पिंपरी । प्रतिनिधी :
पिंपळे गुरव-सांगवी प्रभाग क्र. 29, 31 आणि 32 मधील महापालिकेच्या सर्व सफाई महिला कामगारांचा साडी, मिठाई देऊन; तर पुरुष कामगारांचा संपूर्ण पोशाख देऊन सन्मान करण्यात आला. सोबतीला मिठाईचा गोडवा आणि ’सांज स्वरांची : अभंगवाणी- मंगलगाणी’ या कार्यक्रमाचा आस्वादही कामगारांना घेता आला. यामध्ये आणखी भरीस भर म्हणजे ‘तुझ्यात जीव रंगला’ फेम अभिनेत्री चंदा (दीप्ती सोनावणे)ची सोबत कामगारांसाठी खूपच आनंददायी ठरली.
पिंपळे गुरवमधील नटसम्राट निळू फुले नाट्यग्रहात राष्ट्रवादी काँग्रेसच्यावतीने कचरावेचक कामगारांच्या यथोचित सन्मान सोहळ्याचे, तसेच ‘सांज स्वरांची : अभंगवाणी-मंगलगाणी’ या सांगीतिक कार्यक्रमाचे आयोजन करण्यात आले होते. यावेळी राष्ट्रवादी काँग्रेसचे शहराध्यक्ष संजोग वाघेरे, कार्याध्यक्ष प्रशांत शितोळे, नगरसेवक विठ्ठल उर्फ नाना काटे, स्थायी समितीचे माजी अध्यक्ष अतुल शितोळे, माजी नगरसेविका शोभा आदियाल, ज्येष्ठ सामाजिक कार्यकर्ते विजूअण्णा जगताप, तृप्ती जवळकर आदी उपस्थित होते. कार्यक्रमाचे आयोजन राष्ट्रवादी काँग्रेसचे माजी नगरसेवक राजेंद्र जगताप, राष्ट्रवादी युवक काँग्रेसचे चिंचवड विधानसभा अध्यक्ष श्याम जगताप, अमरसिंग आदियाल, शिवाजी पाडुळे, तानाजी जवळकर, गौरव टण्णू, सामाजिक कार्यकर्ते हुसेन मुलाणी आदींनी केले होते.
‘सांज स्वरांची : अभंगवाणी-मंगलगाणी’ कार्यक्रमाची सुरुवात ‘ओंकार स्वरुपा सद्गुरु समर्था’ या गाण्याने गायक नितीन कदम यांनी केली. या पहिल्याच गाण्याला रसिकांनी उत्स्फूर्त दाद दिली. त्यानंतर गायिका अर्चना सुतार यांनी ‘आली माझ्या घरी ही दिवाळी’ हे गीत गात वातावरण दिवाळीमय करून टाकले. त्याला रसिकांची टाळ्यांची दाद मिळाली. माजी स्वीकृत नगरसेवक शिवाजी पाडुळे यांनी ‘विठ्ठल आवडी’ गात सर्वांनाच अचंबित केले. ‘मनाच्या धुंदीत लहरीत येना’ या गीताला उत्स्फूर्त दाद मिळाली. अवघ्या 12 वर्षे वयाच्या यशश्री निकाळजे या उभरत्या गायिकेने गायलेले ‘दिपावली मनाये सुहानी’ रसिकांची वाहवा मिळवून गेले. तसेच अस्मिता देशमुख हिने गायलेल्या ‘मन बसिया’ या गीतालाही रसिकांनी चांगली दाद दिली. त्यानंतर शिवाजी पाडुळे यांनी गायलेले ‘गं साजनी’ गाण्याने वातावरणात चैतन्य आले. तर पाडुळे यांनी सहगायकाच्या साथीत गायलेल्या ‘राजा सर्जाची हनाम जोडी’ या गाण्याने वन्समोअर मिळवला. ‘माऊली…. माऊली’ आणि ‘साई बाबा आला’ या गाण्यात रसिक तल्लीन झाल्याचे पाहायला मिळाले. एकंदरीत अनेक स्वरांच्या सादरीकरणातून गायकांनी दिवाळीच्या शुभेच्छा दिल्या.
कार्यक्रमाचे सूत्रसंचालन दीपक म्हस्के यांनी केले. तर आभार अमरसिंग आदियाल यांनी मानले.
चंदाने जिंकली रसिकांची मने
‘तुझ्यात जीव रंगला’ फेम अभिनेत्री चंदा (दीप्ती सोनावणे) व्यासपीठावर येताच सर्वांनी टाळ्याच्या कडकडाटात तिचे स्वागत केले. तिनेही त्याला तेवढ्याच उत्स्फूर्तपणे प्रतिसाद दिला. चंदा उर्फ दीप्तीसोबत सेल्फी, फोटो काढण्यासाठी सफाई कामगार महिलांनी एकच गराडा घातला होता. आपले मनोगत व्यक्त करताना दीप्ती यांनी सांगितले, की आपल्या हातून सफाई कामगारांचा सन्मान होत आहे, ही माझ्यासाठी मोलाची गोष्ट आहे. दिवाळीच्या शुभेच्छा दीप्ती म्हणाल्या, गेली दोन वर्षे मालिकेच्या चित्रीकरणाच्या निमित्ताने कोल्हापूरमध्येच असते. त्यामुळे दिवाळीलाही येता आले नव्हते. यंदा मात्र आवर्जून दिवाळीसाठी पुण्यात आपल्या घरी आले आहे. माझे आई-बा, सासू-सासरे, पती यांच्यासोबत यंदाच्या दिवाळीचा आनंद लुटायला मिळतो आहे, ही माझ्यासाठी खूप आनंददायी गोष्ट आहे.
