पुणे – ब्राह्मण संघाने आज सकाळी पुणे महापालिकेच्या आवारात दादोजी कोंडदेव यांची प्रतिमा बसवून त्याचे पूजन केले. त्यावेळी कार्यक्रमस्थळी धाव घेत संभाजी ब्रिगेडच्या कार्यकर्त्यांनी निषेध व्यक्त केला. या सर्व वादानंतर ती प्रतिमा हटवण्यात आली.
आज ७ मार्च दादोजी कोंडदेव यांची पुण्यतिथी आहे. त्या निमित्ताने ब्राम्हण महासंघाच्या वतीने आज सकाळी दादोजी कोंडदेव यांची प्रतिमा बसवून तिचे पूजन करण्यात आले. संभाजी ब्रिगेडच्या कार्यकर्त्यांना याची माहिती मिळताच त्यांनी कार्यक्रमस्थळी धाव घेतली आणि दादोजी कोंडदेव यांची प्रतिमा त्वरित हटविण्यात यावी, अशी मागणी केली. तसेच या कार्यकर्त्यांनी ब्राम्हण महासंघाच्या कार्यकर्त्यांशी वाद घालण्याचा प्रयत्न केला.
संभाजी ब्रिगेडच्या मागणी व वादविवादानंतर अखेर संघाचे शहराध्यक्ष आनंद दवे यांनी ही प्रतिमा काढून घेतली. केवळ दादोजी कोंडदेवांचा पुतळा बसविण्याची प्रशासनाला आठवण करून देण्यासाठी आम्ही पालिकेच्या आवारात प्रतिमा बसवली, असे त्यांनी स्पष्ट केले. त्यामुळे कायदा सुव्यवस्थेचा प्रश्न निर्माण न होता पुढील वाद टळला.