पुणे- ज्या शहरात कोरोना प्रतिबंधक लस बनली तिथेच तिचा तुटवडा भासणे या सारखे दुर्दैव नाही, जगाला देऊ द्यात पण पुण्याला कमी पडू देऊ नका असे आज येथे कॉंग्रेसचे महापालिकेतील ग ट नेते आणि माजी उपमहापौर आबा बागुल यांनी सांगितले . आज त्यांनी त्यांच्या प्रभागात लसीकरण मोहिमेला प्रारंभ केला त्यावेळी ते बोलत होते .
पुणे शहरात कोरोनाचे रुग्ण दिवसेंदिवस वाढत असताना पुणेकरांना कोरोनाचे लसीकरण करणे सोयीचे व्हावे यासाठी शहरात विविध ठिकाणी लसीकरण केंद्र सुरू करण्यात आली असून प्रभागातील नागरिकांसाठी राजीव गांधी अकॅडमी ऑफ ई लर्निंग स्कूल येथे लसीकरण केंद्र सुरू करण्यासाठी पाठपुरावा करून हे केंद्र सुरू करण्यात आले. सदर केंद्रात लसीकरण करणाऱ्या नागरिकांना पुष्प देऊन स्वागत करण्यात येते तसेच निरीक्षण कक्षेत चहा पाण्याची व्यवस्था करण्यात आल्याचे पुणे महानगरपालिकेचे गटनेते आबा बागुल यांनी सांगितले. आज राजीव गांधी अकॅडमी ऑफ ई लर्निंग येथील लसीकरण केंद्राचा शुभारंभ झाला असून यावेळी काँग्रेस पक्षाचे गटनेते आबा बागुल, सहायक आयुक्त प्रज्ञा पोतदार,आरोग्य अधिकारी डॉ विद्या नागमोडे, डॉ पाखले,डीएसआय भालेराव,जयश्रीताई बागुल,अमित बागूल आदी उपस्थित होते.
