क्रेडाई पुणे-मेट्रोच्या कार्यशाळेत जीएसटीवर सेवाकर अधिकाऱ्यांचे मार्गदर्शन

पुणे– ‘जीएसटी‘चा आढावा आणि जीएसटी मायग्रेशन यावरील संवादात्मक कार्यशाळेचे आयोजन नुकतेच क्रेडाई–पुणे मेट्रोच्या सभागृहात  करण्यात आले होते. यावेळी क्रेडाई–पुणे मेट्रोचे २४७  सदस्य व त्यांचे प्रतिनिधी उपस्थित होते. या कार्यशाळेत सेवा कर आयुक्त श्री. एन. श्रीधर आणि सेवा कर उपायुक्त  के. रामाराव यांनी उपस्थितांना मार्गदर्शन केले.

क्रेडाई–पुणे मेट्रोचे संयुक्त चिटणीस  अतुल गोयल यांनी माननीय सेवा कर आयुक्त  एन. श्रीधर यांचे स्वागत आणि सत्कार केला यावेळी  एन. श्रीधर यांनी जीएसटीचे महत्त्व विशद केले आणि सर्वांना ‘जीएसटी‘ अंतर्गत नोंदणी करण्याचे आवाहन केले. सेवा कर आयुक्त कार्यालय, वाडिया कॉलेज,  येथे ६ ते ९ एप्रिल पर्यंत १० ते ६ यावेळेत जीएसटी मायग्रेशन मेळाव्याचे आयोजन केले असल्याचेही त्यांनी पुढे सांगितले. सर्व सेवा करदात्यांनी जीएसटीकडे जाण्यासाठी हा मेळावा आयोजित केला आहे. या मेळाव्यात जागेवर नोंदणी करण्याची सोय उपलब्ध करून देण्यात आली आहे. प्राधिकृत व्यक्तीच्या ईमेल व मोबाइलद्वारे येथे नोंदणी करता येईल. सर्वांनी या मेळाव्याचा लाभ घ्यावा, असे आवाहन त्यांनी केले.

के. रामाराव यांनी उदाहरण देऊन  मायग्रेशन प्रक्रिया विशद केली आणि प्रत्येकाला जीएसटी (वस्तू आणि सेवा कर) हा विषय उलगडून सांगितला. जीएसटी नोंदणी प्रक्रिया त्यांनी विशद करून सांगितली. तसेच, के रामाराव यांनी जीएसटीची कार्यप्रणाली समजावून सांगितली. सदस्य व त्यांच्या प्रतिनिधींच्या शंकांचे निरसन  श्री. के. रामाराव यांनी केले.

जीएसटी मायग्रेशनबाबत क्रेडाई–पुणे मेट्रोचे सदस्य आणि त्यांच्या प्रतिनिधींचे मार्गदर्शन केल्याबद्दल डॉ. डी. के. अभ्यंकर यांनी सेवा कर अधिकाऱ्यांचे आभार मानले. उपस्थितांनी आपले प्रश्न क्रेडाई–पुणे मेट्रो सचिवालयाला पाठवावेत, ते संकलित करून सेवा कर विभागाकडे पाठवले जातील, अशी विनंती त्यांनी केली. सदस्य आणि त्यांच्या प्रतिनिधींचेही त्यांनी आभार मानले.