उद्यानाचे सुशोभीकरण, स्वतंत्र देखभाल यंत्रणा उभारण्याची माजी नगरसेविका प्रिती सातम यांची मुंबई उपनगरचे पालकमंत्री ॲड. मंगलप्रभात लोढा यांच्याकडे मागणी

मुंबई
आरे कॉलनीतील स्वांतत्र्यवीर सावरकर उद्यानाची दिवसेंदिवस दुरवस्था होत आहे. सद्यस्थितीत हे उद्यान प्रेमी युगुल आणि मद्यपींचा अड्डा बनला आहे. दिवसरात्र अनेक तळीराम येथ तळ ठोकून असतात. त्यामुळे नागरिकांना अडचणींचा सामना करावा लागतो आहे. याबाबत कारवाई करावी तसेच उद्यानाचे सुशोभिकरण करून त्याची देखभाल करण्यासाठी स्वतंत्र व्यवस्था उभारावी अशी मागणी मुंबई उपनगरचे पालकमंत्री ॲड. मंगलप्रभात लोढा यांच्याकडे गोरेगाव पूर्व येथील भाजपच्या माजी नगरसेविका प्रिती सातम यांनी पत्राद्वारे केली आहे

उद्यानाचे सुशोभिकरण व नुतनीकरण हे म्हाडाच्या मुंबई झोपडपट्टी सुधार मंडळाच्यावतीने सन २०२०-२१च्या क वर्ग पर्यटन निधीतून करण्यात आले होते. उद्यानाच्या सुशोभिकरण आणि नुतनीकरणाचे लोकार्पण तत्कालिन पर्यटन मंत्री आदित्य ठाकरे यांच्या हस्ते झाले होते. लोकार्पणानंतर स्थानिक आमदार रविंद्र वायकर यांनी आपल्यासह आपल्या नेत्यांचे फोटो प्रदर्शित करत सावरकर उद्यानाचे नामफलक प्रत्येक प्रवेशद्वारांवर लावले आहेत. पण सदर उद्यानाचे लोकार्पण झाल्यानंतर उद्यानाच्या देखभालीकडे आ. वायकर यांनी लक्षच दिले नाही. परिणामी आज दोन ते अडीच वर्षांपूर्वी बनवलेल्या उद्यानाची दुरवस्था झाली आहे.

स्वा. सावरकर यांच्या प्रति देशवासियांना तीव्र आदर आहे. हिंदुत्व या संकल्पनेचे प्रणेते म्हणून सावरकर यांची ओळख असून कट्टर हिंदुत्वाचा पुरस्कार करणाऱ्या सावरकर यांचे नाव असणाऱ्या या उद्यानाची दुरवस्था झालेली पाहून अतिव दु:ख होत आहे. स्वा.सावरकरांच्या नावे असलेल्या या उद्यानाला आलेला हा बकालपणा कुणाही राष्ट्रप्रेमी जनतेला आवडणार नाही. या उद्यानाचे सुशोभिकरण व नुतनीकरण करत लोकार्पण करणाऱ्या उबाठा शिवसेनेने काँग्रेस आणि शरद पवार यांच्या राष्ट्रवादी काँग्रेसशी सलगी करत आघाडी केली आहे. त्यामुळे त्यांना आता सावरकरांबाबत कोणताही आदर आणि प्रेम राहिलेले नाही. त्यांच्या पक्षाने हिंदुत्वच सोडल्याने त्यांना आता सावरकरांचाही विसर पडू लागला आहे. सदर उद्यानाची दुरवस्था होत असतानाच वायकरांना या उद्यानाची देखभाल राखण्याचा प्रयत्न किमान सावरकर यांच्या नावासाठीही करावासा वाटत नाही. यातच त्यांच्या पक्षाची भूमिका स्पष्ट होत आहे असेही माजी नगरसेविका प्रिती सातम यांनी म्हटले आहे.

या उद्यानातील प्रत्येक झाड हे पाण्याअभावी सुकून गेले आहे, गवताचा भाग सुकून, करपून गेला आहे. पायवाटांमध्ये कचरा पसरल्याने लोकांना चालताही येत नाही. कचरा दररोज साफ स्वच्छ केला जात नसल्याने एकप्रकारे कचऱ्याचे साम्राज्य पसरले आहे. त्यामुळे सावरकर यांच्या नावाने सुरु असलेल्या उद्यानाची जागा आता खंडर बनले असून त्याचा फायदा आता नशेबाज लोक आणि प्रेमी युगलांकडून घेतला जात आहे. या उद्यानांमध्ये दिवसा आणि रात्री दारु पिणारे आणि गर्दुल्ल्यांचा वावर असतो. दारु पिऊन याच ठिकाणी बॉटल्स टाकल्या जातात, बऱ्याचदा दारु पिऊन बॉटल्स तिथेच फोडून टाकल्या जातात. याचा काचा जिथे तिथे पडलेल्या दिसून येत आहेत. गर्दुल्ले उद्यानातील कोपऱ्यात बसून असल्याने तसेच त्यांचा वावर असल्याने या उद्यानांमध्ये आता सर्वसामान्य जनता सकाळी किंवा संध्याकाळी फिरण्यास किंवा बसण्यास जाण्याचीही हिंमत दाखवत नाहीत. संध्याकाळच्यावेळी प्रेमी युगलांचाही वावर वाढतच चालला आहे. त्यांच्या विकृत चाळ्यांमुळे या उद्यानातील खेळण्याची साहित्य असूनही पालक मुलांना याठिकाणी घेऊन येण्यास तयार होत नाही. या उद्यानाच्या शेजारी दुध सागर आणि महानंदा या निवासी वसाहती असून या सर्वांसाठी हे उद्यान डोकेदुखी ठरु लागले आहे. उद्यानातील नशेबाज लोक आणि विकृत चाळे करणारे प्रेमी युगल यामुळे या दोन्ही वसाहतींमधील लोकांना या मार्गावरुन ये -जा करण्यास भीती वाटत आहे, त्यांना याचा प्रचंड त्रास सहन करावा लागत आहे. सावरकर यांचे नाव या उद्यानाला आहे, पण त्यात अशाप्रकारे धंदे चालत असल्याने एकप्रकारे तमाम हिंदुंच्या भावना भडकल्या जात आहेत. त्यामुळे स्थानिक आमदारांनी आपले फलक लावून या उद्यानाची दुरवस्था करून तमाम सावरकर प्रेमींच्या अवमान केला आहे. सदर उद्यान हे प्रेमी युगल आणि नशेबाजांसाठी एक अड्डा निर्माण करून दिला का असा सवाल आता स्थानिक रहिवाशांकडून केला जात आहे. त्यामुळे सावरकरांच्या नावाने खुले केलेले हे उद्यान या भागातील जनतेला सुसज्ज असे निर्माण करून देण्यासाठी याचे सुशोभिकरण करून त्यांची योग्यप्रकारे देखभाल राखण्यासाठी निधी उपलब्ध करून देत प्रयत्न केले जावे. या उद्यानाचे सुशोभिकरण करून त्यांची देखभाल राखल्यास खऱ्या अर्थाने स्वातंत्र्यवीर सावरकर यांना श्रध्दांजली ठरेल असेही प्रिती सातम यांनी लिहलेल्या पत्रात म्हटले आहे

मुंबई

विकसित भारताचे आपले स्वप्न प्रत्यक्षात आणण्याचे काम तरुणाई करू शकते. पंतप्रधान नरेंद्र मोदी यांच्या कामावर भारताच्या युवा शक्तीचा प्रचंड विश्वास आहे असे प्रतिपादन मुंबई भाजपा अध्यक्ष आ. ॲड. आशिष शेलार यांनी आज येथे केले. भारतीय जनता युवा मोर्चाच्या वतीने माटुंगा येथे आयोजित नमो युवा चौपाल कार्यक्रमात ते बोलत होते. भाजयुमो मुंबई अध्यक्ष तजिंदर सिंह तिवाना यांच्या पुढाकाराने अभियान यशस्वी करण्यात आले.

पंतप्रधान नरेंद्र मोदी यांनी २०४७ पर्यंत देश विकसित भारत बनवण्याचे स्वप्न पाहिले आहे. विकसित भारतासाठी देशाची दिशा काय असेल हे देशातील तरुणाईच ठरवणार आहे. नमो युवा चौपाल आणि नमो वॉरियर्स अभियानाच्या माध्यमातून हजारो तरुणांना जोडण्याचे काम होत आहे असेही मुंबई भाजपा अध्यक्ष आ. ॲड. आशिष शेलार म्हणाले.

यावेळी मुंबई भाजपा सरचिटणीस संजय उपाध्याय, मुंबई भाजपा उपाध्यक्ष पवन त्रिपाठी, भाजपा दक्षिण मध्य जिल्हाध्यक्ष राजेश शिरवडकर, माजी नगरसेविका नेहल शाह आणि भाजयुमोचे पदाधिकारी, कार्यकर्ते उपस्थित होते.

मुंबई:
सरकार जोपर्यंत माथाडी कायदा मोडीत काढणारे सुधारणा विधेयक क्रमांक ३४/२०२३ आणि सन २०१८ चे महाराष्ट्र विधानसभा विधेयक क्रमांक ६४ मागे घेत नाही तोपर्यंत कालपासून सुरू असलेले माथाडी कायदा बचाव कृती समितीचे आमरण व साखळी उपोषण आंदोलन चालूच राहील. माथाडी कामगार नेते माजी आमदार नरेंद्र पाटील यांनी आपल्या भाषणात निक्षुन सांगितले. तर ९४ वर्षाचे बाबा आढाव यांनीही सरकारला निर्वाणीचा इशारा दिला की, गेल्या अनेक दिवसांपासून सरकारला आम्ही पत्रव्यवहार आणि समक्ष भेटून माथाडी कामगार कायद्यात बदल करण्याच्या सरकारच्या विधेयकांमुळे माथाडी कामगार कसा उध्वस्त होणार आहे. हे समजावून सांगितले, पण सरकार योग्य संवाद साधण्यसाठी तयारच नाही म्हणूनच आमचं हे आंदोलन सरकार विधेयके मागे घेत नाही तोपर्यंत चालूच राहणार आहे.
माथाडी कायदा बचाव कृती समितीच्या आजच्या दुसऱ्या दिवशीच्या आझाद मैदान येथील आमरण व साखळी उपोषण आंदोलनाला विविध लोकप्रतिनिधी व मान्यवरांनी आपला पांठीबा व्यक्त करण्यासाठी भेट दिली.
या आंदोलनस्थळी भाषण करताना माजी मंत्री बाळासाहेब थोरात म्हणाले की ५५ वर्षांचा माथाडी आणि सुरक्षा रक्षक कायदा मोडीत काढण्याचा सरकारचा डाव आहे. याला आपण तीव्र विरोध करायलाच पाहिजे गेल्या १४ वर्षांच्या कारकिर्दीत भाजपा सरकारने तीन काळे कायदे आणले, पण आपल्या सर्वांच्या दबावाने ते थांबले यावरून दिसून येतं की, या सरकारचा हेतू चांगला नाही. माथाडी कामगार कायद्यात बदल करणारे विधेयक ३४ मुळे माथाडी कामगार आणि संघटना नष्ट होणार आहेत आणि म्हणूनच हे कुटील कारस्थान रोखण्यासाठी आम्ही पुरोगामी विचारांचे सर्व लोक तुमच्या पाठीशी आहोत असेही ते म्हणाले.
मुंबई विद्यापीठाचे माजी कुलगुरू आणि माजी खासदार भालचंद्र मुणगेकर माथाडी कामगारांच्या या आमरण व साखळी उपोषण आंदोलनात बोलताना म्हणाले की, तुमच्यामागे खंबीरपणे उभे राहण्यासाठी आम्ही इथे आलो आहोत. सरकारमधले लोकप्रतिनिधी निवडून येण्यासाठी तुमच्या पाया पडतात आणि निवडून गेले की, त्यांच्या पायाशी तुम्हाला जावं लागतं अशा प्रकारची लोकशाहीची विटंबना जगात कुठेही नाही. वेगवेगळ्या क्लृप्त्या करून माथाडी कायदा बदलण्याचा सरकारचा प्रयत्न आहे, या बदलांचा मी आणि ही जाहीर सभा निषेध करीत आहे. पुढे ते असेही म्हणाले की, हा कायदा उध्वस्त करण्याचं कारस्थान आपल्याला हाणून पाडायचं आहे तर, जनआंदोलन राष्ट्रीय समन्वयचे संजय गोकाक म्हणाले की, सध्या अन्यायाविरूध्द लढणाऱ्या कामगार, शेतकरी, यांच्या मार्गात खिळे ठोकले जातात, अश्रुधुर सोडतात, गोळ्याही घातल्या जातात असं सरकारचं काम चालू आहे. म्हणून या सरकारचं डोकं ठिकाणावर नाही म्हणूनच बाबा आढाव आणि आम्हाला इथं याव लागलं. आमचा या कायदा बदलाला विरोध असून माथाडी कायद्यात कधीही बदल खपवून घेतले जाणार नाहीत. तर नर्मदा बचाव आंदोलनाच्या नेत्या मेधा पाटकर यांचाही आंदोलनाला पांठीबा असल्याचं त्यांनी जाहीर केलं. संवाद साधण्यासाठी सरकार तयार नाही आणि म्हणूनच भारताच्या संविधानाने दिलेले अधिकार शाबूत ठेवण्यासाठी ही लढाई आहे असेही ते म्हणाले, तर शेतकरी कामगारांचे नेते सुभाष लोमटे म्हणाले की, माथाडी कायद्यात बदल करण्याचा सरकारच्या कुटील हेतुमुळे ८०% माथाडी कामगारांचं जगणं धोक्यात आलं आहे.
माजी कामगार मंत्री आणि आमदार गणेश नाईक म्हणाले की, कामगार, शेतकरी ज्या देशात दु:खी आहे, त्या देशाची प्रगती कधीच होत नाही. तुम्ही माथाडी कामगारांसाठी जो लढा देत आहात त्या लढ्यात मी तुमच्या सोबत आहे. कायद्यात बदल करून कामगारांना रस्त्यावर आणण्याचं काम या सरकारचं चालू आहे मात्र यातून मार्ग काढण्याचा प्रयन्त करेन आणि यातून मार्ग नक्कीच निघेल याची मला खात्री आहे.
माथाडी कायदा बचाव कृती समिती, महाराष्ट्र राज्य च्या दुसऱ्या दिवशीच्या आमरण व साखळी उपोषणाच्या आंदोलनाला पाठिंबा देण्यासाठी विधानरिषदेचे विरोधी पक्षनेते अंबादास दानवे, माजी कामगार मंत्री हुसेल दलवाई, कामगार नेते आमदार भाई जगताप, रोहित पवार, आमदार सचिन अहिर, आमदार अशोक पवार, आमदार निरंजन डावखरे, आमदार अनिकेत तटकरे, आमदार प्रविण दटके यांनीही भेट दिली व आपले मनोगत व्यक्त केले. दरम्यान मुख्यमंत्री कार्यालयाने कामगार आयुक्त सतीश देशमुख, सह कामगार आयुक्त लोखंडे मॅडम, कामगार विभागाचे उप सचिव खताळ व अन्य अधिकाऱ्यांचे शिष्टमंडळ उपोषणकर्त्यांना भेट देण्यासाठी पाठविले होते, त्यांचे चर्चा झाली, परंतु त्यांच्या चर्चेतून उपोषणकर्त्यांचे समाधान झाले नाही, दरम्यान आझाद मैदान पोलीस स्टेशन परिमंडळ-१ चे उपायुक्त यांच्या माध्यमातून मुख्यमंत्री कार्यालयातून उपोषणकर्त्यांच्या शिष्टमंडळाला सार्वजनिक बांधकाम मंत्री दादा भुसे यांची विधानभवनामध्ये भेट करून देण्यात आली. उद्या दि. २८ फेब्रुवारी रोजी मुख्यमंत्री ना. एकनाथ शिंदे यांच्या अध्यक्षतेखाली माथाडी कायदा बचाव कृती समितीबरोबर संबंधितांची संयुक्त बैठक आयोजित करण्याचे आश्वासन देण्यात आले. परंतू नरेंद्र पाटील व इतर नेत्यांनी निक्षून सांगितले की विधेयके मागे घेतल्याशिवाय आम्ही हे उपोषण मागे घेणार नाही. हे उपोषण आंदोलन दि. २८ फेब्रुवारी रोजी देखील चालू ठेवण्याचा निर्णय माथाडी कायदा बचाव कृती समितीने घेतला आहे.

सरकारचे अपयश व भ्रष्टाचार झाकण्यासाठी अर्थसंकल्पात घोषणांचा पाऊस – नाना पटोले

महायुती सरकारला आर्थिक शिस्त नाही, ‘ऋण काढून सण साजरा’ करण्यासारखा प्रकार.

मुंबई, दि. २७ फेब्रुवारी
महायुती सरकारने सादर केलेला अंतरिम अर्थसंकल्पात निवडणुक डोळ्यासमोर ठेवून प्रत्येक समाज घटकाला खूष करण्यासाठी केवळ घोषणा केल्या आहेत. राजकीय तोडफोड, महागाई, बेरोजगारी, पेपरपुटी, समाजा-समाजात भांडणे लावण्याचे सरकारने केलेले प्रकार यामुळे राज्यातील जनतेमध्ये या ट्रिपल इंजिन सरकारबद्दल तीव्र असंतोष आहे. लोकसभा निवडणुकीत जनता या महायुतीचा ‘हिशोब’ करणार आहे. सरकार सर्व आघाड्यांवर अपयशी ठरले आहे, सरकारचे हे अपयश व भ्रष्टाचार झाकण्यासाठी अर्थसंकल्पात घोषणांचा पाऊस पाडला आहे, अशी प्रतिक्रीया महाराष्ट्र प्रदेश काँग्रेस कमिटीचे अध्यक्ष नाना पटोले यांनी दिली आहे.

अंतरिम अर्थसंकल्पावर बोलताना काँग्रेस प्रदेशाध्यक्ष नाना पटोले म्हणाले की, सरकारने कोणत्या विभागाला किती रुपयांची तरतूद केली याच्या मोठ्या घोषणा केल्या परंतु सरकारचा आतापर्यंतचा अनुभव पाहता यातील कशाचाही फायदा सर्वसामान्य जनतेला होणार नाही. राज्यातील शेतकरी आज मोठ्या संकटात आहे पण सरकार त्यांना मदत करत नाही. मागील काळात जाहीर केलेली मदतही अद्याप मिळालेली नाही. राज्यातील तरुण रस्त्यावर आहेत, नोकरी भरती होत नाही. स्पर्धा परिक्षांमध्ये घोटाळे होत आहेत, पेपर फुटण्याचे प्रकार वाढले आहेत परंतु सरकारने तरुणांच्या मागण्यांकडे लक्ष दिलेले नाही. महिला सक्षमीकरणाबद्दल अर्थमंत्र्यांनी काही घोषणा केल्या पण क्रांतीज्योती सावित्रिबाई फुले यांच्या महाराष्ट्रात सावित्रीच्या लेकी किती सुरक्षित आहेत हे सर्वांना माहित आहे. हजारो महिला व मुली बेपत्ता आहेत, महिला अत्याचार वाढले आहेत, सरकार जर खरेच महिला सक्षमीकरणाबद्दल गंभीर असते तर महिला अत्याचार वाढले नसते.
सरकार प्रत्येक अधिवेशनात पुरवण्या मागण्या आणते पण त्याचे पुढे काय झाले याचे उत्तर मिळत नाही. सरकारने आधी ७५ हजार कोटींच्या पुरवण्या मागण्या सादर केल्या होत्या त्यानंतर ४० हजार कोटींच्या पुरवणी मागण्या आल्या आणि आता ८ हजार कोटींच्या पुरवण्या मागण्या सादर केल्या आहेत. राज्याची आर्थिक परिस्थिती बिघडलेली असते, दिवाळखोरी निघालेली असते त्यावेळेस एवढ्या मोठ्या प्रमाणात पुरवण्या मागण्या सादर केल्या जातात. या मागण्या कशासाठी आणल्या आहेत? महायुती सरकारला आर्थिक शिस्त नाही, राज्यावर कर्जाचा डोंगर करुन ठेवला आहे. ‘ऋण काढून सण साजरा’ करण्यासारखा हा प्रकार आहे. पंतप्रधान नरेंद्र मोदींच्या विकसीत भारताच्या संकल्पनेला पुरक असा अर्थसंकल्प असल्याचा मुख्यमंत्र्यांचा दावा पोकळ आहे. कारण मोदींची गॅरंटीच फसवी आहे तर मोदींच्या पावलावर चालणाऱ्या या महायुती सरकारच्या गॅरंटीवर तरी कोण विश्वास ठेवणार? असा टोलाही नाना पटोले यांनी लगावला आहे.