पुणे: शिवप्रतिष्ठानचे संस्थापक संभाजीराव भिडे यांचे 7 तारखेला मुंबईत परळ येथे भाषण होणार आहे. मात्र कोरेगाव भीमा दंगलीमुळे आणि त्यानंतर आ. जिग्नेश मेवानी यांच्या भाषणाला परवानगी न देता छात्रभारती च्या मुलांची उचलबांगडी करणारे पोलिस भिडे गुरुजींच्याच अटकेची मागणी होत असताना त्यांच्या भाषणाला परवानगी देणार कां, याविषयी साशंकता आहे.
पूर्वनियोजित कार्यक्रमानुसार हे भाषण होणार आहे. छत्रपती शिवरायांचे बत्तीस मण वजनाचे सोन्याचे सिंहासन पुन्हा उभे करण्याचा शिवप्रतिष्ठान या संघटनेचा संकल्प आहे. त्यासंदर्भात करण्यात येणाऱ्या जनजागृतीसाठी भिडे यांचे भाषण होणार आहेत. त्याचबरोबर त्यांच्या संस्थेमार्फत राबविल्या जाणाऱ्या राज्यातील गडकोड मोहिमेबद्दलही ते बोलणार आहेत.
दरम्यान, सद्या राज्यभर तणाव असलेल्या भीमा कोरेगाव दंगल प्रकरणात त्यांच्यावर गुन्हा नोंदविण्यात आला आहे. पुरोगामी संघटनांकडून भिडेंचा निषेध करण्यात येत आहे. या संघटनांकडून या कार्यक्रमात गोंधळ होऊ शकतो. त्यामुळे पोलिस कार्यक्रमाला परवानगी देतात कां, हे पाहवे लागणार आहे.