पुणे-करोना पॉझिटिव्ह असलेले अनेक रुग्ण किरकोळ लक्षणे असूनही होम आयसोलेशन मध्ये राहण्याऐवजी भीतीपोटी रुग्णालयात दाखल होत आहेत. त्यामुळे रुग्णालयांमध्ये करोनाबाधितांची गर्दी वाढल्याचे निरीक्षण नोंदविले जात आहे. रुग्णालये अद्याप ‘फुल’ झाली नसली, तरी तसे चित्र निर्माण केले जात असल्याचे महापालिकेच्या आरोग्य विभागाने स्पष्ट केले.
शहरात फेब्रुवारीच्या दुसऱ्या आठवड्यापासून करोनाबाधितांची संख्या वाढत आहे. त्यामुळे सक्रिय रुग्णसंख्येत वाढ होत आहे. त्याशिवाय गंभीर आणि ऑक्सिजनवरील रुग्णांच्या संख्येतही वाढ झाली. त्यामुळे शहरातील रुग्णालयांमध्ये गर्दी होऊ लागल्याचे चित्र दिसू लागले आहे. गंभीर रुग्णांची संख्या कमी असून त्यांना रुग्णालयात दाखल करण्याची गरज असल्याचे सांगण्यात आले.
‘महापालिकेच्या नायडू रुग्णालयात १०० रुग्ण सध्या उपचार घेत आहेत; तर दळवी रुग्णालयात ७५, लायगुडे आणि बोपोडी येथील रुग्णालयात प्रत्येकी ५०; तसेच बाणेर येथील ३२५ बेड्सची सुविधा आहेत. त्यात बाणेरचे रुग्णालय ‘फुल’ झाले आहे. लायगुडे, दळवी आणि बोपोडी रुग्णालयातील बेड भरत आले आहेत. नायडू येथे आणखी बेड वाढविण्याची तयारी केली असून त्यासाठी कर्मचाऱ्यांची मागणी करण्यात आली आहे. रक्षकनगर येथे २०० बेडचे रुग्णालय शुक्रवारी सुरू होईल,’ अशी माहिती महापालिकेच्या आरोग्य विभागाने दिली.
शहरात खासगी रुग्णालयांमध्ये ८० टक्के बेड इतर आजाराच्या रुग्णांसाठी राखीव ठेवले गेले आहेत; तर २० टक्के बेड हे करोनाबाधितांसाठी ठेवले आहेत. त्यात ‘होम आयसोलेशन’ पुरेसे असतानासुद्धा अनेक रुग्ण भीतीपोटी रुग्णालयात दाखल होत असल्याने बेड भरले जात आहेत. परंतु, सध्या रुग्णालयांमध्ये गरजू करोनाबाधित रुग्णांसाठी बेड उपलब्ध होऊ शकतात, असेही आरोग्य अधिकाऱ्यांनी सांगितले.
‘ससून रुग्णालयात ११ मजली इमारतीत ५५० बेडची क्षमता आहे. मात्र, २१० बेड सध्या उपलब्ध केले असून त्यापैकी १८० बेड भरले आहेत. त्यात ४० रुग्ण व्हेंटिलेटरवर आहेत; तर १०० जण ऑक्सिजनवर आहेत. गरज पडल्यास सुमारे तीनशे बेड उपलब्ध करण्यात येतील,’ असे ससून रुग्णालयाच्या सूत्रांनी सांगितले.
शहरात खासगी रुग्णालयांमध्ये करोनाबाधित रुग्ण दाखल आहेत. त्यांची संख्या कमी आहे. परिणामी, सर्वच खासगी रुग्णालयांमध्ये पुरेसे बेड उपलब्ध आहेत. कोणीही बेड नाकारू शकत नाही. सध्या बाधितांना ‘होम आयसोलेशन’ची गरज असून अतिदक्षता विभागाची अत्यल्प गरज असल्याचे दिसते. त्यामुळे खासगी रुग्णालयात बेड रिकामे आहेत.
– बोमी भोट, अध्यक्ष हॉस्पिटल असोसिएशन ऑफ पुणे