लातूर- मुख्यमंत्री देवेंद्र फडणवीस यांच्या हेलिकॉप्टरचा गुरूवारी लातूरमध्ये अपघात झाला. मात्र, या अपघातामधून ते थोडक्यात बचावले आहेत. लातूर दौऱ्यावर असलेले देवेंद्र फडणवीस गुरुवारी निलंग्याहून मुंबईच्या दिशेने येण्यासाठी निघाले होते. हेलिपॅडची व्यवस्था नसल्यामुळे याठिकाणी असलेल्या एका शाळेच्या मैदानातून हेलिकॉप्टरने आकाशात उड्डाण केले. यावेळी हा अपघात झाला. हेलिकॉप्टर जमिनीवरुन काही उंचीवर असतानाच अचानक खाली कोसळले. सुदैवाने हेलिकॉप्टर खाली असलेल्या मातीच्या ढिगाऱ्यावर येऊन आदळले. उड्डाण केल्यानंतर लाईटच्या तारेला हेलिकॉप्टरचा काही भाग लागल्यामुळे हा अपघात झाला. अपघातापासून १०० मीटर अंतरावर विजेचा ट्रान्सफॉर्मर आहे. हेलिकॉप्टर या ट्रान्सफॉर्मरला धडकले असते तर मोठा अपघात होऊ शकला असता. त्यामुळे मुख्यमंत्री फडणवीस मोठ्या अपघातातून थोडक्यात बचावले आहे.
यावेळी मुख्यमंत्री देवेंद्र फडणवीस यांच्याबरोबर हेलिकॉप्टरमध्ये त्यांचे सचिव प्रवीण परदेशी, स्वीय सहाय्यक अभिमन्यू पवार आणि केतन पाटील हे तिघेहीजण प्रवास करत होते. मात्र, हे सर्वजण सुखरुप आहेत. मुख्यमंत्री देवेंद्र फडणवीस यांनी स्वत:हून ट्विट करुन आपण सुखरुप असल्याची माहिती दिली आहे. मुख्यमंत्र्यांच्या उजव्या हाताला किरकोळ खरचटले आहे. मात्र, डॉक्टरांनी माझी वैद्यकीय तपासणी केली असून माझा रक्तदाब आणि इतर गोष्टी व्यवस्थित आहेत. त्यामुळे काळजी करण्याचे कोणतेही कारण नसल्याचे देवेंद्र फडणवीस यांनी सांगितले आहे.
व्हिडीओ पहा .. फेसबुक पेजवर https://www.facebook.com/MyMarathiNews/