पुणे, दि. ७: आगामी लोकसभा सार्वत्रिक निवडणुकीच्यावेळी देण्यात येणाऱ्या विविध परवान्यासाठी एक खिडकी सुविधा सुरू करण्यात येणार असून निवडणूक विषयक विविध परवानग्यांसाठी संबंधितांनी आवश्यक त्या कागदपत्रांसह संपर्क साधण्याचे जिल्हा निवडणूक प्रशासनाच्यावतीने आवाहन करण्यात येत आहे.

नोंदणीकृत राजकीय पक्ष आणि नोंदणीकृत पक्षाच्या जिल्हास्तरीय पदाधिकाऱ्यांनी जिल्ह्याच्या कार्यक्षेत्रात तसेच उमेदवार किंवा प्रतिनिधींनी लोकसभा मतदारसंघ कार्यक्षेत्रात वाहन परवाना मिळविण्यासाठी निवडणूक निर्णय अधिकारी कार्यालयातील जिल्हास्तरीय एक खिडकी कक्षात अर्ज करावा.

उमेदवार किंवा प्रतिनिधींनी विधानसभा मतदारसंघ कार्यक्षेत्रात वाहन परवाना मिळविण्याकरीता सहायक निवडणूक निर्णय अधिकारी कार्यालयात अर्ज करावा. अर्जासोबत परिवहन विभागाचे नाहरकत प्रमाणपत्र, वाहनाचे आर.सी. पुस्तक, वाहनाचा विमा, वाहनाचे फिटनेस प्रमाणपत्र, कर भरल्याची पावती, व्यावसायिक वाहन असल्यास वैध परवाना, चालकाचा परवाना, पीयूसी, वाहनाच्या चारही बाजूचे छायाचित्र जोडावे.

विधानसभा मतदारसंघ कार्यक्षेत्रात तात्पुरते पक्ष कार्यालय उघडण्याबाबत लागणाऱ्या परवान्याकरीता सहायक निवडणूक निर्णय अधिकारी कार्यालय तसेच कोपरा सभा, प्रचार सभेसाठी मैदान परवाना, ध्वनीक्षेपण परवान्याकरीता सहायक निवडणूक निर्णय अधिकारी यांच्या कक्षातील पोलीस अधिकाऱ्यांकडे अर्ज करावा. अर्जासोबत संबंधित जागा मालकांची संमती, स्थानिक स्वराज्य संस्था तसेच पोलीस विभागाचे नाहरकत प्रमाणपत्र जोडावे.

विधानसभा मतदारसंघ कार्यक्षेत्रात फेरी, मिरवणूक, रोड शो, पदयात्रा, पथनाट्याचे आयोजन, ध्वनीक्षेपणाबाबत परवाना मिळण्याकरीता सहायक निवडणूक निर्णय अधिकारी यांच्या कक्षातील पोलीस अधिकारी तर लोकसभा मतदारसंघ कार्यक्षेत्रातील परवान्याकरीता जिल्हास्तरीय एक खिडकी कक्षातील पोलीस अधिकाऱ्यांकडे अर्ज करावा. अर्जासोबत पोलीस विभाग आणि वाहतूक नियंत्रण विभागाचे नाहरकत प्रमाणपत्र जोडावे.

विधानसभा मतदारसंघ कार्यक्षेत्रात स्टेज, बॅरिकेट आणि भाषणाकरीता उंच व्यासपीठ (रोस्ट्रम) उभारण्याबाबत लागणाऱ्या परवान्याकरीता सहायक निवडणूक निर्णय अधिकारी यांच्याकडे अर्ज करावा. अर्जासोबत संबंधित जागा मालकांची संमती, स्थानिक स्वराज्य संस्था, पोलीस विभाग, सार्वजनिक बांधकाम विभागाची स्थापत्य व विद्युत शाखा आणि अग्निशमन विभागाचे नाहरकत प्रमाणपत्र जोडावे.

जिल्ह्यात हेलीपॅडचे बांधकाम आणि हेलिकॉप्टर उतरविण्याबाबत लागणाऱ्या परवान्याकरीता ग्रामीण भागासाठी जिल्हाधिकारी कार्यालयातील गृह शाखा , पुणे शहर हद्दीसाठी पुणे पोलीस आयुक्त कार्यालय आणि पिंपरी-चिंचवड हद्दीकरीता पोलीस आयुक्त, पिंपरी-चिंचवड यांच्या कार्यालयात अर्ज करावा. अर्जासोबत संबंधित जागा मालकांची संमती, स्थानिक स्वराज्य संस्था, पोलीस विभाग, सार्वजनिक बांधकाम विभागाची स्थापत्य व विद्युत शाखा आणि अग्निशमन विभागाचे नाहरकत प्रमाणपत्र जोडावे, अशी माहिती जिल्हा निवडणूक अधिकारी कार्यालयामार्फत देण्यात आली आहे.

पुणे,दि. ७ : राज्यातील राज्य मंडळाचा अभ्यासक्रम असणाऱ्या सर्व मान्यताप्राप्त शाळा, सर्व व्यवस्थापनाच्या, सर्व माध्यमांच्या शाळांमध्ये इयत्ता ५ वी आणि ८ वी साठी ३ एप्रिल रोजी वार्षिक परीक्षा व नियतकालिक मूल्यांकन चाचणी घेण्याचा निर्णय घेण्यात आला आहे, अशी माहिती शालेय शिक्षण व क्रीडा विभाग, राज्य शैक्षणिक संशोधन व प्रशिक्षण परिषदेच्या कार्यालयाने दिली आहे.

इयत्ता ५ वी व ८ वीची वार्षिक परीक्षा ही द्वितीय सत्राच्या अभ्यासक्रमावर आधारीत असणार आहे. या वार्षिक परीक्षांसाठी इयत्ता ५ वी ला प्रथम भाषा, द्वितीय भाषा, तृतीय भाषा, गणित, व परिसर अभ्यास हे विषय असतील तर इयत्ता ८ वी ला प्रथम भाषा, द्वितीय भाषा, तृतीय भाषा, गणित, विज्ञान व सामाजिक शास्त्र हे विषय असतील. तसेच इयत्ता ५ वी आणि ८ वी साठी सातत्यपूर्ण सर्वंकष मूल्यमापन योजनेतील संकलित मूल्यमापन २ म्हणजेच वार्षिक परीक्षा असणार आहे.

या परीक्षेकरिता प्रत्येक शाळांनी शाळास्तरावर प्रश्नपत्रिका तयार करून परीक्षा घेण्यात यावी. शाळांनी प्रश्नपत्रिका तयार करताना राज्य शैक्षणिक संशोधन व प्रशिक्षण परिषद महाराष्ट्र यांनी त्यांच्या maa.ac.in या संकेतस्थळावर उपलब्ध नमुना प्रश्नपत्रिकेचा उपयोग करून प्रश्नपत्रिका तयार कराव्यात.

इयत्ता पाचवी व आठवीच्या वार्षिक परीक्षेत विद्यार्थी ज्या विषयात उत्तीर्ण होऊ शकणार नाहीत त्यासाठी त्यांच्या शाळेमार्फत त्या विषयासाठी अतिरिक्त पूरक मार्गदर्शन प्रदान करून वार्षिक परीक्षेचा निकाल जाहीर झाल्यापासून दोन महिन्याच्या आत पुनर्परीक्षा देण्याची संधी देण्यात येईल. पुनर्परीक्षाचे आयोजनदेखील शासन निर्णयाप्रमाणे संबंधित शाळांनी करावयाचे आहे. पुनर्परीक्षा घेताना शाळांनी कोणती दक्षता घ्यावयाची याबाबतचे निर्देश संबधित शासन निर्णयात दिलेले आहेत.

नियतकालिक मूल्यांकन चाचणी (पीएटी) शैक्षणिक वर्ष २०२३ -२४ पासून राज्यातील शासकीय व स्थानिक स्वराज्य संस्थांच्या तसेच खाजगी अनुदानित शाळांमधील इयत्ता ३ री ते ८ वी च्या वर्गातील विद्यार्थ्यांसाठी प्रथम भाषा, गणित व तृतीय भाषा (एकूण १० माध्यम) करिता तीन नियतकालिक मूल्यांकन (पीएटी) चाचण्यांचे आयोजन करण्यात येणार आहे. त्यापैकी आतापर्यंत पायाभूत चाचणी व संकलित मूल्यमापन १ चे आयोजन करण्यात आले असून संकलित मूल्यमापन २ चे आयोजन २ ते ४ एप्रिल या कालावधीमध्ये राज्यातील शासकीय व स्थानिक स्वराज्य संस्थांच्या तसेच खाजगी अनुदानित शाळांमध्ये एकाच वेळी करण्यात येणार आहे.

इयत्ता ३ री, ४ थी, ६ वी, ७ वी करिता प्रथम भाषा, गणित व तृतीय भाषा या तीन विषयांकरिता नियतकालीक मुल्यांकन चाचणी हीच संकलित मूल्यमापन २ असेल त्यामुळे या विषयांसाठी स्वतंत्रपणे संकलित मूल्यमापन २ घेण्यात येणार नाही व उर्वरित विषयांचे संकलित मूल्यमापन २ शाळांनी त्यांच्या स्तरावर प्रश्नपत्रिका विकसित करून घ्यावयाच्या आहे.

इयत्ता ५ वी व ८ वी साठी मात्र नियतकालिक मूल्यांकन चाचणी (पीएटी) ही संकलित मूल्यमापन २ असणार नाही. या दोन इयत्तांसाठी वार्षिक परीक्षा ही स्वतंत्रपणे घेण्यात येईल. त्यामुळे शासकीय व स्थानिक स्वराज्य संस्था व खाजगी अनुदानित शाळांनी २, ते ४ एप्रिल या कालावधीत नियतकालिक मूल्यांकन चाचणीचे आयोजन निश्चित केले असल्यामुळे या चाचणी नंतरच वार्षिक परीक्षेचे आयोजन शाळांनी करावे.

सर्व शाळांनी सूचनांप्रमाणे आपल्या स्तरावर इयत्ता ५ वी व ८ वी च्या वार्षिक परीक्षा शासन निर्णयातील निर्देशाप्रमाणे अंमलबजावणी करून यशस्वीपणे परीक्षा पार पाडाव्यात, यासाठी योग्य ती दक्षता घ्यावी, असे आवाहन राज्य शैक्षणिक संशोधन व प्रशिक्षण परिषदेच्या उपसंचालक (समन्वय) डॉ. कमलादेवी आवटे यांनी केले आहे.

माजी सैनिक विधवा पत्नी किंवा त्यांच्या अवलंबितासाठी

पुणे, दि. ७ : माजी सैनिक महामंडळातर्फे पुणे शहरातील चतु:श्रृंगी येथे माजी सैनिक विधवा पत्नी किंवा त्यांचे अवलंबिताकडून महिला सुरक्षा रक्षक पदे भरण्यासाठी कंत्राटी पद्धतीने भरती प्रक्रिया राबविण्यात येणार असून इच्छुक आणि शारीरिकदृष्ट्या योग्य असलेल्या उमेदवारांनी सर्व कागदपत्रासह १५ मार्च पर्यंत जिल्हा सैनिक कल्याण कार्यालय, पुणे येथे संपर्क करण्याचे आवाहन करण्यात आले आहे.

या पदासाठी उमेदवाराची शैक्षणिक अर्हता दहावी पास व वय ३५ वर्षाखालील असावे. सुरक्षा रक्षक प्रशिक्षणाबाबतचे प्रमाणपत्र असावे. उमेदवाराची तीन शिफ्टमध्ये काम करण्यास तयारी असावी. निवड झालेल्या उमेदवाराला २५ हजार रूपये वेतन दिले जाईल. नियमानुसार वेतनातून रोजगार भविष्य निर्वाह निधी, उपदान आणि बोनससाठी ४ हजार ६०० रूपये वजा करण्यात येईल, असेही जिल्हा सैनिक कल्याण अधिकारी लेफ्टनंट कर्नल हंगे स. दै. (नि.) यांनी कळविले आहे.

पुणे विमानतळाच्या नव्या टर्मिनलचे उद्घाटन अखेरीस १० मार्च रोजी पंतप्रधान नरेंद्र मोदी ऑनलाईन पद्धतीने करणार आहेत हे ऐकल्यावर मनात येते की, ऑनलाईन पद्धतीनेच पंतप्रधान नरेंद्र मोदींना उद्घाटन करायचे होते तर ते आधीच का केले नाही? प्रवाशांची या नव्या टर्मिनलमुळे फार मोठी सोय होणार होती हे माहीत असूनही विमान प्रवास करणाऱ्या पुणेकरांची कुचंबणा करीत या नव्या टर्मिनलचे उद्घाटन इतके दिवस होऊ दिले नाही. या भाजपाच्या कृतीमुळे पुणेकरांमध्ये संताप उसळणे स्वाभाविक आहे असे महाराष्ट्र प्रदेश कॉंग्रेस कमिटीचे उपाध्यक्ष व माजी आमदार मोहन जोशी यांनी म्हटले आहे.

मोहन जोशी पुढे म्हणाले की, पुणे शहर कॉंग्रेस पक्ष आणि ‘वेक अप पुणेकर’ यांच्यामार्फत गेले अनेक महिने रुबी हॉल क्लिनिक ते रामवाडी मेट्रो आणि पुणे विमानतळ नव्या टर्मिनलचे लोकार्पण लगेच व्हावे यासाठी आम्ही आवाज उठवला, आंदोलने केली, घंटानाद केले. त्यामुळेच मेट्रो मार्गाचे उद्घाटन ऑनलाईन पद्धतीने नुकतेच केले गेले आणि आता नव्या टर्मिनलचे लोकार्पणदेखील पंतप्रधान नरेंद्र मोदी ऑनलाईन पद्धतीने करणार आहेत. जनआंदोलनाचे हे सारे श्रेय आहे, असे ते म्हणाले.

वास्तविक पंतप्रधान नरेंद्र मोदींना वेळ नाही हे लक्षात घेता मेट्रोसाठी रेल्वेमंत्री आणि टर्मिनलसाठी हवाई वाहतूकमंत्री यांच्या हस्ते लोकार्पण करता आले असते. असे सांगून मोहन जोशी म्हणाले की, पंतप्रधान नरेंद्र मोदींचा त्यांच्या पक्षात दराराच एवढा मोठा आहे की, पुणे भाजपला रेल्वेमंत्री अथवा हवाई वाहतूकमंत्री हा पर्याय सुचवण्याचे धारिष्ट्य झाले नाही, हे देखील यातून दिसून येते.

पुणे,दि.७:- राजकारणात येणाऱ्या महिलांची संख्या वाढत असतांना या क्षेत्रात काम करतांना महिलांनी विविध विषयांचा अभ्यास, पक्षाची भूमिका आणि विधीमंडळातील आयुधांविषयी जाणून घेणे गरजेचे आहे, असे प्रतिपादन विधान परिषदेच्या उपसभापती डॉ. नीलम गोऱ्हे यांनी केले.

महिला दिनाच्या औचित्याने नवलमल फिरोदिया विधी महाविद्यालयात आयोजित ‘महिलांचे राजकीय सक्षमीकरण’या विषयावर आयोजित चर्चासत्रात त्या बोलत होत्या. चर्चासत्रास प्रा. उल्हास बापट, आयएलएस विधी महाविद्यालयाच्या प्राचार्य डॉ. दीपा पातूरकर, प्रा. बिंदू रोनाल्ड, ॲड. विजयालक्ष्मी खोपडे, नवलमल विधी महाविद्यालयाच्या प्राचार्य डॉ. सुनीता आढाव, ॲड. अशोक पाळंदे उपस्थित होते.

डॉ. गोऱ्हे म्हणाल्या, राजकारणात महिलांचा सहभाग वाढतो आहे. आज केवळ ८ टक्के महिला राजकारणात सक्रीय आहेत. नव्या विधेयकानुसार महिलांचे राजकारणातील प्रमाण वाढणार आहे, त्याला काही कालावधी लागेल. राजकारणात स्वत:ला सिद्ध करतांना महिलांना राजकीय क्षेत्रात सक्रीय होऊन राजकीय विचार मांडावे लागतील. राजकीय क्षेत्रातील महिलांनी विविध अहवालांचा, विचारांचा अभ्यास करणे गरजेचे आहे. अभ्यासासोबत पक्षाची भूमिका ठासून मांडण्याची कला अवगत असावी. विधीमंडळात उपयोगात येणाऱ्या आयुधांचा अभ्यासही महत्वाचा आहे. योग्य आयुधांचा अचूक वेळेला उपयोग करणेही तेवढेच महत्वाचे आहे, असेही त्या म्हणाल्या.

समाजात कुटुंबियांच्या मतानुसार मतदान करणारी स्त्री आता स्वत:चा निर्णय घेऊ लागली आहे. महिला सक्षमीकरणाच्यादृष्टीने ही सकारात्मक बाब आहे. निवडणूक प्रक्रियेत वेगवेगळ्या स्तरावर महिलांचा सहभाग असतो. महिला उमेदवार, महिला अधिकारी, माध्यमांतील महिला अशा विविध स्तरांवर महिला आपली भूमिका बजावत असतात. लोकशाहीत महिला मतदारांची भूमिका अत्यंत महत्वाची असून महिला मतदारांनी अधिकारांबाबत जागरूक रहात आपल्या आकांक्षापूर्ततेसाठी जागरूक राहून मतदान करावे, असे आवाहन त्यांनी केले.

राजकीय क्षेत्रात वावरतांना महिला लोकप्रतिनिधींना अनेक आव्हानांना सामारे जावे लागते, त्यांना संघर्षाचा सामना करावा लागतो. अशा परिस्थितीत महिलांनी धैर्याने काम करावे. लोकशाहीत आपली भूमिका इतरांपर्यंत पोहोचविणे महत्वाचे आहे. यासाठी माध्यमे महत्वाचे कार्य करत असल्याने महिलांनी माध्यमातून आपली भूमिका ठामपणे मांडणे गरजेचे आहे. माध्यमाद्वारे जनतेशी जोडले न गेल्यास राजकारणात मागे राहण्याची शक्यता असते.

पक्षासोबत विविध क्षेत्रातील संस्था, संघटना, प्रतिनिधी यांच्याशी सातत्याने होणारा संवाद उपयुक्त ठरतो. जनता आपली मार्गदर्शक आहे हे लक्षात घेऊन काम केले तर राजकीय क्षेत्रात चांगला प्रभाव पाडता येतो. विधानसभेतील महिलांची भूमिका बघत असताना तिथे तुम्ही महिला म्हणून नाही तर लोकप्रतिनिधी म्हणून जबाबदारी पार पाडावी लागते, असेही डॉ.गोऱ्हे म्हणाल्या.

यावेळी डॉ.गोऱ्हे यांनी विद्यार्थ्यांशी विविध विषयांवर संवाद साधला. विद्यार्थ्यांनी मतदार नोंदणी व मतदानाविषयी जागरुकता दाखवावी असे आवाहनही त्यांनी केले. यावेळी विधी महाविद्यालयातील प्राध्यापक, अधिकारी, कर्मचारी व विद्यार्थी-विद्यार्थीनी उपस्थित होते.
000

अखिल म्हसोबा उत्सव मंडई ट्रस्टतर्फे लुई ब्रेल अंध अपंग कल्याण संस्थेला ७५ हजार रुपयांची आर्थिक मदत
पुणे : सामाजिक संस्थांच्या माध्यमातून समाजोपयोगी काम होत आहे. संस्थेकडे आलेल्या निधीचा योग्य व चांगला विनियोग होणे गरजेचे असते, ते काम अखिल म्हसोबा उत्सव मंडई ट्रस्ट करीत आहे. दृष्टीहिन व्यक्ती अपंगत्व असतानाही स्वत:च्या पायावर उभे राहतात. आपण अनेकदा अडचणींसमोर हात टेकतो, त्यावेळी आपण प्रत्येकाने अशा लढवय्या दृष्टीहिन व्यक्तींचे काम डोळ्यासमोर आणायला हवे, असे मत राज्यसभेच्या खासदार प्रा. डॉ.मेधा कुलकर्णी यांनी व्यक्त केले.

शुक्रवार पेठेतील अखिल म्हसोबा उत्सव मंडई ट्रस्टतर्फे लुई ब्रेल अंध अपंग कल्याण संस्थेला ७५ हजार रुपयांची आर्थिक मदत प्रदान व दृष्टीहिन बांधवांसाठी भोजन समारंभाचे आयोजन मंडईतील बुरुड आळी येथे करण्यात आले. यावेळी आमदार रवींद्र धंगेकर, पोलीस उपायुक्त स्माथना पाटील ,संदीपसिंह गिल्ल, उद्योजक युवराज ढमाले, प्रिती सुनील कांबळे, वरिष्ठ पोलीस निरीक्षक दिपाली भुजबळ, सामाजिक कार्यकर्ते शिरीष मोहिते, ट्रस्टचे विश्वस्त अध्यक्ष राहुल सुर्यवंशी, विश्वस्त उपाध्यक्ष निवृत्ती जाधव आदी उपस्थित होते. ट्रस्टचे सहाय्यक प्रख्यात उद्योजक प्रकाश धारिवाल व युवराज ढमाले यांच्या जन्मदिनानिमित्त हा कार्यक्रम घेण्यात आला.

रवींद्र धंगेकर म्हणाले, धार्मिकतेकडून विधायकतेकडे या ट्रस्टने चांगली वाटचाल सुरु ठेवली आहे. वंचित लोकांकडे समाजाचे लक्ष जात नाही. त्यांना मदत देणे गरजेचे असते. म्हसोबा ट्रस्ट सारख्या सामाजिक संस्था अशा वंचितांकडे लक्ष देऊन त्यांना मदतीचा हात देत असल्याचे कार्य कौतुकास्पद आहे.

निवृत्ती जाधव म्हणाले, केवळ आर्थिक मदत न देता दिव्यांग कलाकारांची विशेष संगीत मैफल आयोजित करुन त्यांच्यातील गुण सामान्य नागरिकांसमोर सादर व्हावे, याकरिता देखील प्रयत्न करण्यात येत आहे. लुई ब्रेल अंध अपंग संस्था समाजातील दुर्बल घटकांना प्रेरित करून त्यांच्या कलागुणांना वाट मोकळी करून देत जगण्याचा सुरेख मार्ग दाखवित आहे. त्यांच्या पंखांना बळ देण्याचा प्रयत्न म्हसोबा ट्रस्ट करीत असल्याचे त्यांनी सांगितले. अबोली सुपेकर यांनी सूत्रसंचालन केले.

आम्ही विधानसभेलाच अडकलोय : रवींद्र धंगेकर
मी आणि मेधा कुलकर्णी यांनी अनेक वर्षे पुणे महानगरपालिकेत एकत्र काम केले. विचारांची लढाई विचारांनी लढली. मात्र, मेधाताई नशिब काढून आल्या आहेत. त्यांनी थेट खासदारकीला उडी मारली. आम्ही मात्र अजून विधानसभेलाच अडकलोय, असे रवींद्र धंगेकर यांनी सांगताच उपस्थितांमध्ये हशा पिकला.

पुणे : दिल्ली येथील राष्ट्रीय आयुर्वेद विद्यापीठाकडून प्राचीन संहिता गुरुकुलाच्या चार आयुर्वेद अभ्यासक्रमांना मान्यता मिळाली आहे. आयुर्वेदाच्या अभ्यासक्रमांना मान्यता मिळालेली प्राचीन संहिता गुरुकुल ही भारतातील खासगी क्षेत्रातील पहिलीच संस्था ठरली आहे. भारत सरकारच्या आयुष मंत्रालयाचे सचिव डॉ. राजेश कोटेचा, आयुर्वेद महर्षी डॉ. मनोज नेसरी, ऑल इंडिया इन्स्टिट्यूट ऑफ आयुर्वेदाच्या डॉ. तनुजा नेसरी, भारतीय चिकित्सा पद्धती राष्ट्रीय आयोगाचे अध्यक्ष वैद्य जयंत देवपुजारी यांच्या हस्ते गुरुकुलाचे प्रमुख डॉ. हरीश पाटणकर यांनी मान्यतेचे प्रमाणपत्र स्वीकारले.
प्राचीन संहिता गुरुकुल ही आयुर्वेदातील विद्यार्थी घडविणारी संस्था असून, या संस्थेच्या सर्टिफिकेट कोर्स इन आयुर्वेदिक कॉस्मेटोलॉजी अँड ट्रायकोलॉजी विथ मॉडर्न आस्पेक्ट (बेसिक, २०० तास), सर्टिफिकेट कोर्स इन आयुर्वेदिक कॉस्मेटोलॉजी अँड ट्रायकोलॉजी विथ मॉडर्न आस्पेक्ट (अडवान्सड, ५०० तास), सर्टिफिकेट कोर्स इन आयुर्वेदिक क्लिनिकल डायटेटिक्स, न्यूट्रिशन अँड इम्युनिटी (२०० तास), सर्टिफिकेट कोर्स इन मर्म अँड नाडी विज्ञान (२०० तास) या चार अभ्यासक्रमांसाठी ही मान्यता मिळाली आहे. राष्ट्रीय आयुर्वेद विद्यापीठातर्फे नऊ संस्थांना प्रमाणित करण्यात आले. त्यामध्ये महाराष्ट्रामधून प्राचीन संहिता गुरुकुल ही एकमात्र संस्था आहे.
या यशाबद्दल डॉ. हरीश पाटणकर यांनी आनंद व्यक्त केला. ‘भारत सरकारच्या सर्वोत्तम संस्थेकडून गौरव होणे आनंदाची बाब आहे. सद्गुरू श्री आनंदनाथ महाराज, गुरू वैद्य समीर जमदग्नी, वैद्यराज दिवाकर जुवेकर, प्राचीन संहिता गुरुकुलचे सर्व गुरूवर्य आणि ज्ञानसंकुल विद्यार्थी संघाचे सर्व विद्यार्थी यांचे खूप मोठे योगदान आहे. तसेच गुरुकुलाच्या उभारणीत आई-वडील, बंधू पंकज पाटणकर, पत्नी डॉ. स्नेहल पाटणकर यांचा मोठा वाटा आहे. डॉ. रश्मी वेद, मनीष जानी, डॉ. गायत्री संत, डॉ. गायत्री पांडव यांच्यासह वैद्य निलेश ढवळे, विवेक आंबरे, ओमप्रसाद जगताप, स्वप्नील भाकरे, केदार जोशी आणि अगणित जुने व नवे प्राचीन संहिता गुरुकुल आणि इंडियन इन्स्टिटयूट ऑफ एन्सीएंट सायन्सेस एंड मॉडर्न टेक्नोलॉजीचे सहकारी यांची साथ लाभली