पुणे : समाजातील मुख्य प्रवाहापासून वंचित राहिलेल्या अनेक समुहांना मतदान कार्ड मिळवून देण्यासाठी भारत निवडणूक आयोगामार्फत स्वीप कार्यक्रमाअंतर्गत विशेष शिबीराचे आयोजन केले जाते. त्याचाच एक भाग असलेल्या 208 वडगांवशेरी विधानसभा मतदार संघामध्ये दि. 22 जानेवारी 2018 रोजी एस.ओ.एस. या अनाथ मुलांच्या बालग्राममध्ये एक आगळया वेगळया कार्यक्रमाचे आयोजन करण्यात आले होते. 18 ते 21 वयोगटाच्या विशेष प्रवर्गातील विद्यार्थ्यांना वंचित समूह शोधून त्यांच्या शिबीराचे आयोजन करुन कागदपत्रांची जुळवा-जुळव करुन, अंतिमत: त्यांना कार्डाचे वाटप करण्यात आले यावेळी त्यांच्या चेहऱ्यावरचा आनंद बघणे ही कामाची पोच पावतीच होती.
पुणे जिल्हयात साजरा होणारा हा पहिला एकमेव कार्यक्रम असून शासकीय कामाबाबत असणारी नागरिकांची उदासीनता अशा वैशिष्टयपूर्ण शिबीरांनी झटकली आहे. या कार्यक्रमात एकूण 45 विद्यार्थ्यांना प्रशस्तीपत्रक व मतदान कार्डाचे वाटप करण्यात आले. यावेळी उपजिल्हा निवडणूक अधिकारी श्रीमती मोनिकासिंग, वडगांव शेरी मतदार संघाचे मतदार नोंदणी अधिकारी ज्ञानेश्वर मोळक, तहसिलदार तथा सहाय्यक मतदार नोंदणी अधिकारी अर्चना यादव, एस.ओ.एस.संस्थेचे झोनल डायरेक्टर एन.के.लोकश, व्हिलेज प्रमुख टी.कोठरेश, निवडणूक नायब तहसिलदार शुभांगी जाधव आदि उपस्थित होते.
रंगीत मतदान कार्डासोबत प्रशस्तीपत्रक घेताना शासनाची ही सेवा आमच्या घरापर्यंत येत असल्याचा आनंद आपल्या मनोगतामधून बालग्राम मधील विद्यार्थी, विद्यार्थीनींनी यावेळी व्यक्त केला, असे संजय गांधी योजनेचे तहसिलदार यांनी प्रसिध्दीपत्रकान्वये कळविले आहे.
