पुणे : जिल्हा वार्षिक योजनेमधून अनुसूचित जाती उपयोजनेंतर्गत (विशेष घटक योजना) अनुसूचित जातीच्या लाभार्थ्यांच्या शेतावर मृद व जलसंधारणाचे विविध उपचार राबविण्यासाठी पुणे जिल्हयास दोन कोटी रुपये निधी मंजूर झाला असून अनुसूचीत जातीमधील शेतकऱ्यांना उत्पनांचे इतर कायम स्वरुपी साधन नसते, त्यांचे संपूर्ण क्षेत्र सिंचनाखाली आणण्यासाठीच्या मर्यादा लक्षात घेता त्यांच्या कृषी उत्पन्नात वाढ वाढ करण्यासाठी पाणलोट विकास कार्यक्रम राबविण्यात येत आहे.
अनुसूचित जातीच्या शेतकऱ्यांच्या उत्पन्नात वाढ करुन त्यांचे राहणीमान सुधारणे व त्यांचे स्थलांतर रोखने यासाठी ही योजना 100 टक्के अनुदानावर राबविण्यात येत आहे. या योजनेंतर्गत अनुसूचित जातीचे लाभार्थींची संमती घेऊन त्यांची वैयक्तीक क्षेत्रावर मृद व जलसंधारणाचे पुढील प्रमाणे उपचार घेण्यात येतात. सलग समतल चर, कंपार्टमेंट बंडिंग, अनघड दगडी बांध, शेततळे, मजगी, जुने भात शेती दुरुस्ती, इत्यादी व सामुहीक स्वरुपाचे माती नाला बांध, सिमेंट नाला बांध, इत्यादी उपचार घेण्यात येतात.
या योजनेंतर्गत लाभ घेण्यासाठी अनुसूचित जातीचा दाखला,7/12 उतारा व 8 अ चा उतारा इत्यादी कागदपत्र देणे आवश्यक आहे. या योजनेंतर्गत लाभ घेऊ इच्छित असलेल्या शेतकऱ्यांनी कृषी विभागाच्या तालुका कृषी अधिकारी, मंडल कृषी अधिकारी, कृषी पर्यवेक्षक,कृषी सहाय्यक, तसेच उपविभागीय कृषी अधिकारी यांच्याशी संपर्क साधावा, असे आवाहन जिल्हा अधिक्षक कृषी अधिकारी यांनी केले आहे.