पुणे : श्रीमंत भाऊसाहेब रंगारी गणपती ट्रस्ट आणि स्वस्तिक इको एनर्जी यांच्या संयुक्त विद्यमाने मुठा नदीपात्र स्वच्छता अभियानाचे आयोजन करण्यात आले. स्वच्छ, सुंदर आणि शाश्वत भविष्यासाठी राबविण्यात आलेल्या या उपक्रमाला नागरिकांचा उत्स्फूर्त प्रतिसाद मिळाला.

या अभियानात गुड मॉर्निंग ग्रुप, कात्रज तसेच एच. व्ही. देसाई कॉम्पिटिटिव्ह एक्झाम्स सेंटर यांनी सक्रिय सहभाग नोंदविला. नदी स्वच्छतेच्या या उपक्रमात तब्बल ७३ पर्यावरणप्रेमींनी सहभागी होत मुठा नदीपात्रातील कचरा हटविण्यासाठी श्रमदान केले.

पर्यावरण संवर्धन आणि नदी स्वच्छतेबाबत जनजागृती निर्माण करण्याच्या उद्देशाने आयोजित करण्यात आलेल्या या अभियानामुळे नागरिकांमध्ये पर्यावरणाबद्दल सकारात्मक संदेश पोहोचला. सहभागी स्वयंसेवकांनी भविष्यातही अशा उपक्रमांमध्ये सक्रिय सहभाग घेण्याचा निर्धार व्यक्त केला.

आयोजकांनी सर्व सहभागी, स्वयंसेवक आणि सहकार्य करणाऱ्या संस्थांचे आभार मानत पर्यावरण संरक्षणासाठी सामूहिक प्रयत्नांची गरज अधोरेखित केली.

पुणे, दि. १६ : सन २०२६-२७ या शैक्षणिक वर्षात सामाजिक न्याय विभागाअंतर्गत क्रांतीज्योती सावित्रीबाई फुले मुलींचे शासकीय वसतिगृह येरवडा, (गुणवंत) पुणे येथे इयत्ता ११ व १२ वी नंतर प्रवेश घेवू इच्छिणाऱ्या अनु. जाती प्रवर्गाच्या विद्यार्थिनींना मोफत शासकिय वसतिगृह प्रवेश देण्यात येणार आहे.

वसतिगृह प्रवेश हा प्रवर्ग निहाय गुणवत्तेनुसार राहील. सदर शासकीय वसतिगृहात विनामुल्य निवास, आंथरूण-पांघरुण, भोजन, पुस्तके, स्टेशनरी इतर शैक्षणिक बाबींकरीता आर्थिक सहाय्य, तसेच दरमहा निर्वाह भत्ता इत्यादी सुविधा पुरविण्यात येतात. इच्छुक विद्यार्थ्यांनी वसतिगृह प्रवेशासाठी https://hmas.mahait.org/ या संकेतस्थळावर ऑनलाईन अर्ज करावे, असे आवाहन समाज कल्याण विभागातर्फे करण्यात आले आहे.

पुणे, दि. १६ : अनुसूचित जाती व नवबौध्द घटकांतील स्वयंसहायता बचत गटांना मिनी ट्रॅक्टर व त्याची उपसाधने उपलब्ध करून देण्यासाठी समाज कल्याण विभागामार्फत अर्थसहाय्य योजना राबविण्यात येत आहे. या योजनेंतर्गत किमान ९ ते १८ अश्वशक्ती क्षमतेचा मिनी ट्रॅक्टर व त्याची उपसाधने खरेदी करण्यासाठी प्रति पात्र बचत गटास रु. ३.१५ लाखांपर्यंत अर्थसहाय्य देण्यात येणार आहे.

या योजनेसाठी अर्ज सहाय्यक आयुक्त, समाज कल्याण, जिल्हा पुणे कार्यालय, सामाजिक न्याय भवन, सर्व्हे क्र. १०४/१०५, विश्रांतवाडी पोलीस स्टेशनसमोर, येरवडा, पुणे – ४११००६ येथे स्वीकारले जातील. अर्ज सादर करण्याची अंतिम मुदत ३१ ऑगस्ट २०२६ आहे.

योजनेचा लाभ घेण्यासाठी बचत गट नोंदणीकृत असणे, गटाच्या नावाने राष्ट्रीयीकृत बँकेत खाते असणे, गटातील किमान ८० टक्के सदस्य अनुसूचित जाती व नवबौध्द घटकांतील असणे, सदस्य महाराष्ट्र राज्याचे रहिवासी असणे तसेच गटाचे अध्यक्ष व सचिव हे अनुसूचित जाती व नवबौध्द घटकांतील असणे आवश्यक आहे.
पात्र स्वयंसहायता बचत गटांनी विहित मुदतीत अर्ज सादर करून योजनेचा लाभ घ्यावा, असे आवाहन समाज कल्याण विभागाने केले आहे.

पुणे, दि. १६ : हिंदुहृदयसम्राट बाळासाहेब ठाकरे महाराष्ट्र समृद्धी महामार्गावरील सुमारे ७२७ कोटी रुपयांच्या हरितीकरण प्रकल्पाची जबाबदारी वन विभागाकडे हस्तांतरित करण्यात आली आहे. या निर्णयामुळे देशातील सर्वात मोठ्या महामार्ग हरितीकरण प्रकल्पाच्या संवर्धनासाठी वन विभागाची भूमिका अधिक बळकट होणार असल्याची माहिती विभागीय वन अधिकारी सुनिल शिंदे यांनी दिली आहे.

नागपूर ते ठाणे दरम्यानच्या ७०१ किलोमीटर लांबीच्या समृद्धी महामार्गालगत ४,५०० हेक्टर क्षेत्रात ३० लाखांहून अधिक वृक्ष व वनस्पतींची लागवड करण्यात आली आहे. यामध्ये ११.३२ लाख वृक्ष, १२.५४ लाख झुडपे, ३.८० लाख वेली, सुमारे ३ लाख बांबू आणि २.९६ लाख अगेव वनस्पतींचा समावेश आहे.

या हरित संपत्तीच्या संवर्धनासाठी अत्याधुनिक सिंचन व्यवस्था उभारण्यात आली असून, त्यामध्ये 70 विहिरी, 12 जलस्त्रोत, 9 जलसाठे, 81 पंपगृहे, 2 हजार 287 किलोमीटर जलवाहिन्या अणि 10 हजार 256 किलोमीटर ठिबक सिंचन जाळे विकसित करण्यात आले आहे. वृक्षलागवड, देखभाल, संवर्धन आणि सिंचन व्यवस्थापनाची जबाबदारी वन विभागाकडे राहणार आहे. यासाठी आवश्यक निधी महाराष्ट्र राज्य रस्ते विकास महामंडळामार्फत उपलब्ध करून देण्यात येणार आहे.

या हस्तांतरणासाठी महाराष्ट्र राज्य रस्ते विकास महामंडळ आणि सामाजिक वनीकरण विभाग यांच्यात सामंजस्य करार करण्यात आला असून, समृद्धी महामार्गावरील हरित पट्टा पर्यावरण संरक्षण, कार्बन शोषण, जैवविविधता संवर्धन तसेच प्रदूषण नियंत्रणात महत्त्वपूर्ण योगदान देणार असल्याचेही विभागीय वन अधिकारी सुनिल शिंदे यांनी कळविले आहे.
000

पुणे.दि.१५: महिलांच्या सक्षमीकरणासाठी अनेक कायद्यांमध्ये बदल झाले असले, तरी त्यांची प्रभावी अंमलबजावणी आणि महिलांपर्यंत कायद्यांची माहिती पोहोचविणे ही आजची मोठी गरज आहे. तसेच महिलांच्या कायदेनिर्मितीतील आणि समाजपरिवर्तनातील योगदानाचा इतिहास नव्या पिढीपर्यंत पोहोचला पाहिजे, असे प्रतिपादन शिवसेना नेत्या व मा. विधानपरिषद उपसभापती डॉ. नीलम गोऱ्हे यांनी केले.

महाराष्ट्र साहित्य परिषद, पुणे यांच्या वतीने आयोजित शं. ना. जोशी पुरस्कार ‘कायदा निर्मितीमध्ये महिलांचे योगदान’ या पुस्तकाच्या लेखिका विद्या देवधर यांना सोमवारी प्रदान करण्यात आला. डॉ. गोऱ्हे यांच्या हस्ते हा पुरस्कार प्रदान करण्यात आला. यावेळी महाराष्ट्र साहित्य परिषदेचे अध्यक्ष योगेश सोमण, प्रमुख कार्यवाह डॉ. स्वाती महाळंक, स्थानिक कार्यवाह सुनेत्रा मंकणी, ॲड. प्रार्थना सदावर्ते, लेखिका मंगला गोडबोले, अंजली कुलकर्णी यांच्यासह साहित्य, सामाजिक आणि राजकीय क्षेत्रातील मान्यवर उपस्थित होते.

यावेळी बोलताना डॉ. गोऱ्हे म्हणाल्या की, भारतभरातील महिलांचा चरित्रकोष तयार करण्याचा विद्या देवधर यांचा संकल्प अत्यंत मौल्यवान ठरणार आहे. सतीप्रथा आणि बालविवाहासारख्या प्रतिकूल सामाजिक परिस्थितीतही अहिल्याबाई होळकर यांनी सती न जाता राज्याची जबाबदारी स्वीकारली आणि लोककल्याणकारी राज्यकारभार उभा केला. त्यांचे कार्य आजही प्रेरणादायी आहे.

त्या पुढे म्हणाल्या, समाजकारण, राजकारण आणि स्वातंत्र्य चळवळीत महिलांचे योगदान अत्यंत महत्त्वाचे राहिले आहे. मात्र, आजही अनेक क्षेत्रांत महिला मागे असल्याचे दिसते आणि त्यासाठी पुरुषप्रधान संस्कृती कारणीभूत ठरली आहे. गेल्या काही वर्षांत महिलांच्या सक्षमीकरणासाठी अनेक कायद्यांमध्ये बदल करण्यात आले आहेत. मात्र, महिलांना या कायद्यांची माहिती व्हावी यासाठी व्यापक प्रबोधन होणे आवश्यक आहे.

महिलांनी आज उच्च शिक्षणात मोठ्या प्रमाणावर प्रवेश केला असून विविध क्षेत्रांतील जबाबदाऱ्या समर्थपणे सांभाळल्या आहेत. तरीही महिला विषयक कायद्यांच्या अंमलबजावणीसाठी असलेल्या यंत्रणा अद्याप दुर्बल असल्याचे डॉ. गोऱ्हे यांनी नमूद केले. सध्याच्या पिढीला पूर्वीच्या पिढीचा संघर्ष, इतिहास आणि योगदान समजणे आवश्यक आहे. महिलांना जागृत करणारी माहिती सोशल मीडियाच्या माध्यमातून सर्वांपर्यंत पोहोचविण्यासाठी अधिक प्रयत्न होणे गरजेचे असल्याचेही डॉ. गोऱ्हे यांनी सांगितले.

महिला आमदारांना प्रसूती काळात रजेची तरतूद असावी, ही बाब आपण विधिमंडळाच्या निदर्शनास आणून दिली असल्याचे सांगताना डॉ. गोऱ्हे म्हणाल्या की, यापूर्वी या विषयाकडे गांभीर्याने लक्ष वेधले गेले नव्हते. कायदेनिर्मिती प्रक्रियेत पीडित महिलांचे योगदानही तितकेच महत्त्वाचे असून त्यांच्या अनुभवांमुळे अनेक कायद्यांना दिशा मिळाली आहे.

स्त्री संघटनांच्या माध्यमातून स्वमदत गट, कायदेशीर सहाय्य आणि महिलांना कायद्यांचा झालेला लाभ यावर चर्चा होणे आवश्यक आहे. कायदा तयार करताना समाज आणि राज्यकर्ते या दोघांची भूमिका महत्त्वाची असते. राज्य सरकारच्या वतीने लवकरच एकल महिला धोरणाची अंमलबजावणी करण्यात येणार असल्याची माहितीही डॉ. गोऱ्हे यांनी दिली.

पंतप्रधान नरेंद्र मोदी यांनी लोकसभेत मांडलेले ‘नमो शक्ती वंदन विधेयक’ आगामी काळात प्रत्यक्षात अमलात आलेले दिसेल, असा विश्वास व्यक्त करताना डॉ. गोऱ्हे यांनी महिलांच्या राजकीय प्रतिनिधित्वाच्या दृष्टीने हा महत्त्वाचा टप्पा असल्याचे सांगितले. तसेच तत्कालीन मुख्यमंत्री एकनाथ शिंदे यांच्या सरकारने नावामध्ये आईच्या नावाचा समावेश करण्याचा निर्णय घेऊन महिलांचा सन्मान केला.

पुण्याच्या संदर्भात बोलताना त्यांनी मूळ पुणेकरांच्या सुरक्षेसाठी ‘सुरक्षित व दक्ष पुणे’ हे व्यासपीठ सुरू करण्याचा विचार असल्याचे सांगितले.

पुरस्कार स्वीकारताना विद्या देवधर म्हणाल्या, ‘‘या पुस्तकाच्या लेखनादरम्यान महिलांच्या कायदेनिर्मितीतील ऐतिहासिक योगदानाचा अभ्यास करता आला. स्वातंत्र्यपूर्व काळातही महिलांनी कायदे, प्रशासन आणि राज्यकारभारात महत्त्वपूर्ण भूमिका बजावली होती. ‘महिला चरित्र कोष’ तयार करण्याचा संकल्प असून त्यातून जगभरातील महिलांच्या कार्याचा सविस्तर आढावा मांडण्यात येईल.’’

डॉ. स्वाती महाळंक यांनी महिलांमध्ये कायद्यांविषयी आवश्यक ती सजगता निर्माण करण्यासाठी सामूहिक प्रयत्नांची गरज व्यक्त केली. तर ॲड. प्रार्थना सदावर्ते यांनी पुस्तकात भारतीय कायदेनिर्मिती प्रक्रियेत महिलांच्या योगदानाचा सखोल आढावा घेण्यात आल्याचे सांगितले.

जिल्हाधिकाऱ्यांच्या अध्यक्षतेखाली जिल्हा रस्ता सुरक्षा समितीची बैठक संपन्न

पुणे, दि. १५: जिल्ह्यातील रस्ते अपघातात नागरिकांचे होणारे मृत्यूंचे प्रमाण कमी करण्यासाठी अपघातग्रस्त (ब्लॅकस्पॉट) प्रत्यक्ष स्थळ पाहणी करावी. सर्व संबंधित विभागाने स्थळ पाहणी दरम्यान सुक्ष्म निरीक्षण नोंदवून अल्प व दिर्घकालीन उपाययोजना सूचवाव्यात, याबाबत लवकरच आढावा बैठक घेवून कार्यवाही करण्याबाबत सूचना दिल्या जातील, अशा सूचना जिल्हाधिकारी जितेंद्र डुडी यांनी दिल्या.

जिल्हाधिकारी कार्यालयात जिल्हा रस्ता सुरक्षा समितीची बैठक आयोजित करण्यात आली. यावेळी जिल्हा पोलीस अधीक्षक संदीप गिल, सार्वजनिक बांधकाम विभागाचे अधीक्षक अभियंता भरतकुमार बाविस्कर, पुणे शहर वाहतूक शाखेचे उपायुक्त संदीप भाजीभाकरे, पिंपरी-चिंचवडचे प्रादेशिक परिवहन अधिकारी संदेश चव्हाण, पुण्याचे सहायक उपप्रादेशिक परिवहन अधिकारी स्वप्नील भोसले, पिंपरी-चिंचवडचे राहूल जाधव, बारामतीचे सुरेंद्र निकम, भारतीय राष्ट्रीय महामार्ग प्राधिकरण, विविध सामाजिक संस्थांचे प्रतिनिधी उपस्थित होते.

श्री. डुडी म्हणाले, पुणे, पिंपरी चिंचवड शहर व ग्रामीण भागातील नागरिकांचे अपघातामुळे होणारे मृत्यू रोखण्याला प्राधान्य देण्यात यावे.
पोलीस विभाग, प्रादेशिक परिवहन, भारतीय राष्ट्रीय महामार्ग प्राधिकरण, सार्वजनिक बांधकाम विभाग, महाराष्ट्र राज्य रस्ते विकास महामंडळ, सामाजिक संस्थांचे प्रतिनिधींनी संयुक्त स्थळ पाहणी करावी. ब्लॅक स्पॉटची संयुक्त पाहणी करून अपघाताची कारणे व आवश्यक उपाययोजना याबाबतचा अहवाल २९ जून २०२६ पर्यंत जिल्हाधिकारी कार्यालयास सादर करावे. अपघात रोखण्याकरिता स्थळ पाहणी अहवालात सुचविण्यात आलेल्या उपाययोजनांप्रमाणे सर्व संबंधित विभागाने गांर्भीयाने कार्यवाही करुन जिल्हाधिकारी कार्यालयास अहवाल सादर करावा. यामध्ये हलगर्जीपणा खपवून घेतला जाणार नाही, याबाबत सर्व संबंधित विभागाने नोंद घ्यावी.

वाहतुकीला शिस्त लागण्यासाठी नियमभंग करणाऱ्यांवर कठोर दंडात्मक कारवाई करावी. नवले ब्रिज परिसरातील अपघात कमी करण्यासाठी यापूर्वी सुचविण्यात आलेल्या उपाययोजनांप्रमाणे भारतीय राष्ट्रीय महामार्ग प्राधिकरणाने कार्यवाही करावी, याकरिता निधी उपलब्ध करुन देण्यात येईल, असेही श्री. डुडी म्हणाले.

श्री. गिल म्हणाले, मा. सर्वोच्च न्यायलयाच्या निर्देशाप्रमाणे जिल्ह्यात अपघात कमी करण्याला प्राधान्य देत आहे. राष्ट्रीय महामार्गावरील टोलनाका परिसरात अपघात टाळण्याकरिता मोठ्या आकाराचे जनजागृती फलके लावावीत. जिल्हा पोलीस ग्रामीण दलाकडून अपघातप्रवण स्थळाची यादी लवकरच उपलब्ध करुन देण्यात येईल. सर्व संबंधित विभागाचे अधिकाऱ्यांना सोबत घेवून पोलीस प्रशासनाच्यावतीने यादीतील स्थळनिहाय पाहणी दौऱ्याचे लवकरच आयोजन करण्यात येईल. वाहतूक कोंडीमागे नियमांचे उल्लंघन हे एक प्रमुख कारण असून नागरिकांनी स्वयंशिस्त पाळणे आवश्यक आहे, असेही श्री. गिल म्हणाले.

या बैठकीत परिवहन विभाग, सार्वजनिक बांधकाम विभाग, पोलीस प्रशासन, सामाजिक संस्थेच्या प्रतिनिधींनी अपघात कमी करण्याकरिता करण्यात येणाऱ्या उपाययोजनांबाबत माहिती दिली.

पुणे- श्री संत ज्ञानेश्वर महाराज व श्री संत तुकाराम महाराज यांच्या पालख्यांचे आगमन पुणे शहरात गुरुवार, दिनांक ०९ जुलै २०२६ रोजी होत आहे. या पार्श्वभूमीवर पुणे महानगरपालिकेच्या वतीने पालखी मार्गांची जागा पाहणी आयोजित करण्यात आली होती. सदर जागा पाहणीस केंद्रीय राज्यमंत्री मुरलीधर मोहोळ,महापौर मंजुषा दीपक नागपुरे,उपमहापौर परशुराम वाडेकर, स्थायी समिती अध्यक्ष श्रीनाथ भिमाले, आयुक्त नवल किशोर राम अतिरिक्त महापालिका आयुक्त ( ई) प्रजीत नायर, पक्षनेते, राष्ट्रवादी कॉंग्रेस पक्ष ( श प गट) सोपान उर्फ काका चव्हाण, सुनील शिंदे, सुहास टिंगरे, हर्षल उर्फ रवि टिंगरे, शीतल सावंत संगीता दांगट, अश्विनी भंडारे, नंदिनी धेंडे, रफिक शेख पल्लवी जावळे, रवींद्र काकडे, दत्ता बहिरट, शहर अभियंता अनिरुद्ध पावसकर,मुख्य अभियंता, विद्युत विभाग मनीषा शेकटकर ,उपायुक्त परिमंडळ ५ माधव जगताप,मुख्य अभियंता, पाणी पुरवठा नंदकिशोर जगताप, उपायुक्त परिमंडळ १,आशा राउत,उपायुक्त, शिक्षण विभाग वसुंधरा बारवे,सह महापालिका आयुक्त, उद्यान विभाग अशोक घोरपडे,मुख्य अभियंता पथ राजेश बनकरव क्षेत्रीय कार्यालयातील संबंधित अधिकारी उपस्थित होते.
श्री संत ज्ञानेश्वर महाराज व श्री संत तुकाराम महाराज यांच्या पालखी मार्गाच्या पाहणीमध्ये खालील विषयावर चर्चा होऊन संबंधितांना पालखीचे आगमनप्रसंगी करावयाचे नियोजनाबाबत आदेश देण्यात आले. येरवडा कळस धानोरी क्षेत्रीय कार्यालय, औंध – बाणेर क्षेत्रिय कार्यालय, भवानी पेठ क्षेत्रिय कार्यालय, हडपसर क्षेत्रिय कार्यालय या ठिकाणच्या सुसज्ज आपत्ती व्यवस्थापन कक्ष नियोजनाबाबत रस्ते दुरूस्ती, अतिक्रमण, मुक्कामाच्या ठिकाणाची सुरक्षितता, पाणीपुरवठा, स्वच्छतागृहे, आरोग्यविषयक सेवा याबाबत सोयी-सुविधा उपलब्ध करणे, पावसाळी गटारे, चेंबर्स दुरुस्त करणेबाबत व स्वच्छता विषयक कामे करणेसंबंधी अधिकाऱ्यांना सूचना दिल्या.

• मलनिःसारण विभागास म्हस्के वस्ती, कळस येथील नाल्यावरील कल्व्हर्टची साफसफाई करण्यास तसेच नाल्यांची खोली वाढविण्याचे आदेश देण्यात आले. पालखी मार्गावरील सर्व चेंबर्स तपासून चेंबर्सवर लोखंडी जाळी बसविणे, पावसाळी पाईप तपासून त्यासंबंधित कामे तातडीने करण्याचे सूचित करण्यात आले.
• पुणे शहरातील पावसाळी चेंबर्सवरील कचरा त्याभागातील संबंधित सफाई कर्मचाऱ्यांकडून काढण्याची व्यवस्था संबंधित क्षेत्रीय कार्यालयामार्फत करण्याच्या सूचना देण्यात आल्या.
• वारकऱ्यांच्या आरोग्यासाठी सर्व परिसराची २४ तास स्वच्छता ठेवण्याबाबत सांगण्यात आले. घनकचरा विभागास स्वच्छतेसंबंधी सर्व सुविधा पुरविण्याबाबत आदेश देण्यात आले आहेत.
• विद्युत व्यवस्था खंडीत होणार नाही याबाबत संबंधितांना सुचना करण्यात आल्या आहेत. तसेच पालखी मार्गावर पुरेशी प्रकाश व्यवस्था करण्यास सांगण्यात आले.
• रस्त्यावरील बेवारस गाड्या तसेच अडगळीच्या वस्तू उचलणे व त्याची विल्हेवाट लावणे.
• पालखी मार्गावर ठिकठिकाणी वारकऱ्यांसाठी विसावा/आराम कक्षदेखील उभारण्याची व्यवस्था करण्याबाबत आदेशित करण्यात आले. सदर दोन्ही कक्षामध्ये वारकऱ्यांसाठी, स्वच्छ पिण्याचे पाणी, मोबाईल टॉयलेट्स, इमर्जन्सी मेडिकल युनिट इत्यादी गोष्टींची व्यवस्था करण्यात येईल. त्याचबरोबर ठिकठिकाणी वारकऱ्यांचे आरोग्यविषयक सेवा उपलब्ध होणेकामी फिरते दवाखान्यांनी व्यवस्था करण्याबाबत आदेशित करण्यात आले.
• वाहतूक पोलीसांमार्फत वाहतूक सुरळीत राहावी तसेच पालखी दिंडी सोहळ्यास वाहतुकीचा अडथळा होणार नाही याची काळजी घेण्याबाबत सूचना केल्या.
• पथ विभागाच्या माध्यमातून पदपथ व रस्ते यांची डागडुजी करून घेणेस सांगितले आहे. त्याच बरोबर रस्त्यालगतच्या सिमाभिंती स्वच्छ करण्यात येणार आहेत. पालखी मार्गात अडथळा येणाऱ्या झाडांच्या फांद्यांची छाटणी करण्यात येणार आहे.
• विसाव्याच्या ठिकाणी पालखीचे दर्शन घेण्यासाठी येणाऱ्या नागरिकांची गर्दी आणि गैरसोय होऊ नये याकरिता पालखी दर्शन व्यवस्था व बॅरिकेडस बाबत संबंधितांना आदेश दिले. त्याचबरोबर विसाव्याच्या ठिकाणी प्रसादाची व्यवस्था करताना आपत्तीजन्य परिस्थिती उद्भवू नये याकरिता अग्निशमनविषयक सुविधा देण्यास सांगितले आहे.
• पालखी मार्गावर वाहतुकीस अडथळा ठरणाऱ्या टपऱ्या, अतिक्रमणे काढण्याची कार्यवाही अतिक्रमण विभाग व बहुद्देशीय पथक यांचेमार्फत पुर्ण करण्याचे आदेश देण्यात आलेले आहे.
• पालखी सोहळ्यानिमित्त पाणीपुरवठा विभागाकडून पालखी मार्ग व पालखी तसेच दिंड्यांच्या मुक्कामांची ठिकाणे विचारात घेऊन पालखी मार्गावर व सर्व पेठांमध्ये पाणीपुरवठा करण्यात येत असून, देखभाल दुरुस्तीकामी २४ तास दुरूस्ती यंत्रणा ठेवण्यात येणार आहे.
• संचेती चौक, विश्रांतवाडी चौक परिसर पालखी मार्ग, एफ सी रोड, अलका टॉकीज चौक याठिकाणी मोबाईल टॉयलेट्सची आणि पिण्याच्या पाण्याची व्यवस्था करण्याबाबत संस्थानांच्या प्रतिनिधींनी सूचना केली.
• तसेच ज्या ठिकाणी मंडळामार्फत वारकऱ्यांना जेवण / नाश्ता देण्यात येतो त्या ठिकाणीही स्वच्छता राहावी यासाठी पुरेसे कचरा वेचक सेवक उपस्थित ठेवण्यात येणार आहे. तसेच त्या ठिकाणी स्वच्छ पिण्याचे पाणी उपलब्ध करून दिले जाणार आहेत.
• पालखी मुक्कामाच्या परिसरातील सार्वजनिक शौचालये दुरूस्ती पुर्ण करण्यात येणार असून विविध ठिकाणी मोबाईल टॉयलेट्सची व्यवस्था करण्यात आलेली आहे. तसेच ज्या दिंड्या मनपाच्या शाळांमध्ये मुक्कामी असतात त्या ठिकाणी पाणीपुरवठा, शौचालये उपलब्ध करण्याबाबत आदेशित करण्यात आले.
• आरोग्य विभागाकडून पालखी पूर्वी पालखी मार्गावर तसेच सर्व शाळांमध्ये औषध फवारणी करण्याबाबत सूचना देण्यात आली. तसेच घनकचरा व्यवस्थापन विभागामार्फत स्वच्छता करण्यात येणार असून फिरती शौचालये ठेवणेत येणार आहेत. तसेच सार्वजनिक स्वच्छता गृहे स्वच्छ व दुरुस्ती करण्याचे आदेश देण्यात आलेले आहे.