विद्यापीठे आणि विद्यमान सरकार याविषयावरील व्याख्यान
सेवा, कर्तव्य, त्याग सप्ताह
पुणे : देशातील प्रत्येक क्षेत्रासह शिक्षणक्षेत्र आणि विद्यापीठांमध्ये देखील वरवरची लोकशाहीपूर्ण आणि व्यक्तीस्वातंत्र्य असल्याचा आभास निर्माण केला जात आहे. प्रत्यक्षात याविरोधी परिस्थिती असून आपल्याला विरोध होऊ नये, अशा प्रकारचे वातावरण सताधारी पक्ष तयार करीत आहे. केवळ पक्ष, विचारधारा आणि संघपरिवाराशी संबंधित म्हणून शिक्षणक्षेत्रात गेल्या ३ वर्षांमध्ये पुरेशी गुणवत्ता नसलेल्यांना पदे दिली गेली आहेत. भाजपच्या अशा राजकीय हस्तक्षेपामुळे विद्यापीठे ही राजकारणाचे रणांगण बनत चालले असून ही परिस्थिती बदलण्याकरीता विद्यार्थ्यांनी आवाज उठवायला हवा, असे मत शिक्षण क्षेत्रातील अभ्यासक प्रा.श्रीरंजन आवटे यांने व्यक्त केले.
कॉंग्रेस अध्यक्षा आदरणीय श्रीमती सोनियाजी गांधी यांच्या वाढदिवसानिमित्त आयोजित सेवा, कर्तव्य, त्याग सप्ताहात पत्रकार भवन येथे विद्यापीठे आणि विद्यमान सरकार – शैक्षणिक स्वायत्ततेला धोक्यात आणणारी निती याविषयावरील व्याख्यानाचे आयोजन करण्यात आले. यावेळी सप्ताहाचे मुख्य संयोजक माजी आमदार मोहन जोशी, चंद्रशेखर कपोते, आयुब पठाण, किशोर मारणे, अॅड.शाबीर खान आदी उपस्थित होते.
प्रा.श्रीरंजन आवटे म्हणाले, जेव्हा शिक्षणाचा दर्जा खालावतो, शिक्षक व विद्यार्थी कोलमडतात, तेव्हा राष्ट्र संपते. गेल्या ३ वर्षात भाजप-सेनेचे सरकार आल्यानंतर अनेकांना राजीनामा देण्यास भाग पाडल्याच्या घटना घडल्या आहेत. गुणवत्तेची कदर नसलेला सत्ताधारी पक्ष असून उच्चशिक्षणाची व्यवस्था कोलमडण्यास केवळ सरकारच कारणीभूत आहे. कॉंग्रेसच्या काळातील लोक गुणवत्तापूर्ण तरी होते. आता मात्र, विद्यापीठांतील वातावरण भितीचे, संतापाचे करण्याचा जाणीवपूर्वक प्रयत्न केला जात आहे. जेएनयु सारखी अनेक उदाहरणे आपल्यासमोर आहेत. त्यामुळे शिक्षणाचे भगवीकरण थांबविण्यास विद्यार्थी संघटना पुढे यायला हव्या.
मोहन जोशी म्हणाले, भाजप-सेना सत्तेत आल्यानंतर युती शासनाने शिक्षण क्षेत्रात अनेक बदल केले. या बदलांमध्ये नियोजनाची कमतरता आणि परिणामांची पूर्वकल्पना केलेली नव्हती. त्यामुळे शिक्षण पद्धतीचा बोजवारा उडाल्याचे दिसून येत आहे. मुंबई विद्यापीठातील परीक्षा निकालात झालेला गोंधळ ही राज्यातील शिक्षण परंपरेची बदनामी करणारी घटना आहे, असेही त्यांनी सांगितले. यशराज पारखी यांनी सूत्रसंचालन केले. प्रशांत वेलणकर यांनी आभार मानले.
