पुण्यातील विकास कामांबाबत दूरदृष्टी आणि काम पूर्ण करून घेण्याची धमक नसल्यामुळेच गेली १० वर्षे केंद्रात, राज्यात व पुण्यात सत्तेवर असणाऱ्या  भारतीय जनता पक्षामुळे पुण्यातील अनेक मोठे प्रकल्प रखडले. मुठा नदी सुधारणा ( जायका ) प्रकल्प, स्मार्ट सिटी, पुण्याची मेट्रो, पुणे आंतरराष्ट्रीय विमानतळाचा विस्तार, पुण्याहून अनेक शहरांकडे जाणाऱ्या नव्या रल्वे गाड्या असे कोणतेच प्रकल्प भाजप करू शकले नाही. मेट्रो तर गेल्या १० वर्षात पूर्ण होऊ शकली नाही. त्यामुळे पुणेकरांचे मोठे नुकसान झालेले असून या  परिस्थितीत परिवर्तन करीत महाविकास आघाडी व इंडिया आघाडीच्या काँग्रेसला मतदान यंत्रावरील पंजाच्या चित्रापूढील बटन दाबून विजयी करा असे आवाहन पुणे लोकसभा मतदार संघातील महाविकास आघाडी व इंडिया आघाडीचे काँग्रेस पक्षाचे उमेदवार रवींद्र धंगेकर यांनी केले.

कोथरूड मधील प्रभाग क्र. ११रामबाग कॉलनी शिवतीर्थनगर येथे रविवारी सायंकाळी निघालेल्या विराट पदयात्रेच्या समारोप प्रसंगी ते बोलत होते.

कोथरूड विधानसभा मतदार संघातील प्रभाग क्र. ११ मधील ही पदयात्रा ना भूतो ना भविष्यती अशी झाली सुमारे ४००० हून अधिक कार्यकर्ते व नागरिक या पदयात्रेत सहभागी झाले होते.

पदयात्रेत महिलांचा सहभाग मोठा होता तसेच अनेक ठिकाणी महिला गटागटाने उभ्या राहून रवींद्र धंगेकर यांना ओवाळत होत्या. अनेक ठिकाणी त्यांच्यावर पुष्पवृष्टी करण्यात आली. या पदयात्रेत ठिकठिकाणी पथनाट्य आयोजित केली गेली. ‘लोकायत संस्थेतर्फे’ पथनाट्याद्वारे काँग्रेसच्या योजनांची माहिती दिली गेली. याचे सूत्रसंचालन कोथरूड ब्लॉक अध्यक्ष रवींद्र माझिरे आणि यशराज पारखी यांनी केले. या पदयात्रेचे संयोजन माजी जेष्ठ नगरसेवक रामचंद्र उर्फ चंदूशेठ कदम यांनी केले.  याप्रसंगी राष्ट्रवादी काँग्रेस अजितदादा पवार पक्षाचे  संतोष डोख व दिपाली डोखयांनी राष्ट्रवादी काँग्रेस शरदचंद्र पवार पक्षात शेकडो  कार्यकर्त्यांसह कालच्या रॅलीत प्रवेश केला.

पृथ्वीराज चव्हाण यांची उपस्थिती.

या पदयात्रेत रवींद्र धंगेकरांनी श्री विठ्ठल मंदिर, श्री राम मंदिर, श्री देवी मंदिर येथे फुलांचा हार अर्पण करून मनोभावे दर्शन घेतले. पदयात्रेत काँग्रेस पक्ष, राष्ट्रवादी काँग्रेस शरदचंद्र पवार पक्ष, शिवसेना उद्धव बाळासाहेब ठाकरे पक्ष, आम आदमी पार्टी व सर्व मित्रपक्षांचे पदाधिकारी व कार्यकर्ते सहभागी झाले होते. या पक्षांचे झेंडे पदयात्रेत डौलाने फडकत होते. विशेष म्हणजे केळेवाडी परिसरात काँग्रेसचे जेष्ठ नेते व महाराष्ट्राचे माजी मुख्यमंत्री पृथ्वीराज चव्हाण देखील सहभागी होते. पदयात्रेत पृथ्वीराज चव्हाण यांनी अनेक मंडळांना भेटी दिल्या तेव्हा पाठिंब्याच्या जोरदार घोषणा मंडळाच्या कार्यकर्त्यांनी दिल्या.

 चंदूशेठ कदम यांचे ऑफिस – म्हातोबानगर पासून पदयात्रेस सुरुवात झाली – राजमाता जिजाऊनगर (सुतारदरा) – शिवकल्याण गणपती गल्ली क्र. ११ – क्रांतीसेना कमान – जुने विठ्ठल मंदिर – गल्ली क्र. ३१ – गल्ली क्र २८ पांडुरंगनगर – समर्थ चौक – माथवड चौक ते जयभवानीनगर क लाईन – गुरुदत्त चौक,किष्किंधानगर – रामबाग कॉलनी – शंकरराव मोरे विद्यालय ऑफिस समोरून – मोरे श्रमिक वसाहत – राउतवाडी – हनुमाननगर – राजीवगांधी पार्क – इंदिरा पार्क – केळेवाडी विठ्ठल मंदिर ए.आर.ए.आय रोड – आदर्श मित्रमंडळ – विश्वशांती मंडळ – जय श्रीराम तरुण मंडळ येथे समाप्त झाली.

पदयात्रेत उमेदवार रवींद्र धंगेकर, माजी मुख्यमंत्री पृथ्वीराज चव्हाण, माजी गृहराज्यमंत्री रमेशबागवे, माजी जेष्ठ नगरसेवक चंदूशेठ कदम,शिवसेनेचे माजी आमदार चंद्रकांत मोकाटे, माजी नगरसेवक पृथ्वीराज सुतार,माजी नगरसेवक योगेश मोकाटे,शिवसेना उद्धव बाळासाहेब ठाकरेपक्ष पुणे शहर प्रमुख गजानन थरकुडे,आम आदमी पार्टी शहर प्रमुख सुदर्शन जगदाळे धनंजय बेनकर, शिवसेना उद्धव बाळासाहेब ठाकरे पक्ष पुणे उपशहर प्रमुख राजस पळसकर,पुणे शहर काँग्रेस महिला अध्यक्षा पूजा आनंद, कोथरूड ब्लॉक अध्यक्ष रवींद्र माझिरे, महिला ब्लॉक अध्यक्ष मनीषा करपे, राष्ट्रवादी काँग्रेस शरदचंद्र पवार पक्ष ब्लॉक अध्यक्ष स्वप्नील दुधाणे,शिवसेना उद्धव बाळासाहेब ठाकरे पक्षमहिला आघाडी सविता मते,अभिजित मोरे, अमोल काळे,पुणे शहर महिला संघटक सचिव नैना सोनार, महिला उपशहर प्रमुख दुधाणे ताई, पुणे शहर उपाध्यक्ष विजयश्री खळदकर, काँग्रेस, राष्ट्रवादी काँग्रेस शरदचंद्र पवार पक्ष, शिवसेना उद्धव बाळासाहेब ठाकरे पक्ष आणि आम आदमी पक्षाचे सर्व पदाधिकारी आणि कार्यकर्ते उपस्थित होते. सुमारे ४ तास चालेली ही विशाल पदयात्रा रात्री ९.३० च्या सुमारास संपली.

पुणे : महावीर जयंतीनिमित्त जैन समाजातील चारही पंथीयांनी एकत्र येऊन त्यांच्यासह स्थानिकांचाही समावेश करून श्री सकल गंगाधाम महावीर जन्म कल्याणक महोत्सव समितीतर्फे भव्य शोभायात्रा काढण्यात आली.  आनंद, समृद्धी आणि आपुलकीच्या वातावरणात बिबेवाडी गंगाधाम येथील वर्धमानपुरा सोसायटीच्या जैन मंदिरापासून या शोभायात्रेस सुरुवात झाली. या परिसरातील सर्व सोसायट्यांमधून मार्गक्रमण करत या मिरवणुकीची सांगता गंगाधाम फेज 2 येथील जैन मंदिरात झाली. आकर्षक पारंपारिक वेशभूषा,  विविध संगीत समूह आणि ’त्रिसलानंदन वीर की…जय बोलो महावीर स्वामी की… जयकारे ’यांच्या जयघोषात त्यांना नमन व पूजन करून मिरवणूक काढण्यात आली. तसेच या मिरवणुकीत आमदार माधुरी मिसाळ आणि लोकसभा उमेदवार मुरलीधर मोहोळ सहभागी झाले होते, अशी माहिती महावीर जनम कल्याणक महोत्सव समितीचे उमेश मांडोत यांनी दिली.
अशोक हिंगड यांनी सांगितले की, या शोभायात्रेत 2000 हून अधिक जैन अनुयायीही पायी चालत सहभागी झाले होते. हे नयनरम्य दृष्य पाहणसाठी नागरिकांची गर्दी झाली होती. या भव्य मिरवणुकीत 5 रथ, 3 बँड पथक, 1 ढोल ताशा पथक, 1 डीजे सिस्टीम आणि हजारो स्त्री-पुरुष, लहान मुले, तरुण व वृद्ध सहभागी झाले होते.
अहिंसेचे प्रवर्तक भगवान महावीर स्वामींच्या वरघोड्याचे सौंदर्य पाहण्यासारखे होते. फुलांनी सजलेली गाडी आणि मुलांच्या जयघोषाने आसपासचा परिसर दणाला हाता. शोभायात्रेत पारंपारिक पोशाखात महिलांची संख्या केवळ उल्लेखनीयच नव्हती तर त्यांची श्रद्धा आणि भक्ती देखील दिसून येते. उमेश मांडोत, अशोक हिंगड, आनंद कटारिया, सौ. सारिका संचेती, दिनेश अग्रवाल, अनिल पोरवाल, अनिल भन्साळी, नरेश जैन, ललित गुंदेचा आदींनी शोभायात्रा यशस्वी अलौकिक आणि वाखाणण्याजोगा करण्यासाठी केवळ अथक परिश्रम घेतले. त्यांच्यासोबत उमेश मंडोत, अशोक हिंगड, आनंद कटारिया, दिनेश अग्रवाल, नरेश जैन, अनिल पोरवाल, बालचंद बांठिया, प्रवीण चोरबेले, सारिका संचेती, दिलीप जैन, तरुण मोदी, अनिल भन्साळी, तेजराज धोका, संजय राठोड, जितेंद्र राठोड, मणिलाल राठोड, प्रवीण संघवी, पुनित परमार, नितीन शहा, राजेंद्र दुग्गड, अजित सेठिया, सचिन सरनोत, महावीर कटारिया, प्रकाश फुलफगर आदींचे सक्रिय सहकार्य होते. तसेच शोभायात्रेत अशोक हिंगड, आनंद कटारिया, सारिका संचेती, ललित गुंदेचा, महेश कोठारी, नितीन शहा, तरुण मोदी, राहुल परमार, वंदना संजय राठोड यांच्यासह महिलांचा सहभाग अधिक होता.

पुणे, दि. २२ एप्रिल : ” सर्व विरोधक जर एकत्र आले, तर निश्चित समाजावे की राजा प्रामाणिक आहे. दोन हजार वर्षापूर्वी आर्य चाणक्याने जे लिहून ठेवले, ते आजही सर्वार्थाने लागू आहे. याचे सांगण्याचे प्रयोजन म्हणजे आता होऊ घातलेली लोकसभा निवडणूक असून याच काळात ही पुस्तक प्रकाशित होणे महत्वाचे संकेत आहे.” असे मत कार्यक्रमाचे लेखक व पत्रकार डॉ. रवींद्र गुर्जर यांनी व्यक्त केले.
मतदार जागृतीसाठी आणि समृध्द लोकशाहीसाठी माजी वायुसेना व माजी पोलिस अधिकारी अनिल शां. पाटील यांनी लिहिलेल्या ‘चोरांची लोकशाही’ या पुस्तकाचे प्रकाशन टिळक रोड येथील मराठा चेंबर ऑफ कॉमर्सच्या पद्मजी हॉल येथे लेखक व पत्रकार डॉ. रवींद्र गुर्जर, ज्येष्ठ साहित्यिक आणि कथाकार बबन पोतदार, राजहंस प्रकाशनचे संपादक डॉ. सदानंद बोरसे आणि देशभक्त कोशकार चंद्रकांत शहासने, व प्रतिभा पाटील या प्रमुख पाहुण्यांच्या हस्ते पुस्तकाचे प्रकाशन करण्यात आले. या प्रसंगी सेलिब्रेशन अ‍ॅट सिक्टी या पुस्तकाच्या द्वितीय आवृत्ती प्रकाशित करण्यात आली. यावेळी अनिता पाटील व प्रतिभा पाटील या उपस्थित होत्या.
डॉ. रवींद्र गुर्जर म्हणाले,” जगातील सर्वात मोठी लोकशाही असलेल्या भारतामधील वास्तव परिस्थिती काय आहे. लोकशाही खरोखर अस्तित्वात आहे का. भ्रष्टाचाराने पोखरलेल्या देशात खरे  राष्ट्रनिष्ठ आणि सर्वस्व झोकून देण्याची तयारी असलेल्या लोकांचे प्रमाण किती आहे, हे तपासणे गरजेचे आहे. पंतप्रधान पं. नेहरू गेल्यानंतर देशासमोर प्रश्न पडला होता की पुढील पंतप्रधान कोण आहे. पण लोकशाहीने ते दाखवून दिले. तसेच नरेंद्र मोदी नंतर ही या देशात बरेच पंतप्रधान येतील.”
चंद्रकात शहासने म्हणाले,” आम्ही चोर आहोत हे ज्या दिवशी या देशात थांबेल तेव्हाच आम्ही विश्वगुरू बनेल. संविधाच्या आधारावर चाललेल्या या देशात कालानुरूप काही चुका आहेत.  त्याचे आता परीक्षण होणे गरजेचे आहे. सर्वसामान्यांचा संभ्रम, चीड, संताप, अगतिकता या सर्व गोष्टी लेखकाने पुस्तकात मांडल्या आहेत.”
डॉ. सदानंद बोडसे म्हणाले, ” भ्रष्टाचारी सदैव अस्तित्वात राहतात याला आपणच जबाबदार आहोत. अशावेळेस चोरांच्या विरोधात उभे राहणे गरजेचे आहे. देशात लोकशाही टिकवायची असेल तर मतदातांनी सजग होऊन चिंतन, मनन करून योग्य मतदान करावे. कोणतीही सुधारणा करावयाची असेल तर मतभेद होणे ही गरजेचे आहे.”
बबन पोतदार म्हणाले, ” चोरांची लोकशाही सारखे पुस्तकांची निर्मिती होणे म्हणजे सर्वांना विचार करण्याची वेळ आली आहे. वाढता भ्रष्टाचार हा देशाला पोरखून ठेवणारा आहे. अशावेळेस मतदातांनी जागृत राहून संविधानाचा अभ्यास करावा आणि भ्रष्टाचाराला प्रतिबंध घालावा.”
अनील पाटील म्हणाले,”  देश स्वतंत्र होऊन ७५ वर्षे पूर्ण झालीत परंतू आज ही हा देश बर्‍याच समस्यांनी ग्रस्त आहे. स्वातंत्र्यानंतर कल्याणकारी योजनांचा पाऊस पडला खरे परंतू गरिबी काही संपली नाहीच परंतू भ्रष्ट लोकांमुळे आज लोकशाहीला नुकसान पोहचले आहे. चोरांची लोकशाही हा विषय गेल्या ८वर्षापासून डोक्यात होता. या पुस्तकात संविधान, हक्क आणि कर्तव्य, राजकारणात गुन्हेगारांचा प्रवेश, घराणेशाही, न्यायव्यवस्था, भ्रष्टाचार, प्रसार माध्यमे यांचा उहापोह केलेला आहे.”
सूत्रसंचालन प्रा. अतुल कुलकर्णी यांनी केले. आकाश पाटील यांनी आभार मानले.

पुणे : सावळा गं रामचंद्र… दशरथा घे हे पायसदान…आज मी शापमुक्त जाहलें…या इथे लक्ष्मणा बांध कुटी.. यांसह गीत रामायणातील ५६ गीते एक सलग एकाच दिवशी एकाच मंचावर कलाकारांनी सादर केली. तब्बल आठ तास चाललेल्या स्वरयज्ञात २५ हून  अधिक कलाकारांनी सहभाग घेत सुरेल आवाजात गीते सादर करून रामचरित्राची अनुभूती दिली. शेकडो श्रोत्यांच्या उपस्थितीत भक्तिपूर्ण वातावरणात गीत रामायणाचा आनंद सोहळा रंगला.

हटके म्युझिक ग्रुपच्या वतीने ‘संपूर्ण गीत रामायण’ हा एका दिवसात गीत रामायणातील सर्व ५६ गीते सादर करण्याचा आगळा वेगळा कार्यक्रम सदाशिव पेठेतील भावे प्राथमिक शालेच्या सभागृहात आयोजित  करण्यात आला. कार्यक्रमाच्या उद्घाटनप्रसंगी गदिमा यांच्या सुकन्या प्रियदर्शिनी अंतरकर आणि सुपुत्र आनंद माडगुळकर हे प्रमुख पाहुणे तर हटके ग्रुपचे संस्थापक, कार्यक्रमाचे सादरकर्ते शिरीष कुलकर्णी, सुमेधा कुलकर्णी, माधव धायगुडे यांसह कलाकार उपस्थित होते. दीपप्रज्वलनाने कार्यक्रमाचे उद्घाटन झाले. कार्यक्रमाचे सांगीतिक नियोजन जेष्ठ हार्मोनियम वादक आणि गायक अनिल मोटे यांनी केले होते.

आनंद  माडगूळकर म्हणाले, गीत रामायण हे केवळ मनोरंजन नसून अनेकांंनी ते जीवनात अंगीकारले आहे.  हटके ग्रुपने हाच वसा घेतला आहे व असे अनेक कार्यक्रम व्हावेत, अशा  शुभेच्छा त्यांनी दिल्या. शिरीष कुलकर्णी म्हणाले, हटके ग्रुपचा उद्देश सर्वांना आनंद देणे, नवोदितांना संधी देणे व सांगीतिक व्यावसायिकांना धन-निर्मितीची संधी या  तिन्ही माध्यमातून सफल झाला.

गीतरामायणातील सर्व गीतांच्या सादरीकरणांमध्ये श्रोते रममाण होऊन गेले होते. सीतेच्या तोंडच्या काही तर गीतांच्या सादरीकरणाच्या वेळी  श्रोत्यांचे डोळे पाणावले. नकोस नौके…सेतू बांधा रे सागरी… त्रिवार जयजयकार … अशा काही गीतांच्या  बरोबरीने श्रोतेही गायक म्हणून सहभागी झाले. तर, दशरथा घे हे पायसदान…. हे गीत हार्मोनिका व व्हायोलिन यावर ‘हटके’ प्रकारे सादर झाले आणि श्रोत्यांनी त्याला भरभरून दाद दिली. 
या सुमधुर गीतांच्या सादरीकरणासोबतच डॉ. मुकुंद कोठावदे यांनी प्रत्येेक गीतासाठी काढलेली ५६ रेखाचित्रेही दाखवली. आठ तास चाललेल्या या कार्यक्रमात प्रेक्षक अगदी समरस झालेले होते. गीतांच्या सादरीकरणांमध्ये सह कलाकारांमध्ये मातब्बर आणि अनुभवी साथीदार होते.  चारुशीला गोसावी-व्हायोलिन, मोहन पारसनीस – तबला,  संतोष अत्रे – हार्मोनियम, ओमकार पाटणकर – कीबोर्ड व विशेष म्हणजे तालवादक वसंत देव  ज्यांनी विविध तालवाद्ये एकाच वेळी वाजवून अतिशय सुरेख साथ दिली. सहवादकांनी  हटके ग्रुप चे या शिवधनुष्य उचलण्याचा प्रयत्न, वाखाणण्यासारखा आहे, असे सांगितले. .हा कार्यक्रम “न भूतो न भविष्यती” असा झाल्याचे बऱ्याच प्रेक्षकांनी नमूद केले. असेच नवनवीन कार्यक्रम घेऊन हटके म्युझिक ग्रुप आपल्या समोर येत राहणार आहे, असा मानस शिरीष कुलकर्णी यांनी व्यक्त केला.

पुणे, दि. २१: जिल्ह्यातील चारही मतदारसंघात मतदानाचे प्रमाण वाढावे आणि मतदारांना सुलभपणे तसेच शांततापूर्ण वातावरणात मतदान करता यावे यासाठी अधिकाऱ्यांनी प्रयत्न करावे; त्यादृष्टीने मतदान केंद्रावर आवश्यक सुविधा करण्यासोबत त्याची माहिती मतदारांना द्यावी, असे निर्देश राज्याचे मुख्य निवडणूक अधिकारी एस. चोक्कलिंगम यांनी दिले.

जिल्हाधिकारी कार्यालयात आयोजित निवडणूक विषयक आढावा बैठकीत ते बोलत होते. बैठकीस जिल्हाधिकारी तथा पुणे लोकसभा मतदार संघाचे निवडणूक निर्णय अधिकारी डॉ. सुहास दिवसे, पुणे पोलीस आयुक्त अमितेश कुमार, पिंपरी चिंचवड पोलीस आयुक्त विनय कुमार चौबे, बारामती लोकसभा मतदार संघाच्या निवडणूक निरीक्षक आनंधी पालानीस्वामी, निवडणूक निर्णय अधिकारी कविता द्विवेदी, निवडणूक खर्च निरीक्षक विजय कुमार, निवडणूक पोलीस निरीक्षक जॉएस लाल्लरेमावी, मावळ मतदार संघाचे निवडणूक निर्णय अधिकारी दीपक सिंगला, पोलीस अधीक्षक पंकज देशमुख, शिरुर मतदारसंघाचे निवडणूक निर्णय अधिकारी अजय मोरे आदी उपस्थित होते.

आगामी लोकसभा निवडणुका मुक्त, निर्भय, व पारदर्शक वातावरणात पार पाडण्याच्यादृष्टीने सर्व घटकांनी समन्वयाने काम करावे, असे सांगून श्री. चोक्कलिंगम म्हणाले, एकापेक्षा अधिक मतदान केंद्र असलेल्या ठिकाणी मतदार मदत कक्ष ठेवण्यात यावा. मतदारांना रांगेत उभे राहावे लागू नये यासाठी शक्य असल्यास शहरी भागात प्रतीक्षा कक्षाची सुविधा करावी. उद्योग संस्थांच्या प्रतिनिधींना मतदानाच्या दिवशी कामगारांना मतदानासाठी पगारी रजा देण्याच्या सूचना द्याव्यात.

निवडणूक प्रक्रिया सुरू असताना कोणताही कायदा व सुव्यवस्थेचा प्रश्न निर्माण होणार नाही यावर विशेष लक्ष ठेवावे. कोठेही अशी घटना लक्षात आल्यास वेळीच उपाययोजना करा. मतदान संबंधी सर्व अहवाल वेळेत सादर करावे. वेबकास्टिंगद्वारे नियंत्रण कक्षाच्या माध्यमातून मतदान प्रक्रियेवर लक्ष ठेवावे. सी-व्हिजिलवर प्राप्त तक्रारींचे १०० मिनिटात निवारण करावे. मतदानाच्या वेळी येणाऱ्या अडचणी टाळण्यासाठी मतदान केंद्र पथकाला मतदान आणि ईव्हीएमविषयक सूक्ष्म बाबींचे प्रशिक्षण द्यावे.

निवडणुकीत पैसा, मद्य तसेच इतर कोणत्याही स्वरुपातील आमिषाचे वाटप तसेच बळाचा वापर होऊ नये यासाठी विशेष लक्ष द्यावे. दिव्यांग मतदारांना सुलभपणे मतदान करता यावे यासाठी आवश्यक सुविधा देण्यात याव्यात. समाजमाध्यमाद्वारे चुकीचे संदेश पसरविणाऱ्यांवर पोलिसांनी तात्काळ कारवाई करावी, आदी सूचना त्यांनी दिल्या.

निवडणूक विषयक नियमांचे उल्लंघन कोणत्याही घटकाद्वारे होऊ नये यासाठी पोलीस विभागासोबत सर्व संबंधित विभागांनी दक्ष राहावे. कमी मतदान असलेल्या १० मतदान केंद्रावर लक्ष केंद्रित करून हे प्रमाण वाढविण्यासाठी ग्रामस्तरावरील कर्मचाऱ्यांना विशेष प्रयत्न करण्याच्या सूचना द्याव्यात. मतदार माहिती स्लीप आणि माहिती पत्रकाचे वाटप वेळेवर करावे. मतदानाचे प्रमाण वाढविण्यात महानगरपालिका आणि नगरपालिकांची भूमिका महत्त्वाची असून त्यासाठी आवश्यक प्रयत्न करावे, असेही श्री.चोक्कलिंगम म्हणाले.

पोलीस आयुक्त अमितेशकुमार, श्री.चौबे आणि पोलीस अधीक्षक श्री.देशमुख यांनी पोलीस विभागाने केलेल्या तयारीची माहिती दिली. निवडणुका शांततेत पार पाडण्यासाठी सुरक्षेच्या सर्व उपाययोजना करण्यात आल्या आहेत असे त्यांनी सांगितले.

जिल्हाधिकारी डॉ.दिवसे यांनी सदारीकरणाद्वारे जिल्ह्यातील निवडणूक तयारीची माहिती दिली. पोलीस विभागाच्या सहकार्याने निवडणुकीसाठी सर्व तयारी पूर्ण झाली असल्याचे त्यांनी सांगितले.

मावळ, बारामती आणि शिरूर मतदारसंघाच्या निवडणूक निर्णय अधिकाऱ्यांनीही निवडणूक तयारीची माहिती सादर केली.

बैठकीनंतर मुख्य निवडणूक अधिकाऱ्यांनी भारतीय खाद्य महामंडळाच्या गोदामाला भेट देऊन मतमोजणीसाठी करण्यात आलेल्या नियोजनाची माहिती घेतली.

पिंपरी, पुणे (दि. २१ एप्रिल २०२४)- विशिष्ट शैलीतील ठसकेबाज गायकीसाठी प्रसिध्द असलेले ज्येष्ठ गायक आनंद शिंदे यांच्या लोकगीतांना सांगवीकरांनी उदंड प्रतिसाद दिला.
सांगवीतील फिनिक्स सोशल ऑर्गनायझेशनच्या वतीने छत्रपती शिवाजी महाराज, भारतरत्न डॉ. बाबासाहेब आंबेडकर आणि क्रांतीसुर्य महात्मा जोतीराव फुले यांच्या संयुक्त जयंती महोत्सवाचे आयोजन करण्यात आले होते. त्याअंर्तगत शनिवारी रात्री जुन्या सांगवीतील एकता चौकात आनंद शिंदे यांच्या लोकगीतांचा “जलसा” या संगीतमय कार्यक्रमाचे आयोजन करण्यात आले होते. भाजपचे पिंपरी-चिंचवड शहराध्यक्ष शंकर जगताप, संस्थेचे अध्यक्ष व माजी नगरसेवक संतोष कांबळे, गणेश बँकेचे संचालक संजय जगताप, ऑल इंडिया बॉडी बिल्डींग असोसिएशनचे खजिनदार राजेश सावंत, ज्येष्ठ नागरिक संघाचे अध्यक्ष चंद्रकांत बाराथे, सचिव बाळासाहेब सोनवणे, सामाजिक कार्यकर्ते दिलीप तनपुरे आदी उपस्थित होते. यावेळी परिसरातील नागरिकांची तुडुंब गर्दी झाली होती. शंकर जगताप यांच्या हस्ते आनंद शिंदे यांचा सत्कार करण्यात आला. शाहीरीच्या माध्यमातून जनप्रबोधन करण्याच्या संस्थेच्या उपक्रमाचे जगताप यांनी कौतुक केले.
आनंद शिंदे यांनी या कार्यक्रमात भीमगीते, बुद्धगीतांपासून त्यांची प्रसिध्द असलेली अनेक बहारदार गाणी गायली. प्रेक्षकांकडून त्यांना भरभरून दाद मिळाली. सांगवीकरांच्या रसिकतेचे शिंदे यांनी आवर्जून कौतुक केले. प्रास्ताविक संस्थेचे सचिव योगेश कांबळे यांनी तर रवींद्र यादव यांनी आभार मानले.

यांचे मत; ‘आयसीएमएआय’तर्फे ‘रिजनल प्रॅक्टिशनर्स कॉन्व्हेंशन २०२४’
पुणे : “देशातील विकासकामे करदात्यांच्या पैशांतून होत असतात. त्यामुळे कोणताही प्रकल्प राबविताना त्याचे सूक्ष्म आर्थिक नियोजन व प्रस्तावित खर्चाचा योग्य विनियोग कसा होईल, यावर कॉस्ट अँड मॅनेजमेंट अकाउंटंट (सीएमए) काम करत असतो. विकसित भारताच्या वाटचालीत ‘सीएमए’चे योगदान महत्वपूर्ण आहे,” असे मत राज्यसभा खासदार प्रा. डॉ. मेधा कुलकर्णी यांनी व्यक्त केले. केंद्र सरकारशी संबंधित ‘सीएमए’च्या काही अडचणी असतील, तर त्या सोडविण्यासाठी कटिबद्ध असल्याचेही त्यांनी नमूद केले.

दि इन्स्टिट्यूट ऑफ कॉस्ट अकाउंटंट्स ऑफ इंडियाच्या (आयसीएमएआय) वेस्टर्न इंडिया रिजनल कौन्सिल आणि आयसीएमएआय पुणे चॅप्टरच्या संयुक्त विद्यमाने ‘रिजनल प्रॅक्टिशनर्स कॉन्व्हेंशन २०२४’ व ‘रिजनल लेडी सीएमए कॉन्व्हेंशन २०२४’ कार्यक्रमाचे नुकतेच आयोजन केले होते. ‘लर्न, शेअर अँड नेटवर्किंग इज अ सक्सेस मंत्रा’ आणि ‘विकसित भारताच्या प्रगतीमध्ये महिलांच्या क्षमतांचा लाभ’ अशी या कार्यक्रमाची संकल्पना होती. या अधिवेशनाच्या उद्घाटनावेळी प्रा. डॉ. मेधा कुलकर्णी बोलत होत्या.

कर्वेनगर येथील संस्थेच्या कार्यालयात ‘आयसीएमएआय’चे अध्यक्ष सीएमए अश्विन दलवाडी यांच्या प्रमुख उपस्थित झालेल्या या कार्यक्रमावेळी ‘आयसीएमएआय’च्या केंद्रीय समितीचे सदस्य सीएमए नीरज जोशी, वेस्टर्न इंडिया रिजनल कौन्सिलचे अध्यक्ष सीएमए चैतन्य मोहरीर, उपाध्यक्ष सीएमए अरिंदम गोस्वामी, सचिव सीएमए मिहीर व्यास, खजिनदार नॅन्टी शहा, पुणे चॅप्टरचे अध्यक्ष सीएमए नागेश भागणे, सीएमए डॉ. डी. व्ही. जोशी, सीएमए एम. के. आनंद, सीएमए अमित आपटे, सीएमए डॉ. संजय भार्गवे, सीएमए नीलेश केकाण, सीएमए श्रीकांत इप्पलपल्ली, सीएमए राहुल चिंचोलकर आदी उपस्थित होते.

सीएमए अश्विन दलवाडी म्हणाले, “संसदेच्या कायद्यांतर्गत स्थापित झालेली आयसीएमएआय ही एक प्रोफेशनल संस्था आहे. कॉस्ट अकाउंटन्सीच्या व्यवसायाचा प्रचार, नियमन आणि विकास करण्याचे काम होते. संस्था खर्चाची स्पर्धात्मकता, खर्च व्यवस्थापन, संसाधनांचा कार्यक्षम वापर आणि खर्च लेखाबाबत संरचित दृष्टीकोन याचा पाठपुरावा करते. सीएमए हे कॉस्ट अँड मॅनेजमेंट अकाउंटिंग, फायनान्स, कर, मर्जर अँड अक्विजीशन, तसेच कॉस्ट ऑडिट अँड सर्टिफिकेशन आणि ऑडिट ऑफ कॉस्ट रेकॉर्ड्सच्या क्षेत्रात उद्योग आणि व्यवसायात कार्यरत असतात.”

सीएमए चैतन्य मोहरीर म्हणाले, “विद्यार्थ्यांसाठी सीएमए सर्वोत्तम पदवी असून व्यवसाय व नोकरीमध्ये उत्तम करियर करू शकतात. त्यामुळे सीएमए करणाऱ्या विद्यार्थ्यांची संख्या दिवसेंदिवस वाढत आहे. अधिकाधिक तरुणांनी सीएमएचा अभ्यास समजून घेऊन तयारी करावी. भारताच्या अर्थव्यवस्थेत व विकासात योगदान देण्याची ही नामी संधी आहे.”

सीएमए डॉ. डी. व्ही. जोशी यांचे बीजभाषण झाले. सीएमए नागेश भागणे यांनी स्वागत-प्रास्ताविक केले. सीएमए नीलेश केकाण यांनी सूत्रसंचालन केले. सीएमए नॅन्टी शहा यांनी आभार मानले.