पुणे : कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे दत्तजयंतीनिमित्त शनिवार, दिनांक १८ डिसेंबर रोजी पहाटे ६ पासून मंदिर खुले राहणार असून संपूर्ण दिवसभर विविध कार्यक्रमांचे आयोजन करण्यात आले आहे. दत्तजयंतीनिमित्त दत्तजन्म सोहळा, महाआरती आणि मोजक्या विश्वस्त व पदाधिका-यांची उपस्थितीत पायी नगरप्रदक्षिणा होणार आहे. दत्तमंदिराला विविधरंगी फुलांची आरास व विद्युतरोषणाई करण्यात आली आहे.
शनिवारी सकाळी ६ वाजता ट्रस्टचे खजिनदार राजू बलकवडे, हेमलता बलकवडे यांच्या हस्ते लघुरुद्र, त्यानंतर सहाय्यक धर्मादाय आयुक्त प्रशांत चव्हाण व वर्षा चव्हाण, ट्रस्टचे उत्सवप्रमुख अक्षय हलवाई, दीपक पोकळे व विद्या पोकळे यांच्या हस्ते श्री दत्तयाग होईल. दुपारी १२.३० वाजता प्रोग्रेसिव्ह एज्युकेशन सोसायटीचे अध्यक्ष डॉ.गजानन एकबोटे, नगरसेविका ज्योत्स्ना एकबोटे, डॉ.डी.वाय.पाटील अभिमत विद्यापीठ पुणेचे कुलपती डॉ.पी.डी.पाटील, प्र-कुलगुरु भाग्यश्री पाटील यांसह विविध क्षेत्रातील मान्यवरांच्या हस्ते माध्यान्य आरती होणार आहे.
दत्तजन्म सोहळ्याच्या मुख्य कार्यक्रमात राष्ट्रीय कीर्तनकार ह.भ.प.चारुदत्तबुवा आफळे यांचे दत्तजन्म कीर्तन सायंकाळी ५ वाजता असून सायंकाळी ६ वाजता दत्तजन्म सोहळा पार पडेल. त्यानंतर पालखी नगरप्रदक्षिणेऐवजी विश्वस्त व पदाधिका-यांच्या उपस्थितीत पायी नगरप्रदक्षिणा होणार आहे. उत्सव आरती रात्री ८ वाजता महाराष्ट्राच्या तुरुंग सुधारसेवा विभागाचे महानिरीक्षक अतिरिक्त पोलीस महासंचालक अतुलचंद्र कुलकर्णी व अश्विनी कुलकर्णी यांच्या हस्ते होणार आहे.
दत्तमंदिर ट्रस्टचे यंदा १२४ वे वर्ष आहे. तसेच भाविकांच्या स्वहस्ते अभिषेकाची सुविधा सकाळी ७ ते सायंकाळी ५ पर्यंत उत्सव मंडपात करण्यात आली आहे. कोविड प्रतिबंधक अनुरूप व्यवहाराच्या शासकीय नियमावलीनुसार मुखपट्टी अनिवार्य असेल. उत्सव मंडपाचे निर्जंतुकीकरण, अभ्यागतांचे प्रवेशद्वारावर तापमान मापन, इ. कार्यप्रणालीची काटेकोर अंमलबजावणी करण्यात येईल.