पुणे, दि. १७: मतदान टक्केवारीत वाढ होण्यासाठी सर्व पात्र नाव युवांची १०० टक्के मतदार नोंदणी करावी, असे आवाहन जिल्हाधिकारी डॉ. सुहास दिवसे यांनी पत्राद्वारे सावित्रीबाई फुले पुणे विद्यापीठाचे कुलगुरू तसेच सर्व महाविद्यालयांना केले आहे.

मतदार यादी हा लोकशाहीचा पाया असून तो सशक्त करण्यासाठी तसेच त्याची गुणवत्ता राखत मतदानाची टक्केवारी वाढविण्यासाठी भारत निवडणूक आयोगाच्यावतीने विविध कार्यक्रमाचे आयोजन करण्यात येत आहे. याचाच एक म्हणून जिल्ह्यातील सर्व महाविद्यालयामध्ये १०० टक्के मतदार नोंदणी करुन सर्वकष मतदार नोंदणी करुन मतदान प्रक्रियेतील नवयुवकांचा सहभाग वाढविण्याचा प्रयत्न करण्यात येत आहे.

यासाठी सर्व पात्र विद्यार्थ्यांकडून आवश्यकतेप्रमाणे नवमतदार नोंदणीसाठी नमुना क्र. ६, नाव वागलणीसाठी नमुना क्र. ७ आणि मतदार यादीतील, मतदार कार्डवरील तपशील, नाव यात बदल, सुधारणा करण्यासाठी नमुना क्र. ८, ८-अ भरून घ्यावेत. आपले राष्ट्रीय कर्तव्य समजून या प्रक्रियेत विद्यार्थ्यांचा सक्रीय सहभाग वाढवत मतदार नोंदणी करावी, असे आवाहन या पत्रात करण्यात आले आहे.

मतदान प्रक्रियेत युवकांचा सहभाग वाढविण्यासाठी विशेष मोहीम राबविण्याचे आवाहनही सर्व मतदार नोंदणी अधिकारी आणि सह मतदार नोंदणी अधिकारी, जिल्हा परिषदेच्या माध्यमिक शिक्षणाधिकारी,  पुणे आणि पिंपरी चिंचवड महानगरपालिका शिक्षणाधिकारी, ९५ बिग एफ एम रेडिओ चॅनलच्या कार्यक्रम प्रमुख यांना पत्राद्वारे करण्यात आले आहे.

‘एमएसएमई’ मंत्रालय व एआयसी पिनॅकल यांच्या वतीने राष्ट्रीय बौद्धिक संपदा यात्रा
पुणे : “भारत हा प्रतिभावान व बुद्धीवानांचा देश आहे. भारतीयांमध्ये नवकल्पना व सर्जनशीलता उपजत आहे. मात्र, या बौद्धिक संपदेचे (इंटेलेक्च्युअल प्रॉपर्टी-आयपी) अधिकार संरक्षित होत नाहीत. देशाच्या विकासासाठी बौद्धिक संपदेचे संरक्षण गरजेचे आहे. त्यासाठी केंद्र सरकारच्या ‘एमएसएमई’ मंत्रालयाकडून आयपी, पेटंट, कॉपीराईट नोंदणीसाठी प्रोत्साहन दिले जात आहे,” असे केंद्र सरकारच्या सूक्ष्म, लघु व मध्यम उद्योग मंत्रालयाच्या उप महासंचालक अनुजा बापट यांनी नमूद केले. केंद्र सरकारच्या सूक्ष्म, लघु व मध्यम उद्योग मंत्रालय आणि एआयसी पिनॅकल आंत्रप्रेन्युअरशीप फोरम यांच्या संयुक्त विद्यमाने राष्ट्रीय बौद्धिक संपदा (इंटेलेक्च्युअल प्रॉपर्टी – आयपी राईट्स) यात्रेच्या उद्घाटनावेळी अनुजा बापट बोलत होत्या. पुण्यातील सेनापती बापट रस्त्यावरील मराठा चेंबर ऑफ कॉमर्स अँड इंडस्ट्रीजच्या (एमसीसीआयए) सभागृहात झालेल्या कार्यक्रमावेळी एआयसी पिनॅकल आंत्रप्रेन्युअरशीप फोरमचे अध्यक्ष डॉ. सुधीर मेहता, ‘एमएसएमई’चे (तंत्र व प्रकल्प) संचालक विनम्र मिश्रा, निवृत्त वरिष्ठ पेटंट सहनियंत्रक डॉ. के. एस. कर्दम, एआयसी पिनॅकल’चे मुख्य कार्यकारी अधिकारी सुनील धाडीवाल आदी उपस्थित होते.
या यात्रेमध्ये ‘वैश्विक दृष्टीकोनातून बौद्धिक संपदा’वर डॉ. नितीन तिवारी, ‘प्रोटेक्टिंग युअर ब्रँड’वर श्रीधर परुंडेकर, ‘इंटरनॅशनल प्रॅक्टिसेस ऑन आयपीआर’वर के. एस. कर्दम, डॉ. सुधा कन्नन, डॉ. बी. पी. सोमह, वेदांत पुजारी, डॉ. मोहन दिवाण, परवेज कुड्रोली, ‘आयपीआरचा व्यवसाय वृद्धीवर होणारा परिणाम’वर अजित राऊळ, ‘व्यवसायवाढ आणि स्पर्धात्मकतेसाठीची बौद्धिक संपदा, खोट्या जाहिराती, उल्लंघनाच्या समस्या आणि आव्हाने’वर डॉ. नितीन तिवारी, श्रीधर परुंडेकर, शैलेंद्र भंडारे, ऍड. ऋतुजा मेहेंदळे फडके, तर ‘एआयसी-पिनॅकल आयपी फॅसिलिटेशन सेंटर व बौद्धिक संपदा नोंदीची प्रक्रिया’वर ऍड. पूनम नहार यांनी मार्गदर्शन केले. एमएसएमई मंत्रालयातील वरिष्ठ अधिकारी, आयपी प्रॅक्टिस करणारे वरिष्ठ व्यासायिक, विधिज्ञ, यशस्वी स्टार्टअप्स, उद्योग क्षेत्रातील लोक सहभागी झाले होते.
अनुजा बापट म्हणाल्या, “औद्योगिक व आर्थिक विकासात ‘एमएसएमई’चे योगदान मोठे आहे. इनोव्हेशन व संशोधनाची जोड मिळाल्याने हे छोटे उद्योग क्रांतिकारक कामगिरी करत आहेत. यांच्या इनोव्हेशन व संशोधनाचे अधिकार संरक्षित करण्यासाठी, तसेच आयपी, पेटंट, कॉपीराईट नोंदणीला प्रोत्साहन देण्यासाठी मंत्रालयामार्फत अनेक योजना आणल्या जात आहेत. जनजागृतीसाठी आयपी यात्रेचे आयोजन केले जात आहे.”
डॉ. सुधीर मेहता म्हणाले, “बुद्धिवंतांचे शहर असलेल्या पुण्यात मोठ्या प्रमाणात इनोव्हेशन होत आहे. याचे संरक्षण करण्यासाठी या बौद्धिक संपदेची नोंद होणे गरजेचे आहे. बौद्धिक संपदेच्या हक्कांबाबत जागृती, सर्जनशील उपक्रमांना प्रोत्साहन, कल्पना आणि इनोव्हेशनचे संरक्षण, प्रगत तंत्रज्ञान अंतर्भूत करून एमएसएमई सक्षम होण्यास यामुळे मदत होईल.”
विनम्र मिश्रा म्हणाले, “बौद्धिक संपदेची नोंदणी करण्याची मानसिकता वाढली आहे. स्टार्टअप्सना देखील एमएसएमईकडे आपले हक्क नोंदवता येणार आहेत. देशातील २० वेगवेगळ्या शहरांतून ही आयपी यात्रा आयोजित करून बौद्धिक संपदेच्या हक्कांबाबत जागृती केली जात आहे. आयपी नोंदणीसाठी ८० पेक्षा अधिक सुविधा केंद्रे उपलब्ध करून देण्यात आली आहेत.”
डॉ. के. एस. कर्दम म्हणाले, “काही वर्षांपूर्वी पेटंटबद्दल भारतीयांमध्ये अनभिज्ञता होती. जपान, अमेरिका, चीन यांसारखे देश बौद्धिक संपदेच्या संरक्षित हक्कांच्या जोरावर विकसित झाले आहेत. आपल्याकडे अलीकडच्या याबाबत जागरूकता निर्माण होत असून, अनेक छोटे-मोठे व्यवसाय आयपी व पेटंट नोंद करत आहेत.”
 सुनील धाडीवाल यांनी स्वागत प्रास्ताविक केले. श्रद्धा सप्तर्षी यांनी सूत्रसंचालन केले.

पुढारीच्या पत्रकाराला पोलिसांनी केलेय धक्काबुक्कीबाबत कारवाई झालेली आहे,हवे तर पुन्हा रिव्हिजन घेऊ

mymarathi.netपुणे- निखील वागळे यांनी पोलिसांच्या सूचना ऐकल्या नाहीत म्हणून त्यांच्यावर हल्ला झाला पण तिथेही पोलीस त्यांच्या संरक्षणासाठी होतेच त्यामुळे परिस्थिती नियंत्रणात राहिली ,पण याचा अर्थ हल्लेखोरांना निखील वागळे यांचा खून करायचा होता किंवा त्यांच्या खुनाचा प्रयत्न झाला असे म्हणता येणार नाही असा स्पष्ट दावा पुण्याचे पोलीस आयुक्त अमितेश कुमार यांनी केला आहे.याबरोबरच उपमुख्यमंत्री अजित पवार यांच्या प्रमुख उपस्थितीत शिवाजीनगर येथे आयोजित पाण्याच्या टाकीच्या कार्यक्रमात पुढारी च्या वार्ताहराला पोलिसांनी केलेल्या धक्काबुक्की संदर्भात योग्य कार्यवाही झालेली आहे हवे असल्यास आपण पुन्हा त्याबाबत पुनर्परीक्ष्ण करू असे ते म्हणाले.

पुणे-

गुंड शरद मोहोळ यांच्या पत्नी स्वाती मोहोळ यांना धमकी देणाऱ्या  तसेच ससुन हॉस्पिटल येथून पळून जाणाऱ्या मार्शल लुईस लीलाकर याला आज अटक करण्यात आली. त्याला येरवडा येथून त्याच्या मावशीच्या घरातून अटक करण्यात आली, ही कामगिरी सायबर पोलीस स्टेशनने केली. 

लुईस याला स्वाती मोहोळ यांना धमकी दिल्याप्रकरणी अटक करण्यात आली होती. 11 फेब्रुवारी रोजी तो उपचारादरम्यान ससुन हॉस्पिटल येथून पळून गेला. क्राईम ब्रँच तसेच सायबर पोलीस स्टेशन कडून शोध चालू होता. आरोपीच्या तपासासाठी नेरळ व कर्जत येथे तपास पथके रवाना करण्यात आली होती.आज तो मावशीला भेटायला आला असता तेथे अगोदरच तैनात असलेल्या सायबर पोलीस स्टेशनच्या स्टाफने त्यास ताब्यात घेतले. त्याच्यावर बंडगार्डन पोलीस स्टेशनमध्ये रजिस्टर नंबर 44 /2024 कलम 224 भादवि प्रमाणे गुन्हा नोंद करण्यात आला होता. सायबर पोलिसानी त्याला बंडगार्डन पोलीसांच्या ताब्यात दिले आहे.

पुणे-पुण्यात तीन वाहनांचा भीषण अपघात झाला आहे. यामध्ये तिघांचा मृत्यू झाला. तर एक जण गंभीर जखमी झाला आहे. पुणे नाशिक राष्ट्रीय महामार्गावर शनिवारी पहाटे हा विचित्र अपघात झाला आहे. मृत्यू झालेले तिघे जण खेड तालुक्यातील राक्षेवाडी येथील असल्याची माहिती आहे.

पुणे – नाशिक महामार्गावर पुण्याकडे जाणाऱ्या मार्गावर एक कंटेनर बंद पडला होता. रस्त्याच्या कडेला कंटेनर उभा होता. या मार्गावर सकाळी टेम्पो आणि स्विफ्ट कारमध्ये आधी जोरदार धडक झाली. त्यानंतर टेम्पो पुढे रस्त्याच्या कडेला उभ्या असलेल्या कंटेनरवर धडकला. तर धडक होताच स्विफ्ट कारने पेट घेतला. या आगीत कारमधील तिघांचा होरपळून मृत्यू झाला. सुदैवाने कारचा चालक आणि टेम्पोचा चालक अपघातातून थोडक्यात बचावले.

अपघातात एक जण गंभीर जखमी झाला आहे. त्याला जवळच्या रुग्णालयात उपचारासाठी दाखल केले आहे. कार‌ चालकाचे गाडीवरील नियंत्रण सुटल्यामुळे हा अपघात झाल्याची शक्यता वर्तवली जात आहे. या अपघातात मृत्यू झालेल्यांची नावे अजून मिळाली नाही. या प्रकरणी मंचर पोलिस ठाण्यात गुन्हा दाखल करण्यात आला आहे. आता पुढील तपास मंचर पोलीस करत आहेत.दरम्यान, पहाटे झालेल्या या अपघातानंतर महामार्गावर काही काळ वाहतूक कोंडी झाली होती. मंचरमधील वाहतूक शाखेच्या पोलिसांनी घटनास्थळी धाव घेतली. त्यांनी रस्त्यावर असलेली अपघातग्रस्त वाहने क्रेनच्या मदतीने बाजूला केली. त्यानंतर पुणे-नाशिक मार्गावरील वाहतूक सुरळीत सुरू झाली. या अपघातात तिन्ही वाहनांचे मोठे नुकसान झाले आहे. स्विफ्ट कार तर संपूर्णपणे जळून खाक झाली आहे.

पुणे-8 मार्च 2022 रोजी मुंबई- नाशिक महामार्गावर भिवंडी जवळ दिवे गावात एक कार अडवून सदर कारचालकास तीन जणांनी पोलिस असल्याचे सांगितले. त्यानंतर संबंधीत गाडीतील हवालाचे ४५ लाख रुपये घेऊन सदर कर्मचारी पसार झाल्याचा प्रकार घडला होता. याप्रकरणाच्या चौकशीत पोलिस शिपाई गणेश मारुती कांबळे, दिलीप मारुती पिलाणे व गणेश बाळासाहेब शिंदे हे तिघे दोषी आढळल्याने त्यांच्यावर अपर पोलिस आयुक्त प्रवीणकुमार पाटील यांनी पोलिस दलाच्या सेवेतून बडतर्फीची कारवाई केली आहे.

याप्रकरणी पोलिस शिपाई गणेश कांबळे, दिलीप पिलाणे व गणेश शिंदे या तीघांवर नारपोली पोलिस ​ठाण्यात गुन्हा दाखल करण्यात आलेला आहे. या घटनेनंतर तिघांना पोलिस पदावरुन निलंबित करण्यात आले होते. त्यांची विभागीय चौकशी सुरु असताना, त्यात संबधित तिघे हे दोषी आढळल्याने त्यांच्यावर बडतर्फ कारवाईचा बडगा उचलण्यात आला आहे. पुण्यातील दत्तवाडी पोलिस ठाण्यात ते नेमणुकीस असताना, 8 मार्च २०२२ रोजी ते साप्ताहिक सुट्टीच्या दिवशी दिलीप पिलाणे याच्या बहिणीचा घरी धार्मिक कार्यक्रम असल्याचे कारण सांगून पुण्यातून दिवे येथे ते बाबुभाई सोळंकी यांच्यासह गेले होते. प्रवासा दरम्यान बाबुबाई सोळंकी यांना त्यांचे भावाचा फोन आला होता.

त्याद्वारे गणेश कांबळे याला समजले कि , बाबुभाई सोळंकी यांच्याकडून हवालाचे पैसे हे औरंगाबादहून नाशिक मार्ग ठाणे येथे जाणार आहे.ड त्यानुसार, त्याने दिलीप पिलाणे व गणेश शिंदे यांच्यासोबत संगनमत करुन भिवंडी जवळील दिवे गावात रामलाल परमार याची हवालाचे पैसे घेऊन जाणारी गाडी अडवली. पोलिस असल्याचे सांगून गाडीची झडती घेण्याचे नावाखाली त्यांनी कारवाई करण्याची धमकी देत गाडीतील ४५ लाख रुपये घेऊन तेथून पसार झाले. त्यानंतर याबाबत नारपोली पोलिस ठाण्यात गुन्हा दाखल झाला.

विभागीय चौकशीत गणेश शिंदे याने प्रशिक्षिण काळात साप्ताहिक सुट्टी मिळाली नाही त्यामुळे साप्ताहिक सुट्टी घेतो असे खोटे कारण सांगून सुट्टीत घेत दीवे येथे जाऊन हा गुन्हा साथीदारांचे मदतीने केला. गणेश कांबळे याने तो आजारी नसताना देखील तो आजारी असल्याचे सांगून पोलिस निरीक्षकांची दिशाभूल करुन सुट्टीचा पास मिळवला. तर दिलीप पिलाणे याने पर्यायी साप्ताहिक सुट्टी घेऊन भिवंडीला जात हा गुन्हा केल्याचे निष्पन्न झाले आहे. याप्रकारामुळे समजात पोलिसांची प्रतिमा मलीन झाल्याने त्यांना सेवेतून बडतर्फ करण्यात आले आहे. याप्रकरणात आणखी काही वरिष्ठ पोलिस अधिकारी सहभागी असल्याची पोलिस दलात चर्चा असून त्यांचेवर कारवाई होणार का? असा प्रश्न उपस्थित केला जात आहे.

पुणे-पुणे, शिवाजीनगर, पिंपरी चिंचवड रेल्वे स्टेशन, बांद्रा आणि गेटवे ऑफ इंडीया बॉम्बने उडवुन देण्याची धमकी देणाऱ्या हडपसरच्या इलेक्ट्रिशिअन ला 12 तासातच पुणे पोलिसांनी पकडले. प्रविण पंडीत येशी वय ३५ वर्षे व्यवसाय इलेक्ट्रीशन रा. गंगोत्री कॉम्पलेक्स, महादेवनगर, मांजरी रोड, हडपसर असे या आरोपीचे नाव असून त्याला न्यायालयाने पोलीस कोठडी सुनावली आहे. १६ फेब्रुवारी २४ रोजी दुपारी पावणेदोन वाजता पोलिसांना फोन करून त्याने ,आपण आज सायंकाळी ५ वाजता पुणे रेल्वे स्टेशन, शिवाजीनगर, पिंपरी चिंचवड रेल्वे स्टेशन, बांद्रा आणि गेटवे ऑफ इंडीया बॉम्बने उडवून देणार असल्याची धमकी दिली होती.

या संदर्भात पोलिसांनी दिलेली माहिती अशी कि,’ दिनांक १६/०२/२०२४ रोजी १३/४४ वा. डायल ११२ नंबरवर अनोळखी इसमाने त्याचे मोबाईल नंबर वरुन फोन करुन सायंकाळी १७/०० वा. पुणे रेल्वे स्टेशन, शिवाजीनगर, पिंपरी चिंचवड रेल्वे स्टेशन, बांद्रा आणि गेटवे ऑफ इंडीया बॉम्बने उडवून देण्याची धमकी देऊन सरकारी यंत्रणेला वेठीस धरले म्हणुन पोलीस नियंत्रण कक्ष, पुणे शहर येथील महिला पोलीस अंमलदार कल्पना घरजाळे यांनी बंडगार्डन पोलीस स्टेशन येथे तक्रार दिल्यावरुन बंडगार्डन पोलीस स्टेशन येथे गु.र.नं.५१/२०२४ भा.द.वि.कलम १८२ (ब). ५०६(२),५०५ (ब),५०७ प्रमाणे गुन्हा दाखल करुन सदर गुन्ह्याचा तपास पोलीस उप-निरीक्षक लोहार यांचेकडे देण्यात आला.
यातील आरोपीचे कॉलवरुन तात्काळ दखल घेऊन बंडगार्डन पोलीस स्टेशनकडुन बांद्रा आणि गेटवे ऑफ इंडीया मुंबई व पिंपरी चिंचवड रेल्वे स्टेशन, यांचा समावेश असल्याने तेथील पोलिस आयुक्तालय यांना तात्काळ कळवुन बी.डी.डी. एस. पथकाकडून पुणे रेल्वे स्टेशन व शिवाजीनगर परीसराची तपासणी करण्यात आली परंतु संशयीत काही एक मिळुन आले नाही. तसेच यातील आरोपीचा शोध घेणेसाठी तात्काळ २ पथके तयार करुन त्यांनी यातील आरोपीचे मोबाईल नंबर वरुन सदर आरोपीचा हडपसर पोलीस स्टेशनचे स्टाफचे मदतीने शोध घेतला असता आरोपी प्रविण पंडीत येशी वय ३५ वर्षे व्यवसाय इलेक्ट्रीशन रा. गंगोत्री कॉम्पलेक्स, महादेवनगर, मांजरी रोड, हडपसर, पुणे याला दिनांक १७/०२/२०२४ रोजी ००/३० वा. अटक करण्यात आलेली आहे. त्याचेकडे प्रथमदर्शनी केलेले तपासामध्ये त्याने सदरचे केलेले कृत्य हे कौटुंबीक कलहातुन आलेल्या नैराश्यामधुन केल्याचे सांगीतले आहे. या आरोपीला न्यायालयामध्ये हजर करुन त्याची पोलीस कस्टडी रिमांड घेऊन आणखी सखोल तपास बंडगार्डन पोलीस करीत आहेत.
सदरची कारवाई ही पोलीस आयुक्त अमितेश कुमार, पोलीस सह आयुक्त प्रविण पवार, अप्पर पोलीस आयुक्त, पश्चिम प्रादेशिक विभाग पुणे, प्रविणकुमार पाटील,पोलीस उप आयुक्त परिमंडळ २, स्मार्तना पाटील, सहा. पोलीस आयुक्त, लष्कर विभाग पुणे शहर संजय सुर्वे, बंडगार्डन पोलीस स्टेशनचे व.पो.नि संदिपान पवार यांचे मार्गदर्शनाखाली पोलीस उपनिरीक्षक स्वप्नील लोहार, पो. अंमलदार घडे, पुराणे व म.पो.अं. रोमण यांचे पथकाने केली.

पुणे, दि. १६: जुन्नर वन विभागातील घोडेगाव वनपरिक्षेत्रातील वनपरिमंडळ घोडेगाव नियतक्षेत्र घोडेगाव येथे मंगळवारी (दि. १३) खवले मांजर (इंडियन पँगोलीन) या शेड्युल १ मधील वन्यप्राण्याची तस्करी केल्या प्रकरणात ७ आरोपींना ताब्यात घेण्यात आले असून त्यापैकी ६ आरोपींना १७ फेब्रुवारीपर्यंत वनकोठडी सुनावण्यात आली आहे.

या गुन्ह्याच्या तपासादरम्यान रोहीदास पंढरीनाथ कुळेकर वय ५५ वर्ष, कांताराम सखाराम वाजे वय ४९ वर्ष दोघे रा. भोमाळे (ता. खेड), सखाराम बबन मराडे वय ४३ वर्ष, रा. पाभे (ता. खेड), सागर पुनाजी मेमाणे वय ३१ वर्ष, रा. तळेराण (ता. जुन्नर), जालिंदर कान्डु कशाळे वय ६५ वर्ष, रा. बडेश्वर (ता. मावळ), श्रीमती गीता नंदकुमार जगदाळे रा. चव्हाणवस्ती कुमठे (ता. कोरेगाव जि. सातारा), शांताराम सोमनाथ कुडेकर वय ३२ वर्ष, रा. करंजाळे (ता. जुन्नर) असे एकूण ७ आरोपींना ताब्यात घेण्यात आले. त्यापैकी ६ आरोपीना अटक करुन प्रथम वर्ग न्यायदंडाधिकारी घोडेगाव यांच्यासमोर हजर केले असता त्यांना १७ फेब्रुवारीपर्यंत वनकोठडी देण्यात आली आहे.

ही कार्यवाही पुणे वनविभागाचे मुख्य वनसंरक्षक एन. आर. प्रविण, जुन्नर वनविभागाचे उप वनसंरक्षक अमोल सातपुते यांच्या मार्गदर्शनाखाली तपास अधिकारी तथा तथा सहाय्यक वनसंरक्षक जुन्नर संदेश पाटील, घोडेगाव आणि खेड वनपरिक्षेत्र अधिकारी व वनकर्मचाऱ्यांच्या सहकार्याने यशस्वी करण्यात आली.

वन व वन्यजीव तस्करी, अतिक्रमण, अवैद्य वृक्षतोड संबंधित गैरप्रकार निदर्शनास आल्यास नागरिकांनी तात्काळ वनविभागाचा टोल फ्री नंबर १९२६ या क्रमांकावर संर्पक साधून माहिती देऊन सहकार्य करावे, असे आवाहन सहायक वनसंरक्षक श्री. पाटील यांनी केले आहे.

पुणे, दि. १६ : भोसरी विधानसभा मतदार संघ आणि समाज कल्याण विभागाच्यावतीने श्रमिक नगर, तळवडे येथे तृतीयपंथी वर्गासाठी विशेष मतदार नोंदणी मोहिमेचे आयोजन करण्यात आले. मोहिमेअंतर्गत १८ नवमतदारांकडून नमुना क्र.६ चे अर्ज भरून घेण्यात आले.

नायब तहसिलदार अर्पणा देशपांडे यांनी नमुना क्रमांक ६, ७, व ८ चे अर्ज भरणे आणि त्यासोबत जोडण्यात येणाऱ्या कागदपत्राविषयी माहिती दिली. तसेच मुक्त व निर्भयपणे मतदान करण्याचे आवाहन त्यांनी केले. तृतीयपंथी मतदारांना ईव्हीएम यंत्राबाबत माहिती व्हावी यासाठी मतदानयंत्र हाताळणीबाबत प्रात्याक्षिक दाखविण्यात आले.

मोहिमेअंतर्गत एकूण ७३ नागरिकांनी मतदान प्रात्याक्षिकात सहभाग घेतला. १८ नागरिकांचे नमुना क्रमांक ६ व २ मतदारांचे नमुना क्रमांक ८ चे अर्ज भरून घेण्यात आले.यावेळी दिलीप करदुरे, सिओना साळवे आदी उपस्थित होते.

अर्चना तांबे, स्वीप नोडल अधिकारी- मतदार जागृतीसाठी विविध स्तरावर जनजागृती मोहिम आयोजित करण्यात येत आहे. अधिकाधिक तृतीयपंथीयांनी मतदारांनी मतदान नोंदणी करून मतदान प्रक्रियेत सहभाग घ्यावा तसेच ईव्हीएम हाताळण्याविषयी प्रात्याक्षिकात सहभाग घ्यावा.