत आणि रुलर स्कॉलर स्किम अंतर्गत महाराष्ट्रातील गरजू महाविद्यालयीन विद्यार्थीनींचा शैक्षणिक खर्च असा मदतीचा हात देत या विद्यार्थ्यांच्या पंखांना फाऊंडेशनचे बळ दिले आहे. अशाच यशस्वी गरजू विद्यार्थी-विद्यार्थीनींचा सन्मान सोहळा पुण्यात नुकताच पार पडला.

अ‍ॅमनोरा येस फाऊंडेशनतर्फे हडपसर मगरपट्टा जवळील अ‍ॅमेनोरा द फर्न येथे या विद्यार्थ्यांच्या सन्मानसोहळ्याचे व स्नेहमेळाव्याचे आयोजन करण्यात आले होते. यावेळी फाऊंडेशनचे संस्थापक अध्यक्ष अनिरुद्ध देशपांडे, विवेक कुलकर्णी यांसह विविध क्षेत्रातील मान्यवर उपस्थित होते. फाऊंडेशनच्या कार्याला हातभार लावणा-या नोबेल हॉस्पिटलचे डॉ.एस.के.राऊत, लोकमान्य हॉस्पिटलचे विशाल क्षीरसागर, आस्था ब्रेस्ट कॅन्सर सपोर्ट ग्रुपचे डॉ.शेखर कुलकर्णी, सरिता सोनवले, रोटरी क्लब कात्रजचे मिलिंद कुलकर्णी, नितीन नाईक, डॉ.अजित कुलकर्णी, डॉ.एच.व्ही.देसाई आय हॉस्पिटलमधील पदाधिका-यांचा सन्मान यावेळी करण्यात आला.

तसेच खामगाव येथील पारधी समाजातील विद्यार्थी संतोष अंबुरे, ॠषिकेश सोनवणे आणि कराटे खेळाडू अथर्व चव्हाण यांना देखील गौरविण्यात आले. रुलर स्कॉलर स्किम अंतर्गत प्रियांका मोहिते, अश्विनी लेम्भे, क्षितिजा धुमाळ या महाराष्ट्रातील गरजू व यशस्वी विद्यार्थीनींचे सन्मानचिन्ह देऊन विशेष कौतुक करण्यात आले. जलसंधारणाविषयी व पाणी बचतीविषयी मी अवंतिका ही चित्रफित आणि पारधी शाळेच्या कार्याची चित्रफित देखील यावेळी दाखविण्यात आली. यावेळी पारधी समाजातील शालेय विद्यार्थ्यांनी योगासने देखील सादर केली.

अनिरुद्ध देशपांडे म्हणाले, पारधी समाजातील मुलांचे आयुष्य बदलून त्यांना समाजाच्या मुख्य प्रवाहात आणण्याचा प्रयत्न फाऊंडेशन करीत आहे. केवळ शिक्षण नाही, तर कला, क्रीडा अशा विविध माध्यमातून त्यांना सक्षम करण्याचा आमचा प्रयत्न आहे. गरजू लोकांना अन्नदानसोबतच  विद्यादानासारखी पोटाची खळगी कायमस्वरूपी भरणारी मदत आम्ही करीत आहोत. पारधी समाज हा ब्रिटीशांच्या विरोधात लढणारा समाज अशी त्याकाळी ओळख असल्याने त्यांना सरकारी कागदपत्रांकरिता स्वातंत्र्यानंतरच्या काळात अनेक अडचणी आल्या. मात्र, त्या देखील दूर करुन आता उत्तम नागरिक घडविण्याच्या दिशेने वाटचाल सुरु झाली आहे. तर, महाराष्ट्रातील पाच हजार गरजू मुलींची जबाबदारी घेण्याकरिता पुढाकार घेणार आहे. पुढील ३ वर्षात समुदाय विकासाच्या दृष्टीने देखील उपक्रम राबविणार असल्याचे देशपांडे यांनी  सांगितले.

रुलर स्कॉलर स्किममधील प्रियांका मोहिते म्हणाली, उस्मानाबाद येथील खेड्यातून मी पुण्यात शिक्षणासाठी आले. इयत्ता १२ वी नंतर माझे लग्न करण्याचा घरच्यांचा विचार होता. मात्र, अ‍ॅमनोरा येस फाऊंडेशन माझे दुसरे पालक झाले आणि आज मी बीएमएस झाले आहे. फाऊंडेशनतर्फे मला सर्वोतोपरी आर्थिक सहाय्य मिळाल्याने ही वाटचाल मी करु शकले.

विवेक कुलकर्णी म्हणाले, पारधी समाजातील मुले ही अंध:कारात जगत होती. त्यांना शिक्षणाच्या प्रकाशाचे कोंदण अ‍ॅमेनोरा फाऊंडेशनने दिले आहे. यामध्ये फाऊंडेशनचे अध्यक्ष अनिरुद्ध देशपांडे यांच्या सर्व संकल्पना असून त्याद्वारे आजपर्यंत ४९६ आरोग्य शिबीरे, १६६ सामाजिक शिबीरे, ५३ शैक्षणिक शिबीरे, ५१ पर्यावरणविषयक शिबीरे विनामूल्य स्वरुपात भरविण्यात आली आहेत. यापुढेही असेच कार्य सुरु राहणार असल्याचे त्यांनी सांगितले.

अश्विनी लांबे म्हणाल्या,  अनिरुद्ध देशपांडे यांचे  अ‍ॅमनोरा येस फाऊंडेशन आमच्यासारख्या विद्यार्थ्यांना सक्षम करत केवळ मदत करत नाही तर  विद्यार्थी राष्ट्रीय गुंतवणूक म्हणून सिद्ध होतील, यासाठी ते कायम प्रयत्न करतात.

पुणे, दि. १६: समाज कल्याण विभागाकडून ६५ वर्ष वय व त्यावरील ज्येष्ठ नागरिकांचे शारीरिक, मानसिक स्वास्थ्य अबाधित राखण्यासाठी एकरकमी आर्थिक सहाय्य देण्याच्या ‘मुख्यमंत्री वयोश्री’ योजने’चा जिल्ह्यातील ज्येष्ठ नागरिकांनी लाभ घ्यावा असे आवाहन करण्यात आले आहे.

ज्येष्ठ नागरिकांना वयोमानपरत्वे येणाऱ्या दिव्यांगत्व, अशक्तपणा यावर उपाययोजना करण्यासाठी आवश्यक सहाय्य साधने, उपकरणे खरेदी करण्यासाठी व मनःस्वास्थ्य केंद्र, योगोपचार केंद्राद्वारे त्यांचे मानसिक स्वास्थ्य अबाधित ठेवण्यासाठी ही योजना राबविण्यात येत आहे. या योजनेच्या लाभासाठी लाभार्थ्याचे वार्षिक उत्पन्न २ लाखाच्या आत असणे आवश्यक आहे. यामध्ये पात्र लाभार्थ्याच्या आधार संलग्न वैयक्तिक बँक खात्यावर एकरकमी ३ हजार रूपये थेट लाभ वितरण (डीबीटी) प्रणालीद्वारे प्रदान करण्यात येईल.

लाभ वितरण झाल्यावर या योजनेअंतर्गत विहित केलेली उपकरणे खरेदी केल्याचे तसेच मन:स्वास्थ केंद्राद्वारे प्रशिक्षण घेतल्याचे लाभार्थ्यांचे देयक प्रमाणपत्र ३० दिवसांच्या आत सहायक आयुक्त समाजकल्याण पुणे यांचेकडून प्रमाणित करून संबंधीत केंद्रीय सामाजिक उपक्रम (सीपीएसयु) संस्थेमार्फत विकसित पोर्टलवर ३० दिवसांच्यात आत अपलोड करणे आवश्यक राहिल. अन्यथा लाभार्थ्याकडून सदर रक्कम वसूल करण्यात येईल.

अधिक माहितीसाठी पात्र अर्जदारांनी सहायक आयुक्त, समाजकल्याण कार्यालय, डॉ. बाबासाहेब आंबेडकर सामाजिक न्याय भवन स.नं.१०४/१०५, विश्रांतवाडी रोड, पोलिस स्टेशनसमोर, येरवडा पुणे- ०६ (दूरध्वनी क्रमांक ०२०-२९७०६६११ ईमेल-acswopune@gmail.com) वर सपंर्क साधण्याचे आवाहनही सहायक आयुक्त, समाजकल्याण विशाल लोंढे यांनी केले आहे.

बारामती, दि. १६:  उपमुख्यमंत्री तथा जिल्ह्याचे पालकमंत्री अजित पवार यांनी  बारामती परिसरातील विविध सार्वजनिक विकासकामांची पाहणी केली. कामे दर्जेदार पद्धतीची व गतीने पूर्ण करण्याचे निर्देश त्यांनी दिले.

श्री.पवार यांनी कन्हेरी वन विभाग, जळोची उपबाजार येथील कृषी उत्पन्न बाजार समिती, नटराज मंदिर परिसरातील सुरू असलेल्या सार्वजनिक विकासकामांची पाहणी केली.

यावेळी उपवनसंरक्षक महादेव मोहिते, अपर पोलीस अधीक्षक संजय जाधव , उप विभागीय अधिकारी वैभव नावडकर, महावितरणचे मुख्य अभियंता सुनील पावडे, सार्वजनिक बांधकाम विभागाचे अधीक्षक अभियंता बप्पा बहीर आदी उपस्थित होते.

नटराज मंदिर परिसरातील कॅनालच्या समांतर असलेले पदपथ स्वच्छ राहतील याची दक्षता घेतानाच सार्वजनिक कामांचे विद्रूपीकरण करणाऱ्यावर पोलिसांनी कार्यवाही करावी. परिसरात सीसीटीव्ही कॅमेरे बसवावेत अशा सूचना त्यांनी दिल्या. जळोची उपबाजार येथील कृषी उत्पन्न बाजार समिती कार्यालयाच्या नूतन इमारतीचे काम अंतिम आराखड्याप्रमाणे पूर्ण करावे. परिसरातील रस्त्याचा विचार करुन पुरेशा उंचीच्या संरक्षक भिंती उभाराव्यात.

कन्हेरी वनविभागात सरळ वाढणारी, सावली देणाऱ्या प्रजातींचे वृक्षारोपण करा आणि ती झाडे जगली पाहिजेत याकडे लक्ष द्यावे. लहान मुले व ज्येष्ठ नागरिकांना चढ-उतर करण्यासाठी सोयीस्कर पायऱ्या व बैठक व्यवस्था करावी. तलावातील पाणी व परिसर स्वच्छ राहील, याची दक्षता घ्यावी. कामे झाल्यानंतर ती नैसर्गिक वाटली पाहिजेत. या सर्व सार्वजनिक कामांसाठी अत्याधुनिक दर्जाच्या साहित्याचा वापर करावा, अशा सूचना उपमुख्यमंत्री श्री. पवार यांनी दिल्या.

यावेळी सार्वजनिक बांधकाम विभागाचे कार्यकारी अभियंता अनिल ढेपे, जलसंपदा विभागाचे कार्यकारी अभियंता दिगंबर डुबल, तहसीलदार गणेश शिंदे, मुख्याधिकारी महेश रोकडे, गट विकास अधिकारी अनिल बागल, वन परिक्षेत्र अधिकारी शुभांगी लोणकर, सहायक निबंधक मिलिंद टांकसाळे, पुणे जिल्हा मध्यवर्ती बँकेचे संचालक संभाजी होळकर, बारामती सहकारी बँकचे अध्यक्ष सचिन सातव, बारामती कृषी उत्पन्न बाजार समितीचे सभापती सुनील पवार, नगर परिषदेचे माजी उपनगराध्यक्ष जय पाटील, बाळासाहेब जाधव आदी उपस्थित होते.

नवले पुलावर अपघातांचे सत्र सुरूच–19 ब्लॅकस्पॉट निश्चित–मृत पावणाऱ्यांमध्ये 67% दुचाकी स्वारांचा समावेश

पुणे-भरधाव वेगात येणाऱ्या डंपरने ट्रॅव्हल्सला धडक दिल्याने भीषण अपघात झाला आहे. यामध्ये डंपरचालकासह बसमधील ६ प्रवाशी जखमी झाले आहेत. मुंबई – बंगळुरू महामार्गावरील नवले पुलाजवळ हा अपघात झाला. शुक्रवारी पहाटे 6 ते 7 च्या दरम्यान हा अपघात झाला आहे.

नवले पुलाजवळ व्हीआरएल ट्रॅव्हल्स कंपनीचे ऑफिस आहे. इथून सकाळी सात वाजण्याच्या सुमारास प्रवाशांना घेऊन ट्रॅव्हल्स बाहेर पडत असताना मुंबईच्या दिशेकडून भरधाव वेगाने आलेल्या डंपरने ट्रॅव्हल्सला पाठीमागून जोराची धडक दिली. या भीषण अपघात डंपर चालकासह बसमधील 6 प्रवाशी असे एकूण 7 जण जखमी झाले आहेत.

दरम्यान, घटनेची माहिती मिळताच सिंहगड रस्ता वाहतूक विभागाचे अंमलदार यांनी तत्काळ घटनास्थळी पोहचून जखमींना जवळच्या रुग्णालयात उपचारासाठी दाखल केले आहे. या अपघातात ट्रॅव्हल्सचे तसेच डंपरचे प्रचंड नुकसान झाले आहे. तसेच अपघातानंतर काही वेळ वाहतूक कोंडी झाली होती. या पुलावर विचित्र स्लोप असल्यामुळे वाहनांवरील नियंत्रण सुटून अपघात होत असल्याचे बोलले जात आहे.

पुण्यातील नवले पुलावर अपघातांच्या घटना सातत्याने घडत असतात. या पुलावर आतापर्यंत अनेक जीवघेणे अपघात झाले असून त्यामध्ये अनेकांना आपला जीव गमवावा लागला आहे. या पुलावर वारंवार घडणाऱ्या अपघातांच्या मालिकेमुळे राष्ट्रीय महामार्ग प्राधिकरणाच्या विरोधात नागरिक संतप्त झालेले पाहायला मिळत आहेत. याबाबत राष्ट्रीय महामार्ग प्राधिकरणाच्या वतीने ठोस उपाययोजना करण्याची मागणी स्थानिकांकडून होते आहे.

शहरातील 19 अपघात प्रवण ठिकाणी (ब्लॅकस्पॉट) निश्चित केली आहेत. या ठिकाणी अपघात रोखण्यासाठी वाहतूक विषयक सुधारणा करण्यासंबंधी वाहतूक पोलिसांनी महापालिका सार्वजनिक बांधकाम विभाग आणि राष्ट्रीय महामार्ग प्राधिकरणाच्या अधिकाऱ्यांना पत्रव्यवहार केला असून त्यानुसार काही सुधारणा देखील करण्यात आल्या आहेत. केंद्रीय रस्ते वाहतूक व महामार्ग मंत्रालयाने नुकत्याच जाहीर केलेल्या आकडेवारीवरून रस्ते अपघातात मृत पावणाऱ्यांमध्ये 67% दुचाकी स्वारांचा समावेश असल्याचे स्पष्ट झाले आहे.

पुणे – महाराष्ट्र राज्याचे मुख्यमंत्री एकनाथ शिंदे यांच्या वाढदिवसानिमित्त येत्या १6 फेब्रुवारी ते १८ फेब्रुवारी २०२४ रोजी पुण्यात भव्य सेना केसरी राज्यस्तरीय कुस्तीचे सामने आयोजित करण्यात आले आहेत. चार दिवसीय पार पडत असलेल्या या सामन्यात, राज्यभरातून अनेक मल्ल भाग घेणार असून, मल्लांचा यथोचित सन्मान करण्यासाठी व रांगड्या मातीतील खेळाला चालना देण्यासाठी हे सामने आयोजित करण्यात आले आहेत. तब्बल 550 मल्ल यात सहभागी होणार आहेत.

शिवसेना शहरप्रमुख प्रमोद नाना भानगिरे यांच्या संकल्पनेतून, आयोजित करण्यात आलेल्या चार दिवसीय भव्य सेना केसरी राज्यस्तरीय कुस्ती स्पर्धा २०२४ ही स्पर्धा हिंदुहृदयसम्राट स्व. बाळासाहेब ठाकरे फुटबॉल मैदान, जे. एस. पी. एम. कॉलेज शेजारी, हांडेवाडी,हडपसर पुणे येथे पार पडणार आहेत.

विशेष म्हणजे वियजी मल्लांसाठी ठेवण्यात आलेली, बक्षीसे हे आकर्षणाचा विषय ठरत आहेत. यामध्ये प्रथम क्रमांक आलेल्या मल्लास रोख रक्कम ५ लक्ष रुपये , चांदीची गदा व बुलेट मिळणार आहे. तर द्वितीय क्रमांकास ३ लक्ष व सन्मान चिन्ह, तृतीय क्रमांकास २ लक्ष व सन्मान चिन्ह व चतुर्थ क्रमांकास १ लक्ष व सन्मान चिन्ह अशा स्वरूपाची बक्षिसे मिळणार आहेत.

दरम्यान, भव्य सेना केसरी राज्यस्तरीय कुस्ती स्पर्धा २०२४ ही स्पर्धा महाराष्ट्र राज्य कुस्तीगीर परिषदेच्या मान्यतेने व त्यांच्या नियमानुसार होणार असून, या स्पर्धेस महाराष्ट्र राज्य कुस्तीगीर परिषदेचे मोठे मार्गदर्शन लाभणार आहे.यास्पर्धेचे उदघाटन खासदार डॉ श्रीकांत शिंदे, प्रसिद्ध उद्योगपती पुनीत बालन,शिवसेना प्रवक्ते नरेश म्हस्के,यांच्या हस्ते होणार आहे. यावेळी ट्रीपल महाराष्ट्र केसरी विजय चौधरी, महाराष्ट्र केसरी/हिंद केसरी अभिजित कटके, मनपा अतिरिक्त आयुक्त विकास ढाकणे हे उपस्थित राहणार आहेत. तसेच या स्पर्धेचे बक्षीस वितरण महाराष्ट्र राज्याचे मुख्यमंत्री एकनाथ शिंदे यांच्या हस्ते होणार आहे.

वाहतूक उपायुक्तांशी चर्चा-संयोजक, माजी आमदार मोहन जोशी

पुणे – विविध चौकांमध्ये होणाऱ्या ट्रॅफिक जॅम च्या समस्या जाणून घेऊन त्या सोडविण्यासाठी ‘वेकअप पुणेकर’ मार्फत पाठपुरावा चालू असून वाहतूक शाखेचे पोलीस उपायुक्त शशिकांत बोराटे यांच्याशी चर्चा करण्यात आली, अशी माहिती ‘वेकअप पुणेकर’ चे संयोजक, माजी आमदार मोहन जोशी यांनी आज (गुरुवारी) दिली.

कोरेगाव पार्क येथील साधू वासवानी पुलाच्या पाडकामाआधी करण्यात आलेल्या प्रायोगिक वाहतूक बदलामुळे निर्माण झालेल्या समस्या नागरिकांनी ‘वेकअप पुणेकर’ च्या निदर्शनास आणून दिल्या. मंगलदास रोड वाहतुकीसाठी एकेरी न ठेवता पूर्वीसारखीच दुतर्फा वाहतूक चालू ठेवावी, मोबोज हॉटेल चौकातील बॅरिकेड्स ताबडतोब काढण्यात यावेत, त्या चौकातील रसत्यांवर तीन ते चार ट्रॅफिक वॉर्डन दिवसभरासाठी तैनात व्हावेत, अशा उपाययोजना नागरिकांनी ‘वेकअप पुणेकर’ला सुचविल्या होत्या. पोलीस उपायुक्तांकडे त्या सूचनांचे निवेदन देऊन सविस्तर चर्चा केली, असे मोहन जोशी यांनी सांगितले.

दहावी, बारावी आणि इतर वार्षिक परीक्षेनंतर पुलाचे पाडकाम करावे, अशीही सूचना नागरिकांकडून आली होती, ती ही उपायुक्तांकडे दिल्याचे मोहन जोशी यांनी सांगितले.

ट्रॅफिक समस्येवर नागरिका़ंकडून ‘वेकअप पुणेकर’ मार्फत उत्तर शोधण्याचा प्रयत्न केला जात आहे. त्यासाठी स्वयंसेवी संघटना, जागरूक नागरिक, सामाजिक कार्यकर्ते, तज्ज्ञ यांना ‘वेकअप पुणेकर’ने एकत्रित आणले आहे. ट्रॅफिक प्रश्नातून पुणेकरांची लवकरात लवकर सुटका व्हावी, असा प्रयत्न असल्याचे मोहन जोशी यांनी सांगितले.

वाहतूक उपायुक्तांसमवेत झालेल्या बैठकीत धैर्यशील वंदेकर, वीरेंद्र किराड, प्रथमेश आबनावे, प्रशांत सुरसे, संकेत गलांडे, किशोर मारणे, प्रा.यशराज पारखी, सचिन भोसले, पल्लवी सुरसे, विश्वजीत जाधव आणि अधिकारी वर्ग सहभागी झाला होता.