पुणे-सख्या मेव्हण्याला जीवे ठार मारण्यासाठी त्याच्या दाजीनेच मध्यप्रदेश येधील कुस्ती पैलवानास सुपारी दिल्याच्या प्रकरणात महेश महादेव ठोंबरे (पैलवान), फैजल खान (पैलवान) आणि तथाकथित दाजी अश्विनीकुमार शेषराव पाटील वय ५२ वर्ष रा. कमलनिवास, संतोष बेकरीजवळ, आपटेरोड, शिवाजीनगर, पुणे यांना पुणे पोलिसांनी अटक केली आहे.
या प्रकरणी पोलिसांनी सांगितले कि,’दिनांक ०४/०२/२०२४ रोजी रात्रौ २२/३५ वा. सुमा फिर्यादी वय ३१ वर्ष रा. आपटे रोड पुणे हे आपले हॉटेल बंद करुन राहते घरी आले असताना दोन इसमांनी पत्ता विचारण्याचा बहाण्याने त्यांचे जवळ येऊन काही कारण नसताना त्यांचे तोंडावर लाल तिखट टाकुन कोणत्या तरी हत्याराने वार करुन गंभीर जखमीकरुन त्यांचा खुनाचा प्रयत्न केला बाबत डेक्कन पोलीस स्टेशन गुरनं २०/२०२४ भादंवि कलम ३०७,३२४,३४ अन्वये गुन्हा दाखल आहे. सदर गुन्हयाचा समांतर तपास करीत असताना युनिट १ कडील पोलीस अंमलदार दत्ता सोनवणे, महेश बामगुडे, शशीकांत दरेकर, अभिनव लडकत, निलेश साबळे यांनी गुन्हयाचे घटनास्थळापासुन बालगंधर्व
चौक, वृधेश्वर घाट, पुणे मनपा, गाडीतळ चौक, मालधक्का चौक ठिकाणचे सविस्तर सीसीटीव्ही फुटेज पाहुनसंशयीत आरोपी माहिती घेवुन मार्ग काढुन संशयीत आरोपी हे पुणे स्टेशन येथे गेले बाबत निष्पन्न केले.
या सीसीटीव्ही फुटेज व्दारे तांत्रिक विश्लेषण करुन गुन्हयाचा तपास करुन निष्पन्न झालेला आरोपी नामे महेश महादेव ठोंबरे वय २८ वर्ष रा. जुना बस स्टॉप संगमवाडी पुणे सध्या आगरवाल तालीम, कसबा पेठ पुणे यास ताब्यात घेवुन त्याचेकडे गुन्हयाच्या गुन्ह अनुशंगाने व तांत्रीक विश्लेषणाच्या आधारे तपास करता त्याने सदर गुन्हा फिर्यादीचे दाजी यांचे सांगणेवरुन ५० हजार रुपायांची सुपारी देवुन इसम नामे पैलवान फैजल खान व त्याचे दोन मित्र रा. मध्यप्रदेश यांचेसह केला असल्याची कबुली दिली.
इ महेश ठोंबरे याच्या सांगणेवरुन फिर्यादीचे दाजी इसम नामे अश्विनीकुमार शेषराव पाटील वय ५२ वर्ष रा. कमलनिवास, संतोष बेकरीजवळ, आपटेरोड, शिवाजीनगर, पुणे. यास ताब्यात घेवुन त्यास युनिट १ कार्यालयात आणुन त्याचेकडे तांत्रिक विश्लेषण व केलेला तपास आधारे तपास केला असता त्यानेही सदर गुन्हयांची कबुली दिली आहे.
एकूणच महेश महादेव ठोंबरे (पैलवान), फैजल खान (पैलवान) यांनी अश्विनीकुमार पाटील यांचे सांगण्यावरुन सदर गुन्हयामध्ये पुर्व नियोजीत कट रचुन गुन्हा केल्याचे तपासामध्ये निष्पन्न झाले आहे. त्यामुळे आरोपींना पुढील कार्यवाही कामी डेक्कन पोलीस ठाणे पुणे यांचे ताब्यात दिले आहे.
सदरची कामगिरी अपर पोलीस आयुक्त, गुन्हे, शैलेश बलकवडे, पोलीस उप- आयुक्त, गुन्हे, अमोल झेंडे,सहाय्यक पोलीस आयुक्त, गुन्हे-१, सुनिल तांबे, यांच्या मार्गदर्शनाखाली वरिष्ठ पोलीस निरीक्षक युनिट १, शब्बीर सय्यद सहा. पोलीस निरीक्षक अशिष कवठेकर, पोलीस अंमलदार दत्ता सोनावणे, महेश बामगुडे, शुभम देसाई, निलेश साबळे, राहुल मखरे, शशीकांत दरेकर, आय्याज दड्डीकर, अभिनव
लडकत यांनी केली आहे.

पुणे, दि. २३: लोकसभा सार्वत्रिक निवडणूक- २०२४ दरम्यान उमेदवार आणि राजकीय पक्षांच्या निवडणूक खर्चावर आणि निवडणुकीतील गैरप्रकारांवर लक्ष ठेवण्यासाठी जिल्ह्यात १३५ भरारी पथके आणि १२९ स्थिर सर्वेक्षण पथकांची स्थापन करण्यात आली आहेत, अशी माहिती तक्रार निवारण कक्षाद्वारे देण्यात आली आहे.

खर्च संनियंत्रणासाठी जिल्हाधिकारी तथा जिल्हा निवडणूक अधिकारी यांच्या अधिनस्त जिल्हास्तरावर समन्वय अधिकारी नेमण्यात आले असून प्रत्येक मतदारसंघाचे निवडणूक निर्णय अधिकारी यांच्या स्तरावर खर्च पथक नेमण्यात आले आहे. या पथकाचे काम अन्य विविध पथकांच्या समन्वयाने चालते. भरारी पथक (एफएसटी), स्थिर सर्वेक्षण पथक (एसएसटी), व्हिडीओ सर्वेक्षण पथक (व्हिएसटी), व्हिडीओ पाहणी पथक (व्हिव्हिटी), माध्यम संनियंत्रण आणि प्रमाणीकरण समिती (एमसीएमसी), जिल्हा नियंत्रण कक्ष व तक्रार संनियंत्रण कक्ष आदीदेखील खर्च पथकाला सहकार्य करतात. तसेच त्यासाठी आयकर विभाग आणि राज्य उत्पादन शुल्क विभागाचीदेखील या कामात मदत घेतली जाते.

जिल्ह्यातील चार लोकसभा मतदार संघाअंतर्गत २१ विधानसभा मतदार संघात मिळून एकूण १३५ एफएसटी पथक आणि १२९ एसएसटी पथके स्थापन करण्यात आली आहेत. भोर मतदार संघात १५ आणि इतर २० मतदार संघात प्रत्येकी ६ एफएसटी स्थापन करण्यात आली आहेत. तसेच भोर विधानसभा मतदार संघात ९ आणि उर्वरित विधानसभा मतदार संघांमध्ये प्रत्येकी ६ एसएसटी स्थापन करण्यात आली आहेत.

या पथकांद्वारे मतदारांना प्रभावित करण्यासाठीची रोकड, मद्य, तसेच प्रतिबंधित पदार्थांच्या वाहतुकीस आळा घालणे, आचारसंहिता भंगाबाबत घटनांवर लक्ष देणे, निवडणुकीतील गैरप्रकारांची माहिती घेणे, सिव्हिजिल आणि नियंत्रण कक्षाकडे आलेल्या तक्रारींवर कार्यवाही आदी कामे करण्यात येतात.

उमेदवार, राजकीय पक्षांच्या प्रचाराच्या सर्व जाहीर सभा, रॅली यांचे व्हिडीओ चित्रीकरण व्हिएसटीच्या माध्यमातून केले जाते व त्याची पाहणी व्हिव्हिटीकडून केली जाते. प्रत्येक विधानसभा मतदारसंघात ३ व्हिएसटी आणि २ व्हीव्हीटी नेमण्यात आल्या आहेत. या पथकाची निरीक्षणे खर्च पथकासाठी उपयुक्त ठरतात. एमसीएमसीद्वारे उमेदवारांच्या वृत्तपत्रे तसेच इलेक्ट्रॉनिक माध्यमातील जाहिरात खर्चाचा अहवाल समितीकडे पाठविला जातो. या विविध माध्यमातून उमेदवारांनी दर्शविलेला निवडणूक खर्चाची पडताळणी केली जाते. खर्च दर्शविण्यात आला नसल्यास त्याबाबतची नोटीस देऊन त्याच्या निवडणूक खर्चात समाविष्ट केला जातो.

प्रत्येक विधानसभा मतदार संघासाठी सहायक खर्च निरीक्षक नेमण्यात येतो. केंद्र शासनाच्या आयकर विभाग, केंद्रीय उत्पादन शुल्क विभाग, केंद्रीय लेखापरीक्षा व लेखा विभाग किंवा केंद्रीय सार्वजनिक उपक्रमाचे अधिकाऱ्यांची नेमणूक सहायक खर्च निरीक्षक म्हणून होते. ते विधानसभा मतदार संघातील खर्च तपासणीचे काम योग्य पद्धतीने चालले आहे का याची पाहणी करणे आणि खर्च निरीक्षक व जिल्हा निवडणूक अधिकारी यांना खर्च पडताळणीसाठी सहकार्य करण्याचे काम करतात. तसेच उमेदवारांच्या खर्च नोंदवहीची तसेच शॅडो ऑब्झर्वेशन रजिस्टरचे संनियंत्रण करतात, अशीही माहिती जिल्हा निवडणूक प्रशासनाच्यावतीने देण्यात आली.

पुणे :हुकूमशाहीविरुद्ध लढणाऱ्या तरूणाईचा  सन्मान  ‘बोल के लब आजाद है तेरे’ या कार्यक्रमात   पुण्यात  करण्यात आला .दि.२३ मार्च रोजी सायंकाळी ६ वाजता काँग्रेस भवन, शिवाजीनगर येथे भारत जोडो अभियान, पुणे आणि इंडिया आघाडी ,   युवक क्रांती दल, महाराष्ट्र गांधी स्मारक निधी, निर्भय बनो, जनसंघर्ष समिती, स्वराज अभियान, एनएस यु आय , राष्ट्रवादी विद्यार्थी काँग्रेस (शरदचंद्र पवार), जनआंदोलनांचा राष्ट्रीय समन्वय, अभ्यासिका विद्यार्थी कृती समिती या संस्था,संघटना आयोजनात सहभागी झाले.
 प्रसिध्द अभिनेते किरण माने,दिग्दर्शिका शिल्पा बल्लाळ,लेखक,अभ्यासक प्रा. डॉ. श्रीरंजन आवटे हे प्रमुख पाहुणे म्हणून उपस्थित होते .

विविध आंदोलनातून हुकूमशाहीच्या विरोधात निर्भयपणे लढणाऱ्या अप्पा अनारसे,सचिन पांडुळे,भक्ती कुंभार,एड.बाळकृष्ण निढाळकर,वैभव कोठुळे, सायांतन चक्रवर्ती, रिताग्निक भट्टाचार्य, मधुरीमा मैती, मनकल्प नोकवोहम,निहारिका भोसले, श्रावणी बुवा, आकाश नवले,  प्रथमेश नाईक आणि आश्चर्या अशा अनेक युवा प्रतिनिधींचा सन्मान या कार्यक्रमात करण्यात  आला. शेतकरी आंदोलन, ललित कला केंद्र हल्ला प्रकरण, निर्भय बनो सभा हल्ला प्रकरण, सावित्रीबाई फुले पुणे विद्यापीठ हल्ला प्रकरण, फिल्म इन्स्टिट्युट हल्ला प्रकरण अशा ठिकाणी दडप शाही विरुद्ध लढणाऱ्या युवक , युवतींचा यात समावेश होता.
नीलम पंडित यांनी संविधानाच्या प्रास्ताविकेचे वाचन केले.संदीप बर्वे यांनी प्रास्ताविक केले. संदिप ताम्हणकर, इब्राहिम खान तसेच युवा आंदोलकांनी  मनोगत व्यक्त केले.  अशोक तातुगडे,  सुनील सुखथनकर , डॉ प्रवीण सप्तर्षी,अन्वर राजन, प्रशांत कोठडीया असे अनेक मान्यवर उपस्थित होते. एकनाथ पाठक यांनी आभार मानले.
यावेळी बोलताना किरण माने म्हणाले, ‘ ७० वर्ष भारतीय कंदमुळं खावून जगत होते, असा समज करून दिला जातो.  २०१४ नंतर हवेत ऑक्सिजन वाढला ,असा समज करून दिला जातो.मात्र,मोदी हे अवतारी पुरुष असल्याने त्यांनी चहा विकलेले रेल्वे स्टेशन सापडत नाही, डिग्री सापडत नाही . याच काळात माणसाचा गुलाम होण्याची प्रक्रिया झाली. मेंदूवर कब्जा घेण्यात आला आहे. या अराजक काळात जे दोन हात करतील त्यांचे नाव इतिहासात लिहिले जाईल. म्हणूनच आज होत असलेल्या सत्काराचे महत्व आहे.

आपण देश वाचविण्यासाठी झटले पाहिजे. कलाकारांनी राजाचे भाट बनू नये. किरण माने दडपशाहीच्या विरोधात उभे राहिले म्हणून संपले, असे उदाहरण सेट करण्याचा प्रयत्न झाला. मात्र मी संपलो नाही, म्हणून लढा देणाऱ्या कोणीही घाबरु नये. हुकूमशाही विरुद्ध लढणारे लाखो निर्माण व्हावेत, असेही ते म्हणाले.

 शिल्पा बल्लाळ म्हणाल्या,’  भगतसिंग यांनी केलेला स्फोट हिंसक नव्हता.  ती पहिली वहिली अभिव्यक्ती होती.   आज आपला लढा स्वातंत्र्य लढ्यासारखा आहे.  तरुण मंडळींनी हा लढा पुढे न्यायचा आहे. कलाकारांनी हिंसक अभिव्यक्ती पेक्षा सकारात्मक अभिव्यक्ती करावी. अभिव्यक्ती स्वातंत्र्य सर्वव्यापी असली पाहिजे.गोडसेची अभिव्यक्ती हवी की गांधीजींची अभिव्यक्ती हवी, हे ठरवण्याची वेळ आली आहे.

श्रीरंजन आवटे म्हणाले, ‘देशाची स्थिती बिकट आहे. त्याविरुद्ध लढा देण्याची शपथ आजच्या शहीद दिनी घेतली पाहिजे.संविधानाचा वारसा नाकारण्याचा प्रयत्न होत आहे. संविधान बदलण्याचा सत्ताधाऱ्यांचा प्रयत्न लपलेला नाही.ध्रुवीकरणाच्या द्वारे विखार पसरवला जात आहे. या लढाईत द्वेष जिंकणार नाही, तर प्रेम जिंकणार आहे’.

पुणे-मूळचे पैलवान असलेले आणि आता भाजपा महायुतीकडून पुणे लोकसभेच्या आखाड्यात उतरलेले पै. मुरलीधर मोहोळ यांच्या प्रचारासाठी हजारो मल्ल पुण्यात शड्डू ठोकणार आहेत. आपल्यातीलच एका पैलवानाला थेट लोकसभेसाठी संधी मिळाल्याने विजयासाठी झोकून देऊन काम करण्याचा निर्धार यावेळी पुणे आणि परिसरातील मल्लांनी एकदिलाने करण्यात आला. पै. मोहोळ यांचे मताधिक्य वाढवण्यासाठी घर ना घर पिंजून काढून असाही निश्चय करत यासाठी कृती आराखडाही तयार करण्यात आला आहे.

पैलवानकीचा सराव करत असताना मोहोळ यांनी कोल्हापूर आणि पुणे परिसरात पैलवानांचा मोठा मित्र परिवार तयार केला होता. आज मोहोळ स्वतः लोकसभेच्या आखाड्यात उतरल्याने पुणे आणि परिसरातील मल्लही मोहोळ यांच्या प्रचारासाठी एकवटले असून पुढील प्रचारासाठी प्लॅन तयार करण्यात आला आहे. त्यात पुढील ४५ दिवसांचे नियोजन करण्यात आले आहे. कर्वे रस्त्यावरील अंबर हॅाल येथे झालेल्या बैठकीत महाराष्ट्र केसरी, हिंदकेसरी, विविध तालमींचे वस्ताद, राष्ट्रीय-आंतरराष्ट्रीय कुस्तीपटू आवर्जून उपस्थित होते. पै. दीपक मानकर, पै. बापूसाहेब पठारे, पै. विकास दांगट, पै. आप्पा रेणूसे, पै. शुक्राचार्य वांजळे, पै. बाबा कंधारे, पै. हनुमंत गावडे, पै. योगेश दोडके, पै. संदीप भोंडवे, पै. विलास कथुरे, पै. ज्ञानेश्वर मांगडे, पै. विजय बनकर, पै. शिवराज राक्षे, पै. राजेश बारगुजे, पै. संतोष गरुड, पै. नितीन दांगट, पै. रामभाऊ सासवडे, पै. पंकज हरपुडे, पै. महेश मोहोळ, पै. राजू मोहोळ, पै. तात्या भिंताडे, पै. अभिजीत आंधळकर, पै. विजय जाधव, पै. अमोल बराटे, पै. शिवाजी तांगडे यांच्यासह पुणे आणि परिसरातील पैलवान मोठ्या संख्यने उपस्थित होते.

महाराष्ट्र केसरी विकी बनकर म्हणाले, आमच्या पैलवानांपैकी एक पैलवान थेट दिल्लीत जाणार आहे. ही आम्हा सर्वांसाठीच मोठी समाधानाची बाब आहे. म्हणून मोहोळ यांच्या विजयात आपलाही वाटा असावा अशी प्रत्येक पैलवानाची भावना आहे. म्हणूनच आम्ही एकवटलो आहोत. आम्ही एकत्रित येत जास्तीत जास्त लोकांपर्यंत पोहोचण्यासाठी नियोजन करत असून यात हजारो पैलवान सहभागी होत आहेत. मोहोळ यांचे मताधिक्य वाढवणे ही आता आमची जबाबदारी आहे आणि ती आम्ही यसस्वीपणे पार पाडू, हा विश्वास आहे’.

हिंद केसरी पै. योगेश दोडके म्हणाले, ‘मोहोळ यांना मिळालेली उमेदवारी ही आम्हा सर्व पैलवानांचा सन्मान आहे. ते लोकसभेत गेल्यावर आम्हा पैलवानांचे प्रश्न पोटतिडकीने मांडतील आणि ते सोडवण्यासाठी प्रामाणिक पाठपुरावा करतील, हा विश्वास आहे. म्हणूनच आम्ही सर्वांनी मोहोळ यांच्या पाठिशी ठामपणे उभे राहण्याचा निर्णय घेतला आहे’.

मुरलीधर मोहोळ म्हणाले, ‘लाल मातीशी नाते असणारा माझा परिवार एकवटला असून सर्वजण त्यांच्या पातळीवर प्रचारासाठी सज्ज होत आहेत. येत्या कालावधी ८ ते ९ हजार पैलवान स्वयंस्फूर्तीने प्रचारात सहभागी होणार आहेत. विशेष म्हणजे माझा सर्व पैलवान परिवार माझ्या उमेदवारीच्या निमित्ताने एकत्र आला आहे, ही निश्चितच आनंदाची बाब आहे.

पै. अप्पा रेणुसे म्हणाले, ‘पुण्यासारख्या शहराचे प्रतिनिधीत्व करणाऱ्या पैलनावाला थेट संसदेत जाण्याची संधी मिळत आहे, हा सर्व पैलवानांचा सन्मान आहे. आपण सर्वांनी पुढील कालावधीत जबाबदारीने घरोघरी प्रचार केल्यास मोहोळ यांना मोठे मताधिक्य मिळेल’.

पै. दिपक मानकर म्हणाले, ‘मोहोळ यांच्या मागे पैलवानांची ताकद उभी राहिल्याने त्यांचे मताधिक्य विक्रमी असेल हा विश्वास आहे. आम्ही सर्वजण विश्वासाने एकत्र आलो असून ही निवडणूक मुरलीधर मोहोळ यांची नाही तर ही निवडणूक दीपक मानकर यांची आहे.’

मुरलीधर मोहोळ यांच्या प्रचारासाठी भाजपने केले प्रचाराचे सूक्ष्म नियोजन

पुणे लोकसभा मतदारसंघातील भाजप, शिवसेना, आरपीआय (ए) आणि महायुतीचे अधिकृत उमेदवार मुरलीधर मोहोळ यांच्या प्रचारासाठी शहर भाजपने कंबर कसली असून, प्रचाराचे सूक्ष्म नियोजन करण्यात आले आहे.

यासंदर्भात आज शहर कार्यालयात निवडणूक व्यवस्थापन समितीची बैठक पार पडली. या समितीत ७० हून अधिक अनुभवी कार्यकर्त्यांचा समावेश आहे. लोकसभा आणि विधानसभा स्तरावरील समित्यांची निर्मिती पूर्ण झाली आहे.

शहराध्यक्ष धीरज घाटे, खासदार डॉ. मेधा कुलकर्णी, प्रदेश उपाध्यक्ष माधव भंडारी, उपाध्यक्ष राजेश पांडे, चिटणीस ऍड वर्षा डहाळे, संयोजक श्रीनाथ भिमाले यांनी मार्गदर्शन केले.

भांडारी म्हणाले, उत्तम निवडणूक व्यवस्थापनातून पुणे मतदारसंघात भाजप विक्रमी मताधिक्य मिळवेल असा विश्वास वाटतो. व्यवस्थापन पूर्ण झाले असून त्याच्या अंमलबजावणीची प्रक्रिया सुरू केली आहे.

घाटे म्हणाले, बूथ समितीचे व्यवस्थापन, विविध समाज घटकांतील मतदार संपर्क, लाभार्थी संपर्क, प्रसिद्धी, डिजिटल माध्यमे, प्रचार व्यवस्थापन, साहित्य निर्मिती, नेत्यांचे दौरे, सभा मेळावे, आचारसंहिता आदी विषयांच्या समित्यांची स्थापना करून कामाचे सूक्ष्म नियोजन करण्यात आले आहे.
मोहोळ यांना विविध समाज घटकांचा मोठा पाठिंबा मिळत आहे

सोसायटी ऑफ ऑटोमोटिव्ह इंजिनिअर्सतर्फे ‘ऑटोमोटिव्ह फ्युचर ट्रेंड्स’वर चर्चासत्र
पुणे : “प्रगत तंत्रज्ञान, इनोव्हेशनच्या साहाय्याने शाश्वत इंधनावर चालणाऱ्या गाड्यांची निर्मिती होत आहे. रस्त्यांचा दर्जा उंचावत आहे. ईलेक्ट्रीकल व्हेईकल मोठ्या प्रमाणात रस्त्यावर येत असून, त्यासाठी पूरक पायाभूत सुविधा उभारण्यासाठी प्रयत्न सुरु आहेत. भविष्यात कार्बनमुक्त व अपघाताविरहित वाहतूक व्यवस्था उभारण्यावर भर दिला जात आहे,” असे मत ऑटोमोटिव्ह रिसर्च असोसिएशन ऑफ इंडियाचे (एआरएआय) संचालक डॉ. रेजी मथाई यांनी व्यक्त केले.

सोसायटी ऑफ ऑटोमोटिव्ह इंजिनिअर्स (एसएई) इंडिया आणि ऑटोमोटिव्ह रिसर्च असोसिएशन ऑफ इंडिया (एआरएआय) यांच्या संयुक्त विद्यमाने ऑटोमोटिव्ह क्षेत्रातील भविष्यात येणाऱ्या नवप्रवाहांवर विचारमंथन करण्यासाठी ‘ऑटोमोटिव्ह फ्युचर ट्रेंड्स’वर चर्चासत्राचे आयोजन केले होते. होमियोपॅथ व काऊन्सलर डॉ. मीनल सोहोनी, ‘एआरएआय’च्या उपसंचालिका उज्ज्वला कार्ले, फोर्स मोटर्सचे डॉ. बाळासाहेब शिंदे, सागे इंजिनिअरिंग कन्सल्टन्सीचे महेश शिंदे, एमआयटी विश्वशांती विद्यापीठातील संशोधक प्राध्यापक डॉ. आनंद कुलकर्णी यांनी या चर्चासत्रात मार्गदर्शन केले. 

कर्वे रस्त्यावरील हॉटेल प्रेसिडेंटमध्ये झालेल्या या चर्चासत्राच्या उद्घाटनप्रसंगी व्हेक्टर इंजिनिअरिंग सोल्युशन्सचे संचालक एन. पी. वाघ, ‘एआयएसएसएमएस’ येथील सहयोगी प्राध्यापक डॉ. अविनाश वाघमारे, स्पेक्ट्राटेकचे संचालक केशव ताम्हणकर, ‘एसएई’ वेस्टर्न सेक्शनचे सदस्य प्रकाश सरदेसाई व संजय निबंधे, कार्यकारी संचालक रमेश पसरीजा, सहायक संचालक मोहन पाटील, व्यवस्थापक परेश शितोळे, सागर मुरुगकर व ओंकार देशपांडे आदी उपस्थित होते. यावेळी ‘एसएई’तर्फे घेण्यात आलेल्या स्पर्धेचे पारितोषिक वितरण झाले.

डॉ. रेजी मथाई म्हणाले, “दळणवळण अधिक सक्षम होण्यासाठी ‘व्हिजन झिरो’ आणि ‘नेट झिरो’ संकल्पना राबविण्यात येत आहे. वाहतुकीसंबंधी नियमावली करण्यासह चार्जर, बॅटरी यामध्ये इंनोव्हेशन सुरु आहे. इलेक्ट्रॉनिक, सॉफ्टवेअरचा वापर वाढवून कार्बनमुक्त व अपघातमुक्त वाहतूक कशी बनवता येईल, या दृष्टीने विचारविनियम केला जात असून, त्या पद्धतीची धोरणे आपल्याला बनवावी लागतील. त्याचप्रमाणे २०२५ मध्ये ‘ई-२०’ ची अंबलबजावणी होणार आहे. हायड्रोजन इंधन वाढवण्यावर भर दिला जात आहे. जागतिक स्तरावर लागू होईल, अशा पद्धतीची नियमावली तयार केली जात आहे.”

डॉ. मीनल सोहोनी यांनी तणावमुक्त जीवन कसे जगावे, याचे प्रात्यक्षिकांसह सादरीकरण केले. कार्यक्षमता वाढविण्यासाठी मनशांती गरजेची असून, कामाच्या धबडग्यातून स्वतःसाठी थोडा वेळ दिला पाहिजे. योग्य व्यायाम, प्राणायाम याचे महत्व अधोरेखित केले. प्रा. डॉ. अविनाश वाघमारे यांनी ‘एसएई’तर्फे घेण्यात आलेल्या स्पर्धांविषयीची माहिती दिली. रमेश पसरीजा यांनी स्वागत-प्रास्ताविक केले. अनिता वर्मा यांनी सूत्रसंचालन केले. एन. पी. वाघ यांनी आभार मानले.

स्त्री आधार केंद्र व गरवारे महाविद्यालय पत्रकारिता व जनसंज्ञापन विभागाचा पुढाकार

पुणे दि.२३: काही दिवसांपूर्वी विधिमंडळाला गरवारे महाविद्यालयाच्या विद्यार्थी-विद्यार्थिनींनी भेट दिलेली होती. त्यावेळी महिला मतदारांच्या लोकप्रतिनिधी यांचे कडून काय अपेक्षा आहेत याबाबत चर्चा झाली होती. त्याचाच पुढचा भाग म्हणून राज्यातील महिला मतदारांचे सर्व्हेक्षण करण्याचे निश्चित झाले आहे. यासाठी स्त्री आधार केंद्र व गरवारे महाविद्यालयाचे पत्रकारिता व जनसंज्ञापन विभाग मिळून सर्व्हेक्षण करणार असल्याचे महाराष्ट्र विधानपरिषद उपसभापती तथा स्त्री आधार केंद्राच्या अध्यक्षा डॉ. नीलम गोऱ्हे यांनी सांगितले.

आबासाहेब गरवारे महाविद्यालय पुणे येथे पत्रकरिता व जनसंज्ञापन विभाग आणि स्त्री आधार केंद्र यांच्या संयुक्त विद्यमाने आयोजित पत्रकारितेच्या विद्यार्थ्यांशी मुक्तसंवाद कार्यक्रम आयोजित करण्यात आला होता त्यावेळी उपसभापती डॉ. नीलम गोऱ्हे बोलत होत्या. याप्रसंगी सुधीर भोसले म. ए. सो. सहायक सचिव, डॉ नूतन कानेगावकर विभाग प्रमुख, प्रा संतोष गोगले आदी मान्यवर उपस्थित होते.

यावेळी उपसभापती डॉ. नीलम गोऱ्हे यांनी सांगितले की, यापूर्वी स्त्री आधार केंद्रांने महिला मतदारांचा अंदाज घेतला होता. त्यावेळी बऱ्याच गोष्टी लक्षात आल्या होत्या. त्यामध्ये कुठली नक्की निवडणूक आहे याची अनेक मतदारांना माहिती नसते. तसेच निवडणुकीचा आठवडा जवळ आल्यावर राजकीय जागृती अधिकाधिक होते असे दिसून आले असल्याचे त्यांनी सांगितले.

यावेळी महिला मतदारांचे सर्वेक्षण पुढच्या महिनाभरामध्ये तीन ते चार टप्प्यांमध्ये होणार आहे. यामध्ये महिला मतदारांच्या अपेक्षांच प्रतिबिंब या व येणाऱ्या सर्व निवडणुकात पडावं हे अपेक्षितच आहे.म्हणून अगदी प्राथमिक स्वरूपामध्ये परंतु महाराष्ट्राच्या सर्व भागांमधून महिला मतदारांचा कानोसा घेण्याचा प्रयत्न करणार आहोत. हा दृष्टिकोन समोर ठेवून सर्वेक्षणाला ३० मार्चपासून सुरुवात होईल. त्याच्यानंतर ते साधारणपणे ३० मे पर्यंत चालणार असल्याचे त्यांनी सांगितले. यातून समोर आलेल्या माहितीचे विविध माध्यमांच्या आणि वाहिन्यांच्या मार्फत त्याचे निष्कर्ष किंवा निरीक्षण मांडणार असल्याचे त्यांनी सांगितले. तसेच हे सर्व्हेक्षण म्हणजे महाराष्ट्रातील ओपिनियन पोल किंवा एक्झिट पोल नसून तो एक समाजशास्त्राच्या अभ्यासातून महिला मतदारांमध्ये जागृती करण्यासाठीचा अराजकीय उपक्रम असल्याचे उपसभापती डॉ. गोऱ्हे यांनी सांगितले.

भारतीय विद्या भवन,इन्फोसिस फाऊंडेशनचा सांस्कृतिक प्रसार उपक्रम 
पुणे ः
भारतीय विद्या भवन आणि इन्फोसिस फाऊंडेशनच्या सांस्कृतिक प्रसार उपक्रमांतर्गत आयोजित  ‘स्वर स्नेहांकित ‘ या संगीत कार्यक्रमाला शनिवारी सायंकाळी चांगला प्रतिसाद मिळाला.
    हा कार्यक्रम अबीर इव्हेन्ट या संस्थेने   सादर केला.गौरी गोळे-लिमये यांनी भावसंगीत, भक्ती संगीत, नाटय संगीतातून बहारदार सादरीकरण केले. त्यांच्या गायनाला श्रोत्यांनी भरभरून प्रतिसाद दिला.
अदिती गराडे(संवादिनी),अवधूत धायगुडे(तालवाद्य),अक्षय शेवडे(तबला) यांनी  साथसंगत केली. हर्षद लिमये यांनी कार्यक्रमाचे  निवेदन केले.  या कार्यक्रमात मानवी आयुष्यातील नात्यांचा सुरेल शोध भावसंगीत,नाट्य संगीत आणि भक्ती संगीताच्या माध्यमातून घेतला गेला.

नाट्यसंगीतामध्ये ‘ उगवला चंद पुनवेचा ‘ ,अभंगामध्ये ‘अबीर गुलाल उधळीत रंग ‘,भावगीत मध्ये  ‘हसले मनी चांदणे ‘, ‘कुहू कुहु  येई साद’, सादर करण्यात आले.चित्रपट गीतामध्ये ‘ आळविते केदार, ‘भरजरी ग पितांबर दिला फाडून ‘ सादर करण्यात आले. त्याचबरोबर रागमाला, चतरंग हे शास्त्रीय संगीतातील प्रकारही सादर झाले.
हा कार्यक्रम शनिवार,२३ मार्च  २०२४ रोजी सायंकाळी साडे पाच   सेनापती बापट रस्ता) येथे  झाला.हा कार्यक्रम विनामूल्य होता.भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत सादर होणारा हा  १९९ वा कार्यक्रम  होता.भारतीय विद्या भवनचे मानद सचिव प्रा.नंदकुमार काकिर्डे यांनी प्रास्ताविक केले आणि कलाकारांचा सत्कार केला.

पिंपरी, पुणे (दि. २३ मार्च २०२४) ज्या कुटुंबामध्ये महिलांना आर्थिक स्वातंत्र्य दिले आहे ते कुटुंब सक्षम पणे स्थिरस्थावर झाल्याचे दिसते. योग्य आर्थिक व्यवस्थापन करून बदलत्या काळातील नवतंत्रज्ञान आत्मसात करीत आपल्या कुटुंबाच्या आर्थिक उन्नतीसाठी पुरुषांबरोबरच महिलांनी देखील सहभाग घेतला पाहिजे. अनुभवी सल्लागार यांच्या मार्गदर्शनाखाली सुयोग्य नियोजन केले तर प्रत्येकाला सुरक्षित आर्थिक उद्दिष्ट गाठता येते असे प्रतिपादन श्रीनिवास होल्डिंग प्रायव्हेट लिमिटेड कंपनीचे संचालक ओंकार पटवर्धन यांनी केले.
श्रीनिवास होल्डिंग प्रा. लि. कंपनीच्या ग्राहक आणि हितचिंतकांचा ग्राहक मेळावा शुक्रवारी चिंचवड येथील प्रा. रामकृष्ण मोरे प्रेक्षागृह येथे आयोजित करण्यात आले होते. यावेळी कंपनीच्या वतीने ‘बदलत्या काळाची गुंतवणूक इन्व्हेस्टमेंट विषयी थोडक्यात’ या माहिती पुस्तिकेचे वितरण करण्यात आले. यावेळी डॉ. जगदीश ढेकणे, अनिकेत बुटाला, आनंद मुथा, कंपनीचे संचालक सुहास गनबोटे, अरुणा गनबोटे, स्नेहल पटवर्धन, चैतन्य कुलकर्णी आदी उपस्थित होते.
यावेळी चैतन्य कुलकर्णी व सह कलाकारांनी हिंदी, मराठी चित्रपट व पारंपारिक गीतांचा सांस्कृतिक कार्यक्रम सादर केला.
ओंकार पटवर्धन यांनी आर्थिक व्यवस्थापन याविषयी मार्गदर्शन करताना सांगितले की, आर्थिक नियोजन हा खूप मोठा आणि कधीही न संपणारा विषय आहे. यामध्ये बरेच टप्पे आहेत. पण कुठून तरी सुरुवात होणे महत्त्वाचे आहे. बाजारामध्ये अनेक गुंतवणुकीचे पर्याय उपलब्ध आहेत. गुंतवणूक करताना त्या गुंतवणुकीची सुरक्षितता, तरलता, कर, परतावा, अनुकूलता आणि गुंतवणुकीची वेळ याचा प्राधान्याने विचार करावा. सुरक्षिततेसाठी आयुर्विमा, अपघात विमा, तसेच अचानकपणे उद्भवणाऱ्या वैद्यकीय उपचारांसाठी राखीव निधी, दीर्घकालीन ठेव योजना, आवर्तक ठेव योजना, एसआयपी (पद्धतशीर गुंतवणूक योजना), एसडब्लूपी याबाबत माहिती घ्यावी. आधी घर घ्यावे की म्युच्युअल फंडात गुंतवणूक करावी. निवृत्तीनंतरची आर्थिक गरज याविषयी ओंकार पटवर्धन यांनी चित्रफितीद्वारे मार्गदर्शन केले. निवडक ग्राहकांनी आपले कंपनीच्या सेवा सुविधा विषयी मनोगत व्यक्त करून शुभेच्छा दिल्या.
स्वागत, प्रास्ताविक स्नेहल पटवर्धन आणि आभार अरुण गणबोटे यांनी मानले.

mपिंपरी, पुणे (दि. २३ मार्च २०२४) आयुष्यात यशस्वी होण्यासाठी पाहिलेली स्वप्न पूर्ण करण्यासाठी कठोर परिश्रम करा. म्हणजे स्वप्नांना गवसणी घालता येईल. आज तुम्ही फिजिओथेरपी पदवी प्राप्त केली. हे यश संपादन करताना आई – वडील, शिक्षकांनी तुमच्यावर जो विश्वास दाखवला आहे, त्याला तडा जाऊ देऊ नका. फिजिओथेरपी डॉक्टर म्हणून उत्तम सेवा प्रदान करा, असे प्रतिपादन चाकण नगरपरिषदेचे कार्यकारी अधिकारी संदीप चिद्रावार यांनी केले.
स्व. फकिरभाई पानसरे एज्युकेशन फाऊंडेशनच्या निगडी येथील फकिरभाई पानसरे कॉलेज ऑफ फिजिओथेरपीचा सातवा पदवी प्रदान समारंभ प्राधिकरणातील ग. दि. माडगूळकर सभागृह येथे आयोजित करण्यात आला होता. यावेळी डॉ. संजीव कुमार पाटील, जॉर्न जोशेफ, जॉर्डन संसारे, स्व. फकिरभाई पानसरे एज्युकेशन फाऊंडेशनचे अध्यक्ष निहाल आझम पानसरे, संचालिका डॉ. झोया पानसरे, संचालक डॉ. श्याम अहिरराव, प्राचार्या डॉ. वर्षा कुलकर्णी आदी उपस्थित होते.
यशस्वी विद्यार्थ्यांची संवाद साधताना डॉ. झोया पानसरे म्हणाल्या, तुम्ही फिजिओथेरपीचा अभ्यासक्रम पूर्ण करून पदवी प्राप्त केली आहे. पुढील काळात फिजिओथेरपिस्ट म्हणून जबाबदारीने काम करा. आपल्या ज्ञानाचा समाजाला उत्तम सेवा देण्यासाठी उपयोग करा, असे डॉ. झोया पानसरे यांनी सांगितले.
आपल्याला पदवी मिळाली म्हणजे शिक्षण संपले असे समजू नका. शिक्षण निरंतर चालणारी प्रक्रिया आहे. सातत्याने नवनवीन शिक्षण, संशोधन, अनुभव यांचा ज्ञान रूपी संचय जमा करा. उपचारासाठी आलेल्या रूग्णांना धीर दिला पाहिजे. गोरगरीब रुग्णांवर मोफत उपचार करून त्यांना मदत करा. आपले आईवडील, गुरूजनांना विसरू नका‌; याप्रमाणे कार्य करीत राहिलात तर पुढील आयुष्यात यशोशिखरावर पोहचाल असे डॉ. श्याम अहिरराव म्हणाले.
प्राचार्य डॉ. वर्षा कुलकर्णी यांनी महाविद्यालयाच्या कार्याचा आढावा घेतला. राजू शिंगोटे यांनी मनोगत व्यक्त केले. यावेळी उत्कृष्ट विद्यार्थी डॉ. शराण्या बापट, डॉ. प्रांजली झेंडे, उत्कृष्ट शिक्षक – डॉ. भाग्यश्री बडवे आणि महाविद्यालयाच्या समर्पित कामगिरीसाठी राजू शिंगोटे यांना गौरविण्यात आले. यावेळी विद्यार्थी, पालक मोठ्या संख्येने उपस्थित होते.
कार्यक्रम यशस्वी करण्यासाठी सर्व वरिष्ठ शिक्षकांनी योगदान दिले. पारितोषिक वितरणाचे संचालन डॉ. श्रुती मुळावकर यांनी केले. स्वागत डॉ. मानसी चौधरी, डॉ. एकता पाटील, सूत्रसंचालन डॉ. नेहा देशपांडे यांनी तर डॉ. लावण्या अय्यर यांनी आभार मानले.