पुणे- दिवाळीतील वसूबारसाचा मुहुर्त साधून नारायण पेठेत साहित्य-दर्शन या ग्रंथ दालनाचे उद्घाटन महाराष्ट्र साहित्य परिषदेचे कार्याध्यक्ष प्रा. मिलींद जोशी तसेच प्रसिध्द चित्रकार रविमुकुल यांच्या हस्ते संपन्न झाले. कोणतीही सुटी न घेता यापुढे दरवर्षी चालणार्या या नाविन्यपूर्ण उपक्रमात ग्रंथ दालनातील कोणत्याही पुस्तकावर २५ टक्के सूट जाहीर करण्यात आली आहे.
प्रा. जोशी व रविमुकुल यांच्या हस्ते उद्घाटन ग्रंथदालनातील गणेश व सरस्वतीच्या मूर्तीपूजनाने झाले. या अनौपचारिक सोहळ्यास अक्षरधारा ग‘ंथप्रदर्शनाचे रमेश राठीवडेकर, विश्वकर्मा प्रकाशनाचे विशाल सोनी, वरदा बुक्स प्रकाशन संस्थेचे गौरव भावे, अमोल प्रकाशनाचे संजय काकडे इत्यादी मान्यवर उपस्थित होते.
विक्रेते रविंद्र कासार आणि गणेश लोंढे यांनी सुरु केलेल्या या अभिनव दालनात एक लाख नव्या व जुन्या लेखकांची पुस्तके विक‘ीसाठी उपलब्ध असतील. पुणेकरांमध्ये व विशेषतः नवीन पिढीत मराठी पुस्तकांबद्दल प्रेम व त्याची व्यवस्था असावी तसेच वाचनसंस्कृती खोलवर रुजावी यातून साहित्य-दर्शनची योजना आकारास आल्याचे कासार आणि लोंढे यांनी सांगितले.
साहित्य-दर्शनला शुभेच्छा देताना प्रा. जोशी म्हणाले की, स्मार्ट पुण्यात स्मार्ट वाचक निर्माण होण्यासाठी साहित्य दर्शनसारखी अनेक ग्रंथदालने व्हायला हवीत. त्यातून मराठी लेखकांबरोबर मराठी वाचकही साहित्याभिमुख व्हायला मदत होईल. वाचनसंस्कृतीचा प्रवाह अधिक गतिमान व्हायला साहित्य व्यवहाराशी निगडीत सर्व घटकांशी एकत्र येऊन जाणीवपूर्वक प्रयत्न करायला हवेत. साहित्य-दर्शन ग्रंथदालनाची निर्मिती हा त्याचाच एक स्वागतार्ह भाग आहे.
रविमुकुल यांनी या दालनाला शुभेच्छा देताना सांगितले की, समाजात अन्नाइतकीच पुस्तकांची भूक असते. ती भागवण्याचे काम कासार आणि लोंढे हे तरुण व अनुभवीग्रंथ विक्रेते चांगल्या पध्दतीने करतील, अशी आपली खात्री आहे.