पुणे -नोटाबंदीच्या निर्णयामुळे नागरिकांना होत असलेल्या त्रासाच्या विरोधात शहरातील विविध चौकात अंदोलन करण्यात आले. केंद्र सरकारच्या निर्णयाला ६१ दिवस उलटून देखील अर्थव्यवस्था ठप्प आाहे. बँका बाहेरील गर्दी कमी होत नाही. सरकारच्या चुकीमुळे जनसामान्यांना झालेल्या त्रासाच्या विरोधात एनएसयूआई व सेवादलाच्यावतीने नरपतगिरी चौक, स्टेशन येथे आंदोलन करण्यात आले. काँग्रेस महिला आघाडीच्या वतीने बोहरी आळी चौकात आंदोलन करण्यात आले. पुणे युवा काँग्रेसच्यावतीने अलका टॉकीज येथे आंदोलन करण्यात आले. यावेळी मोठय़ा प्रमाणात काँग्रेसचे कार्यकर्ते उपस्थित होते. मोदी सरकारच्या नोटाबंदीच्याविरोधात यावेळी मोठय़ा प्रमाणात घोषणाबाजी करण्यात आली.
यावेळी शहराध्यक्ष रमेश बागवे, माजी सहकारमंत्री हर्षवर्धन पाटील, काँग्रेस युवक प्रदेशाध्यक्ष विश्वजित कदम, संगीता तिवारी, चंद्रकांत दायमा, अरविंद शिंदे, कमाल व्यवहारे ,रवींद्र म्हसकर, भूषण रानभरे, गोपाळ तिवारी, अविनाश बागवे, सोनाली मारणे यांच्यासह अन्य कार्यकर्ते उपस्थित होते.
काँग्रेसचे शहराध्यक्ष रमेश बागवे म्हणाले की, निवडणुकीत मोदी सरकारने प्रति महिन्याला २ कोटी रोजगार निर्माण करण्याचे आश्वासन दिले होते. मात्र, नोटाबंदीच्या निर्णयामुळे देशात १५ कोटी कामगार बेरोजगार झाले आहेत. देशात आर्थिक आणिबाणीचे सावट असल्याचेही त्यांनी यावेळी सांगितले.